MISAVA LEYI NGA TALA HI SWIKARHATU

2 | Yi Tirhisi Kahle Male Ya Wena

HI MHAKA MUNI SWI LI SWA LISIMA

Vanhu va vanyingi swi lava swaku va tirha hintamu swaku va kuma leswi lavekaka swaku va kota ku hanya. Swikarhatu leswi humelelaka lani misaveni, swi yendla swaku swi karhata hambi hi ku kuma swilo leswi lavekaka swaku hi hanya. Hi mhaka muni?

Loko ku humelela swikarhatu, swilo swi ya swi dura hintamu. Swa karhata ku kuma swakudla ni ndhawu ya ku tshama.
Loko ku ni crise swi nga yendla swaku vanhu va heleliwa hi ntirho kumbe va pumbeliwa muholo.
Tinghozi ta ntumbuluku ti nga ha wonhetela switolo, tiyindlo ta vanhu ni swilo swin’wani, naswona leswo swi yendla swaku vanhu va va wusiwanini.

Leswi U Faneleke U Swi Tiva

Loko u swi kota ku yi tirhisa kahle male ya wena, u ta va u lunghekile loko u tshuka u kumana ni swikarhatu kumbe ku va ni tinghozi.
Khumbuka swaku a tshomba, muholo kumbe male leyi u nga yi veka banku, swi nga hela na u nga swi nyimelanga.
Ku ni swilo leswi male yi kalaka yi nga swi koti ku swi xava, swa ku fana ni ku tsaka ni ku twanana ndjangwini.

I Mpsini Leswi U Nga Swi Yendlaka

Bibele li li: “Kutani loko hi ni swakudla ni swa ku yambala hi ta tsaka hi swilo leswi.” — 1 Timotiya 6:8.

Phela hi ta tsaka hi ku kuma leswi hi swi lavaka swaku hi tama hi hanya ku tlula ku lwela ku lavetela leswi hi swi navelaka. Leswo i swa lisima hintamu, ngopfungopfu loko hi nga na male ya yinyingi.

Swaku hi tsaka hi leswi hi nga na swona, swi lava hi tidjondzisa ku kala hi nga xaveteli minchumu ya yinyingi ya ku dura, hikusa ku tshamela ku xavetela minchumu leyi tlulaka muholo wa hina, swi nga hi vangela swikarhatu swa swinyingi.

I MPSINI LESWI U NGA SWI YENDLAKA — Leswi Nga Ku Pfunaka

Loko ku humelela swikarhatu, swilo leswi swi nga ku pfuna kuva u yi tirhisa kahle male ya wena

PUMBA LESWI U SWI XAVAKA

Pumba leswi u swi xavaka

U nga heti male ya wena hi ku xava swilo leswi kalaka swi nga bohi. Tivutisi leswi: ‘Ku nga va swaku swa boha kuva ni xava movha? Ku nga va swaku handle ka kuva ni xava swilo swa ku fana ni matsavu, ni nga yendla nsimu lani kaya?’
Na u nga se xava nchumu tivutisi leswi: ‘Ku nga va swaku nchumu lowu wa laveka hikakunene? Ni ta swi kota ku hakela?’
Titsalisi swaku u pfuniwa hi mfumu kumbe tinhlengeletanu leti pfunaka vanhu loko ti li kona.

“Mina ni ndjangu wa mina, hi kambisise leswi hi yi tirhisisaka xiswona male. Naswona hi pumbe swilo leswi a hi hungata hi swona, leswi a swi hi hetela male ni ku nyima ku hungata hi swilo swin’wani. Hi tlhele hi sungula ku sweka swakudla swa ku kala swi nga duri.” — John.

HAMBA MAPLANU

Hamba maplanu

Bibele li li: “Maplanu ya lava tirhaka hi matimba ma pfuna hikakunene, kambe hinkwavu lava nga ni magugu va ta va swisiwana.” (Swivuriso 21:5) Ku hamba maplanu swi ta ku pfuna kuva u tiyiseka swaku leswi u swi xavaka swi fambisana ni muholo lowu u wu kumaka.

Tsala muholo wa wena wa wheti ni wheti.
Hamba lixta la swilo leswi u tolovelaka ku swi xava wheti ni wheti, u gama u kambela swaku ka swilo leswi u swi xavaka i mpsini leswi tolovelaka ku ku hetela male.
Tiyiseka swaku u na yona male ya ku yenela leswaku u xava leswi u swi lavaka, loko u vona swaku male ya wena a yi yeneli pumba swilo leswi u vonaka swaku a swi bohi leswaku u va na swona.

“Wheti ni wheti hi hamba lixta la swilo leswi hi swi xavaka ni male leyi hi holaka yona. Hi veka male swaku hi yi tirhisa ka nkama lowu taka ni yin’wanyani leyi hi nga ta yi tirhisa loko yi tshuka yi laveka swa kola na kola. Leswo swi hi pfuna ku kala hi nga karhateki hikusa hi hamba maplanu ya leswi hi nga ta yi tirhisisa xiswona.” — Carlos.

U NGA HAMBI SWIKWENETI / POPARA MALE

U nga hambi swikweneti / popara male

Hamba maplanu ya kahle ya leswi u nga swi yendlaka swaku u pumba swikweneti leswi u nga na swona, naswona loko swi koteka u nga ha txeneki.
Loko u lava ku xava nchumu, rhanga hi ku veketela male ya kona swaku u ta gama u swi kota ku xi xava. Wheti ni wheti veka male leyi u nga ta yi tirhisa ka nkama lowu taka kumbe loko yi tshuka yi laveka swa kola na kola.

TIRHA KAHLE / HLAYISA NTIRHO WA WENA

Bibele li li: “Swa pfuna ku yendla ntirho wun’wani ni wun’wani wa ku tika”. — Swivuriso 14:23.

Tirha kahle / hlayisa ntirho wa wena

Rhandza ntirho lowu u wu yendlaka. Hambiloko i nga li wona ntirho lowu a wu wu navela, ntirho wa wena wa ku pfuna swaku u tihlayisa.
Tirha kahle u tlhela u va mutirhi wa ku tshembeka. Leswo swi ta ku pfuna swaku u nga heleliwi hi ntirho kumbe hambiloko wu ku helela, swi nga ku karhateli ku kuma ntirho wun’wani.

“Mina ni yendla ntirho wun’wani ni wun’wani lowu ni wu kumaka hambiloko ni nga wu rhandzi kumbe wu hakela male yayitsongo. Ni zama ku va mutirhi wa ku tshembeka ni tlhela ni yendla ntirho wawunene ingi hi loko ni nga tirhi ka patrao kambe ni tiyendlela ntirho wa mina.” — Dmitriy.

Loko swi ku u lavetela ntirho, zama ku yendla leswi . . .

U nga tshami hi mavoko, yendla xan’wanchumu. Lavetela ntirho ka maempreza, hambi hi ka maempreza lawa ma kalaka ma nga tholi hi nkama wolowo. Byela vanghanu va wena ni maxaka ya wena swaku u lavetela ntirho.
Titwananisi ni xiyimu. Swa karhata ku kuma ntirho lowu nga ni hinkwaswu leswi u swi lavaka.