I Mani Mutirhi wa Kutshembeka ni wa Kutlhariha?

Loko kusale nkama nyana swaku Yesu a fa, a bule ni 4 wa vadjondzisiwa va yena kunga Petro, Yakobo, Yohane na Andriya. Kutani loko ali karhi a vulavula hi swikombiso swa kuvuya ka yena hi masiku ya wugamu, a yendle xivutiso xa lisima lexinge: ‘Xana i mani mutirhi lweyi a tshembekeke, ni kutlhariha, lweyi n’winyi wa yena amu vekeke kuhlayisa vatirhikulobye va munti, ava phamela swakudla hi nkarhi wakona?’ (Matewu 24:3, 45; Marka 13:3, 4) Yesu tani hi “n’winyi” wa vadjondzisiwa va yena, aava tiyisekisa swaku aata langa mutirhi swaku a phamela vadjondzisiwa va yena swakudla swa moya ka masiku ya wugamu. Se i mani mutirhi wa kona?

I ntlawa wawutsongo wa valandzeli va Yesu lavanga totiwa. A ‘mutirhi’ lweyi Yesu a vulavuleke hi yena, namuntlha a tiviwa tani hi Ntlawa Lowu Rhangelaka wa Timboni ta Yehovha. Ntlawa lowu, hi wona wu nyikelaka swakudla swa moya ka vagandzeli van’wana va Yehovha. Minkama hinkwayu hi nyimela wona swaku ‘wuhi phamela swakudla hi nkarhi wakona.’ — Luka 12:42.

Wu hlayisa vanhu va Xikwembu. (1 Timotiya 3:15) Yesu a tamelise mutirhi lweyi wutihlamuleli lalikulu la kuvonelela ntirho hinkwawu lowu yendliwaka ka nhlengeletanu ya Yehovha ya laha misaveni: kuvonelela swilo hinkwaswu swa nhlengeletanu, kukongomisa ntirho wa kuchumayela ni kuhi djondzisa hi kutirhisa mabandla. Kutani swaku ‘mutirhi lweyi a tshembekeke ni kutlhariha’ a kota kuhi phamela swakudla swa moya leswi hiswi lavaka hi nkama lowu hiswi lavaka ha wona, a tirhisa mabuku lawa hima tirhisaka ntirhweni wa kuchumayela, mintlhanganu ya bandla ni masembleya.

Mutirhi lweyi wa tshembeka ka ntiyiso ya Bibele ni ka ntirho wa kuchumayela mahungu ya kutsakisa. Naswona a hlayisa swilo swa Yesu Kreste swa laha misaveni hi wutlharhi. (Mintirho 10:42) Yehovha a katekisa ntirho wa mutirhi lweyi hi kukokela vanhu va kutala swaku va nghena ka nhlengeletanu ni kumu pfuna kuphamela swakudla swaswinyingi swa moya. — Esaya 60:22; 65:13.

• Yesu a lange mani swaku a phamela vadjondzisiwa va yena swakudla swa moya?

• I yini lexi kombisaka swaku a mutirhi lweyi a tshembekile a tlhela a tlhariha?