Mahungu Ya Ku Tsakisa Ya Ku Tsaliwa Hi Luka

17 Kutani Yesu a byela vadjondzisiwa va yena a ku: “Minkama hinkwayu swi ta va kona leswi nga ta yendla van’wani va djoha. Kambe yowee ka lweyi a djohisaka van’wani! 2 Swi nga yampsa swinene loko o boheleliwa ribye lalikulu* ka nhamu se a txukumeteliwa lwandle ku tlula ku va a djohisa mun’we ka lavatsongo.+ 3 Tivoneleni. Loko makwenu a djoha mu layi,+ loko a tisola, mu rivaleli.+ 4 Hambi o ku djohela ka 7 hi siku se a ta ka wena ka 7 a ku: ‘Ni rivaleli,’ u fanele u mu rivalela.”+

5 Kutani vapostolo va byela Hosi va ku: “Hi pfuni ku va ni lipfumelo la ku tiya.”+ 6 Kutani Hosi yi ku: “Loko a mi ni lipfumelo la ku ringana ni mbewu ya sinapi,* a mi ta byela nsinya lowu wa timora mi ku: ‘Titsuvuli u ya tibyala lwandle!’ Kutani a wu ta mi yingisa.+

7 “I mani ka n’wina lweyi loko a vuya hi masin’wini a nga byelaka mutirhi wa yena lweyi a mu rimelaka masimu kumbe a lusaka swiharhi swa yena a ku: ‘Tani hi ta dla xikan’we’? 8 A nga kona! Kambe a ta ku: ‘Txintxa mpahla, u ni lunghiselela jantari, u gama u ni tirhela anze ni gama ku dla ni ku nwa, se hi kona na wena u nga ta gama u dla u tlhela u nwa. 9 I nga va swaku a ta mu khensa mutirhi wa yena hi mhaka ya leswi a nga yendla ntirho wa yena? A nge mu khensi! 10 Se swa fana ni le ka n’wina, loko mi yendle mintirho hinkwayu leyi mi nga nyikiwa yona, vulani mi ku: ‘Hi vatirhi va ku kala va nga pfuni nchumu. Hi yendle ntsena leswi a hi fanele hi swi yendla.’”+

11 Na a kongoma Yerusalema, a hundze hi le xikarhi ka Samariya ni Galileya. 12 Nkama a nga nghena ka xidoropani xin’wani, a voniwe hi 10 wa vavanuna lava a va ni mavabyi ya nhlokonho,* na va nyimile kulenyana.+ 13 Kutani va huwelela va ku: “Yesu Mudjondzisi, hi tweli wusiwana!” 14 Nkama a nga va vona, a va byele a ku: “Fambani mi ya tikombisa ka vaprista.”+ Se na va ha famba, va hanyisiwa.*+ 15 Nkama mun’wani wa vona a nga vona swaku a hanyisiwile, a tlhelile ka Yesu na a dzunisa Xikwembu hi ku tsaka. 16 Se a khizama ka minenge ya Yesu na a txuvuke hansi, a mu khensa. Wanuna lweyi a a li Musamariya.+ 17 Yesu a ku: “Ku hanyisiwe 10 wa vona a hi swona ke? Se lava 9 va kwini? 18 A ku na mun’wani lweyi a nga vuya a ta dzunisa Xikwembu handle ka wanuna lweyi wa lixaka lin’wani.” 19 Se a ku: “Pfuka u famba; lipfumelo la wena li ku hanyisile.”+

20 Nkama Vafarisi va nga mu vutisa swaku Mfumu wa Xikwembu wu ta ta siku muni,+ a va hlamulile a ku: “Loko Mfumu wa Xikwembu wu ta, va ku tala a va nga ta swi vona; 21 naswona vanhu a va nge vuli va ku: ‘Vonani hi lowu!’ kumbe ‘Hi lowuya!’ Hikusa Mfumu wa Xikwembu wu le xikarhi ka n’wina.”+

22 Kutani a byela vadjondzisiwa va yena a ku: “Ku ta fika masiku lawa mi nga ta navela ku va ni N’wana wa munhu, kambe a swi nga ta koteka. 23 Se vanhu va ta ku: ‘Vonani hi lwiya!’ kumbe: ‘Vonani hi lweyi!’ Mi nga yeni kumbe ku va landzelela.+ 24 Ku fana ni leswi ku hatima ku voningaka ku sukela ka tlhelo lin’we la tilo ku ya fika ka lelin’wani, swi ta yendlekisa swoleswo ni ka N’wana wa munhu+ hi siku la yena.+ 25 Kambe a fanele a rhanga hi ku hluphiwa a tlhela a nyenyiwa hi vanhu va nkama* lowu.+ 26 Ku fana ni leswi swi nga yendlekisa xiswona ka masiku ya Nowa,+ swi ta yendlekisa swoleswo ni ka nkama wa N’wana wa munhu:+ 27 A va dla, va nwa, vavanuna va chada ni vavasati va chadiwa, ku za ku fika siku leli Nowa a nga nghena hi lona ka ngalava,+ se Ndhambi yi fika yi va helisa hinkwavu.+ 28 Naswona swi yendlekise swoleswo ka masiku ya Lota:+ A va dla, va nwa, va xava, va xavisa, va byala ni ku yaka. 29 Kambe siku leli Lota a nga huma hi lona Sodoma, ku ne ndzilu ni swiribyani leswi swi pfurhaka* hi le tilweni, swi va helisa hinkwavu.+ 30 Swi ta tshamisa swoleswo ni hi siku leli N’wana wa munhu a nga ta kombisiwa hi lona ka vanhu.+

31 “Hi siku lolelo, lweyi a nga henhla ka yindlo,* kambe minchumu ya yena yi nga ndlwini, a nga xiki a ya yi teka, naswona lweyi a nga masin’wini, na yena a nga tshuki a tlhela kaya. 32 Khumbukani nsati wa Lota.+ 33 Lweyi a zamaka ku ponisa wutomi la yena a ta luzekeliwa hi lona, kambe lweyi a luzekeliwaka hi lona a ta tlhela a li kuma.+ 34 Na mi byela swaku ka wusiku lolelo, vanhu vambirhi va ta va na va yetlelile ka mubedu wun’we; ku ta tekiwa mun’we kambe mun’wani a ta siyiwa.+ 35 Vavasati vambirhi va ta va na va sila xikan’we, ku ta tekiwa mun’we kambe mun’wani a ta siyiwa.” 36* —— 37 Se va mu vutisa va ku: “Hosi, swi ta yendleka kwini ke?” A va hlamula a ku: “Lomu ntsumbu wu nga kona, hi kona lani magama* na wona ma nga ta hlengeletana kona.”+