Tama U Va Kusuhi Ni Nhlengeletanu Ya Yehovha

MUDJONDZISIWA Yakobe a tsale leswi: “Tshinelani ka Xikwembu kutani na xona xi ta tshinela ka n’wina.” (Yak. 4:8) Hambileswi Yehovha a nga Mukulu a tlhela a li ka xitshamu xa ku tlakuka wa swi yingisa swikhongelo swa vanhu lava kalaka va nga hetisekanga. (Min. 17:27) Leswaku hi tshinela ka Xikwembu swi lava leswaku hi va ni wunghanu la le kusuhi na xona. Hi nga swi yendlisa ku yini leswo? Ndlela yin’wani ya ku yendla leswo i ku khongela ka xona hi mbilu hinkwayu. (Ps. 39:12) Ndlela yin’wani i ku va hi djondza Bibele siku ni siku. Loko hi yendla leswo, hi ta mu tiva Yehovha, hi ta tiva swikongomelo swa yena ni leswi a lavaka ku hi yendlela swona. (2 Tm. 3:16, 17) Hi ku yendla leswo, hi ta djondza ku mu rhandza ni ku chava ku mu kwatisa. — Ps. 25:14.

² Swo koteka ntsena ku va ni wunghanu na Yehovha hi mhaka ya N’wana wa yena Yesu Kreste. (Yoh. 17:3; Rom. 5:10) A ku na munhu amisaveni lweyi a nga kotaka ku hi pfuna ku swi twisisa kahle leswi Yehovha a swi pimisaka loko ku nga li N’wana wa yena Yesu. Yesu a a mu tiva hintamu Papayi wa yena, hi mhaka leyo a ze a vula leswi: “A nga kona lweyi a mu tivaka N’wana loko ku nga li Papayi. Naswona a nga kona lweyi a mu tivaka Papayi loko ku nga li N’wana ni lweyi N’wana a tsakelaka ku mu tivisa ka yena.” (Luk. 10:22) Hi mhaka leyo, loko hi djondza mabuku ya ku sukela ka Matewu ku ya ka Yohani swaku hi twisisa leswi Yesu a swi pimisaka ni leswi a titwisaka xiswona, hi va hi tiva leswi Yehovha a swi pimisaka ni leswi a titwisaka xiswona, naswona leswo swi hi pfumelela ku va ni wunghanu la kusuhi ni Xikwembu.

³ Leswaku hi va vanghanu va Yehovha hi fanele hi va kusuhi ni nhlengeletanu ya yena lani misaveni, leyi hi pfunaka ku yendla ku rhandza ka Xikwembu, hi tlhela hi swi tiva swaku a tirhisa Yesu swaku a rhangela. Matewu 24:45-47 yi tlhela yi hi komba swaku Yesu a tirhisa “mutirhi wa ku tshembeka ni wa ku tlhariha” swaku a hi nyika leswi hi swi lavaka swaku hi kulisa wunghanu la hina na Yehovha. Yehovha a tirhisa mutirhi lweyi swaku a hi kutxa swaku hi tama hi djondza Bibele siku ni siku, hi ya mintlhanganwini hi tlhela hi chumayela “mahungu ya ku tsakisa ya Mfumu”. (Mat. 24:14; 28:19, 20; Yox. 1:8; Ps. 1:1-3) Hambileswi mutirhi wa ku tshembeka ni wa ku tlhariha a kalaka a nga hetisekanga, a hi kanakani swaku a tirhisiwa hi Yehovha. Ku va kusuhi ni nhlengeletanu ya Yehovha lani misaveni hi tlhela hi pfumela ku kongomisiwa hi yona, swi ta hi tshineta kusuhi na Yena swi tlhela swi hi pfuna ku langutana ni swikarhatu.

HI MHAKA MUNI MIRINGO YI YA YI TALA?

⁴ Swi nga yendleka se i khale na u li Mboni ya Yehovha naswona se u kumane ni miringo ya ku tala swinene, kumbe swi nga yendleka wa ha li ku nghena ka ntiyiso naswona u swi vonile leswaku Sathana a yendla hinkwaswu leswaku a hambukisa hinkwavu lava yingisaka Yehovha. (2 Tm. 3:12) Hambiloko u kumana ni miringo ya ku tala kumbe swikarhatu swa ku tshamisa ku yini, u nga godoli kumbe u hela matimba, tiyiseka leswaku Yehovha a ta ku pfuna naswona a ta ku nyika wutomi la ku kala li nga heli. — Heb. 13:5, 6; Nhl. 2:10.

