BIBLIYOTEKA KA INTERNETI la Watchtower
Watchtower
BIBLIYOTEKA KA INTERNETI
xiChangana (Moçambique)
  • BIBELE
  • MABUKU
  • MINTLHANGANU
  • nwt Lisimu La Solomoni 1:1-8:14
  • Lisimu La Solomoni

Aku na vhidiyu lihlawuliweke.

Hivaleli, aswikotekanga kuchaya vhidiyu.

  • Lisimu La Solomoni
  • Wuhundzuluxeli La Misava Ya Nyuwani La Matsalwa Ya Ku Kwetsima
Wuhundzuluxeli La Misava Ya Nyuwani La Matsalwa Ya Ku Kwetsima
Lisimu La Solomoni

LISIMU LA SOLOMONI

1 Lisimu la Solomoni leli tiviwaka hintamu:+

 2 “Ni bejari* hi nomo wa wena,

Hikusa swikombiso swa wena swa lirhandzu swa yampsa ku tlula vhinyu.+

 3 Ku nun’hwela ka mafurha ya wena ka tsakisa.+

Vito la wena li fana ni mafurha ya ku nun’hwela lawa ma nga chululiwa.+

Hi leswo swi yendlaka swaku tintombhi ti ku rhandza.

 4 Ni teki hi famba xikan’we;* a hi tsutsume.

Hosi yi ni yise ka makwartu ya yona ya le ndzenindzeni!

A hi tsake, hi tsakisisa xikan’we.

A hi dzunise marito ya wena lama kombisaka lirhandzu lama nga ya lisima ku tlula vhinyu.

Swa fanela swaku tintombhi ti ku rhandza.

 5 N’wina tintombhi ta Yerusalema, ni wa ntima kambe ni sasekile,

Ku fana ni matende ya Kedari,+ ku fana ni tipanu+ ta tende la Solomoni.

 6 Mi nga ni hlamali hi mhaka ya leswi ni nga wa ntima,

Ni yo hisiwa hi dlambu.

Vamakwavu va mina va xinuna va ni kwatelile;

Va ni rhume swaku ni hlayisa masimu ya mawuvha,

Kambe ni tsandzekile ku hlayisa nsimu ya mina ya mawuvha.

 7 Wena lweyi ni ku rhandzaka hintamu,

Ni byeli lani u luselaka kona swifuyu swa wena,+

Lani swi humulaka kona ninhlikanhi.

Hi mhaka muni ni fanele ni fana ni wansati lweyi a nga mbhonyiwa hi nguvu*

Axikarhi ka swifuyu swa vanghanu va wena?”

 8 “Loko u nga swi tivi, wena wansati wa ku saseka hintamu ku tlula vavasati van’wani,

Landzelela minkondzo ya swifuyu,

U lusa swimbutani swa wena kusuhi ni matende ya valusi.”

 9 “Murhandziwa, ni ku fanisa ni kavhalu leli nga xikarhi ka tinyolo* ta Faru.+

10 Marhama ya wena ma sasekile hi mhaka ya swiphatiphati,*

Nhamu ya wena yi sasekile loko u yambale makolari.*

11 Hi ta ku yendlela swiphatiphati swa woru,

Leswi nga sasekiseliwa hi prata.”

12 “Loko hosi yi tshame ka meza wa yona,

Perfume* la mina+ li humesa ku nun’hwela ka lona.

13 Ka mina, murhandziwa wa mina a fana ni nkwama wa mira wa ku nun’hwela+

Niwusiku a yetlela xikarhi ka mavele ya mina.

14 Ka mina murhandziwa wa mina a fana ni xinsinyani xa henna+

Lexi nga xikarhi ka masimu ya mawuvha ya Eni-Jedi.”+

15 “Phela u sasekile murhandziwa!

U saseke ndjhani! Matihlo ya wena ma fana ni ya matuva.”+

16 “Phela u saseke ndjhani murhandziwa funtshi wa ni tsakisa!+

Mubedu wa hina wu yendliwe hi matluka.

17 Timhandzi ta yindlo ya hina i ta minsinya ya mikedari,

Mapulangu lawa ma nga fulela yindlo* ya hina i ya minsinya ya yunipa.

2 “Mina ni xiluva xa safroni lexi nga kusuhi ni lwandle,

Ni xiluva xa khon’wa lexi nga ka nkova.”+

 2 “Murhandziwa wa mina loko a li xikarhi ka tintombhi

A fana ni khon’wa leli nga xikarhi ka mimintwa.”

