Unga Yendla Yini Leswaku U Va Munghanu wa Xikwembu?

1, 2. I vamani van’wana lava ava li vanghanu va Yehovha?

I MANI lweyi u lavaka leswaku a va munghanu wa wena? I munhu lweyi aku tsakisaka. I munhu lweyi u hanyisanaka kahle na yena naswona mi twananaka. Munhu lweyi anga munene a tlhela a va ni wumunhu leliku tsakisaka.

² Yehovha a langa vanhu leswaku va va vanghanu va yena. Hi xikombiso, Abrahama a ve mun’wana wa vanghanu va Yehovha. (Esaya 41:8; Yakobo 2:23) Nakambe Yehovha aamu rhandza Davhida tani hi leswi a ali munghanu wa yena. A vule leswaku Davhida a ali ‘munhu lweyi anga wa mbilu ya yena’. (Mintirho 13:22) Naswona muprofeta Daniyele a ali “munhu wa lisima swinene” ka Yehovha. — Daniyele 9:23.

3. Hi mhaka muni Abrahama, Davhida na Daniyele va ve vanghanu va Yehovha?

³ I yini leswi Abrahama, Davhida na Daniyele vaswi yendleke leswaku va va vanghanu va Yehovha? Yehovha a vule leswi ka Abrahama: “Wena u yingise ritu la mina.” (Genesa 22:18) Yehovha i munghanu wa lava hi kutiveka hansi vamu yingisaka. A hlamusele leswaku hambi tiko la Israyele alitaswi kota kuva ni wunghanu na yena; loko aku: “Yingisani rito la mina kutani nita va Xikwembu xa n’wina, n’wina mita va vanhu va mina”. (Yeremiya 7:23) Kutani na wena u fanele u yingisa Yehovha loko u lava kuva munghanu wa yena.

YEHOVHA WAVA SIRHELELA VANGHANU VA YENA

4, 5. Yehovha ava sirhelelisa kuyini vanghanu va yena?

⁴ Bibele li vula leswaku Yehovha a lavetela tindlela “leswaku a kombisa ntamu wa yena ka lava mbilu ya vona yi hetisekeke ka yena.” (2 Tikronika 16:9) Ka buku la Tipisalema 32:8, Yehovha a tshembisa leswi ka vanghanu va yena: “Nitaku nyika kutwisisa naswona nitaku djondzisa andleleni leyi u faneleke u famba ha yona. Nitaku nyika ndzayu ni veke tihlo la mina a henhla ka wena.”

⁵ Kambe ku ni nala wa matimba lweyi a lavaka kuhi sivela kuva vanghanu va Xikwembu. Kambe Yehovha a lava kuhi sirhelela. (Lerha Tipisalema 55:22.) Leswi hinga vanghanu va Yehovha, himu tirhela hi mbilu ya hina hinkwayu. Ha tshembeka ka yena hambi hi li ka swiyimu swotika awuton’wini. Naswona hi ni kutiyiseka loku mupisalema a ali na kona loko a tsala leswi hi Yehovha: “Hikuva a le vokweni la mina la xinene, aninge tshuki ni tsekatsekisiwa.” (Tipisalema 16:8; 63:8) Sathana a zamisa kuyini kuhi sivela kuva vanghanu va Yehovha?

KULUMBETA KA SATHANA

6. I yini leswi Sathana angaswi vula hi vanhu?

⁶ Ka Ndzima 11 hi djondze leswaku Sathana a tlhontlhe Yehovha naswona amu lumbete leswaku i muhembi ni leswaku anga lulamanga hikusa a sivela Adamu na Evha leswaku va tiyendlela swiboho swa leswinga swinene ni leswobiha. Ka buku la Yobo, Bibele lihi djondzisa leswaku Sathana a tlhele a lumbeta vanhu hinkwavu lava lavaka kuva vanghanu va Xikwembu. A vule leswaku va tirhela Xikwembu hi leswi va lavaka swokarhi ka xona kunga li hi leswi vaxi rhandzaka. Sathana a tlhele a vula leswaku anga yendla leswaku mun’wana ni mun’wana wa hina a tshika kutirhela Xikwembu. Ahi kambisiseni leswi hingaswi djondzaka ka Yobo ni ndlela leyi Yehovha amu sirheleleke hi yona.

7, 8. a) Yehovha aamu vonisa kuyini Yobo? b) I yini leswi Sathana aswi vuleke hi Yobo?

