Himani a mukaneti wa Kristu?
A filmi go kari ga ku tshisa nguvu ga ha hi ku humesiwako gi na ni hloko ya mhaka yi nge Mukaneti wa Kristu (hi xiNgiza).
Ka yinwe ya tialbu ta wona a ntlawa wo kari wa vayimbeleli va ndhuma wu lo tsala lezi: Muyimbeleli wa hombe wa Mukaneti wa Kristu (hi xiNgiza).
Friedrich Nietzsche, a tlhari ya filozofia ya zana ga malembe ga wu 19, i lo chula ginwe ga mabhuku yakwe lezaku Mukaneti wa Kristu (hi xiNgiza).
Lomu ka malembe ya va 476 kala 1500 Mahlweni ka Nguva ya Hina a tihosi ti wa tolovela ku vitana valala va tona lezaku vakaneti va Kristu.
Martin Luther, a nga hi murangeli wa kucica a tigonzo ta wukhongeli le Alemanya, i lo vitana a vapapa va Katolika va le Roma lezaku vakaneti va Kristu.
KOTA lezi a magezu “mukaneti wa Kristu” ma sinako ma tirisiwa hi malembe yo tala kasi ku chula zilo zo hambanahambana kusukela ka tihosi kuya ka mafilmi, za zwala a kuva hi wutisa lezi: Himani a mukaneti wa Kristu? Xana a magezu lawa ma na ni lisima ka hina inyamutlha? A wutshamu ga gi nene ga ku sangula hi kona a ku hlota hlamulo wa lezaku himani a mukaneti wa Kristu, hi lomu ka Biblia, ku nga lomu a magezu lawa ma kumbukiwako ntlhanu wa makhati.
KUPALUXIWA KA MUKANETI WA KRISTU
A mutsali wa Biblia a kumbukako a magezu “mukaneti wa Kristu” hi mupostoli Johani. Himani a mukaneti wa Kristu hi kuya hi mupostoli Johani? Wona lezi a wulako ka papilo gakwe go ranga: “Vana vanga, makunu xikhati xo gumesa; kota lezi mu nga zizwa lezaku wata Mukaneti wa Kristu, hambu ni lezi va kona vanyingi vakaneti va Kristu; hi kota ya lezo ha zi tiva lezaku xikhati xo gumesa. Va humele xikari ka hina, kanilezi va wa nga hi va hina . . . Himani Muhembi, loku ku nga hi yena loyi a kanetako lezaku Jesu hi Kristu ke? A mukaneti wa Kristu hi yena loyi a kanetako Dadani ni N’wana.” — 1 Johani 2:18, 19, 22.
Hi kuya hi mupostoli Johani, vontlhe lava va nga hangalasa mawunwa ya wukhongeli ha womu xungetano hi Jesu Kristu ni tigonzo takwe va wa hi mukaneti wa Kristu
Hi gonza yini hi magezu lawa? Johani i wulawulile hi ‘vakaneti vanyingi va Kristu,’ na a komba lezaku a mukaneti wa Kristu a hi munhu munwe, kanilezi i ntlawa wa vanhu. A tihlengeletano kutani vanhu va wumbako a mukaneti wa Kristu va hangalasa mawunwa, va nga vumeli lezaku Jesu hi Kristu kutani Messia, va tlhela va zama ku fihla a wuxaka gi nga kona xikari ka Nungungulu ni N’wana wakwe, Jesu Kristu. Lava va wumbako a xipanze xa mukaneti wa Kristu va ti maha vona Kristu kutani vayimeli vakwe, kanilezi kota lezi ‘va humeleko xikari ka hina,’ zi komba ku va lo tsika a tigonzo ta lisine ta Biblia. Tlhatakumbiri, a ntlawa lowo wu wa hi kona a xikhati lexi Johani a nga tsala a papilo gakwe, ka “xikhati xo gumesa,” kuzilava kugumeseni ka xikhati xa vapostoli.
Zini zinwani lezi Johani a tsalileko xungetano hi mukaneti wa Kristu? Na a wulawula hi vaprofeti va mawunwa, i lo tlharihisa lezi: “Yontlhelele mimoya leyi yi wulako lezaku Jesu Kristu i tile nyameni nja Nungungulu; kanilezi a mimoya yontlhe leyi yi nga vumeliko a kuta ka Jesu nyameni a hi ya Nungungulu. Hi wona moya wa Mukaneti wa Kristu, lowu mu wu zwileko ku ngalo wata; makunu wu laha tikweni.” (1 Johani 4:2, 3) Zonake ka papilo gakwe ga wumbiri, Johani i lo tlhela a phinda magezu lawa: A “vakhohlisi vanyingi va humele vaya tikweni, lava va nga vumeliko lezaku Jesu Kristu i tile nyameni. Hi yena mukanganyisi tlhelo Mukaneti wa Kristu.” (2 Johani 7) Zi te dlunya lezaku hi kuya hi vontlhe lava va nga hangalasa mawunwa ya wukhongeli ha womu xungetano hi Jesu Kristu ni tigonzo takwe va wa hi mukaneti wa Kristu.
