XIDJONDZO 21

I Yini Betele?

Timboni ta Yehovha timbirhi ti tirha ka Departamentu la Kudezenyara aBetele — Departamentu ya Kudezenyara, le Amerika

Mboni ya Yehovha yi tirha ka kuyimprimira le Betele la Alemanha — Alemanha

Mboni ya Yehovha yi tirha ka kuhlampsa le Betele la Quênia — Quênia

Timboni ta Yehovha leti tirhelaka lomu kudleliwaka kona ti lulamisela maparatu le Betele la Colômbia — Colômbia

Betele i vito la Xiheberu leli vulaka “Yindlo ya Xikwembu.” (Genesa 28:17, 19) Vito leli, la fanela kuva li tlhamusela miyaku ya Timboni ta Yehovha amisaveni hinkwayu. Ka miyaku leyi, kululamiseliwa ntirho wa kuchumayela ni kuseketela leswi yendliwaka ka wona. A Ntlawa Lowu Rhangelaka wu tirha ka Betele la Amerika le Nova York, EUA. Hi kolanu wu vonelelaka mintirho leyi yendliwaka ka mabetele ya tindhawu ta ku hambanahambana. Lava tirhaka Betele va yendla swilo tani hi ndjangu: va hanya xikan’we, va tirha xikan’we, va dla xikan’we va tlhela va djondza Bibele xikan’we. Hi leswo swi yendlaka va tiviwa tani hi “Ndjangu wa Betele.” — Tipisalema 133:1.

I ndhawu ya kuhlawuleka lomu vanhu va tirhaka kona hi kuswi rhandza. A vavanuna ni vavasati lavanga Vakreste lava tirhaka Betele, i vanhu lava nyiketeleke wutomi la vona leswaku va yendla kurhandza ka Xikwembu ni kurhangisa swilaveko swa Mfumu ka wutomi la vona hinkwalu. (Matewu 6:33) Aku na lweyi a holeliwaka hi ntirho lowu awu yendlaka, kambe hinkwavu va nyikiwa ndhawu ya kuyetlela, swakudla ni swimalana nyana leswaku switava pfuna ka swilaveko swa vona. Mun’wana ni mun’wana a ni ntirho lowu awu yendlaka. Van’wana va tirha kozinya, xikritoriyu, ka ndhawu ya kudlela ka yona, ka michini ya kuyendla mabuku, ka kukadernara mabuku, ka kuhlampsa mpahla, ka kulunghisa swilo kumbe ka swin’wana.

I ndhawu leyi kutirhiwaka swinene leswaku kuseketeliwa ntirho wa kuchumayela mahungu ya Mfumu. A xikongomelo xaxikulu xa Betele lin’wana ni lin’wana, i kuyendla leswaku ntiyiso wa Bibele wu fikelela vanhu va kutala hilaha swinga kotekaka hi kona. Broxura leli i xikombiso xa swoleswo. Lavanga yendla lona ava kongomisiwa hi Ntlawa Lowu Rhangelaka. Loko vali hetile, va game vali rhumela hi komputadori ka mintlawa ya kutala leyi hundzuluxelaka amisaveni hinkwayu. Kutani li gama li imprimiriwa ka michini ya kutsutsuma swinene ya Betele, se li gama li rhumeliwa ka mabandla ya tlula 120.000. Ka ntirho wun’wana ni wun’wana wa kuyendla buku la kukarhi, a ndjangu wa Betele wu pfuneta hintamu ka ntirho wa xihantla swinene wa kuchumayela mahungu ya kutsakisa. — Marka 13:10.

I vamani lava tirhaka Betele naswona va hlayisisiwa kuyini?
Hi wihi ntirho wa xihantla swinene lowu seketeliwaka hi leswi yendliwaka Betele?