“Yendlani Hinkwaswu Swaku Mi Dzunisa Xikwembu”

LESWI hi nga malandza ya Yehovha lawa ma nga tinyiketela, swa fanela swaku hi mu dzunisa hi marito ni hi leswi hi swi yendlaka. Mupostolo Pawulo a veke mhaka leyi yi twisiseka nkama a nge te: “Hambi mi dla kumbe mi phuza kumbe mi yendla yini na yini, yendlani hinkwaswu swaku mi dzunisa Xikwembu.” (1 Ko. 10:31) Leswo swi vula swaku hi fanele hi hanya hi minawu ya Yehovha ya ku lulama leyi kombisaka wumunhu la yena la ku hetiseka. (Kol. 3:10) Leswi hi nga vanhu va Yehovha va ku kwetsima, hi fanele hi mu tekelela. — Efe. 5:1, 2.

² Leswaku a pfuna Vakreste, mupostolo Pedru a tsale leswi: “Leswi mi nga vana lava yingisaka, tshikani ku hanya hi ku navela loku a mu li na kona na mi nge se tiva nchumu, kambe ku fana ni Xikwembu xa ku kwetsima lexi nga mi vitana, na n’wina kwetsimani ka mahanyelo ya n’wina hinkwawu, hikusa ku tsaliwile: ‘Mi fanele mi kwetsima hikusa mina na kwetsima.’” (1 Pe. 1:14-16) Ku fana ni ka minkama ya Vayisrayele, hinkwavu abandleni la Wukreste va fanele va kwetsima. Leswo swi vula swaku a va fanelanga va va ni nchumu lexi va chakisaka, kambe va fanele va tshama na va basile ka xidjoho ni ka mahanyelo ya misava. Leswo swi yendla swaku va faneleka ku yendla ntirho wa ku kwetsima. — Eks. 20:5.

³ Hi tshama na hi basile loko hi yingisa minawu ni matshinya ya minawu ya Yehovha lawa ma nga kombisiwa ka Matsalwa. (2 Tm. 3:16) Hi ku djondza Bibele hi djondze hi Yehovha, tindlela ta yena hi tlhela hi tshinela kusuhi na yena. Djondzo ya hina ya Bibele yi hi pfune ku twisisa swaku hi fanele hi lava Mfumu wa Xikwembu ku sungula hi tlhela hi yendla ku rhandza ka Yehovha, ku nga nchumu wa lisima ka wutomi la hina. (Mat. 6:33; Rom. 12:2) Leswaku leswo swi koteka, swi lave hi yambala wumunhu la nyuwani. — Efe. 4:22-24.

KU BASA KA MAHANYELO NI KA WUNGHANU LA HINA NI XIKWEMBU

⁴ Ku hanya hi minawu ya ku lulama ya Yehovha, a hi minkama hinkwayu swi vevukaka. Nala wa hina Sathana Davulosi a zama hinkwaswu leswaku a hi hambukisa ka ntiyiso. Misava leyi ya ku biha, ni leswi hi kalaka hi nga hetisekanga swi yendla leswaku minkama yin’wani swi karhata ku hanya hi minawu ya Xikwembu. Ku hanya hi ku landza leswi hi nga tinyiketela ka Xikwembu swi lava leswaku hi lwa nyimpi yayikulu. Bibele li vula leswaku a hi fanelanga hi hlamala loko vanhu va hi xanisa kumbe loko hi kumana ni miringo. Phela leswo swi yendleka hileswi hi rhandzaka ku lulama. (2 Tm. 3:12) Hambiloko hi kumana ni miringo hi fanele hi tsaka, hikusa leswo swi kombisa leswaku hi yendla ku rhandza ka Xikwembu. — 1 Pe. 3:14-16; 4:12, 14-16.

