U longile ‘kuga a tshomba ya misava’ ke?

HONTLHENI hi zvi lava nguvhu a ku zvi wona na zvi maheka lezvi Jesu a nga tsumbisa, zvaku: “Va katekile lava vo olova hakuva va taga a tshomba ya misava.” (Mat. 5:5) A vatotilweko va taga tshomba ya misava hi ku fuma na Jesu kota tihosi le tilweni. (Kuv. 5:10; 20:6) A kutala ka maKristu ya lisine nyamutlha ma zvi rindzela hi mahlo yo pswhuka a kuga tshomba ya misava ni ku hanya ka yona kala kupindzuka na va mbhelele, na va hi ni kurula ni litsako. Kasi lezvo zvi koteka, va tava ni mitiro ya lisima nguvhu. Wona leyi ya yinharu: Va ta vhunetela ku cica misava yiva paradhise, ku khatalela lava va to vhuxiwa hi ka vafileko ni ku va gondzisa. Ahandle ka lezvo, wona lezvi u nga mahako hambu zvezvi kasi ku komba lezvaku wa zvi lava ku hlengela ka mitiro leyo misaveni yiswa.

U LONGILE KU CICA MISAVA YIVA PARADHISE?

A cikhati leci Jehovha a nga byela vanhu lezvaku va ‘tata misava, va yi fumela’ i kombile lezvaku a misava yontlhe yi wa ta gumesa hi kuva paradhise. (Gen. 1:28) A cileletelo leco ci rindzela lava va toga tshomba ya misava. Kusanguleni a misava yi nga ta ngha yi hi paradhise, hakuva a jardhim ya Edheni a ya ha hi kona. Zvalezvi va to swe, ku tava ni ntiro wa kulela ga cima wa ku basisa a matshamu lawa zvezvi ma wonhiwako. Ku ta tiriwa ku ku phum!

Lezvo zvi hi alakanyisa a ntiro lowu a vaIzrayeli va ngava nawo a cikhati va nga huma hi le Bhabhuloni. Ku wa hundza a cipimo ca 70 wa malembe a tiko gabye na gi hi rumbi. Kanilezvi Isaya i wa phrofetile lezvaku va wa ta zvi kota ku gi vhuxa hi ku vhuniwa hi Jehovha. A ciphrofeto leco ci wa wula lezvi: ‘A ciwula cakwe i ta ci maha ci fanana ni Edheni, ni mapanya yakwe ma ta fanana ni simu ga Jehovha.’ (Isa. 51:3) A vaIzrayeli va no gi vhuxa futsi. Ni lava va toga tshomba ya misava va ta zvi kota ku cica misava yiva paradhise hi ku vhuniwa hi Jehovha. Ku na ni zvilo zvaku hambu zvezvi u nga maha kasi ku komba lezvaku wa zvi lava ku maha ntiro lowo.

A cin’we ca zvona ku maha zvontlhe u zvi kotako kasi ku basisa muti wa wena ni lomu timbhirini u tlhela u veketela khwatsi a zvilo zva wena zvi nga mahi vhilinganya. U nga maha lezvo, hambu loku a vaakelani va wena va nga khatali hi zvona. Ahandle ka lezvo, u nga vhunetela ku basisa a Salawu ya Mufumo ni ya Mitlhangano ya Hombe. Loku a ciyimo ca wena ci vhumela, u nga tlhela u rumela petisawu ga ku tira lomu ka ku lamulela timhango lomu cipandzeni ca n’wina. Lezvo zvi ta komba ku u longile ku vhuna van’wani loku zvi laveka. Ti wutise lezvi: ‘A ku ndzi nga gondza ntiro wo kari wa ku ndzi nga maha loku ndzi kuma thomo ga kuga tshomba ya misava?’

I ntlawa wa vamakabye va basisako ni ku hlayisa a Salawu ya Mufumo.

U LONGILE KU KHATALELA LAVA VA TO VHUXIWA HI KA VAFILEKO?

Zvalezvi Jesu a nga vhuxa a nhanyana wa Jairo, i no tekela ku mu nyikeni zvakuga. (Mar. 5:42, 43) Zvi wonekisa ku khwatsi a zvi karatangi a ku khatalela a nhanyana loye wa 12 wa malembe. Hambulezvo, hi nga alakanyela a ntiro wu tova kona a cikhati leci Jesu a to tatisa lezvi a nga tsumbisa, zva ku ‘vontlhe lava va nga zvilahleni vazwa gezu gakwe va huma.’ (Joh. 5:28, 29) Hambu lezvi a Bhibhiliya gi kalako gi nga tlhamuseli zvotala, kuzvilava lava va to vhuxiwa zvi ta lava ku va vhuniwa ku kuma zvakuga, wutshamu go hanya kona ni tinguwo. Xana hambu zvezvi u nga zvi kombisa lezvaku u lava ku tshama na u longile ku va vhuna? Ku na ni zviwutiso zvo kari u nga ehleketako.

