Nehemiya

5 Kambe a ku ni vavanuna ni vasati va vona lava va nga sungula ku rila hintamu va tlhela va khala hi mhaka ya vamakwavu va Vayuda.+ 2 Van’wani a va ku: “Hina ni vana va hina hi vanyingi, hi fanele hi kuma swakudla swaku hi ta dla hi hanya.” 3 Van’wanyani a va ku: “Hi lombise masimu ya hina ya trigu* ni ya mawuvha ku patsa ni tiyindlo ta hina hi nkama wa ndlala swaku hi ta kuma swakudla.” 4 Kasi van’wani a va ku: “Hina hi lombise masimu ya hina ya trigu ni ya mawuvha swaku hi ta kuma male ya ku hakela rhesa* ya hosi.+ 5 Hi vana va munhu mun’we, phela hi vamakwerhu, ni vana va hina va fana ni va vona; kambe hi boheke ku va yendla swikarawa vana va hina, funtshi vana va hina, vavasati se i swikarawa.+ Kambe a hi koti ku yendla nchumu hikusa masimu ya hina ya trigu ni ya mawuvha ma le ka mavoko ya van’wani.”

6 Nkama ni nga twa xirilo xa vona ni marito lawa ni kwate hintamu. 7 Se ni sungula ku pimisa kahle hi mhaka leyi, kutani ni swi vona swaku varhangeli ni vapfunisi va vagovhernadori va ni nandzu, ni gama ni va byela leswi: “Hinkwenu ka n’wina mi lava majuru ka vamakwenu.”+

Se ni markara ntlhanganu swaku ku lunghisiwa mhaka leyi. 8 Kutani ni va byela leswi: “Hi yendle hinkwaswu swaku hi ponisa vamakwerhu lava va nga Vayuda lava a va xavisiwile ka vamatiko; kambe mi lava ku tlhela mi xavisa vamakwenu+ swaku hi ta tlhela hi va ponisa?” Se va miyela va ku ntse! 9 Kutani ni ku: “A swi kahle leswi mi swi yendlaka. Hi mhaka muni mi nga chavi Xikwembu xa hina+ swaku vamatiko, lava nga valala va hina va ta tshika ku hi poyila? 10 Funtshi mina, vamakwerhu ni vapfunisi va mina hi va lomba male ni swakudla. Ni kombela hi tshika ku lombisa hi majuru.+ 11 Namuntlha ni kombela mi va tlhelisela masimu ya vona,+ masimu ya vona ya mawuvha, ya mawolivhera, tiyindlo ta vona, ku patsa ni male ya majuru,* trigu, vhinyu la nyuwani ni mafurha, leswi mi nga swi teka ka vona swaku swi va majuru.”

12 Kutani va ku: “Hi ta va tlhelisela naswona a hi nga ta lava nchumu ka vona. Hi ta yendla leswi u swi hlayaka.” Se ni vitana vaprista swaku vavanuna lava va funga phambheni ka vona swaku va ta yendla leswi va nga swi tshembisa. 13 Naswona ni tlhele ni dzudza mpahla ya mina ni gama ni ku: “Munhu mun’wani ni mun’wani lweyi a kalaka a nga xi hetisisi xitshembiso lexi, Xikwembu xa ntiyiso xi ta mu dzudzisa xileswi ka yindlo ya yena ni ka leswi a nga na swona naswona a a dzudziwi a sala a nga na nchumu.” Kutani vanhu hinkwavu va ku: “Amen!”* Se va sungula ku dzunisa Yehovha, ni ku yendla leswi va nga swi tshembisa.

14 Ku sukela hi siku leli hosi yi nga ni veka swaku ni va govhernadori+ ka tiko la Yuda, hi lembe la wu 20+ la ku fuma ka Hosi Artaxexe+ anze ka lembe la wu 32+ la ku fuma ka yona, ku nga 12 wa malembe, mina ni vamakwerhu a hi nga dli swakudla leswi nyikiwaka vagovhernadori.+ 15 Kambe vagovhernadori lava va nga va kona na ni nge se va govhernadori, a va tikisela vanhu; hi siku a va lava 456 wa magrama* ya prata, swaku va xava pawu ni vhinyu. Ni vapfunisi va vona a va tikisela vanhu. Kambe mina a ni zanga ni swi yendla leswo+ hi mhaka ya ku chava Xikwembu.+

16 Funtshi ni pfunetile ka ku yaka muru lowu naswona a hi tekanga nsimu ya munhu;+ vapfunisi va mina hinkwavu na vona a va li ku yakeni. 17 A ku ni 150 wa Vayuda ni vapfunisi va vagovhernadori lava a va dla na mina ku patsa ni vanhu lava va taka hi ka matiko man’wani. 18 Siku ni siku a hi swekeliwa homu, 6 wa tinyempfu ta ku nona ni tihuku* leswi a ni swi hakelela,* se loko ku hundze 10 wa masiku a hi kuma vhinyu la linyingi hi mixaka ya lona. Kambe a ni zanga ni londza swakudla leswi nyikiwaka vagovhernadori hikusa vanhu se a va tikeliwa hintamu. 19 Ni kombela u ni khumbuka Xikwembu xanga, u khumbuka mintirho ya mina hinkwayu yayinene leyi ni nga yi yendlela vanhu lava.+