 3 “Murhandziwa wa mina loko a li xikarhi ka madjaha a fana ni nsinya wa maçã

Lowu nga xikarhi ka minsinya ya khwati,

Ni swi navela hi mbilu hinkwayu ku tshama ka ndzhuti wa yena,

Funtshi mihandzu ya yena ya tsokombela.

 4 A ni tise ka yindlo leyi nga ni fexta,*

Leswi a ni swi vona hi leswi a a ni rhandzisa xiswona.

 5 Ni nyikeni mabolu lama nga hambiwa hi mawuvha ya ku woma;+

Ni nyikeni maçã ni dla,

Hikusa no fa hi lirhandzu.

 6 Voko la yena la ximatsi li le hansi ka nhloko ya mina,

Funtshi a ni barasara hi voko la yena la xinene+

 7 N’wina tintombhi ta Yerusalema,

Na mi fungisa hi timhunti+ ni timbavala:*

Mi nga ni xengeteli swaku ni rhandzana ni munhu anze mina ni swi lava hi noxe.+

 8 Ni twa rito la murhandziwa wa mina!

Wa ta,

Na a khwela tintshava, a tlula henhla ka maganga.

 9 Murhandziwa wa mina a fana ni mhala,* a fana ni ximbavalana.+

Hi lwiyaa a nyime ndzhaku ka muru wa hina,

A txuvuka hi ka majanela,

A hlometele hi ka magradi ya majanela.

10 Murhandziwa wa mina a ni byela a ku:

‘Pfuka murhandziwa,

A hi fambe xikan’we xiluva xanga.

11 Phela wuxika* se li hundzile.

Timpfula ti nyimile a ta ha li kona.

12 A tiko li yo tala hi swiluva,+

Nkama wa ku kapara minsinya wu fikile,+

Ku twakala lisimu la tuva ka tiko la hina.+

13 Nsinya wa nkuwa wu humesa makuwa ya wona ya ku sungula;+

Minsinya ya mawuvha yi ni swiluva se yi humesa ku nun’hwela ka swona.

Pfuka murhandziwa, tani.

A hi fambe xikan’we xiluva xa mina.

14 Wena tuva la mina leli nga ka ndhawu leyi nga ni maribye,+

Ka ndhawu leyi nga ni maganga,

Ni tshike ni ku vona ni twa ni rito la wena,+

Hikusa rito la wena la tsakisa ni nghohe* ya wena yi sasekile.’”+

15 “Hi khomeleni timbyana ta khwati,*

Timbyana tatitsongo ta khwati leti wonhetelaka masimu ya mawuvha,

Hikusa masimu ya hina ya mawuvha ma humese swiluva.”

16 “Murhandziwa wa mina i wanga, na mina ni wa yena.+

A lusa+ xikarhi ka swiluva swa makhon’wa.+

17 Na ku nga se ba swimoyana ni mindzhuti yi nga se famba,

Vuya hi ku kahlula, murhandziwa wa mina,

Ku fana ni mhala+ kumbe ximbavalana+ lexi xi nga ka tintshava leti hi hambanisaka.*

3 “Nkama a ni li ka mubedu wa mina niwusiku,

Ni lavetele murhandziwa wa mina.+

Ni mu lavetelile kambe a ni zanga ni mu kuma.+

 2 Ni ta pfuka ni rhendzelekela ka doropa;

Ka switaratu ni xikarhi ka doropa,

Ni ya lavetela murhandziwa wa mina.

Ni mu lavetelile, kambe a ni zanga ni mu kuma.

 3 Vagwardu lava rhendzelekelaka ka doropa va ni kumile.+

Se ni va vutisile ni ku: ‘Indjhe a mi mu vonanga murhandziwa wa mina?’

 4 A ni nga se ya kule

Nkama ni nga kuma murhandziwa wa mina.

Ni mu khomile, phela a ni nga swi lavi swaku a famba

Anze ni vuya na yena kaya ka mamani,+

Ka kwartu la lweyi a nga ni psala.*

 5 N’wina tintombhi ta Yerusalema na mi fungisa

Hi timhunti ni timbavala:*

Mi nga ni xengeteli swaku ni rhandzana ni munhu anze mina ni swi lava hi noxe.”+

 6 “I mpsini leswi taka hi mananga leswi fanaka ni marhefu ya ximusi,

Leswi nun’hwelaka mira ni olibanu,*

Ni mixaka hinkwayu ya swinun’hwelisu leswi xavisiwaka?”+

 7 “Vonani! I xitshamu xa Solomoni.