⁵ Hinkwerhu hi nga ha nyimela ku kumana ni swikarhatu ka misava leyi fumiwaka hi Sathana. Ku sukela Mfumu wa Xikwembu wu vekiwa hi 1914, Sathana ni madimoni ya yena a va ha pfumeleliwi swaku va nghena matilweni. Leswo swi yendla swaku swikarhatu swi ya swi tala lani misaveni, naswona malandza ya Yehovha ma ya ma hluphiwa hintamu hikusa Sathana a kwatile hintamu. Leswo swi kombisa swaku hi hanya ka masiku ya wugamu ya misava leyi fumiwaka hi Sathana. — Nhl. 12:1-12.

⁶ Leswi Sathana va nga mu danisa, a ni xiviti hileswi a tivaka swaku yi mu chayelile. Yena ni madimoni ya yena va yendla hinkwaswu leswi va nga swi kotaka leswaku va kavanyeta ntirho wa ku chumayela ni ku tlhela va wonha ku twanana ka malandza ya Yehovha. Leswo swi yendla leswaku hi va ka nyimpi leyi tlhamuseliwaka ka Bibele. Lona li li: “A hi lwi ni vanhu kambe hi lwa ni mimfumu, ni varhangeli, ni tihosi ta misava leyi nga ya munyama, ku nga madimoni ya manyingi lawa ma nga matilweni.” Se hi nga yendla yini leswaku hi hlula ka nyimpi leyi na hi li tlhelweni ka Yehovha? A hi fanelanga hi godola, hi fanele hi tama hi yambala mpahla ya nyimpi leswaku hi lwisana ni mintlhamu ya Sathana. (Efe. 6:10-17) Leswaku leswo swi koteka, swi lava hi tiyisela.

HI NGA SWI KOTISA KU YINI KU TIYISELA?

⁷ Ku tiyisela swi vula ku kota ku gwenta swikarhatu leswi u nga ha kumanaka na swona. Ka hina Vakreste ku tiyisela swi vula ku yendla swaswinene hambiloko hi hluphiwa, ntirho wa hina wu yalisiwa kumbe hi kumana ni swikarhatu swaswikulu leswi nga ha ringaka ku tshembeka ka hina ka Xikwembu. Kambe leswo a swi vevuki, swi lava hi djondza ku tiyisela naswona swi teka nkama. Loko lipfumelo la hina li tiya swi ta hi vevukela ku tiyisela swikarhatu. Loko hi kota ku tiyisela swikarhatu swaswitsongo leswi hi kumanaka na swona nkama hi sungulaka ku va Vakreste, hi ta tiya hi ku ndee hi tlhela hi kota ku tiyisela swikarhatu swaswikulu leswi hi nga ta kumana na swona ka nkama lowu taka. (Luk. 16:10) A hi fanelanga hi nyimela swaku hi kumana ni swikarhatu swaswikulu swaku hi djondza ku tiyisela, hi fanele hi rhanga hi ku tinyimisela swoswi swaku hi ta kota ku hlula swikarhatu. Loko Pedru a vulavula hi ku tiyisela a te ku fanele ku fambisana ni wumunhu lin’wanyani leli tsakisaka Xikwembu. Yena a te: “Zamani ku yengetela wunene ka lipfumelo la n’wina, ka wunene mi yengetela wutivi, ka wutivi mi yengetela ku tikhoma, ka ku tikhoma mi yengetela ku tiyisela, ka ku tiyisela mi yengetela ku tinyiketela ka Xikwembu, ka ku tinyiketela ka Xikwembu mi yengetela ku rhandza vamakwenu, ka ku rhandza vamakwenu mi yengetela ku rhandza vanhu hinkwavu.” — 2 Pe. 1:5-7; 1 Tm. 6:11.

