Leswi Van’wana Vaswi Kholwaka

Vabaniyana

va kholwa swaku munhu a hlupheka hi mhaka swilo swa kubiha leswi angaswi yendla ka wutomi leli kumbe ka wutomi lin’wana. Va tlhela va kholwa swaku munhu anga nyima kuhlupheka loko a fikelela xiyimu lexi vuliwaka mocsa leswi vulaka swaku loko a fa angahata tlhela a psaliwa leswaku a hakela swidjoho swa yena swa khale. Ka xiyimu lexo miyanakanyu ya yena ayaha pimisi hi swilo swa misava.

Vasurumani

va kholwa swaku loko munhu a hlupheka o khatisiwa hi mhaka swidjoho swa yena naswona o kambiwa lipfumelo. Sayyid Syeed murhangeli wa ntlhanganu wa vasurumani wa América do Norte a te: “Minchumu ya kubiha leyi yihi yendlekelaka yihi khumbukisa swaku hi fanele hi khensa Xikwembu hi swilo swaswinene leswi xihi yendlelaka swona ni leswaku hi fanele hi pfuna swisiwana.”

Vayuda

va kholwa swaku munhu a hlupheka hi mhaka swidjoho swa yena. Vayuda van’wana va vula swaku vafi vata pfuxiwa. Se lavanga hlupheka na vanga na nandzu vata katekisiwa. Vayuda van’wana va djondzisa swaku loko munhu a fa, a tlhela a psaliwa. Nakambe, leswi nyikaka munhu mukhandlu wa kululamisa swidjoho leswi angaswi yendla na angase fa.

Mabuda

ma kholwa swaku loko munhu lweyi a yendlaka swa kubiha a fa, a tlhela a psaliwa na a li munhu mun’wanyana. Kutani loko a tama a yendla swa kubiha a tlhela a fa, a gama a psaliwa na a li munhu mun’wanyana anze a tshika kuyendla swilo swa kubiha. Ma tlhela ma kholwa swaku loko munhu a ni wutivi, mimpimiso yayinene a tlhela a yendla mintirho yayinene, anga fikelela xiyimu xa kukala angaha hlupheki.

Vaseketeli va Konfusiyu

buku lin’wana leli vulavulaka hi wukhongeli li tlhamusela swaku vaseketeli va Konfusiyu va kholwa swaku vanhu va talisa kuhlupheka hi mhaka ya swihoxo swa vona ni leswi va kalaka vangaswi koti kutiyendlela swa swinene. Vaseketeli va Konfusiyu va kholwa swaku loko munhu a ni mahanyela yamanene, kuhlupheka ka yena kunga pumbeka kambe “lexinga helisaka kuhlupheka hinkwaku i swikwembu swa vona. A xa munhu i kuyamukela leswi swikwembu swa yena swi lavaka swona.”

Kukhongela va kokwana

vanhu van’wana va kholwa swaku va hlupheka hi mhaka ya kuloyiwa. Hikuya hi vona, a swikwembu swingava tisela tindjombo kumbe swiva tisela makhombo naswona leswaku swikwembu leswi swi tsaka, va fanele va phahla. Va kholwa swaku loko va vabya vayo loyiwa kutani va ya tinyangeni leswaku va hanya.

Vakreste

va kholwa swaku hi hlupheka hi mhaka ya xidjoho xa vanhu va kusungula hilani swinga tsaliwa hakona ka buku la Genesa. Kambe tikereke tin’wana tayi txintxanyana djondzo leyi. Van’wana lava khongelaka Katolika va kholwa swaku ‘vanga nyikela kuhlupheka ka vona ka Xikwembu’ leswaku kupfuneka kereke kumbe vanhu van’wana.