Jehovha i hi tiyisekisa lezvaku i ta cica misava yiva paradhise

1. Ma wa hi wahi mahungu ya muprofeti Isaya ka vaIzrayeli-kuloni?

MUPROFETI Isaya i tlhamusele Jehovha kota “Nungungulu wa lisine”. A gezu gi hundzuluselweko ku “lisine” hi ku kongoma gi wula ku “amen”. (Isa. 65:16) A gezu “amen” gi wula ku “a zvive tano” kutani ku “hakunene”. Loku a gezu “amen” gi tirisiwa lomu ka Bhibhiliya na gi yelana na Jehovha kutani Jesu, citiyisekiso ca lezvaku a nchumu wo kari lisine. Hikwalaho, a mahungu ya Isaya ka vaIzrayeli ma wa hi lawa yaku: Ni cihi Jehovha a wulako, contlhe cikhati ci ta maheka. Jehovha i zvi kombisile lezvaku a magezu lawa lisine hi ku tatisa zvitsumbiso zvakwe contlhe cikhati.

2. Hikuyini hi nga tsumbako a zvitsumbiso zva Jehovha xungetano hi wumandziko ga hina, niku zviwutiso muni hi to zvi kambisisa?

² A ku hinawu hi nga tsumba lezvaku a zvitsumbiso zva Jehovha xungetano hi wumandziko zvi ta tatiseka? Kwalomu ka 800 wa malembe andzhako ka masikwini ya Isaya, mupostoli Pawule i tlhamusele a ku hikuyini hi nga tiyisekako lezvaku a zvitsumbiso zva Nungungulu contlhe cikhati zvi ta tatiseka. Pawule i te: ‘Nungungulu a nga zvi koti ku hemba’. (Mah. 6:18) A ku khwatsi cibuka ca mati ci kalako ci nga zvi koti ku humesa mati ya ku nandziha ni mati ya munyu, hizvalezvo, Jehovha, a Cibuka ca lisine, a nga zvi koti ku hemba. Hikwalaho, hi nga tsumba hi kumbhelela lezvi Jehovha a wulako, a ku patsa ni zvitsumbiso zvakwe zvontlhe xungetano hi wumandziko ga hina. Ka ndzima leyi, hi ta kambisisa zviwutiso lezvi: Zvini lezvi Jehovha a nga tsumbisa ku hi nyika cikhatini ci tako? Niku Jehovha i hi tiyisekisa kuyini lezvaku a citsumbiso cakwe ci ta tatiseka?

ZVINI LEZVI JEHOVHA A TSUMBISILEKO?

3. a) Citsumbiso muni ci tsakelwako nguvhu hi malandza ya Nungungulu? (Kuvhululelwa 21:3, 4) b) A vokari va hlamulisa kuyini loku hi bhula navo hi citsumbiso leci?

³ A citsumbiso hi to bhula hi cona ci tsakelwa nguvhu hi malandza ya Nungungulu misaveni yontlhe. (Lera Kuvhululelwa 21:3, 4.) Jehovha i tsumbisa ku ku tava ni cikhati leci ku to kala ku nga hi na “kufa, hambu ni hlomulo, kutani kurila, ni kubayisa”. A kutala ka hina ha lera a mavhesi lawa kasi ku tiyisa a vanhu lava hi va chumayelako ni ku va komba lezvi a wutomi gi to tshamisa zvona cikhatini ci tako. A vanhu vo kari va hlamulisa kuyini laha hi va bhulelako a citsumbiso leci? Kuzvilava va wula lezvi: “A zvilo lezvi zva tsakisa nguvhu, kanilezvi a ndzi kholwi lezvaku zvi ta maheka.”

4. a) Zvini Jehovha a nga zvi tiva ku zvi wa ta humelela masikwini ya hina laha a nga maha citsumbiso ca Paradhise? b) Ahandle ka ku maha citsumbiso, zvini zvin’wani Jehovha a mahako?