⁵ Hambileswi Yesu a a hetisekile, a djondze ku yingisa ka swikarhatu leswi a a kumana na swona. A nga pfumelanga ku hluliwa hi mindzingo ya Sathana naswona a a nga na wunavenave la swilo swa misava leyi. (Mat. 4:1-11; Yoh. 6:15) Yesu a nga zanga a tshika ku tshembeka ka Yehovha. Leswi a a tshembeka ka Yehovha, swi yendle swaku vanhu van’wani va misava leyi va mu nyenya, kambe leswo a swi mu chavisanga a tame a hanya hi minawu ya Yehovha ya ku lulama. Na a li kusuhi ni ku fa, a khumbukise vadjondzisiwa va yena ka leswaku a vanhu a va ta va nyenya. Ku sukela kolanu vadjondzisiwa va yena va xanisiwa, kambe leswi va swi tivaka swaku hambi hi N’wana wa Xikwembu a yi hlulile misava, va nyima va ku dzi va nga chavi nchumu. — Yoh. 15:19; 16:33; 17:16.

⁶ Leswaku hi nga hanyi ku fana ni vanhu va misava, hi fanele hi hanya hi minawu ya Yehovha ya ku lulama ku fana ni leswi Yesu Hosi ya hina a nga swi yendla. A hi fanelanga hi nghenela timhaka ta politika ta misava leyi ni ku nghena ka mintlawa leyi zamaka ku yampsisa wutomi la vanhu, naswona hi fanele hi lwa ni mahanyelo ya ku biha ya misava. Hi fanele hi xi teka na xi li xa lisima xitsundzuxu lexi kumekaka ka Yakobe 1:21 lexi nge: “Txukumetani chaka hinkwalu ni swilo swa ku biha kutani mi tiveka hansi mi yamukela Rito la Xikwembu mi li tshika li mila ka timbilu ta n’wina hikusa li ta mi ponisa.” Hi ku djondza Bibele ni ku tlhela hi va kona amintlhanganwini nkama ni nkama, hi va hi tshika Rito la Xikwembu li “mila” ka mimpimiso ni ka timbilu ta hina naswona a hi nga ta lava swilo leswi misava yi swi nyikelaka. Mudjondzisiwa Yakobe a tsale leswi: “A mi swi tivi swaku loko mi va vanghanu va misava mi valala va Xikwembu ke? Kutani lweyi a lavaka ku va munghanu wa misava a tiyendla nala wa Xikwembu.” (Yak. 4:4) Hi mhaka leyo, Bibele li hi nyika switsundzuxu leswaku hi khomelela ka minawu ya ku lulama ya Yehovha hi tlhela hi tihambanisa ni misava.

⁷ A Rito la Xikwembu li hi tsundzuxa swaku a hi fanelanga hi va ni mahanyelo ya tingana kumbe ya ku biha. Lona li vula leswi: “A wuntunga la swa masangu ni chaka hinkwalu kumbe makwanga swi nga tshuki swi vuliwa xikarhi ka n’wina hikusa minchumu leyi a yi faneli vanhu va ku kwetsima.” (Efe. 5:3) Hi mhaka leyo, a hi fanelanga hi pfumelela swaku mimpimiso ya hina yi chimisiwa hi swilo swa ku biha kumbe swa tingana, kumbe hi kutsongokutsongo hi va ni mabulu ya ku fana ni wolawo ya ku biha. Hi ndlela yoleyo, hi ta kombisa swaku hi lava ku hanya hi minawu ya Yehovha ya mahanyelo leyi nga lulama yi tlhela yi basa.

KU BASA AMUZIMBHENI NI LOMU U TSHAMAKA KONA

⁸ Handle ka ku basa ka mahanyelo ni ka wunghanu la hina na Yehovha Xikwembu, hina Vakreste hi swi teka swi li swa lisima swinene ku basa amuzimbheni ni lomu hi tshamaka kona. Phela ka Israyele wa khale, Xikwembu lexi kwetsimaka a xi lava leswaku hinkwaku lomu Vayisrayele a va tshama kona ku tshama na ku basile. Na hina namuntlha hi fanele hi teka ku basa na ku li ka lisima swinene, leswaku Yehovha “a nga voni nchumu xa ku danisa ka hina.” — Det. 23:14.

