Kwadro Ga Ziwutiso

◼ Xana Za Fanela A Ku Maha Mukhongelo Ka Xigonzo Xa Biblia Xi Mahiwako Nyangweni Ya Muti?

A ku sangula ni ku gumesa a xigonzo xa Biblia hi mukhongelo zi neha mabhinzu yo tala. Loku hi khongela, hi kombela a moya wa ku basa wa Jehova lezaku wu hi vuna xigonzweni xa hina. (Luka 11:​13) A mukhongelo kambe wu byela a xigonzani xa hina lezaku a xigonzo xakwe xa Biblia a hi mhaka ya kuhlakana, wu tlhela wu mu gonzisa a ku khongela. (Luka 6:​40) Hikwalaho, zi nene ku sangula a ku khongela xigonzweni ka masiku yo sangula. Hambulezo, kota lezi a ziyimo zi hambanahambanako, a mufambisi wa xigonzo i fanele ku tirisa wutlhari loku a lava ku boha ku khongela kutani ku nga khongeli ka xigonzo xa Biblia xi mahiwako nyangweni ya muti.

A xinwe xa zilo za lisima xi faneleko ku alakanyelwa wutshamu legi a xigonzo xi mahelwako kona. Loku ku nga hunzahunzi nguvu vanhu, ku nga mahiwa mukhongelo wo koma kasi ku sangula ni ku gumesa a xigonzo xi tiyileko. Kanilezi loku ku hi ku a ku maha lezo zi ta koka kupima ka vahunzi ni vanwani va nga kusuhani kutani a xigonzani xi nga tizwi khwatsi, i chukwana a ku rinzela kala a xigonzo xi mahiwa ka wutshamu legi mu to kala mu nga woniwi nguvu hi vanhu. Hambu loku a xigonzo xi fambisiwa ni ka gihi wutshamu, hi fanele ku tirisa wutlhari loku hi lava ku sangula a ku khongela xigonzweni. — Wona a Nosso Ministério do Reino, ga Março wa 2005, phajina 8.