DETERONOMA

1 Lawa i marito lawa Moxe a nga ma byela Vayisrayele hinkwavu adixtritu la Yordani ka mananga lawa ma nga phambheni ka Sufi, axikarhi ka Parani, Tofeli, Labani, Hazeroti ni Dizahabi. 2 A swi teka 11 wa masiku ku suka Horebi u ya aKadexi-Barneya+ loko u famba hi ka Ntshava ya Seyiri. 3 Hi siku la ku sungula ka wheti ya wu 11, hi lembe la wu 40,+ Moxe a byela Vayisrayele hinkwaswu leswi Yehovha a nga mu rhuma swaku a va byela swona. 4 Leswi swi yendleke loko se a hlule Sihoni+ hosi ya Vaamori, lweyi a a tshama aExiboni na Ogi+ hosi ya Baxani, lweyi a a tshama aAxiteroti le Edreyi.+ 5 Moxe a va tlhamusela Nawu+ lowu adixtritu la Yordani ka tiko la Mowabu, a ku:

6 “Yehovha Xikwembu xa hina a khulume na hina aHorebi a ku: ‘Se mi tshame nkama wa wunyingi ka ndhawu leyi ya tintshava.+ 7 Sukani mi ya ka ndhawu ya tintshava ya Vaamori+ ni ka vavhizinyu va vona hinkwavu aAraba,+ ndhawu ya tintshava, Xefela, Negebi, ndhawu leyi nga kusuhi ni lwandle,+ tiko la Vakanana ni Lebanoni*+ ku ya fika ka nambu wawukulu wa Ewufrata.+ 8 Yingisani, ni ta mi nyika tiko leli. Fambani mi ya teka tiko leli Yehovha a nga funga ku li nyika vapapayi va n’wina ku nga Abrahamu, Izaki+ na Yakobe+ ni vana* va vona.’+

9 “Naswona ni mi byelile hi nkama wolowo ni ku: ‘A ni nge swi koti ku mi rhangela na ni li noxe.+ 10 Yehovha Xikwembu xa n’wina a mi yendle mi va vanyingi, se namuntlha mi tale ku fana ni tinyeleti ta matilo.+ 11 Yehovha Xikwembu xa vavhovho va n’wina a a yendli leswaku mi tala hintamu+ ku tlula leswi mi nga talisa xiswona swoswi, naswona a a mi katekisi a yendla leswi a nga mi tshembisa swona.+ 12 A ni nge swi koti ku mi rhangela na ni li noxe hi mhaka ya leswi mi tshamelaka ku ngurangura.+ 13 Langani vavanuna va ku tlhariha, va ku tshembeka ni lava nga ni xiperiyensa* ka tinxaka ta n’wina, swaku ni ta va veka va va varhangeli va n’wina.’+ 14 Kutani mi ni hlamule mi ku: ‘Leswi u nga hi byela swaku hi swi yendla i swinene.’ 15 Se ni teke varhangeli va tinxaka ta n’wina, vavanuna va ku tlhariha ni lava nga ni xiperiyensa, ni va veka swaku va va varhangeli va n’wina, tindota ta mintlawa ya 1.000 wa vanhu, tindota ta mintlawa ya 100 wa vanhu, tindota ta mintlawa ya 50 wa vanhu, tindota ta mintlawa ya 10 wa vanhu ni varhangeli va tinxaka ta n’wina.+

16 “Hi nkama wolowo ni byele vayavanyisi va n’wina ni ku: ‘Loko mi thetha mhaka ya vamakwenu va n’wina, mi fanele mi yavanyisa hi ndlela yayinene,+ xikarhi ka munhu ni makwavu kumbe munhu wa tiko lin’wani.+ 17 Mi nga tshuki mi va ni xikheto loko mi yavanyisa.+ Mi fanele mi yavanyisa munhu wa xiyimu xa le henhla ni wa xiyimu xa le hansi hi ndlela ya ku fana.+ Mi nga chavisiwi hi munhu,+ hikusa i Xikwembu xi yavanyisaka;+ naswona loko mhaka yi mi tikela swinene, mi fanele mi yi tisa ka mina swaku ni ta yi twa.’+ 18 Hi nkama wolowo ni mi byele hinkwaswu leswi mi faneleke mi swi yendla.

19 “Hi suke aHorebi hi tsemakanya mananga wolawo hinkwawu lama chavisaka swinene,+ lawa hi nga ma vona ka ndhawu ya tintshava ya Vaamori,+ hi ku landza leswi Yehovha Xikwembu xa hina a nga hi byela swona, naswona hi wugamu hi fike aKadexi-Barneya.+ 20 Kutani ni mi byele leswi: ‘Mi fike ka ndhawu ya tintshava ya Vaamori, leyi Yehovha Xikwembu xa hina a hi nyikaka yona. 21 Vonani, Yehovha Xikwembu xa n’wina a mi nyike tiko. Fambani mi ya li teka, hi ku landza leswi Yehovha Xikwembu xa vavhovho va n’wina a nga mi byela swona.+ Mi nga chavi kumbe ku chavisiwa.’

22 “Kambe hinkwenu mi te ka mina mi ta ni byela leswi: ‘A hi rhumeni vavanuna swaku va ya hi kambelela tiko kutani va hi vuyisela nhlamulu ya ndlela leyi hi faneleke hi famba hi yona ni madoropa lawa hi nga ta fikela ka wona.’+ 23 Ni ma vone ma li mavonelo ya kahle, se ni lange 12 wa vavanuna ka n’wina, mun’we ka lixaka ha lin’we.+ 24 Va yile ka ndhawu ya tintshava,+ va fika ka Nkova wa Exikoli, va kambela tiko. 25 Va vuye ni mihandzu yin’wani ya tiko la kona va fika va hi komba naswona va vuyise nhlamulu va ku: ‘Tiko leli Yehovha Xikwembu xa hina a hi nyikaka lona i linene.’+ 26 Kambe mi yale ku ya li teka naswona a mi yingisanga minawu ya Yehovha Xikwembu xa n’wina.+ 27 A mi tshamela ku ngurangura ka matende ya n’wina mi ku: ‘Yehovha wa hi nyenya, hi leswo swi nga yendla a hi humesa ka tiko la Gibita swaku a hi nyiketa ka Vaamori swaku va hi helisa. 28 Yi tshamise ku yini ndhawu leyi hi yaka ka yona ke? Vamakwerhu va hi chaviselile+ va ku: “Ku ni vanhu va matimba ku hi tlula va tlhela va leha ku hi tlula, naswona madoropa ya vona i makulu ma tlhela ma va ni mimuru ya ku leha yi ya fika tilweni+ naswona hi vone ni vana va Anaki+ kolanu.”’

29 “Kutani ni mi byele ni ku: ‘Mi nga chavi kumbe mi chavisiwa hi mhaka ya vona.+ 30 Yehovha Xikwembu xa n’wina a ta mi rhangela naswona a ta mi lwela+ ku fana ni leswi a nga swi yendla phambheni ka n’wina aGibita.+ 31 Naswona mi swi vonile leswi Yehovha Xikwembu xa n’wina a nga mi tlakulisa xiswona amananga ku fana ni loko munhu a tlakula n’wana wa yena, hinkwaku lomu mi nga ya kona mi za mi fika ka ndhawu leyi.’ 32 Kambe hambileswi mi nga vona swilo leswi hinkwaswu a mi kombisanga lipfumelo ka Yehovha Xikwembu xa n’wina,+ 33 lweyi a a mi rhangela ndleleni leswaku a mi lavela ndhawu swaku mi gwimba matende ka yona. A a mi rhangela hi ndzilu niwusiku ni hi rhefu ninhlikanhi swaku a mi komba ndlela leyi mi faneleke mi famba hi yona.+

34 “Nkama hinkwawu Yehovha a a twa hinkwaswu leswi a mi swi vula lakakuva swi mu kwatisa a za a funga+ a ku: 35 ‘A nga kona ni mun’we xikarhi ka vavanuna lava va ku biha, lweyi a nga ta vona tiko leli ni nga funga ku li nyika vapapayi va n’wina,+ 36 ntsena Kalebe n’wana wa Yefune. Yena a ta li vona naswona tiko leli a nga famba ka lona ni ta li nyika yena ni vana va yena hikusa a landzele Yehovha hi mbilu hinkwayu.+ 37 Phela na mina, Yehovha a ze a ni kwatela hi mhaka ya n’wina, a ku: “Na wena a wu nga ta nghena ka lona.+ 38 Yoxuwa n’wana wa Nuni lweyi a nga nyima phambheni ka wena,+ hi yena a nga ta nghena ka tiko lolelo.+ Mu tiyisi,*+ hikusa hi yena a nga ta rhangela Vayisrayele swaku va kuma tiko.” 39 Naswona vana va n’wina lava mi nga hlaya swaku va ta tekiwa,+ ni vana va n’wina va madjaha lava namuntlha va kalaka va nga tivi swaswinene kumbe swa ku biha, vona va ta nghena naswona ni ta va nyika lona, li ta va la vona.+ 40 Kambe n’wina, tlhelani mi ya mananga hi ndlela leyi yaka ka Lwandle la Ku Pshuka.’+

41 “Se mi ni hlamule mi ku: ‘Hi djohele Yehovha. Hi ta ya hi ya lwa hi ku landza leswi Yehovha Xikwembu xa hina a nga hi byela swona!’ Kutani mun’wani ni mun’wani wa n’wina a khome matlharhi naswona a mi pimisa swaku swi ta mi vevukela ku ya khwela ntshava.+ 42 Kambe Yehovha a ni byela a ku: ‘Va byeli leswi: “Mi nga yi mi ya lwa, hikusa a ni nga ta va na n’wina.+ Loko mo ya, valala va n’wina va ta mi hlula.”’ 43 Ni khulume na n’wina kambe a mi ni yingisanga. Mi terekele Yehovha, mi zama ku khwela ntshava hi mhaka ya leswi a mi tibyela. 44 Se Vaamori lava a va tshama ka ntshava yoleyo va huma va ta lwa na n’wina va mi txatxa ku fana ni tinyoxi, va mi hangalasa aSeyiri anze Orma. 45 Se mi game mi vuya mi sungula ku rilela Yehovha, kambe Yehovha a nga zanga a mi yingisile naswona a nga vanga ni mhaka na n’wina. 46 Hi leswo swi nga yendla mi tshama nkama wa wunyingi aKadexi.

2 “Se hi tlhela hi ya mananga hi ndlela leyi yaka ka Lwandle la Ku Pshuka, hi ku landza leswi Yehovha a nga hi byela swona,+ hi fambe masiku ya manyingi kusuhi ni Ntshava ya Seyiri. 2 Hi wugamu Yehovha a ni byela leswi: 3 ‘I khale na mi pepetseka ka ntshava leyi. Swoswi fambani ka tlhelo la norte.* 4 Byela vanhu lava u ku: “Mi ta hundza hi lomu ndhawu ya vamakwenu yi tsemaka hi kona, ku nga vana va Esawu+ lava tshamaka Seyiri,+ va ta mi chava,+ se tivoneleni. 5 Mi nga lwi na vona hikusa a ni nga ta mi nyika nchumu ka tiko la vona, hambi xindhawani xa ku ringana nkondzo; hikusa Ntshava ya Seyiri ni yi nyike Esawu leswaku yi va tshomba la yena.+ 6 Mi fanele mi hakela male loko mo dla swakudla swa vona naswona mi fanele mi hakela mati lawa mi nga ta ma phuza.+ 7 Hikusa Yehovha Xikwembu xa n’wina a mi katekisile ka hinkwaswu leswi mi nga swi yendla. A swi tiva kahle leswi mi nga tsendzelekisa xiswona ka mananga lawa yamakulu. Yehovha Xikwembu xa n’wina a a mi hlayisa ka 40 wa malembe lawa. A mi zanga mi pfumala nchumu.”’+ 8 Se hi swi kotise xileswo ku hundza hi ka vamakwerhu, ku nga vana va Esawu,+ lava tshamaka aSeyiri; a hi fambanga hi ndlela ya le Araba, leyi sukelaka aElati ni le Eziyoni-Yeberi.+

“Kutani, hi game hi tlhela hi ndlela leyi yaka mananga ya Mowabu.+ 9 Se Yehovha a ni byela a ku: ‘U nga karhati Vamowabu kumbe ku lwa na vona, hikusa a ni nga ta ku nyika tiko ni lin’we la vona swaku li va tshomba, hikusa tiko la Ara ni li nyike vana va Lota swaku li va tshomba la vona.+ 10 (Vaemimi+ lava a va tshama kolanu khale, a va li vanyingi naswona a va ni matimba va tlhela va leha ku fana ni Vaanaki. 11 Varefayimi+ a va voniwa na va fana ni Vaanaki,+ naswona Vamowabu a va va vitana swaku i Vaemimi. 12 A khale Vahori+ a va tshama Seyiri, kambe vana va Esawu va va hlongolile va tlhela va va dlaya va gama va tshama ka ndhawu ya vona,+ va yendle leswi Vayisrayele va nga ta swi yendla ka tiko leli nga tshomba la vona, leli Yehovha a nga ta va nyika lona hikakunene.) 13 Se swoswi, tlulelani Nkova wa Zeredi.’ Kutani hi tlulela Nkova wa Zeredi.+ 14 Hi hete 38 wa malembe na hi famba ku sukela aKadexi-Barneya anze hi ya tlulela Nkova wa Zeredi, ku za ku hela lixaka lolelo hinkwalu la vavanuna va nyimpi, ku nga leswi Yehovha a nga va fungela swona.+ 15 Phela voko la Yehovha a li lwa na vona swaku li va helisa ka matende anze va ku jii.+

16 “Hi ku hantlisa nkama vavanuna hinkwavu va nyimpi va nga fa xikarhi ka vanhu,+ 17 Yehovha a tlhele a vulavula na mina a ku: 18 ‘Namuntlha mi ta hundza hi ka tiko la Vamowabu, ku nga Ara. 19 Nkama mi nga ta fika kusuhi ni Vaamoni, mi nga va karhati kumbe ku va hlasela, hikusa a ni nga ta mi nyika tiko ni lin’we la Vaamoni swaku li va tshomba, ni li nyike vana va Lota swaku li va tshomba la vona.+ 20 Na yona ndhawu leyi a yi vitaniwa swaku i tiko la Varefayimi.+ (Khale Varefayimi a va tshama kolanu naswona Vaamoni a va va vitana swaku i Vazamizumimi. 21 A va li vanyingi naswona a va ni matimba va tlhela va leha ku fana ni Vaanaki;+ kambe Yehovha a va helisile na va voniwa hi Vaamoni, kutani va va hlongola va gama va tshama ka ndhawu ya vona. 22 Phela hi swoleswo a nga swi yendlela vana va Esawu, lava swoswi va tshamaka Seyiri,+ nkama a nga helisa Vahori+ na va swi vona, leswaku va va tekela tiko va tshama ka lona anze namuntlha. 23 Swidoropani swa Vaavhimi a swi fole swi za swi ya fika aGaza,+ anze nkama Vakafitori+ lava a va huma Kafitori,* va nga va helisa va teka ndhawu ya vona.)

24 “‘Tilunghiseni, mi tlulela Nkova wa Arinoni.+ Phela Sihoni+ hosi ya Vaamori wa le Exiboni ni mu nyikete ka mavoko ya n’wina. Se sungulani ku teka tiko la yena mi lwa na yena. 25 Namuntlha ni ta yendla swaku vanhu hinkwavu lava va nga ta twa na ku vulavuliwa hi n’wina hansi ka matilo va mi chava. Va ta dungeka tinhloko va tlhela va rhurhumela hi mhaka ya n’wina.’+

26 “Kutani ni rhuma vanhu va suka mananga ya Kedemoti+ va ya ka Hosi Sihoni wa le Exiboni na va ni marito ya ku kombela ku rhula, lama nge:+ 27 ‘Ni pfumeleli ni hundza hi ka tiko la wena. Ni ta famba hi ndlela ntsena naswona a ni nga ta djika ni ya ka xinene kumbe ka ximatsi.+ 28 Ni ta dla swakudla ni tlhela ni phuza mati lawa u nga ta ni xavisela wona ntsena. Wena ni pfumeleli ni hundza ntsena, 29 hi leswo vana va Esawu lava va tshamaka Seyiri ni Vamowabu lava va tshamaka Ara va nga ni yendlela swona, anze ni tlulela Nambu wa Yordani ni ya ka tiko leli Yehovha Xikwembu xa hina a hi nyikaka lona.’ 30 Kambe Hosi Sihoni wa le Exiboni a nga hi pfumelelanga swaku hi hundza, hikusa Yehovha Xikwembu xa n’wina a mu tshike a tiwomisa nhloko+ a tlhela a yendla swaku a va ni mbilu ya ribye, leswaku a mu nyiketa ka mavoko ya n’wina ku nga leswi mi swi vonaka namuntlha.+

31 “Se Yehovha a ni byela a ku: ‘Phela se ni sungule ku nyiketa Sihoni ni tiko la yena ka wena. Sungula ku teka tiko la yena.’+ 32 Nkama Sihoni a nga ta ni vanhu va yena hinkwavu swaku a ta lwa na hina aYahazi,+ 33 Yehovha Xikwembu xa hina a mu nyikete ka hina kutani hi mu hlula, yena, vana va yena ni vanhu va yena hinkwavu. 34 Hi nkama wolowo hi teke madoropa ya yena hinkwawu hi tlhela hi dlaya vavanuna, vavasati ni vana. A hi siyanga munhu.+ 35 Hi yo teka ntsena swifuyu ni minchumu ya vona ka madoropa lawa hi nga ma teka. 36 Ku sukela ka doropa la Arowa+ leli nga ka Nkova wa Arinoni ku patsa ni doropa leli nga nkoveni, anze aJiliyadi, a ku na doropa leli nga pona. Yehovha Xikwembu xa hina a ma nyikete hinkwawu ka mavoko ya hina.+ 37 Kambe a mi zanga mi tshinela kusuhi ni tiko la Vaamoni,+ ndhawu hinkwayu leyi nga ka Nkova wa Yaboki+ ni madoropa lama nga ka ndhawu ya tintshava, kumbe ndhawu yin’wani ni yin’wani leyi Yehovha Xikwembu xa hina a nga hi byela swaku hi nga ngheni ka yona.

3 “Se hi tlhela, hi famba hi Ndlela ya Baxani. Kutani Ogi hosi ya Baxani a ta ni vanhu va yena hinkwavu a ta lwa na hina aEdreyi.+ 2 Kutani Yehovha a ni byela a ku: ‘U nga mu chavi, hikusa ni ta ku pfuna swaku u mu hlula, yena ni vanhu va yena hinkwavu ni tiko la yena, u ta mu yendla swa ku fana ni leswi u nga swi yendla ka Sihoni hosi ya Vaamori, lweyi a a tshama aExiboni.’ 3 Se Yehovha Xikwembu xa hina a hi pfuna swaku hi hlula Hosi Ogi wa le Baxani ni vanhu va yena hinkwavu, kutani hi mu dlaya naswona a ku ponanga munhu ni mun’we. 4 Kutani hi teka madoropa ya yena hinkwawu. A ku na doropa ni lin’we leli hi kalaka hi nga li tekanga; hi teke 60 wa madoropa lawa a ma kumeka ka ndhawu hinkwayu ya Argobi, ka mfumu wa Ogi le Baxani.+ 5 Madoropa lawa hinkwawu a ma ni mimuru ya ku leha hintamu, ma tlhela ma va ni swipfalu swaswikulu ni swa ku khiyela hi swona, ku patsa ni swidoropani swa swinyingi leswi a swi li kusuhi na wona. 6 Kambe hi ma helisile,+ hi yendla swa ku fana ni leswi hi nga swi yendla ka Hosi Sihoni wa le Exiboni hi ku helisa madoropa hinkwawu, ku patsa ni vavanuna, vavasati ni vana.+ 7 Hi titekele swifuyu hinkwaswu ni swilo swa vona ka madoropa wolawo.

8 “Hi nkama wolowo, hi teke tiko la tihosi timbirhi ta Vaamori,+ leti a ti li ka dixtritu la Yordani, ku sukela ka Nkova wa Arinoni ku ya fika ka Ntshava ya Hermoni,+ 9 ku nga ntshava leyi Vasidoni a va yi vitana swaku i Siriyoni kasi Vaamori a va yi vitana swaku i Seniri. 10 Hi teke madoropa hinkwawu ya tiko leli nga ka ndhawu ya le henhla, tiko hinkwalu la Jiliyadi ni la Baxani ku ya fika aSaleka ni le Edreyi,+ ku nga madoropa ya mfumu wa Ogi aBaxani. 11 Phela Hosi Ogi wa le Baxani, hi yena yexe ntsena a a salile ka Varefayimi. A lahliwe hi nkaxa wa ku yendliwa hi nsimbi* naswona wa ha li Raba ka tiko la Vaamoni. Nkaxa wolowo a wu lehe 4 wa mametru,* wu yanama kolomuyani ka mametru mambirhi* hi ku ya hi mapimelo ya ku toloveleka. 12 Hi nkama wolowo hi teke tiko lolelo: Ku sukela Arowa+ leli nga ka Nkova wa Arinoni ni hafu ya tiko leli nga ni tintshava la Jiliyadi, naswona madoropa ya lona ni ma nyike va ka Rubeni ni va ka Gadi.+ 13 Kasi ndhawu leyin’wani ya tiko la Jiliyadi ni tiko hinkwalu la Baxani leli nga mfumu wa Ogi, ni swi nyike hafu ya lixaka la Manasi.+ Ndhawu hinkwayu ya Argobi, leyi a yi li ya Baxani, a yi tiviwa swaku i tiko la Varefayimi.

14 “Yayiri+ n’wana wa Manasi a teke ndhawu hinkwayu ya Argobi+ ku ya fika lomu ndhawu ya va ka Jesuri ni va ka Mukati+ a yi tsema hi kona; a chule ndhawu yoleyo ya Baxani a ku i Avhoti-Yayiri,*+ yi vitanisiwa swoleswo anze namuntlha. 15 Kasi Makiri+ ni mu nyike tiko la Jiliyadi. 16 A va ka Rubeni ni va ka Gadi+ ni va nyike ku sukela aJiliyadi anze ka Nkova wa Arinoni, ndhawu ya vona yi tsema hi xikarhi ka nkova, anze Yaboki, nkova wa kona hi lani ndhawu ya Vaamoni yi tsemaka hi kona. 17 Ni va nyike ni Araba ni Nambu wa Yordani ni ndhawu ya lomu wu tsemaka hi kona, ku sukela aKinereti anze ka Lwandle la Araba, ku nga Lwandle la Munyu* ni le kusuhi* ni Pisiga hi le wuxeni.+

18 “Se ni mi byele leswi: ‘Yehovha Xikwembu xa n’wina a mi nyike tiko leli swaku mi li teka. Tinhenha ta n’wina hinkwatu ti ta khoma matlharhi ti tlulela ni vamakwenu, ku nga Vayisrayele.+ 19 Vasati va n’wina, vana va n’wina ni swifuyu swa n’wina (na swi tiva swaku mi ni swifuyu swa swinyingi) hi vona ntsena va nga ta sala va tshama ka madoropa lawa ni nga mi nyika wona, 20 anze Yehovha a humulisa vamakwenu ku fana ni leswi a nga mi yendlela swona n’wina; va ta teka tiko leli Yehovha Xikwembu xa n’wina a nga ta va nyika lona ka tlhelo lelin’wani la Yordani. Se mi ta gama mi vuya, mun’wani ni mun’wani a ta ya ka ndhawu leyi ni nga mu nyika yona swaku yi va tshomba la yena.’+

21 “Hi nkama wolowo ni byele Yoxuwa+ ni ku: ‘U swi vonile leswi Yehovha Xikwembu xa n’wina a nga swi yendla ka tihosi leti ta timbirhi. Yehovha a ta yendla swa ku fana ni leswi ka mimfumu hinkwayu leyi mi yaka mi ya lwa na yona.+ 22 Mi nga va chavi, hikusa Yehovha Xikwembu xa n’wina hi yena lweyi a nga ta mi lwela.’+

23 “Hi nkama wolowo, ni kombele Yehovha ni ku: 24 ‘Yehovha Hosi Leyikulu, u sungule ku ni komba mintirho ya wena ya ku hlamalisa ni matimba ya wena mina mutirheli wa wena,+ hikusa a xi kona xikwembu atilweni kumbe amisaveni lexi nga yendlaka mintirho ya ku hlamalisa ku fana ni ya wena.+ 25 Ni kombela u ni pfumelela ni tlulela ni ya vona tiko lalinene leli nga ka tlhelo lelin’wani la Yordani, ndhawu yayinene ya tintshava ni le Lebanoni.’+ 26 Kambe Yehovha a wa ha ni kwatelile hi mhaka ya n’wina+ naswona a nga ni yingisanga. Kambe Yehovha a te: ‘A swi gami kola! U nga ha tshuki u vulavula na mina hi mhaka leyi. 27 Famba u ya khwela henhla ka ntshava ya Pisiga,+ u txuvuka wupeladlambu, anorte,* asul* ni le wuxeni, u vona tiko hikusa a wu nga ta tlulela Nambu wa Yordani.+ 28 Langa Yoxuwa+ swaku a va murhangeli, u mu tiyisa, hikusa hi yena a nga ta rhangela Vayisrayele swaku va tlulela nambu+ naswona hi yena lweyi a nga ta va pfuna swaku va teka tiko leli u nga ta li vona.’ 29 Hinkwaswu leswi swi yendleke na ha ha tshama ka ndhawu leyi nga phambheni ka Beti-Peyori.+

4 “N’wina Vayisrayele, yingisani minawu ni swiboho swa ku yavanyisa leswi ni mi djondzisaka swona leswaku mi ta hanya+ mi tlhela mi teka tiko leli Yehovha Xikwembu xa vavhovho va n’wina a mi nyikaka lona. 2 Mi nga tshuki mi yengetela nchumu ka leswi ni mi byelaka swona naswona mi nga pumbi nchumu,+ leswaku mi ta kota ku yingisa minawu ya Yehovha Xikwembu xa n’wina leyi ni mi byelaka yona.