⁹ Ka Bibele a ku kwetsima ni ku basa ka muzimbha wa hina ni lomu hi tshamaka kona swa fambisana. Hi xikombiso, Pawulo a vule leswi: “Varhandziwa . . . a hi tibasiseni ka swilo hinkwaswu leswi chimisaka muzimbha ni mbilu hi kwetsima hi ku helela hileswi hi chavaka Xikwembu.” (2 Ko. 7:1) Vakreste va fanele va yendla hinkwaswu va nga swi kotaka swaku va basa hi ku hlambha ni ku yi hlampsa kahle mpahla ya vona. Hambileswi swiyimu swi hambanaka hi ku ya hi tiko leli munhu a tshamaka ka lona, hi ntolovelo swa koteka swaku ku kumeka mati ni sabão swaku munhu a tibasisa a tlhela a pfuna vana va yena swaku va basa.

¹⁰ Leswi hi yendlaka ntirho wa ku chumayela, hi ntolovelo vavhizinyu va hina va hi tiva. Se loko hi basisa kaya ka hina hi tlhela hi ku hlayisa hi handle ni le ndzeni, swi ta nyikela wumboni lalinene ka vavhizinyu va hina. Phela ku basisa kaya swi lava swaku hinkwavu andjangwini va tirhisana. Hi xikombiso, wanuna lweyi a nga Mukreste a nga ha basisa ni ku hlayisa handle ka munti ni kintari, hikusa a kintari leli tshamaka na li basile la navetisa ka vanhu van’wani. Loko wanuna a yendla mintirho leyo a tlhela a pfuna ndjangu wa yena swaku wu va ni wunghanu lalinene na Yehovha, swi kombisa swaku i nhloko ya ndjangu leyi wu rhangelaka kahle ndjangu wa yona. (1 Tm. 3:4, 12) Vavasati lava nga Vakreste na vona va ni mintirho ya vona, ngopfungopfu mintirho leyi faneleke yi yendliwa ndzeni ka munti. (Tit. 2:4, 5) Vana lava djondzisiweke kahle va yendla leswi va nga swi kotaka hi ku va va basisa makwartu ka vona va tlhela va ku lunghisa. Loko ndjangu wu tirhisana swaku wu tama wu basa, wu ta kombisa swaku wu ta yi landzela ni minawu ya ku basa leyi nga ta vekiwa ka misava ya nyuwani hansi ka Mfumu wa Xikwembu.

¹¹ Vamakwerhu va vanyingi amisaveni hinkwayu va tirhisa mimovha, swithuthuthu leswaku va ya mintlhanganwini. Ka tindhawu tin’wani swo boha kuva vamakwerhu va tirhisa mimovha ka ntirho wa ku chumayela. Mimovha yoleyo yi fanele yi tshama na yi basile yi tlhela yi hlayiseka. Munti wa hina ni movha wa hina swi fanele swi kombisa swaku hi lumba ndjangu wa ku basa ni wa ku kwetsima wa Yehovha. Leswo swa tirha ni ka Mabibele ya hina ni mapaxta lawa hi ma tirhisaka leswaku hi ya ka ntirho wa ku chumayela, na swona swi fanele swi basile swi tlhela swi hlayisekile.