⁴ Kunene, a cikhati leci Jehovha a nga pimisela mupostoli Johani lezvaku a tsala citsumbiso leci xungetano hi Paradhise, i wa zvi tiva ku hina nyamutlha hi wa ta bhulela van’wani a kutsumba loku laha hi chumayelako a mahungu ya Mufumo. Jehovha i rangile a wula ku a votala va wa ta wona citsumbiso leci ca zvilo ‘zva zviswa’ na ci karata ku ci kholwa. (Isa. 42:9; 60:2; 2 Kor. 4:3, 4) Makunu, hi nga va tiyisekisa kuyini van’wani — a ku patsa na hina — lezvaku a makatekwa ma nga ka Kuvhululelwa 21:3, 4 ma ta tatiseka? Jehovha a nga no maha citsumbiso leci co tsakisa basi, kanilezvi i tlhelile a hi nyika ni zvigelo zvo zwala zva ku tsumba citsumbiso leci. Zvigelo muni a hi nyikileko?

JEHOVHA I HI TIYISEKISA LEZVAKU A CITSUMBISO CAKWE CI TA TATISEKA

5. Mavhesi muni ma hi nyikako zvigelo zva ku tsumba citsumbiso ca Nungungulu, niku zvini ma wulako?

⁵ Hi kuma zvigelo zva ku tsumba citsumbiso ca Jehovha hi Paradhise ka mavhesi ma landzelako. Ka wona hi lera lezvi: “Loyi a tshamileko citshan’wini ca wuhosi i te ngalo: ‘Hi nga wona! Ndzi maha zvilo zvontlhe zviva zviswa.’ A tlhela aku: ‘Tsala hakuva a timhaka leti ti tsumbekile niku lisine.’ I no engeta aku ka mina: ‘Zvi mbhelile! Hi mina Alfa na Omega, a masangulo ni magumo. Ni wihi loyi a zwako tora ndzi ta mu nyika kunwa mati ya cibuka ca mati ya wutomi mahala.’” — Kuv. 21:5, 6a.

6. Hikuyini a zvitiyisekiso zvi nga ka Kuvhululelwa 21:5, 6 zvi tiyisako a kutsumba ka hina ka citsumbiso ca Nungungulu?

⁶ Hikuyini a cipandze leci ca Bhibhiliya ci tiyisako kutsumba ka hina ka zvitsumbiso zva Nungungulu? A bhuku Revelação — Seu Grandioso Clímax Está Próximo! gi wula lezvi xungetano hi mavhesi lawa: “Lezvi Jehovha a mahako zvi nga fananisiwa ni ku sinara a phepha gi hi tiyisekisako ku i ta tatisa citsumbiso cakwe.”b A citsumbiso ca Nungungulu ci tsalilwe ka Kuvhululelwa 21:3, 4. Kanilezvi ka mavhesi 5 ni 6, hi kuma sinatura ya Jehovha, leyi yi tiyisekisako lezvaku a citsumbiso cakwe ci ta tatiseka. A hi kambisiseni khwatsi a magezu lawa Jehovha a ma tirisako kasi ku hi tiyisekisa lezvaku hi nga mu tsumba.

7. Himani a sangulako ku wulawula ka vhesi 5 ga Kuvhululelwa, niku hikuyini lezvo zvi nga zva lisima?

⁷ A citiyisekiso ca Nungungulu ci sangula hi magezu lawa: “Loyi a tshamileko citshan’wini ca wuhosi i te ngalo.” (Kuv. 21:5a) A magezu lawa ya lisima hakuva legi i khati go sangula ka makhati lawa ya manharu laha Jehovha wutsumbu a wulawulako ka bhuku ga Kuvhululelwa. Hikwalaho, a citiyisekiso leci a citi hi ka ngilozi, ne a citi hi ka Jesu, kanilezvi cita hi ka Jehovha wutsumbu! Lezvo zvi komba lezvaku hi nga zvi tsumba hi kumbhelela lezvi zvi landzelako. Hikuyini hi wulako lezvo? Hakuva Jehovha i “Nungungulu loyi a nga hembiko.” (Tit. 1:2) A magezu ma nga ka Kuvhululelwa 21:5, 6 handle ko kanakana ma ta tatiseka.