3 “Mi swi vonile leswi Yehovha a nga swi yendla ka mhaka ya Bali wa Peyori; Yehovha Xikwembu xa n’wina a dlaye hinkwavu lava va nga landzela Bali wa Peyori+ axikarhi ka n’wina. 4 Kambe n’wina mi nga khoma swi tiya ka Yehovha Xikwembu xa n’wina, ma ha hanya hinkwenu namuntlha. 5 Phela ni mi djondzise minawu ni swiboho swa ku yavanyisa,+ hi ku landza leswi Yehovha Xikwembu xa mina a nga ni rhuma swona, leswaku mi ta swi yingisa loko se mi li ka tiko leli mi nga ta li teka. 6 Mi fanele mi swi yingisa kahle+ hikusa loko mi yendla leswo vanhu lava va nga ta twa hi ta minawu leyi hinkwayu va ta swi vona swaku mi ni wutlharhi+ mi tlhela mi twisisa+ kutani va ta ku: ‘Vhela, tiko leli lalikulu i la vanhu va ku tlhariha ni va ku twisisa.’+ 7 Hikusa hi lini tiko leli swikwembu swa lona swi nga kusuhi na lona ku fana na Yehovha Xikwembu xa hina lweyi a nga kusuhi na hina loko hi mu vitana?+ 8 Naswona hi lini tiko lalikulu leli nga ni minawu yayinene ni swiboho swa ku yavanyisa swa ku fana ni Nawu lowu hinkwawu, lowu ni mi nyikaka wona namuntlha?+

9 “Kambe tivoneleni swaku mi nga swi khohlwi swilo leswi mi nga swi vona naswona swi nga suki ka timbilu ta n’wina wutomi la n’wina hinkwalu. Mi fanele mi tlhela mi swi byela vana ni vatukulu va n’wina.+ 10 A siku leli mi nga ya nyima hi lona phambheni ka Yehovha Xikwembu xa n’wina aHorebi, Yehovha a ni byele leswi: ‘Hlengeleta vanhu va ta ka mina swaku va ta twa leswi ni nga ta va byela swona,+ va ta djondza ku ni chava+ masiku hinkwawu lawa va nga ta hanya wona naswona va tlhela va djondzisa ni vana va vona.’+

11 “Kutani mi ta, mi fika mi nyima hansi ka ntshava, ntshava a yi pfurha ndzilu lowu a wu tuvika ku ya fika atilweni; a ku ni munyama ni marhefu naswona a ku yo mphum!+ 12 Yehovha a sungula ku vulavula na n’wina na a li xikarhi ka ndzilu.+ A mi twa rito kambe a mi nga voni munhu,+ a ko twala rito ntsena.+ 13 A mi byele ntwananu wa yena,+ lowu a nga mi rhuma swaku mi wu yingisa, ku nga 10 wa Minawu.+ Se a gama a yi tsala ka maribye mambirhi.*+ 14 Hi nkama wolowo, Yehovha a ni rhume swaku ni mi djondzisa minawu ni swiboho swa ku yavanyisa, leswi mi faneleke mi hanya hi swona ka tiko leli mi nga ta li teka swaku li va la n’wina.

15 “Kutani tivoneleni, hileswi mi kalaka mi nga vonanga munhu siku leli Yehovha a nga vulavula na n’wina aHorebi na a li xikarhi ka ndzilu, 16 leswaku mi nga yendli swa ku biha hi ku tiyendlela xifaniso xa ku vatliwa lexi fanaka ni nchumu xin’wani ni xin’wani, xifaniso xa wanuna kumbe xa wansati,+ 17 xifaniso xa xiharhi xin’wani ni xin’wani lexi nga misaveni, xifaniso xa xinyanyani xin’wani ni xin’wani lexi hahaka,+ 18 xifaniso xa xiharhi xin’wani ni xin’wani xa ku famba hi khwirhi kumbe xifaniso xa hlampfi yin’wani ni yin’wani leyi nga matini.+ 19 Naswona loko mi txuvuka tilweni mi vona dlambu ni n’weti ni tinyeleti, swilo hinkwaswu* swa le tilweni, mi nga tikanganyisi mi gama mi sungula ku swi khizamela mi swi gandzela.+ Yehovha Xikwembu xa n’wina a swi nyike vanhu hinkwavu lava nga misaveni. 20 Kambe hi n’wina vanhu lava Yehovha a nga va humesa awukaraweni aGibita, lomu a ku hisa ku fana ni xitiko lexi dereterisaka nsimbi, leswaku mi ta va vanhu va yena*+ ku nga leswi mi nga swona namuntlha.

21 “Yehovha a ni kwatelile hi mhaka ya n’wina+ kutani a funga swaku a ni nge wu tluleli Nambu wa Yordani, hambi ku ya ka tiko lalinene leli Yehovha Xikwembu xa n’wina a mi nyikaka lona swaku li va tshomba la n’wina.+ 22 Hikusa ni ta fela ka tiko leli; a ni nge wu tluleli Nambu wa Yordani,+ kambe n’wina mi ta wu tlulela mi ya teka tiko lalinene swaku li va tshomba la n’wina. 23 Tivoneleni swaku mi nga khohlwi ntwananu lowu Yehovha Xikwembu xa n’wina a nga wu yendla na n’wina,+ naswona mi nga tiyendleli xifaniso xa ku vatliwa, xa ku fana ni nchumu lexi Yehovha Xikwembu xa n’wina a nga mi byela swaku mi nga xi yendli.+ 24 Hikusa Yehovha Xikwembu xa n’wina i ndzilu lowu helisaka,+ i Xikwembu lexi lavaka swaku vanhu va gandzela xona ntsena.+

25 “Loko mi va ni vana ni vatukulu mi tlhela mi hanya nkama wa wunyingi atikweni, mi gama mi djoha hi ku yendla xifaniso xa ku vatliwa,+ mi djohela Yehovha Xikwembu xa n’wina mi mu kwatisa,+ 26 namuntlha, ni teka matilo ni misava swi va timboni ta mina, swaku loko mo yendla leswo mi ta fa hikakunene ka tiko leli mi tlulelaka Yordani swaku mi ya li teka. A mi nga ta hanya nkama wa wunyingi kambe mi ta helisiwa.+ 27 Yehovha a ta mi hangalasa,+ mi ta sala na mi li vatsongo+ xikarhi ka matiko lawa Yehovha a nga ta mi hlongola mi ya ka wona. 28 Ka matiko wolawo, mi ta sindziseka ku gandzela swikwembu leswi nga yendliwa hi xigodo ni ribye leswi nga yendliwa hi munhu,+ swikwembu swa ku kala swi nga voni kumbe ku twa kumbe ku dla kumbe ku nun’hwetela.

29 “Loko mo lava Yehovha Xikwembu xa n’wina na mi li kolanu, tiyisekani swaku mi ta mu kuma+ loko mi mu lavetela hi mbilu ya n’wina hinkwayu ni hi wutomi la n’wina hinkwalu.+ 30 Loko mi hlupheka swinene naswona mi humeleliwa hi swilo leswi hinkwaswu ka nkama lowu taka, mi ta tlhelela ka Yehovha Xikwembu xa n’wina, mi yingisa rito la yena.+ 31 Hikusa Yehovha Xikwembu xa n’wina i Xikwembu xa timpsalu.+ A nge mi tshiki, kumbe a mi helisa kumbe a khohlwa ntwananu lowu a nga wu yendla* ni vavhovho va n’wina.+

32 “Vutisani hi ta minkama leyi nga hundza na mi nge se va kona, ku sukela siku leli Xikwembu xi nga tumbuluxa munhu amisaveni; lavetelani ku sukela ka magamu man’wani ya matilo ku ya fika ka magamu man’wani ya matilo. Phela a ku se tshama ku yendleka swilo swaswikulu swa ku tshamisa xileswi kumbe ku twiwa nchumu wa ku fana ni lowu!+ 33 Phela a va kona vanhu van’wani lava va nga tshama va twa rito la Xikwembu xikarhi ka ndzilu ku fana ni leswi n’wina mi nga li twa mi tlhela mi tama mi hanya!+ 34 Phela Xikwembu a xi se tshama xi teka lixaka lin’wani xikarhi ka lixaka lin’wani hi ku tirhisa makhombo,* swikombiso, masingita,+ nyimpi,+ voko la matimba,+ ni matimba ya xona yamakulu* ni hi mintirho ya ku chavisa,+ ku fana ni leswi Yehovha Xikwembu xa n’wina a nga mi yendlela swona aGibita na mi swi vona hi matihlo ya n’wina! 35 N’wina mi kombiwe swilo leswi, swaku mi ta swi tiva swaku Yehovha i Xikwembu xa ntiyiso;+ a ku na mun’wani handle ka yena.+ 36 A mi yendle mi twa rito la yena na li huma matilweni leswaku a mi lulamisa, a tlhela a yendla swaku mi vona ndzilu wawukulu amisaveni naswona mi twe marito ya yena na ma huma xikarhi ka ndzilu.+

37 “A mi humese Gibita hi matimba ya yena yamakulu hi mhaka ya leswi a a rhandza vavhovho va n’wina kutani a langa vana* va vona.+ 38 A hlongole matiko yamakulu lama nga ni matimba ku mi tlula, leswaku a mi tisa ka tiko la wona a tlhela a mi nyika lona swaku li va tshomba la n’wina ku nga leswi mi swi vonaka namuntlha.+ 39 Se mi fanele mi swi tiva namuntlha mi tlhela mi swi khumbuka swaku Yehovha i Xikwembu xa ntiyiso, amatilweni ni lani misaveni.+ A ku na mun’wani.+ 40 Mi fanele mi hlayisa hinkwaswu leswi a mi byelaka swona ni minawu ya yena leyi ni mi byelaka yona namuntlha, leswaku swi ta mi fambela kahle n’wina ni vana va n’wina, mi tlhela mi hanya nkama wa ku leha ka tiko leli Yehovha Xikwembu xa n’wina a mi nyikaka lona.”+

41 Hi nkama wolowo, Moxe a lange madoropa manharhu lawa ma nga wuxeni ka Yordani.+ 42 Loko munhu o tshuka a dlaya munhu mun’wani na ku nga li hi maxivomu naswona a nga mu nyenyi,+ a fanele a baleka a ya ka lin’wani la madoropa wolawo swaku a nga dlayiwi.+ 43 Madoropa ya kona hi lawa: Doropa la Bezeri+ leli nga mananga li ta tirhisiwa hi va ka Rubeni, doropa la Ramoti+ leli nga Jiliyadi li ta tirhisiwa hi va ka Gadi se doropa la Golani+ leli nga Baxani li ta tirhisiwa hi va ka Manasi.+

44 Lowu i Nawu+ lowu Moxe a nga wu nyika Vayisrayele. 45 Leswi i switsundzuxu, minawu ni swiboho swa ku yavanyisa leswi Moxe a nga swi nyika Vayisrayele loko se va hume Gibita,+ 46 adixtritu la Yordani ka nkova lowu nga kusuhi ni Beti-Peyori,+ ka tiko la Hosi Sihoni wa Vaamori, lweyi a a tshama aExiboni,+ lweyi Moxe ni Vayisrayele va nga mu hlula loko se va hume Gibita.+ 47 Va teke tiko la yena ni tiko la Hosi Ogi+ wa le Baxani ku nga tihosi timbirhi ta Vaamori leti a ti li wuxeni la dixtritu la Nambu wa Yordani, 48 ku sukela aArowa+ ku nga tiko leli nga ka ndhawu leyi nga ka Nkova wa Arinoni, ku ya ka Ntshava ya Sayoni ku nga Hermoni,+ 49 ni dixtritu hinkwalu la Araba awuxeni la Yordani ku ya fika ka Lwandle la Araba* ahansi ka maganga ya Pisiga.+

5 Kutani Moxe a vitana tiko hinkwalu la Israyele a li byela leswi: “Yingisa wena Israyele, minawu ni swiboho swa ku yavanyisa leswi ni mi byelaka swona namuntlha, mi fanele mi swi djondza mi tlhela mi swi yingisa. 2 Yehovha Xikwembu xa hina a yendle ntwananu na hina aHorebi.+ 3 Ntwananu lowu Yehovha a nga wu yendlanga ni vavhovho va hina, kambe a wu yendle na hina hinkwerhu lava hi nga kona lani namuntlha. 4 Yehovha a vulavule na n’wina hi ku kongoma ka ntshava, na a li xikarhi ka ndzilu.+ 5 Hi nkama wolowo+ a ni nyime xikarhi ka Yehovha na n’wina leswaku ni ta mi byela leswi Yehovha a swi hlayaka, hikusa a mi chava ndzilu naswona a mi yanga ka ntshava.+ A te:

6 “‘Hi mina Yehovha Xikwembu xa wena, lweyi a nga ku humesa ka tiko la Gibita lomu a wu li xikarawa.*+ 7 U nga tshuki u va ni swikwembu swin’wani loko ku nga li mina.+

8 “‘U nga tshuki u tiyendlela xifaniso xa ku vatliwa+ kumbe xifaniso xa nchumu lexi nga matilweni, kumbe lexi nga misaveni kumbe lexi nga matini hansi ka misava. 9 U nga tshuki u swi khizamela kumbe u xengiwa ku swi tirhela,+ hikusa mina Yehovha Xikwembu xa wena, ni Xikwembu lexi lavaka ku gandzeliwa xona ntsena,+ naswona ni Xikwembu lexi khatisaka vana hi mhaka ya xidjoho xa vapapayi va vona ni tlhela ni yendla leswo ka vatukulu* va vona ni ka lixaka la wu 4 ka lava va ni nyenyaka,+ 10 kambe ni rhandza lava va ni rhandzaka va tlhela va yingisa minawu ya mina, anze ka lixaka la wu 1.000.

11 “‘U nga tshuki u tlanga hi vito la Yehovha Xikwembu xa wena,+ hikusa Yehovha a nge tshiki ku khatisa lweyi a tlangaka hi vito la yena.+

12 “‘Hlayisa siku la Savata, u li vona na li kwetsima hi ku landza leswi Yehovha Xikwembu xa wena a nga ku byela swona.+ 13 U fanele u yendla mintirho ya wena hinkwayu hi 6 wa masiku ntsena,+ 14 kambe siku la wu 7, li ta va savata la Yehovha Xikwembu xa wena.+ U nga tshuki u yendla ntirho ni wun’we,+ wena kumbe n’wana wa wena wa djaha kumbe wa ntombhi kumbe xikarawa xa wena xa xinuna kumbe xa xisati kumbe homu ya wena kumbe mbongolo ya wena kumbe swifuyu swa wena kumbe munhu wa tiko lin’wani lweyi u tshamaka na yena,+ leswaku xikarawa xa wena xa xinuna kumbe xa xisati xi ta humula ku fana na wena.+ 15 Khumbuka swaku a wu li xikarawa ka tiko la Gibita, kambe Yehovha Xikwembu xa wena a ku humesile hi voko la yena la matimba,+ ni matimba ya yena yamakulu.* Hi leswo swi nga yendla Yehovha Xikwembu xa wena a ku byela swaku u hlayisa siku la Savata.

16 “‘Hlonipha papayi wa wena ni mamani wa wena,+ hi ku landza leswi Yehovha Xikwembu xa wena a nga ku byela swona, swaku u ta hanya masiku ya manyingi naswona swi ta ku fambela kahle ka tiko leli Yehovha Xikwembu xa wena a ku nyikaka lona.+

17 “‘U nga tshuki u dlaya.+

18 “‘U nga tshuki u mbuyeta.+

19 “‘U nga tshuki u yiva.+

20 “‘U nga tshuki u hemba loko u fakaza mhaka hi munhu mun’wani.+

21 “‘U nga tshuki u navela nsati wa munhu mun’wani.+ U nga tshuki u navela yindlo ya munhu mun’wani hi ndlela ya ku biha kumbe nsimu ya yena kumbe xikarawa xa yena xa xinuna kumbe xa xisati kumbe homu ya yena kumbe mbongolo ya yena kumbe nchumu xin’wani ni xin’wani lexi nga xa yena.’+

22 “Yehovha a vule marito lawa ka n’wina hinkwenu ka ntshava, na a li xikarhi ka ndzilu ni rhefu la ku mphuma li ku mphum,+ hi rito lalikulu, a nga yengetelanga nchumu ka marito wolawo; se a game a ma tsala ka maribye mambirhi* kutani a ni nyika wona.+

23 “Kambe hi ku hantlisa, nkama mi nga twa rito li huma xikarhi ka rhefu la ku mphuma, hi nkama wolowo ntshava a yi li ku pfurheni,+ se varhangeli hinkwavu va tinxaka ta n’wina ni madoda va ta ka mina. 24 Se mi ku: ‘Yehovha Xikwembu xa hina a hi kombe ku phatima ni matimba ya yena naswona hi twe rito la yena na li huma xikarhi ka ndzilu.+ Namuntlha hi swi vonile swaku Xikwembu xi nga vulavula ni munhu a tlhela a tama a hanya.+ 25 Kutani hi mhaka muni hi fanele hi fa? Phela ndzilu lowu wawukulu wu nga hi heta. Loko ho tama hi twa rito la Yehovha Xikwembu xa hina, hi ta fa a hi nge poni. 26 Hikusa i mani ka vanhu hinkwavu lweyi a nga tshama a twa Xikwembu na xi vulavula xikarhi ka ndzilu ku fana na hina hi nga xi twa, a tlhela a tama a hanya? 27 Wena u fanele u tshinela u ya twa hinkwaswu leswi Yehovha Xikwembu xa hina a nga ta swi vula, se u ta vuya u ta hi byela hinkwaswu leswi Yehovha Xikwembu xa hina a nga ku byela swona naswona hi ta swi yingisa hi tlhela hi swi yendla.’+

28 “Se Yehovha a swi twile leswi mi nga ni byela swona, kutani Yehovha a ni byela leswi: ‘Ni swi twile leswi vanhu lava va nga ku byela swona. Hinkwaswu leswi va nga swi hlaya i swinene.+ 29 Loko ntsena a vo va ni mbilu leyi yi nga tinyimisela ku ni chava minkama hinkwayu+ ni ku hlayisa minawu ya mina hinkwayu;+ a swi ta va fambela kahle, vona ni vana va vona hi masiku ni masiku!+ 30 Famba u ya va byela u ku: “Tlhelelani ka matende ya n’wina.” 31 Kambe wena u fanele u sala kola na mina, ni ta ku byela hinkwaswu leswi ni swi lavaka, minawu ni swiboho swa ku yavanyisa leswi u faneleke u va djondzisa swona ni leswi va faneleke va swi yingisa ka tiko leli ni nga ta va nyika lona leswaku va li teka.’ 32 Kutani n’wina mi fanele mi tinyimisela ku yendla leswi Yehovha Xikwembu xa n’wina a mi rhumaka swona.+ Mi nga tshuki mi djika mi ya ka xinene kumbe ka ximatsi.+ 33 Mi fanele mi hanya hi ku landza leswi Yehovha Xikwembu xa n’wina a nga mi byela swaku mi hanyisa swona,+ leswaku swi ta mi fambela kahle, mi tlhela mi hanya nkama wa wunyingi ka tiko leli mi nga ta li teka.+

6 “Leyi i minawu, ni swiboho swa ku yavanyisa leswi Yehovha Xikwembu xa wena a nga ni nyika swaku ni ku djondzisa swona. U ta hanya hi swona loko u tlulela nambu u ya ka tiko leli u nga ta li teka, 2 leswaku u ta chava Yehovha Xikwembu xa wena u tlhela u yingisa minawu ya yena hinkwayu, ni hinkwaswu leswi a ku byelaka swona, wena ni vana va wena ni vatukulu va wena,+ wutomi la wena hinkwalu, swaku u ta hanya masiku ya manyingi.+ 3 U fanele u swi yingisa wena Israyele, u swi landzela kahle swaku swi ta ku fambela kahle u tlhela u tala ka tiko leli nga tala hi leiti ni wulombe, ku nga leswi Yehovha Xikwembu xa vavhovho va wena a nga ku tshembisa swona.

4 “Yingisa, wena Israyele: Yehovha Xikwembu xa hina i Yehovha mun’we.+ 5 U fanele u rhandza Yehovha Xikwembu xa wena hi mbilu ya wena hinkwayu, hi wutomi la wena hinkwalu+ ni hi matimba ya wena hinkwawu.+ 6 Marito lawa ni ku byelaka wona namuntlha, u fanele u ma hlayisa ka mbilu ya wena, 7 u fanele u ma djondzisa vana va wena+ hi ku phindhaphindha, naswona u vulavula hi wona loko u tshamile kaya, loko u li ndleleni, loko u yetlela ni loko u pfuka.+ 8 Ma boheleli ka voko la wena swaku ma ta va xitsundzuxu naswona ma fanele ma va marka ka ximombo xa wena.+ 9 Ma tsali ka maaru ya swipfalu swa yindlo ya wena ni ka swipfalu swaswikulu swa doropa.

10 “Loko Yehovha Xikwembu xa wena a ku yisa ka tiko leli a nga tshembisa vavhovho va wena ku nga Abrahamu, Izaki na Yakobe swaku a ta ku nyika lona,+ madoropa yamakulu ya ku saseka lawa ma kalaka ma nga yakiwanga hi wena,+ 11 tiyindlo leti nga tala hi swilo swaswinene leswi u kalaka u nga swi tirhelanga, swihlovo leswi u kalaka u nga swi txelanga ni masimu ya mawuvha ni minsinya ya mawolivhera leyi u kalaka u nga yi byalanga, u gama u dla u xurha,+ 12 tivoneli swaku u nga mu khohlwi Yehovha,+ lweyi a nga ku humesa awukaraweni* ka tiko la Gibita. 13 U fanele u chava Yehovha Xikwembu xa wena+ naswona u fanele u gandzela yena ntsena,+ u fanele u funga hi vito la yena.+ 14 A wu fanelanga u landzela swikwembu swin’wani, swikwembu swa vanhu lava va nga matlhelweni ka wena,+ 15 hikusa Yehovha Xikwembu xa wena lweyi a nga xikarhi ka n’wina i Xikwembu lexi lavaka ku gandzeliwa xi li xoxe.+ Loko u nga yendli leswo, Yehovha Xikwembu xa wena a ta ku kwatela hintamu+ a ku helisa.+

16 “Mi nga tshuki mi ringa Yehovha Xikwembu xa n’wina,+ ku fana ni leswi mi nga mu ringisa xiswona aMasa.+ 17 Mi fanele mi yingisa kahle hinkwaswu leswi Yehovha Xikwembu xa n’wina a nga mi byela swona ni switsundzuxu swa yena ni minawu ya yena leyi a nga mi byela swaku mi yi yingisa. 18 Mi fanele mi yendla swaswinene leswi tsakisaka Yehovha, swaku swi ta mi fambela kahle ni swaku mi ta nghena mi teka tiko lalinene leli Yehovha a nga li fungela vavhovho va n’wina,+ 19 hi ku hlongola valala va n’wina hinkwavu phambheni ka n’wina hi ku landza leswi Yehovha a nga swi tshembisa.+

20 “Loko n’wana wa wena o tshuka a ku vutisa ka nkama lowu taka a ku: ‘Kasi switsundzuxu, minawu ni swiboho swa ku yavanyisa leswi Yehovha Xikwembu xa hina a nga ku byela swona swi vula yini ke?’ 21 U ta mu hlamula u ku: ‘A hi li swikarawa swa Faru aGibita, kambe Yehovha a hi humesile hi voko la yena la matimba. 22 Yehovha a tame a yendla swilo swa ku hlamalisa ni masingita leswi nga hlasela Vagibita,+ Faru ni hinkwavu vandjangu wa yena+ naswona hi swi vonile hi matihlo ya hina. 23 Naswona a hi humese Gibita a hi tisa lani swaku a ta hi nyika tiko leli a nga li fungela vavhovho va hina.+ 24 Kutani Yehovha a hi byele swaku hi yingisa minawu leyi hinkwayu ni ku chava Yehovha Xikwembu xa hina swaku swi ta hi fambela kahle minkama hinkwayu,+ leswaku hi ta tama hi hanya+ ku nga leswi u swi vonaka namuntlha. 25 Hi ta voniwa na hi lulamile loko hi yingisa ni ku yi landzela kahle minawu leyi hinkwayu ya Yehovha Xikwembu xa hina leyi a nga hi nyika yona.’+

7 “Loko Yehovha Xikwembu xa wena a ku nghenisa ka tiko leli u nga kusuhi ni ku nghena ka lona u li teka,+ a ta tlhela a susa matiko lawa ma nga ni vanhu va vanyingi phambheni ka wena:+ Ku nga Vaheti, Vagirgaxa, Vaamori,+ Vakanana, Vaperezi, Vahivhi ni Vayebusi;+ 7 wa matiko lama nga ni vanhu va vanyingi ma tlhela ma va ni matimba ku ku tlula.+ 2 Yehovha Xikwembu xa wena a ta ma nyiketa ka wena naswona u ta ma hlula.+ Phela u fanele u ma helisa.+ U nga tshuki u yendla ntwananu na wona kumbe u ma twela wusiwana.+ 3 U nga tshuki u chada na vona. U nga pfumeleli swaku vana va wena va tintombhi va tekiwa hi vana va vona va madjaha, kumbe u teka vana va vona va tintombhi swaku va va vasati va vana va wena va madjaha.+ 4 Hikusa va ta hambukisa vana va wena va madjaha kuva va nga ha ni landzeli, se va ya tirhela swikwembu swin’wani;+ kutani Yehovha a ta ku kwatela naswona a ta ku helisa hi ku hantlisa.+

5 “Kambe mi fanele mi va yendla leswi: Hahlulani maaltari ya vona, mi diliza mapilari+ lawa va nga ma yendla swikwembu swa vona, mi tsemelela timhandzi ta vona+ ta Axera,* mi hisa ni swifaniso swa vona leswi va swi gandzelaka.+ 6 Hikusa mi vanhu va ku kwetsima ka Yehovha Xikwembu xa n’wina naswona Yehovha Xikwembu xa n’wina a mi langile swaku mi va vanhu va yena, tshomba la yena la lisima xikarhi ka vanhu hinkwavu lava va nga misaveni.+

7 “Phela Yehovha a nga mi rhandzanga a tlhela a mi langa+ hi mhaka ya leswi a mi li vanyingi ku tlula vanhu hinkwavu, hikusa a mi li vatsongo ku tlula vanhu hinkwavu.+ 8 Kambe a ku li hi mhaka ya leswi Yehovha a a mi rhandza ni hi mhaka ya xitshembiso lexi a nga xi yendlela vavhovho va n’wina,+ se Yehovha a mi humesile hi voko la matimba leswaku a mi ponisa ka wukarawa,*+ ka voko la Faru hosi ya Gibita. 9 Mi swi tiva kahle swaku Yehovha Xikwembu xa n’wina i Xikwembu xa ntiyiso, Xikwembu xa ku tshembeka, lexi hlayisaka ntwananu wa xona ni ku tshembeka* ku fikela ka lixaka la wu 1.000 la lava va mu rhandzaka va tlhela va yingisa minawu ya yena.+ 10 Kambe a ta helisa+ lava va mu nyenyaka. A nge hlweli ku helisa lava va mu nyenyaka. 11 Kutani hlayisani minawu ni swiboho swa ku yavanyisa ni hinkwaswu leswi ni mi byelaka swona namuntlha, mi swi yingisa.

