“Hi mu kumile Messia”!

Loku ku hunzile xipimo xa 400 wa malembe anzhako ka kutsaliwa ka mabhuku ya Biblia lawa ma tsalilweko hi xiHeberu, a xiprofeto xa Mika xungetano hi Messia xi lo tatiseka: Jesu i lo pswaliwa le Betlehema. Anzhako ka xipimo xa 30 wa malembe, hi 29 Nguveni ya Hina, ku lo tatiseka a xipanze xo sangula xa xiprofeto xa Danieli xungetano hi Messia. Jesu i lo bapatizwa zonake Nungungulu a mu tota hi moya wa ku basa. Messia, a Pswalo, loyi a nga rinzelwe hi xikhati xo leha, i lo chikela hi xikhati xa kona!

Jesu i lo tekela ku sangula a ntiro wakwe, a “tlhatlhambutela ivangeli ya mufumo wa Nungungulu.” (Luka 8:1) Khwatsi hi lezi zi nga profetilwe, Jesu i lo kombisa wunene, a tlhela a khatalela vanwani. A tigonzo takwe ti wa kombisa liranzo niku ti wa vuna. I tlhelile a hanyisa vanhu va nga hi ni “tixaka tontlhe ta mababyi,” hi ndlela leyo a komba lezaku Nungungulu i wa hi zinwe naye. (Mateu 4:23) A vanhu vo tala va titanga tontlhe va waya ka Jesu, va tlhela va wula na va nga kanakani vaku: “Hi mu kumile Messia”! — Johani 1:41.

Jesu i profetile lezaku na ku kiyela xikhatanyana kasi ku a Mufumo wakwe wu sangula ku fumela zilo zontlhe, lomu tikweni ku wa tava ni tiyimpi, kutsekatseka ka misava, ni zikarato zinwani zo tsalangana. I lo kuca vontlhe aku: “Rinzelani!” — Marku 13:37.

Jesu i wa hi munhu wo mbhelela loyi xikhati xontlhe a nga ingisa Nungungulu, kanilezi i’ve ni valala lava va nga gumesa hi ku mu daya. A kufa kakwe ku’ve ntsengo lowu wu nga laveka kasi hi tlheliselwa lezi Adamu na Eva va nga zi luza — ku nga wutomi ga pinzukelwa Paradiseni.

A kufa ka Jesu ni kuvuxiwa kakwe hi ka vafileko kota xivangwa xa moya xa ntamu anzhako ka masiku manharu ku’ve kutatiseka ka ziprofeto. Anzhako ka kuva a vukile hi ka vafileko, Jesu i lo woneka ka 500 wa vapizani ni ku hunza. Na a nga se tlakukela tilweni, Jesu i rumile vapizani vakwe lezaku va xumayela mahungu yo saseka xungetano hi yena ni Mufumo wakwe ka vanhu va “matiko wontlhe.” (Mateu 28:19) Xana va tatisile khwatsi a xiavelo xabye ke?

 — Ma seketelwe ka Mateu, Marku, Luka, Johani, 1 Va Le Korinte.