Hi Nga Yendla Yini Swaku Bandla Li Va Ni Ku Rhula Li Tlhela Li Basa

LEMBE ni lembe vanhu va vanyingi va nghena ka wugandzeli leli nga tenga la Yehovha, leswi kombisaka ku hetiseka ka wuprofeta la Bibele. (Mik. 4:1, 2) Hi tsaka hintamu hi ku va yamukela ka “bandla la Xikwembu”! (Min. 20:28) Va swi rhandza hintamu ku tirhela Yehovha Xikwembu swin’we na hina naswona va tsaka hintamu hi ku lumba bandla leli nga basa li tlhela li va ni ku twanana. Moya wa ku kwetsima wa Xikwembu ni switsundzuxu swa xona swa wutlharhi swa Bibele swi hi pfuna akuva hi hlayisa ku rhula ni ku basa abandleni. — Ps. 119:105; Zak. 4:6.

² Loko hi tirhisa matshinya ya minawu ya Bibele, hi va na hi “yambala wumunhu la nyuwani.” (Kol. 3:10) A hi swi teki na swi li swa lisima swinene ku holovisana loku ku kalaka ku nga li ka nchumu, naswona hi vona swilo hi ndlela leyi Yehovha Xikwembu a swi vonaka hi yona. Hi ku maha leswo, hi hlula swilo swa misaveni leswi nga yendlaka swaku hi nga twanani hi tlhela hi yendla hinkwaswu swaku hi tama hi twanana tanihi ndjangu wun’we wa vamakwerhu amisaveni hinkwayu. — Min. 10:34, 35.

³ Nhambileswo, minkama yin’wani ku nga ha humelela swikarhatu leswi nga yendlaka swaku ku nga vi na ku rhula ku tlhela ku nga vi na ku twanana abandleni. Kasi hi mhaka muni leswo swi yendleka? Leswo swi yendleka hikusa minkama yin’wani ku nga ha va ku tluliwe matshinya ya minawu ya Bibele, kumbe minkama yin’wani swi nga ha yendleka hileswi hi kalaka hi nga hetisekanga hikusa a nga kona lweyi a kalaka a nga djohi. (1 Yo. 1:10) Swi nga yendleka munhu a tshuka a yendla swilo leswi swi nga ha chimisaka bandla. Minkama yin’wani hi nga ha kwatisa van’wani hi leswi hi swi vulaka kumbe hi kwata hileswi van’wani va nga hi byela swona kumbe leswi va nga hi yendlela swona. (Rom. 3:23) Se hi nga swi lunghisisa ku yini swiyimu swa ku tshamisa xileswi?

⁴ Leswi Yehovha a hi rhandzaka, wa swi tiva hinkwaswu leswi swi hi humelelaka naswona ka Rito la yena ku nga Bibele a hi nyika minkongomiso leyi nga hi pfunaka loko hi kumana ni swikarhatu. Madoda lawa ma nga varisi naswona ma nga ni lirhandzu ma tinyimisele ku hi pfuna. Loko hi tirhisa minkongomiso leyi hi yi kumaka ka Bibele, hi nga va ni wunghanu lalinene ni van’wani naswona Yehovha a ta hi yamukela. Loko hi layiwa kumbe hi soliwa hi ku ya hi Matsalwa hi mhaka ya xidjoho xa ku karhi, hi nga tiyiseka swaku lexo i xikombiso xa lirhandzu xa Papayi wa hina wa le tilweni. — Swiv. 3:11, 12; Heb. 12:6.

HI NGA TI LULAMISISA KU YINI TIMHAKA TATITSONGO?

⁵ Minkama yin’wani swi nga ha yendleka hi tshuka hi nga twanani kumbe ku humelela swikarhatu swaswitsongo ka vamakwerhu va hina abandleni. Swikarhatu swoleswo swi fanele swi lulamisiwa hi xihantla kambe hi ndlela ya lirhandzu. (Efe. 4:26; Filp. 2:2-4; Kol. 3:12-14) Phela u ta swi vona swaku swikarhatu swin’wani leswi swi nga ha vaka kona xikarhi ka hina ni vamakwerhu abandleni, swi nga lulamisiwa loko hi landza xitsundzuxu lexi mupostolo Pedru a nga xi nyikela nkama a nga te: “Rhandzanani swinene hikusa lirhandzu li mbhonya swidjoho swa swinyingi.” (1 Pe. 4:8) Bibele li tlhela li hi byela leswaku “hinkwerhu ha phazama minkama ya yinyingi.” (Yak. 3:2) Phela loko hi tirhisa nawu lowu vulaka swaku hi yendlela van’wani swilo leswi hi lavaka swaku na vona va hi yendlela swona, hi ta rivalela hi tlhela hi khohlwa swihoxo swa ku a swi nyawuli. — Mat. 6:14, 15; 7:12.