12 “Loko mo tama mi yingisa swiboho leswi swa ku yavanyisa mi tlhela mi swi hlayisa, Yehovha Xikwembu xa n’wina a ta hlayisa ntwananu ni lirhandzu, ku nga leswi a nga swi fungela vavhovho va n’wina. 13 A ta mi rhandza ni ku mi katekisa, a tlhela a yendla swaku mi va vanyingi. A ta mi katekisa hi vana va vanyingi,+ hi misava leyi humesaka mihandzu ya yinyingi, trigu la n’wina, vhinyu la n’wina la nyuwani, mafurha ya n’wina,+ swihon’wani swa tihomu ta n’wina ni swinyempfani swa tinyempfu ta n’wina, ka tiko leli a nga li fungela vavhovho va n’wina swaku a ta mi nyika lona.+ 14 Mi ta va lava nga katekisiwa ku tlula vanhu hinkwavu;+ a ku nga ta va ni wanuna kumbe wansati xikarhi ka n’wina lweyi a kalaka a nga na vana kumbe swifuyu swa n’wina leswi kalaka swi nga psali.+ 15 Yehovha a ta mi susela mavabyi hinkwawu, a nge mi tiseli mavabyi ya ku chavisa lawa mi nga ma vona aGibita.+ Kambe a ta ma yisa ka vanhu hinkwavu lava va mi nyenyaka. 16 Mi fanele mi helisa vanhu hinkwavu lava Yehovha Xikwembu xa n’wina a va nyiketaka ka n’wina.+ A mi fanelanga mi va tsetselela+ naswona a mi fanelanga mi tirhela swikwembu swa vona,+ hikusa leswo swi ta va ntlhamu ka n’wina.+

17 “Loko wo tshuka u vula leswi ka mbilu ya wena: ‘Matiko lawa ma ni vanhu va vanyingi ku ni tlula. Ni nga swi kotisa ku yini ku va hlongola?’+ 18 U nga va chavi.+ U fanele u khumbuka leswi Yehovha Xikwembu xa wena a nga swi yendla ka Faru ni le ka Vagibita hinkwavu,+ 19 makhombo* lawa u nga ma vona, masingita,+ voko la matimba ni matimba yamakulu lawa Yehovha Xikwembu xa wena a nga ku humesa hi wona.+ Hi leswo, leswi Yehovha Xikwembu xa wena a nga ta swi yendla ka vanhu hinkwavu lava u va chavaka.+ 20 Yehovha Xikwembu xa wena a ta yendla swaku va hela matimba* anze lava va nga sala+ ni lava va nga ku tumbelela va hela. 21 U nga va chavi hikusa Yehovha Xikwembu xa wena a na wena,+ i Xikwembu xaxikulu lexi vanhu va faneleke va xi chava va tlhela va xi hlonipha.+

22 “Yehovha Xikwembu xa wena a ta hlongola matiko lawa hi kutsongokutsongo.+ A nge pfumeleli swaku u va helisa hi ku hantlisa, hikusa swiharhi swa le khwatini swi nga tala hintamu ku ku tlula. 23 Yehovha Xikwembu xa wena a ta va nyiketa ka wena kutani a va hlula hi ku helela, anze va hela.+ 24 A ta nyiketa tihosi ta vona ka voko la wena,+ naswona wena u ta helisa mavito ya tona misaveni.+ A ku na munhu ni mun’we lweyi a nga ta ku tiyela+ anze u va heta hinkwavu.+ 25 U fanele u hisa swifaniso swa swikwembu swa vona leswi nga vatliwa.+ U nga tshuki u navela prata ni woru leli swi nga yendliwa hi lona,+ naswona u nga swi teki leswaku swi nga ku xengi hikusa i swilo leswi nyenyentsaka ka Yehovha Xikwembu xa wena.+ 26 U nga tshuki u teka nchumu xa ku nyenyentsa u xi yisa kaya ka wena swaku u nga helisiwi ku fana na xona. U fanele u xi nyenya hintamu, hikusa i nchumu lexi nga ta helisiwa.

8 “Mi fanele mi yingisa minawu hinkwayu leyi ni mi nyikaka yona namuntlha, swaku mi ta tama mi hanya+ naswona mi va vanyingi kutani mi nghena mi teka tiko leli Yehovha a nga li fungela vavhovho va n’wina.+ 2 Khumbuka ndlela ya ku leha leyi Yehovha Xikwembu xa wena a nga ku fambisa hi yona malembe lawa ya 40 amananga,+ swaku a ku djondzisa ku tiveka hansi ni ku ku ringa+ swaku a ta tiva leswi nga ka mbilu ya wena,+ kuva a vona swaku u ta yingisa minawu ya yena kumbe a wu nga ta yi yingisa. 3 A ku djondzise ku tiveka hansi, a ku tshika u fa hi ndlala+ a gama a ku nyika mana,+ leyi hambi wena kumbe vapapayi va wena a mi nga yi tivi, swaku u ta swi tiva swaku munhu a nga hanyi hi pawu ntsena, kambe munhu a hanya hi rito lin’wani ni lin’wani leli humaka hi ka nomo wa Yehovha.+ 4 Mpahla leyi a wu yi yambala a yi hlakalanga hambi minenge ya wena a yi pfimbanga ka malembe lawa ya 40.+ 5 U swi tiva kahle ka mbilu ya wena swaku Yehovha Xikwembu xa wena a o ku laya, ku fana ni munhu lweyi a layaka n’wana wa yena.+

6 “Kutani u fanele u yingisa minawu ya Yehovha Xikwembu xa wena hi ku famba ka tindlela ta yena u tlhela u mu chava. 7 Hikusa Yehovha Xikwembu xa wena a ku yisa ka tiko lalinene,+ tiko la minambu, swihlovo ni tindhawu* leti nga ni mati ya ku yenta lawa ma fambaka ma ya ka minkova ni lomu ku nga ni tintshava, 8 tiko la trigu ni maxalani, mawuvha, minkuwa ni ma romã,+ tiko la mafurha ya wolivhera ni wulombe,+ 9 tiko leli swakudla swi nga ta va swinyingi naswona a wu nge pfumali nchumu, tiko leli maribye ya lona ma nga ni nsimbi naswona ka tintshava ta lona u ta txela kobre.

10 “Loko se u dlile u xurha, u fanele u dzunisa Yehovha Xikwembu xa wena hi mhaka ya tiko lalinene leli a nga ku nyika lona.+ 11 Tivoneli swaku u nga mu khohlwi Yehovha Xikwembu xa wena lakakuva u tshika ku yingisa minawu ya yena ni swiboho swa yena swa ku yavanyisa leswi ni ku byelaka swona namuntlha. 12 Loko u dla u xurha kutani u yaka tiyindlo ta ku saseka u tshama ka tona,+ 13 loko tihomu ta wena ni tinyempfu ta wena swi tala ni prata la wena ni woru li yengeteleka, se u va ni minchumu ya yinyingi, 14 u nga tibyeli,*+ u khohlwa Yehovha Xikwembu xa wena lweyi a nga ku humesa awukaraweni,*+ ka tiko la Gibita, 15 lweyi a nga yendla swaku u famba ka mananga yamakulu, lawa ma chavisaka,+ lama nga ni tinyoka leti nga ni vhenenu,* ni swizavanani ni misava leyi nga woma leyi kalaka yi nga na mati. A ku humesele mati ka ribye,+ 16 a ku nyika mana+ amananga, leyi vapapayi va wena va kalaka va nga yi tivanga swaku a ku djondzisa ku tiveka hansi,+ ni ku ku ringa swaku swi ta ku fambela kahle ka nkama lowu taka.+ 17 Loko wo tikhuza u ku: ‘Matimba ya mina ni mavoko ya mina hi swona leswi nga yendla swaku ni ganya,’+ 18 khumbuka swaku lweyi a nga ku nyika matimba ya ku tirha+ swaku u ganya i Yehovha Xikwembu xa wena, ku yendlela swaku a tiyisa ntwananu wa yena lowu a nga wu fungela vavhovho va wena, ku nga leswi hi swi vonaka namuntlha.+

19 “Loko wo tshuka u khohlwa Yehovha Xikwembu xa wena kutani u landzela swikwembu swin’wani u swi tirhela ni ku swi khizamela, na funga namuntlha swaku phela u ta helisiwa.+ 20 U ta helisiwa ku fana ni matiko lawa Yehovha a ma helisaka phambheni ka wena, hikusa a wu li yingisanga rito la Yehovha Xikwembu xa wena.+

9 “Yingisa wena Israyele, namuntlha u tlulela Nambu wa Yordani+ swaku u nghena u tekela matiko yamakulu ni lama nga ni matimba ku ku tlula,+ madoropa yamakulu ni lawa ma nga ni mimuru ya ku leha ku ya fika matilweni,+ 2 vanhu va matimba va tlhela va leha, vana va Anaki,+ lava u va tivaka naswona u nga twa ku hlayiwa leswi hi vona: ‘I mani lweyi a nga tiyelaka vana va Anaki?’ 3 Se u fanele u swi tiva namuntlha swaku Yehovha Xikwembu xa wena a ta ku rhangela loko u tlulela nambu.+ Yena i ndzilu lowu helisaka+ naswona a ta va helisa. A ta va hlula na u va txuvukile swaku u ta hantla u va hlongola ni ku va helisa, hi ku landza leswi Yehovha a nga ku tshembisa swona.+

4 “Nkama Yehovha Xikwembu xa wena a nga ta va hlongola phambheni ka wena, u nga tibumi mbilwini ya wena u ku: ‘Yehovha a ni tise swaku ni ta teka tiko leli hi mhaka ya ku lulama ka mina.’+ Kambe Yehovha a hlongola matiko+ lawa phambheni ka wena hi mhaka ya leswi ma yendlaka swilo swa ku biha. 5 A hi mhaka ya ku lulama ka wena kumbe wunene la mbilu ya wena u zaka u nghena ka tiko la vona. Kambe hi mhaka ya swilo swa ku biha leswi yendliwaka hi matiko lawa; Yehovha Xikwembu xa wena wa ma hlongola phambheni ka wena+ swaku a tiyisa rito leli Yehovha a nga li fungela vavhovho va wena, ku nga Abrahamu,+ Izaki+ na Yakobe.+ 6 Se swi tivi swaku a hi mhaka ya ku lulama ka wena leswi Yehovha Xikwembu xa wena a zaka a ku nyika tiko leli lalinene swaku u li teka, hikusa mi vanhu va nkanu.*+

7 “Khumbukani leswi, mi nga tshuki mi khohlwa leswi mi nga mu kwatisisa swona Yehovha Xikwembu xa n’wina amananga.+ Mi terekele Yehovha ku sukela siku leli mi nga huma hi lona ka tiko la Gibita anze mi ta fika ka ndhawu leyi.+ 8 Hambi aHorebi mi kwatise Yehovha naswona Yehovha a a mi kwatele hintamu lakakuva a a lava ni ku mi helisa.+ 9 Nkama ni nga ya ka ntshava swaku ni ya yamukela maribye* ya ntwananu,+ lowu Yehovha a nga wu yendla na n’wina,+ ni tshame 40 wa masiku ka ntshava, wusiku ni nhlikanhi,+ na ni nga dli nchumu naswona na ni nga nwi mati. 10 Se Yehovha a ni nyika maribye mambirhi lawa ma nga tsaliwa hi litiho la Xikwembu, naswona ka wona a ku tsaliwe marito hinkwawu lawa Yehovha a nga mi byela wona ka ntshava na a li xikarhi ka ndzilu hi siku leli a mi hlengeletanile hi lona.+ 11 Nkama ku nga hela 40 wa masiku, wusiku ni nhlikanhi, Yehovha a game a ni nyika maribye mambirhi ya ntwananu, 12 Yehovha a ni byela leswi: ‘Xika hi ku hantlisa, hikusa vanhu va wena lava u nga va humesa Gibita se va djohile.+ A va hlwelanga ku hambuka ka ndlela leyi ni nga va byela swaku va famba hi yona. Va tiyendlele xifaniso.’+ 13 Kutani Yehovha a ni byela leswi: ‘Phela na swi vona swaku vanhu lava, va tiyele tinhloko.*+ 14 Ni tshiki, ni ta va helisa ni tima mavito ya vona hansi ka matilo, se ni ta gama ni ku yendla u va tiko leli nga ni matimba ni leli nga ni vanhu va vanyingi ku va tlula.’+

15 “Se ni ndzuluka ni xika ka ntshava, ntshava na yi pfurha ndzilu+ naswona maribye mambirhi ya ntwananu na ma li ka mavoko ya mina.+ 16 Nkama ni nga txuvuka, ni vone swaku se mi djohele Yehovha Xikwembu xa n’wina! Mi tiyendlele xifaniso xa xihon’wani.* A mi hlwelanga ku hambuka ka ndlela leyi Yehovha a nga mi byela swaku mi famba hi yona.+ 17 Kutani ni khoma maribye mambirhi ni ma txukumetela hansi, ni ma pfotlosa phambheni ka n’wina.+ 18 Se ni khizama phambheni ka Yehovha ku fana ni le ku sunguleni, ku ringana 40 wa masiku, wusiku ni nhlikanhi. A ni zanga ni dla nchumu kumbe ku nwa mati,+ hi mhaka ya swidjoho swa n’wina hinkwaswu leswi mi nga swi yendla, hi ku yendla swilo swa ku nyenyentsa phambheni ka Yehovha mi mu kwatisa. 19 Hikusa a ni chava hi mhaka ya leswi Yehovha a a mi kwatelile hintamu+ lakakuva a a lava ni ku mi helisa. Kambe Yehovha a tlhele a ni yingisa hi nkama wolowo.+

20 “Na yena Aroni Yehovha a a mu kwatele swinene lakakuva a lava ni ku mu dlaya,+ kambe ni mu khongelelile ni kombela swaku a rivaleliwa. 21 Kutani ni teka nchumu lexi nga mi djohisa, ku nga xihon’wani,+ ni xi hisa hi ndzilu; ni xi pfotlosela, ni tlhela ni xi sila swinene xi za xi fana ni wuthulu ni gama ni teka wuthulu lolelo ni li hoxa ka nambu wawutsongo lowu mati ya kona a ma huma hi ka ntshava.+

22 “A swi gamelanga lanu, mi tlhele mi kwatisa Yehovha aTabera,+ aMasa+ ni le Kibroti-Atavha.+ 23 Nkama Yehovha a nga mi rhuma na mi li Kadexi-Barneya+ a ku: ‘Fambani mi ya teka tiko leli ni nga ta mi nyika lona’, mi tlhele mi terekela Yehovha Xikwembu xa n’wina,+ a mi kombisanga lipfumelo+ ka yena naswona a mi mu yingisanga. 24 Mi te khoo mi terekela Yehovha ku sukela siku leli ni nga mi tiva hi lona.

25 “Kutani ni khizame phambheni ka Yehovha 40 wa masiku, wusiku ni nhlikanhi,+ ni yendle leswo hileswi Yehovha a nga hlaya swaku a ta mi helisa. 26 Ni sungule ku mi khongelela ka Yehovha ni ku: ‘Yehovha Hosi Leyikulu, u nga va helisi vanhu va wena. I tshomba la wena+ leli u nga li kutsula hi ntamu wa wena, u tlhela u li humesa Gibita hi voko la wena la matimba.+ 27 Khumbuka vatirheli va wena ku nga Abrahamu, Izaki na Yakobe.+ U nga ku txuvuki ku tiyela tinhloko ka vanhu lava, mintirho ya vona ya ku biha ni xidjoho xa vona.+ 28 Loko u nga yendli leswo vanhu va tiko leli u nga hi humesa ka lona va ta ku: “Yehovha a tsandzekile ku va yisa ka tiko leli a nga va tshembisa lona, a va yise mananga swaku a ya va dlaya hi mhaka ya leswi a a va nyenya.”+ 29 I vanhu va wena ni tshomba la wena+ leli u nga li humesa hi ntamu ni matimba ya wena yamakulu.’*+

10 “Hi nkama wolowo Yehovha a ni byela a ku: ‘Khwaya* maribye mambirhi ma fana ni lawayani ya ku sungula,+ u gama u ta ka mina ka ntshava; u fanele u tlhela u tiyendlela ni areka hi mapulangu. 2 Ka maribye wolawo, ni ta gama ni tsala marito lawa a ma li ka maribye ya ku sungula lawa u nga ma pfotlosa, naswona u fanele u ma veka ndzeni ka areka.’ 3 Se ni yendla areka hi mapulangu ya nsinya wa akasiya ni tlhela ni khwaya ni maribye* mambirhi ma fana ni lawayani ya ku sungula, kutani ni khwela ntshava na ni ni maribye mambirhi lawa a ni ma khome hi voko.+ 4 Kutani Yehovha a tsala marito lawa a a ma tsale ka maribye ya ku sungula,+ ku nga 10 wa Minawu,+ leyi yena a nga mi byela yona ka ntshava na a li xikarhi ka ndzilu,+ hi siku leli a mi hlengeletanile hi lona;+ se Yehovha a ni nyiketa wona. 5 Kutani ni ndzuluka ni xika ka ntshava,+ ni ya veka maribye ndzeni ka areka leyi ni nga yi yendla, ni swoswi ma ha li kolomuyani hi ku landza leswi Yehovha a nga ni byela swona.

6 “Vayisrayele va suka aBeroti Bene-Yakani va ya Mosera. Kutani Aroni a fa, a lahliwa kolanu+ se n’wana wa yena Eliyazari a sungula ku va muprista.+ 7 Nkama va nga suka kolanu va ye Gudigoda, va gama va suka Gudigoda va ya Yotibata,+ ku nga tiko leli nga ni minkova leyi ngirimelaka mati.

8 “Hi nkama wolowo, Yehovha a lange lixaka la Levhi+ swaku li rhwala areka ya ntwananu wa Yehovha+ ni ku tirha phambheni ka Yehovha, li dzunisa ni ku katekisa hi vito la yena+ ku nga leswi li swi yendlaka ninamuntlha. 9 Hi mhaka leyo, Levhi a nga nyikiwanga tiko kumbe tshomba nkama vamakwavu va nga nyikiwa. Yehovha i tshomba la yena, ku nga leswi Yehovha Xikwembu xa n’wina a nga mu byela swona.+ 10 Se mina ni tshame ka ntshava 40 wa masiku, wusiku ni nhlikanhi,+ ku fana ni leswi ni nga tshama ni swi yendla ka nkama lowu nga hundza, Yehovha a tlhele a ni yingisa hi nkama wolowo.+ Yehovha a a nga lavi ku mi helisa. 11 Kutani Yehovha a ni byela leswi: ‘Rhangela vanhu lava, leswaku va lunghekela ku nghena ka tiko leli ni nga funga ku li nyika vavhovho va vona.’+

12 “Se swoswi wena Israyele, i mpsini leswi Yehovha Xikwembu xa wena a ku kombelaka swona?+ Hi leswi ntsena: Swaku u chava Yehovha Xikwembu xa wena,+ u famba ka tindlela ta yena hinkwatu,+ u mu rhandza, u tirhela Yehovha Xikwembu xa wena hi mbilu ya wena hinkwayu ni hi wutomi la wena hinkwalu,+ 13 ni ku yingisa hinkwaswu leswi a ku rhumaka swona ni minawu ya Yehovha leyi ni ku byelaka yona namuntlha, leswaku swi ta ku fambela kahle.+ 14 Phela matilo i ya Yehovha Xikwembu xa wena, matilo ya matilo ni misava ni hinkwaswu leswi nga ka yona.+ 15 Kambe Yehovha a ve kusuhi* ni vavhovho va wena ntsena, a tlhela a va rhandza, naswona a lange n’wina, vatukulu va vona xikarhi ka vanhu hinkwavu,+ ku nga leswi mi swi vonaka namuntlha. 16 Swoswi mi fanele mi basisa timbilu ta n’wina,+ mi tshika ku tiwomisa tinhloko.+ 17 Hikusa Yehovha Xikwembu xa n’wina a tlakukile ku tlula swikwembu hinkwaswu,+ i Hosi ya tihosi, Xikwembu lexikulu, a ni matimba ya ku hlamalisa, a nga na xikheto+ naswona a nga xaveleliwi. 18 A yendla swaku n’wana lweyi a nga feliwa hi vapsali* ni wansati wa ku feliwa hi nuna+ va yavanyisiwa hi ndlela yayinene naswona a rhandza munhu wa tiko lin’wani,+ a mu nyika swakudla ni mpahla. 19 Na n’wina mi fanele mi rhandza vanhu va matiko man’wani, hikusa a mi tshama ka tiko la Gibita leli a li nga li la n’wina.+

20 “Mi fanele mi chava Yehovha Xikwembu xa n’wina, mi mu tirhela,+ mi mu rhandza naswona mi fanele mi funga hi vito la yena. 21 Mi fanele mi dzunisa Yena.+ I Xikwembu xa wena, lexi nga ku yendlela minchumu leyi hinkwayu yayikulu ni ya ku hlamalisa leyi u nga yi vona hi matihlo ya wena.+ 22 Nkama vavhovho va wena va nga ya Gibita+ a va li 70 wa vanhu, kambe swoswi, Yehovha Xikwembu xa wena a ku yendle u tala swinene u fana ni tinyeleti ta matilo.+

11 “U fanele u rhandza Yehovha Xikwembu xa wena+ naswona minkama hinkwayu u mu yingisa u tlhela u yingisa ni minawu ya yena, swiboho swa yena swa ku yavanyisa ni hinkwaswu leswi a ku byelaka swona. 2 Ma swi tiva swaku namuntlha ni vulavula na n’wina, a ni vulavuli ni vana va n’wina lava va kalaka va nga swi tivanga kumbe ku swi vona ku layiwa hi Yehovha Xikwembu xa n’wina,+ wukulu la yena,+ voko la yena la matimba+ ni matimba ya yena yamakulu.* 3 A va swi vonanga swikombiso swa yena ni mintirho ya yena leyi a nga yi yendla aGibita, a yi yendla ka Faru hosi ya Gibita ni ka tiko la yena hinkwalu;+ 4 kumbe leswi a nga swi yendla ka masonchwa ya Gibita, ka makavhalu ya Faru ni tinyolo* ta nyimpi, leswi nga mintiwa hi mati ya Lwandle la Ku Pshuka nkama Vagibita va nga mi hlongolisa, kutani Yehovha a va helisa va ku jii.+ 5 A va swi vonanga leswi a nga mi yendlela* swona amananga anze mi ta fika ka ndhawu leyi, 6 kumbe leswi a nga swi yendla ka Datani na Abirami, vana va Eliyabi n’wana wa Rubeni, nkama va nga mintiwa hi misava ku patsa ni mindjangu ya vona ni matende ya vona ni hinkwaswu leswi hanyaka leswi a swi li swa vona, aphambheni ka tiko hinkwalu la Israyele.+ 7 Mi yi vonile hi matihlo ya n’wina mintirho hinkwayu ya ku hlamalisa leyi Yehovha a nga yi yendla.

8 “Mi fanele mi yingisa minawu hinkwayu leyi ni mi byelaka yona namuntlha, leswaku mi ta tiya mi tlhela mi tlulela mi ya teka tiko, 9 ni leswaku mi ta hanya nkama wa wunyingi+ ka tiko leli Yehovha a nga funga ku li nyika vavhovho va n’wina ni vana* va vona,+ tiko leli nga tala hi leiti ni wulombe.+

10 “Tiko leli mi yaka mi ya li teka a li fani ni tiko la Gibita leli mi nga huma ka lona, lomu a mi tolovela ku byala mbewu mi gama mi tidlaya hi ntirho wa ku regara* ku fana ni loko mi regara nsimu ya matsavu. 11 Kambe tiko leli mi yaka ka lona i tiko la tintshava ni minkova,+ li nwa mati ya mpfula ya le matilweni;+ 12 i tiko leli Yehovha Xikwembu xa n’wina a li hlayisaka. Yehovha Xikwembu xa n’wina a tshama na a li vonelela, ku sukela ku sunguleni ka lembe anze ku heleni ka lona.

13 “Loko mo yingisa minawu ya mina leyi ni mi byelaka yona namuntlha, mi tlhela mi rhandza Yehovha Xikwembu xa n’wina mi mu tirhela hi mbilu ya n’wina hinkwayu ni hi wutomi la n’wina hinkwalu,+ 14 ni ta nisa mpfula tikweni hi nkama wa kona, mpfula ya wuxika ni mpfula ya malanga, kutani mi ta hlengeleta swakudla swa n’wina ni vhinyu la n’wina la nyuwani ni mafurha ya n’wina.+ 15 Swifuyu swa n’wina ni ta swi nyika byanyi, na n’wina mi ta dla mi xurha.+ 16 Tivoneleni swaku timbilu ta n’wina ti nga kanganyisiwi, mi gama mi hambuka mi ya gandzela swikwembu swin’wani mi swi khizamela.+ 17 Loko mo yendla leswo, Yehovha a ta mi kwatela, a pfala matilo swaku ku nga ni mpfula,+ misava na yona a yi nga ta humesa swakudla, kutani mi ta hela hi ku hantlisa ka tiko lalinene leli Yehovha a mi nyikaka lona.+

18 “Mi nga ma khohlwi marito lawa ni mi byelaka wona, ma vekiseni ka timbilu ta n’wina, mi ma bohelela ka mavoko ni ka swimombo swa n’wina, leswaku ma va xitsundzuxu.+ 19 Ma djondziseni vana va n’wina, mi vulavula hi wona loko mi tshamile kaya ka n’wina, loko mi famba ndleleni, loko mi yetlela ni loko mi pfuka.+ 20 Ma tsaleni ka maaru ya swipfalu swa tiyindlo ta n’wina ni ka swipfalu swaswikulu swa madoropa ya n’wina, 21 leswaku n’wina ni vana va n’wina mi ta hanya nkama wa wunyingi+ ka tiko leli Yehovha a nga funga ku li nyika vavhovho va n’wina,+ ntsena loko misava ya ha li hansi ka matilo.

22 “Loko mo yi yingisa kahle minawu leyi ni mi nyikaka yona, mi tlhela mi hanya hi yona, mi rhandza Yehovha Xikwembu xa n’wina+ mi famba ka tindlela ta yena hinkwatu mi tlhela mi khoma swi tiya ka yena,+ 23 Yehovha a ta mi hlongolela matiko lawa hinkwawu phambheni ka n’wina,+ mi ta hlongola matiko ya matimba ni lama nga ni vanhu va vanyingi ku mi tlula.+ 24 Kutani lomu mi nga ta kandzihetela kona ku ta va ndhawu ya n’wina.+ Ku sukela amananga ku ya fika aLebanoni, ku sukela ka Nambu, ku nga nambu wa Ewufrata ku ya fika ka lwandle leli nga wupeladlambu,* hi kolanu ndhawu ya n’wina yi nga ta tsema hi kona.+ 25 A nga kona lweyi a nga ta mi tiyela.+ Yehovha Xikwembu xa n’wina a ta yendla swaku mi chaviwa swinene ka tiko leli mi nga ta famba ka lona,+ hi ku landza leswi a nga mi tshembisa swona.