⁷ A ali mani Yobo? A ali wanuna wa munene lweyi a hanyeke kolomu ka 3.600 wa malembe lama hundzeke. Yehovha a vule leswaku hi nkama wolowo akunga na munhu lweyi a afana na yena laha misaveni. Yobo a ani xihloniphu lexikulu ka Xikwembu naswona a anyenya leswobiha. (Yobo 1:8) Hakunene, Yobo a ali munghanu lwenkulu wa Yehovha.

⁸ Sathana a vule leswaku Yobo a atirhela Xikwembu hi mhaka ya leswi a alava kuva ni swilo swotala. Sathana a vule leswi ka Yehovha: “Ahi leswi u vekeke xisirhelelo leswaku umu sirhelela, ni kusirhelela yindlu ya yena ni hinkwaswu leswi anga na swona? U katekise ntirho wa mavoko ya yena, naswona swifuyu swa yena swi tale ngopfu tikweni. Kambe kuhambana ni leswo, gwimba voko la wena u khumba swilo hinkwaswu leswi anga na swona, kunene ataku rhuketela amahlweni ka wena.” — Yobo 1:10, 11.

9. I yini leswi Yehovha a pfumeleleke Sathana kuva aswi yendla?

⁹ Sathana a lumbete Yobo hi kuvula leswaku a tirhela Yehovha ntsena hi mhaka ya leswi aata kuma swokarhi ka Yena. Sathana a tlhele a vula leswaku aataswi kota kuyendla leswaku Yobo a tshika kutirhela Yehovha. Yehovha aaswi tiva leswaku leswo i mavunhwa. Kutani amu tshike a ringa Yobo leswaku atati vonela hi ya yena leswaku Yobo a ali munghanu wa Yehovha hi leswi amu rhandzaka kungali hi kulava swilo.

SATHANA A HLUPHA YOBO

10. Sathana amu ringise kuyini Yobo naswona Yobo a yangulise kuyini?

¹⁰ Xosungula, Sathana a dumele swihari hinkwaswu swa Yobo. Swin’wana swi yiviwile naswona swin’wanaya swi dlayiwile. Nzhaku ka leswo, a dlaye vatirhi votala va Yobo. Kutani Yobo a luze swilo swa yena hinkwaswu. Hi wugamu, Sathana a dlaye 10 wa vana va Yobo hi xidzedze. Kambe Yobo a tshame a tshembekile ka Yehovha. Bibele li li: “Ka hinkwaswu leswi, Yobo anga djohanga kumbe kuvula leswinga fanelangiki ka Xikwembu.” — Yobo 1:12-19, 22.

11. a) I yini swin’wana leswi Sathana aswi yendleke ka Yobo? b) Se Yobo a yangulise kuyini?

¹¹ Kambe aswimu nyikanga wurhongo Sathana. A tlhele a tlhontlha Xikwembu hi kuvula a ku: “Khumba marhambu yakwe ni nyama yakwe kutani u vona loko angataku rhukana anghoheni.” Kutani Sathana a hlasela Yobo hi mavabyi lama tsemaka nhlana. (Yobo 2:5, 7) Ni ka xiyimo lexo, Yobo a tshame a tshembekile ka Yehovha. A te: “Aningeli tshiki wutshembeki la mina kufikela loko nifa!” — Yobo 27:5.

12. Yobo aswi kombisise kuyini leswaku Sathana i muhembi?

¹² Yobo aanga tivi nchumu hi leswi Sathana aamu lumbeta hi swona kumbe kutiva leswaku a ahlupheka hi mhaka muni. A apimisa leswaku i Yehovha lweyi amu vangelaka swikarhato. (Yobo 6:4; 16:11-14) Kambe Yobo a tshame a tshembekile ka Yehovha. Swoswi akunga na kukanakana ka leswaku Yobo aanga tirheli Yehovha hi mhaka ya leswi a alava kukuma swokarhi. Kambe a ali munghanu wa Xikwembu hi leswi aaxi rhandza. Swiyo vhela swiku khangala, leswaku Sathana i muhembi!

13. Kutshembeka ka Yobo kupfune hi ndlela yihi?

¹³ Hambileswi Yobo aangaswi tivi leswi aswi yendleka atilweni, a tshame a tshembekile ka Xikwembu naswona a kombise leswaku Sathana i muhembi lwenkulu swinene. Yehovha a katekise Yobo hi mhaka ya wunghanu la yena lotshembeka. — Yobo 42:12-17.