Ku ni 60 wa vavanuna matlhelweni ka xona,

Ku nga masonchwa ya matimba ya Israyele,+

 8 Hinkwavu va ni swipada,

Hinkwavu va djondzisiwe ku lwa nyimpi,

Mun’wani ni mun’wani a tlhome xipada

Swaku a mu vhikela ka makhombo ya niwusiku.”

 9 “I xitshamu* xa Hosi Solomoni

A tiyendlele xona hi misinya ya Lebanoni.+

10 Minenge ya xona a yi yendle hi prata,

Lomu ka ku khighetela ku yendliwe hi woru.

Ka ku tshamela a ku yendle hi mavoya ya ku pshuka;

Tintombhi ta le Yerusalema

Ti xi sasekise kahle ndzeni ka xona.”

11 “Humani n’wina tintombhi ta Siyoni,

Vonani Hosi Solomoni

A yambale harhi* ya muchadu leyi a nga hambeliwa hi mamani wa yena+

Hi siku la yena la muchadu,

Hi siku leli a a tsakile.”

4 “Phela u sasekile murhandziwa.

U saseke ndjhani!

Matihlo ya wena ma fana ni ya matuva, loko u timbhonyile hi nguvu.

Misisi ya wena yi fana ni ntlhambi wa timbuti

Loko wu ngirimela ka tintshava ta Jiliyadi.+

 2 Matinyu ya wena ma fana ni ntlhambi wa tinyempfu leti ta ha ku tsemetiwaka

Leti taka hi ku hlambisiweni,

Hinkwatu ti psala mahahla,

Vana va tona hinkwavu va kona.

 3 Nomo wa wena wu fana ni linya la ku pshuka,

Leswi u vulavulisaka swona swa ni tsakisa.

Marhama ya wena ma fana ni swikhemu swa ma romã

Loko u timbhonye hi nguvu.

 4 Nhamu ya wena+ yi fana ni prediyu* la Davhida,+

Leli nga yakiwa hi maribye,

Leli ku nga hayekiwa 1.000 wa swivhikelo ka lona,

Swivhikelo hinkwaswu swa redondu swa masonchwa ya matimba.+

 5 Mavele ya wena ma fana ni swimhuntani swimbirhi,

Leswi nga mahahla,+

Leswi dlaka xikarhi ka swiluva swa makhon’wa.”

 6 “Ni ta ya ka ntshava ya mira

Ni ka ganga la olibanu*+

Anze minkama leyi ku nga ta baka swimoyani ni mindzhuti yi baleka.”

 7 “U saseke ndjhani murhandziwa,+

A wu na lexi u nga soliwaka hi xona.

 8 A hi suke xikan’we aLebanoni, wena ntombhi yanga,

A hi suke xikan’we aLebanoni.+

Xika ka ntshava ya Amana,*

Ka ntshava ya Seniri, ka ntshava ya Hermoni,+

Lomu ku yetlelaka tinghonyama, ka tintshava ta maliyopardu.*

 9 U yive mbilu ya mina,+ wena murhandziwa, ntombhi ya mina,

U yive mbilu ya mina hi ku ni txuvuka kan’we ntsena,

U yi yivile hi kolari* la wena.

10 Lirhandzu la wena la tsakisa hintamu+ wena murhandziwa, ntombhi ya mina!

Lirhandzu la wena li yampsa hintamu ku tlula vhinyu,+

Mafurha* ya wena ma nun’hwela hintamu ku tlula mafurha hinkwawu!+

11 Nomo wa wena ntombhi ya mina wu thona wulombe.+

Hansi ka lirimi la wena ku ni wulombe ni leiti+

Mpahla ya wena yi nun’hwela ku fana ni ku nun’hwela loku twalaka ka khwati la le Lebanoni.

12 Murhandziwa, wena ntombhi ya mina, u fana ni jardim leli nga ni mimuru,

Jardim leli nga khiyiwa, xihlovo lexi nga pfaliwa swi tiya.

