Zviwutiso zva vagondzi

A ntiro wa kuchumayela a mahungu ya manene wu ta gumesa rini?

Jesu i wulile lezvi: “A mahungu lawa ya manene ya Mufumo ma ta chumayelwa misaveni yontlhe kasi mava wukustumunyu ka matiko wontlhe, hi kona ku to chikela a kugumesa.” (Mat. 24:14) A gezu ga ciGreki gi hundzuluselweko ku “kugumesa” ka vhesi legi ni ka vhesi 6 ni 13 i teʹlos. Gi wulako a kugumesa ka tiko ga Sathani yimpini ya Armagedhoni. (Kuv. 16:14, 16) Hikwalaho, hi ta simama ku chumayela mahungu ya manene kala na ku kiyela kutsongwani kasi a yimpi ya Armagedhoni yi sangula. Lezvi zvi cica a mazwisisela ya hina ya kale.

A kale hi wa zwisisa lezvaku hi ta nyima a ku chumayela mahungu ya manene a cikhati leci a kuxaniseka ka hombe ku to sangula hi ku lovisiwa ka Bhabhuloni wa hombe. (Kuv. 17:3, 5, 15, 16) Hi wa kholwa lezvaku lezvo zvi wa tava kugumesa ka “lembe [go fananisa] ga tipswalo ta Jehovha”. (Isa. 61:2) A cin’wani kambe, hi wa alakanya lezvaku lava va to pona a kuxaniseka ka hombe va wa ta ngha va kombile lezvaku va khozela Jehovha a kuxaniseka ka hombe na ku nga se sangula. Hi wa va fananisa ni vaJudha lava va ponileko a ku lovisiwa ka Jerusalema hi 607 na ku nga se chikela Nguva ya Hina. A vanhu lavo va wa rangile va fungiwa kasi va pona hakuva va wa khozela Jehovha va tlhela va nyenya zvakubiha. (Ezek. 5:11; 9:4) Hambulezvo, a kufananisa loko a ku yelani ni magezu ya Jesu ma nga ka Matewu 24:14, ma kombako lezvaku kuzvilava a vanhu va tava ni thomo ga ku vhumela mahungu ya manene kala na ku kiyela kutsongwani kasi ku chikela kugumesa, ku nga yimpi ya Armagedhoni.

A kuzwisisa ka hina ka kuswa ka Matewu 24:14 ku tlhela ku chukwatisa a ku zwisisa ka hina xungetano hi mahungu yo fana ni “maralala ya hombe” lawa ma phrofetilweko ka Kuvhululelwa 16:21. A cikhati leci hi nga kambisisa khwatsi hi wonile lezvaku a mavhesi lawa ya mambiri ma yelana. Hi ndlela muni? A hlamulo wu ka lezvi a vanhu va ma amukelisako zvona a mahungu ya Mufumo. Mupostoli Pawule i tsalile lezvaku a mahungu lawa hi chumayelako mahungu ya manene ka “lava va ponisiwako”, “masema ya wutomi”. Kanilezvi ka valala va Nungungulu mahungu yo biha, “masema ya kufa”. (2 Kor. 2:15, 16) A valava va Nungungulu va nyenya mahungu ya Mufumo hakuva ma zvi veka kubaseni lezvi a tiko gabye gi nga tshamisa zvona — gi bihile, gi fumelwa hi Sathani niku gi lava ku lovisiwa zvezvanyana. — Joh. 7:7; 1 Joh. 2:17; 5:19.

A cin’wani kambe, wona lezvaku a maralala lawo yo fananisa ma tava ya “hombe nguvhu”. Kuzvilava lezvo zvi wula ku ndzeni ka kuxaniseka ka hombe, a ntiro wa kuchumayela wu tava wa hombe nguvhu, kutani ku, a vito ga Jehovha gi ta tiviwa nguvhu zva ku cima a gi se tivekisa lezvo. (Ezek. 39:7) Ka cikhati leco, andzhako ka ku lovisiwa ka Bhabhuloni wa hombe, xana a vokari va ta kokiwa hi mahungu lawo a ku khwatsi masema yo nuhela? Lezvo zva koteka. Kuzvilava va ta alakanya kutani va ta tiva lezvaku hi malembe yo tala a Vakustumunyu va Jehovha va wa chumayela a kulovisiwa ka wukhongeli ga mawunwa.

Lezvo zva fana ni lezvi zvi nga humelela le Gibhite wa kale andzhako ka 10 wa makhombo. Andzhako ka loku Jehovha a ‘lamulile vontlhe a vanungungulu va Gibhite’ a vanhu vakwe va no patsana ni “vanhu vo tala va tixakaxaka” vo kala va nga hi vaIzrayeli. (Ekso. 12:12, 37, 38) A vanhu lavo vo kala va nga hi vaIzrayeli kuzvilava va hlawulile a kuva tlhelweni ga Jehovha a cikhati leci va nga wona a zvitlharihiso zva Mosi zva 10 wa makhombo na zvi tatiseka.

Ni wihi loyi a tova tlhelweni ga Jehovha andzhako ka ku lovisiwa ka Bhabhuloni wa hombe i tava ni thomo ga ku va mahela zvazvinene a vamakabye va Kristu lava va to ngha va ha hi laha misava. (Mat. 25:34-36, 40) Kunene, a thomo lego ga ku lamuliwa kota tiyivhu gi ta mbhela na ku kiyela kutsongwani kasi a Armagedhoni yi sangula, a cikhati leci a misalela ya va totilweko yi to kuma nchachazelo wabye wa le tilweni.

A kuzwisisa loku ka kuswa ku khanyisa a lirandzo la hombe la Jehovha ni wuxinji gakwe. Kunene, Jehovha “a nga lavi lezvaku ku lova ni mun’we, kanilezvi i xuva lezvaku vontlhe va ti sola”. — 2 Ped. 3:9.