DJONDZO 4
A Tsakise Papayi Wa Yena na Yehovha
I xitshembisu xihi lexi Yefta axi yendleke ka Yehovha?
Aswi karhata, kambe n’wana wa Yefta ayendle leswi papayi wa yena aswi tshembiseke
Xana waxi vona xintombhana lexi ka foto? — I n’wana wa nuna lweyi a vitaniwaka Yefta. Bibele ayi vuli vitu la xintombhana lexi, kambe hi tiva leswaku xona xi tsakise papayi wa xona na Yehovha. Ahi djondze hi xona ni papayi wa xona, Yefta.
Yefta a ali wanuna wa kahle naswona a hete nkama wa wunyingi na a djondzisa n’wana wa yena hi Yehovha. Yena a ali wanuna wa matimba ni murhangeli lonene. Hi ndlela yoleyo, Vayisrayele vamukombele leswaku ava rhangela ka nyimpi leyi avata yilwa ni valala va vona.
Yefta a khongele ka Xikwembu leswaku ximu pfuna kuhlula nyimpi. Yefta a tshembise Xikwembu leswaku, loko ohlula, a atanyikela hi munhu lweyi a atarhanga amu tlhangaveta loko a vuya hi le nyimpini. Munhu yelweyo a atatshama atlhela a tirha wutomi la yena hinkwalu atabernakeleni. Tabernakele akuli ndhawu leyi vanhu ava tirhela Yehovha kona nkameni wolowo. Yefta aswi kotile kuhlula nyimpi! Xana waswi tiva leswaku i mani munhu lweyi anga rhanga a huma amu tlhangaveta loko a fike kaya? —
Ina, i n’wana wa Yefta! Phela a angaha na n’wana mun’wana. Kambe swoswi a fanele amu tshika a famba. Leswo swiyendle Yefta a karhateka swinene. Kambe khumbuka leswaku a yendle xitshembisu ka Xikwembu. Hi nkama wolowo, n’wana wa yena ate: ‘Papayi, loko u tshembise Yehovha u fanele uswi hetisisa.’
Lembe ni lembe, vanghanu va n’wana wa Yefta avaya mupfuxela
N’wana wa Yefta na yena a akarhatekile naswona kuva a tirha tabernakeleni, aswi vula leswaku a angata chada ni kuva ni vana. Kambe yena a aswilava ku hetisisa xitshembisu xa papayi wa yena ni ku tsakisa Yehovha. Ka yena, leswo aswili swa lisima ngopfu ku tlula kuchada ni kuva ni vana. Hi ndlela yoleyo, yena a fambe a ya tirha atabernakeleni wutomi la yena hinkwalu.
Xana leswi aswi yendleke swi tsakise papayi wa yena na Yehovha? — Ina, swiva tsakisile! Na wena loko u yingisa u tlhela u rhandza Yehovha, uta fana ni n’wana wa Yefta naswona uta tsakisa swinene vapsali va wena na Yehovha.