Zvini u nga mahako zvezvi kasi ku komba lezvaku u longile kuga tshomba ya misava?

Vamakabye va tsakile va nga aeroporto va hoyozelako a vamakabye va tako ka gotsovanyano wa matiko manyingi le Paris.

Loku hi tivisiwa ku hi ta endzelwa hi muwoneleli wa cipandze laha bandleni, ndza ti nyikela kasi ku mu nyika zvakuga? Loku a malandza ya ntiro wa cikhati contlhe wo hlawuleka ma nyima ku tira Bheteli ma avelwa ku ya tira sin’wini, kutani loku a muwoneleli wa cipandze ci mbhela ciavelo cakwe, ndzi nga va vhuna ku kuma ko tshama kona? Loku ku hi ni gotsovanyano wa muganga kutani wo hlawuleka lomu cipandzeni ca hina, ndzi nga ti hendleleta kasi ndzi tira mahlweni ni ndzhako ka wona, kutani kasi ku amukela vapfhumba?

U LONGILE KU GONDZISA LAVA VA TO VHUXIWA HI KA VAFILEKO?

Hi kuya hi lezvi zvi wuliwako ka Mitiro 24:15, hi rindzela lezvaku ku vhuxiwa vanhu va talela ga cima. A kutala kabye hi lava va ngafa na va nga vangi ni lungelo ga ku tiva Jehovha. Va tava ni lungelo lego a cikhati leci va to vhuxiwa.a A malandza yo tsumbeka ni ya ku buvha ya Nungungulu, ma ta gondzisa a vanhu lavo. (Isa. 11:9) Charlotte, loyi a chumayeleko le Europa, ni América do Sul ni Afrika, i ci rindzela hi mahlo yo pswhuka a cikhati leco. I wula lezvi na a tsakile: “Ndzi zvi lava nguvhu a ku gondzisa lava va to vhuxiwa. Loku ndzi gondza matimu ya wokari a hanyileko cikhatini ci nga hundza, ndzi tolovela ku alakanya lezvi: ‘Loku a munhu loyi i wa no tiva Jehovha, a wutomi gakwe na gi nga tshamisangi lezvi.’ Ndzi zvi rindzela hi mahlo yo pswhuka a ku gondzisa vanhu va tiva Jehovha ni ku va vhuna ku tiva lezvaku a wutomi gabye gi tava gi nene nguvhu loku va hlawula ku mu tirela.”

Hambu a malandza yo tsumbeka ya Jehovha lawa ma ngafa Jesu na a nga seta laha misaveni, zvi ta lava ku ma gondzisiwa zvotala. Hi nga alakanyela lezvi zvi to tsakisisa zvona ni thomo legi hi tova nago ga ku tlhamusela Dhaniyeli lezvi zvi nga tatisekisa zvona a zviphrofeto lezvi a nga tsala na a nga zvi zwisisi! (Dan. 12:8) Hi nga alakanyela kambe lezvi zvi to tsakisisa zvona a ku tlhamusela Rute na Nawomi lezvaku a pswalo wabye wu patsile na Mesiya! Hakunene, li tava litsako la hombe nguvhu a ku hinawu hi maha ntiro lowo wu to mahiwa misaveni yontlhe, na hi nga colopetelwi ne na hi nga karatiwi hi tiko legi go biha!

Makabye a nyikelako a ciphephana ka wasati wo kari a nga le kuhlazweni.

Zvini u nga mahako zvezvi kasi ku komba lezvaku u lava ku chikela seyo na u longile ku maha ntiro lowo? A yin’we ya tindlela to dlunyateka ku ti karatela ku chukwatisa magondzisela ya wena ni ku maha ntiro lowu wu mahiwako misaveni yontlhe inyamutlha. (Mat. 24:14) Hambu loku u nga mahi lezvi u nga zvi xuva hi kota ya tanga kutani zviyimo zvin’wani, a kutikarata ka wena ku nga komba lezvi u longisileko zvona kasi ku gondzisa lava va to vhuxiwa hi ka vafileko.

A ciwutiso ca lisima nguvhu hi leci: Wa zvi lava hakunene a kuga tshomba ya misava ke? Wa zvi dokolokela nguvhu a ku cica misava yiva paradhise, ku khatalela ni ku gondzisa lava va to vhuxiwa hi ka vafileko? U nga komba lezvaku u longile hi ku nyamutlha u londzowota ku maha mitiro yo fana ni leyi zvi to lava ku u maha a cikhati u toga tshomba ya misava!

a Wona ndzima “Va ta ‘kokela vanyingi kululameni’” ka Murindzeli wa Setembro wa 2022.