A ni nga humi hi kaya na ni nga na xibamu

WUTOMI LA MINA LA KHALE:

Ni psaliwe ni tlhela ni kulisiwa aRoma ka ndhawu leyi a yi nga hlayisekanga, naswona a ku tshama swisiwana leswi a swi yentxa mintirho leyi a yi voniwa na yi nga li ya nchumu. Wutomi a li karhata. A ni zanga hi ku mu tiva mamana wa mina, naswona mina na papayi a hi nga twani. Ni kulile na ni hanya a switaratwini.

Nkama a ni ni 10 wa malembe se a ni yiva, se loko ni yentxe 12 wa malembe ni suki hi kaya. Minkama ya yinyingi papayi a a famba a ya ni teka djele. Minkama hinkwayu a ni holova ni vanhu, a ni li xigevenga naswona a ni kwatela vanhu hinkwavu. Nkama na ni ni 14 wa malembe ni suki hi kaya naswona a na ha zanga ni tlhela. Ni sungule ku dzaha timbangi ni ku hanya switaratwini. Leswi a ni nga na ndhawu ya ku yetlela kona, a ni gwandza mimovha swaku ni ta kota ku yetlela ka yona. Loko ni pfuka a ni hlamba ka mpompi wun’wana ni wun’wana lowu a ni wu kuma.

Ni game ni va muyivi wa mukulu, a ni yiva ka mapaxta ya vanhu, ka maprediyu ni ka miminti niwusiku. Loko se ni sungule ku va ni ndhuma va ni rhambile swaku ni rhangela swigevenga swin’wana leswi a swi yiva a mabanku. A va ni hlonipha hileswi a ni li munhu wa ku karhata. Mina a ni nga suki ni nga li na xona xibamu xa mina funtshi a ni yetlela na xona hansi ka xidamu. Wutomi la mina a ku li wugevenga, ku dzaha, ku yiva, mavulavulelo ya ku biha ni mahanyelo ya ku biha. Maphoyisa a ma tshamela ku ni lavetela nkama hinkwawu. Minkama ya yinyingi a ma ni khoma ma ni yisa djele naswona ni hete malembe ya mayingi na ni tshamela ku nghena djele na ni huma.

BIBELE LI LI TXINTXISE KU YINI WUTOMI LA MINA:

Siku lin’wana loko ni hume djele, ni ye ni ya pfuxela titiya wa mina. Phela a ni nga se swi tiva swaku yena ni va primu va mina se i Timboni ta Yehovha. Va ni rhambile swaku ni ya ka mintlhanganu ya Timboni. Ni fambe na vona, loko se hi fikile ka Yindlu ya Wugandzeli ni lave ku tshama kusuhi ni nyangwha leswaku ni ta vona hinkwavu lava a va nghena na va huma. Phela a ni nga xi siyanga xibamu xa mina.

Ntlhanganu lowu wu txintxe wutomi la mina. Ni titwe ingaku no va ka misava yin’wana. Vanhu a va ni xoweta hi lirhandzu na va hlekelela, a ni nge swi khohlwi leswo a swi hambane hintamu ni leswi a ni swi tolovelile.

Ni sungule ku djondza Bibele ni Timboni. Loko ni ya ni djondza a ni swi vona swaku ni fanele ni txintxa mahanyelo ya mina. Ni ma vonile ma li ya lisima marito ya Swivuriso 13:20 la ma nge: “Lweyi a fambaka ni va ku tlhariha a ta tlhariha kambe lweyi a tirhisanaka ni swiphunta swi ta mu fambela ku biha.” Ni swi vonile swaku a ni fanele ni tihambanisa ni ntlawa lowuyani wa swigevenga. Leswo a swi nga wolovi kambe Yehovha a ni pfunile ni swi kotile.

Ni tlhele ni basisa ni mirhi wa mina. Hi mizamu ya yikulu, ni tshike ku dzaha masigari ni mbangi. Ni tseme misisi ya mina leyi a yi li yikulu, ni susa switlan’wani ni tlhela ni tshika ku vulavula marito ya ku biha. Hi khambi la ku sungula ka wutomi la mina se a ni swi kota ku tikhoma.

A ni nga se tshama ni swi rhandza ku lerha ni ku djondza, hi mhaka leyo swi ni karhatelile ku sungula ku dondza Bibele kambe ni yentxe mizamu ya yikulu. Hi kutsongokutsongo ni sungule ku rhandza Yehovha naswona swin’wana swi txintxile a ndzeni ka mina lipfalo la mina li sungule ku tirha. Minkama yin’wana a ni titwa nandzu naswona a ni pimisa swaku Yehovha a nga ta ni rivalela hi mhaka ya minchumu ya ku biha leyi ni nga yi yentxa khale. Ka minkama yoleyo swi ni pfune hintamu ku lerha swaku Yehovha a rivalele hosi Davhida nkama anga yentxa swidjoho swa swikulu. — 2 Samuwele 11:1–12:13.

Xikarhatu xin’wana a ku li ku vulavula hi lipfumelo la mina hi munti ni munti. (Matewu 28:19, 20) Nawona a ni chava ku kumana ni munhu lweyi ni nga tshama ni mu yentxela swa ku biha. Kambe hi kutsongokutsongo ni ye ni hlula ku chava loku a ni li na kona. Ni sungule ku va ni ku tsaka ka ntiyiso hi ku pfuna vanhu ku djondza hi papayi wa hina Yehovha lweyi a nga matilweni naswona a rivalelanaka.

NI PFUNEKISE KU YINI:

Ku djondza hi Yehovha swi ponise wutomi la mina! Vanhu van’wana lava a ni tlanga na vona va file kumbe va le djele kambe mina ni ni wutomi la ku tsakisa swoswi naswona ni ta tsaka ni ka nkama lowu taka. Ni djondze ku tiveka hansi, ku yingisa ni ku tikhoma. Leswo swi ni pfunile ku twanana ni vanhu. Ni tsakile ni nsati wa mina wa ku xonga Carmen, naswona ha tsaka hi leswi hi pfunaka vanhu van’wana ku djondza Bibele.

Phela se na tshembeka ka ntirho wa mina, hambileswi swi lavaka ni nghena mabanku a na ha yeli ku ya yiva nho yela ku ya basisa ntsena!