SWIRILO
א [Alefi]*
1 Vona leswi a nga tshamisa swona na a li yexe, kuve a a li doropa leli nga tala hi vanhu!+
Vona ndlela leyi a fanaka hi yona ni wansati wa ku feliwa hi nuna, kuve a a ni vanhu va vanyingi xikarhi ka matiko!+
Vona ndlela leyi a nga xikarawa hi yona, kuve a a li hosi ya xisati xikarhi ka maprovhinsiya!+
ב [Beti]
2 A rila hi xiviti niwusiku,+ mihloti ya yena yi xiririka hi ka marhama.
A ku na munhu ni mun’we lweyi a mu miyetaka ka lava a a rhandzana na vona.+
Vanghanu va yena hinkwavu va mu xavisile;+ va ve valala va yena.
ג [Gimeli]
3 Yuda a ye wukaraweni+ naswona wa xaniseka swinene.+
A fanele a tshama xikarhi ka matiko;+ a nga yi kumi ndhawu ya ku humula ka yona.
Hinkwavu lava mu xanisaka va mu kume na a xaniseka.
ד [Daleti]
4 Tindlela leti yaka Siyoni ta rila, hikusa a ku na munhu lweyi a taka fexteni.+
Tinyanghwa ta yena hinkwatu ti hahluleliwile;+ vaprista va yena va ni nhlomulu.
Tintombhi ta yena ta xukuvala naswona yena a le ku hluphekeni kakukulu.
ה [He]
5 Valala va yena va ve varhangeli va yena; a va na mhaka na yena.+
Hikusa Yehovha a mu tisele ku vaviseka hi mhaka ya swidjoho swa yena swa swinyingi.+
Vana va yena va yisiwe wukaraweni hi nala.+
ו [Vawu]
6 Doropa* la Siyoni a la ha phatimi.+
Varhangeli va lona va fana ni timbavala* leti kalaka ti nga ha kumi byanyi,
Ti famba na ti karhele phambheni ka lweyi a ti hlongolaka.
ז [Zayini]
7 Nkama lowu a a xaniseka ni nkama lowu a a pfumala kaya, Yerusalema a khumbuke
Swilo swa yena hinkwaswu swa lisima leswi a nga tshama a va na swona.+
Nkama vanhu va yena va nga hlaseliwa hi nala naswona ku nga li na lweyi a mu pfunaka,+
ח [Heti]
8 Yerusalema a djohe ngopfu.+
Hi leswo swi nga yendla a va nchumu xa ku nyenyentsa.
Hinkwavu lava a va mu hlonipha, swoswi va mu vona na a nga li wa nchumu, hikusa va mu vone na a nga yambalanga nchumu.+
A le mahlomulweni+ funtshi a txuvuka tlhelweni hi mhaka ya tingana.
ט [Teti]
9 Ku chaka ka yena ku le ka mpahla ya yena.
A nga pimisanga hi leswi a swi ta mu humelela ka nkama lowu taka,+
Ku wa ka yena a ku hlamalisa; a ku na munhu lweyi a nga ta mu tiyisa.
Yehovha Xikwembu xa mina, vona ku hlupheka ka mina hikusa nala a titlakusile.+
י [Iyodi]
10 Nala a teke swilo swa yena hinkwaswu swa lisima.+
Hikusa a vone matiko na ma nghena ka ndhawu ya yena leyi kwetsimaka,+
Lawa u nga vula swaku ma nga ngheni ka vanhu va wena.
כ [Kafi]
11 Vanhu va yena hinkwavu va le mahlomulweni; va lava pawu.+
Va nyikele ni swilo swa vona swa lisima swaku va kuma swakudla, swaku va ta kota ku hanya.
Yehovha Xikwembu xa mina, ni txuvuki; ni fana ni wansati* lweyi a kalaka a nga pfuni nchumu.
ל [Lamedi]
12 Swo kala swi nga mi khumbi n’wina hinkwenu lava mi hundzaka hi ndlela?
Vonani!
Indjhe ku kona ku vava ka ku fana ni loku ni nga vangeliwa kona,
Loku Yehovha a nga yendla swaku ni va na kona ka siku la ku kwata ka yena kakukulu?+
מ [Memi]
13 A rhumele ndzilu na a li tilweni swaku a hisa marhambu ya mina hinkwawu.+
A yandlalele minenge ya mina redi; a ni sindzise ku tlhelela ndzhaku.
