Lisima La Ku Tiva Swaku Ku Ni Lweyi A Nga Yendla Swilo Hinkwaswu

Hi mhaka muni swi li swa lisima ku tiva swaku ku ni Lweyi a nga yendla swilo hinkwaswu? Loko u tiyiseka swaku hikakunene ku ni Xikwembu xa matimba hinkwawu swi ta ku yendla u lava ku kambela swilo leswi kombisaka leswaku a Bibele li ta hi ka xona. Naswona ku kholwa ka leswi Bibele li swi vulaka swi nga ku pfuna hi tindlela leti landzelaka.

U ta va ni wutomi la ku tsakisa

BIBELE LI LI: “[Xikwembu] xi mi kombe swaku i Xikwembu xa ku tshamisa ku yini hi ku mi yendlela swaswinene, xi mi nisela timpfula ni ku mi nyika minkama ya ku tshovela, xi mi phamela mi xurha ni ku tsakisa timbilu ta n’wina.” — Mintirho 14:17.

SWI VULA YINI LESWO: Phela swilo hinkwaswu swaswinene leswi nga kona lani misaveni swi ta hi ka Xikwembu. Loko u tsumbula swaku swilo hinkwaswu leswo swaswinene swi ta hi ka Xikwembu lexi nga ni mhaka na wena swi ta ku yendla u xi tlangela swinene.

U ta kuma switsundzuxu swa kahle

BIBELE LI LI: “U ta twisisa swa ku lulama ni swaswinene, ndlela hinkwayu ya swaswinene.” — Swivuriso 2:9.

SWI VULA YINI LESWO: Xikwembu hi xona xi nga ku yendla hi mhaka leyo xa swi tiva leswi swi lavekaka leswaku u tsaka. Loko u djondza Bibele u ta kuma swilo swa swinyingi leswi nga ta ku pfuna ka wutomi la wena.

U ta kuma tinhlamulu ta swivutiso leswi u nga ha vaka na swona

BIBELE LI LI: “U ta va ni wutivi la Xikwembu.” — Swivuriso 2:5.

SWI VULA YINI LESWO: Ku tiva swaku ku ni Lweyi a nga yendla swilo hinkwaswu swi ta ku pfuna leswaku u kuma tinhlamulu ta swivutiso swa lisima swinene, swa ku fana ni leswi: Kasi hi hanyela yini? Hi mhaka muni vanhu va hlupheka? Ku yendleka yini hi hina loko hi fa? Phela tinhlamulu ta swivutiso leswo ta kumeka ka Bibele.

U ta va ni ntshembo

BIBELE LI LI: “‘Hikusa ni swi tiva kahle leswi ni swi pimisaka hi n’wina,’ ku vula Yehovha, ‘ni lava swaku mi va ni ku rhula ku nga li khombo, swaku swi mi fambela kahle ka nkama lowu taka ni tlhela ni mi nyika ni ntshembo.’” — Yeremiya 29:11.

SWI VULA YINI LESWO: Xikwembu xi tshembisa swaku xi ta helisa wubihi, ku hlupheka ni lifu. Ku tiva leswo swi nga ku tiyisa leswaku u kota ku hlula swikarhatu swa siku ni siku.

Leswi vanhu van’wani va nga pfunekisa xiswona hi ku kholwa swaku ku ni lweyi a nga yendla swilo hinkwaswu

“Siku ni siku swa ni hlamalisa ku vona ndlela leyi Xikwembu xi hi pfunaka hi yona ka swiyimu hinkwaswu swa wutomi la hina. Phela xa hi pfuna ku tiva leswi swi nga swa lisima ka wutomi xi tlhela xi hi pfuna hi leswi hi nga swi yendlaka swaku hi hanyisana kahle ni vanhu van’wani ni leswi hi nga swi yendlaka swaku hi va vanghanu va xona.” — Cyndi wa le Estados Unidos.

“Ku kholwa swaku ku ni Lweyi a nga yendla swilo hinkwaswu swi yendla leswaku wutomi la mina li tsakisa ni tlhela ni swi tiva swaku ni hanyela yini. Leswi ni kholwaka ka Xikwembu ni tshama na ni ni swa swinyingi swa ku swi djondza hi xona, swilo leswi xi nga swi yendla ni Rito la xona ku nga Bibele, leswo swi yendla swaku ni tshama na ni tsakile.” — Elise wa le França.

“Ku tirhisa leswi Xikwembu xi hi djondzisaka swona ka Bibele, swi ni pfunile leswaku ni tsaka. Swi tlhele swi ni pfuna swaku ni nga rhandzi ku solasola van’wani kambe ni va pimisela, ni tlhela ni tsaka hi leswi ni nga na swona. Phela Bibele li ni pfune leswaku ni va papayi wamunene.” — Peter wa le Holanda.

“A khale a wutomi la mina a ku li ku dla, ku yetlela naswona a ni nga swi koti ku fika hi nkama antirhweni. Phela a no hanya ntsena kambe a ni nga ku twi ku tsakisa ka wutomi! Swoswi ni vona wutomi na ku li nchumu wa ku tsakisa lowu taka hi ka Xikwembu naswona hi fanele hi wu nyika lisima.” — Liz wa le Estônia.

“Ni munhu wa ku vilela hintamu. Kambe ku tiva leswaku wubihi, ku pfumaleka ka wululami ni ku hlupheka swi ta helisiwa swi ni pfuna hintamu leswaku ni swi kota ku tiyisela.” — Adrien wa le França.