Samuwele Wa Ku Sungula
3 Hi nkama wolowo, Samuwele lweyi a a li mufana a a tirhela+ Yehovha phambheni ka Eli, kambe rito leli taka hi ka Yehovha a li kala ka masiku wolawo; naswona a swi kala swaku a komba vanhu minchumu ya ku hlamalisa+ hi ndlela ya singita.*
2 Siku lin’wani Eli a a yo yetlela ka kwartu la yena naswona leswi matihlo ya yena a ma biwe hi limphume a a nga ha voni kahle.+ 3 A xa ku voninga hi xona*+ lexi a xi li kona tempeleni*+ ya Yehovha a xi nga se timiwa naswona Samuwele a a yetlele lani Areka ya Xikwembu a yi li kona. 4 Se Yehovha a vitana Samuwele. Samuwele a hlamula a ku: “Hi mina lweyi.” 5 Kutani a tsutsuma a ya ka Eli, a fika a ku: “Hi mina lweyi, hikusa u ni vitanile.” Kambe yena a ku: “A ni ku vitananga. Famba u ya yetlela.” Se a tlhela a ya yetlela. 6 Yehovha a tlhela a mu vitana a ku: “Samuwele!” Samuwele a pfuka a ya ka Eli, a fika a ku: “Hi mina lweyi, hikusa u ni vitanile.” Kambe yena a ku: “A ni ku vitananga n’wananga. Famba u ya yetlela.” 7 (Hi nkama wolowo Samuwele a a nga se mu tiva kahle Yehovha naswona a a nga se tshama a twa Yehovha na a vulavula na yena.)+ 8 Yehovha a tlhela a mu vitana ka wunharhu a ku: “Samuwele!” Se a pfuka a ya ka Eli, a fika a ku: “Hi mina lweyi, hikusa u ni vitanile.”
Kutani Eli a swi tsumbula swaku a ku li Yehovha lweyi a a vitana xidjahana lexi. 9 Se Eli a byela Samuwele a ku: “Famba u ya yetlela; loko a tlhela a ku vitana, mu hlamuli u ku: ‘Vulavula Yehovha, hikusa mina mutirheli wa wena na ku twa.’” Kutani Samuwele a famba a ya yetlela lani a a yetlele kona.
10 Yehovha a tlhela a mu vitana ku fana ni le ku sunguleni a ku: “Samuwele, Samuwele!” Se Samuwele a mu hlamula a ku: “Vulavula, hikusa mina mutirheli wa wena na ku twa.” 11 Yehovha a byela Samuwele a ku: “Vona! Ni ta yendla nchumu aIsrayele wa ku loko munhu a wu twa, wu ta mu tinga tindleve.+ 12 Hi siku lolelo ni ta yendla hinkwaswu leswi ni nga hlaya swaku ni ta swi yendla ka Eli ni ndjangu wa yena, ku sukela ka rito la ku sungula ku ya fika ka rito la wugamu.+ 13 U fanele u mu byela swaku ni ta wu yavanyisela swa wugamu ndjangu wa yena hi mhaka ya xidjoho lexi a xi tivaka,+ hikusa vana va yena va ni rhuka+ kambe yena a nga va layanga.+ 14 Hi leswo swi nga ni yendla ni funga ka ndjangu wa Eli swaku xidjoho xa vona a xi nge tshuki xi rivaleliwa hi ku tirhisa magandzelo.”+
15 Samuwele a yetlela anze li xa; se a pfula swipfalu swa tempele* ya Yehovha. Samuwele a a chava ku byela Eli leswi Xikwembu xi nga mu byela swona. 16 Kambe Eli a vitana Samuwele a ku: “Samuwele n’wananga!” Yena a hlamula a ku: “Hi mina lweyi.” 17 Kutani a mu vutisa a ku: “A ku byele yini? Ni kombela u nga ni fihleli. Xikwembu a xi ku khatise hintamu loko wo ni fihlela hambi ko va rito lin’we ka marito hinkwawu lawa xi nga ku byela.” 18 Se Samuwele a mu byela hinkwaswu, a nga mu fihlelanga nchumu. Kutani Eli a ku: “I Yehovha. A a yendli leswi a swi vonaka na swi li swinene.”
19 Samuwele a tama a kula naswona Yehovha a va na yena;+ a yendle hinkwaswu leswi a nga swi vula. 20 Tiko hinkwalu la Israyele ku sukela aDani ku ya Berxeba li swi tiva swaku Samuwele a a vekiwile swaku a va muprofeta wa Yehovha. 21 Se Yehovha a tama a humelela aXilo, hikusa hi lani Yehovha a nga titivisa kona ka Samuwele, hi rito la yena Yehovha.+