⁶ Loko u tsumbula swaku makwerhu a kwatile hi mhaka ya leswi u nga swi vula kumbe u nga swi yendla, vana wa ku rhanga u famba u ya yendla ku rhula na yena na u nga hlweliseli. Khumbuka swaku a wunghanu la wena na Yehovha na lona li le nghozini. Yesu a byele vadjondzisiwa va yena a ku: “Loko u tisa gandzelo la wena ka altari, kutani u khumbuka na wu li kolanu swaku makwenu a ku kwatelile, siya gandzelo la wena kolanu phambheni ka altari, u rhanga hi ku ya lunghisa mhaka ya kona ni makwenu, se hi kona u nga ta vuya u ta nyikela gandzelo la wena.” (Mat. 5:23, 24) Swi nga yendleka wena ni makwerhu mu yo kala mi nga twisisananga, hi mhaka leyo swi kahle kuva mi bulisana. Loko hinkwerhu abandleni hi bulisana kahle swi ta pfuna swaku hi nga kwatisani hi tlhela hi lulamisa timhaka leti nga ha tshukaka ti humelela hileswi hinkwerhu hi kalaka hi nga hetisekanga.

LOKO SWI LAVA SWAKU MUNHU A LAYIWA HI KU YA HI MATSALWA

⁷ Minkama yin’wani madoda ma nga ha swi vona swi fanela akuva munhu a layiwa swaku a lulamisa mapimiselo ya yena. Kambe leswo a hi minkama hinkwayu swi vevukaka. Pawulo a va tsalele leswi Vakreste va le Galatiya: “Vamakwerhu, loko munhu a tshuka a huma ndleleni na a nga swi voni, n’wina lava kongomisiwaka hi moya wa ku kwetsima wa Xikwembu zamani ku mu pfuna hi ndlela ya ku rhula.” — Gal. 6:1.

⁸ Leswi madoda ma risaka bandla, ma li vhikela ka swilo swa swinyingi ni ka swikarhatu swaswikulu leswi swi nga wonhaka wunghanu la lona na Yehovha. Madoda ma tikarhatela ku yendla ntirho wa wona abandleni leswaku wu fambisana ni xitshembiso lexi Yehovha a nga xi yendla hi ku tirhisa Esaya, loko a ku: “Mun’wani ni mun’wani a ta fana ni ndhawu ya ku tumbela ka yona loko ku ni moya, ndhawu ya ku tumbela ka yona loko ku ni xidzedze, ku fana ni minambu ka tiko leli kalaka li nga na mati, ku fana ni ndzhuti wa ribye lalikulu ka tiko leli nga woma.” — Esa. 32:2.

‘MARKARANI’ LAVA VA KU DJAMUKA

⁹ Leswaku mupostolo Pawulo a hi basopisa ka Vakreste va ku djamuka lava va nga hambukisaka bandla, a te: “Hambanani ni makwerhu lweyi a kalaka a nga yingisi naswona a kalaka a nga landzi timhaka leti hi nga mi byela tona.” A tlhele a tiyisekisa mhaka leyi hi ku vula leswi: “Loko munhu a yala ku yingisa leswi hi nga mi tsalela ka karta leli, mu markareni naswona tshikani ku va munghanu wa yena leswaku a ta dana. Mi nga mu voneni na a li nala, kambe tamani mi mu laya hikusa i makwenu.” — 2 Tes. 3:6, 14, 15.

¹⁰ Minkama yin’wani abandleni ku nga ha va ni munhu lweyi hambileswi a kalaka a nga yendlanga xidjoho xaxikulu xa ku za a hlongoliwa abandleni, kambe ku ni nchumu lexi kombisaka swaku a nga yi hloniphi minawu leyi Vakreste va fanele va hanya hi yona. Leswo swi nga ha patsa ku va a ni wulolo la ku tlula mpimu, a tlhela a rhandza ku solasola ni ku va a nga rhandzi ku basa. Kumbe munhu yelweyo a nga ha rhandza ku ‘tipeta ka timhaka ta ku kala ti nga mu lumbi.’ (2 Tes. 3:11) Funtshi swi nga yendleka munhu lweyo a rhandza ku kanganyisa vanhu van’wani kumbe a rhandza ku hungata hi swilo leswi kalaka swi nga fanelanga ka Vakreste. Mahanyelo ya yena ya ku kala ma nga li manene ma nga ha va ma bihile hintamu lakakuva ma nga wonha ni ndhuma leyi bandla li nga na yona naswona leswo swi nga ha tlulela ka vamakwerhu van’wani.