“HI NGA WONA! NDZI MAHA ZVILO ZVONTLHE ZVIVA ZVISWA.”

8. Zvini lezvi Jehovha a wulako kasi ku khanyisa lezvaku a citsumbiso cakwe ci ta tatiseka? (Isaya 46:10)

⁸ Zvezvi a hi bhuleni hi gezu “Hi nga wona!” (Kuv. 21:5) A gezu ga ciGreki gi hundzuluselwako ku “hi nga wona!” gi tirisiwa hi kuphindaphinda lomu ka bhuku ga Kuvhululelwa. A bhuku go kari gi wula lezvaku a magezu lawa ma tirisiwa kota “a ndlela ya ku byela muleri kasi a veka kupima ka lezvi zvi landzelako.” Zvini lezvi Nungungulu a wulako hi ku landzela? Nungungulu i te: “Ndzi maha zvilo zvontlhe zviva zviswa.” Hi lisine, Jehovha i wulawula hi kucica cikhatini ci tako. Kanilezvi hi kota ya lezvi a tiyisekako lezvaku i ta tatisa a citsumbiso cakwe, i wula lezvaku i kari a maha a kucica loko. — Lera Isaya 46:10.

9. a) A magezu “Ndzi maha zvilo zvontlhe zviva zviswa” ma wula zvilo muni zva zvimbiri lezvi Jehovha a mahako? b) Zvini zvi to humelela “matilo” ni “misava” lezvi zvi nga kona?

⁹ A hi kambisiseni a fraze yi landzelako yi kumekako ka Kuvhululelwa 21:5, ma ge: “Ndzi maha zvilo zvontlhe zviva zviswa.” Ka cipimo leci ca Bhibhiliya, ku wuliwa zvilo zvimbiri lezvi Jehovha a mahako. Co sangula, Jehovha i ta lovisa a tiko legi go biha. Ca wumbiri, I ta tisa a tiko giswa. Ka Kuvhululelwa 21:1, hi lera lezvi: “A tilo ga kale ni misava ya kale zvi wa hundzile”. “A tilo ga kale” ku wuliwa a mifumo ya politika yi kucetelwako hi Sathani ni madhimoni yakwe. (Mat. 4:8, 9; 1 Joh. 5:19) A gezu “misava” gi tirisiwako lomu ka Bhibhiliya, ku nga ha wuliwa a vanhu lava va hanyako ka yona. (Gen. 11:1; Lis. 96:1) Hikwalaho, “a misava ya kale” inyamutlha ku wuliwa a hlengeletano ya vanhu vakubiha. Jehovha a nga ta gamela laha ka ku chukwatisa kutani ku lulamisa a “tilo” ni “misava” lezvi zvi nga kona; wutshan’wini ga lezvo, i ta zvi lovisa zvi ku bhi. I ta vhaleta a tilo ni misava lezvi zvi nga kona zvezvi hi “tilo giswa ni misava yiswa” — ku nga, mufumo wuswa ni hlengeletano yiswa ya vanhu vo lulama.

10. Zvini Jehovha a to zvi maha zviva zviswa?

¹⁰ Hi kulandzela, ka Kuvhululelwa 21:5, hi wona lezvi Jehovha a wulako xungetano hi zvilo lezvi a to zvi maha zviva zviswa. Wona ku Jehovha a nga wuli ku: “Ndzi maha zvilo zviswa zvontlhe.” Wutshan’wini ga lezvo, i wula lezvi: “Ndzi maha zvilo zvontlhe zviva zviswa.” Jehovha i ta maha misava yi ku khwatsi yiswa ni vanhu va ku khwatsi vaswa, hi ku va tlhelisela ka ciyimo co sangula, vava vo mbhelela. Jehovha i ta maha misava yontlhe yiva wutshamu go saseka a ku khwatsi i jardhim ya Edheni. Niku i ta hi maha hiva vaswa hi ku chuma mun’we ni mun’wani wa hina hi kumbhelela. A zvilima, ni zvikhumu, ni lava vofa tindleve va ta hanyisiwa, niku hambu lava va fileko va ta vhuxiwa va hanya. — Isa. 25:8; 35:1-7.