A ni yendle ni va wansati lweyi a nga tshikiwa.
Na vabya siku hinkwalu.
נ [Nuni]
14 Swidjoho swa mina swi boheleliwile ku fana ni kange* swi boheleliwe hi voko la yena.
Swi vekiwe ka nhamu ya mina, a na ha na matimba.
Yehovha a ni nyikele ka lava ni kalaka ni nga swi koti ku lwa na vona.+
ס [Sameki]
15 Yehovha a teke vavanuna va mina hinkwavu lava nga ni matimba.+
A hlengelete vanhu swaku va ta dlaya madjaha ya mina.+
Yehovha a psanyetele vanhu va Yuda* ka ndhawu ya ku kamela mawuvha.+
ע [Ayini]
16 Na rila hi mhaka ya swilo leswi;+ matihlo ya mina ma xiririka mihloti.
Hikusa lweyi a a ta ni miyetela kumbe a ni tiyisa a le kule na mina.
Vana va mina a va ha na ntshembo hikusa nala a hi hlulile.
פ [Pe]
17 Siyoni a tlakuse mavoko;+ a ku na munhu lweyi a mu tiyisaka.
Yehovha a rhume hinkwavu lava nga rhendzela Yakobe swaku va va valala va yena.+
Yerusalema a ve nchumu xa ku nyenyentsa ka vona.+
צ [Tsadi]
18 Yehovha a lulamile,+ hi mina ni kalaka ni nga yingisanga minawu ya yena.+
Yingisani hinkwenu, mi vona ku vaviseka ka mina.
Tintombhi ta mina ni madjaha ya mina va yisiwe wukaraweni.+
ק [Kofi]
19 Ni vitane lava ni rhandzanaka na vona kambe va ni kanganyisile.+
Vaprista ni madoda ya mina va fele doropeni,
Nkama na va lava swakudla swaku va ta kota ku hanya.+
ר [Rexi]
20 Yehovha, vona nhlomulu wa mina wawukulu.
Ni chava ngopfu lakakuva ni ndzeni* ka mina ka luma.
Mbilu ya mina yi karhatekile hikusa ni ku djikelile.+
Ahandle xipada xi dlaye vana va mina;+ kasi a phakati ka yindlo na kona ka fiwa.
ש [Xini]
21 Vanhu va ni twile nkama na ni konya; kambe a ku na lweyi a ni tiyisaka.
Valala va mina hinkwavu va twile hi ta khombo la mina.
Va tsakile hi mhaka ya leswi u nga ni tisela lona.+
Kambe u ta tisa siku leli u nga vula swaku u ta li tisa,+ leli na vona va nga ta fana na mina.+
ת [Tawu]
22 Vona wubihi la vona hinkwalu naswona va khatise swinene,+
Ku fana ni leswi na mina u nga ni khatisisa swona hi mhaka ya swidjoho swa mina hinkwaswu.
Hikusa ku konya ka mina i kukulu naswona mbilu ya mina ya vava.
א [Alefi]
2 Vona leswi Yehovha a nga li mbhonyisa swona doropa* la Siyoni hi rhefu la ku kwata ka yena!
A txukumete ku saseka ka Israyele ku sukela atilweni ku ta fika amisaveni.+
Hi siku la ku kwata ka yena a nga yi khumbukanga ndhawu leyi a vekaka ka yona minenge ya yena.+
ב [Beti]
2 Yehovha a minte tindhawu hinkwatu ta ku tshama ka tona ta Yakobe, a nga vanga ni ntwelawusiwana.
A dilize tindhawu ta ku hlayiseka ta vanhu va Yuda na a kwatile.+
A wise mfumu+ ni varhangeli va vona+ hi ndlela ya ku danisa.
ג [Gimeli]
3 A tseme timhondzo* hinkwatu ta Israyele na a kwatile swinene.
A suse voko la yena la xinene nkama nala a a tshinela,+
A tame a pfurhela Yakobe ku fana ni ndzilu lowu hisaka swilo hinkwaswu leswi nga kusuhi na wona.+
ד [Daleti]
4 A gwimbe ligubu la yena ku fana ni nala; a yendle swaku voko la yena la xinene li lunghekela ku hlasela ku fana ni nala;+
A tame a dlayetela vanhu hinkwavu lava nga va lisima ka hina.+
A chulule ku kwata ka yena ku fana ni ndzilu+ ka tende la doropa la Siyoni.+
ה [He]
5 Yehovha a fana ni nala;+
A minte Israyele.