13 Leswi nga mila ka jardim la wena swi fana ni paradesi la ma romã,

Leli nga ni mihandzu ya lisima hintamu, swinsinyani swa henna ku patsa ni swinsinyani swa nardu,

14 Xinsinyani xa nardu+ ni xa safroni,* lihlanga la ku nun’hwela+ ni kanela,+

Minsinya hinkwayu ya olibanu,* mira ni timhangani+

Ni ku nun’hwela ka mafurha hinkwawu ya xiyimu xa le henhla.+

15 U xihlovo xa jardim lexi nga ni mati ya ku tenga,

Ni minambu leyi taka hi Lebanoni.+

16 Pfuka, wena moya wa norte;*

Nghena wena moya wa sul.*

A ku be swimoyani ka jardim la mina.

Ku nun’hwela ka lona a ku hangalake.”

“Murhandziwa wa mina a a te ka jardim la yena

A ta dla mihandzu ya lona yayinene.”

5 “Ni nghene ka jardim la mina,+

Wena murhandziwa, ntombhi ya mina.

Ni khaye mira ya mina ni minsinya yin’wani ya ku nun’hwela.+

Ni dle wulombe la mina, ka xisaka xa tinyoxi;

Ni phuze vhinyu la mina ni leiti la mina.”+

“Dlanani, n’wina vanghanu lava rhandzekaka!

Phuzani mi dakwa hi lirhandzu!”+

 2 “Ni yetlelile, kambe mbilu ya mina ya vona.+

Ni twa murhandziwa wa mina na a gongondza!

‘Ni pfuleli, murhandziwa,

Tuva la mina leli kalaka li nga na xa ku soliwa hi xona!

Hikusa nhloko ya mina yi tsakamisiwe hi mberha,*

Misisi ya mina ya tsakama hi mhaka ya hunguva ya niwusiku.’+

 3 Se ni susile nguvu ya mina.

Ni tlhela ni ya yi yambala ke?

Se ni hlambhile minenge.

Ni tlhela ni ya yi chakisa ke?

 4 Murhandziwa wa mina a suse voko la yena ka mbhovo wa nyanghwa,

Se ni sungula ku mu navela.

 5 Ni pfukile, ni ya pfulela murhandziwa wa mina;

Mavoko ya mina a ma thona mira,

Tintiho ta mina a ti thona mafurha ya mira,

Ka xikhomo xa xipfalu.

 6 Ni pfulele murhandziwa wa mina,

Kambe murhandziwa wa mina se a a sukile a famba.

Ni karhatekile nkama ni nga kuma swaku se a a fambile.

Ni mu lavetelile, kambe a ni zanga ni mu kuma.+

Ni mu vitanile, kambe a nga zanga a ni hlamula.

 7 Vagwardu lava rhendzelekelaka ka doropa va ni kumile.

Va ni ba, va ni vavisa.

Vagwardu va mimuru va ni tekele nguvu ya mina.

 8 N’wina tintombhi ta Yerusalema, na mi fungisa:

Loko mi kuma murhandziwa wa mina,

Mu byeleni swaku no fa hi lirhandzu.”

 9 “Kasi murhandziwa wa wena a va tlula hi yini varhandziwa van’wani,

Wena wansati wa ku saseka hintamu ku tlula vavasati van’wani?

Kasi murhandziwa wa wena a va tlula hi yini varhandziwa van’wani,

U zaka u hi fungisa ke?”

10 “Murhandziwa wa mina wa phatima funtshi a pshukile;

I wa lisima ku tlula 10.000 wa vanhu.

11 Nhloko ya yena i woru, woru lalinene.

Misisi ya yena yi fana ni tigadja ta nsinya wa ntxindzu,

Misisi ya yena i ya ntima ku fana ni tlhugwani.*

12 Matihlo ya yena ma fana ni matuva lawa ma nga kusuhi ni minambu,

Lawa ma hlambaka hi leiti,

Na ma tshame kusuhi ni mati ya ku yenta.

13 Marhama ya yena ma fana ni jardim leli nga ni minsinya ya ku nun’hwela,+

Li nga ni swinsinyani swa swinyingi swa ku nun’hwela.

Nomo wa yena i swiluva swa makhon’wa leswi swi thonaka mafurha ya mira.+

14 Mavoko ya yena i tinhonga ta woru, leti nga ni maribye ya krizolita.

Khwirhi la yena li fana ni matinyu ya tindlopfu lawa ma nga polichiwa ma phatima ma tlhela ma veketeliwa maribye ya safira.

