XIDJONDZO 6
Hi Wihi Ntshembo Lowunga Kona ka Lavafeke?
1. Xana kutamaheka yini hi vanhu lavafeke?
Loko Yesu afika aBetaniya, kunga muganga wa le kusuyi ni Yerusalema, akume leswaku se akuhundze 4 wa masiku munghana wakwe Lazaru afile. Afambe na Mariya na Marta, vamakwavu va Lazaru, laha aalahliwe kona. Hi nkamanyana kute ni vanhu van’wani votala. Yesu agame apfuxa Lazaru. Xana wawuvona hi mahlo ya miyanakanyu ntsaku lowu Marta na Mariya vaveke na wona loko Yesu amupfuxile? — Lerha Yohane 11:21-24, 38-44.
Marta aamativa mahungu yotsakisa ya leswingata mahekaka ka vanhu lavafeke. Aaswitiva leswaku Yehovha atavapfuxa vanhu lavafeke vatlhela vahanya laha misaveni. — Lerha Yohane 11:24.
2. Xana Kumaheka yini hi hina loko hifa?
Xikwembu xibyele Adamu xiku: “Uwuthulu, hikolaho utatlhelela ka wuthulu.” — GENESA 3:19.
Vanhu vavumbiwe hi wuthulu la misava. (Genesa 2:7; 3:19) Ahi na moya lowuhanyaka ka miri wa hina kambe hi swivumbiwa swa nyama. Hikolaho, aku na nchumu wokarhi lowusalaka wuhanya ka hina loko hifa hikuva byongo ni miyanakanyu ya hina swafa na swona. Hikolaho, loko Lazaru apfuxiwile, angavulanga nchumu hi leswingamu endlekela loko afile hikuva lavafeke avativi nchumu nikatsongo. — Eklesiasta 9:5, 6, 10.
Xana i ntiyisu leswaku Xikwembu xihisa vanhu ka ndzilu loko vafa? Tani hileswi Bibele livulaka leswaku loko munhu afa angahativi nchumu, djondzo ya kuhisa vanhu ka ndzilu i mavunwa, naswona yaxinyenyetsa Xikwembu hikuva vanhu vaxilumbeta hi swilo leswi xingaswiyendliki. — Lerha Yeremiya 7:31.
Sixtira vhidiyu lelinge Xana Kumaheka Yini hi Hina Loko hi Fa?
3. Xana vanhu lavafeke vangavulavula ni lavahanyaka?
Vafi avatwi naswona avavulavuli. (Tipisalema 115:17) Kambe ku ni tintsumi tin’wani tobiha kunga madimona, letingaha vulavulaka ni vanhu titiyendla ingi i munhu lweyi afeke. (2 Petro 2:4) Hikolaho, Yehovha waswivenga ku va hiringeta kuvulavula ni vanhu lavafeke. — Lerha Deteronoma 18:10, 11.
4. Xana i vamani lavangata pfuxiwaka?
Vanhu votala lavanga masirheni vatapfuxiwa ivi vatlhela vahanya kola misaveni. Hambi lavangafa na vayendla swilo swobiha hikolaho ka leswi avangaxitivi Xikwembu vatapfuxiwa. — Lerha Luka 23:43; Mintirho 24:15.
Vanhu lavangata pfuxiwaka vatanyikiwa nkama wodjondza hi Xikwembu ni kukombisa lipfumelo ka Yesu hi kumuyingisa. (Nhlavutelo 20:11-13) Lavangata pfuxiwaka ivi vayendla swilo leswinene, vatatikhorisa hi wutomi lelingaheliki kola misaveni. — Lerha Yohane 5:28, 29.
5. Xana mhaka ya kupfuxiwa ka vafi yihidjondzisa yini hi Yehovha?
Hi ni ntshembo wa kutlhela hivona varhandziwa va hina lavafeke hikolaho ka leswi Xikwembu xirhumeleke N’wana wa xona leswaku atahifela. Hikolaho, kupfuxiwa ka lavafeke kuhidjondzisa leswaku Yehovha wahirhandza naswona ahikombisa musa lowungahi faneliki. Loko kutapfuxiwa vanhu lavafeke, i mani lweyi ungatatsakela kumuvona? — Lerha Yohane 3:16; Varhoma 6:23.