¹¹ Ku sungula, madoda ma ta zama ku pfuna munhu yelweyo hi ku mu nyika switsundzuxu leswi taka hi ka Bibele. Kambe loko munhu a tama a kombisa ku kala a nga hloniphi minawu ya Bibele hambileswi va nga mu pfuna hi ku phindhaphindha, madoda ma nga swi vona swi yampsa kuva ma veka dixkursu leli yaka ka vanhu hinkwavu kambe na li ni xikongomelo xa ku basopisa bandla. Madoda ma ta kombisa wutlharhi hi ku kambela swaku a xiyimu xolexo xa fanela ku va xi vekeliwa dixkursu kumbe nada. Nkama dixkursu li vekiwaka, a muveki wa lona a ta ti tlhamusela kahle timhaka leti fambisanaka ni mahanyelo ya ku biha lawa munhu yelweyo a nga na wona kambe na a nga mu phati hi vito. Loko a yendla leswo, lava va xi tivaka xiyimu xa munhu yelweyo naswona va yingiselaka dixkursu va ta tivonela swaku va nga vi vanghanu va yena hambileswi va nga ta kala va nga tshiki ku hlangamela na yena naswona va ta ‘tama va mu laya hikusa i makwenu.’

¹² Ku nyimeliwa swaku bandla li nyima ni leswi nga tlhamuseliwa ka dixkursu naswona leswo swi nga yendla leswaku munhu yelweyo lweyi a nga ni mahanyelo ya ku biha a dana a tlhela a tisola. Loko se swi tikomba kahle swaku munhu yelweyo a ma tshikile mahanyelo ya yena ya ku biha, hi fanele hi mu khoma ku fana ni vamakwerhu van’wani hinkwavu.

LOKO KU YENDLIWE SWIHOXO SWASWIKULU

¹³ Ku va hi tinyimisela ku rivalela swihoxo a swi vuli swona swaku a hi na mhaka ni mahanyelo ya ku biha lawa munhu lweyi hi nga mu rivalelaka a ma yendlaka kumbe ku kombisa swaku hi nyima ni leswi a nga swi yendla. A hi swidjoho hinkwaswu swi vangiwaka hi ku kala hi nga hetisekanga naswona a hi swinene ku swi ba hi makatla swidjoho swaswikulu. (Lev. 19:17; Ps. 141:5) A ntwananu wa Nawu wu kombise swidjoho swin’wani leswi nga swikulu ku tlula swin’wanyani, phela leswo hi swona leswi swi yendlekaka ninamuntlha ka bandla la Wukreste. — 1 Yo. 5:16, 17.

¹⁴ Yesu a vule leswi hi nga swi yendlaka swaku hi lulamisa timhaka leti hi nga ha vaka na tona ni vamakwerhu. A hi voni swilo leswi a nga swi vula. A te: “Loko makwenu a ku djohela, [1] famba u ya kombisana na yena ku hoxa ka yena, na mi li n’wina vambirhi ntsena; loko a ku yingisa, u ta va u pfune makwenu ku yendla swaswinene. Kambe loko a nga ku yingisi, [2] famba ni munhu mun’we kumbe vambirhi, leswaku mhaka yin’wani ni yin’wani yi ta tiyisiwa hi vafakazi vambirhi kumbe vanharhu. Loko a nga va yingisi, [3] byela bandla. Loko a yala ni ku yingisa bandla, mu voni ku fana ni munhu wa matiko ni muhakelisi wa rhesa.” — Mat. 18:15-17.

¹⁵ Xifaniso lexi Yesu a nga gama a vulavula hi xona ka Matewu 18:23-35, xi kombisa swaku swi nga yendleka xin’we xa swidjoho swin’wani leswi Yesu a a pimisa hi swona nkama a nga vulavula marito lawa ma kumekaka ka Matewu 18:15-17, a swi fambisana ni male kumbe swilo swin’wani swa munhu swa ku fana ni ku hakela xikweneti kumbe ku kanganyisa. Kumbe swi nga yendlela Yesu a a vulavula hi ku wonha vito la munhu, ku nga xidjoho lexi nga wonhaka ndhuma leyi munhu a nga na yona.

