Karta La Ntlawa Lowu Rhangelaka

Vamakwerhu Lava Rhandzekaka:

Ku rhandza Xikwembu ni vanhu swi hi yendla hi ‘famba hi ya djondzisa vanhu va matiko hinkwawu leswaku va va vadjondzisiwa . . . hi va tsakamisa’. (Mat. 28:19, 20; Mar. 12:28-31) Lirhandzu la ntiyiso li ni matimba, li nga khumba timbilu ta vanhu lava kombisaka “swaku va lava ku kuma wutomi la ku kala li nga heli”. — Min. 13:48.

A khale a hi zama ku vekisa leswi hi nga ma sungulisaka xiswona mabulu hi tlhela hi siyela vanhu mabuku. Kambe swoswi hi zama ku yampsisa ndlela leyi hi bulaka hi yona ni vanhu. Hi lava ku va komba swaku ha va rhandza hi ku vulavula na vona hi swilo leswi vona va swi rhandzaka. Leswo swi vula swaku hi fanele hi titwananisa ni swiyimu hi tlhela hi kambisisa kahle swilo leswi karhataka munhu lweyi hi bulaka na yena ni leswi a swi rhandzaka. Se broxura leli li ta hi pfunisa ku yini swaku hi yendla leswo?

Broxura leli li ni 12 wa tidjondzo leti vulavulaka hi wumunhu leli lavekaka swaku hi kota ku kombisa lirhandzu ni ku pfuna vanhu swaku va va vadjondzisiwa. Djondzo yin’wani ni yin’wani yi susiwe ka Bibele naswona yi vulavula hi leswi Yesu kumbe munhu mun’wani wa nkama wa vapostolo a nga swi yendla swaku a djondzisa kahle ka ntirho wa ku chumayela. Xikongomelo xa hina a hi ku vekisa kumbe ku dekorara leswi hi nga ma sungulisaka xiswona mabulu, kambe i ku vona leswi hi nga swi yendlaka swaku hi kombisa lirhandzu ka vanhu. Hambileswi wumunhu hinkwalu leli hi nga ta djondza hi lona li lavekaka ka ntirho wa ku chumayela, hi ta vona wumunhu leli lavekaka hintamu loko hi sungula mabulu, loko hi yendla marevhizita ni loko hi fambisa tidjondzo ta Bibele.

Ka djondzo yin’wani ni yin’wani, pimisa kahle hi leswi u nga swi yendlaka swaku u kombisa wumunhu leli u djondzaka hi lona nkama u vulavulaka ni vanhu va lomu u tshamaka kona. Zama hinkwaswu swaku u tiyisa lirhandzu leli u nga na lona hi Yehovha ni hi vanhu. Ku tlula xin’wani ni xin’wani lexi u nga xi yendlaka, lirhandzu hi lona li nga ta ku pfuna swaku u kota ku pfuna vanhu va va vadjondzisiwa.

I nkateko wawukulu ka hina ku tirha xikan’we na wena. (Sof. 3:9) Hi navela swaku Yehovha a ku katekisa nkama lowu u tamaka u rhandza vanhu u tlhela u va pfuna swaku va va vadjondzisiwa!