SE SATHANA AKU LUMBETISA KUYINI?

14, 15. I yini leswi Sathana a lumbetaka vanhu hinkwavu hi swona?

¹⁴ Unga kuma tidjondzo ta lisima ka leswinga humelela Yobo. Namuntlha, Sathana ahi lumbeta leswaku hi gandzela Yehovha hi mhaka ya leswi hi lavaka swokarhi ka Yena. Ka buku la Yobo 2:4, Sathana a te: “Hinkwaswu leswi munhu anga na swona ataswi humesa leswaku a ponisa wutomi la yena.” Hi ndlela leyo, Sathana a lumbeta vanhu hinkwavu leswaku va gandzela Xikwembu hi kutilavela swotala. Loko se kuhundze malembe yotala Yobo a file, Sathana anga tshikanga kurhuketela Yehovha ni vagandzeli va yena. Kutani ka buku la Swivuriso 27:11 Yehovha ahi kombela leswi: “Tlhariha n’wananga, u tsakisa mbilu ya mina, leswaku ni kota kuyangula lweyi ani poyilaka [kumbe, lweyi ani rhuketelaka].”

¹⁵ Unga langa kuyingisa Yehovha naswona u va munghanu wa Yena, u kombisa leswaku Sathana i muhembi. Hambi swi lava kuva u cinca swotala ka wutomi la wena leswaku u va munghanu wa Xikwembu, lexi i xiboho xa lisima kutlula hinkwaswu awuton’wini la wena! Xiboho lexi i mhaka ya yikulu swinene. Sathana a vula leswaku wena ungata tshembeka ka Xikwembu loko u kumana ni swikarhato. A zama kuhi phasa leswaku hinga tshembeki ka Xikwembu. Se aswi yendlisa kuyini swoleswo?

16. a) Hi tihi tindlela leti Sathana ati tirhisaka leswaku a tshikisa vanhu kutirhela Yehovha? b) Diyavulosi anga zama hi tindlela tihi leswaku aku tshikisa kutirhela Yehovha?

¹⁶ Sathana a tirhisa tindlela totala leswaku a zama kuhi sivela kuva vanghanu va Xikwembu. Xosungula, a hlasela ‘kufana ni nghonyama leyibongaka, yilava lweyi yingamudlaka.’ (1 Petro 5:8) Kutani unga hlamali loko vanghanu, maxaka kumbe vanhu van’wana va zama kuku tshikisa kudjondza Bibele ni kuyendla leswinga swinene.a (Yohane 15:19, 20) Xa wumbirhi, a tihundzula “ntsumi ya kuvonakala.” Se angaha zama kuhi kanganyisa leswaku hingamu yingisi Yehovha. (2 Vakorinto 11:14) Xa wunharhu, i kuhi yendla hi pimisa leswaku ahingeswi koti kutirhela Xikwembu hilaha kufaneleke. — Swivuriso 24:10.

YINGISA YEHOVHA

17. Hi mhaka muni hi yingisa Yehovha?

¹⁷ Loko hi yingisa Yehovha, hi kombisa leswaku Sathana i muhembi. I yini leswingatahi pfuna kuyingisa Xikwembu? Bibele li li: “U fanele u rhandza Yehovha Xikwembu xa wena hi mbilu ya wena hinkwayu ni hi moyaxiviri wa wena hinkwawu ni hi matimba ya wena hinkwawu.” (Deteronoma 6:5) Hi yingisa Yehovha hi leswi himu rhandzaka. Loko lirhandzu la hina liya li kula, hita lava kuyendla hinkwaswu leswi ahi kombelaka leswaku hiswi yendla. Mupostola Yohane a tsale leswi: ‘Hikuva leswi i lirhandzu la Xikwembu, xileswo ahihlayiseni milawu ya xona, hikuva milawu ya xona ayitiki.’ — 1 Yohane 5:3.

18, 19. a) Hi swihi swilo swin’wana leswi Yehovha a vulaka leswaku swi bihile? b) Hiswi tivisa kuyini leswaku Yehovha angahi kombeli kuyendla leswi hingaswi kotiki?