A minte maprediyu* ya yena hinkwawu;
A helise tindhawu ta yena leti nga ni mimuru ya ku tiya.
A yengetele swikarhatu ni swirilo ka vanhu va Yuda.
ו [Vawu]
6 A hahlulele tende la yena+ ku fana ni xiyindlwani lexi nga masin’wini.
A helise ku tsaka ka yena.+
Yehovha a yendle swaku ku khohlwiwa fexta ni savata aSiyoni,
Naswona hi ku kwata ka yena kakukulu a nga na mhaka ni hosi ni muprista.+
ז [Zayini]
7 Yehovha a yi tshikile altari ya yena;
A yi tshikile ndhawu ya yena leyi kwetsimaka.+
A nyikete mimuru ya maprediyu ya doropa la yena ka nala.+
Va huwelelile na va li ka yindlo ya Yehovha+ ku fana ni siku la fexta.
ח [Heti]
8 Yehovha a tinyimisele ku diliza muru wa doropa la Siyoni.+
A pime mimuru hi ngoti ya ku pima hi yona.+
A nga tshikanga ku yi helisa.
A yendla swaku mimuru yi rila.
Hinkwayu yi wile.
ט [Teti]
9 Tinyanghwa ta yena ti mbombomele misaveni.+
A helise a tlhela a tshovelela swa ku khiya hi swona.
Hosi ya yena ni varhangeli va yena va le xikarhi ka matiko.+
A ku na nawu; hambi vaprofeta va yena, Yehovha a nga va kombi nchumu hi ndlela ya singita.*+
י [Iyodi]
10 Madoda ya doropa la Siyoni ma tshame hansi, na ma miyelile.+
Ma ticheletele wuthulu ka tinhloko naswona ma yambale masaka.+
Tintombhi* ta Yerusalema ti korhamise tinhloko ta tona.
כ [Kafi]
11 Matihlo ya mina ma vava hi mhaka ya ku rila.+
Ni chava hintamu lakakuva ni ndzeni* ka mina ka luma.
Mbilu ya mina ya vava* hi mhaka ya ku helisiwa ka vanhu va mina,*+
Hi mhaka ya vana ni swivanani leswi titivalaka xikarhi ka doropa.+
ל [Lamedi]
12 Va tshamela ku vutisa vamamani va vona va ku: “Swi kwini swakudla ni vhinyu?”+
Va vutisa leswo nkama va titivalaka ku fana ni munhu lweyi a nga vavisiwa xikarhi ka doropa,
Nkama va karhatekaka* ka mavoko ya vamamani va vona.
מ [Memi]
13 I ntxini lexi ni nga xi tirhisaka swaku xi va mboni,
Kumbe ni nga ku fanisa ni yini wena Yerusalema?
Kasi ni nga ku fanisa ni yini swaku ni ku tiyisa, wena doropa la Siyoni?
Hikusa ku wa ka wena i kukulu ku fana ni lwandle.+ I mani lweyi a nga ku holisaka?+
נ [Nuni]
14 Vaprofeta va wena va vone swilo* swa mavunhwa ni leswi kalaka swi nga pfuni nchumu,+
A va zamanga ku ku pfuna hi ku ku byela xihoxo xa wena swaku u nga yisiwi wukaraweni,+
Kambe a va tshamela ku ku byela swilo swa mavunhwa ni swa ku kanganyisa leswi a va swi vona.+
ס [Sameki]
15 Hinkwavu lava ndlhulaka hi ndlela va ba mavoko va ku hleka.+
Va ba noti na va hlamala,+ va hlakahlela Yerusalema* tinhloko va ku:
“A hi lona doropa leli ku nga vuliwa swaku ‘li saseke ngopfu naswona li tsakisa vanhu hinkwavu lava tshamaka misaveni’?”+
פ [Pe]
16 Valala va wena hinkwavu va ku hleka.
Va ba noti ni ku luma matinyu ya vona va ku: “Hi mu helisile.+
Phela leli i siku leli a hi li nyimelile!+ Li fikile naswona hi li vonile!”+
ע [Ayini]
17 Yehovha a swi yendlile leswi a a lava ku swi yendla;+ a hetisisile leswi a nga swi vula,+
Leswi a nga swi vula khale swinene.+
A dilizile a nga tsetseleli.+
A yendle swaku nala a tsaka hi mhaka ya wena; a va yengetele matimba* valala va wena.