26 “Vonani, ni veka nkateko ni xirhuku* phambheni ka n’wina namuntlha:+ 27 Mi ta kateka ntsena loko mo yingisa minawu ya Yehovha Xikwembu xa n’wina leyi ni mi byelaka yona namuntlha,+ 28 kambe mi ta rhukiwa loko mo kala mi nga yi yingisi minawu ya Yehovha Xikwembu xa n’wina,+ mi hambuka ka ndlela leyi ni mi byelaka swaku mi famba hi yona namuntlha, mi gandzela swikwembu swin’wani swa ku kala mi nga swi tivi.

29 “Loko Yehovha Xikwembu xa n’wina a mi fikisa ka tiko leli mi faneleke mi li teka, mi fanele mi katekisa vanhu ka Ntshava ya Jerzimi, mi rhuka vanhu ka Ntshava ya Ebali.+ 30 Tintshava leti ti ka tlhelo lelin’wani la Yordani awupeladlambu, ka tiko la Vakanana lava va tshamaka Araba, aphambheni ka Jiligali, atlhelweni ka minsinya yayikulu ya More.+ 31 Hikusa mi tlulela Nambu wa Yordani, mi ya nghena ka tiko leli Yehovha Xikwembu xa n’wina a mi nyikaka lona.+ Nkama mi nga ta li teka mi sungula ku tshama ka lona, 32 mi fanele mi tiyiseka swaku mi hanya hi minawu ni swiboho swa ku yavanyisa leswi ni mi byelaka swona namuntlha.+

12 “Leyi i minawu ni swiboho swa ku yavanyisa leswi mi faneleke mi swi landzela wutomi la n’wina hinkwalu ka tiko leli Yehovha Xikwembu xa vavhovho va n’wina a nga ta mi nyika swaku mi tshama ka lona. 2 Mi fanele mi hahlula tindhawu hinkwatu leti vanhu lava mi nga ta va tekela matiko a va gandzela swikwembu swa vona ka tona,+ leti nga ka tintshava ta ku leha kumbe ka maganga kumbe ahansi ka nsinya wun’wani ni wun’wani wawukulu. 3 Mi fanele mi dilizela maaltari ya vona, mi fayetela mapilari+ lawa va nga ma yendla swikwembu swa vona, mi hisa timhandzi ta vona ta Axera,* mi tsema ni swifaniso leswi nga vatliwa swa swikwembu swa vona,+ mi helisa ni mavito ya swona ka ndhawu yoleyo.+

4 “Mi nga tshuki mi mu gandzela hi ndlela leyo Yehovha Xikwembu xa n’wina.+ 5 Kambe mi fanele mi ya ka ndhawu leyi Yehovha Xikwembu xa n’wina a nga ta yi langa swaku vito la yena li dzunisiwa ka yona, ka tinxaka ta n’wina hinkwatu naswona mi fanele mi mu gandzela kolanu.+ 6 Hi kolanu mi faneleke mi ma yisa kona magandzelo ya n’wina ya ku hisiwa,+ swa wukhume,*+ minyikelo, magandzelo lawa mi nga tshembisa ku ma yendla,+ magandzelo ya ku tirhandzela+ ni matevula ya swifuyu swa n’wina.+ 7 N’wina ni mindjangu ya n’wina mi fanele mi dlela kolanu phambheni ka Yehovha Xikwembu xa n’wina,+ mi tikhorisa hi mintirho ya n’wina hinkwayu,+ hikusa Yehovha Xikwembu xa n’wina a mi katekisile.

8 “Mi nga tshuki mi yendla leswi hi swi yendlaka lani namuntlha, hikusa lani mun’wani ni mun’wani a yendla leswi a swi lavaka, 9 hikusa a mi se fika ka ndhawu ya ku humula ka yona+ ni ka tiko leli Yehovha Xikwembu xa n’wina a mi nyikaka lona. 10 Nkama mi nga ta tlulela Nambu wa Yordani+ mi ya tshama ka tiko leli Yehovha Xikwembu xa n’wina a mi nyikaka lona swaku li va la n’wina, phela a ta mi humulisa ka valala va n’wina hinkwavu, mi ta tshama na mi hlayisekile.+ 11 Mi ta tisa hinkwaswu leswi ni mi rhumaka swaku mi swi tisa ka ndhawu leyi Yehovha Xikwembu xa n’wina a nga ta yi langa leswaku vito la yena li dzunisiwa ka yona,+ magandzelo ya n’wina ya ku hisiwa, swa wukhume,+ minyikelo ni magandzelo hinkwawu ya xitshembiso lawa mi nga funga ku ma nyika Yehovha. 12 Mi ta tsaka phambheni ka Yehovha Xikwembu xa n’wina,+ n’wina ni vana va n’wina va madjaha ni va tintombhi, swikarawa swa n’wina swa xinuna ni swa xisati ni Mulevhi lweyi a tshamaka na n’wina, hikusa a nga na tiko kumbe tshomba xikarhi ka n’wina.+ 13 Tivoneleni swaku mi nga tshuki mi yendla magandzelo ya ku hisiwa ka ndhawu yin’wani ni yin’wani leyi mi yi kumaka.+ 14 Mi fanele mi yendla magandzelo ya ku hisiwa ntsena ka ndhawu leyi Yehovha a nga ta yi langa, lomu ku tshamaka lin’wani la tinxaka ta n’wina naswona kolanu mi fanele mi yendla hinkwaswu leswi ni mi rhumaka swona.+

15 “Kambe loko mi navela nyama, mi nga dlaya xiharhi mi dla+ hi ku ya hi leswi Yehovha Xikwembu xa n’wina a mi katekisaka xiswona, hinkwaku lomu mi tshamaka kona. Munhu lweyi a kalaka a nga tenganga ni lweyi a nga tenga va nga yi dla, ku fana ni leswi a mi ta yi dlisa xiswona mhala* kumbe mbavala.* 16 Kambe mi nga tshuki mi dla ngati;+ mi fanele mi yi halata hansi ku fana ni mati.+ 17 Ka madoropa ya wena, a wu nga ta pfumeleliwa ku dla swa wukhume swa trigu la wena, swa vhinyu la wena la nyuwani, swa mafurha ya wena, xifuyu xa wena xa matevula,+ magandzelo man’wani ni man’wani ya wena lawa u nga tshembisa ku ma nyikela, magandzelo ya wena ya ku tirhandzela kumbe munyikelo wa wena. 18 U ta swi dlela phambheni ka Yehovha Xikwembu xa wena, ka ndhawu leyi Yehovha Xikwembu xa wena a nga ta yi langa,+ wena ni n’wana wa wena wa djaha, n’wana wa wena wa ntombhi, mutirhi wa wena wa xinuna ni wa xisati ni Mulevhi lweyi a tshamaka na wena; u ta tsaka phambheni ka Yehovha Xikwembu xa wena ka hinkwaswu leswi u swi yendlaka. 19 Loko wa ha hanya ka tiko la wena u nga tshiki ku hlayisa Mulevhi.+

20 “Loko Yehovha Xikwembu xa wena a yengetela tiko la wena,+ hi ku landza leswi a nga ku tshembisa swona,+ se u gama u ku: ‘Ni lava ku dla nyama,’ hileswi u nga navela ku dla nyama, u nga yi dla nkama wun’wani ni wun’wani lowu u yi navelaka.+ 21 Loko ndhawu leyi Yehovha Xikwembu xa wena a nga ta yi langa swaku vito la yena li dzunisiwa ka yona+ yi li kule na wena, u fanele u dlaya swifuyu swin’wani ka ntlhambi wa wena wa tihomu kumbe wa tinyempfu leswi Yehovha a nga ku nyika swona, hi ku landza leswi ni nga mi byela swona naswona, u fanele u swi dla lomu u tshamaka kona nkama wun’wani ni wun’wani loko u swi navela. 22 U nga swi dla ku fana ni leswi a wu ta yi dlisa xiswona mhala kumbe mbavala;+ munhu lweyi a nga tenga ni lweyi a kalaka a nga tenganga a nga swi dla. 23 Tinyimiseli ku kala u nga dli ngati,+ hikusa ngati i wutomi+ kutani u nga tshuki u dla wutomi ni nyama. 24 U nga tshuki u dla ngati. U fanele u yi halata hansi ku fana ni mati.+ 25 U nga tshuki u yi dla, leswaku swi ta ku fambela kahle, wena ni vana va wena, hikusa u yendla swaswinene phambheni ka Yehovha. 26 Loko u ya ka ndhawu leyi Yehovha a nga ta yi langa, u fanele u ya ni swilo swa wena swa ku kwetsima ni magandzelo lawa u nga tshembisa swaku u ta nyikela hi wona. 27 Kolanu u ta yendla magandzelo ya wena ya ku hisiwa, u nyikela nyama ni ngati+ ka altari ya Yehovha Xikwembu xa wena naswona ngati ya magandzelo ya wena yi fanele yi cheliwa ka altari+ ya Yehovha Xikwembu xa wena, kambe nyama u nga tidlela.

28 “Yingisa u tlhela u ma hlayisa hi ku tshembeka marito hinkwawu lawa ni ku byelaka wona, leswaku swi ta ku fambela kahle wena ni vana va wena, hikusa u yendla swaswinene ni swa ku lulama phambheni ka Yehovha Xikwembu xa wena.

29 “Nkama Yehovha Xikwembu xa wena a nga ta helisa matiko lawa u nga ta ma hlongola+ kutani u tshama ka tiko la wona, 30 tivoneli swaku u nga tshuki u phasiwa loko matiko lawa se ma helisiwile. U nga vutisi hi ta swikwembu swa wona u ku: ‘Kasi matiko lawa a ma swi gandzelisa ku yini swikwembu swa wona? Na mina ni ta yendla swa ku fana ni swoleswo.’+ 31 U nga tshuki u yendla leswo ka Yehovha Xikwembu xa wena, hikusa va yendlela swikwembu swa vona swilo hinkwaswu swa ku nyenyentsa leswi Yehovha a swi nyenyaka; va hisa ni vana va vona va madjaha ni va tintombhi va hisela swikwembu swa vona.+ 32 Mi fanele mi yendla hinkwaswu leswi ni mi byelaka swona.+ Mi nga tshuki mi yengetela kumbe mi pumba nchumu ka leswi ni mi byelaka swona.+

13 “Loko ko tshuka ku humelela muprofeta kumbe lweyi a vhumbaka hi ku tirhisa milorho xikarhi ka n’wina kutani a mi nyika xikombiso kumbe a mi vhumbela, 2 se xikombiso kumbe leswi a nga mi vhumbela swona swi yendleka a gama a ku: ‘A hi landzeleni swikwembu swin’wani, swikwembu leswi mi kalaka mi nga swi tivi hi tlhela hi swi tirhela’, 3 mi nga mu yingiseni muprofeta kumbe mulorhi yelweyo,+ hikusa Yehovha Xikwembu xa n’wina o mi ringa+ kuva a vona swaku ma mu rhandza Yehovha Xikwembu xa n’wina hi mbilu ya n’wina hinkwayu ni hi wutomi la n’wina hinkwalu.+ 4 Mi fanele mi landzela Yehovha Xikwembu xa n’wina, mi fanele mi chava yena, mi fanele mi hlayisa minawu ya yena, mi fanele mi yingisa rito la yena; mi fanele mi tirhela yena naswona mi fanele mi khoma swi tiya ka yena.+ 5 Kambe muprofeta kumbe mulorhi yelweyo a fanele a dlayiwa,+ hikusa a hlohlotele moya wa ku terekela Yehovha Xikwembu xa n’wina, ka ndlela leyi Yehovha Xikwembu xa n’wina a nga mi rhuma swaku mi famba hi yona, yena lweyi a nga mi humesa ka tiko la Gibita a mi ponisa ka wukarawa.* Naswona mi fanele mi susa swilo hinkwaswu swa ku biha xikarhi ka n’wina.+

6 “Loko makwenu, n’wana wa mamani wa wena, kumbe n’wana wa wena wa djaha, kumbe wa ntombhi, kumbe nsati wa wena lweyi u mu rhandzaka, kumbe munghanu wa wena wamukulu o tshuka a zama ku ku xenga xihundleni a ku: ‘A hi fambi hi ya gandzela swikwembu swin’wani,’+ leswi wena kumbe vavhovho va wena va kalaka va nga swi tivanga, 7 swikwembu swa vanhu lava va nga matlhelweni ka n’wina, lava va nga kusuhi kumbe kule na n’wina, ku sukela ka magamu man’wani ya tiko ku ya ka magamu man’wani ya tiko, 8 u nga tshuki u pfumelelana na yena+ kumbe u mu yingisa kumbe u mu twela wusiwana kumbe u mu vhikela; 9 kambe u fanele u mu dlaya.+ U fanele u va wa ku sungula ku tlakusa voko u mu ba hi ribye se ku gama ku landzela lavan’wani.+ 10 U fanele u mu ba hi maribye a za a fa,+ hikusa a a lava ku ku xenga leswaku u tshika Yehovha Xikwembu xa wena, lweyi a nga ku humesa awukaraweni* ka tiko la Gibita. 11 Kutani tiko hinkwalu la Israyele li ta swi twa li gama li chava, se a li nge he tshuki li yendla nchumu wa ku biha wa ku fana ni wolowo xikarhi ka n’wina.+

12 “Loko wo tshuka u twa na ku vuliwa leswi ka madoropa man’wani lawa Yehovha Xikwembu xa wena a nga ku nyika leswaku u tshama ka wona: 13 ‘Ku humelele vavanuna xikarhi ka n’wina lava va kalaka va nga pfuni nchumu lava va nga hambukisa vanhu va madoropa ya vona, va ku: “A hi fambeni hi ya tirhela swikwembu swin’wani,” swikwembu leswi mi kalaka mi nga swi tivi,’ 14 u fanele u lavisisa kahle, u kambisisa, u tlhela u vutisisa;+ naswona loko wo kuma leswaku nchumu lowu, lowu nyenyentsaka wu yendliwile xikarhi ka n’wina, 15 u fanele u dlaya lava va tshamaka ka doropa lolelo hi xipada.+ U helisa ni hinkwaswu leswi nga ka lona ku patsa ni swifuyu swa lona+ hi xipada. 16 Gama u hlengeleta minchumu hinkwayu leyi nga kumiwa ka doropa lolelo, u yi veka xikarhi ka lona kutani u hisa doropa, minchumu ya lona yi ta va gandzelo leli heleleke ka Yehovha Xikwembu xa wena. Doropa lolelo li ta hohlotiwa li nga ha vi kona hi masiku ni masiku. A li nge he tlheli li yakiwa. 17 U nga tshuki u teka nchumu lexi faneleke xi helisiwa+ swaku u nga mu kwatisi Yehovha, leswaku a ta ku komba timpsalu ni ku ku twela wusiwana ni ku ku yendla u tala hi ku ya hi leswi a nga swi funga ka vavhovho va wena.+ 18 Hikusa u fanele u yingisa Yehovha Xikwembu xa wena hi ku hlayisa minawu hinkwayu ya yena leyi ni ku byelaka yona namuntlha, kutani u yendla swaswinene phambheni ka Yehovha Xikwembu xa wena.+

14 “N’wina mi vana va Yehovha Xikwembu xa n’wina. Mi nga titsemeleli+ kumbe mi tsema tinxiyi ta n’wina hi mhaka ya munhu wa ku fa.+ 2 Hikusa mi vanhu va ku kwetsima+ ka Yehovha Xikwembu xa n’wina naswona Yehovha a mi langile swaku mi va vanhu va yena, tshomba la yena la lisima xikarhi ka vanhu hinkwavu lava va nga misaveni.+

3 “Mi nga tshuki mi dla nchumu xin’wani ni xin’wani xa ku nyenyentsa.+ 4 Swiharhi leswi mi nga swi dlaka hi leswi:+ Homu, nyempfu, mbuti, 5 mbavala,* mhunti, nhlangu,* mhala,* nhongo,* nyempfu ya nhova, nyempfu ya le tintshaveni. 6 Mi nga dla xiharhi xin’wani ni xin’wani lexi nga ni xondzo leli nga yavana hi xikarhi, lexi gayelaka swakudla. 7 Kambe swiharhi leswi landzelaka leswi gayelaka swakudla kumbe leswi nga ni xondzo leli nga yavana hi xikarhi a mi fanelanga mi swi dla: Kamela, mpfundlha ni timbila,* hikusa swi dla swi tlhela swi gayela kambe xondzo la swona a li yavananga. A swi tenganga ka n’wina.+ 8 Ni khumba hikusa li ni xondzo leli nga yavana hi xikarhi, kambe a li gayeli. A li tenganga ka n’wina. Mi nga tshuki mi dla nyama ya swona kumbe mi khumba mintsumbu ya swona.

9 “Ka leswi tshamaka matini, mi nga dla ntsena leswi landzelaka: Hinkwaswu leswi nga ni swipapani* ni mayaya mi nga swi dla.+ 10 Kambe mi nga tshuki mi dla leswi kalaka swi nga na swipapani ni mayaya. A swi tenganga ka n’wina.

11 “Mi nga dla xinyanyani xin’wani ni xin’wani lexi nga tenga. 12 Kambe a mi fanelanga mi dla leswi: Gama, gama leli phasaka matini, koti la ntima,*+ 13 mangatlu* wa ku pshuka, mangatlu wa ntima, mixaka hinkwayu ya mangatlu, 14 mixaka hinkwayu ya matlhugwani,* 15 yintxa,* xikhovha, sekwa* la khwatini, mixaka hinkwayu ya makhozi,* 16 xikhovha xaxitsongo, xikhovha xa tindleve ta ku leha, xitutu,* 17 gumbula,* koti, tlhugwani la ku tshamela matini,* 18 ntavila,* mixaka hinkwayu ya mithetxwani,* munyani* ni mangadjani. 19 Swiharhi hinkwaswu swaswitsongo leswi nga ni timpapa leswi tshamaka hi mintlawa na swi li swinyingi na swona a swi tenganga ka n’wina. A swi fanelanga swi dliwa. 20 Kambe mi nga dla xiharhi xin’wani ni xin’wani lexi hahaka lexi nga basa.

21 “Mi nga tshuki mi dla xiharhi lexi nga kumiwa na xi file.+ Mi nga xi nyika munhu wa tiko lin’wani lweyi mi tshamaka na yena ka madoropa ya n’wina swaku a dla, kumbe mi xi xavisela munhu wa matiko. N’wina mi vanhu va ku kwetsima ka Yehovha Xikwembu xa n’wina.

“Mi nga tshuki mi sweka ximbutani hi leiti la mamani wa xona.+

22 “U fanele u nyikela swa wukhume* swa leswi u swi tshovelaka masin’wini lembe ni lembe.+ 23 U ta dla swa wukhume swa trigu la wena, swa vhinyu la wena la nyuwani, swa mafurha ya wena ni matevula ya tihomu ta wena ni ya tinyempfu ta wena phambheni ka Yehovha Xikwembu xa wena, ka ndhawu leyi a nga ta yi langa swaku vito la yena li dzunisiwa ka yona,+ swaku u ta djondza ku chava Yehovha Xikwembu xa wena minkama hinkwayu.+

24 “Kambe loko ndhawu ya kona yi li kule hintamu naswona u nga swi koti ku rhwala swilo leswi, swi ya ka ndhawu leyi Yehovha Xikwembu xa wena a nga yi langa, swaku vito la yena li dzunisiwa kona+ hileswi yi nga kule na wena (hikusa Yehovha Xikwembu xa wena a ta ku katekisa), 25 u nga swi xavisa u kuma male kutani u famba u ya ka ndhawu leyi Yehovha Xikwembu xa wena a nga ta yi langa na u khome male ya kona. 26 Kutani u nga xava xin’wani ni xin’wani lexi u xi lavaka, tihomu, tinyempfu, timbuti, vhinyu ni mabyala man’wani ni man’wani ni xin’wani ni xin’wani lexi u xi tsakelaka; u ta swi dla kolanu phambheni ka Yehovha Xikwembu xa wena u tsaka, wena ni ndjangu wa wena.+ 27 U nga tshiki ku hlayisa Mulevhi lweyi a tshamaka ndzeni ka madoropa ya wena,+ hikusa a nga na tiko kumbe tshomba xikarhi ka wena.+

28 “A ku heleni ka lembe lin’wani ni lin’wani la wunharhu, u fanele u humesa swa wukhume la hinkwaswu leswi u nga swi tshovela ka lembe lolelo, u swi veka ndzeni ka madoropa ya wena.+ 29 Kutani Mulevhi lweyi a kalaka a nga na tiko kumbe tshomba xikan’we na wena, munhu wa tiko lin’wani lweyi a tshamaka na wena, n’wana wa ku feliwa hi vapsali* ni wansati wa ku feliwa hi nuna, lava u tshamaka na vona ka madoropa ya wena va ta ta, va fika va dla anze va xurha,+ leswaku Yehovha Xikwembu xa wena a ta ku katekisa ka hinkwaswu leswi u swi yendlaka.+

15 “A ku heleni ka lembe lin’wani ni lin’wani la wu 7 u fanele u tima swikweneti.+ 2 Swikweneti swi ta timisiwa xileswi: Lweyi a devhiwaka a ta tima xikweneti xa munhu mun’wani lweyi a nga mu lomba. A nga fanelanga a londza munhu mun’wani kumbe makwavu, hikusa swikweneti swi ta timiwa hi mhaka ya ku hlonipha Yehovha.+ 3 U nga ha mu londza munhu wa tiko lin’wani+ lweyi a tshamaka na wena kambe u fanele u tima swikweneti hinkwaswu swa makwenu. 4 Kambe a nga kona xikarhi ka n’wina lweyi a faneleke a va xisiwana, hikusa Yehovha a ta ku katekisa hikakunene+ ka tiko leli Yehovha Xikwembu xa wena a nga ta ku nyika lona swaku li va tshomba; 5 leswo swi ta yendleka ntsena loko wo yingisa rito la Yehovha Xikwembu xa wena u tlhela u hlayisa minawu hinkwayu leyi ni ku byelaka yona namuntlha.+ 6 Hikusa Yehovha Xikwembu xa wena a ta ku katekisa hi ku landza leswi a nga ku tshembisa swona, u ta lombisa swilo ka matiko ya manyingi, kasi wena a wu nge lombi nchumu ka wona;+ u ta fuma matiko ya manyingi kasi wona a ma nga ta ku fuma.+

7 “Loko makwenu o tshuka a va xisiwana xikarhi ka n’wina ka man’wani ya madoropa ya n’wina, ka tiko leli Yehovha Xikwembu xa wena a ku nyikaka lona, u nga mu feli mona kumbe u mu tsona.+ 8 U fanele u pfula voko la wena,+ u mu lomba leswi a swi lavaka kumbe leswi a swi pfumalaka. 9 Tivoneli swaku u nga pimisi swilo swa ku biha u ku: ‘Li kusuhi lembe la wu 7 la ku tima swikweneti,’+ kutani u tsona makwenu lweyi a nga xisiwana u nga mu nyiki nchumu. Loko a huwelela ka Yehovha hi mhaka ya wena, u ta va u djohile.+ 10 U fanele u mu nyika hi mbilu ya ku basa+ naswona u nga mu nyiki na u ngurangura, hikusa hi leswo swi nga ta yendla swaku Yehovha Xikwembu xa wena a ku katekisa ka hinkwaswu leswi u swi yendlaka.+ 11 Phela swisiwana swi ta tshama na swi li kona atikweni.+ Hi leswo swi yendlaka ni ku: ‘U fanele u pfula voko la wena u pfuna lweyi a hluphekaka ni makwenu lweyi a nga xisiwana ka tiko la n’wina.’+

12 “Loko munhu o tshuka a ku xavisela makwenu, ku nga Muheberu wa xinuna kumbe wa xisati kutani a ku tirhela 6 wa malembe, u fanele u mu tshika a famba hi lembe la wu 7.+ 13 Naswona loko u mu chunsa u nga mu tshiki a famba na a nga na nchumu. 14 U fanele u mu nyika swilo leswi u nga swi susa ka ntlhambi wa wena wa tinyempfu kumbe wa timbuti, leswi u nga swi byala masin’wini, mafurha ya wena ni vhinyu. U fanele u mu nyika hi ku ya hi leswi Yehovha Xikwembu xa wena a nga ku katekisisa xiswona. 15 Khumbuka swaku a wu li xikarawa ka tiko la Gibita kutani Yehovha Xikwembu xa wena a ku ponisa.* Hi leswo swi yendlaka ni ku rhuma ku yendla leswi namuntlha.

16 “Kambe loko o tshuka a ku byela a ku: ‘A ni swi lavi ku famba,’ hikusa wa ku rhandza wena ni vandjangu wa wena naswona a tsakile hi ku va na wena,+ 17 u fanele u teka nchumu xa ku boxa hi xona,* u mu boxa ndleve na a khigele ka xipfalu, kutani a ta va xitirhi xa wena wutomi la yena hinkwalu. U fanele u yendla leswo ni ka xitirhi xa wena xa xisati. 18 Swi nga ku karhateli ku mu tshika a famba hikusa leswi a nga ku yendlela swona ka 6 wa malembe a a ta faneliwa hi muholo wa vanhu vambirhi naswona Yehovha Xikwembu xa wena a ku katekisile ka hinkwaswu leswi nga yendliwa.