¹² A mpahla ya hina ni ndlela leyi hi tilunghisaka hi yona, swi fanele swi kombisa swaku hi landzela minawu ya Xikwembu. A hi nga ta pimisa hi ku humelela phambheni ka munhu wa lisima na hi yambale hi ndlela ya futa ni ya ku kala yi nga kombisi xihlonipho. Se swi li yini hi Yehovha? Hi fanele hi yambala hi ndlela leyi nga ta kombisa swaku hi nyimela Yehovha, loko hi ya ka ntirho wa ku chumayela kumbe loko hi ni swiyenge leswi nga ta lava hi khwela tribuna. Ndlela leyi hi tilunghisaka hi yona ni mpahla leyi hi yi dlokaka, swi nga khumba ndlela leyi van’wani va li vonaka hi yona wugandzeli la hina ka Yehovha. A hi swinene ku kombisa ku kala hi nga va hloniphi van’wani hi leswi hi dlokisaka xiswona. (Mik. 6:8; 1 Ko. 10:31-33; 1 Tm. 2:9, 10) Hi ndlela yoleyo, loko hi tilunghiselela swaku hi ya ku chumayeleni kumbe hi ya ka mintlhanganu, masembleya ni makongresu, hi fanele hi khumbuka leswi Bibele li swi vulaka hi ku basa ni ku tilunghisa. Minkama hinkwayu hi lava ku dzunisa Yehovha ni ku kombisa swaku ha mu hlonipha.

¹³ Phela minawu yoleyi ya yin’we ya tirha loko hi ya pfuxela abetele la Timboni ta Yehovha kumbe sede mundial. Khumbuka leswaku a rito leli nge Betele li vula “Yindlo ya Xikwembu”. Hi mhaka leyo, ndlela leyi hi yambalaka hi yona ni ndlela leyi hi tikhomaka hi yona yi fanele yi fana ni loko hi ya mintlhanganwini.

¹⁴ Phela hambiloko hi li ku hungateni hi lava ku yambala hi tlhela hi tilunghisa hi ndlela ya kahle. Hi nga ha tivutisa leswi: ‘Indjhe a ni ta dana ku chumayela munhu swa kola na kola hi mhaka ndlela leyi ni nga yambala hi yona?’

KU HUNGATA HI NDLELA YAYINENE

¹⁵ Swa laveka swaku hi humula hi tlhela hi hungata swaku hi va ni lihanyu la kahle hi tlhela hi tsaka. Siku lin’wani Yesu a rhambe vadjondzisiwa va yena swaku va ya ka ndhawu ya vona voxe swaku va ya “humulanyana.” (Mar. 6:31) A ku humula ni ku hungata hi ndlela yayinene swi nga yendla swaku hi tsaka hi tlhela hi pepisa nhloko. Swi nga hi pfuna swaku hi yendla mintirho ya hina ya siku ni siku na hi tsakile.

¹⁶ Ku ni swilo swa swinyingi swa ku hungata hi swona namuntlha wa siku, kambe Vakreste va fanele va tivonela ka leswi va swi langaka, va tirhisa wutlharhi leli taka hi ka Yehovha nkama lowu va langaka leswi va nga ta hungata hi swona. Hambileswi ku hungata swi nga swinene, a hi swona leswi faneleke swi va swa lisima ka wutomi la hina. Bibele li hi ba ndleve hi ku vula swaku “ka masiku ya wugamu” a vanhu a va ta “rhandza ku titsakisa va tshika ku rhandza Xikwembu.” (2 Tm. 3:1, 4) Swilo swa ku tala leswi vanhu va hungataka hi swona a swi basanga ka lava va lavaka ku hanya hi minawu ya Yehovha ya ku lulama.