¹⁶ Loko u tiyiseka swaku makwerhu mun’we abandleni a ku djohelile, u nga hantliseli ku ya byela mhaka yoleyo madoda ya bandla leswaku ma ta nyima na wena. Hilani Yesu a nga vula hi kona, u fanele u rhanga hi ku ya vulavula ni munhu yelweyo. Zama ku lulamisa mhaka yoleyo na mi li vambirhi ntsena, mi nga peti vanhu van’wani. Khumbuka swaku Yesu a nga vulanga swaku u fanele u ‘famba kan’we u ya kombisana na yena ku hoxa ka yena.’ Hi mhaka leyo, loko munhu wa kona a nga pfumeli xihoxo xa yena kumbe a nga kombeli ku rivaleliwa swi nga va swinene u bula na yena hi nkama wun’wani. Se loko mhaka ya kona yi lulamisiwa, lweyi a nga ku djohela a ta ku khensa swinene hi mhaka ya leswi u kalaka u nga byelanga van’wani mhaka yoleyo ni leswi u kalaka u nga chimisanga vito la yena kumbe ndhuma ya yena abandleni. Phela hi ku va u yendle leswo u ta va “u pfune makwenu ku yendla swaswinene.”

¹⁷ Loko munhu lweyi a nga ku djohela a pfumela nandzu wa yena a tlhela a kombela ku rivaleliwa naswona a yendla swilo swaku a lulamisa xihoxo xa yena, a swi bohi swaku a mhaka ya n’wina yi yisiwa kun’wani, yi nga fela kolanu. Phela hambiloko xidjoho xa kona xo va xikulu xi nga lulamisiwa na mi li n’wina vambirhi ntsena.

¹⁸ Kambe swi nga yendleka swi nga koteki swaku mi lunghisa mhaka “na mi li n’wina vambirhi ntsena”, ka xiyimu lexo u nga ha yendla leswi Yesu a nga swi vula, a te: “Famba ni munhu mun’we kumbe vambirhi” u tlhela u ya bula ni makwerhu. A vanhu lava u nga ta va teka, xikongomelo xa vona na xona xi fanele xi va xa ku pfuna makwerhu swaku a yendla swaswinene. Swa yampsa u langa vanhu lava va yi tivaka mhaka ya kona, kambe loko swi nga koteki u nga kombela munhu mun’we kumbe vambirhi swaku va famba na wena hambiloko va nga yi tivi mhaka ya kona. Loko swi li swaku vanhu lava u fambaka na vona va yi tiva mhaka, va ta ku pfuna ku vona swaku mhaka yoleyo i xidjoho xaxikulu kumbe nada. Loko u rhamba lin’we la madoda swaku li va na wena nkama u yaka u ya bulisana ni makwerhu, a li nga ta va na li nyimela bandla hi nkama wolowo hikusa a li rhumiwanga hi ntlawa wa madoda swaku li ya yendla leswo.

¹⁹ Loko mhaka ya kona yi nga lunghisiwi ndzhaku ka loko u yendle minzamu hinkwayu leyi, ku nga ku bula ni munhu wa kona, u tlhela u rhamba van’wani swaku va va kona ka mabulu, se u vona swaku a wu nge yi khohlwi mhaka leyo, yi teki u ya yi chululela madoda. Khumbuka swaku a xikongomelo xa madoda i ku yendla swaku bandla li va ni ku rhula li tlhela li tshama na li basile. Loko se u bulile ni madoda swi tshiki mavokweni ya vona u tshemba Yehovha. A wu fanelanga u pfumelela swaku mahanyelo ya ku biha ya vanhu van’wani ma ku pharhiheta nkama u tirhelaka Yehovha ma tlhela ma ku yendla u nga ha tsaki ka ntirho wa yena. — Ps. 119:165.

²⁰ Varisi va ntlhambi va ta kambisisa mhaka ya kona. Swi nga yendleka va tsumbula swaku munhu yelweyo a ku djohele hintamu funtshi a nga tisolanga, a nga lavi ku txintxa funtshi a nga yendli nchumu swaku mhaka leyi yi lulamisiwa. Ka xiyimu lexo a comissão la ku yavanyisa li nga swi vona swi yampsa kuva li susa munhu yelweyo abandleni. Hi ku yendla leswo ma ta vhikela ntlhambi naswona bandla li ta tshama na li basile. — Mat. 18:17.