19 “U fanele u nyika Yehovha Xikwembu xa wena matevula hinkwawu ya xinuna lama nga psaliwa ka mintlhambi ya wena ya tihomu ni ya tinyempfu.+ A wu fanelanga u yendla ntirho ni wun’we hi matevula ya homu* ya wena naswona u nga tsemeti mavoya ya tinyempfu ta wena ta matevula. 20 Wena ni ndjangu wa wena mi fanele mi swi dla phambheni ka Yehovha Xikwembu xa wena lembe ni lembe, ka ndhawu leyi Yehovha a nga ta yi langa.+ 21 Kambe loko xi limalile, xi khwita, xi file matihlo kumbe xi vavisiwile, a wu fanelanga u yendlela Yehovha Xikwembu xa wena gandzelo hi xona.+ 22 U fanele u xi dla lomu u tshamaka kona; munhu wa ku kala a nga tenganga ni lweyi a nga tenga va ta dla xikan’we ku fana ni loko va dla mhala* kumbe mbavala.*+ 23 Kambe u nga tshuki u dla ngati ya xona;+ u fanele u yi halata misaveni ku fana ni mati.+

16 “Khumbuka wheti ya Abibi,* naswona u yendla fexta* la Paxkwa ka Yehovha Xikwembu xa wena,+ hikusa Yehovha Xikwembu xa wena a ku humese Gibita niwusiku hi wheti ya Abibi.+ 2 Naswona u fanele u yendlela Yehovha Xikwembu xa wena+ gandzelo la Paxkwa hi xifuyu lexi u nga ta xi susa ka ntlhambi wa tinyempfu ni wa tihomu+ ka ndhawu leyi Yehovha a nga ta yi langa swaku vito la yena li dzunisiwa ka yona.+ 3 U nga tshuki u li dla ni nchumu lexi nga ni fermentu;+ u fanele u heta 7 wa masiku na u dla pawu la ku kala fermentu ku nga pawu la ku xaniseka, hikusa u hume ka tiko la Gibita hi ku hantlisa.+ Yendla leswi wutomi la wena hinkwalu leswaku u khumbuka siku leli u nga huma hi lona ka tiko la Gibita.+ 4 A ku fanelanga ku kumiwa fermentu ka ndhawu hinkwayu leyi u tshamaka ka yona anze ku hela 7 wa masiku,+ naswona nyama leyi u nga ta yendla gandzelo hi yona nimadlambu hi siku la ku sungula, a yi fanelanga yi sala anze nimixo.+ 5 A wu nge pfumeleliwi ku yendla gandzelo la Paxkwa ka doropa lin’wani ni lin’wani leli Yehovha Xikwembu xa wena a ku nyikaka lona. 6 Kambe li fanele li yendliwa ka ndhawu leyi Yehovha Xikwembu xa wena a nga ta yi langa swaku vito la yena li dzunisiwa ka yona. U fanele u yendla gandzelo la Paxkwa nimadlambu loko dlambu li pela,+ hi nkama lowu nga vekiwa wa ku huma ka wena aGibita. 7 U fanele u yi sweka u tlhela u yi dlela+ ka ndhawu leyi Yehovha Xikwembu xa wena a nga ta yi langa,+ se nimixo u nga tlhelela ka matende ya wena. 8 U fanele u dla pawu la ku kala fermentu anze ku hela 6 wa masiku naswona hi siku la wu 7 ku ta va ni asembleya ya ku hlawuleka ya Yehovha Xikwembu xa wena. U nga tshuki u tirha hi siku lolelo.+

9 “U fanele u konta 7 wa mavhiki. U fanele u sungula ku konta 7 wa mavhiki nkama u nga ta sungula ku tsema maxalani* hi sikelo.*+ 10 Kutani u ta gama u yendla Fexta la Mavhiki ka Yehovha Xikwembu xa wena,+ u nyikela ni gandzelo la ku tirhandzela, hi ku ya hi leswi Yehovha Xikwembu xa wena a nga ku katekisa xiswona.+ 11 U ta tsaka phambheni ka Yehovha Xikwembu xa wena, wena ni n’wana wa wena wa djaha, n’wana wa wena wa ntombhi, xikarawa xa wena xa xinuna, xikarawa xa wena xa xisati, Mulevhi lweyi u tshamaka na yena, munhu wa tiko lin’wani, n’wana lweyi a nga feliwa hi vapsali* ni wansati wa ku feliwa hi nuna, lava tshamaka xikarhi ka n’wina ka ndhawu leyi Yehovha Xikwembu xa wena a nga ta yi langa swaku vito la yena li dzunisiwa ka yona.+ 12 Khumbuka swaku a wu li xikarawa aGibita,+ kutani yingisa u tlhela u landzela minawu leyi.

13 “U fanele u yendla Fexta la Minchacha*+ anze ku hela 7 wa masiku, nkama u nga ta hlengeleta leswi nga xihulelweni* xa wena, u kama mafurha ya wena ya wolivhera ni vhinyu. 14 Tsaka hi nkama wa fexta,+ wena ni n’wana wa wena wa djaha, n’wana wa wena wa ntombhi, xikarawa xa wena xa xinuna, xikarawa xa wena xa xisati, Mulevhi, munhu wa tiko lin’wani, n’wana lweyi a nga feliwa hi vapsali* ni wansati wa ku feliwa hi nuna, lava tshamaka na wena tikweni. 15 U ta yendlela Yehovha Xikwembu xa wena fexta+ ka ndhawu leyi Yehovha a nga ta yi langa anze ku hela 7 wa masiku, hikusa Yehovha Xikwembu xa wena a ta katekisa ntshovelo wa wena hinkwawu ni hinkwaswu leswi u swi yendlaka+ naswona u ta tsaka swinene.+

16 “Kanharhu hi lembe, vavanuna hinkwavu xikarhi ka wena va fanele va ya phambheni ka Yehovha Xikwembu xa wena, ka ndhawu leyi a nga ta yi langa: Ka Fexta la Mapawu ya Ku Kala Fermentu,+ Fexta la Mavhiki+ ni Fexta la Minchacha*+ naswona a ku fanelanga ku va ni lweyi a yaka ka Yehovha na a nga khomanga nchumu. 17 Xin’wani ni xin’wani lexi munhu a nga ta xi nyikela xi fanele xi ringana ni nkateko lowu Yehovha Xikwembu xa wena a nga ku katekisa hi wona.+

18 “U fanele u langa vayavanyisi+ ni varhangeli ka lixaka lin’wani ni lin’wani ka madoropa hinkwawu lawa Yehovha Xikwembu xa wena a ku nyikaka wona naswona va fanele va yavanyisa vanhu hi ndlela yayinene. 19 U nga tshuki u txintxa swa ku lulama,+ u va ni xikheto+ kumbe u pfumela ku xaviwa hikusa leswo swi pfala matihlo ya lava va ku tlhariha+ swi tlhela swi txintxa marito ya lava ku lulama. 20 U fanele u yavanyisa hi ndlela ya ku lulama+ leswaku u ta tama u hanya, u teka tiko leli Yehovha Xikwembu xa wena a ku nyikaka lona.

21 “U nga tshuki u byala nsinya wun’wani ni wun’wani swaku wu va mhandzi ya Axera*+ akusuhi ni altari leyi u nga yi yendlela Yehovha Xikwembu xa wena.

22 “Naswona u nga tshuki u dzima pilari swaku u li gandzela+ hikusa Yehovha Xikwembu xa wena wa swi nyenya swoleswo.

17 “U nga tshuki u yendlela Yehovha Xikwembu xa wena gandzelo hi ku tirhisa homu kumbe nyempfu ya ku limala kumbe leyi nga ni xivati xin’wani, hikusa leswo swa nyenyentsa ka Yehovha Xikwembu xa wena.+

2 “Loko ko tshuka ku kumeka wanuna kumbe wansati xikarhi ka n’wina, ka madoropa lawa Yehovha Xikwembu xa wena a ku nyikaka wona, lweyi a yendlaka swilo swa ku biha ka matihlo ya Yehovha Xikwembu xa wena, a tlula ntwananu wa yena;+ 3 naswona munhu wa kona a hambuka a ya gandzela swikwembu swin’wani a swi khizamela, kumbe a khizamela dlambu, kumbe n’weti, kumbe swilo hinkwaswu* swa le tilweni,+ ku nga leswi ni kalaka ni nga mi rhumanga;+ 4 se u gama u byeliwa yona mhaka leyi kumbe u yi twa, u fanele u yi kambisisa kahle. Loko ku kumeka swaku mhaka leyi ya ku nyenyentsa yi yendlekile+ aIsrayele, 5 u fanele u humesa wanuna kumbe wansati yelweyo a nga yendla swilo swa ku biha ahandle ka swipfalu swa doropa kutani wanuna kumbe wansati yelweyo a fanele a biwa hi maribye a za a fa.+ 6 Munhu a fanele a dlayiwa ntsena loko ku ni wufakazi la timboni timbirhi kumbe tinharhu.+ A nga tshuki a dlayiwa hi mhaka ya wufakazi la mboni yin’we ntsena.+ 7 Timboni hi tona ti faneleke ti sungula ti mu ba hi maribye, se hi kona vanhu lavan’wani hinkwavu va nga ta mu ba hi maribye. U fanele u susa swa ku biha xikarhi ka wena.+

8 “Loko ku tshuka ku va ni mhaka leyi karhataka ku yi yavanyisa ka madoropa man’wani ya n’wina, ku nga ha va mhaka ya ku dlayiwa ka munhu,+ kumbe ku ni nandzu lowu nga pfuxa xirilo kumbe loko ku yendliwe swilo swa ku biha,* kumbe timhaka tin’wani leti fambelanaka ni ku holovisana, u fanele u ya ka ndhawu leyi Yehovha Xikwembu xa wena a nga ta yi langa.+ 9 Famba ka vaprista lava va nga Valevhi ni ka muyavanyisi+ lweyi a nga kona hi nkama wolowo, u fika u va byela mhaka ya kona, se va ta gama va ku byela leswi nga bohiwa.+ 10 U fanele u yendla leswi va nga swi boha ka ndhawu leyi Yehovha a nga ta yi langa. Tiyiseka swaku u yendla hinkwaswu leswi va ku byelaka swona. 11 U fanele u yendla leswi laviwaka hi nawu lowu va nga ta ku komba wona ni hi ku ya hi leswi va nga ta swi boha.+ U nga hambuki ka leswi va nga ta swi boha, u ya ka xinene kumbe ka ximatsi.+ 12 Munhu lweyi a nga ta tibyela kutani a nga mu yingisi muprista lweyi a tirhelaka Yehovha Xikwembu xa wena kumbe muyavanyisi, a fanele a fa.+ U fanele u susa swa ku biha aIsrayele.+ 13 Vanhu hinkwavu va ta swi twa se va chava, a va nge he tshuki va tibyela.+

14 “Nkama u nga ta fika ka tiko leli Yehovha Xikwembu xa wena a ku nyikaka lona, naswona se u li tekile u tshama ka lona kutani u gama u ku: ‘Na ha tivekela hosi ku fana ni matiko lawa ma nga kusuhi na mina,’+ 15 u fanele u tivekela hosi leyi Yehovha Xikwembu xa wena a yi langaka.+ U fanele u veka Muyisrayele wa lixaka la wena swaku a va hosi. Swa tsimbisiwa ku veka munhu wa tiko lin’wani lweyi a kalaka a nga li Muyisrayele. 16 Hosi ya kona, a yi fanelanga yi tihlengeletelela makavhalu ya manyingi+ kumbe yi yendla swaku vanhu va tlhelela Gibita va ya yi lavela makavhalu man’wani,+ hikusa Yehovha a mi byele leswi: ‘Mi nga ha tlheleli ka tiko leliyani ni siku ni lin’we.’ 17 A yi fanelanga yi va ni vavasati va vanyingi, leswaku mbilu ya yona yi nga hambuki,+ naswona yi nga tihlengeleteleli prata ni woru la linyingi hintamu.+ 18 Loko yi sungula ku fuma, yi fanele yi kopiyara Nawu lowu yi wu tsala ka buku, yi ta kopiyara ka Nawu lowu nga hlayisiwa hi vaprista lava va nga Valevhi.+

19 “Yi ta tshama na wona naswona yi fanele yi wu lerha wutomi la yona hinkwalu,+ leswaku yi ta djondza ku chava Yehovha Xikwembu xa yona ni ku hlayisa marito hinkwawu ya Nawu lowu, kutani yi hanya hi wona.+ 20 Se mbilu ya yona a yi nge tiveki henhla ka vamakwavu naswona a yi nge hambuki ka minawu leyi, yi ya ka xinene kumbe ka ximatsi, kutani yi ta fuma nkama wa wunyingi, yona ni vana va yona aIsrayele.

18 “Vaprista lava va nga Valevhi ni lixaka hinkwalu la Levhi a va nga ta va ni tiko kumbe tshomba ni Vayisrayele. Va ta dla leswi susiwaka ka magandzelo lama nga nyikeliwa ka Yehovha hi ndzilu, leswi ku nga tshomba la yena.+ 2 Se a va fanelanga va va ni tshomba xikarhi ka vamakwavu. Yehovha i tshomba la vona, ku nga leswi a nga va byela swona.

3 “Vanhu va fanele va mu nyika leswi muprista: Mun’wani ni mun’wani lweyi a yendlaka gandzelo, ku nga ha va hi homu kumbe hi nyempfu, a fanele a nyika muprista katla, tinhlaya* ni khwirhi. 4 Mi fanele mi mu nyika leswi nga rhanga swi tshoveliwa ka trigu* la n’wina, vhinyu la n’wina la nyuwani, mafurha ya n’wina ni mavoya lama nga rhanga ma tsemetiwa ka tinyempfu ta n’wina.+ 5 Yehovha Xikwembu xa n’wina, a lange Valevhi ni vana va vona ka tinxaka ta n’wina hinkwatu swaku va ta tirhela Yehovha nkama hinkwawu.+

6 “Kambe loko Mulevhi a rhurha ka lin’we la madoropa ya Israyele lomu a a tshama kona+ naswona a navela ku ya ka ndhawu leyi Yehovha a yi langaka,*+ 7 a nga tirha kolanu a tirhela Yehovha Xikwembu xa yena ku fana ni vamakwavu hinkwavu, ku nga Valevhi lava va tirhelaka Yehovha kolanu.+ 8 A ta kuma swakudla swa ku ringana ni swa vona+ ku yengetela ka leswi a nga ta swi kuma loko a xavisa swilo leswi a nga siyeliwa swona hi vavhovho va yena.

9 “Nkama u nga ta nghena ka tiko leli Yehovha Xikwembu xa wena a ku nyikaka lona, u nga tshuki u tekelela mintirho ya ku nyenyentsa leyi yendliwaka hi matiko wolawo.+ 10 Xikarhi ka wena ku nga tshuki ku kumiwa munhu lweyi a hisaka n’wana wa yena wa djaha kumbe wa ntombhi hi ndzilu+ swaku a yendla gandzelo hi yena,+ lweyi a hlahluvaka,+ lweyi a yendlaka masalamusi,+ lweyi a vhumbaka, muloyi,+ 11 lweyi a loyaka van’wani, lweyi a vutisaka mungoma+ kumbe lweyi a vhumbaka+ kumbe lweyi a vutisaka lava va nga fa.+ 12 Hikusa mun’wani ni mun’wani lweyi a yendlaka swilo leswi wa nyenyentsa ka Yehovha, naswona Yehovha Xikwembu xa wena a za a hlongola matiko lawa phambheni ka wena hi mhaka ya swilo leswi swa ku nyenyentsa. 13 A wu fanelanga u va ni nandzu phambheni ka Yehovha Xikwembu xa wena.+

14 “Hikusa matiko lawa u ma hlongolaka a ma yingisa lava va yendlaka masalamusi+ ni lava va vhumbaka,+ kambe Yehovha Xikwembu xa wena a ku tsimbisile ku yendla swilo swa ku fana ni leswo. 15 Yehovha Xikwembu xa wena a ta ku langela muprofeta wa ku fana na mina, xikarhi ka vamakwenu. Mi fanele mi mu yingisa.+ 16 Phela hi leswo u nga swi kombela ka Yehovha Xikwembu xa wena hi siku leli a ku tlhanganiwile+ le Horebi, u ku: ‘U nga ha tlheli u yendla swaku ni twa rito la Yehovha Xikwembu xa mina kumbe ni vona ndzilu lowu wawukulu leswaku ni nga fi.’+ 17 Kutani Yehovha a ku: ‘Leswi va swi vulaka i swinene. 18 Ni ta va langela muprofeta xikarhi ka vamakwavu lweyi a fanaka na wena,+ ni ta veka marito ya mina ka nomo wa yena+ kutani a ta va byela hinkwaswu leswi ni nga ta mu byela swona.+ 19 Phela munhu lweyi a nga ta kala a nga yingisi marito ya mina lawa muprofeta a nga ta ma vula hi ku tirhisa vito la mina a ta tihlamulela ka mina.+

20 “‘Loko muprofeta o tibyela, a hlaya nchumu xa ku kala ni nga mu rhumanga swaku a xi vula na a tirhisa vito la mina, kumbe a vulavula hi swikwembu swin’wani, muprofeta yelweyo a fanele a fa.+ 21 Kambe u nga ha tivutisa leswi: “Ni ta swi tivisa ku yini swaku leswi a swi vulaka a swi ti hi ka Yehovha?” 22 Loko muprofeta o vulavula hi vito la Yehovha kutani leswi a nga swi vula swi nga humeleli kumbe swi nga hetiseki, leswo swi ta vula swaku leswi a nga swi vula a swi nga ti hi ka Yehovha. Muprofeta yelweyo o swi sukela. U nga tshuki u mu chava.’

19 “Nkama Yehovha Xikwembu xa wena a nga ta helisa vanhu lava Yehovha Xikwembu xa wena a ku nyikaka tiko la vona, se wena u va hlongola naswona u tshama ka madoropa ni ka tiyindlo ta vona,+ 2 u fanele u langa madoropa manharhu xikarhi ka tiko leli Yehovha Xikwembu xa wena a ku nyikaka lona.+ 3 U fanele u yava tiko leli Yehovha Xikwembu xa wena a ku nyikaka lona swaku li va tindhawu tinharhu, u tlhela u lunghiselela tindlela swaku mudlayi a ta swi kota ku baleka a ya ka lin’we la madoropa wolawo.

4 “Leswaku mudlayi lweyi a balekaka a ya kolanu a tama a hanya ku fanele ku yendleke leswi: Loko o tshuka a dlaye munhu mun’wani ku nga li hi maxivomu naswona na a nga mu nyenyi;+ 5 hi xikombiso loko swi ku a a yo famba ni munhu mun’wani va ya nhoveni swaku va ya rholela tihunyi, kutani a tlakusa voko la yena swaku a tsema nsinya, kambe bewula li hlomuka ka mbhinyi li ya ba munhu yelweyo a fa, mudlayi a fanele a baleka a ya ka lin’wani la madoropa wolawo swaku a tama a hanya.+ 6 Loko ku nga yendliwi leswo, xaka la le kusuhi la lweyi a nga dlayiwa+ li nga mu hlongolisa, li za li mu kuma hi mhaka ya leswi li nga kwata kutani li mu dlaya hikusa ndlela ya ku ya ka doropa la ku tumbela ka lona yi lehile. Kambe mudlayi lweyi a a nga faneliwi hi ku fa hikusa a a nga mu nyenyi lweyi a nga mu dlaya.+ 7 Hi leswo swi yendlaka ni ku byela ni ku: ‘Langa madoropa manharhu.’

8 “Yehovha Xikwembu xa wena a ta yengetela ndhawu ya wena hi ku landza leswi a nga swi fungela vavhovho va wena,+ kutani a ku nyika tiko hinkwalu leli a nga li tshembisa vavhovho va wena,+ 9 kambe leswaku leswo swi yendleka, u fanele u yingisa minawu leyi hinkwayu ni ku byelaka yona namuntlha, leswaku u rhandza Yehovha Xikwembu xa wena ni ku famba ka tindlela ta yena,+ kutani u ta yengetela madoropa man’wani manharhu ka lawa se u nga na wona ya manharhu.+ 10 Loko u yendla leswo, a ku nga ta dlayiwa munhu wa ku kala a nga na nandzu+ ka tiko la wena leli Yehovha Xikwembu xa wena a ku nyikaka lona swaku li va tshomba la wena, naswona a wu nga ta va ni nandzu wa ngati.+

11 “Kambe loko ku li swaku munhu wa kona a a nyenya munhu mun’wani,+ se a gama a mu tumbelela kutani a mu ba a mu vavisa swinene a za a fa, se mudlayi lweyi a baleka a ya ka lin’wani la madoropa lawa, 12 madoda ya doropa leli a taka hi ka lona ma fanele ma rhuma vanhu swaku va ya mu teka, se va mu nyiketa ka xaka la le kusuhi la lweyi a nga dlayiwa naswona a fanele a fa.+ 13 A wu fanelanga u mu twela wusiwana, u fanele u susa xidjoho xa lweyi a nga dlaya munhu wa ku kala a nga na nandzu aIsrayele,+ swaku swi ta ku fambela kahle.

14 “Nkama u nga ta kuma tshomba la wena ka tiko leli Yehovha Xikwembu xa wena a ku nyikaka lona, a wu fanelanga u susa xa ku markara ndhawu* ya vhizinyu wa wena,+ lexi nga vekiwa hi vavhovho va n’wina u xi veka ka ndhawu yin’wani.

15 “Munhu a nge nyikiwi nandzu loko ku ni fakazi yin’we ka xihoxo xin’wani ni xin’wani kumbe xidjoho xin’wani ni xin’wani lexi a nga xi yendla.+ Mhaka yi fanele yi tiyisiwa hi vafakazi vambirhi kumbe vanharhu.+ 16 Loko fakazi yo tshuka yi lumbeta munhu mun’wani hi mhaka ya leswi yi mu nyenyaka,+ 17 vanhu lavambirhi va holovaka va fanele va nyima phambheni ka Yehovha, phambheni ka vaprista ni vayavanyisi lava va nga ta va kona hi nkama wolowo.+ 18 Vayavanyisi va ta yi kambisisa kahle mhaka ya kona,+ loko munhu lweyi a lumbetaka mun’wani a li fakazi ya mavunhwa naswona a lumbeta makwavu hi mavunhwa, 19 mi fanele mi mu yendla leswi a a lava ku swi yendla ka makwavu,+ mi fanele mi susa swa ku biha xikarhi ka n’wina.+ 20 Van’wani va ta swi twa va gama va chava naswona a va nge he tshuki va yendla nchumu wa ku biha wa ku fana ni lowu xikarhi ka n’wina.+ 21 U nga mu tweli wusiwana:+ Wutomi li ta hakeliwa hi wutomi, tihlo hi tihlo, tinyu hi tinyu, voko hi voko, nenge hi nenge.+

20 “Loko wo ya nyimpini u ya lwa ni valala va wena, kutani u vona swaku va ni makavhalu, tinyolo* ta nyimpi ni masonchwa ya manyingi ku ku tlula, u nga va chavi hikusa Yehovha Xikwembu xa wena lweyi a nga ku humesa ka tiko la Gibita a na wena.+ 2 Loko mi li kusuhi ni ku ya nyimpini, muprista a fanele a tshinela a vulavula ni vanhu.+ 3 A fanele a va byela leswi: ‘Yingisani n’wina Vayisrayele, mi kusuhi ni ku ya lwa ni valala va n’wina. Mi nga vi ni wutoya. Mi nga va chavi kumbe mi hela ntamu naswona mi nga rhurhumeli hi mhaka ya vona, 4 hikusa Yehovha Xikwembu xa n’wina a famba na n’wina swaku a mi lwela ka valala va n’wina ni ku mi ponisa.’+

5 “Na vona varhangeli va fanele va byela vanhu va ku: ‘I mani lweyi a nga yaka yindlo naswona a kalaka a nga se sungula ku yi tirhisa? A a tlhelele kaya ka yena hikusa a nga fa nyimpini kutani wanuna mun’wani a sungula ku yi tirhisa. 6 Naswona i mani lweyi a nga rima masimu ya mawuvha kambe a kalaka a nga se ma tshovela? A a tlhelele kaya ka yena hikusa a nga fa nyimpini kutani wanuna mun’wani a sala a ma tshovela. 7 Naswona i mani lweyi a nga tshembisa wansati kambe a kalaka a nga se mu chada? A a tlhelele kaya ka yena+ hikusa a nga fa nyimpini kutani wansati yelweyo a sala a tekiwa hi wanuna mun’wani.’ 8 Varhangeli va fanele va tlhela va vutisa vanhu va ku: ‘I mani lweyi a chavaka naswona a nga ni wutoya?+ A fanele a tlhelela kaya ka yena swaku a nga yendli vamakwavu va hela matimba ku fana na yena.’+ 9 Loko varhangeli va game ku vulavula ni vanhu, va fanele va langa varhangeli va masonchwa lava va nga ta rhangela vanhu.

10 “Loko u tshinela kusuhi ni doropa swaku u lwa na lona, u fanele u rhanga hi ku byela lava tshamaka ka lona swaku mi lava ku yendla ku rhula na vona.+ 11 Loko vanhu va doropa lolelo vo pfumela ku kala va nga lwi na n’wina kutani va mi pfulela swipfalu swa doropa la vona, vanhu hinkwavu lava va nga kolanu va ta va swikarawa swa n’wina va tlhela va mi tirhela.+ 12 Kambe loko va nga lavi ku yendla ku rhula na wena va lava ku lwa na wena, u fanele u rhendzela doropa lolelo, 13 Yehovha Xikwembu xa wena a ta li nyiketa ka mavoko ya wena kutani u fanele u dlaya vavanuna hinkwavu lava va nga ka doropa lolelo hi xipada. 14 Kambe vavasati, vana, swifuyu ni hinkwaswu leswi nga ka doropa lolelo, mi nga titekela swona+ naswona mi ta titekela swilo hinkwaswu swa lisima swa valala va n’wina leswi Yehovha Xikwembu xa n’wina a nga mi nyika swona.+

15 “Mi ta yendla leswo ka madoropa hinkwawu lama nga kule hintamu na n’wina, madoropa lawa ma kalaka ma nga lumbi matiko lama nga kusuhi na n’wina. 16 Kambe ka madoropa ya vanhu lava, lawa Yehovha Xikwembu xa wena a nga ku nyika wona swaku ma va tshomba, a wu fanelanga u pfumelela nchumu ni xin’we lexi hefemulaka xi tama xi hanya.+ 17 U fanele u va helisa hinkwavu, Vaheti, Vaamori, Vakanana, Vaperezi, Vahivhi ni Vayebusi,+ hi ku landza leswi Yehovha Xikwembu xa wena a nga ku byela swona; 18 leswaku va nga mi djondzisi ku yendla minchumu ya vona hinkwayu ya ku nyenyentsa, leyi va yi yendlelaka swikwembu swa vona se va mi yendla mi djohela Yehovha Xikwembu xa n’wina.+

19 “Loko wo rhendzela doropa u gama u li teka loko se u lwe na lona masiku ya manyingi, u nga tshuki u helisa minsinya ya lona hi ku yi tsema hi bewula. U nga dla mihandzu ya lona kambe a wu fanelanga u tsema minsinya.+ Hikusa, indjhe swo boha u hlasela minsinya ya le nhoveni ku fana ni loko u hlasela munhu? 20 U nga helisa ntsena nsinya lowu u swi tivaka swaku a wu dliwi. U nga wu tsema kutani u yaka mimuru leyi nga ta ku pfuna ku hlasela doropa leli u lwaka na lona anze u li hlula.