צ [Tsadi]
18 Mbilu ya vona ya huwelela ka Yehovha, wena muru wa doropa la Siyoni.
Mihloti a yi xiririke ku fana ni xinambyani wusiku ni nhlikanhi.
U nga humuli, tihlo la wena li nga humuli.
ק [Kofi]
19 Suka u nyima! Bana nkosi wusiku hinkwalu.
Byela Yehovha hinkwaswu leswi nga mbilwini ya wena na u rila.
Tlakusela mavoko ka yena hi mhaka ya wutomi la vana va wena,
Lava titivalaka switaratwini hi mhaka ya ndlala.+
ר [Rexi]
20 Yehovha, txuvuka vanhu va wena lava u nga va twisa ku vava swinene.
Indjhe vavasati va fanele va tshamela ku dla vana va vona,+
Kumbe vaprista ni vaprofeta va fanele va dlayiwa ka ndhawu ya wena leyi kwetsimaka, wena Yehovha?+
ש [Xini]
21 A vafana ni lava va nga guga va file va yo mbaa aswitaratwini.+
Tintombhi ni madjaha ya mina va dlayiwile hi xipada.+
U va dlayile hi siku leli a wu kwatile; u va dlayetelile a wu va tsetselelanga.+
ת [Tawu]
22 U vitane swilo leswi ni swi chavaka swi ta hi ka matlhelo hinkwawu, ingi hiloko ko va ni fexta.+
A nga kona lweyi a nga baleka kumbe a pona hi siku la ku kwata ka wena Yehovha;+
Nala a helise lava ni nga va psala ni tlhela ni va kulisa.+
א [Alefi]
3 Ni munhu lweyi a nga vona vanhu na va xaniseka hi mhaka ya nhonga ya ku kwata ka Yena.
2 A ni hlongolile a gama a ni fambisa ka munyama ku nga li ka ku vonakala.+
3 Voko la yena li lwa na mina siku hinkwalu.+
ב [Beti]
4 Muzimbha wa mina a wu hete ntamu a hlakata ni nyama ya mina;
A tshove marhambu ya mina.
5 A yake muru wu ni rhendzela; a ni rhendzele hi vhenenu la ku bava+ ni hi mahlomulu.
6 A ni sindzise ku tshama ka munyama, ku fana ni vanhu lava nga fa khale swinene.
ג [Gimeli]
7 A ni rhendzele hi mimuru swaku ni nga baleki;
A ni bohe hi machini ya ku tika ya kobre.+
8 Loko ni kombela ku pfuniwa na ni li ka mahlomulu, a nga xi yingisi xikhongelo xa mina.+
9 A pfale tindlela ta mina hi maribye ya ku vatliwa;
A yendle swaku swi karhata ku famba ka tindlela ta mina.+
ד [Daleti]
10 A ni tumbelelile ku fana ni ursu* swaku a ni hlasela, ku fana ni nghonyama leyi nga tumbela.+
11 A ni sindzise ku suka ka tindlela ta mina a tlhela a ni phatlulela;
A ni yendle ni nga ha pfuni nchumu.+
12 A gwimbe ligubu la yena, a ni nyimisa swaku ni txopiwa hi mpaxwa.*
ה [He]
13 A tlhave tiyinso ta mina hi mimpaxwa leyi nga ka xipaxtani* xa yena.
14 Na hlekiwa hi vanhu hinkwavu, va ni poyilela hi tinsimu ta vona siku hinkwalu.
15 A ni dlise swa ku bava, a ni yendla ni tshamela ku phuza mati ya swinsinyani swa ku bava.+
ו [Vawu]