⁸ Loko Yakobe a vulavula hi lisima la ku tiyisela a te: “Vamakwerhu, tsakani loko mi kumana ni mindzingo ya yinyingi, hikusa ma swi tiva swaku lipfumelo la n’wina leli nga ringiwa li psala ku tiyisela. Kambe pfumelelani ku tiyisela ku yendla ntirho wa kona, leswaku mi ta helela mi nga na xa ku soliwa ka hinkwaswu, mi nga pfumali nchumu.” (Yak. 1:2-4) Vona swaku lani Yakobo a vule swaku hi nga tsaka loko hi kumana ni miringo ya yinyingi hikusa leswo swi hi pfuna ku tiyisela. Kambe swi nga kotekisa ku yini swoleswo? U swi vonile swaku lani a tlhele a vula swaku ku tiyisela ku yendla ntirho wa kona? Leswo swi kombisa swaku ku tiyisela swi ta hi pfuna ku yampsisa wumunhu la hina hi tlhela hi yamukeleka ka Xikwembu. Phela loko hi kumana ni swikarhatu siku ni siku hi tlhela hi swi hlula, hi ya hi swi kota ku tiyisela. Ku tiyisela ku tlhela ku hi pfuna ku va ni wumunhu lin’wani leli lavekaka ka Vakreste.

⁹ Loko hi tiyisela hi tsakisa Yehovha, naswona a ta hi nyika wutomi la ku kala li nga heli loko hi tama hi tiyisela. Yakobe a tlhele a ku: “Wa tsaka munhu lweyi a tamaka a tiyisela mindzingo, hikusa loko se a yi hlulile a ta kuma harhi ya wutomi, leyi Yehovha a nga yi tshembisa lava tamaka va mu rhandza.” (Yak. 1:12) Phela ku tiyisela ku hi pfuna leswaku hi lwela ku kuma wutomi la ku kala li nga heli. Loko hi nga swi koti ku tiyisela, a hi nge swi koti ku tama hi va kona ka ntiyiso. Naswona loko hi nga tiyiseli, Yehovha a nga hi tekela moya wa yena wa ku kwetsima se hi nga ha swi koti ku kombisa mihandzu ya moya wa ku kwetsima naswona hi ta hanya ku fana ni vanhu va misava leyi.

¹⁰ Leswaku hi kota ku tiyisela swikarhatu ka minkama leyi ya wugamu, hi fanele hi vona swikarhatu na ku li mukhandlu wa ku djondza ku tiyisela. Khumbuka swaku Yakobe a tsale leswi: “Vamakwerhu tsakani loko mi kumana ni mindzingo ya yinyingi.” Phela leswo a swi vevuki hikusa hi nga ha biwa, hi poyiliwa, kambe swa laveka hikusa leswaku hi kuma wutomi la ku kala li nga heli swi ta lava hi tiyisela. Leswi nga humelela vapostolo aminkameni ya khale swi kombisa swaku swa koteka ku tsaka hambiloko hi kumana ni swikarhatu. Buku la Mintirho li li: “Kutani va vitana vapostolo, va va ba, va va byela swaku va tshika ku vulavula hi vito la Yesu va gama va va tshika va famba. Kutani va huma tribunali na va tsakile hileswi va nga vuliwa lava faneliwaka hi ku hluphiwa hi mhaka ya vito la Yesu.” (Min. 5:40, 41) Leswi a swi yendla vapostolo va tsaka hileswi a va swi tiva swaku a va hluphiwa hileswi a va yingisa Yesu ni hi leswi a va tsakeliwa hi Yehovha. Hi ku famba ka nkama, loko pedru a tsale karta la yena la ku sungula a vulavule hi lisima la ku tiyisela hi mhaka ya swa ku lulama. — 1 Pe. 4:12-16.