21 “Loko ko tshuka ku kumiwa munhu na a dlayiwile ka tiko leli Yehovha Xikwembu xa wena a ku nyikaka lona, kambe swi nga tiviwi swaku i mani a nga mu dlaya, 2 madoda ni vayavanyisi+ va wena va fanele va huma va ya pima mpfhuka lowu nga xikarhi ka doropa leli nga kusuhi ni ntsumbu. 3 Kutani madoda ya doropa leli nga kusuhi ni ntsumbu ma fanele ma teka xihon’wani ka ntlhambi lexi kalaka xi nge se tshama xi tirhisiwa, lexi kalaka xi nge se tshama xi tlhatekiwa kange;* 4 madoda ya doropa lolelo ma fanele ma famba ni xihon’wani lexo ka nkova lowu nga ni mati lama fambaka, lomu ku kalaka ku nge se tshama ku rimiwa, kumbe ku byaliwa mbewu; kutani va fanele va tshova nhamu ya xihon’wani xolexo ka nkova.+

5 “Se vaprista ku nga Valevhi, va ta ta hikusa Yehovha Xikwembu xa wena a lange vona swaku va mu tirhela+ va tlhela va katekisa vanhu hi vito la Yehovha.+ Va ta vula leswi mhaka yin’wana ni yin’wana leyi fambisanaka ni loko munhu a hlaseliwa yi nga ta tlhantlhisiwa xiswona.+ 6 Se madoda hinkwawu ya doropa lawa ma tshamaka ka doropa leli nga kusuhi ni ntsumbu ma fanele ma hlamba mavoko+ henhla ka xihon’wani lexi nga tshoviwa nhamu ankoveni, 7 ma fanele ma ku: ‘A hi hina hi nga mu dlaya munhu* lweyi naswona a hi swi vonanga nkama a nga dlayiwa. 8 Yehovha, u nga va nyiki nandzu vanhu va wena ku nga Israyele, lava u nga va ponisa,+ naswona u nga yendli vanhu va wena va tshama na va ni nandzu wa ku dlayiwa ka munhu lweyi a kalaka a nga na nandzu.’+ Kutani a va nga ta voniwa na va ni nandzu wa ngati. 9 Hi ku yendla leswo u ta susa nandzu wa ku dlayiwa ka munhu lweyi a kalaka a nga na nandzu xikarhi ka wena hi ku yendla swa ku lulama phambheni ka Yehovha.

10 “Loko wo lwa ni valala va wena kutani Yehovha Xikwembu xa wena a ku hlulela vona, se u va yendla swikarawa,+ 11 naswona u vona wansati wa ku saseka xikarhi ka swikarawa, u mu navela naswona u lava ku mu teka swaku a va nsati wa wena, 12 u nga mu yisa kaya ka wena. A fanele a tsemeta nhloko ya yena yi ku baa, a tsema ni tinwala ta yena, 13 a hlivila mpahla ya yena ya wukarawa kutani a tshama kaya ka wena. A ta rila papayi wa yena ni mamani wa yena wheti hinkwayu,+ se hi kona u nga gamaka u famba masangu na yena; u ta va nuna wa yena naswona yena a ta va nsati wa wena. 14 Kambe loko u nga ha mu lavi, u fanele u mu tshika a famba,+ a ya lomu a ku lavaka. Kambe u nga mu xavisi hi male kumbe u mu hlupha, hikusa u mu danisile.

15 “Loko wanuna o va ni vasati vambirhi, kambe a rhandza mun’we ku tlula lweyi mun’wani, se hawumbirhi va mu psalela vana va madjaha kuve n’wana wa djaha wa matevula a psaliwe hi wansati lweyi a kalaka a nga rhandziwi,+ 16 a nga pfumeleliwi ku yendla ingaku n’wana wa nsati lweyi a mu rhandzaka hi yena wa matevula, hi siku leli a nga ta nyika vana va yena tshomba, hikusa lweyi wa matevula i n’wana wa nsati lweyi a kalaka a nga rhandziwi. 17 A fanele a kombisa swaku n’wana wa nsati lweyi a kalaka a nga rhandziwi hi yena wa matevula hi ku mu nyika swiyenge swimbirhi swa hinkwaswu leswi a nga na swona, hikusa djaha leli hi lona masungulo ya matimba ya yena ya ku psala. Mfanelo leyi swi bohaka yi kumiwa hi n’wana wa matevula yi lumba yena.+

18 “Loko munhu o va ni n’wana wa ku tlhanyisana nhloko a tlhela a delela, lweyi a kalaka a nga mu yingisi papayi wa yena kumbe mamani wa yena+ naswona va nga zama ku mu laya kambe a nga va yingisi,+ 19 papayi wa yena ni mamani wa yena va fanele va mu khoma va mu yisa ka madoda lawa ma nga ka nyanghwa wa doropa, 20 va fika va byela madoda ya doropa va ku: ‘N’wana lweyi wa hina a hi tlhanyisa nhloko a tlhela a delela, a nga hi yingisi. A ni magolo*+ naswona i xidakwa.’+ 21 Kutani vavanuna hinkwavu va doropa lolelo va fanele va mu ba hi maribye a za a fa. U fanele u susa swa ku biha xikarhi ka wena, tiko hinkwalu la Israyele li ta swi twa, li gama li chava.+

22 “Loko munhu o tshuka a yendla xidjoho lexi a faneliwaka hi ku fa, kutani a dlayiwa+ u tlhela u mu hayeka ka mhandzi,+ 23 ntsumbu wa yena a wu fanelanga wu tshikiwa wusiku hinkwalu ka mhandzi.+ U fanele u tiyiseka swaku wa mu lahla hi siku lolelo, hikusa munhu lweyi a nga hayekiwa i xirhuku ka Xikwembu,+ a wu fanelanga u chakisa tiko la wena leli Yehovha Xikwembu xa wena a ku nyikaka lona swaku li va tshomba.+

22 “Loko u tshuka u vona homu kumbe nyempfu ya makwenu yi lahleka, u nga yendli ingi a wu yi vonanga.+ U fanele u yi tlhelisela ka makwenu. 2 Kambe loko makwenu a nga tshami kusuhi na wena kumbe u nga mu tivi, u fanele u muka ni xifuyu lexo kaya ka wena, xi ta tshama na wena anze makwenu a xi lavetela. Kutani u fanele u mu tlhelisela xona.+ 3 U fanele u yendla leswo ka mbongolo ya yena, mpahla ya yena ni ka nchumu xin’wani ni xin’wani lexi nga lahleka lexi lumbaka makwenu kutani u gama u xi rhola. U nga tshuki u yendla ingi a wu xi vonanga.

4 “Loko u vona mbongolo ya makwenu kumbe homu ya yena na yi djiyelile ndleleni, u nga tshuki u yendla ingi a wu swi vonanga. U fanele u mu pfuna ku pfuxa xifuyu xolexo.+

5 “Wansati a nga tshuki a yambala mpahla ya wanuna, ni wanuna a nga tshuki a yambala mpahla ya wansati, hikusa lweyi a yendlaka leswo wa nyenyentsa ka Yehovha Xikwembu xa wena.

6 “Loko wo tshuka u kuma xisaka xa xinyanyani andleleni na xi ni vana kumbe matandza, ku nga ha va ka nsinya kumbe hansi, naswona mamani wa kona a fukamela vana* kumbe matandza, u nga tshuki u teka mamani wa kona ni vana va yena.+ 7 Tshika mamani wa kona a famba u titekela vana va kona, loko u yendla leswo swi ta ku fambela kahle naswona u ta hanya nkama wa ku leha.

8 “Loko wo yaka yindlo, u fanele u tlhela u yaka ni ximurwani* ahenhla ka yindlo,+ swaku u nga vi ni nandzu wa ngati loko ko tshuka ku wa munhu hi henhla ka yindlo.

9 “U nga tshuki u byala mbewu yin’wani lomu u nga byala mawuvha.+ Loko wo tshuka u yendla leswo hinkwaswu leswi nga ta tshoveliwa kolanu swi ta tekiwa swi yisiwa ka ndhawu leyi kwetsimaka.

10 “U nga tshuki u rima hi homu leyi nga patsiwa xikan’we ni mbongolo.+

11 “U nga tshuki u yambala mpahla leyi nga rhungiwa hi mavoya ni hi panu ya linyu.+

12 “U fanele u rhunga swilo swa ku sasekisa hi swona leswi lengalengaka* ka 4 wa tiponta ta mpahla ya wena.+

13 “Loko wanuna o teka nsati kutani a famba masangu na yena a gama a sungula ku mu nyenya,* 14 a mu lumbeta swaku a nga tikhomanga kahle a tlhela a mu wonha vito, a ku: ‘Ni teke wansati lweyi kambe nkama ni nga famba masangu na yena, ni tsumbule swaku se a a fambe masangu ni mun’wani,’ 15 vapsali va ntombhi leyi, va fanele va nyikela wumboni ka madoda lawa ma nga ka nyanghwa wa doropa la swaku ntombhi leyi, a yi nge se tshama yi famba masangu ni munhu mun’wani. 16 Papayi wa ntombhi a fanele a byela madoda a ku: ‘Ni nyike wanuna lweyi n’wana wa mina swaku a va nsati wa yena kambe swoswi wa mu nyenya,* 17 a mu lumbeta swaku a nga tikhomanga kahle, a li: “Ni tsumbule swaku n’wana wa wena a tshame a famba masangu.” Kambe wumboni la leswaku n’wana wa mina a a nge se tshama a famba masangu ni munhu mun’wani hi leli.’ Se va ta yandlala lensoli phambheni ka madoda ya doropa. 18 Kutani madoda ya doropa+ ma ta teka wanuna yelweyo ma mu ba.+ 19 Ma ta mu hakelisa 1.140 wa magrama* ya prata ma yi nyika papayi wa ntombhi, hikusa wanuna lweyi a wonhe vito la ntombhi ya Israyele,+ ntombhi leyi yi ta tama yi va nsati wa yena. Wanuna yelweyo a nge tshuki a pfumeleliwa ku mu tshika loko a ha hanya.

20 “Kambe loko swi ku leswi va mu lumbetaka hi swona i ntiyiso naswona a ku na wumboni la leswaku ntombhi leyi a yi nge se tshama yi famba masangu ni munhu mun’wani, 21 va fanele va humesa ntombhi leyo va yi yisa ka nyanghwa wa yindlo ya papayi wa yona kutani vavanuna va doropa va fanele va yi ba hi maribye yi za yi fa, hikusa yi yendle swilo leswi danisaka+ aIsrayele hi ku yendla wuntunga la swa masangu* kaya ka papayi wa yona.+ Se u fanele u susa swilo swa ku biha xikarhi ka wena.+

22 “Loko wanuna o kumiwa na a famba masangu ni wansati lweyi a nga ni nuna, va fanele va dlayiwa hawumbirhi ka vona, wanuna lweyi a nga famba masangu ni wansati ku patsa ni wansati wa kona.+ Se u fanele u susa swilo swa ku biha aIsrayele.

23 “Loko ntombhi* leyi nga tshembisiwa ku chadiwa hi wanuna yi tlhangana ni wanuna mun’wani adoropeni, se wanuna lweyi a gama a famba masangu na yona, 24 mi fanele mi va humesa hawumbirhi mi va veka ka nyanghwa wa doropa, mi va ba hi maribye va za va fa, ntombhi yi ta fa hi mhaka ya leswi yi kalaka yi nga banga nyandha adoropeni, kutani wanuna a ta fa hi mhaka ya leswi a nga danisa nsati wa munhu mun’wani.+ Se mi fanele mi susa swilo swa ku biha xikarhi ka n’wina.

25 “Kambe loko wanuna o tshuka a tlhangana ni ntombhi leyi nga tshembisiwa ku chadiwa hi wanuna mun’wani anhoveni, a gama a yi pfinya, ku to dlayiwa wanuna yelweyo ntsena, 26 kasi ntombhi u nga tshuki u yi yendla nchumu. A yi yendlanga xidjoho lexi faneliwaka hi lifu. Mhaka leyi yi fana ni loko munhu a hlasela munhu mun’wani a mu dlaya.+ 27 Hikusa a tlhangane na yona anhoveni. Naswona ntombhi yi be nyandha kambe a ku nga na munhu wa ku yi pfuna.

28 “Loko wanuna o tlhangana ni ntombhi* leyi kalaka yi nge se tshembisiwa hi wanuna, se a yi khoma a gama a famba masangu na yona kutani va tsumbuliwa,+ 29 wanuna lweyi a nga famba masangu ni ntombhi a fanele a nyika papayi wa yona 570 wa magrama ya prata,* se yi ta gama yi va nsati wa yena.+ Leswi a nga yi danisa, a nge tshuki a pfumeleliwa ku yi tshika wutomi la yena hinkwalu.

30 “A ku na wanuna lweyi a faneleke a teka nsati wa papayi wa yena swaku a nga danisi papayi wa yena.+

23 “A ku na wanuna lweyi a nga theniwa hi ku fayiwa marhanga ya wununa kumbe hi ku tsemiwa xirho xa wununa a nga yamukelekaka ka vanhu va Yehovha.+

2 “A ku na n’wana lweyi a nga psaliwa hi vanhu lava va nga mbuyeta a nga yamukelekaka ka vanhu va Yehovha.+ Naswona a ku na munhu ni mun’we wa lixaka la yena, lweyi a nga yamukelekaka ka vanhu va Yehovha.

3 “A ku na Muamoni kumbe Mumowabu lweyi a yamukelekaka ka vanhu va Yehovha.+ Hambi ka lixaka la wu 10, a ku na ntukulu wa vona ni mun’we lweyi a nga yamukelekaka ka vanhu va Yehovha, 4 hikusa a va mi pfunanga hi ku mi nyika swakudla ni mati nkama mi nga huma Gibita,+ ni hi mhaka ya leswi va nga thola Balamu n’wana wa Beyori wa le Petori wa Mesopotamiya swaku a ta mi rhuka.+ 5 Yehovha Xikwembu xa wena a nga mu yingisanga Balamu.+ Kambe Yehovha Xikwembu xa wena a txintxe xirhuku swaku xi va nkateko ka wena,+ hikusa Yehovha Xikwembu xa wena wa ku rhandza.+ 6 Ka wutomi la wena hinkwalu u nga tshuki u va navelela swaswinene kumbe swaku swi va fambela kahle.+

7 “U nga tshuki u nyenya Muedomu, hikusa i makwenu.+

“U nga tshuki u nyenya Mugibita, hikusa a wu tshama* ka tiko la yena.+ 8 Vana va vona va ku sukela ka lixaka* la wunharhu va nga yamukeleka ka vanhu va Yehovha.

9 “Loko u lunghekile ku lwa ni valala va wena, u fanele u fambela kule ni nchumu xin’wani ni xin’wani xa ku biha.+ 10 Loko munhu o chaka hi mhaka ya leswi a nga huma mbewu ya wununa niwusiku,+ a fanele a huma handle ka matende naswona a nga fanelanga a tlhela a nghena ka matende. 11 Loko li pela, a fanele a hlamba hi mati, se hi kona a nga ta nghena ka matende loko se li mphumile.+ 12 Ku fanele ku va ni ndhawu handle* ka matende, hi lanu u nga ta ya kona loko u lava ku tirhuma. 13 Ka minchumu ya wena u fanele u va ni xikomu. Loko u tirhuma u fanele u rhanga hi ku txela xikhele hi xona, se u gama u seletela chaka la wena. 14 Hikusa Yehovha Xikwembu xa wena a fambafamba xikarhi ka matende ya wena,+ swaku a ku ponisa ni ku nyiketa valala va wena ka wena, kutani matende ya wena ma fanele ma kwetsima,+ swaku a nga voni nchumu xa ku danisa ka wena a gama a ku tshika a nga ha fambi na wena.

15 “Loko xikarawa xo tshuka xi baleka n’winyi wa xona xi ta ka wena, u nga xi tlhelisi ka n’winyi wa xona. 16 Xi nga tshama lomu xi lavaka ku tshama kona ka lin’wani la madoropa ya wena. U nga tshuki u xi hlupha.+

17 “A nga kona ni mun’we ka tintombhi ta Israyele lweyi a faneleke a va nghwavani ya le tempeleni+ ni madjaha ya vana va Israyele ma nga tshuki ma va tinghwavani ta le tempeleni.+ 18 U nga tshuki u tisa male leyi nga hakeliwa* nghwavani ya xisati kumbe nghwavani ya xinuna* ka yindlo ya Yehovha Xikwembu xa wena swaku yi ta hakela leswi nga tshembisiwa, hikusa hawumbirhi ka vona va nyenyentsa ka Yehovha Xikwembu xa wena.

19 “U nga tshuki u hakelisa makwenu majuru,*+ ku nga ha va ka male, ka swakudla kumbe ka nchumu xin’wani ni xin’wani lexi munhu a nga hakelisaka majuru ka xona. 20 Munhu wa tiko lin’wani u nga mu hakelisa majuru,+ kambe u nga tshuki u mu hakelisa majuru makwenu wa wena,+ swaku Yehovha Xikwembu xa wena a ta ku katekisa ka mintirho hinkwayu leyi u nga ta yi yendla ka tiko leli u yaka ka lona swaku u ya li teka.+

21 “Loko wo mu tshembisa nchumu Yehovha Xikwembu xa wena,+ u nga hlweli ku xi yendla. Phela Yehovha Xikwembu xa wena a ta lava swaku u xi yendla;+ loko u nga xi yendli, u ta va u yendle xidjoho.+ 22 Kambe loko u nga tshembisanga nchumu, a wu nga ta va ni nandzu wa xidjoho.+ 23 U fanele u yendla leswi u nga swi hlaya hi nomo wa wena,+ naswona u fanele u yendla leswi u nga swi tshembisa hi nomo wa wena swaku swi va gandzelo la ku tirhandzela ka Yehovha Xikwembu xa wena.+

24 “Loko wo tshuka u nghena ka masimu ya mawuvha ya munhu mun’wani, u nga dla mawuvha anze u kolwa, kambe u nga tshuki u chela man’wani ka xibya xa wena.+

25 “Loko wo nghena ka masimu ya trigu ya munhu mun’wani, u nga khaya leli nga wupfa hi voko, kambe u nga tshuki u teka sikelo* u tshovela trigu la yena.+

24 “Loko wanuna o chada wansati kambe a nga ha mu tsakeli hileswi a nga kuma nchumu xa ku kala xi nga mu tsakisi ka yena, a fanele a mu tsalela papela la ku tima muchadu,*+ a mu nyika lona a gama a mu hlongola kaya ka yena.+ 2 Loko a sukile ka munti wolowo, a nga ha chadiwa hi wanuna mun’wani.+ 3 Loko nuna lweyi wa wumbirhi na yena a nga ha mu lavi kutani a mu tsalela papela la ku tima muchadu, a mu nyika lona a gama a mu hlongola kaya ka yena kumbe loko nuna lweyi wa wumbirhi o tshuka a fa, 4 nuna wa yena wa ku sungula, lweyi a nga mu hlongola a nga pfumeleliwi ku tlhela a mu teka swaku a va nsati wa yena loko se a chakisiwile, hikusa leswo i nchumu xa ku nyenyentsa ka Yehovha. U nga tshuki u tisa xidjoho ka tiko leli Yehovha Xikwembu xa wena a ku nyikaka lona swaku li va tshomba.

5 “Loko wanuna a ha ku chada, a nga fanelanga a ya nyimpini kumbe a nyikiwa mintirho yin’wani. A fanele a chunseka lembe hinkwalu, a tshama kaya a tsakisa nsati wa yena.+

6 “A nga kona lweyi a faneleke a tekela makwavu maribye ya yena ya ku sila hi wona+ swaku ma va xitiyisekisu xa xikweneti hikusa a tihanyisa hi wona.

7 “Loko munhu o tshuka a kumiwa na a yive* Muyisrayele a gama a mu hlupha a tlhela a mu xavisa,+ munhu yelweyo a fanele a fa.+ U fanele u susa swilo swa ku biha xikarhi ka n’wina.+

8 “Loko ku tshuka ku va ni ntungu wa mavabyi ya nhlokonho,* tiyisekani swaku mi yendla hinkwaswu leswi vaprista lava va nga Valevhi va nga ta mi byela swona.+ Yendlani hinkwaswu hi ku landza leswi ni nga va byela swona. 9 Khumbukani leswi Yehovha Xikwembu xa n’wina a nga swi yendla ka Miriyamu andleleni nkama mi nga huma Gibita.+

10 “Loko wo tshuka u lomba munhu xanchumu,+ u nga ngheni kaya ka yena u mu tekela lexi a nga ku tshembisa ku ku nyika xona loko o kala a nga ku hakeli. 11 U fanele u nyima handle, kutani lweyi a ku devhaka a ta ku tisela xa ku tiyisekisa xikweneti, lexi a nga ku tshembisa xona. 12 Loko munhu yelweyo a li xisiwana, u nga yetleli na u nga mu tlheliselanga lexi a nga ku tamelisa xona xa ku tiyisekisa xikweneti.+ 13 U fanele u mu tlhelisela mubalu* wa yena hi ku hantlisa loko dlambu li pela+ swaku a ta wu finengela naswona a ta ku katekisa; u ta va u yendle swaswinene ka Yehovha Xikwembu xa wena.

14 “U nga tshuki u kanganyisa mutirhi lweyi a pfumalaka naswona a nga xisiwana, kumbe i makwenu kumbe i munhu wa tiko lin’wani lweyi u tshamaka na yena ka tiko la wena, ndzeni ka madoropa ya wena.+ 15 U fanele u mu nyika muholo wa yena hi siku lolelo,+ na dlambu li nge se pela, hikusa a nga na nchumu naswona a hanya hi muholo wolowo. Loko u nga yendli leswo, a ta rila hi wena ka Yehovha kutani u ta va ni nandzu.+

16 “Vapapayi a va fanelanga va dlayiwa hi mhaka ya swidjoho swa vana va vona, ni vana a va fanelanga va dlayiwa hi mhaka ya swidjoho swa vapapayi va vona.+ Munhu a fanele a dlayiwa ntsena hi mhaka ya xidjoho xa yena.+

17 “U nga tshuki u yavanyisa munhu wa tiko lin’wani lweyi a tshamaka na wena hi ndlela ya ku kala yi nga li yinene, kumbe n’wana lweyi a nga feliwa hi vapsali*+ naswona u nga tshuki u teka mubalu wa wansati wa ku feliwa hi nuna swaku wu va xitiyisekisu xa xikweneti.+ 18 Khumbuka swaku a wu li xikarawa aGibita kutani Yehovha Xikwembu xa wena a ku ponisa.+ Hi leswo swi yendlaka ni ku rhuma ku yendla leswi.

19 “Loko u tshovela ka masimu ya wena, se u khohlwa nyandza, u nga tlheli u yi landza. Yi fanele yi siyeliwa munhu wa tiko lin’wani lweyi a tshamaka na wena, n’wana lweyi a nga feliwa hi vapsali* ni wansati wa ku feliwa hi nuna,+ swaku Yehovha Xikwembu xa wena a ta ku katekisa ka hinkwaswu leswi u swi yendlaka.+

20 “Loko u hlakahla nsinya wa wena wa mawolivhera, a wu fanelanga u tlhela u hlakahla ni tigadja ta wona. Leswi nga sala swi fanele swi siyeliwa munhu wa tiko lin’wani lweyi a tshamaka na wena, n’wana lweyi a nga feliwa hi vapsali* ni wansati wa ku feliwa hi nuna.+

21 “Loko u tshovela mawuvha ka masimu ya wena, u nga tshuki u tlhelela u ya tshovela leswi nga sala. Swi fanele swi siyeliwa munhu wa tiko lin’wani lweyi a tshamaka na wena, n’wana lweyi a nga feliwa hi vapsali* ni wansati wa ku feliwa hi nuna. 22 Khumbuka swaku a wu li xikarawa ka tiko la Gibita. Hi leswo swi yendlaka ni ku rhuma ku yendla leswi.

25 “Loko vanhu vo tshuka va holova, va nga ya ka vayavanyisi+ kutani va ta va thethisa, va hlaya swaku wa ku lulama a nga na nandzu ni swaku lweyi wa ku biha a ni nandzu.+ 2 Loko lweyi wa ku biha a faneliwa hi ku biwa,+ muyavanyisi a ta yendla swaku a yetlelisiwa hansi a gama a biwa phambheni ka yena. Tindhuku leti a biwaka tona ti fanele ti ringana ni xidjoho xa yena. 3 A nga mu ba 40 wa tindhuku,+ kambe a nga hundzi. Loko o tshuka a tama a mu ba tindhuku ta ku tlula leto, makwenu a nga danisiwa phambheni ka wena.

4 “U nga pfali nomo wa homu loko yi hula trigu.*+

5 “Loko vamakwavu va tshama xikan’we, se mun’we wa kona a fa na a nga na n’wana, nsati wa lweyi a nga fa a nga fanelanga a chadiwa hi munhu mun’wani lweyi a kalaka a nga li wa ndjangu wolowo. Makwavu wa nuna wa yena a fanele a ya ka yena, a mu teka swaku a va nsati wa yena.+ 6 N’wana wa matevula lweyi a nga ta mu psala,* a ta chuliwa vito la makwavu wa yena+ lweyi a nga fa swaku vito la yena li nga nyamalali aIsrayele.+

7 “Loko wanuna yelweyo a nga swi lavi ku teka nsati wa makwavu lweyi a nga fa, wansati yelweyo a fanele a ya ka madoda, ka nyanghwa wa doropa a fika a ku: ‘Makwavu wa nuna wa mina a yalile ku hlayisa vito la makwavu aIsrayele. A nga pfumelanga ku ni chada.’ 8 Madoda ya doropa leli a tshamaka ka lona ma fanele ma mu vitana ma vulavula na yena. Loko o tama a sindzisa a ku: ‘A ni swi lavi ku chada na yena,’ 9 nsati wa makwavu a fanele a mu tshinelela phambheni ka madoda, a mu hlivila sandaliya,+ a tlhela a mu pshitela marhi matihlweni a gama a ku: ‘Ku fanele ku yendliwa leswo ka wanuna lweyi a kalaka a nga swi lavi ku pfuxa ndjangu wa makwavu.’ 10 Se vito la ndjangu wa yena li ta gama li tiviwa swaku i ‘Yindlo ya munhu lweyi a nga hliviliwa sandaliya aIsrayele.’

11 “Loko vavanuna vambirhi vo lwa se nsati wa mun’wani a nghenelela swaku a lamulela nuna wa yena ka lweyi a mu baka, a gama a mu khoma hi xirho xa yena xa wununa, 12 u fanele u mu tsema voko. A wu fanelanga u mu tsetselela.