16 A tshova matinyu ya mina hi swiribyani;
A ni kasisa ka nkuma.+
17 A ni tsona ku rhula; ni khohlwe ni leswi nga swinene.
18 Kutani ni li: “Ku hlonipheka ka mina ku helile ni ntshembo wa mina wu helile ka Yehovha.”
ז [Zayini]
19 Khumbuka ku hlupheka ka mina ni leswaku a ni na kaya,+ khumbuka swaku ni dla swinsinyani swa ku bava ni vhenenu la ku bava.+
20 U ta khumbuka u gama u ta, u ta ni pfuna.+
21 Na swi khumbuka leswi; hi swona swi yendlaka ni rindza.+
ח [Heti]
23 U hi chululela timpsalu ta wena mixo wun’wani ni wun’wani;+ wa tshembeka minkama hinkwayu.+
24 Ni te: “Yehovha i tshomba la mina,+ hi leswo swi yendlaka ni mu nyimela.”+
ט [Teti]
25 Yehovha i munene ka lweyi a mu tshembaka,+ ka lweyi a mu lavetelaka nkama hinkwawu.+
26 I swinene swaku munhu a nyimela ku ponisiwa hi Yehovha+ na a miyelile.+
27 Swa yampsa swaku munhu a kumana ni swikarhatu na a ha li jovhem.+
י [Iyodi]
28 A a tshame na a li yexe a miyela loko Xikwembu xi pfumelela swikarhatu swa yena.+
29 A a tiveke hansi, nghohe* ya yena yi khumba hansi;*+ kumbexana ku nga ha va ni ntshembo wa leswaku a ta ponisiwa.+
30 A a mu nyike rhama lweyi a mu baka; a a dane swinene.
כ [Kafi]
31 Hikusa Yehovha a nge hi txukumeti swa wugamu.+
32 Hambileswi a nga hi vangela ku vaviseka, a ta tlhela a hi komba timpsalu hi ku ya hi lirhandzu la yena lalikulu.+
33 Hikusa a nga swi tsakeli ku xanisa vanhu kumbe ku va twisa ku vava.+
ל [Lamedi]
34 Ku kandzihela swib’ochwa hinkwaswu swa lani misaveni hi minenge ya yena,+
35 Ku kala a nga khomi munhu hi ndlela ya ku lulama phambheni ka Lweyi A Nga Tlakuka,+
36 Ku kanganyisa munhu loko ku thethiwa mhaka ya yena,
Yehovha a nga swi pfumeleli swilo swoleswo.
מ [Memi]
37 I mani lweyi a nga vula swilo swi gama swi humelela loko ku nga li Yehovha a nga vula swaku swi humelela?
38 Ka nomo wa Lweyi A Nga Tlakuka
A ku humi swilo swa ku biha ni swaswinene hi nkama wun’we.
39 Hi mhaka muni munhu* a fanele a vilela hi leswi a nga ta swi tshovela hi mhaka ya xidjoho xa yena?+
נ [Nuni]
40 A hi kambeleni tindlela ta hina+ hi ti kambisisa kahle, hi tlhelela ka Yehovha.+
41 A hi kombeleni ka Xikwembu amatilweni hi timbilu ta hina hinkwatu, a hi tlakuseni mavoko ya hina hi ku:+
42 “Hi djohile hi tlhela hi ku djikela,+ wena a wu hi rivalelanga.+
ס [Sameki]
43 U pfale ndlela ya ku tshinela ka wena na u kwatile;+
U hi txatxile u hi dlaya a wu hi tsetselelanga.+
44 U pfale ndlela ya ku tshinela ka wena hi rhefu, swaku xikhongelo xa hina xi nga fiki ka wena.+
45 U yendle swaku hi poyiliwa hi tlhela hi va chaka xikarhi ka vanhu.”
פ [Pe]
46 Hinkwavu valala va hina va hi hleka.+
47 Hi tshama na hi chava naswona hi phasekile,+ a ha ha na ntshembo funtshi hi karhatekile.+
48 Ka matihlo ya mina ku huma xinambyani xa mati hi mhaka ya ku wa ka vanhu va mina.*+
ע [Ayini]
51 Ni karhatekile hileswi matihlo ya mina ma nga swi vona ka swidoropani* hinkwaswu swa doropa la mina.+
צ [Tsadi]
52 Valala va mina va ni hlotile ku fana ni xinyanyani na ku nga na xivangelo.
53 Va helise wutomi la mina mugodini; va ni hoxetele hi maribye.
54 Mati ma fambe hi ka nhloko ya mina ni gama ni ku: “Ni file!”
ק [Kofi]