“VAPROFETI VA MAWUNWA” NI “MUNHU WA KUONHA”
Jesu i tlharihisile lezaku a vaprofeti va mawunwa va wa tata kota ‘timhisi ti ambeleko mabhebhe ya tiyivu’
Xikhatini xa kale nguvu Johani na a nga se tsala hi vakanganyisi lavo va vakhongeli, Jesu i wa tlharihisile a valanzeli vakwe aku: “Chavani a vaprofeti va mawunwa, lava va tako ka nwina na va ambele a tinguwo ta tiyivu, kanilezi timbilwini tabye va hi timhisi leti ti pamako.” (Mateu 7:15) Mupostoli Paule yenawu i tlharihisile a maKristu ya le Tesalonika aku: “Mu nga kanganyiswi hi munhu ha nchumu; hakuva a kuranga ku tava kona a wuhluwuki, ku wonekeliswa a munhu wa kulwa ni nayo, a nga n’wana wa kulovisa.” — 2 Va Le Tesalonika 2:3, NM.
Hikwalaho, ka zana ga malembe go sangula, a vaprofeti va mawunwa ni vahluwuki va wa sangulile ku tira, na va zama ku gi mbheta ntamu a bandla ga wuKristu. Vontlhe lava va nga kari va tirisa wukhongeli kasi ku khohlisa vanhu va tlhela va hangalasa mawunwa xungetano hi Jesu Kristu ni tigonzo takwe, va wa patsiwa laha ka magezu ya Johani yaku ‘Mukaneti wa Kristu.’ Lezi Jehova a va wonisako zona zi wonekile khwatsi ka magezu ya Paule laha a nga va vitana ku i “n’wana wa kulovisa.”
TI WONELE A MITIRO YA MUKANETI WA KRISTU INYAMUTLHA
Ahati inyamutlha ke? A tihlengeletano ni vanhu va wumbako mukaneti wa Kristu va ha simama ku kaneta Kristu ni tigonzo takwe. Va hangalasa mawunwa ha womu ni ku khohlisa vanhu na va lava lezaku va nga tivi a kuhambana ku nga kona xikari ka Dadani — ku nga Jehova Nungungulu — ni N’wana wakwe, Jesu Kristu. Hi na ni xigelo xo zwala xa kuva hi ti wonela a mawunwa lawo ya wukhongeli. A hi wone a zikombiso zimbiri.
Hi malembe yo tala, a tichechi ti hangalasa a gonzo ya vanharu-munwe, va wula lezaku Dadani ni N’wana munhu yaloyi wa munwe. Hi ndlela leyo, a mukaneti wa Kristu i maha lezaku Jehova na Jesu va nga tiveki a ku hi vamani. A mawunwa lawa, ma maha lezaku a vanhu va timbilu ti nene va nga mu pimanyisi Jesu Kristu va tlhela va nga tshineli ka Nungungulu, ku nga lezi a Biblia gi va kucako ku zi maha. — 1 Va Le Korinte 11:1; Jakobe 4:8.
A tichechi ti engetela ku va djudja kupima a vanhu hi ku tirisa maBiblia ma kalako ma nga hi na vito ga Nungungulu, Jehova. Va maha lezo hambu lezi a vito ga Jehova gi kumekako hi xipimo xa 7.000 wa makhati lomu ka mitsalo yo sangula ya Biblia. Zini zi humelelako hi kota ya lezo? A vanhu va simama va hi munyameni, va nga mu tivi Nungungulu wa lisine.
Hi tlhelo ginwani, a ku tiva vito ga Nungungulu, Jehova, zi vuna vakhozeli va timbilu ti nene lezaku va tshinela ka Nungungulu. Lezo zi humelele Richard, loyi a alakanyako a mabhulo a vileko nawo ni Timboni timbiri ta Jehova. I ngalo: “Va lo nzi komba lomu ka Biblia lezaku a vito ga Nungungulu wa lisine hi Jehova. Nzi lo hlamala nguvu hi ku tiva lezaku Nungungulu i na ni vito. Lezo nzi wa nga se tshuka nzi zizwa.” Kusukela kwalaho, Richard i lo cica mahanyela yakwe, a hanya hi kuyelana ni matshinya ya milayo ya Biblia kasi a tsakisa Jehova. I engeta aku: “A ku tiva vito ga Nungungulu zi nzi vunile kuva ni wunghana ga hombe naye.”
Hi mazana ya malembe, a mukaneti wa Kristu i simama ku veka vanhu va talela ga cima munyameni hi tlhelo ga moya. Kanilezi, hi ku gonza a Mhaka ya Nungungulu, a Biblia, hi nga zi tiva a ku himani a mukaneti wa Kristu hi tlhela hi tlhatlhiswa ka mawunwa ya wukhongeli ni kukhohlisa ka mukaneti wa Kristu. — Johani 17:17.