Engetela wutlhari ga wena wutirelini — Nyika wukustumunyu xipanzeni xa mabhinzu

Kota lezi a vanhu vo tala va mbhetako xikhati xo leha mitirweni, a ndlela ya chukwana yo va chiketisela a mahungu ya Mufumo ku va xumayela lomu va tirako kona. A ku xumayela ka xipanze xa mabhinzu zi nga tsakisa nguvu zi tlhela zi bhinzula, hakuva a hi tshuki hi vumala vanhu niku a vatiri va tolovela ku amukela khwatsi a vanhu va va wonisako ku khwatsi vaxavi. Kasi va humelela khwatsi, a vahuweleli va fanele ku tirisa wukheta va tlhela va va xikombiso xi nene ka maambalela ni kutisasekisa. (2 Kor. 6:3) Hikwalaho, a muwoneleli wa ntiro i fanele ku wonelela khwatsi lezaku a zipanze za mabhinzu zi tiriwa kungani, niku zi tiriwa hi vamani.

Mamahela ya kona:

• Longisela xingheniso xo koma. Loku hi mbheta xikhati xo leha na hi bhula ni muxavisi, hi nga ta ha nyikwa lungelo ga ku bhula naye xikhati xi tako.

• Va enzele hi xikhati lexi va kalako va nga khomekangi nguvu, xo kota xikhati lexi va vululako hi xona.

• Ti karatele ku ranga hi ku wulawula ni loyi a rangelako. Kombisa liranzo ni xinghana. U nga ha wula lezi: “Hi enzela vanhu mitirweni yabye hi xikhati xi tsongwani hakuva za karata ku va kuma mitini yabye.” Maha xingheniso xo koma, u guma u mu nyika xiphephana, marevista, kutani bhuku ginwani. Kasi va nga alakanyi lezaku hi vamahi va mabhinzu, i chukwana hi nga kumbuki a lulamiselo ga minyikelo ahandle ka loku va wutisa lezi a ntiro wa hina wu seketeliswako zona.

• Loku loyi a rangelako a kombisa xinghana, kombela ku bhulanyana ni vatiri vanwani. Ka matshamu yo kari, zi ngava zi nene ku wutisa lezaku u nga siya mabhuku ka wutshamu legi va humulako ka gona ke.

• Tirisa wukheta, u tlhela u tiva ku ti zwananisa ni xiyimo. Hi xikombiso, loku a mutiri a kari a bhula ni munhu kutani a khomekile, rinzela kala a mbheta hi kona u to mu tshinelela.

Ka hweti leyi, ringisa lezi:

• Ka Wukhozeli ga nwina ga Ngango gi lanzelako, vuxetani xingheniso xo koma lexi mu nga xi tirisako loku mu kombelwa ku ya tira ka xipanze xa mabhinzu.