KU LULAMISA SWIDJOHO SWASWIKULU

²¹ Swidjoho swin’wani swaswikulu swa ku fana ni wuntunga la swa masangu, ku mbuyeta, kumbe wanuna a famba masangu ni wanuna mun’wani kumbe ku wonha ndhuma ya mun’wani, ku djikela Xikwembu, ku rhuka Xikwembu ni ku gandzela swikwembu swa mavunhwa a swi ringananga swaku lweyi a nga djoheliwa a rivalela munhu lweyi a nga mu djohela. (1 Ko. 6:9, 10; Gal. 5:19-21) Leswi swidjoho swoleswo swi nga chimisaka a bandla ni mahanyelo yamanene lawa li nga na wona, swi fanele swi ya tivisiwa madoda ya bandla leswaku ma swi lulamisa. (1 Ko. 5:6; Yak. 5:14, 15) Vanhu van’wani va nga ha byela madoda leswaku va yendle swidjoho swaswikulu kumbe va ma byela swaku munhu mun’wani a yendle xidjoho xaxikulu. (Lev. 5:1; Yak. 5:16) A swi na mhaka swaku madoda ma swi tivise ku yini swaku munhu lweyi a nga tsakamisiwa a yendle xidjoho xaxikulu, madoda mambirhi ma rhanga hi ku ya kambela mhaka leyo. Loko ku tiyisekiwa swaku munhu yelweyo hikakunene a yendle xidjoho xaxikulu, ntlawa wa madoda wu ta vumba comissão la ku yavanyisa leli vumbiwaka hi madoda manharhu swaku ma lulamisa mhaka ya kona.

²² Madoda ma wu hlayisa kahle ntlhambi hi ku lava tindlela ta ku wu vhikela ka nchumu wun’wani ni wun’wani lowu wu nga wonhaka wunghanu la wona na Yehovha. Naswona ma zama ku li tirhisa kahle Rito la Xikwembu leswaku ma laya lava va wonhaka va tlhela va va pfuna swaku va tlhela va va vanghanu va Yehovha. (Yud. 21-23) Leswo swi twanana ni nkongomiso lowu Pawulo a nga wu nyika Timotiya, nkama a nga te: “Phambheni ka Xikwembu ni ka Kreste Yesu, lweyi a nga ta yavanyisa lava hanyaka ni lava nga fa . . . na ku rhuma ni ku: Laya, u kawuka swinene, u khongotela hi ku lehisa mbilu ni ku djondzisa kahle.” (2 Tm. 4:1, 2) Leswaku madoda ma yendla leswo swi nga ha lava nkama wa wunyingi, kambe i yin’we ya mintirho leyi ma faneleke ma yi yendla. A bandla li yi khensa hintamu minzamu leyi madoda ma yi yendlaka naswona li ma “hlonipha hintamu.” — 1 Tm. 5:17.

²³ Loko se swi tiveka kahle swaku munhu a ni nandzu, xikongomelo xa madoda i ku mu pfuna swaku a pfuxeta wunghanu la yena na Yehovha. Loko a tisolile hikakunene naswona madoda ma swi kota ku mu pfuna nkama lowu ma mu layaka na a li yexe kumbe na ku ni timboni tin’wani ka comissão la ku yavanyisa, ku layiwa koloko ku ta pfuna yena ku tlhela ku basopisa lava a nga na vona. (2 Sam. 12:13; 1 Tm. 5:20) Ka swiyimu hinkwaswu, loko munhu a layiwa a gama a vekeliwa swipimelo. Leswo swi ta mu pfuna swaku ‘a lulamisela tindlela ta yena ti ku nthwii’. (Heb. 12:13) Se hi nkama wa kona swipimelo leswo swi nga ha susiwa loko swi tikomba swaku se a ni wunghanu lalinene na Yehovha.

XITIVISO XA KU SOLIWA

²⁴ Loko a comissão la ku yavanyisa li fikela magamu ya leswaku mudjohi a tisolile, kambe swi nga yendleka mhaka yoleyo yi tiviwa abandleni kumbe amugangeni kumbe swi lava swaku bandla li basopisiwa hi munhu yelweyo, ku ta yendliwa xitiviso hi nkama wa Ntlhanganu wa Mahanyelo ni Ntirho wa Hina Vakreste. Ku fanele ku vuliwa leswi: “[Makwerhu ximanyamanyani] a soliwile.”

LOKO MUNHU A FANELE A SUSIWA BANDLENI

²⁵ Minkama yin’wani swi nga yendleka munhu yelweyo a yendle xidjoho xaxikulu hintamu naswona a pele hi nhloko ka xona, a nga tisoli a tlhela a nga pfumeli ku pfuniwa hi madoda, funtshi swi nga yendleka mudjohi a nga kombisi ‘mintirho leyi kombisaka swaku se a tisolile’ phambheni ka comissão la ku yavanyisa. (Min. 26:20) Se ka xiyimu lexo ku ta yendliwa yini? Ka mhaka leyo munhu lweyi a kalaka a nga tisolanga swi nga lava swaku a susiwa abandleni. Leswo swi ta yendla swaku a nga titlhanganisi ni vanhu va Yehovha lava va nga basa. Mahanyelo ya yena ya ku biha a ma nga ha ta tama ma chimisa bandla, leswo swi ta yendla leswaku bandla li tama li basile li tlhela li va ni wunghanu lalinene na Yehovha ni ku vhikela vito lalinene la bandla. (Det. 21:20, 21; 22:23, 24) Nkama mupostolo Pawulo a nga tiva hi ta mahanyelo ya tingana ya munhu mun’we abandleni la Korinto, a tsalele madoda a ku: “Mi fanele mi nyikela munhu yelweyo ka Sathana . . . leswaku ku hlayisiwa mapimiselo ya bandla.” (1 Ko. 5:5, 11-13) Pawulo a tlhele a vulavula hi ku susiwa ka vanhu va nkama wa vapostolo lava va nga tshika ntiyiso ni ku va ni mahanyelo ya ku biha. — 1 Tm. 1:20.