55 Yehovha Xikwembu xa mina, ni vitane vito la wena na ni li ka xikhele xa ku yenta swinene.+
56 Twana rito la mina; pfula ndleve ya wena swaku yi ni twa loko ni kombela ku pfuniwa.
57 U ni tshinelelile hi siku leli ni nga ku vitana hi lona. U te: “U nga chavi.”
ר [Rexi]
58 Wena Yehovha u ni lwelile atribunali, u ponise wutomi la mina.+
59 Yehovha Xikwembu xa mina, u swi vonile swilo swa ku biha leswi ni nga yendleliwa swona; ni kombela u ni yavanyisa hi ndlela ya ku lulama.+
60 U vonile ku hakelisa ka vona hinkwaku ni leswi va pimisaka ku ni yendla swona.
ש [Sini] kumbe [Xini]
61 Yehovha, u va twile nkama a va ni poyila u tlhela u twa ni leswi va pimisaka ku ni yendla swona,+
62 Marito ya nomo wa lava ni kanetaka ni leswi va ni hlevaka hi swona siku hinkwalu.
63 Va txuvuki; loko va tshamile kumbe loko va nyimile va ni poyilela hi tinsimu ta vona!
ת [Tawu]
64 Yehovha, u ta va hakela hi ku ya hi mintirho ya vona.
65 U ta va rhuka hi ku yendla swaku va va ni timbilu ta ku tiyela.
66 U ta va txatxa na u kwatile, u va helisa hansi ka matilo ya wena Yehovha.
א [Alefi]
4 Vona ndlela leyi woru la ku phatima li nga la ntima hi yona, woru lalinene!+
Vona ndlela leyi maribye ya ku kwetsima+ ma nga hangalakela hi yona aswitaratwini!*+
ב [Beti]
2 Vana va lisima va le Siyoni, lava nga tshama va va va lisima ku fana ni woru la xiyimu xa le henhla,
Vona ndlela leyi va voniwaka ku fana ni makhuwani ya vumba hi yona,
Lawa ma nga yendliwa hi lweyi a tirhaka hi vumba!
ג [Gimeli]
3 Timbyana ta khwati* ti humese mavele ti yan’wisa vana va tona,
Kambe vanhu va mina* va ve ni mona+ ku fana ni tiyintxa* amananga.+
ד [Daleti]
4 Lirimi la xin’wanani lexi yan’waka li namarhela henhla ka nomo hi mhaka ya torha.
Vana va kombela pawu+ kambe a nga kona lweyi a va nyikaka lona.+
ה [He]
5 Lava a va tolovela ku dla swakudla swa xiyimu xa le henhla va yetlela ni ndlala aswitaratwini.+
Lava nga kula na va yambala mpahla ya ku durha*+ va handzela tindhawu leti ku dibiwaka chaka.
ו [Vawu]
6 Ku khatisiwa* ka vanhu va mina i kukulu ku tlula ku khatisiwa ka doropa la Sodoma hi mhaka ya xidjoho xa lona,+
Doropa leli nga helisiwa hi nkamanyana, naswona a ku vanga ni munhu lweyi a nga li pfuna.+
ז [Zayini]
7 Vanaziri va yena+ a va tenge ku tlula gamboko,* va basa ku tlula leiti.
A va pshuke ku tlula tikorali;* a va fana ni maribye ya lisima lawa ma vitaniwaka safira lawa ma nga phatimisiwa.
ח [Heti]
8 I va ntima ku tlula ni nsita;*
A va ha tiviwi aswitaratwini.
Tinyama ta vona ti khwanyalile ti namarhela marhambu;+ ti fana ni tihunyi ta ku woma.
ט [Teti]
9 Va yampsa lava nga dlayiwa hi xipada ku tlula lava nga dlayiwa hi ndlala,+
Hikusa va hela matimba, va tlhaviwa hi xipada hileswi ku kalaka ku nga na swakudla masin’wini.
י [Iyodi]
10 Mavoko ya vavasati lava nga ni ntwelawusiwana ma sweke vana va vona.+
Va ve swakudla swa vona swa xirilo hi nkama wa ku wa ka vanhu va mina.*+
כ [Kafi]
11 Yehovha a kombise ku kwata ka yena;
A chulule ku kwata ka yena kakukulu.+
A tlhavike ndzilu aSiyoni lowu hisaka masungulo* ya yena.+
ל [Lamedi]
12 Tihosi ta misava ni hinkwavu lava tshamaka misaveni a va kholwanga
Swaku nala a ta nghena ka tinyanghwa ta Yerusalema.+
מ [Memi]
13 Leswo swi yendleke hi mhaka ya swidjoho swa vaprofeta va yena, swihoxo swa vaprista va yena,+
Lava nga halata ngati ya vanhu va ku lulama xikarhi ka yena.+
נ [Nuni]
14 Va pepetsekile switaratwini ku fana ni vanhu lava nga fa matihlo.+
Va yo tala hi ngati,+
Lakakuva a ku na munhu lweyi a kotaka ku khumba mpahla ya vona.
