MAHANYELO YA HINA VAKRESTE

Pfuna Lweyi U Djondzaka Na Yena Swaku A Tiyisa Lipfumelo La Yena Ka Yehovha Na Yesu Hi Ku Tirhisa Buku Leli Nge: Tikhorisi Hi Wutomi La Ku Kala Li Nga Heli

Leswaku vanhu lava hi djondzaka na vona Bibele va tsakisa Yehovha, va fanele va tiyisa lipfumelo la vona. (Heb 11:6) Phela hi nga va pfuna ku yentxa leswo hi ku tirhisa buku leli nge: Tikhorisi Hi Wutomi La Ku Kala Li Nga Heli. Buku leli li ni tindzimana leti baka pontu, swivutiso leswi pfunaka lweyi hi djondzaka na yena swaku a pimisa, mavhidiyo ni mafoto ya ku xonga. Loko lava hi djondzaka na vona Bibele va va ni wumunhu la linene va tlhela va va vanghanu va Yehovha, hi ta va hi yaka lipfumelo la vona hi swilo leswi kalaka swi nga pshi. — 1Ko 3:12-15.

Vanhu van’wana swa va karhatela ku kholwa swaku va nga va vanghanu va Xikwembu hileswi va kalaka va nga xi voni. Hi mhaka leyo hi fanele hi pfuna lava hi djondzaka na vona Bibele swaku va tiva Yehovha va tlhela va mu tshemba.

SIXTIRA VHIDIYO LELI NGE TIYISA LIPFUMELO LA VAN’WANA KA YEHOVHA HI KU TIRHISA BUKU LELI NGE: “TIKHORISI HI WUTOMI LA KU KALA LI NGA HELI,” U GAMA U HLAMULA SWIVUTISO LESWI:

Hi swi tivisa ku yini swaku makwerhu a a lunghiselele kahle swaku a ya djondza Bibele ni munhu mun’wana?
Makwerhu a swi tirhisise ku yini swivutiso hi ndlela ya yinene kuva a twisisa swaku lweyi a djondzaka na yena Bibele a a titwisa ku yini hi marito lawa ma nga ka Esaya 41:10, 13?
A vhidiyo ni tindzimana ta Bibele swi mu pfunise ku yini lweyi a a djondza na yena?

Vanhu va vanyingi a va swi twisisi swaku nkutsulu i yini naswona a va wu voni wu li nchumu wa lisima lowu taka hi ka Xikwembu. (Ga 2:20) Hi mhaka leyo, swi lava hi va pfuna swaku va va ni lipfumelo ka lifu la Yesu.

SIXTIRA VHIDIYO LELI NGE TIYISA LIPFUMELO LA VAN’WANA KA YESU HI KU TIRHISA BUKU LELI NGE: “TIKHORISI HI WUTOMI LA KU KALA LI NGA HELI,” U GAMA U HLAMULA SWIVUTISO LESWI:

Hi swi tivisa ku yini swaku makwerhu a a lunghiselele kahle swaku a ya djondza Bibele ni munhu mun’wana?
Makwerhu a yi tirhisise ku yini ndhawu leyi nge: “Loko U Lava Ku Tiva Swin’wana” hi ku ya hi xiyimu xa leweyi a a mu djondzisa?
Hi mhaka muni swi li swa lisima ku khongela ni lava hi djondzaka na vona Bibele?