“A TIMHAKA LETI TI TSUMBEKILE NIKU LISINE. . . . ZVI MBHELILE!”

11. Zvini lezvi Jehovha a nga byela Johani lezvaku a maha, niku cigelo muni a nga mu nyika?

¹¹ Cini cin’wani ci mahako cipandze ca citiyisekiso ca Nungungulu? Jehovha i byelile Johani, aku: “Tsala hakuva a timhaka leti ti tsumbekile niku lisine.” (Kuv. 21:5) Jehovha i mahile zvo hundza kuleletela Johani lezvaku a “tsala”. I tlhelile a mu nyika ni cigelo. I te: “Hakuva a timhaka leti ti tsumbekile niku lisine” — lezvi zvi wulako ku, a magezu ya Nungungulu ma tsumbekile niku lisine. Ha mu bonga nguvhu Johani hi lezvi a nga ingisa cileletelo ca ku “tsala”. Kota wuyelo, hi nga lera a citsumbiso ca Nungungulu ca Paradhise hi tlhela hi ehleketa hi makatekwa yo hlamalisa lawa ma hi rindzelako.

12. Hikuyini Jehovha a nga wulako na a tiyile lezvaku: “Zvi mbhelile!”

¹² Zvini lezvi Nungungulu a wulako hi kulandzela? I wula lezvaku: “Zvi mbhelile!” (Kuv. 21:6) Ka magezu lawa Jehovha i wulisa ku khwatsi a zvilo zvontlhe lezvi a nga zvi kumbuka xungetano hi Paradhise zvi tatisekile. A nga wulawula hi ndlela leyi hakuva a ku na nchumu ci nga mu tsandzekisako ku tatisa kungo gakwe. Jehovha i hi nyika citiyisekiso cin’wani xungetano hi citsumbiso cakwe ka cipandze ci landzelako ca magezu yakwe. Hi cihi ca kona?

“HI MINA ALFA NA OMEGA”

13. Hikuyini Jehovha a wulako ku: “Hi mina Alfa na Omega”?

¹³ Kota hi zvi kumbukileko, Jehovha wutsumbu i wulawulile makhati manharu na Johani hi ku tirisa miwoniso. (Kuv. 1:8; 21:5, 6; 22:13) Ka makhati wontlhe lawo, Jehovha i wulile lezvi: “Hi mina Alfa na Omega.” Alfa i letra go sangula ga maletra ya ciGreki, Omega hi legi go gumesa. Hi ku wula lezvaku “hi mina Alfa na Omega,” Jehovha o hi vhuna ku zwisisa lezvaku loku a sangula nchumu, i ta ci mbhetisa.

14. a) Nyika cikombiso co kari laha Jehovha hi ndlela yo fananisa a nga wula ku, “Alfa” ni laha hi ndlela yo kari, a to wula ku, “Omega.” b) Citiyisekiso muni ci nga ka Genesisi 2:1-3?