ס [Sameki]
15 Vanhu va va hlongola va ku: “Sukani! Mi chakile! Sukani! Sukani! Mi nga hi khumbi!”
Hikusa vo pepetseka, a va ha na makaya.
Vanhu va matiko va te: “A va nge tshami na hina lani.*+
פ [Pe]
16 Yehovha a va hangalasile;+
A nge he va tsakeli.
Vanhu a va nge he va hloniphi vaprista,+ a va nga ha ta va ni mhaka ni madoda.”+
ע [Ayini]
17 Matihlo ya hina ma karhalile hi ku nyimela ku pfuniwa kambe a hi pfuniwanga.+
Hi lavetele ku pfuniwa ka tiko la ku a li nga ta hi ponisa.+
צ [Tsadi]
18 Valala va hina va hi hlotile+ hi za hi tsandzeka ni ku famba switaratwini.
Hi le kusuhi ni ku helisiwa; masiku ya hina ma helile hikusa magamu ya hina ma fikile.
ק [Kofi]
19 Lava hi txatxaka a va tsutsuma ngopfu ku tlula ni magama.*+
Va hi txatxile ka tintshava; va hi tumbelelile amananga.
ר [Rexi]
20 Lweyi hi hanyaka hi mhaka ya yena, lweyi a nga langiwa hi Yehovha,+ a pfaleliwe ka mugodi wa vona wawukulu,+
Lweyi hi nga vulavula hi yena hi ku: “Hi ta tshama ka ndzhuti wa yena xikarhi ka matiko.”
ש [Sini]
21 Banani minkulungwani mi tsaka, n’wina vanhu va Edomu,*+ lava tshamaka ka tiko la Uza.
Kambe kopo yi ta hundzisiwa ni ka n’wina,+ mi ta dakwa mi famba na mi nga yambalanga nchumu.+
ת [Tawu]
22 N’wina lava tshamaka Siyoni,* mi hetile ku hakela xihoxo xa n’wina.
Xikwembu a xi nge he tlheli xi mi yisa wukaraweni.+
Kambe xi ta ba n’wina vanhu va le Edomu* hi mhaka ya xihoxo xa n’wina.
Xi ta kombisa swidjoho swa n’wina.+
5 Yehovha, khumbuka leswi nga hi humelela.
Txuvuka u vona tingana ta hina.+
2 Tshomba la hina li nyikiwe vanhu va ku kala hi nga va tivi, tiyindlo ta hina ti nyikiwe vanhu lava taka hi ka matiko man’wani.+
