Lingahi Pfunisa Kuyini Bibliyoteka Lelinga ka Yindlo ya Hina ya Mfumu?

Waswi navela kukambisisa Bibele kuva u yengetela wutivi la wena? Kunga va swaku u navela kudjondza swokarhi hi ndzimana yokarhi ya Bibele, munhu wokarhi, ndhawu kumbe nchumu xa kukarhi lexi kuvulavuliwaka hi xona Bibeleni? Kumbe u tshame u tivutisa swaku kasi Bibele lingani pfunisa kuyini ka xikarhatu lexi ni kumanaka na xona? A bibliyoteka lelinga ka Yindlo ya Mfumu lingaku pfuna.

Li ni mabuku ya kahle ya kuyendla nkambisiso. Swinga yendleka unga li na wona mabuku hinkwawu ya Timboni ta Yehovha hi lirimi la wena. Kambe a bibliyoteka lelinga ka Yindlo ya Mfumu li ni mabuku yamanyingi lama humesiweke swoswi nyana. Swinga yendleka li ni maBibele ya wuhundzuluxeli la ku hambanahambana, disiyonariyu la kahle ni mabuku man’wana ya kutlhantlha kahle mhaka. Li tirhisi hilaha u lavaka hi kona loko mintlhanganu yingese sungula kumbe loko se yi helile. Loko kuli ni komputadori, swinga yendleka li ni programa la Watchtower Library (Bibliyoteka la Watchtower). A programa leli, li ni mabuku yamanyingi ya nhlengeletanu ya hina naswona kuni ka kukambela mhaka hi kuvevuka, swo lava u tsala mhaka ya kona, kumbe rito la kukarhi kumbe ndzimana ya Bibele.

Linga pfuna switudanti leswi yendlaka swiyenge ka Ntlhanganu wa Mahanyelo ni Ntirho. A bibliyoteka lelinga ka Yindlo ya Mfumu lingaku pfuna swinene kulunghiselela swiyenge swa wena. A mulanguteli wa Ntlhanganu wa Mahanyelo ni Ntirho, hi yena a vonelelaka bibliyoteka leli. A fanele a tiyiseka swaku mabuku lamaha kuhumaka ma kona ka bibliyoteka naswona ma vekisiwe kahle. Ungamu kombela kumbe u kombela lweyi u djondzaka na yena Bibele swaku aku komba ndlela ya kukuma rungula leli uli lavaka. Kambe awu fanelanga u teka buku ni lin’we u muka na lona. Nakambe hi fanele hima pfuletela kahle (swaku manga finyekeli kumbe kudavukela) naswona ahi fanelanga hima tsaletela.

Bibele li tlhamusela swaku, akuva “uta kuma wutivi la Xikwembu” u fanele u tihita kuli lavetela kufana ni loko u lava “xuma lexi fihliweke”. (Swivuriso 2:1-5) A bibliyoteka lelinga ka Yindlo ya Mfumu lingaku pfuna kusungula kulavetela koloko.

• Hi wahi mabuku ya kuyendla nkambisiso lamanga kona ka Yindlo ya hina ya Mfumu?

• I mani angaku pfunaka swaku uyi tirhisa kahle bibliyoteka?