¹⁷ Vakreste va minkama ya vapostolo a va lwisana ni mahanyelo ya ku biha lawa vanhu lava a va tshama kusuhi na vona a va li na wona, hikusa a va rhandza ku titsakisa. Ka swipetakulu swa Varoma a vanhu a va hungata hi ku sixtira vanhu na va xanisiwa, wugevenga, ku banana, ku halatiwa ka ngati ni wuntunga la swa masangu, kambe Vakreste va minkameni ya vapostolo a va nga swi sixtiri swilo leswo. Ninamuntlha ku tala ka swilo leswi vanhu va hungataka hi swona i swilo swa ku biha naswona swi hetisisa ku navela ka vona ka ku biha. Se hi fanele hi ‘tshama na hi pfule matihlo’ ka ndlela leyi hi fambaka hi yona leswaku hi fambela kule ni ku hungata hi swilo swa ku biha. (Efe. 5:15, 16; Ps. 11:5) Hambiloko leswi hi hungataka hi swona swi nga bihanga, kambe swi nga yendleka ndhawu leyi hi hungataka ka yona yi nga li kahle. — 1 Pe. 4:1-4.

¹⁸ Ku ni swilo swa swinyingi swa kahle leswi Vakreste va nga hungataka hi swona. Va vanyingi va pfunekile hi ku yingisa minkongomiso ya Bibele ni leswi tlhamuseliwaka ka mabuku ya hina.

¹⁹ Minkama yin’wani mindjangu ya tlhangana swaku yi heta nkama na yi li xikan’we, kumbe vamakwerhu va nga ha rhambiwa swaku va ya ka muchadu kumbe ka fexta la ku karhi. (Yoh. 2:2) Lava va va rhambaka hi vona va nga ta hlamula ka xin’wani ni xin’wani lexi nga ta humelela ka ndhawu yoleyo. Hi ntolovelo swi lava hi tivonela loko mintlawa yayikulu yi tlhangana. Leswi ku nga ta hungatiwa ka mafexta wolawo, swi nga yendleka van’wani va tlulisa mpimu ka leswi nyimeliwaka ka Vakreste hi ku va va dla ngopfu kumbe va phuza ngopfu kumbe ku yendla swidjoho swin’wani swaswikulu. Hi mhaka leyo, Vakreste lava nga ni wutlharhi va pimela a numeru ya vanhu lava va va rhambaka ni nkama lowu fexta lolelo li nga ta hela hi wona. Loko va va chelela swa ku fana ni byala, va pimela. (Filp. 4:5) Loko ku yendliwa hinkwaswu swaku a mafexta wolawo ma va manene ma tlhela ma tiyisa lipfumelo la van’wani, a byala ni swakudla a swi nga ta va swona swa lisima hintamu.

²⁰ I swinene ngopfu ku rhandza ku rhamba vanhu van’wani. (1 Pe. 4:9) Loko hi rhamba Vakreste van’wani leswaku hi ta bula na vona, hi dla xikan’we, hi fanele hi khumbuka ni ku rhamba vamakwerhu lava pfumalaka. (Luk. 14:12-14) Loko hi rhambiwile swaku hi ya ka tindhawu leto kumbe ka mafexta wolawo, mahanyelo ya hina ma fanele ma twanana ni leswi swi nga ka buku la Marka 12:31. I swa lisima swinene minkama hinkwayu ku khensa timpsalu leti van’wani va hi kombaka tona.

²¹ Vakreste va tikhorisa swinene hi tinyiko ta tinyingi leti taka hi ka Xikwembu, naswona va swi tiva leswaku va nga ‘dla va tlhela va nwa ni ku tsaka hi mhaka ya ntirho wa vona hinkwawu wa matimba.’ (Ekl. 3:12, 13) Loko hi ‘yendla hinkwaswu swaku hi dzunisa Xikwembu’ loko hi rhamba vanhu van’wani ni loko hi rhambiwile, hi ta tsaka swinene hi mafexta wolawo naswona hi ta ma khumbuka tanihi minkama leyi nga hi pepisa swinene.

LAVA YAKA XIKOLA

²² Vana va Timboni ta Yehovha va pfuneka hi ku ya xikola. Lexi va xi lavaka nkama va yaka xikola i ku tikarhatela ku djondza ku lerha ni ku tsala kahle. Swin’wani leswi va swi djondzaka xikola swi nga va pfuna loko va lwela ku fikelela mintirho yin’wani ka nhlengeletanu ya Yehovha. Ka malembe lawa va yaka xikola, swi nga va swinene kuva va tikarhatela ku ‘khumbuka Mutumbuluxi wa vona Wamukulu’ hi ku rhangisa leswi Yehovha a swi lavaka.  — Ekl. 12:1.