¹¹ Mhaka leyi ya ku fana yi humelelile ka Pawulo na Silasi nkama na va yendla ntirho wa vona wa wumisiyonariyu aFilipiya hikusa a va lumbetiwa swaku va pfuxa a mpfilumpfilu adoropeni ni ku tlhela va djondzisa swilo swa ku kala swi nga pfumeleliwi hi ku ya hi nawu. Hi mhaka leyo, va fumbuteliwile ku ku mphum va tlhela va petiwa djele. Bibele li vula swaku “xikarhi ka wusiku” na va li djele naswona na va nga tenderiwi swilondza swa vona leswi va nga swi kuma hileswi va nga biwa, “Pawulo na Silasi a va li ku khongeleni ni le ku dzuniseni ka Xikwembu hi tinsimu funtshi swib’ochwa leswin’wani a swi va twa.” (Min. 16:16-25) Pawulo ni munghanu wa yena Silasi a va nga teki swikarhatu tanihi mukhandlu wa ku kombisa ku tshembeka ka vona ka Xikwembu ntsena, kambe a va swi teka tanihi mukhandlu wa ku nyikela wumboni ka vanhu lava a va tinyimiselile ku twa mahungu ya ku tsakisa hikusa wutomi la vona a li li nghozini. Hi siku loleli la lin’we, mulanguteli wa djele ni ndjangu wa yena va ve vadjondzisiwa hi mhaka leswi va nga twa mahungu ya ku tsakisa. (Min. 16:26-34) Pawulo na Silasi a va mu tshemba hi ku helela Yehovha ni matimba ya yena naswona a va tiyiseka swaku a a ta va pfuna ka xikarhatu lexi a va kumana na xona. Vhela Yehovha a va pfunile.

¹² Yehovha wa ha lava leswaku hi tiyisela. Hi mhaka leyo, a hi nyika hinkwaswu leswi hi swi lavaka swaku hi tama hi tiyisela. Hi xikombiso, a hi nyika Bibele leli hi pfunaka swaku hi mu tiva ku yampsa ni ku tiva leswi a lavaka ku hi yendlela swona li tlhela li hi pfuna ku tiyisa lipfumelo la hina. Handle ka leswo, a hi nyike vamakwerhu lava hi mu tirhelaka xikan’we na vona. A tlhele a hi pfumelela swaku hi tshinela ka yena hi xikhongelo. Phela yena wa swi twa swikhongelo swa hina swa ku mu dzunisa leswi sukaka mbilwini. Wa swi twa loko hi kombela ku pfuniwa kuva hi tama hi tshama na hi basile. (Filp. 4:13) A hi khohlwi nakambe swaku switshembiso leswi a hi yendlelaka swona swa nkama lowu taka, swi hi nyika ntamu wa ku tama hi tiyisela. — Mat. 24:13; Heb. 6:18; Nhl. 21:1-4.

HI NGA YENDLA YINI SWAKU HI TIYISELA SWIKARHATU SWA KU HAMBANAHAMBANA?

¹³ Swikarhatu leswi hi kumanaka na swona namuntlha swa fana ni leswi vadjondzisiwa va Yesu a va kumana na swona khale. Namuntlha Timboni ta Yehovha ta hluphiwa, ti biwa ti tlhela ti poyiliwa hi valala va tona lava va nga byeliwa mavunhwa mayelana na tona. Ku fana ni ka nkama wa vapostolo, ku tala ka valala lava lwisanaka ni Timboni ta Yehovha va hlohloteliwa hi wukhongeli la mavunhwa, leli djondzisaka mavunhwa ni tidjondzo leti lwisanaka ni Rito la Xikwembu. (Min. 17:5-9, 13) Minkama yin’wani vanhu va Yehovha va kuma ku rhula hi ku va va lwela timfanelo leti va nga na tona hi ku ya hi nawu, leti va nyikiwaka tona hi mimfumu. (Min. 22:25; 25:11) Kambe minkama yin’wani mimfumu yi tsimbisa ntirho wa hina leswaku hi nga chumayeli. (Ps. 2:1-3) Kambe ka swiyimu hinkwaswu leswo, hi nyima hi ku dzi hi tekelela xikombiso xa vapostolo, lava nge te: “Hi fanele hi yingisa Xikwembu lexi nga Hosi ku tlula vanhu.” — Min. 5:29.

¹⁴ Leswi namuntlha vanhu va yaka va ma rhandza hintamu matiko ya vona, swi yendla leswaku vanhu va Yehovha va hlohloteliwa ku tshika ku yingisa nawu wa Yehovha wa ku chumayela mahungu ya ku tsakisa. Malandza ya Yehovha ma swi twisisa kahle leswaku ma fanele ma tivonela ka ku gandzela “xiharhi xa ku chavisa hintamu ni xifaniso xa xona”, ku nga leswi ku vulavuliwaka hi swona ka buku la Nhlawutelo 14:9-12. Naswona va ma twisisa kahle marito ya Yohani lama nge: “Hi yona mhaka leyi vakwetsimi lava yingisaka minawu ya Xikwembu ni lava khomaka swi tiya ka lipfumelo la Yesu va faneleke va tiyisela.”