¹⁴ Andzhako ka ku vanga Adhamu na Evha, Jehovha i va byelile a kungo gakwe go sangula hi vanhu ni misava. A Bhibhiliya gi ngalo: ‘Nungungulu i lo va katekisa, ni ku va laya, aku: Pswalani, mu andza, mu tata misava, mu yi fumela.’ (Gen. 1:28) Ka cikhati leco, zvi wa fana ni loku Jehovha aku: “Alfa.” I tlhamusele khwatsi a kungo gakwe: Ku wa ta chikela cikhati leci a pswalo wo mbhelela ni wo ingisa wa Adhamu na Evha wu nga wa ta tata misava ni ku yi maha paradhise. Ka cikhati leco ci tako, laha a kungo gakwe gi to tatiseka, hi ndlela yo kari Jehovha i ta wula ku: “Omega.” Andzhako ka loku ‘a tilo ni misava zvi mahilwe, ni zvilo zvontlhe zvi nga ka zvona,’ Jehovha i wulile zvokari kasi ku komba lezvaku a kungo gakwe handle ko kanakana gi ta wa ta tatiseka. Lezvo zvi kumeka ka Genesisi 2:1-3. (Lera.) Jehovha i no wula lezvaku a siku ga wu 7 gi wa basile. Zvi wula yini lezvo? Lezvo zvi komba ku a kungo ga Jehovha hi vanhu ni misava handle ko kanakana gi wa ta tatiseka hi kumbhelela kumbheleni ka siku ga wu 7.

15. Hikuyini Sathani kuzvilava a nga alakanya ku i wa ta zvi kota ku tsandzekisa Jehovha a ku tatisa kungo gakwe?

¹⁵ Andzhako ka loku Adhamu na Evha va wonhile, va no maha vawonhi va tlhela va hundzisela ciwonho ni kufa ka pswalo wabye. (Rom. 5:12) Kota wuyelo, zvi nga wonekisa ku khwatsi Sathani i no tsandzekisa a kungo ga Nungungulu ga ku tata misava hi vanhu vo mbhelela ni vo tsumbeka. Zvi wa wonekisa ku khwatsi Sathani i no maha ku zvi nga koteki a ku Jehovha a ku “Omega”. Sathani kuzvilava i alakanyile ku Jehovha i wa nga hi na mawonela yo tala. Kuzvilava i alakanyile lezvaku Jehovha i wa ta daya Adhamu na Evha a vanga wun’wani patswa wo mbhelela kasi a tatisa kungo Gakwe ka vanhu. Kanilezvi loku Nungungulu i wa no maha lezvo, Dhiyabho na a mu lumbetile ku muhembi. Hikuyini? Hakuva kota lezvi zvi tsalilweko ka Genesisi 1:28, Jehovha i wa byelile Adhamu na Evha lezvaku a pswalo wabye wu wa ta tata misava.

16. Hikuyini Sathani kuzvilava a alakanyileko ku a nga lumbeta Jehovha lezvaku a nga zvi koti ku maha lezvi a nga tsumbisa?

¹⁶ Hi wahi mawonela man’wani lawa kuzvilava Sathani a alakanyileko ku Nungungulu i wa ta hlawula wona? Kuzvilava Sathani i alakanyile lezvaku Jehovha i wa ta vhumelela Adhamu na Evha a ku va pswala vana vo kala ku mbhelela va ku va wa nga ta tshuka va mbhelela. (Mutsh. 7:20; Rom. 3:23) Ka mhaka leyi, handle ko kanakana Dhiyabho i lumbetile Jehovha lezvaku i wa ta zvi tsandzeka ku tatisa kungo gakwe. Hikuyini? Hakuva a wonela lego gi wa nga ta tatisa a kungo ga Nungungulu, ga ku a misava yiva Paradhise yi tlhela yi tala hi pswalo wo mbhelela ni wo ingisa wa Adhamu na Evha.

17. Jehovha i gi lulamisisile kuyini a wuhluwuki ga Sathani ni ga vanhu vo sangula, niku gi tava gihi wuyelo ga kona hi magumo? (Wona ni mufota.)

