Ziwutiso zinharu zi cicileko wutomi ga mina

KALE KA MINA:

Nzi kulele le Ancram, xi nga xidoropana xa le kule nguvu xa Nova York, Estados Unidos. A xidoropana lexo xi wa tele nguvu hi matshamu ya ku senga masi. Hi lisine, xi wa hi ni tihomu to tala ku hunza vanhu.

A ngango wa hina wu waya ka chechi yinwe yi nga hi kona laha doropeni. Hi tiSonto ni mixo, papai i wa polidja a zilato za mina, zonake nziya ka Escola Dominical ni Biblia ga mina ga gi tsongwani legi kokwani wa xisati wa ku pswala papai a nga nzi nyikile. Mina ni vamakabye va mina va vambiri hi wa gonzisilwe ku tira hi kutikarata, ku kombisa xichawo ni ku vuna vaakelani va hina, ni ku bonga lezi hi nga nazo.

Laha nzi nga kula, nzi lo suka laha kaya zonake nzi ya tira kota mugonzisi. Nzi wa hi ni ziwutiso zo tala xungetano hi Nungungulu ni wutomi. A zigonzani zo kari zi wa tiva nguvu. A zinwani zi wa nga tivi nguvu, kanilezi zi wa ti karata nguvu. A zokari zi wa hi zilema, kanilezi a zinwani zi wa nga hi zilema. Nzi lo alakanya lezaku lezo xihlawulela. Ka zikhati zinwani a vapswali va zigonzani lezi zi nga kala zi nga tivi nguvu va wa wula zilo zo fana ni lezi: “Hi zezi Nungungulu a lavako lezaku a n’wana wa mina a tshamisa zona.” Nzi wa ti wutisa lezaku hikuyini Nungungulu a tsikako zivanana zo kari zi pswaliwa na zi hi zilema ke. Hakuva hi lisine, a xinwanana a xi se maha nchumu xa kubiha.

Nzi lo tlhela nzi ti wutisa lezi: ‘Zilo muni za lisima nzi nga wa ta zi maha wutomini ga mina?’ Nzi lo wona lezaku a wutomi ga mina gi komile. Nzi kulele ka ngango wo ganya, nziya ka xikola xa xi nene, niku zezi nzi wa hi ni ntiro nzi nga wu ranza. Kanilezi, nzi wa nga hi na litsako wutomini ga mina. A xa chukwana nzi nga rinzela ku xi maha, ku wa hi ku chada, nziva ni muti wa wu nene ni vana vo kari, nzi tlhela nzi simama ku tira kala nzi reformara, zonake nziya ka muti wo hlayisa vakhosaheleko. Nzi lo ti wutisa lezaku xana ku wa hi ni xinwani xo hunza lezo wutomini ke.

LEZI A BIBLIA GI NGA CICISA ZONA A WUTOMI GA MINA:

Ka ximumu xo kari, nzi lo enza zinwe ni vagonzisi-kulori hiya le Europa. Hi loya le Abadia de Westminster, Notre-Dame de Paris, ni ka vaVaticano, zinwe ni ka tichechi to tala ti nga tivekiko nguvu. Ni ka gihi wutshamu nzi ngaya ka gona, nzi wa maha ziwutiso za mina. Anzhako ka kuva nzi tlhelile kaya le Sloatsburg, a Nova York, nzi lo enzela tichechi to tala. Kanilezi, i hava a nzi nyikileko mihlamulo yo nzi tsakisa.

Ka siku go kari, a xigonzani xa 12 wa malembe xi lo nzi tshinelela, xi nzi maha ziwutiso zinharu. A xo sangula, xi lo nzi wutisa ku nzi wa zi tiva a ku yena i Mboni ya Jehova ke. Nzi lo mu hlamula ku ina. Ka xa wumbiri, i lo nzi wutisa lezaku nza zi lava ku tiva zotala hi Timboni ta Jehova ke. Nzi lo mu hlamula kambe nziku ina. A xa wunharu, i lo nzi wutisa ku nzi tshama kwihi ke. A xikhati nzi nga mu byela a makhero ya mina, hi lo pola lezaku hi wa hi vaakelane. Ne nzi wa nga zi tivi ku a ziwutiso lezo za zinharu nzi mahilweko hi nhanyana gayani zi wa ta cica wutomi ga mina kala kupinzuka.

Xikhatanyana nzhako ka lezo, i lota hi bhasikeni wakwe laha kaya ka mina, zonake hi sangula a xigonzo xa Biblia. Nzi lo mu maha a ziwutiso lezi nzi nga wutisile a varangeli vo tala va wukhongeli. A kuhambana navo, yena i lo nzi komba a mihlamulo yo zwisiseka ni yo tsakisa lomu ka Biblia ga mina — ya ku cima nzi wa nga se yi wona!