15 Minenge ya yena yi fana ni mapilari ya ribye la marmore lawa ma nga vekiwa ka swa ku tlhoma mapilari leswi nga yendliwa hi woru lalinene.

A sasekile ku fana ni tiko la Lebanoni, funtshi a lehile ku fana ni minsinya ya mikedari.+

16 Nomo wa yena wa tsokotsa,

Ni rhandza hinkwaswu ka yena.+

N’wina tintombhi ta Yerusalema, phela lweyi i murhandziwa wa mina, lweyi ni mu rhandzaka.”

6 “Wena wansati wa ku saseka hintamu ku tlula vavasati van’wani,

A ye kwini murhandziwa wa wena?

Murhandziwa wa wena a djike a ya kwini?

Hi ta ku pfuna ku mu lavetela.”

 2 “Murhandziwa wa mina a ye ka jardim la yena,

Ka jardim la minsinya ya ku nun’hwela,

A le ku luseni xikarhi ka majardim,

Ni ku khaya swiluva swa makhon’wa.+

 3 Ni wa murhandziwa wanga,

Na yena i wa mina.+

A lusa xikarhi ka swiluva swa makhon’wa.”+

 4 “U sasekile ku fana ni doropa la Tiraza,*+ wena murhandziwa wanga,+

U saseke ku fana na Yerusalema,+

U hlonipheka ku fana ni masonchwa lawa ma nga lunghekela nyimpi.+

 5 U nga ni txuvuke+ hintamu,

Hikusa no deretera.

Misisi ya wena yi fana ni ntlhambi wa timbuti

Leti ngirimelaka ka tintshava ta Jiliyadi.+

 6 Matinyu ya wena ma fana ni ntlhambi wa tinyempfu

Leti taka hi ku hlambisiweni,

Hinkwatu ti psala mahahla,

Vana va tona hinkwavu va kona.

 7 Marhama ya wena ma fana ni xikhemu xa romã

Loko u timbhonye nguvu.

 8 Hambi no va ni 60 wa tihosi ta xisati

80 wa vavasati vavatsongo*

Ni tintombhi ta ku kala ti nga konteki hi ku tala ka tona.+

 9 Kambe ku ni mun’we ntsena lweyi a nga tuva la mina,+ lweyi a kalaka a nga na xa ku soliwa hi xona.

I n’wana wa mun’we.

Mamani wa yena wa mu rhandza hintamu.

Loko tintombhi ti mu vona, ti ta hlaya swaku a tsakile;

Tihosi ta xisati ni vasati vavatsongo va mu dzunisa.

10 ‘I mani wansati lweyi a phatimaka ku fana ni dlambu loko li xa,

Wa ku saseka ku fana ni n’weti,

Wa ku tenga ku fana ni masana ya dlambu,

Lweyi a hloniphekaka ku fana ni masonchwa lawa ma nga lunghekela nyimpi?’”+

11 “Ni ye ka jardim la minsinya ya timongo+

Swaku ni ya vona leswi nga mila ka nkova,

Swaku ni ya vona swaku minsinya ya mawuvha yi milile,

Swaku ni ya vona swaku minsinya ya ma romã yi milile.

12 Hi nkamanyana,

Ni tikume

Ni li ka tinyolo* ta vanhu va mina lava hloniphekaka.”

13 “Vuya, vuya, wena Muxulami!

Vuya, vuya,

Swaku hi ta ku vona!”

“Hi mhaka muni mi txuvuka Muxulami?”+

“A fana ni ku txina ka mintlawa yimbirhi!”*

7 “Wena ntombhi ya ku hlonipheka!

Minenge ya wena yi saseke hintamu loko u yambale masandaliya,

Minenge* ya wena yi tshamisekile ku fana ni swiphatiphati,

Leswi nga yendliwa hi munhu lweyi a swi kotaka ku swi yendla kahle.

 2 Nkava wa wena wu fana ni kopo ya redondu.

Nkava wa wena a wu tshame na wu ni vhinyu lalinene.

Khwirhi la wena li fana ni nyandza ya trigu,

Leyi nga rhendzeliwa hi swiluva swa makhon’wa.