13 “Ka paxta la wena u nga tshuki u va ni maribye mambirhi ya ku pima hi wona lawa ma pezaka ku hambana,+ lalikulu ni lalitsongo. 14 U nga tshuki u va ni swibya* swimbirhi swa ku pima hi swona swa ku hambana kaya ka wena,+ xaxikulu ni xaxitsongo. 15 U fanele u va ni swa ku pima hi swona leswi kalaka swi nga kanganyisi, swaku u ta hanya nkama wa wunyingi ka tiko leli Yehovha Xikwembu xa wena a ku nyikaka lona.+ 16 Hikusa munhu mun’wani ni mun’wani lweyi a yendlaka minchumu leyo wa nyenyentsa ka Yehovha Xikwembu xa wena.+

17 “Khumbuka leswi Vaamaleki va nga ku yendla swona andleleni nkama u nga huma Gibita,+ 18 leswi va nga tlhanganisa swona na wena va gama va sungula ku hlasela hinkwavu lava a va sale ndzhaku nkama lowu a wu karhalile hintamu. Phela a va xi chavanga Xikwembu. 19 Nkama Yehovha Xikwembu xa wena a nga ta ku humulisa ka valala va wena hinkwavu lava va nga matlhelweni ka tiko leli Yehovha Xikwembu xa wena a ku nyikaka lona swaku li va tshomba,+ u fanele u helisa Vaamaleki swaku va nga ha tshuki va khumbukiwa hansi ka matilo.+ U nga tshuki u swi khohlwa leswo.

26 “Nkama u nga ta fika ka tiko leli Yehovha Xikwembu xa wena a ku nyikaka lona swaku li va tshomba la wena naswona se u li tekile u tshama ka lona, 2 u fanele u teka mihandzu leyi nga ta rhanga yi wupfa, leyi u nga ta yi tshovela ka tiko leli Yehovha Xikwembu xa wena a ku nyikaka lona, u gama u yi chela ka ndzhava, u ya ka ndhawu leyi Yehovha Xikwembu xa wena a nga ta yi langa swaku vito la yena li dzunisiwa kona.+ 3 U fanele u ya ka muprista lweyi a nga ta va na a tirha hi nkama wolowo u fika u ku: ‘Namuntlha ni tele ku ta byela Yehovha Xikwembu xa wena swaku ni fikile ka tiko leli Yehovha a nga li fungela vavhovho swaku a ta hi nyika lona.’+

4 “Muprista a ta teka ndzhava ka voko la wena a wu veka phambheni ka altari ya Yehovha Xikwembu xa wena. 5 Kutani wena u ta vulavula phambheni ka Yehovha Xikwembu xa wena u ku: ‘Papayi a a li Muaramu+ lweyi a a rhendzelekela,* a game a ya Gibita+ a ya tshama kona na a ni vanhu vatsongo vandjangu wa yena.+ Kambe kolanu a game a va tiko lalikulu, leli nga ni matimba ni vanhu va vanyingi.+ 6 Vagibita va hi hluphile va hi dlisa mbitsi, va tlhela va hi yendla swikarawa.+ 7 Se hi sungula ku rilela Yehovha Xikwembu xa vavhovho naswona Yehovha a hi twile a vona ku hlupheka ni ku karhateka ka hina ni leswi a hi dlisiwa xiswona mbitsi.+ 8 Hi wugamu Yehovha a hi humesile aGibita hi voko la yena la matimba, matimba ya yena yamakulu*+ ni hi mintirho ya ku chavisa, hi swikombiso ni masingita.+ 9 Se a hi tisa ka ndhawu leyi, a hi nyika tiko leli, tiko leli nga tala hi leiti ni wulombe.+ 10 Kutani swoswi, ni tisa ntshovelo wa leswi nga rhanga swi wupfa ka tiko leli Yehovha a nga ni nyika lona.’+

“U fanele u swi veka phambheni ka Yehovha Xikwembu xa wena u gama u khizama phambheni ka Yehovha Xikwembu xa wena. 11 Se u ta tsaka hi mhaka ya swilo hinkwaswu swaswinene leswi Yehovha Xikwembu xa wena a nga ku nyika swona, wena ni vandjangu wa wena, wena ni Mulevhi ni munhu wa tiko lin’wani lweyi a tshamaka na wena.+

12 “Loko u gama ku humesa swa wukhume*+ la hinkwaswu leswi u nga swi tshovela hi lembe la wunharhu, ku nga lembe la ku humesa swa wukhume, u ta swi nyika Mulevhi, munhu wa tiko lin’wani lweyi a tshamaka na wena, n’wana lweyi a nga feliwa hi vapsali* ni wansati wa ku feliwa hi nuna, va ta dla va xurha ka madoropa ya wena.+ 13 Kutani u ta vula leswi phambheni ka Yehovha Xikwembu xa wena: ‘Ni humese swilo swa ku kwetsima kaya ka mina, ni swi nyika Mulevhi, munhu wa tiko lin’wani lweyi a tshamaka na mina, n’wana lweyi a nga feliwa hi vapsali ni wansati wa ku feliwa hi nuna,+ hi ku landza leswi u nga ni byela swona. A ni swi honisanga kumbe ku tlula minawu ya wena. 14 A ni swi dlanga hi nkama lowu a ni xukuvalile hileswi a ni feliwile kumbe ku susa swin’wani hi nkama lowu a ni nga basanga kumbe ku nyikela swin’wani ka lava va nga fa. Ni yingise rito la Yehovha Xikwembu xa mina, ni yendle hinkwaswu leswi u nga ni rhuma swona. 15 Se swoswi txuvuka hansi na u li ka ndhawu ya wena ya ku kwetsima leyi u tshamaka ka yona atilweni, u katekisa vanhu va wena ku nga Vayisrayele ni tiko leli u nga hi nyika lona,+ hi ku landza leswi u nga swi fungela vavhovho va hina,+ tiko leli nga tala hi leiti ni wulombe.’+

16 “Namuntlha Yehovha Xikwembu xa wena a ku rhuma ku landzela minawu leyi ni swiboho swa ku yavanyisa. U fanele u hanya hi swona, u swi landzela hi mbilu ya wena hinkwayu+ ni hi wutomi la wena hinkwalu. 17 Namuntlha u yendle swaku Yehovha a ku tshembisa swaku a ta va Xikwembu xa wena loko u famba ka tindlela ta yena, u landzela minawu ya yena,+ hinkwaswu leswi a ku byelaka swona,+ swiboho swa yena swa ku yavanyisa+ ni loko u yingisa rito la yena. 18 Naswona namuntlha Yehovha a twe xitshembiso xa wena xa leswaku u ta va wa yena, tshomba la yena la lisima+ hi ku landza leswi a nga swi tshembisa ni swaku u ta landzela minawu ya yena hinkwayu, 19 naswona a ta ku tlakusa swaku u va henhla ka matiko laman’wani hinkwawu lawa a nga ma yendla,+ a ku yendla u dzunisiwa u tlhela u va ni ndhuma ni ku phatima loko u swi kombisa swaku wa kwetsima ka Yehovha Xikwembu xa wena,+ hi ku landza leswi a nga ku tshembisa swona.”

27 Se Moxe a byela vanhu na a li ni madoda ya Israyele, a ku: “Mi fanele mi hanya hi minawu hinkwayu leyi ni mi nyikaka yona namuntlha. 2 Siku leli mi nga ta tlulela Nambu wa Yordani, mi nghena ka tiko leli Yehovha Xikwembu xa n’wina a mi nyikaka lona, mi ta langa maribye yamakulu mi gama mi ma semendhela.+ 3 Kutani mi ta tsala marito hinkwawu ya Nawu lowu ka wona loko mi tlulelile, swaku mi nghena ka tiko leli Yehovha Xikwembu xa n’wina a mi nyikaka lona, tiko leli nga tala hi leiti ni wulombe, ku nga leswi Yehovha Xikwembu xa vavhovho va n’wina a nga mi tshembisa swona.+ 4 Loko se mi tlulele Yordani, mi fanele mi langa maribye wolawo ka Ntshava ya Ebali+ kutani mi ma semendhela hi ku landza leswi ni mi byelaka swona namuntlha. 5 Mi fanele mi tlhela mi yakela Yehovha Xikwembu xa n’wina altari kolanu, altari ya maribye. Mi nga tshuki mi tirhisa nsimbi swaku mi tsema maribye wolawo.+ 6 Mi fanele mi yaka altari ya Yehovha Xikwembu xa n’wina hi maribye ya ku kala ma nga tsemiwanga mi gama mi yendlela Yehovha Xikwembu xa n’wina magandzelo ya ku hisiwa henhla ka yona. 7 Mi ta yendla magandzelo ya ku kombela ku rhula+ mi ma dlela kolanu+ naswona mi ta tsaka phambheni ka Yehovha Xikwembu xa n’wina.+ 8 Mi ta tsala marito hinkwawu ya Nawu lowu ka maribye,+ ma voneka kahle.”

9 Kutani Moxe ni vaprista lava va nga Valevhi, va byela tiko hinkwalu la Israyele va ku: “Miyela, u yingisa wena Israyele. Swoswi mi vanhu va Yehovha Xikwembu xa n’wina.+ 10 U fanele u yingisa rito la Yehovha Xikwembu xa wena,+ u hanya hi minawu ya yena leyi ni ku byelaka yona namuntlha.”

11 Hi siku lolelo Moxe a byele vanhu a ku: 12 “Loko se mi ta va mi tlulele Yordani, tinxaka leti landzelaka ti ta nyima ka Ntshava ya Jerzimi+ swaku ti katekisa vanhu: Simiyoni, Levhi, Yuda, Isakara, Yosefa na Benjamini. 13 Kutani leti landzelaka ti ta nyima ka Ntshava ya Ebali+ swaku ti hlaya marito ya xirhuku: Rubeni, Gadi, Aseri, Zebuloni, Dani na Naftali. 14 Kutani Valevhi va ta vulavula ni Vayisrayele hinkwavu hi rito la ku twala va ku:+

15 “‘A a rhukiwi munhu lweyi a yendlaka xifaniso xa ku vatliwa+ kumbe xa nsimbi,+ nchumu xa ku nyenyentsa ka Yehovha,+ lexi nga yendliwa hi mavoko ya lweyi a tirhaka hi mapulangu ni nsimbi, a gama a xi fihla.’ (Se vanhu hinkwavu va ta ku: ‘Amen!’)*

16 “‘A a rhukiwi lweyi a mu vonelaka hansi papayi wa yena kumbe mamani wa yena.’+ (Se vanhu hinkwavu va ta ku: ‘Amen!’)

17 “‘A a rhukiwi lweyi a txintxaka lomu xa ku markara ndhawu* xa vhizinyu wa yena xi nga kona.’+ (Se vanhu hinkwavu va ta ku: ‘Amen!’)

18 “‘A a rhukiwi lweyi a yendlaka swaku munhu wa ku fa matihlo a lahleka.’+ (Se vanhu hinkwavu va ta ku: ‘Amen!’)

19 “‘A a rhukiwi lweyi a mu yavanyisaka+ hi ndlela ya ku biha munhu wa tiko lin’wani lweyi a tshamaka na n’wina, n’wana lweyi a nga feliwa hi vapsali* kumbe wansati wa ku feliwa hi nuna.’+ (Se vanhu hinkwavu va ta ku: ‘Amen!’)

20 “‘A a rhukiwi lweyi a fambaka masangu ni nsati wa papayi wa yena, hikusa a danisa papayi wa yena.’+ (Se vanhu hinkwavu va ta ku: ‘Amen!’)

21 “‘A a rhukiwi lweyi a fambaka masangu ni xiharhi.’+ (Se vanhu hinkwavu va ta ku: ‘Amen!’)

22 “‘A a rhukiwi lweyi a fambaka masangu ni makwavu wa yena wa xisati, n’wana wa papayi wa yena kumbe n’wana wa mamani wa yena.’+ (Se vanhu hinkwavu va ta ku: ‘Amen!’)

23 “‘A a rhukiwi wanuna lweyi a fambaka masangu ni n’wingi wa yena.’+ (Se vanhu hinkwavu va ta ku: ‘Amen!’)

24 “‘A a rhukiwi lweyi a tumbelelaka munhu mun’wani a gama a mu dlaya.’+ (Se vanhu hinkwavu va ta ku: ‘Amen!’)

25 “‘A a rhukiwi lweyi a pfumelaka ku xaviwa swaku a dlaya munhu wa ku kala a nga na nandzu.’+ (Se vanhu hinkwavu va ta ku: ‘Amen!’)

26 “‘A a rhukiwi munhu lweyi a nga ta kala a nga hanyi hi Nawu lowu.’+ (Se vanhu hinkwavu va ta ku: ‘Amen!’)

28 “Loko wo yingisa rito la Yehovha Xikwembu xa wena, u tlhela u hanya hi minawu hinkwayu leyi ni ku byelaka yona namuntlha, Yehovha Xikwembu xa wena a ta yendla swaku u va henhla ka matiko laman’wani hinkwawu amisaveni.+ 2 U ta kuma minkateko leyi hinkwayu+ loko u tama u yingisa rito la Yehovha Xikwembu xa wena:

3 “U ta katekisiwa adoropeni, u tlhela u katekisiwa ni le handle ka lona.+

4 “Vana va wena va ta katekisiwa,+ ni ntshovelo wa wena ni vana va swifuyu swa wena, swihon’wani swa wena ni swinyempfani swa wena.+

5 “Ndzhava wa wena+ ni xibya xa wena lexi u pfuvaka ka xona+ swi ta katekisiwa.

6 “U ta katekisiwa ka mintirho ya wena hinkwayu.*

7 “Yehovha a ta yendla swaku valala va wena lava va lwaka na wena va hluliwa phambheni ka wena.+ Va ta ta hi ndlela yin’we nkama va nga ta ku hlasela, kambe va ta tirhisa 7 wa tindlela swaku va ku baleka.+ 8 Yehovha a ta katekisa tindhawu leti u hlayiselaka ka tona swakudla+ ni mintirho leyi u yi yendlaka, phela a ta ku katekisa ka tiko leli Yehovha Xikwembu xa wena a ku nyikaka lona. 9 Yehovha a ta yendla swaku u va tiko la ku kwetsima+ hi ku landza leswi a nga ku fungela swona,+ hikusa u tama u hlayisa minawu ya Yehovha Xikwembu xa wena u tlhela u famba ka tindlela ta yena. 10 Vanhu hinkwavu amisaveni va ta boheka ku swi vona swaku u vitaniwa hi vito la Yehovha,+ se va gama va ku chava.+

11 “Yehovha a ta ku katekisa hi ku ku nyika vana va vanyingi ni swifuyu swa swinyingi ni hi misava ya ku nona+ ka tiko leli Yehovha a nga fungela vavhovho va wena swaku a ta ku nyika lona.+ 12 Yehovha a ta ku pfulela tshala la yena lalinene, ku nga matilo, swaku a ku nisela mpfula ka tiko la wena hi nkama wa kona+ ni ku katekisa hinkwaswu leswi u swi yendlaka. U ta lombisa swilo ka matiko ya manyingi kasi wena a wu nge zi u lomba nchumu.+ 13 Loko u tama u yingisa minawu ya Yehovha Xikwembu xa wena leyi ni ku byelaka yona namuntlha, swaku u yi landzela u tlhela u hanya hi yona, Yehovha a ta ku veka u va nhloko ku nga li ntxila; u ta va henhla,+ a wu nga ta va hansi. 14 U nga tshuki u tshika marito hinkwawu lawa ni ku byelaka wona namuntlha, u ya ka xinene kumbe ka ximatsi,+ u gama u landzela swikwembu swin’wani swaku u swi tirhela.+

15 “Kambe loko u nga li yingisi rito la Yehovha Xikwembu xa wena, hi ku kala u nga yingisi hinkwaswu leswi ni ku byelaka swona ni minawu ya yena leyi ni ku byelaka yona namuntlha, u ta weliwa hi swirhuku leswi hinkwaswu:+

16 “U ta rhukiwa adoropeni, u tlhela u rhukiwa ni le handle ka lona.+

17 “Ndzhava wa wena+ ni xibya xa wena lexi u pfuvaka ka xona swi ta rhukiwa.+

18 “Vana va wena va ta rhukiwa,+ ntshovelo wa wena, swihon’wani swa wena ku patsa ni swinyempfani swa wena.+

19 “U ta rhukiwa ka mintirho ya wena hinkwayu.*

20 “Yehovha a ta ku rhumela xirhuku ni mpfilumpfilu a tlhela a ku khatisa ka hinkwaswu leswi u nga ta swi yendla anze u helisiwa naswona u helisiwa hi ku hantlisa, hi mhaka ya mintirho ya wena ya ku biha ni hi mhaka ya leswi u nga ni tshika.+ 21 Yehovha a ta yendla swaku mavabyi ma nga heli ka wena anze a ku helisa ka tiko leli u yaka ka lona swaku u ya li teka.+ 22 Yehovha a ta ku ba hi mavabyi ya ndere,* hi ku hiseta ka muzimbha,+ hi ku pfimba, hi xipada,+ hi djandza naswona swinsinyani swa wena swi ta fa;+ phela swilo leswi swi ta ku hlasela anze u helisiwa. 23 Matilo lama nga henhla ka nhloko ya wena ma ta fana ni kobre ni misava leyi nga hansi ka wena yi ta fana ni nsimbi.+ 24 Yehovha a ta yendla swaku mpfula ya tiko la wena yi fana ni misava ni wuthulu, leswi nga ta ku nela na swi ta hi matilweni anze u helisiwa. 25 Yehovha a ta yendla swaku valala va wena va ku hlula.+ Nkama u nga ta ya va hlasela u ta famba hi ndlela yin’we, kambe u ta tirhisa 7 wa tindlela swaku u va baleka; nkama mimfumu hinkwayu amisaveni yi nga ta ku vona yi ta chava.+ 26 Mintsumbu ya n’wina yi ta dliwa hi swinyanyani hinkwaswu ni hi swiharhi, a ku na munhu ni mun’we lweyi a nga ta swi hlongola.+

27 “Yehovha a ta ku ba hi marhumba ya le Gibita, mavabyi ya ku pfimba hala ndzhaku, swirhumbani ni mavabyi ya xikhumba,* leswi nga ta kala swi nga holi. 28 Yehovha a ta ku ba hi mavabyi ya ku hlanya,+ ku fa matihlo ni mpfilumpfilu. 29 U ta yingayinga ninhlikanhi, ku fana ni munhu lweyi a nga fa matihlo loko a yingayinga ka ku mphuma,+ hinkwaswu leswi u swi yendlaka a swi nga ta famba kahle; u ta tshamela ku kanganyisiwa, na ku nga na lweyi a nga ku ponisaka.+ 30 U ta tshembisa wansati ku mu chada kambe wanuna mun’wani a ta mu pfinya. U ta yaka yindlo kambe a wu nga ta tshama ka yona.+ U ta rima masimu ya mawuvha kambe a wu nga ta dla mihandzu ya wona.+ 31 Homu ya wena yi ta dlayiwa phambheni ka wena kambe a wu nga ta yi dla nyama ya yona. Mbongolo ya wena yi ta yiviwa phambheni ka wena kambe a va nga ta ku tlhelisela. Nyempfu ya wena yi ta nyikiwa valala va wena kambe a wu nga ta va ni wa ku ku ponisa. 32 Vana va wena va madjaha ni va tintombhi va ta nyikiwa vanhu van’wani+ na u va txuvukile, u ta tshamela ku va xuva, kambe mavoko ya wena a ma nge koti ku yendla nchumu. 33 Mihandzu ya wena ni ntshovelo wa wena hinkwawu swi ta dliwa hi vanhu lava u kalaka u nga va tivi,+ u ta tshamela ku kanganyisiwa ni ku hluphiwa. 34 Leswi u nga ta swi vona swi ta ku yendla u hlanya.

35 “Yehovha a ta ku ba hi marhumba ya ku vava ya ku kala ma nga daheki ka matsolo ni ka minenge ya wena, ku sukela ka minkondzo anze ka nhloko ya wena. 36 Yehovha a ta yendla swaku wena ni hosi leyi u nga tilangela yona mi fambisiwa ka tiko leli wena ni vavhovho va wena mi kalaka mi nga li tivi,+ kolanu u ta tirhela swikwembu swin’wani, swikwembu swa mapulangu ni swa maribye.+ 37 U ta va nchumu xa ku chavisa ni xipoyilo u tlhela u hlekiwa hi vanhu hinkwavu lava Yehovha a nga ta ku hlongolela ka vona.+

38 “U ta byala mbewu ya yinyingi amasin’wini kambe ntshovelo wa kona wu ta va wutsongo,+ hikusa wu ta dliwa hi mintete. 39 U ta rima u tlhela u byala mawuvha ka masimu ya wena, kambe a wu nga ta phuza vhinyu ya kona kumbe ku tshovela,+ hikusa swi ta dliwa hi swipungwani. 40 Ka ndhawu ya wena hinkwayu u ta va ni minsinya ya mawolivhera, kambe a wu nga ta tola mafurha ya wona, hikusa mihandzu yi ta wa. 41 U ta psala* vana va madjaha ni va tintombhi, kambe a va nga ta tshama na wena hikusa va ta yisiwa awukaraweni.+ 42 Minsinya ya wena hinkwayu ni mihandzu ya wena swi ta dliwa hi mintete.* 43 Munhu wa tiko lin’wani lweyi u tshamaka na yena a ta ya a va ni matimba hintamu, kasi wena u ta ya u heleliwa hi matimba ya wena lawa a wu li na wona. 44 A ta ku lomba swilo kambe wena a wu nge mu lombi nchumu.+ A ta va nhloko, kasi wena u ta va ntxila.+

45 “Phela swirhuku leswi hinkwaswu+ swi ta ku wela, swi ku landzelela anze u helisiwa,+ hikusa a wu li yingisanga rito la Yehovha Xikwembu xa wena ni ku landzela hinkwaswu leswi a nga ku byela swona ku patsa ni minawu ya yena leyi a nga ku byela yona.+ 46 Swi ta tama swi va xikombiso ni xihlamaliso ka wena ni le ka vana va wena hi masiku ni masiku,+ 47 hikusa a wu mu tirhelanga Yehovha Xikwembu xa wena na wu tsakile ni hi mbilu leyi nga tsaka nkama lowu a wu ni swilo hinkwaswu.+ 48 Yehovha a ta yendla swaku valala va wena va lwa na wena, u ta va tirhela+ na u biwa hi ndlala+ ni torha, na u yambale mpahla ya ku handzukela naswona u nga na nchumu. A ta ku rhwexa kange* la nsimbi ka nhamu ya wena anze a ku helisa.

49 “Yehovha a ta ku rhumelela tiko leli taka hi kule swinene,+ na li suka amagamu ya misava; li ta ku hlasela hi ku hantlisa ku fana ni gama,*+ tiko leli lirimi la kona u nga ta kala u nga li twisisi,+ 50 tiko la ku chavisa hi tihanyi ta lona, leli nga ta ka li nga tsetseleli munhu, wamukulu kumbe wamutsongo.+ 51 Va ta dla swifuyu swa wena ni leswi u nga swi tshovela anze u helisiwa. A va nga ta ku siyela trigu,* vhinyu ya nyuwani kumbe mafurha, swihon’wani kumbe swinyempfani anze va ku helisa.+ 52 Va ta ku rhendzela, va ku pfalela ka madoropa ya wena hinkwawu ka tiko la wena anze mimuru ya wena ya ku leha, ya ku tiya leyi u nga yi tshemba yi wa. Va ta rhendzela madoropa ya wena hinkwawu ka tiko la wena, leli Yehovha Xikwembu xa wena a nga ku nyika lona.+ 53 Kutani u ta sindziseka ku za u dla vana va wena, nyama ya vana va wena va madjaha ni va tintombhi,+ lava Yehovha Xikwembu xa wena a nga ku nyika vona, hi mhaka ya mahlomulu lawa valala va wena va nga ta ku vangela wona.

54 “Hambi wanuna lweyi a nga ni ntwelawusiwana naswona a nga tolovela ku hanya amafurheni, a nga ta mu tsetselela makwavu kumbe nsati wa yena lweyi a mu rhandzaka kumbe vana va yena lava va nga sala, 55 naswona a ta va tsona nyama ya vana va yena, hikusa a nga salanga ni nchumu hi mhaka ya mahlomulu lawa nala wa wena a ku vangelaka wona ka madoropa ya wena.+ 56 Hambi wansati lweyi a nga ni ntwelawusiwana naswona a nga tolovela ku hanya mafurheni, lweyi a a nga kandziheteli ni le hansi hi mhaka ya leswi a hanyaka mafurheni,+ a nge mu tsetseleli nuna wa yena lweyi a mu rhandzaka, n’wana wa yena wa djaha kumbe wa ntombhi, 57 hambi n’wana wa yena lweyi wa ha ku mu psalaka ni vana va yena lava a nga va psala, a ta va dla axihundleni hi mhaka ya mahlomulu lawa nala wa wena a ku vangelaka wona ka madoropa ya wena.

58 “Loko u nga tikarhateli ku yingisa marito hinkwawu ya Nawu lowu, lawa ma nga tsaliwa ka buku leyi+ naswona u nga chavi vito leli phatimaka ni leli chavisekaka+ la Yehovha+ Xikwembu xa wena, 59 Yehovha a ta ku tisela makhombo, wena ni vana va wena, makhombo yamakulu, ya ku kala ma nga heli,+ mavabyi lawa ma nga ni nghozi ni ya ku a ma daheki. 60 A ta ku tisela mavabyi hinkwawu ya le Gibita lawa a wu ma chava, phela a ma nga ta suka ka wena. 61 Yehovha a ta tlhela a ku tisela mavabyi ya mixaka hinkwayu kumbe makhombo, leswi kalaka swi nga tsaliwanga ka buku leyi ya Nawu anze u helisiwa. 62 Hambileswi mi nga vanyingi ku fana ni tinyeleti ta matilo,+ mi ta sala na mi li vatsongo,+ hi mhaka ya leswi mi kalaka mi nga yingisanga rito la Yehovha Xikwembu xa n’wina.

63 “Leswi Yehovha a nga tsakisiwa hi ku mi katekisa a tlhela a mi yendla mi va vanyingi, Yehovha a ta tlhela a tsakisiwa hi ku mi helisa; mi ta susiwa ka tiko leli mi nga ta li teka swoswinyana.

