Xana Minawu ya Xikwembu Yihipfuna Njhani?

1. Hayini hilava kukongomisiwa hi Xikwembu?

Muvumbi wa hina atlharihile kuhitlula. Kufana ni Papayi wa lirhandzu, Yehovha wakhatala hi hina. Hambiswilitanu, angahiyendlanga hili ni wuswikoti lotikongomisa. (Yeremiya 10:23) Tani hileswi n’wana alavaka kukongomisiwa hi vapsali vakwe, na hina hilava kukongomisiwa hi Xikwembu. (Esaya 48:17, 18) Hi kutirhisa Bibele, Xikwembu xihinyika minawu leyingahi kongomisaka. Hakunene i nyiku leyi hifaneleke hiyikhensa. — Lerha 2 Timotiya 3:16.

Minawu ya Yehovha yihidjondzisa ndlela yokuma ntsaku awuton’wini swoswi ni ndlela leyi hingalikumaka ha yona wutomi lelingaheliki ankameni lowutaka. Swafanela kuva Xikwembu xihinyika nkongomisu tani hileswi kunga xona muvumbi wa hina. Loko kuli hina, hifanele hiwutlangela swinene nkongomisu wa xona wa lirhandzu naswona hiswitsakela kuhanya hi minawu ya xona. — Lerha Tipisalema 19:7, 11; Nhlavutelo 4:11.

2. Xana Ritu la Xikwembu lihi kongomisa njhani?

Mintiyisu yin’wani ya le Bibeleni yihikomba leswi Xikwembu xilavaka leswaku hiswiyendla ka swiyimu swo hambanahambana. Minawu yin’wani yitirha ntsena ka swiyimu swokarhi. (Deteronoma 22:8) Hifanele hitirhisa wuswikoti la hina loyanakanya leswaku hitwisisa leswi Xikwembu xilavaka leswaku hiswiyendla. (Swivuriso 2:10-12) Hi xikombisu, Bibele lidjondzisa leswaku wutomi i nyiku leyitaka hi ka Xikwembu. Ntiyisu lowu wungahi kongomisa loko hili ntirhweni, makaya ni loko hifambisa movha kumbe swin’wani. Hayini? Hikuva wutahipfuna kungayendli swilo leswingaha vekaka wutomi la hina kumbe la van’wani anghozini. — Lerha Mintirho 17:28.

3. Hi yihi minawu yimbirhi leyinga ya lisima kutlula hinkwayu?

Yesu avulavule hi minawu yimbirhi leyinga ya lisima swinene. Wosungula wupaluxa xikongomelonkulu xa wutomi — kunga kutiva Xikwembu, kuxirhandza ni kuxitirhela hi mbilu hinkwayu. Hifanele hiwutekela nhlokweni nawu lowu loko hiyendla swiboho awuton’wini la hina. (Swivuriso 3:6) Hinkwavu lavahanyaka hi kulandza nawu lowu, vatava vanghana va Xikwembu naswona vatakuma ntsaku wa ntiyisu ni wutomi lelingaheliki. — Lerha Matewu 22:36-38.

Nawu wa wumbirhi wungahipfuna leswaku hihanyisana hi kurhula ni vanhu van’wani. (1 Vakorinto 13:4-7) Loko hitekelela ndlela leyi Yehovha avakhomaka ha yona vanhu hitava hilandzela nawu lowu. — Lerha Matewu 7:12; 22:39, 40.

4. Xana minawu ya Xikwembu yihipfuna njhani?

Minawu ya Xikwembu yidjondzisa ndlela leyi lirhandzu lingayendlaka leswaku mindjangu yihanyisana hi kurhula. (Vakolosa 3:12-14) Ritu la Xikwembu litlhela lisirhelela mindjangu hi nawu lowu kombisaka leswaku — nuna na nsati vafanele vatshama xikan’we wutomi la vona hinkwalu. — Lerha Genesa 2:24.

Hi kulandzela minawu ya le Bibeleni hingaswikota kuwuyendla kahle ntirhu wa hina wotihanyisa ni kuva ni kurhula ka le mbilwini. Hi xikombisu, vanhu varhandza kuthola vatirhi lavahanyaka hi minawu ya Bibele yo tani hi kutshembeka ni kutirha hi matimba. (Swivuriso 10:4, 26; Vaheveru 13:18) Nakambe Ritu la Xikwembu lihidjondzisa leswaku hifanele hiyeneliseka hi swilo leswi hinga na swona, naswona hiteka wuxaka la hina ni Xikwembu lili la lisima kutlula swilo leswivonekaka. — Lerha Matewu 6:24, 25, 33; 1 Timotiya 6:8-10.

Loko hiyingisa minawu ya Bibele, hitasirhelela wutomi la hina. (Swivuriso 14:30; 22:24, 25) Hi xikombisu, loko hiyingisa nawu wa Xikwembu lowutsimbisaka kudakwa, hitatisirhelela ka mavabyi lamadlayaka ni timhangu. (Swivuriso 23:20) Yehovha angatsimbisi kuphuza byala kambe anyenya kuliphuza kutlula mpimu. (Tipisalema 104:15; 1 Vakorinto 6:10) Minawu ya Xikwembu leyihi basopisaka ka swiyendlo ni miyanakanyu yobiha yahivuyelisa. (Tipisalema 119:97-100) Hambiswilitanu, Vakreste va ntiyisu avayingisi minawu ya Xikwembu leswaku vatavuyeliwa ntsena, kambe vayendla sweswo leswaku vavangamisa Yehovha. — Lerha Matewu 5:14-16.