 3 Mavele ya wena ma fana ni swimhuntani swimbirhi,

Leswi nga mahahla.+

 4 Nhamu ya wena+ yi fana ni prediyu*+ leli nga yendliwa hi matinyu ya tindlopfu.

Matihlo ya wena+ ma fana ni mati ya ku yenta ya le Exiboni,+

Lawa ma nga kusuhi ni nyanghwa wa Bati-Rabimi.

Nhompfu ya wena yi fana ni prediyu la Lebanoni,

Leli nga txuvuka Damaxka.

 5 Harhi* ya nhloko ya wena yi saseke ku fana ni ntshava ya Karmeli,+

Misisi* ya wena+ yi fana ni mavoya ya ku pshuka.+

A hosi a yi gwenti hi misisi ya wena ya ku leha.

 6 U saseke ndjhani funtshi u munhu wa ku tsakisa,

Wena ntombhi u rhandziwaka ku tlula minchumu hinkwayu ya ku nandzika!

 7 U tshame ku fana ni nsinya wa ntxindzu

Mavele ya wena ma fana ni switxatxa swa ntxindzu.+

 8 Ni te: ‘Ni ta khwela ka nsinya wa ntxindzu,

Swaku ni ta khoma mihandzu ya wona.’

Mavele ya wena a ma fane ni switxatxa swa mawuvha,

Moya* wa wena a wu nun’hwele ku fana ni maçã,

 9 Nomo wa wena a wu fane ni vhinyu lalinene.”

“A li ngirimele ka nkolo wa murhandziwa wa mina loko a li phuza,

Ku fana ni vhinyu leli xikaka hi ka nomo li gama li yendla swaku vanhu va yetlela

10 Ni wa murhandziwa wa mina+

Funtshi yena wa ni rhandza.

11 Tani murhandziwa wa mina

A hi fambe masin’wini;

Hi ya tshama xikarhi ka swinsinyani swa henna.+

12 A hi pfuke nimpundzu hi ya ka masimu ya mawuvha,

Hi ya vona kumbe minsinya ya mawuvha yi hlukile,

Kumbe se yi ni swiluva+

Ni swaku minsinya ya ma romã yi hlukile.+

Kolanu ni ta ku komba leswi ni ku rhandzisaka swona.+

13 Mihandzu ya mandraga+ yi humesa ku nun’hwela ka yona;

Ku ni mihandzu ya mixaka hinkwayu ka tinyanghwa ta hina.+

Ya khale ni ya nyuwani,

Ni ku vekelile, wena murhandziwa wanga.

8 “Loko a ku li swaku u makwerhu,

Lweyi a nga yan’wa ka mavele ya mamani!

Se loko ni ku kuma ahandle, a ni ta ku bejara,*+

Funtshi a nga kona lweyi a a ta ni sola.

 2 A ni ta famba na wena;

Ni ku yisa kaya ka mamani,+

Lweyi a nga ni djondzisa.

A ni ta ku nyika vhinyu la ku nandzika,

Ni sumu la nyuwani la ma romã.

 3 Voko la yena la ximatsi a li ta va hansi ka nhloko ya mina,

Funtshi a a ta ni barasara hi voko la yena la xinene.+

 4 N’wina tintombhi ta le Yerusalema, na mi fungisa:

Mi nga ni xengeteli swaku ni rhandzana ni munhu anze mina ni swi lava hi noxe.”+

 5 “I mani lweyi a taka hi mananga,

Na a khigetele murhandziwa wa yena?”

“Ni ku pfuxe hansi ka nsinya wa maçã.

Lani mamani wa wena a nga lun’wa* kona.

Ku nga lani a nga ku psalela kona.

 6 Ni veki ka mbilu ya wena ku fana ni marka,

Ku fana ni marka ka voko la wena,

Hikusa lirhandzu li ni matimba ku fana ni lifu,+

Ku navela ku tshembeka ka lweyi u mu rhandzaka swi ni ntamu ku fana ni Sirha.*

Malangavi ya lirhandzu ma fana ni ku hisa ka ndzilu, langavi la Yehovha.*+

 7 Magandlati ya lwandle leli nga kwata a ma nge swi koti ku helisa lirhandzu,+

Hambi hi minambu a yi nge li koki.+

Loko munhu o nyikela tshomba la yena hinkwalu swaku a ta kuma lirhandzu,

Li ta tekeliwa hansi hintamu.”*

 8 “Hi ni makwerhu wa xisati wamutsongo,+

Funtshi a nga se huma mavele.