3 Hi ve vana lava kalaka va nga na vapapayi; vamamani va hina va fana ni vavasati lava nga feliwa hi vavanuna.+
4 Hi boheka ku xava mati ya ku phuza+ ni tihunyi.
5 Lava hi txatxaka va kusuhi ni ku hi khoma;
Hi karhalile kambe a va hi humuti.+
6 Hi tshembe tiko la Gibita+ ni la Asiriya+ swaku hi kuma pawu leli nga ta hi yenela swaku hi dla.
7 Vavhovho va hina lava nga djoha a va ha li kona, kambe hina hi fanele hi hakela nandzu wa swihoxo swa vona.
8 Swoswi hi fumiwa hi switirhi; a ku na munhu lweyi a hi ponisaka ka swona.
9 Hi veka wutomi la hina nghozini swaku hi kuma pawu,+ hi mhaka ya masonchwa lawa ma nga amananga.
10 Xikhumba xa hina xi hisa ku fana ni xitiko xa ndzilu hi mhaka ya ku biwa hi ndlala swinene.+
11 Va pfinye vavasati va le Siyoni ni tintombhi* leti nga ka madoropa ya Yuda.+
12 Varhangeli va hayekiwe hi voko la vona+ naswona madoda a ma ha hloniphiwi.+
13 Madjaha ma rhwala ribye la ku sila naswona vafana va wile hi mhaka ya ku rhwala tihunyi ta ku tika.
14 Madoda a ma ha li kona ka tinyanghwa ta doropa;+ madjaha a ma ha chayi mamuzika ya wona.+
15 Timbilu ta hina a ta ha tsakanga; ku txina ka hina ku txintxe ku va xirilo.+
16 Harhi* yi wile ka nhloko ya hina. Khombo ka hina hikusa hi djohile!
17 Timbilu ta hina ta vava hi mhaka ya leswi,+
Ni matihlo ya hina a ma ha voni kahle hi mhaka ya swilo leswi,+
18 Leswi Ntshava ya Siyoni yi nga hohloka;*+ timbyana ta khwati* ti rhendzelekela kona.
19 Yehovha Xikwembu xa mina, u tshama ka xitshamu xa wuhosi hi nkama wa ku kala wu nga heli.
Wuhosi la wena a li heli.+
20 Hi mhaka muni u hi khohlwa swa wugamu naswona u hi tshika nkama wa ku leha swinene?+
21 Yehovha Xikwembu xa mina, hi tlheliseli ka wena, kutani hi ta tlhelela ka wena hi ku hantlisa.+
Tlhela u hi tisela masiku ya ku tsakisa ku fana ni lawa hi nga tshama hi va na wona.+
22 Kambe u hi txukumete swa wugamu.
U hi kwatele ngopfu.+
Tindzima 1 ku ya ka 4 i swirilo leswi nga tsaliwa hi ku ya hi maletra ya Xiheberu.
Hi Xiheberu: “Ntombhi”.
Kumbe: “veados”.
Hi Xiheberu: “hleka”.
Lani doropa la Yerusalema li fanisiwa ni munhu.
Kumbe: “djoko; jugo”.
Hi Xiheberu: “ntombhi ya Yuda”.
Hi Xiheberu: “marhumbu”.
Hi Xiheberu: “ntombhi”.
Kumbe: “matimba”.
Kumbe: “swihondzo; switezi”.
Hi Xiheberu: “swivono.”
Ku nga tintombhi ta ku kala ti nga se famba masangu.
Hi Xiheberu: “marhumbu”.
Hi Xiheberu: “Xivindzi xa mina xi chululiwa misaveni”.
Hi Xiheberu: “ntombhi ya vanhu va mina”. Kumbexana i marito ya ku kombisa ntwelawusiwana.
Kumbe: “hlalaka”.
Hi Xiheberu: “swivono”.
Hi Xiheberu: “ntombhi ya Yerusalema”.
Hi Xiheberu: “limhondzo”.
Kumbe: “bere”.
Kumbe: “flexa.”
Ku nga xipaxtani xa ku peta mimpaxwa.
Kumbe: “kara la”.
Kumbe: “nomo wa yena wu khumba wuthulu.”
Hi Xiheberu: “munhu lweyi a hanyaka”.
Hi Xiheberu: “ntombhi ya vanhu va mina.”
Hi Xiheberu: “tintombhi”.
Hi Xiheberu: “lomu tindlela ti tlhanganaka kona.”
Lani ku vulavuliwa hi timhungubye.
Hi Xiheberu: “ntombhi ya vanhu va mina”.
Kumbe: “avestruzes”.
Hi Xiheberu: “Lava nga kulisiwa na va yambala mpahla ya ku pshuka”.
Hi Xiheberu: “Xihoxo”.
Kumbe: “neve”. I minchumu ya ku basa yi ku baa ku fana ni jelu.
Vona Ntlhamuselo.
I swilo swa ntima leswi namarhelaka ka panela nkama yi pshaka hi ximusi.
Hi Xiheberu: “ntombhi ya vanhu va mina.”
Kumbe: “fundação”.
Kumbe: “A va nge vi switranjeru lani.”
Ku nga muxaka wa xinyanyani.
Hi Xiheberu: “ntombhi ya Edomu”.
Hi Xiheberu: “ntombhi ya Siyoni”.
Hi Xiheberu: “ntombhi ya le Edomu”.
Ku nga tintombhi ta ku kala ti nga se famba masangu.
Kumbe: “Korowa”.
Kumbe: “rhumbi.”
Lani ku vulavuliwa hi timhungubye.