¹⁸ Kambe hi swihi swilo swin’wana leswi Yehovha ahi byelaka leswaku swi bihile? Ku ni swikombiso swin’wana ka kwadru lelinge: “Nyenya Leswi Yehovha Aswi Nyenyaka.” Loko u sungula kuswi djondza, ungaha pimisa leswaku swin’wana aswi bihanga ngopfu. Kambe loko u lerha Bibele u tlhela u yanakanyisisa kahle hi leswi uswi lerhaka, uta tsumbula leswaku i swa lisima kuyingisa Yehovha. Na wena ungahaswi twisisa leswaku u fanele u cinca swokarhi ka wutomi la wena. Swingaha karhataka, kambe loko u yendla kucinca loku, uta kuma kurhula ni ntsaku lowu taka hi kuva munghanu wotshembeka wa Xikwembu. (Esaya 48:17, 18) Hiswi tivisa kuyini leswaku swa koteka kuyendla kucinca loku?

¹⁹ Yehovha ange tshuki a byela munhu leswaku a yendla swilo leswi anga tsandzekaka kuswi yendla. (Deteronoma 30:11-14) Yehovha i Munghanu wa hina naswona ahi tiva kahle kutlula hina vinyi. A tiva lomu hi tiyeke kona ni lomu hi tsaneke kona. (Tipisalema 103:14) Mupostola Pawulo ahi khutaza hi leswi: “Xikwembu xa tshembeka, axingemi tshiki mi ringiwa hi ndlela leyi tlulaka leswi mingaswi tiyiselaka, kambe loko mi ringiwa xitami nyika ndlela yohuma, leswaku mi kota kuswi tiyisela.” (1 Vakorinto 10:13) Hinga tiyiseka leswaku Yehovha atahi nyika ntamu lowu hiwu lavaka leswaku hi yendla leswinga swinene. Ataku nyika ‘matimba lamakulu, lawa matlulaka hinkwaswu’ leswaku u tiyisela swiyimu swotika. (2 Vakorinto 4:7) Ndzhaku ka loko Pawulo a pfuniwe hi Yehovha, a te: ‘Ningayendla hinkwaswu hi matimba ya Lweyi anitiyisaka.’ — Vafilipiya 4:13.

RHANDZA LESWI XIKWEMBU XISWI RHANDZAKA

20. Hi lihi wumunhu leli u faneleke uli tekelela naswona hi mhaka muni?

²⁰ Kutshika kuyendla leswi Yehovha aswi nyenyaka, i masungulu ya kahle. Kambe hi fanele hi yendla ni swin’wana. (Varhoma 12:9) Vanghanu va Xikwembu va rhandza leswi xiswi rhandzaka ni kutekelela wumunhu la xona leli vuliwaka ka Tipisalema 15:1-5. (Lerha.) Vanghanu va Yehovha va kombisa ‘lirhandzu ni kutsaka ni kurhula ni kuleha mbilu ni vunene ni kunyika ni kutshembeka ni timpsalu ni kutikhoma.’ — Vagalatiya 5:22, 23.

21. I yini lexingaku pfunaka kukombisa wumunhu leli Xikwembu xili tsakelaka?

²¹ Unga djondzisa kuyini kukombisa wumunhu losaseka? U fanele u djondza leswi Yehovha aswi rhandzaka hi kudjondza Bibele nkama ni nkama. (Esaya 30:20, 21) Loko u yendla leswo, lirhandzu la wena hi Yehovha lita kula naswona uta lava kumu yingisa.

22. Kuta yendleka yini loko u langa kuyingisa Yehovha?

²² Kucinca loku ungaha kuyendlaka ka wutomi la wena kunga fanisiwa ni kuhlivila mpahla ya khale u gama u yambala ya nyiwani. Bibele li vula leswaku u fanele u ‘hlivila mahanyela ya wena ya khale’ naswona uti yambexa “munhu wa mahanyela lamampsha”. (Vakolosa 3:9, 10) Hambileswi swingaha karhataka, loko hi yendla kucinca loku naswona hi yingisa Yehovha, a tshembisa kuhi nyika “vuyelo likulu”. (Tipisalema 19:11) Ina, loko u langa kuyingisa Yehovha utaswi kombisa leswaku hakunene Sathana i muhembi. Tirhela Yehovha kunga li hi leswi ungata kuma swokarhi nkameni lowu taka, kambe hi leswi umu rhandzaka hi mbilu hinkwayu. Hi kuyendla leswo, uta va munghanu lwenkulu wa Yehovha!