Se hi ta mu yendlela yini

Siku leli va nga ta ta va ta mu kombela swaku a ya wukatini ke?”

 9 “Loko a li muru,

Hi ta yaka prediyu* la prata henhla ka yena,

Kambe loko a li nyanghwa,

Hi ta mu pfala hi pulangu la mukedari.”

10 “Mina ni muru,

Funtshi mavele ya mina ma fana ni maprediyu.

Ka yena ni fana

Ni munhu wa ku rhula.

11 Solomoni a a ni nsimu ya mawuvha+ aBali-Amoni.

A yi nyike vatirhi swaku va yi hlayisa.

Mun’wani ni mun’wani a a xava mihandzu ya wona hi 1.000 wa swikhemu swa prata.

12 Ni ni nsimu ya mawuvha.

1.000 wa swikhemu swa prata i swa wena, wena Solomoni,

Naswona 200 i swa lava hlayisaka mihandzu.”

13 “Wena u tshamaka ka majardim,+

Vanghanu va lava ku twa rito la wena.

Na mina ni lava ku li twa.”+

14 “Kahlula murhandziwa,

Tsutsuma ku fana ni mhala*+

Kumbe ximbavalana*

Ahenhla ka tintshava ta minsinya ya ku nun’hwela.”

Kumbe: “n’quti”.

Hi Xiheberu: “Ni koki.”

Kumbe: “nguvu leyi lweyi a nga feliwa a timbhonyaka hi yona”.

Kumbe: “tin’qolo; makalichi”.

Kumbexana: “axikarhi ka misisi leyi nga lukiwa”.

Kumbe: “ma cordão.”

Kumbe: “Mafurha ya”.

Kumbe: “yindlo yayikulu”.

Hi Xiheberu: “yindlo ya vhinyu”.

Kumbe: “veados.”

Kumbe: “gazela”.

Kumbe: “nkama wa mpfula”.

Kumbe: “kara la”.

Lani ku vulavuliwa hi timhungubye.

Kumbe: “tintshava ta Betere.”

Kumbe: “veleka.”

Kumbe: “veados.”

Muxaka wa swinun’hwelisu swaku loko swi hisiwa swi humesa ximusi xa ku nun’hwela.

Xitshamu xa ku fuleliwa lexi tihosi a ti tshama ka xona ti tlhela ti tlakuliwa hi xona.

Kumbe: “korowa”.

Kumbe: “xihondzo; xitezi”.

Muxaka wa swinun’hwelisu swa ku loko swi hisiwa swi humesa ximusi xa ku nun’hwela.

Kumbe: “Anti-Lebanoni”.

Kumbe: “tiyingwe.”

Kumbe: “hi cordão.”

Kumbe: “Maperfumi”.

Kumbe: “açafrão”.

Muxaka wa swinun’hwelisu swa ku loko swi hisiwa swi humesa ximusi xa ku nun’hwela.

Kumbe: “n’walungwini.”

Kumbe: “dzongeni.”

Kumbe: “mub’etho”.

Kumbe: “gqugwani.” Ku nga muxaka wa xinyanyani.

Kumbe: “Doropa la Ku Saseka”.

Vona Ntlhamuselo.

Kumbe: “tin’qolo; makalichi”.

Kumbe: “ku txina ka Mahanayimi.”

Kumbe: “Mathanga”.

Kumbe: “xihondzo; xitezi”.

Kumbe: “Korowa”.

Hi Xiheberu: “Nhloko”.

Ku nga moya lowu a wu humesaka loko a hefemula.

Kumbe: “n’quta; nyunta”.

Ku nga ku vava loku wansati a ku twaka loko a lava ku psala.

Kumbe: “Sheol.” Vona Ntlhamuselo.

Kumbe: “Yah.” Yah i magomiselo ya vito leli nge Yehovha.

Kumbexana: “A ta tekeliwa hansi hintamu.”

Kumbe: “xihondzo; xitezi”.

Kumbe: “gazela”.

Kumbe: “veado”.

    Mabuku ya xiChangana (2003-2025)
    Huma
    Nghena
    • xiChangana (Moçambique)
    • Rhumela
    • Hlawula
    • Copyright © 2025 Watch Tower Bible and Tract Society of Pennsylvania
    • Minawu ya Matirhiselo
    • Nawu wa Xihundla
    • Seta Swa Xihundla
    • JW.ORG
    • Nghena
    Rhumela