²³ Loko u li jovhem naswona wa ha ya xikola, tivoneli kuva u nga heti nkama wa wunyingi ni majovhem lawa ma kalaka ma nga tirheli Yehovha na swi nga bohi. (2 Tm. 3:1, 2) Leswi Yehovha a hi nyikaka swilo swa swinyingi leswaku a hi vhikela, ku ni swilo swa swinyingi leswi u nga swi yendlaka swaku u fambela kule ni mahanyelo ya ku biha ya misava. (Ps. 23:4; 91:1, 2) Hi mhaka leyo, leswaku u tivonela swi tirhisi kahle swilo leswi Yehovha a ku nyikaka swona. — Ps. 23:5.

²⁴ Ku tala ka majovhem lawa ma nga Timboni ta Yehovha, a ma tingheniseli ka mintirho leyi yendliwaka loko ku helile xikola leswaku ma tihambanisa ni misava. Phela swi nga ha karhata kuva vakolega va wena ni vaprofesori va wena va swi twisisa leswo, kambe lexi xi nga xa lisima i ku tsakisa Xikwembu. Leswo swi vula swaku u fanele u tirhisa lipfalu la wena leli li nga djondzisiwa hi Bibele, u tlhela u tinyimisela ku kala u nga tingheniseli ka mimpalisanu kumbe ku lwela tiko. (Gal. 5:19, 26) Loko majovhem ma tikarhatela ku tirhisa switsundzuxu swa Bibele leswi vapsali va wona va ma djondzisaka swona, ma tlhela ma va ni vanghanu lava nga Vakreste, ma ta swi kota ku khomelela ka minawu ya Yehovha ya ku lulama.

NTIRHO NI VANGHANU

²⁵ Nhloko ya ndjangu yi ni wutihlamuleli hi ku ya hi Bibele la ku hlayisa ndjangu wa yona. (1 Tm. 5:8) Hambileswo, tinhloko ta mindjangu tanihi malandza ya Yehovha ta swi twisisa swaku a ti fanelanga ti rhangisa ntirho ku tlula Mfumu wa Xikwembu. (Mat. 6:33; Rom. 11:13) Loko va tinyiketela ka Xikwembu va tlhela va tsaka hi leswi va nga na swona, swa ku fana ni swakudla ni swa ku dloka, swi ta va pumbela ku vilela swi tlhela swi va vhikela ka mintlhamu ya ku lwela ku lava ku ganya. — 1 Tm. 6:6-10.

²⁶ Vakreste hinkwavu lava tirhaka swaku va tihlayisa, va fanele va khumbuka matshinya ya minawu ya Bibele. Leswaku hi tshembeka ka mintirho leyi hi yi yendlaka, hi fanele hi fambela kule ni minchumu leyi lwisanaka ni minawu ya Yehovha ni minawu ya tiko. (Rom. 13:1, 2; 1 Ko. 6:9, 10) Leswi hi nga masonchwa ya Kreste, a hi fanelanga hi tipeta ka manegosiyu lawa ma tlulaka minawu ya Xikwembu, kumbe lawa ma nga hi yendlaka hi sungula ku nghenela swa politika ni ku veka wunghanu la hina na Yehovha nghozini. (Esa. 2:4; 2 Tm. 2:4) Minkama hinkwayu hi fanele hi khumbuka swaku swi ni nghozi ku famba ni vanhu va ku biha, naswona hi fanele hi fambela kule ni “Babilona Wamukulu,” ku nga nala wamukulu wa Xikwembu. — Nhl. 18:2, 4; 2 Ko. 6:14-17.