²⁶ Loko a comissão la ku yavanyisa li boha leswaku mudjohi lweyi a kalaka a nga tisolanga a fanele a susiwa abandleni li fanele li mu tivisa kolanu li tlhela li mu byela swaku hi mhaka muni a susiwa hi ku ya hi Matsalwa. Loko ma yendla leswo, a comissão la ku yavanyisa li ta mu byela swaku loko a vona leswaku a nga yavanyisiwanga kahle funtshi a lava swaku a mhaka ya yena yi tlhela yi thethiwa a nga tsala karta a vula swaku hi mhaka muni a lava leswo. Ku sukela hi siku leli mudjohi a byeliwaka swaku a ta susiwa abandleni a fanele a nyikiwa 7 wa masiku na swi nga se tivisiwa abandleni. Se loko munhu a kombela swaku mhaka ya yena yi tlhela yi thethiwa, a ntlawa wa madoda wu fanele wu tekela ku bula ni mudjikelezi hi swona se yena a ta langa madoda lawa ma fanelekaka kahle leswaku ma vumba a comissão leli li nga ta thetha mhaka yoleyo. A comissão leli li ta yendla hinkwaswu swaku li thetha a mhaka ya kona ndzeni ka vhiki lolelo va nga yamukela xikhalu xolexo. Loko munhu a kombela swaku a mhaka ya yena yi tlhela yi thethiwa, a ku susiwa ka yena bandleni a ku fanelanga ku tivisiwa. Hi nkama wolowu wa wun’we munhu yelweyo a nga ha pfumeleliwa leswaku a chumayela kambe a nga fanelanga a hlamula kumbe ku hamba swikhongelo ka mintlhanganu kumbe ku yendla mintirho yin’wani abandleni.

²⁷ Phela a lulamiselo la leswaku munhu a kombela swaku a mhaka ya yena yi tlhela yi thethiwa i lulamiselo la lirhandzu swinene, naswona swi tlhela swi nyima mudjohi mukhandlu wa leswaku a tlhela a yingiseliwa. Kambe loko munhu yelweyo a boha swaku a nga ta ya ka comissão leli li nga ta tlhela li thetha a mhaka ya yena naswona a laveteliwile makhambi ya manyingi leswaku a va kona kambe a nga humeleli, ku ta yendliwa xitiviso xa leswaku a susiwile bandleni.

²⁸ Loko mudjohi a nga kombeli swaku mhaka ya yena yi tlhela yi thethiwa, a comissão la ku yavanyisa li ta mu tlhamusela lisima la ku hundzuka ni leswi a faneleke a swi yendla leswaku a tlhelela bandleni hi nkama wa kona. Leswo i swinene naswona swi kombisa lirhandzu funtshi swi fanele swi yendliwa akuva swi pfuna munhu yelweyo akuva a txintxa mahanyelo ya yena naswona hi ku famba ka nkama a tlhela a swi tsakela ku tlhelela ka nhlengeletanu ya Yehovha. — 2 Ko. 2:6, 7.

XITIVISO XA KU SUSIWA ABANDLENI

²⁹ Loko swi laveka swaku mudjohi lweyi a kalaka a nga hundzukanga a susiwa bandleni, ku ta yendliwa xitiviso lexi: “[Ximanyamanyani] a nga ha li Mboni ya Yehovha.” Xitiviso lexi xi ta tirhela ku basopisa vamakwerhu va ku tshembeka abandleni leswaku va nyima ku titlhanganisa ni munhu yelweyo. — 1 Ko. 5:11.