64 “Yehovha a ta ku hangalasa xikarhi ka matiko hinkwawu, ku sukela ka magamu man’wani ya misava ku ya ka magamu man’wani,+ kolanu u ta gandzela swikwembu swa timhandzi ni swa ribye, leswi wena ni vavhovho va wena mi kalaka mi nga swi tivi.+ 65 A wu nga ta va ni ku rhula xikarhi ka matiko wolawo,+ naswona a wu nge vi ni ndhawu ya ku humula ka yona. Kutani Yehovha a ta yendla swaku u tshamela ku vilela+ ni ku va ni matihlo lama nga karhala ni ku hela matimba.+ 66 Wutomi la wena li ta va ka nghozi yayikulu, u ta tshamela ku chava wusiku ni nhlikanhi; phela a wu nga ta swi tiva swaku u ta pona. 67 Nimixo u ta ku: ‘Loko a lo pela,’ kasi nimadlambu u ta ku: ‘Loko a lo xa,’ hi mhaka ya leswi u chavaka ni hi mhaka ya leswi matihlo ya wena ma nga ta swi vona. 68 Yehovha a ta mi tlhelisela aGibita hi boti, mi famba hi ndlela leyi ni nga tshama ni mi byela ni ku: ‘A mi nge he tshuki mi yi vonile,’ kutani kolanu mi ta boheka ku tixavisa ka valala va n’wina mi va swikarawa swa xinuna ni swa xisati, kambe a mi nga ta xaviwa hi munhu.”

29 Lawa i marito ya ntwananu lowu Yehovha a nga rhuma Moxe swaku a wu yendla ni Vayisrayele ka tiko la Mowabu, ku yengetela ka ntwananu lowu a nga wu yendla na vona aHorebi.+

2 Se Moxe a vitana Vayisrayele hinkwavu a va byela leswi: “Mi swi vonile hinkwaswu leswi Yehovha a nga swi yendla phambheni ka n’wina ka tiko la Gibita, ka Faru ni vatirhi va yena hinkwavu ni ka tiko la yena hinkwalu;+ 3 makhombo* hinkwawu ya ku chavisa lawa mi nga ma vona, swikombiso swaswikulu ni masingita.+ 4 Kambe Yehovha a nga mi nyikanga mbilu ya ku twisisa ni matihlo ya ku vona ni tindleve ta ku twa ku ta fika ni namuntlha.+ 5 ‘Ka 40 wa malembe lawa ni nga mi kongomisa amananga,+ mpahla ya n’wina a yi hlakalanga ni masandaliya ya n’wina a ma hlakalanga ka minenge ya n’wina.+ 6 A mi nga dli pawu naswona a mi nga nwi vhinyu kumbe mabyala man’wani, swaku mi ta swi tiva swaku hi mina Yehovha Xikwembu xa n’wina.’ 7 Mi game mi fika ka ndhawu leyi, se Sihoni hosi ya le Exiboni+ na Ogi hosi ya le Baxani,+ va hume va ta lwa na hina kambe hi va hlulile.+ 8 Se hi game hi teka tiko la vona hi li nyika va ka Rubeni, va ka Gadi ni hafu ya lixaka la Manasi swaku li va tshomba la vona.+ 9 Kutani mi fanele mi yingisa marito ya ntwananu lowu, mi hanya hi wona, swaku hinkwaswu leswi mi nga ta swi yendla swi mi fambela kahle.+

10 “Hinkwenu mi nyime phambheni ka Yehovha Xikwembu xa n’wina namuntlha, varhangeli va tinxaka ta n’wina, madoda ya n’wina, varhangeli va n’wina, vavanuna hinkwavu va Israyele, 11 vana va n’wina, vasati va n’wina+ ni munhu wa tiko lin’wani+ lweyi a tshamaka xikarhi ka matende ya n’wina, ku sukela ka lweyi a mi lavelaka tihunyi ku ya ka lweyi a mi khelaka mati. 12 Mi lani swaku mi ta yendla ntwananu na Yehovha Xikwembu xa n’wina lowu xi nga wu tiyisa hi ku funga, lowu Yehovha Xikwembu xa n’wina a nga wu yendla na n’wina namuntlha,+ 13 leswaku mi ta va vanhu va yena,+ se yena a va Xikwembu xa n’wina+ ku nga leswi a nga mi tshembisa swona ni hi ku landza leswi a nga swi fungela vavhovho va n’wina, Abrahamu,+ Izaki+ na Yakobe.+

14 “Ntwananu lowu ni leswi ni swi fungaka a ni swi yendli na n’wina ntsena, 15 kambe ni swi yendla ni hinkwavu lava va nga nyima lani na hina namuntlha, phambheni ka Yehovha Xikwembu xa hina ni lava va kalaka va nga li na hina namuntlha. 16 (Hikusa mi swi tiva kahle leswi hi nga hanyisa swona ka tiko la Gibita ni leswi hi nga tsemakanyisa swona matiko ya ku hambanahambana na hi li ndleleni.+ 17 Naswona a mi hamba mi swi vona swilo swa vona swa ku nyenyentsa ni swifaniso swa vona swa ku nyenyentsa*+ leswi a swi yendliwe hi timhandzi ni maribye, prata ni woru leswi a va li na swona.) 18 Tivoneleni swaku ku nga tshuki ku va ni wanuna kumbe wansati, ndjangu kumbe lixaka axikarhi ka n’wina namuntlha, lweyi mbilu ya yena yi tshikaka Yehovha Xikwembu xa hina yi ya gandzela swikwembu swa matiko wolawo,+ leswaku ku nga tshuki ku va ni limintsu xikarhi ka n’wina leli psalaka mihandzu leyi nga ni vhenenu yi tlhela yi bava.+

19 “Kambe loko munhu o tshuka a twa marito ya ntwananu lowu kutani a tibyela a ku: ‘Ni ta hanya hi ku rhula, hambi ni tiyendlela ku rhandza,’ se a wonha hinkwaswu leswi nga ka ndlela ya yena, 20 Yehovha a nge pfumeli ku mu rivalela.+ Kambe Yehovha a ta mu kwatela hintamu munhu wa kona, naswona a ta weliwa hi makhombo hinkwawu lama nga tsaliwa ka buku leyi,+ naswona Yehovha a ta helisa vito la yena amisaveni. 21 Kutani Yehovha a ta mu hambanisa ni tinxaka hinkwatu ta Israyele swaku a ta weliwa hi makhombo, hi ku ya hi swirhuku hinkwaswu swa ntwananu lowu nga tsaliwa ka buku leyi ya Nawu.

22 “Loko vatukulu va n’wina ni munhu wa tiko lin’wani lweyi a taka hi kule hintamu va vona makhombo ya tiko lolelo, mavabyi lawa Yehovha a nga ma tisa ka lona, 23 swiribyani leswi swi pfurhaka,* munyu ni ndzilu, lakakuva ka tiko hinkwalu ku nga ha byaliwi naswona ku nga mili nchumu, ku nga humi xinsinyani ka lona, ku fana ni loko ku helisiwa Sodoma ni Gomora,+ Adima ni Zeboyimi,+ matiko lawa Yehovha a nga ma helisa hi mhaka ya leswi a a kwatile hintamu, 24 vona ni matiko hinkwawu va ta ku: ‘Hi mhaka muni Yehovha a yendle leswi ka tiko leli?+ I mpsini swi nga yendla swaku a kwata hintamu?’ 25 Kutani va ta ku: ‘Hikusa va tshike ntwananu wa Yehovha+ Xikwembu xa vavhovho va vona, lowu a nga wu yendla na vona nkama a nga va humesa ka tiko la Gibita.+ 26 Va ye va ya tirhela swikwembu swin’wani ni ku swi khizamela, swikwembu leswi a va nga swi tivi ni leswi a nga va byela swaku va nga swi gandzeli.+ 27 Se Yehovha a kwatela tiko lelo kutani a li tisela swirhuku hinkwaswu leswi nga tsaliwa ka buku leyi.+ 28 Yehovha a va susile ka tiko la vona hi mhaka ya leswi a a kwate ngopfu+ ni hi leswi a a nyenyentsekile, a va yisa ka tiko lin’wani leli va ha tshamaka ka lona ni namuntlha.’+

29 “Swilo leswi nga fihliwa i swa Yehovha Xikwembu xa hina+ kambe swilo leswi nga paluxiwa i swa hina ni vana va hina hi masiku ni masiku, leswaku hi ta hanya hi marito hinkwawu ya Nawu lowu.+

30 “Nkama minchumu hinkwayu leyi ni nga ku byela yona yi nga ta ku yendlekela, nkateko ni xirhuku leswi ni nga swi veka phambheni ka wena,+ se u gama u swi khumbuka+ na u li ka matiko lawa Yehovha Xikwembu xa wena a nga ta ku hangalasela ka wona;+ 2 kutani u tlhelela ka Yehovha Xikwembu xa wena+ u yingisa rito la yena hi ku landza hinkwaswu leswi ni ku byelaka swona namuntlha, wena ni vana va wena, hi mbilu ya wena hinkwayu ni hi wutomi la wena hinkwalu,+ 3 Yehovha Xikwembu xa wena a ta ku twela wusiwana+ a vuyisa vanhu va wena lava va nga yisiwa awukaraweni,+ a tlhela a ku hlengeleta u suka ka vanhu hinkwavu lava Yehovha Xikwembu xa wena a nga ku hangalasela ka vona.+ 4 Hambiloko vanhu va wena va yo hangalaka va za va ya fika ka magamu ya matilo, Yehovha Xikwembu xa wena a ta ku hlengeleta a ku vuyisa.+ 5 Yehovha Xikwembu xa wena a ta ku tisa ka tiko leli vapapayi va wena a va tshama ka lona naswona u ta li teka; a ta yendla swaku swi ku fambela kahle, a ta yendla swaku u tala swinene u tlula vapapayi va wena.+ 6 Yehovha Xikwembu xa wena a ta basisa mbilu ya wena ni ya vana va wena,+ leswaku u rhandza Yehovha Xikwembu xa wena hi mbilu ya wena hinkwayu ni hi wutomi la wena hinkwalu kutani u hanya.+ 7 Se Yehovha Xikwembu xa wena a ta yisa swirhuku leswi hinkwaswu ka valala va wena, lava a va ku nyenya va tlhela va ku xanisa.+

8 “Kutani u ta vuya ka Yehovha u tlhela u yingisa rito la yena, u landzela minawu ya yena hinkwayu leyi ni ku byelaka yona namuntlha. 9 Yehovha Xikwembu xa wena a ta katekisa mintirho ya wena hinkwayu,+ a yendla swaku vana va wena va va vanyingi ni swifuyu swa wena ni leswi u nga ta swi tshovela masin’wini, hikusa Yehovha a ta ku nyika swaswinene hi ku swi rhandza, ku nga leswi a nga swi yendla ka vavhovho va wena.+ 10 Kutani u ta yingisa rito la Yehovha Xikwembu xa wena, u yendla hinkwaswu leswi a swi lavaka u hlayisa ni minawu ya yena leyi nga tsaliwa ka buku leyi ya Nawu; u ta tlhelela ka Yehovha Xikwembu xa wena hi mbilu ya wena hinkwayu ni hi wutomi la wena hinkwalu.+

11 “Nawu lowu ni ku nyikaka wona namuntlha, a wu tiki naswona a wu le kule na wena.+ 12 Nawu lowu a wu le matilweni lakakuva u nga za u ku: ‘I mani lweyi a nga ta khwela a ya tilweni a hi landzela wona, leswaku hi ta wu twa hi tlhela hi wu yingisa?’+ 13 Naswona a wu le ka tlhelo lelin’wani la lwandle lakakuva u nga za u ku: ‘I mani lweyi a nga ta tlulela lwandle a hi landzela wona, leswaku hi ta wu twa kutani hi wu yingisa?’ 14 Hikusa rito leli li le kusuhi swinene na wena, li ka nomo ni le ka mbilu ya wena,+ leswaku u ta hanya hi lona.+

15 “Phela namuntlha ni veka wutomi ni swaswinene phambheni ka wena, lifu ni swa ku biha.+ 16 Loko wo yingisa hinkwaswu leswi Yehovha Xikwembu xa wena a swi lavaka leswi ni ku byelaka swona namuntlha, hi ku rhandza Yehovha Xikwembu xa wena,+ u tlhela u famba ka tindlela ta yena ni hi ku yingisa leswi a swi lavaka ni minawu ya yena ni swiboho swa yena swa ku yavanyisa, u ta hanya+ u tlhela u tala naswona Yehovha Xikwembu xa wena a ta ku katekisa ka tiko leli u yaka swaku u ya tshama ka lona.+

17 “Kambe loko mbilu ya wena yo hambuka,+ u nga yingisi, u xengiwa u gama u ya khizamela swikwembu swin’wani u swi tirhela,+ 18 phela na ku byela namuntlha swaku u ta helisiwa.+ A wu nga ta hanya nkama wa wunyingi ka tiko leli u yaka u ya li teka loko u tlulela Nambu wa Yordani. 19 Ni veka wutomi ni lifu phambheni ka n’wina, nkateko ni xirhuku phambheni ka n’wina;+ matilo ni misava i vafakazi va leswi ni swi yendlaka, n’wina ni vana va n’wina+ mi fanele mi langa wutomi leswaku mi ta tama mi hanya,+ 20 hi ku rhandza Yehovha Xikwembu xa n’wina,+ mi yingisa rito la yena, mi khoma swi tiya ka yena,+ hikusa hi yena lweyi a mi nyikaka wutomi, leswaku mi ta hanya nkama wa wunyingi ka tiko leli Yehovha a nga funga ku li nyika vavhovho va n’wina, Abrahamu, Izaki na Yakobe.”+

31 Kutani Moxe a byela Vayisrayele hinkwavu marito lawa, 2 a ku: “Namuntlha ni ni 120 wa malembe.+ A ni nge he mi rhangeli hikusa Yehovha a ni byele leswi: ‘A wu nge wu tluleli nambu lowu wa Yordani.’+ 3 Yehovha Xikwembu xa n’wina hi yena lweyi a tlulelaka phambheni ka n’wina naswona hi yena lweyi a nga ta helisa matiko lawa phambheni ka n’wina kutani n’wina mi ta ma hlongola.+ I Yoxuwa lweyi a nga ta mi rhangela nkama mi nga ta tlulela nambu,+ hi ku landza leswi Yehovha a nga swi vula. 4 Yehovha a ta ma yendla swa ku fana ni leswi a nga swi yendla ka tihosi ta Vaamori, ku nga Sihoni+ na Ogi+ ni tiko la tona nkama a nga ti helisa.+ 5 Yehovha a ta mi hlulela matiko lawa, naswona mi fanele mi ma yendla leswi nga hlayiwa ka minawu hinkwayu leyi ni nga mi nyika yona.+ 6 Mi nga chavi, tiyani nhlana.+ Mi nga chavi kumbe mi chavisiwa hi vona,+ hikusa Yehovha Xikwembu xa n’wina hi yena lweyi a fambaka phambheni ka n’wina. A nge mi tshiki kumbe a mi tsukula.”+

7 Se Moxe a vitana Yoxuwa a mu byela leswi phambheni ka Vayisrayele hinkwavu: “U nga chavi, tiya nhlana,+ hikusa hi wena u nga ta nghenisa vanhu lava ka tiko leli Yehovha a nga funga ku li nyika vavhovho va vona naswona wena u ta va nyika lona swaku li va tshomba la vona.+ 8 Yehovha hi yena lweyi a fambaka phambheni ka wena naswona a ta va na wena nkama hinkwawu.+ A nge tshuki a ku tshika kumbe a ku tsukula. U nga chavi naswona u nga rhurhumeli.”+

9 Kutani Moxe a tsala Nawu lowu+ a wu nyika vaprista lava va nga Valevhi, lava va rhwalaka areka ya ntwananu wa Yehovha ni madoda hinkwawu ya Israyele. 10 Moxe a va rhuma leswi: “Ka lembe lin’wani ni lin’wani la wu 7 loko li hela, hi nkama lowu nga vekiwa wa lembe la ku tima swikweneti,+ hi nkama wa Fexta la Minchacha,*+ 11 nkama tiko hinkwalu la Israyele li nga ta ya phambheni ka Yehovha+ Xikwembu xa n’wina ka ndhawu leyi a nga yi langa, mi fanele mi lerhela tiko hinkwalu la Israyele Nawu lowu leswaku li wu twa.+ 12 Hlengeletani vanhu,+ vavanuna, vavasati, vana ni munhu wa tiko lin’wani lweyi a tshamaka ka madoropa ya n’wina, leswaku va ta yingisa Yehovha Xikwembu xa n’wina, va djondza hi yena ni ku mu chava ni ku landzela marito hinkwawu ya Nawu lowu. 13 Kutani vana va vona lava va kalaka va nga wu tivi Nawu lowu va ta yingisa+ kutani va djondza ku chava Yehovha Xikwembu xa n’wina masiku hinkwawu lawa mi nga ta ma hanya ka tiko leli mi nga ta li teka loko mi tlulela Yordani.”+

14 Se Yehovha a byela Moxe a ku: “Se wu kusuhi nkama wa leswaku u fa.+ Vitana Yoxuwa, mi ya nyima ka tende la ntlhanganu leswaku ni ta mu veka swaku a va murhangeli.”+ Kutani Moxe na Yoxuwa va ya nyima ka tende la ntlhanganu. 15 Yehovha a humelela ka tende na a li ka rhefu lalikulu, kutani rhefu li nyima ka nyanghwa wa tende.+

16 Yehovha a byela Moxe a ku: “Phela u ta fa swoswinyana naswona vanhu lava, va ta sungula ku gandzela* swikwembu swin’wani swa matiko lawa ma nga kusuhi ni tiko leli va nga ta li teka.+ Va ta tshika ku ni gandzela+ va tlula ntwananu lowu ni nga wu yendla na vona.+ 17 Hi nkama wolowo ni ta va kwatela hintamu+ naswona ni ta va tshika+ ni fambela kule* na vona+ anze va helisiwa. Kutani loko se va weliwile hi makhombo ni mindzingo ya yinyingi+ va ta ku: ‘Indjhe makhombo lawa a ma hi weli hi mhaka ya leswi Xikwembu xa hina xi kalaka xi nga li kona xikarhi ka hina ke?’+ 18 Kambe ni ta tama ni fambela kule* na vona hi siku lolelo hi mhaka ya wubihi hinkwalu leli va nga li yendla hi ku gandzela swikwembu swin’wani.+

19 “Kutani swoswi tsalani lisimu leli,+ mi li djondzisa Vayisrayele.+ Va djondziseni lisimu leli hikusa lona li ta va khumbukisa leswi yendlekaka loko va nga yingisi Xikwembu.+ 20 Loko ni va yisa ka tiko leli ni nga funga ku li nyika vavhovho va vona,+ leli nga tala hi leiti ni wulombe,+ se va dla va xurha, va va ni minchumu ya yinyingi,*+ va ta gama va ya ka swikwembu swin’wani, va swi tirhela va nga ha ni hloniphi va tlhela va tlula ntwananu wa mina.+ 21 Loko makhombo ni mindzingo ya yinyingi swi va wela,+ lisimu leli li ta va fakazi ka vona (hikusa vatukulu va vona a va fanelanga va li khohlwa) hikusa na swi tiva swaku i vanhu va ku tshamisa ku yini+ hambileswi ni kalaka ni nga se va nghenisa ka tiko leli ni nga va fungela lona.”

22 Se Moxe a tsala lisimu lelo hi siku lolelo, a gama a li djondzisa Vayisrayele.

23 Kutani A* veka Yoxuwa+ n’wana wa Nuni swaku a va murhangeli a tlhela a ku: “U nga chavi, tiya nhlana,+ hikusa hi wena u nga ta nghenisa Vayisrayele ka tiko leli ni nga va fungela lona,+ a ni nge ku tshiki.”

24 Nkama Moxe a nga gama ku tsala marito ya Nawu lowu hinkwawu ka buku,+ 25 a byela Valevhi lava rhwalaka areka ya ntwananu wa Yehovha, a ku: 26 “Tekani buku leyi ya Nawu+ mi yi veka tlhelweni ka areka+ ya ntwananu wa Yehovha Xikwembu xa n’wina, yi ta va fakazi xikarhi ka n’wina. 27 Hikusa mina ni swi tiva kahle swaku mi vanhu va ku woma tinhloko,+ lava delelaka.+ Loko mi mu delelisa xileswi Yehovha na na ha hanya, ku ta yendleka yini loko se ni file! 28 Ni hlengeleteleni madoda hinkwawu ya tinxaka ta n’wina ni varhangeli va n’wina leswaku ni ta vulavula marito lawa phambheni ka vona, naswona matilo ni misava swi ta va vafakazi va leswi va swi yendlaka.+ 29 Hikusa ni swi tiva kahle swaku loko se ni file mi ta sungula ku yendla swa ku biha,+ mi djika ka ndlela leyi ni nga mi byela swaku mi famba hi yona. Phela mi ta weliwa hi makhombo+ ka nkama lowu taka hikusa mi ta yendla swa ku biha phambheni ka Yehovha naswona mi ta mu twisa ku vava hi mintirho ya n’wina.”

30 Kutani Moxe a lerhela Vayisrayele hinkwavu marito ya lisimu leli hinkwalu, na va mu yingisela, a ku:+

 3 Hikusa ni ta huwelela vito la Yehovha.+

Byelani van’wani hi wukulu la Xikwembu xa hina!+

 5 Hi vona va nga djoha.+

A hi vana va xona, hi vona va nga yendla xihoxo.+

I lixaka la vanhu va ku biha!+

15 Nkama Yexuruni* a nga sungula ku kuluka, a sungule ku delela.

Wena u kulukile, u xurha hintamu, u tlhela u va ni matimba.+

29 Loko a va tlharihile!+ A va ta pimisa hi swilo leswi.+

A va ta pimisa kahle hi leswi swi nga ta va yendlekela.+

A swi sekeleke swi mi pfuna.

A swi ve ndhawu ya n’wina ya ku tumbela ka yona.

Na dlaya ni tlhela ni hanyisa.+

44 Se Moxe a fika a lerhela Vayisrayele hinkwavu marito ya lisimu leli na vanhu va mu yingisa,+ yena na Oxeya*+ n’wana wa Nuni. 45 Nkama Moxe a nga gama ku byela Vayisrayele hinkwavu marito lawa hinkwawu, 46 a te: “Yingisani marito hinkwawu lawa ni mi baka ndleve hi wona namuntlha,+ mi ta ma djondzisa vana va n’wina leswaku va ta yingisa marito hinkwawu ya Nawu lowu.+ 47 Hikusa marito lawa i ya lisima ka n’wina, ma vula wutomi ka n’wina,+ naswona hi marito lawa mi nga hanya nkama wa wunyingi ka tiko leli mi yaka mi ya li teka loko mi tlulela Nambu wa Yordani.”

48 Yehovha a vulavula na Moxe hi siku lolelo a ku: 49 “Khwela ntshava leyi ya Abarimi,+ Ntshava+ ya Nebo, leyi nga ka tiko la Mowabu, leli nga kusuhi ni Yeriko, swaku u vona tiko la Kanana leli ni nga ta li nyika Vayisrayele.+ 50 Kutani u ta fela ka Ntshava leyi u nga ta khwela ka yona, u gama u lahliwa ka maxaka ya wena ku fana ni makwenu Aroni lweyi a nga fa ka Ntshava ya Ori,+ kutani a lahliwa ka maxaka ya yena, 51 hikusa hawumbirhi ka n’wina a mi tshembekanga ka mina xikarhi ka Vayisrayele, ka mati ya Meriba+ aKadexi amananga ya Zini, hikusa a mi ni dzunisanga phambheni ka Vayisrayele.+ 52 U ta vona tiko la kona na u li kule, kambe a wu nga ta nghena ka tiko leli ni li nyikaka Vayisrayele.”+

33 Leyi i minkateko leyi Moxe mutirheli wa Xikwembu xa ntiyiso a nga yi byela Vayisrayele na a nge se fa.+ 2 A te:

 7 Nkama a nga katekisa Yuda a te:+

 8 Ka Levhi a hlaye leswi:+

12 Ka Benjamini a hlaye leswi:+

13 Ka Yosefa a hlaye leswi:+

18 Ka Zebuloni a hlaye leswi:+

19 Va ta vitana vanhu va ya ka ntshava.

Kolanu va ta yendla magandzelo ya ku lulama.

20 Ka Gadi a hlaye leswi:+

“A ku katekisiwe lweyi a yengetelaka ndhawu ya Gadi.+

Varhangeli va vanhu va ta hlengeletana.

22 Ka Dani a hlaye leswi:+

“Dani i xinghonyamani.+

A ta tlula a huma aBaxani.”+

23 Ka Naftali a hlaye leswi:+

Teka tiko leli nga wupeladlambu ni le sul.”*

24 Ka Aseri a hlaye leswi:+

“Aseri a katekisiwile hi madjaha.

29 Wa tsaka wena Israyele!+

34 Kutani Moxe a suka mananga ya Mowabu a khwela Ntshava ya Nebo,+ henhla ka Pisiga+ lani ku nga txuvukana ni Yeriko.+ Yehovha a mu komba tiko hinkwalu ku sukela aJiliyadi ku ya fika aDani+ 2 ni tiko hinkwalu la Naftali ni tiko la Efrayimi ni la Manasi ni tiko hinkwalu la Yuda ku ya fika ka lwandle leli nga wupeladlambu,*+ 3 Negebi,+ Dixtritu+ la Yordani, ka nkova wa Yeriko, doropa leli nga ni minsinya ya mintxindzu anze Sowari.+

4 Kutani Yehovha a byela Moxe a ku: “Leli i tiko leli ni nga fungela Abrahamu, Izaki na Yakobe ni ku: ‘Ni ta li nyika vana* va wena.’+ Ni ku yendle u li vona kambe a wu nga ta tlulela u ya ka lona.”+

5 Se Moxe mutirheli wa Yehovha a gama a fa kolanu ka tiko la Mowabu, ku nga leswi Yehovha a a swi vulile.+ 6 Se a mu lahla ka nkova, ka tiko la Mowabu leli nga txuvukana ni Beti-Peyori naswona a ku na munhu lweyi a tivaka lomu sirha la yena li nga kona anze namuntlha.+ 7 Nkama a nga fa, Moxe a a ni 120 wa malembe.+ Matihlo ya yena a ma ha vona kahle naswona a wa ha tiyile. 8 Vayisrayele va hete 30 wa masiku na va rila Moxe amananga ya Mowabu.+ Kutani masiku ya ku rila Moxe ma hela.

9 Yoxuwa n’wana wa Nuni a a tale hi wutlharhi* hikusa Moxe a a tlhateke voko la yena henhla ka yena;+ kutani Vayisrayele va sungula ku mu yingisa naswona va yendle hi ku landza leswi Yehovha a nga swi byela Moxe.+ 10 Kambe a ka ha zanga ku va ni muprofeta wa ku fana na Moxe aIsrayele,+ lweyi Yehovha a a vulavula na yena hi ku kongoma.+ 11 A yendle swikombiso hinkwaswu ni masingita leswi Yehovha a nga mu rhuma swaku a swi yendla ka tiko la Gibita ka Faru ni ka vatirhi va yena hinkwavu ni ka tiko la yena hinkwalu,+ 12 ku patsa ni matimba yamakulu lawa Moxe a nga ma kombisa phambheni ka Vayisrayele hinkwavu.