²⁷ Loko hi hanya hi minawu ya ku lulama ya Xikwembu, a hi nga ta tirhisa Yindlo ya hina ya Wugandzeli leswaku hi hamba manegosiyu kumbe swin’wani. Xikongomelo xa hina xa ku va kona amintlhanganwini, amasembleya ni makongresu, i ku ya gandzela Yehovha. Ka mintlhanganu yoleyo, Yehovha hi yena a hi phamelaka naswona “ha tiyisana.” (Rom. 1:11, 12; Heb. 10:24, 25) Ka mintlhanganu leyo hi fanele hi bula hi swilo leswi fambisanaka ni wunghanu la hina ni Xikwembu.

A HI HLAYISENI KU TWANANA KA HINA

²⁸ Leswaku hi kombisa swaku hi hanya hi minawu ya ku lulama ya Yehovha, swi lava hi “hlayisa ku twanana loku, hi ku hanyisana hi ku rhula ni van’wani.” (Efe. 4:1-3) Handle ka ku lava ku titsakisa, mun’wani ni mun’wani a lava leswaku ku pfuneka van’wani. (1 Tes. 5:15) Phela leswo hi swona leswi u nga ta swi kuma ka bandla la Wukreste. Ku nga na mhaka swaku hi ni matshamelo ya ku hambana, hi ta hi ka tindhawu ta ku hambana, hi ve ni tidjondzo ta ku hambana, van’wani va ganyile van’wani i swisiwana, hinkwerhu hi kongomisiwa hi minawu yoleyi ya yin’we ya ku lulama. Hambi hi vanhu lava kalaka va nga li ndzeni ka nhlengeletanu, va swi vona swaku vanhu va Yehovha va twanana. — 1 Pe. 2:12.

²⁹ Loko Bibele li vulavula hi ku twanana loku hi nga na kona li li: “Ku ni muzimbha wun’we ni moya wun’we wa ku kwetsima, ku fana ni leswi ku nga ni ntshembo wun’we lowu mi nga vitaneliwa wona; ku ni Hosi yin’we ni lipfumelo lin’we ni ntsakamiso wun’we; naswona ku ni Xikwembu xin’we lexi nga Papayi wa vanhu hinkwavu xi tlhela xi va henhla ka hinkwavu.” (Efe. 4:4-6) A marito lawa ma hi kutxa ku tama hi twanana ka matwisiselo ya hina ya tidjondzo ta ku sungula ta Bibele ni ka tidjondzo ta ku yenta ta Bibele. Loko hi yendla leswo, hi kombisa swaku ha li hlonipha wuhosi la Yehovha. Phela Yehovha a nyika vanhu va yena lirimi la ku tenga la ntiyiso hi ku yendla swaku swi koteka swaku hi mu tirhela xikan’we hi ku twanana. — Sof. 3:9.

³⁰ Ku twanana ni ku rhula loku nga kona ka bandla la Wukreste swi pepisa hinkwavu lava gandzelaka Yehovha. Ha ku vona ku hetiseka ka xitshembiso xa Yehovha lexi nge: “Va ta twana ku fana ni tinyempfu leti nga xib’aleni.” (Mik. 2:12) Hi lava ku yendla hinkwaswu leswaku hi tshama hi ku twanana hi ku yingisa minawu ya ku lulama ya Yehovha.

³¹ Hinkwavu lava nga yamukeliwa ka bandla la Wukreste la Yehovha va tsakile swinene. Phela ku vitaniwa hi vito la Yehovha ku tlula hinkwaswu leswi munhu a nga titsona swona. Nkama hi hlayisaka wunghanu la hina na Yehovha Xikwembu, hi fanele hi yendla hinkwaswu leswi hi nga swi kotaka swaku hi khoma swi tiya ka minawu ya yena ya ku lulama hi tlhela hi byela van’wani hi yona. — 2 Ko. 3:18.