Karta La Ntlawa Lowu Rhangelaka

Muchumayeli Wa Ku Rhandzeka:

Tipimisi na u li mun’we wa vapostolo va Yesu na u li ka Ntshava ya Mawolivhera. Yesu a humelela phambheni ka wena. Na ku chota nkamanyana swaku a tlhatukela tilweni, a ku: “Mi ta yamukela matimba loko moya wa ku kwetsima wu fika henhla ka n’wina, funtshi mi ta va timboni ta mina aYerusalema ni le tikweni hinkwalu la Yudiya ni le Samariya anze amagamu ya misava.” (Min. 1:8) A wu ta titwisa ku yini?

Swi nga yendleka a wu ta chava hi mhaka ya ntirho lowu wawukulu hintamu. Swi nga yendleka a wu ta tivutisa leswi: ‘Leswi hi ngo va ntlawanyana wawutsongo wa vadjondzisiwa, hi ta swi kotisa ku yini ku chumayela “anze amagamu ya misava”?’ Naswona swi nga yendleka a wu ta khumbuka marito ya Yesu lawa a nga ma vula ka wusiku la wugamu na a nga se dlayiwa, loko a te: “Xikarawa a xi mu tluli n’winyi wa xona. Loko va ni xanisile, na n’wina va ta mi xanisa; loko va ni yingisile, na n’wina va ta mi yingisa. Kambe va ta mi yendla swilo leswi hinkwaswu hi mhaka ya vito la mina, hikusa a va mu tivi Lweyi a nga ni rhuma.” (Yoh. 15:20, 21) Loko u pimisa hi marito lawa a wu ta tshuka u tivutisa leswi: ‘Se ni ta swi kotisa ku yini ku chumayela hi ku helela na hi xanisiwa hi ndlela leyo?’

Ninamuntlha hi nga ha tivutisa swa ku fana. Leswi hi nga Timboni ta Yehovha, hi ni ntirho wa ku chumayela mahungu ya ku tsakisa hi ku helela “anze amagamu ya misava,” ka “vanhu va matiko hinkwawu”. (Mat. 28:19, 20) Se ntirho lowu wa ku chumayela mahungu ya ku tsakisa a wu ta yendlisiwa ku yini leswi hi swi tivaka swaku hi ta kanetiwa hi tlhela hi xanisiwa?

Buku la Mintirho ya vapostolo li hi byela hi swilo swa ku tsakisa mayelana ni leswi vapostolo ni Vakreste van’wani va minkama ya vapostolo va nga swi kotisa xiswona ku hetisisa ntirho wa vona hi ku pfuniwa hi Yehovha. Buku leli u li lerhaka, li yendleliwe ku ku pfuna swaku u ti kambisisa kahle timhaka leto, u tlhela u vona ku tsakisa ka swilo leswi ku vulavuliwaka hi swona ka buku la Mintirho. U ta hlamala hi ku vona swilo leswi vanhu va Yehovha va masiku lawa va fanaka hi swona ni vanhu va Yehovha va minkama ya vapostolo. U ta vona swaku swilo swoleswo leswi hi fanaka hi swona swi yelana ni ntirho lowu hi nga rhumiwa ku wu yendla, swi tlhela swi yelana ni ndlela leyi nhlengeletanu yi tirhaka hi yona swaku yi hetisisa ntirho lowu. Ku pimisa hi timhaka leti swi ta tiyisa ku tshemba ka wena ka leswaku Yehovha Xikwembu a tama a kongomisa xiyenge xa lani misaveni xa nhlengeletanu ya yena.

Hi khongelela swaku ku djondza buku la Mintirho swi ku pfuna ku tama u mu tshemba hintamu Yehovha ni matimba ya moya wa ku kwetsima. Naswona hi navela swaku leswo swi ku tiyisa leswaku u tama u nyikela “wufakazi leli tiyeke hi Mfumu wa Xikwembu” ni ku pfuna vanhu van’wani swaku va kuma ndlela ya ku ponisiwa. — Min. 28:23; 1 Tm. 4:16.