¹⁵ Tinyimpi, ku pfukeliwa, ku xanisiwa hi mimfumu swi nga ha hi kavanyeta ku tirhela Xikwembu na hi chunsekile. Kumbexana swi nga yendleka swi nga koteki kuva hi tlhangana swaku hi khoma mintlhanganu ya bandla, swi nga yendleka swi nga koteki ku vulavulisana ni betele kumbe swi nga koteki ku pfuxeliwa hi mudjikelezi wa sirkwitu, kumbe swi nga koteki ku yamukela a mabuku ya nhlengeletanu. Se loko ku humelela swilo swa ku fana ni leswi, i yini leswi wena u nga swi yendlaka?

¹⁶ Zama ku yendla leswi: Yendla hinkwaswu u nga swi kotaka hi ku ya hi xiyimu lexi u nga ta va ka xona. Swi nga yendleka swa ha koteka swaku u va ni djondzo ya wena wexe; naswona hi ntolovelo loko hi li ka swiyimu swa ku fana ni leswi, swi nga yendleka swi koteka kuva hi tlhangana hi mintlawa yayitsongo kaya ka vamakwerhu. Ku nga ha tirhisiwa mabuku ya khale kumbe Bibele leswaku ku fambisiwa mintlhanganu. U nga karhateki funtshi u nga rhurhumeli, hi ntolovelo a Ntlawa Lowu Rhangelaka, hi nkamanyana wu ta lavetela tindlela swaku swi koteka kuva wu vulavulisana ni vamakwerhu lava rhangelaka.

¹⁷ Hambiloko u tikuma na u hambanisiwile ni vamakwerhu, khumbuka swaku wena a wu wexe funtshi a wu hambanisiwanga na Yehovha ni N’wana wa yena Yesu Kreste. Ntshembo wa wena wu nga tama wu tiya. Yehovha wa ha ta tama a swi yingisa swikhongelo swa wena a tlhela a ku tiyisa hi moya wa yena wa ku kwetsima. Yani ka yena swaku a ku nyika minkongomiso. Khumbuka swaku u mutirheli wa Yehovha ni mulandzeli wa Yesu, hi mhaka leyo wu tirhisi kahle mukhandlu lowu u vaka na wona wa ku chumayela mahungu ya ku tsakisa. Yehovha a ta yi katekisa minzamu leyo, naswona hi nkamanyana van’wani swi nga yendleka va tipatsa na wena ka wugandzeli la ntiyiso. — Min. 4:13-31; 5:27-42; Filp. 1:27-30; 4:6, 7; 2 Tm. 4:16-18.

¹⁸ Ku fana ni vapostolo ni van’wani, na wena swi nga yendleka xikarhatu lexi u kumanaka na xona xi li veka nghozini wutomi la wena. Ka xiyimu lexo, tshemba “Xikwembu lexi pfuxaka lava nga fa.” (2 Ko. 1:8-10) Ntshembo lowu u nga na wona wa ku pfuxiwa ka lava nga fa wu nga ku pfuna swaku u langutana ni xikarhatu hambi xo va xikulu kandjhani. (Luk. 21:19) Yesu a hi vekele xikombiso xaxinene, hikusa yena a a swi tiva swaku ku tshembeka ka yena ka Xikwembu loko a langutana ni swikarhatu, a swi ta pfuna van’wani swaku na vona va tiyisela loko va langutana ni swikarhatu. Hi ku fana, na wena loko u tiyisela loko u langutana ni swikarhatu swi ta pfuna van’wani swaku na vona va tiyisela loko va langutana na swona. — Yoh. 16:33; Heb. 12:2, 3; 1 Pe. 2:21.