¹⁷ Jehovha i lulamisile a wuhluwuki ga Sathani ni ga vanhu vo sangula hi ndlela ya ku Sathani aku kaye! (Lis. 92:5) Jehovha i vhumeleli Adhamu na Evha lezvaku va pswala vana, niku hi ndlela leyo a magezu yakwe ma no tatiseka. Jehovha a nga hembi. Jehovha i kombile lezvaku loku a wula nchumu a ci kona ci nga mu tsandzekisako. I no maha lezvaku a kungo gakwe gi tatiseka hi ku humesa a “pswalo” lowu wu nga wa ta ponisa vana vo ingisa va Adhamu na Evha. (Gen. 3:15; 22:18) Zva koteka ku ngha Sathani a hlamalile hi kota ya lulamiselo ga hakhelo ya kutlhatlhisa ga Jehovha! Hikuyini? Hakuva a lulamiselo legi gi seketelwa ka lirandzo lo kala li nga ti laveli zva lona. (Mat. 20:28; Joh. 3:16) Sathani a nga nago tshamela lego. I ti lavela zva yena basi. Maku, zvini zvi to maheka hi kota ya lulamiselo ga hakhelo ya kutlhatlhisa? Kala kumbheleni ka 1000 wa malembe, a pswalo wo mbhelela ni wo ingisa wa Adhamu na Evha wu ta hanya paradhiseni misaveni — kota lezvi Jehovha a nga zvi lavisile zvona kusanguleni. Ka cikhati leco, Jehovha hi ndlela yo kari i ta wula ku, “Omega”.

LEZVI HI NGA KU TIYISISAKO ZVONA A KUTSUMBA KA HINA KA CITSUMBISO CA JEHOVHA CA PARADHISE

18. Zvitiyisekiso muni zva zvinharu lezvi Jehovha a hi nyikako? (Wona kambe ni kwadru “Zvigelo zvinharu zva ku tsumba citsumbiso ca Jehovha”.)

¹⁸ Hi kuya hi lezvi hi zvi kambisisileko, zvitiyisekiso muni hi nga bhulelako lava va kanakanako lezvaku a citsumbiso ca Nungungulu ca Paradhise ci ta tatiseka? Co sangula, Jehovha wutsumbu wa tsumbisa. A bhuku ga Kuvhululelwa gi ngalo: “Loyi a tshamileko citshan’wini ca wuhosi i te ngalo: ‘Hi nga wona! Ndzi maha zvilo zvontlhe zviva zviswa.’” Jehovha i na ni wutlhari, ntamu ni kuxuva ka ku tatisa citsumbiso cakwe. Ca wumbiri, a kutatiseka ka citsumbiso ca Jehovha ku tiyile laha ka ku, hi mawonela yakwe zvi fana ni loku makunu ci tatisekile. Hi cigelo leco a nge: “A timhaka leti ti tsumbekile niku lisine. . . . Zvi mbhelile!” Ca wunharu, loku Jehovha a sangula nchumu wo kari, i maha zvontlhe zvi lavekako kala a wu chiketa magumo, kota zvi tiyisiwako hi magezu lawa: “Hi mina Alfa na Omega”. Jehovha i ta komba Sathani lezvaku muhembi niku a nga zvi koti ku tsandzekisa Jehovha a ku tatisa kungo gakwe.

19. Loku a vanhu va kanakanela a citsumbiso ca Nungungulu ca Paradhise, zvini u nga mahako?

¹⁹ Alakanya ku, laha u yaku u bhulela lava u va kumako kuchumayeleni a citiyisekiso ca Nungungulu, wo tiyisa a kutsumba ka wena ka zvitsumbiso zva Jehovha. Maku ka khati gi to landzela laha u to lera a citsumbiso co khumba mbilu xungetano hi kuta ka Paradhise ci kumekako ka Kuvhululelwa 21:4, zvonake a wokari aku: “A zvilo lezvi zva tsakisa nguvhu, kanilezvi a ndzi kholwi lezvaku zvi ta maheka,” zvini u nga mahako? U nga lera u tlhela u mu tlhamusela a mavhesi 5 ni 6. Komba lezvi Jehovha a nga tiyisisa zvona a citsumbiso cakwe hi ku ci sinara, hi nga ha wula ku, hi asinatura yakwe wutsumbu. — Isa. 65:16.