KU TSUKULA KUMBE KU TSHIKA NHLENGELETANU

³⁰ Marito lawa ma nge “ku tsukula kumbe ku tshika nhlengeletanu” ma tirha ka munhu lweyi a nga tsakamisiwa naswona hi ku swi lava a tshika ku va Mukreste. A nga yendla leswo hi ku vhela a hlaya swaku yena a nga ha swi lavi ku va Mboni ya Yehovha kumbe a swi kombisa hi mintirho ya yena, hi xikombiso a tipeta ka mintlawa leyi Yehovha a yi nyenyaka leyi lwisanaka ni leswi Bibele li swi djondzisaka naswona yi nga ta yavanyisiwa hi Yehovha. — Esa. 2:4; Nhl. 19:17-21.

³¹ Loko mupostolo Yohani a vulavula hi lava va nga tshika lipfumelo la vona, lava va nga hanya ka minkama ya yena a te: “Va humile ka hina, a va nga li va hina; hikusa loko a va li va hina, a va ta va na hina ni swoswi.” — 1 Yo. 2:19.

³² Loko munhu a tsukula nhlengeletanu, xiyimu xa yena phambheni ka Yehovha xi hambane hintamu ni makwerhu lweyi a nga hola, lweyi a kalaka a nga ha hlangameli ka ntirho wa ku chumayela. Makwerhu lweyi, swi nga yendleka a holile hileswi a nga tshika ku lerha Rito la Xikwembu siku ni siku. Kumbe swi nga yendleka a kumane ni swikarhatu ka wutomi la yena, kumbe ku hluphiwa naswona a nga ha swi hisekeli ku tirhela Yehovha. Madoda ni van’wani abandleni va nga ha tama va mu pfuna makwerhu lweyi a nga hola. — Rom. 15:1; 1 Tes. 5:14; Heb. 12:12.

³³ Kambe loko Mukreste a langa ku tsukula nhlengeletanu, a bandla li nga ha nyikiwa xitiviso lexi: “[Ximanyamanyani] a nga ha li Mboni ya Yehovha.” Munhu yelweyo a khomiwa ku fana ni munhu lweyi a nga susiwa bandleni.

KU TLHELELA BANDLENI

³⁴ Munhu lweyi a nga susiwa bandleni kumbe lweyi a nga tshika nhlengeletanu, swi nga koteka ku a tlhela a tlhelela loko a kombisa hi ku helela swaku wa tisola ni swaku a txintxile naswona swi lava a kombisa hi nkama wa ku karhi swaku a ma tshikile mahanyelo ya yena ya ku biha naswona a lava ku va ni wunghanu lalinene na Yehovha. Madoda ma fanele ma tshika nkama wu hundza, swi nga ha lava tiwheti ta tinyingi, lembe kumbe ku tlula hi ku ya hi swiyimu, leswaku munhu a kombisa leswaku hikakunene a tisolile. Loko ntlawa wa madoda wu yamukela a xikombelo xa ku tlhelela ka munhu abandleni hi karta, a comissão la ku tlhelisela munhu bandleni li ta vulavula ni munhu yelweyo. A comissão li ta kambela swaku munhu yelweyo wa yi ‘kombisa mintirho leyi kombisaka swaku se a tisolile’ li gama li vona swaku swa fanela kuva munhu yelweyo a tlhelela kumbe a swi faneli hi nkama wolowo. — Min. 26:20.

³⁵ Loko munhu lweyi a kombelaka ku tlheliseliwa bandleni a susiwe ka bandla lin’wani, a comissão la ku tlhelisela munhu abandleni la bandla leli a nga ka lona swoswi, li ta tlhangana na yena swaku li kambela xikombelo xa yena. Loko a comissão la bandla lolelo li swi vona swaku swa fanela swaku a tlheliseliwa, li ta posa xikombelo ka ntlawa wa madoda wa bandla leli a nga susiwa ka lona. Ma comissão hamambirhi ma ta tirhisana leswaku ma tiyiseka swaku ku yendliwe hinkwaswu leswi lavekaka leswaku ku yendliwa xiboho xa kahle. Kambe a xiboho xa leswaku munhu a tlheliseliwa bandleni xi ta yendliwa hi comissão la bandla leli munhu yelweyo a nga susiwa ka lona.

XITIVISO XA KU TLHELISELA MUNHU BANDLENI

³⁶ Loko comissão la ku tlhelisela munhu bandleni li tiyiseka swaku munhu lweyi a nga susiwa kumbe a nga tsukula nhlengeletanu a tisolile hikakunene naswona swa fanela swaku a tlheliseliwa bandleni, a mhaka yoleyo yi ta tivisiwa ka bandla leli a nga susiwa ka lona. Loko swi ku munhu yelweyo swoswi a ka bandla lin’wani, xitiviso xi ta tlhela xi tivisiwa ni ka bandla leli a nga ka lona swoswi. Ka xitiviso xolexo ku fanele ku vuliwa leswi: “[Ximanyamanyani] a tlheliseliwile bandleni tanihi Mboni ya Yehovha.”