¹⁹ Handle ka ku hluphiwa ni ku kanetiwa, ku ni swikarhatu swin’wani leswi hi nga ha kumanaka na swona. Hi xikombiso, swi nga ha hi godolisa loko vanhu va yala nsin’wini nkama hi va chumayelaka, kumbexana minkama yin’wani hi nga ha vabya kumbe hi karhateka mbilwini. Minkama yin’wani hi nga ha karhateka hileswi hi kalaka hi nga swi koti ku yendla swilo leswi a hi navela ku swi yendla hileswi hi kalaka hi nga hetisekanga. Phela mupostolo Pawulo na yena a kumane na swona swikarhatu swa ku fana ni leswo, leswi swi nga yendla swaku swi mu karhatela ku hetisisa ntirho wa yena. (2 Ko. 12:7) Funtshi a hi mupostolo Pawulo ntsena, Epafrodito na yena, ku nga Mukreste wa le Filipiya lweyi a nga hanya ka nkama wa vapostolo a kumane na swona swikarhatu swa ku fana ni leswi, a za Pawulo a vula swaku ‘[Epafrodito] a a karhateka hintamu hileswi [vanghanu va yena] va nga twa swaku a a vabya.’ (Filp. 2:25-27) Phela ku va u nga hetisekanga ni ku va van’wani va nga hetisekanga swi nga ha ku hetela ntsaku. Naswona ku va Vakreste van’wani kumbe maxaka ya wena va yendla swilo hi ndlela leyi u kalaka u nga yi tsakeli hambiloko yi nga hoxanga, na swona swi nga ha yendla swaku u nga tsaki. Kambe swi nga koteka swaku u swi hlula swikarhatu hinkwaswu leswi, hi ku pfuniwa hi Rito la Xikwembu. — Eze. 2:3-5; 1 Ko. 9:27; 13:8; Kol. 3:12-14; 1 Pe. 4:8.

KU TINYIMISELA KU TSHAMA NA HI TSHEMBEKILE

²⁰ Minkama hinkwayu hi fanele hi yingisa lweyi Yehovha a nga mu veka swaku a va nhloko ya bandla, ku nga Yesu Kreste. (Kol. 2:18, 19) Naswona hi fanele hi tirhisana ni “mutirhi wa ku tshembeka ni wa ku tlhariha” swin’we ni madoda. (Heb. 13:7, 17) Loko hi yingisa minkongomiso leyi taka hi ka nhlengeletanu hi tlhela hi tirhisana ni lava nga vekiwa leswaku va rhangela, hi va hi lunghekela ku yendla ku rhandza ka Yehovha. Hi fanele hi li tirhisa kahle lunghelo leli hi nga na lona la ku khongela. Phela khumbuka swaku a ku na djele kumbe ndhawu yin’wani leyi nga hi sivelaka ku bula ni Papayi wa hina wa lirhandzu wa le tilweni naswona a ku na nchumu lexi nga helisaka ku twanana loku hi nga na kona ni vamakwerhu va hina.

²¹ Hi ku tinyimisela ni ku tiyisela, a hi yendleni hinkwaswu hi nga swi kotaka swaku hi hetisisa ntirho wa ku chumayela lowu Yesu a nga wu nyika vadjondzisiwa va yena loko se a pfuxiwile. A te: “Fambani mi ya djondzisa vanhu va matiko hinkwawu leswaku va va vadjondzisiwa va mina, mi va tsakamisa hi vito la Papayi ni la N’wana ni la moya wa ku kwetsima, mi va djondzisa ku yingisa hinkwaswu leswi ni nga mi byela swona.” (Mat. 28:19, 20) Ku fana na Yesu hi ta tama hi tiyisela. Onge hi nga va ni ntshembo naswona hi tiyiseka hi wutomi la ku kala li nga heli leli nga phambheni ka hina. (Heb. 12:2) Leswi hi nga valandzeli va Yesu lava nga tsakamisiwa, hi pfulekeliwe hi mukhandlu wa ku hetisisa wuprofeta leli vulavulaka hi leswi nga ta yendleka ka “nkama wa wugamu”, lani Yesu a nge te: “Naswona mahungu lawa ya ku tsakisa ya Mfumu ma ta chumayeliwa amisaveni hinkwayu leswaku ma va wumboni ka matiko hinkwawu; kutani hi kona magamu ma nga ta fika.” (Mat. 24:3, 14) Loko hi tinyiketela hi mbilu hinkwayu a ku hetisiseni ka ntirho lowu Yesu a nga hi nyika wona, leswo swi ta yendla leswaku hi kuma wutomi la ku kala li nga heli ka misava ya ku lulama leyi Yehovha a hi tshembisaka yona.