Lezi nzi zi gonzileko lomu ka Biblia zi lo nzi nehela litsako la hombe. Nzi lo khumbiwa nguvu mbilu a xikhati lexi nzi nga gonza a bhuku ga 1 Johani 5:19 legi gi nge: “A tiko gontlhe gi le ntanwini wa loyi wa kubiha.” Nzi lo chavelelwa hi ku tiva lezaku a kuxaniseka kontlhe loku hi ku wonako a hi Nungungulu a ku vangako, kanilezi hi Satani — ni lezaku Nungungulu i ta hi tlhatlhisa ka zilo lezo. (Kuvululelwa 21:3, 4) Nzi lo pola lezaku a Biblia ga zwisiseka loku gi tlhamuselwa khwatsi. Hambu lezi a Mboni leyi yi nga gonza na mina yi nga hi ni 12 wa malembe ntsena, nzi lo ehleketa lezaku a lisine lisine, na ku nga khataliseki ku li wuliwa hi munhu wa tshamela muni.

Hambulezo, nzi wa lava ku wona lezaku xana a Timboni ta Jehova ta hanya hi lezi ti zi xumayelako ke. Hi xikombiso, a nhanyana loye i wa khanyisa lezaku a maKristu ya lisine ma kombisa a matshamela yo kota lihlaza-mbilu ni wunene. (Va Le Galatia 5:22, 23) Nzi lo boha ku mu ringa kasi ku wona ku xana yena wutsumbu wa kombisa a matshamela lawo ke. Ka siku go kari, nzi lo celwa ha womu ka xigonzo xa mina. Nzi lo ti wutisa lezi: ‘Xana i ta nzi rinzela? Niku loku a nzi rinzela, xana i ta kwata hi kuva nzi celwe?’ Laha nzi nga huma hi lomu ndlwini, nzi lo mu wona na a nzi rinzele laha nyangweni ya muti wa mina. I lo tsutsuma ata laha moveni wa mina a taku: “Nzi wa lava ku tlhela kaya nzi ya byela mamani lezaku hi fanele ku vitana a vadokodela ni maphoyisa, kasi ku wona a ku wa HANYA KHWATSI ke, hakuva a wu se tshuka u celwa ka xigonzo xa wena. Nzi lo karateka nguvu hi wena!”

Ka khati ginwani, nzi lo mu maha xiwutiso nzi nga alakanya lezaku xa karata kasi a nwanana wa 12 wa malembe a hlamula. Nzi wa lava ku wona lezaku xana i ta tsamba a hlamulo wo kari ke. A xikhati nzi nga mu maha xiwutiso lexo, i lo nzi cuwuka hi kukhatala ka hombe, aku: “A xiwutiso lexi xa karata. Nza ha xi tsala, kasi nzi ya wutisa a vapswali va mina.” Kunene, ka siku a ngata kambe kasi hi simama ni xigonzo xa hina, i lota ni revista A Murinzeli gi nga hi ni hlamulo wa xiwutiso xa mina. Lezo zi lo nzi tshineta nguvu ka Timboni ta Jehova — hakuva a mabhuku yabye ma seketelwako lomu ka Biblia ma lo hlamula a ziwutiso za mina zontlhe. Nzi lo simama ku gonza ni xinhanyatana lexo, niku anzhako ka lembe ginwe nzi lo bapatizwa nzi maha Mboni ya Jehova.a

LEZI NZI NGA VUNEKISA ZONA:

A xikhati lexi nzi nga kuma a mihlamulo yo tsakisa ya ziwutiso za mina, nzi lo lava ku bhulela vontlhe a mihlamulo leyo. (Mateu 12:35) Kusanguleni, a maxaka ya mina ma lo kaneta a kukholwa ka mina ka kuswa. Hambulezo, hi ku famba ka xikhati va lo cica mawonela yabye. Ka malembe yo gumesa ya wutomi gakwe, mamani i lo sangula ku gonza a Biblia. Hambu lezi a nga kala ku hanya a xikhati xo ringana a kuza a bapatizwa, nza tiyiseka lezaku i wa ti mahele a xiboho xa ku tirela Jehova.

Hi 1978, nzi lo chada ni Mboni yi nga vitwa ku hi Elias Kazan. Hi 1981, mina na Elias hi lo rambiwa lezaku hiva ziro za ngango wa Beteli wa le Estados Unidos.b Lexi xi nga tsakisiko, hi lezaku anzhako ka kuva hi tirile a mune wa malembe, Elias i lofa. Hambu lezi nzi nga hi noni, nzi lo simama xiavelweni xa mina Beteli, lezo zi lo nzi maha nzi veka kupima ka mina ka zilo zo kari, zi tlhela zi nzi nehela chavelelo wa hombe.

Hi 2006, nzi lo chada na Richard Eldred, loyi yenawu a nga xiro xa ngango wa Beteli. Mina na Richard hi simama ku tsakela a lungelo ga ku tira Beteli. Hi ku tiva lisine xungetano hi Nungungulu, nzi tizwa na nzi nga kumangi a mihlamulo leyi nzi nga yi hlota ntsena, kanilezi nzi tlhela nzi tizwa na nzi tivile lexi nzi hanyelako xona — niku zontlhe lezo zi sukele ka ziwutiso zinharu nzi mahilweko hi xinhanyatana.