SWIYIMU LESWI KHUMBAKA VANA LAVA NGA TSAKAMISIWA

³⁷ Swidjoho swaswikulu leswi yendliwaka hi vana lava nga tsakamisiwa, swi fanele swi byeliwa madoda. Loko madoda ma kambisisa mhaka ya ku fana ni leyo, swi nga yampsa kuva vapsali lava nga tsakamisiwa va va kona. Xikongomelo xa vapsali lava i kuva va tirhisana ni comissão la ku yavanyisa, ku nga li kuva va vhikelela vana va vona ka xidjoho lexi va nga xi yendla hi ku sivela madoda swaku ma va laya. Swi hi ndlela yoleyo loko ku layiwa vavakulu, a comissão la ku yavanyisa li tikarhatela ku pfuna mudjohi swaku a tlhela a va ni wunghanu lalinene na Yehovha. Kambe loko n’wana yelweyo a nga kombisi ku tisola, a fanele a susiwa bandleni.

SWIYIMU LESWI KHUMBAKA VACHUMAYELI VA KU KALA VA NGA TSAKAMISIWANGA

³⁸ I yini leswi yendliwaka loko muchumayeli wa ku kala a nga tsakamisiwanga a yendla xidjoho xaxikulu? Leswi a kalaka a nga tsakamisiwanga a nge susiwi bandleni, kambe va nga mu nyika switsundzuxu wa lirhandzu leswi nga ta mu pfuna kuva ‘a lulamisela tindlela ta yena ti ku nthwii’ hikusa swi nga yendleka a nga yi twisisi hi ku helela minawu ya Bibele. — Heb. 12:13.

³⁹ Loko mudjohi lweyi a kalaka a nga tsakamisiwanga a nga tisoli loko madoda mambirhi se ma bule na yena swaku ma mu pfuna, a bandla li fanele li tivisiwa. Ka xiyimu lexo ku yendliwa xitiviso lexi: “[Ximanyamanyani] a nga ha li muchumayeli wa ku kala a nga tsakamisiwanga.” A bandla li ta vona munhu yelweyi tanihi munhu wa misava. Hambileswi mudjohi yelweyo a kalaka a nga susiwanga bandleni, Vakreste va ta tivonela swaku va nga mahi xinghanu na yena. (1 Ko. 15:33) Munhu lweyi a nga ka xiyimu lexo, a nga pfumeleliwi ku nyikela relatoriyu la ntirho wa nsimu.

⁴⁰ Hi ku famba ka nkama, muchumayeli lweyi a kalaka a nga tsakamisiwanga lweyi a nga nyima ku va muchumayeli hi mhaka leswi a nga yendla xidjoho, swi nga yendleka a lava ku tlhela a chumayela. Ka xiyimu lexo madoda mambirhi ma ta tlhangana na yena ma kambela swaku wunghanu la yena na Yehovha lo yini. Se loko a faneleka ku tlhela a va muchumayeli wa ku kala a nga tsakamisiwanga, ku ta yendliwa xitiviso lexi: “[Ximanyamanyani] a tlhele a pfumeleliwa ku va muchumayeli lweyi a kalaka a nga tsakamisiwanga.”

YEHOVHA A KATEKISA WUGANDZELI LELI NGA NI KU RHULA LI TLHELA LI TENGA

⁴¹ Hinkwavu lava namuntlha va tipatsaka ni bandla la Xikwembu, va nga tsaka hi swilo hinkwaswu leswi Yehovha a swi nyikaka vanhu va yena. Phela Yehovha a hi nyika swilo leswi hi swi lavaka naswona a hi pfumali nchumu. A tlhela a hi djondzisa ntiyiso wa Bibele lowu hi pfunaka. Hi tlhela hi tikhorisa hi ku vhikeleliwa hi Yehovha hi ku tirhisa madoda lawa ma kongomisiwaka hi Kreste. (Ps. 23; Esa. 32:1, 2) Ku hanya xikarhi ka vamakwerhu lava tirhisanaka hi vun’we va tlhela va twanana ka masiku lawa ya wugamu, swi hi yendla hi titwa hi vhikelelekile.

⁴² Loko hi tama hi rhula hi tlhela hi yendla swaku bandla li tshama na li basile, hi va hi tshika ntiyiso wa Mfumu wu phatima. (Mat. 5:16; Yak. 3:18) Hi ku katekisiwa hi Yehovha hi ta tsaka hintamu hi ku vona vanhu va vanyingi na va mu tiva va tlhela va tipatsa na hina swaku hi yendla ku rhandza ka Yehovha.