DJONDZO 7

Mhaka ya Ntiyiso ni Leyi Kholwisaka

Luka 1:3

U FANELE U YENDLA YINI? Pfuna vayingiseli va wena leswaku va fikelela mahetelelo ya mhaka hi kutirhisa wumboni leli tshembekaka.

Yendla nkambisiso ka swihlovo leswi tshembekaka. Tinhlamuselo ta wena ti fanele ti sekeliwa ka Rito la Xikwembu, hi kuva u lerha hi kukongoma ka Bibele. Loko u li karhi u vulavula hi timhaka ta siyensiya, mahungu yokarhi, ntokoto kumbe wumboni lokarhi, rhanga hi kukambisisa kahle kuva u vona leswaku rungula la wena li tshembekile.
Tirhisa swihlovo hi ndlela leyinene. Hlamusela matsalwa hikuya hi ntsutsu wa mhaka; rungula la Bibele swin’we ni mabuku ya ‘mutirhi lweyi atshembekeke [kumbe nandza wotshembeka ni wotlhariha]’. (Mat. 24:45) Loko u tirhisa swihlovo leswinga humiki aBibeleni, tiyiseka leswaku swa tshembeka naswona unga cinci rungula lolelo hi kuvula leswi hambaneke ni leswi mutsali wa rungula aswi tsaleke.

Unga tshuki u tatisa mhaka yokarhi kumbe swin’wana ka rungula la wena. Tivoneli leswaku rito lelinge “vanhu van’wana” li hundzuka li va “vanhu votala,” rito lelinge “ka swiyimo swin’wana” li hundzuka li va “minkama hinkwayo,” naswona rito lelinge “swinga koteka” li hundzuka li va “swita yendleka.”
Yanakanyisisa ni vayingiseli va wena. Ndzhaku kolerha tsalwa kumbe kuvula xihlovo lexi uxi tirhiseke leswaku u kambisisa mhaka yokarhi, yendla swivutiso leswi hlawuliweke kahle kumbe tirhisa xikombiso xokarhi leswaku u pfuna vayingiseli va wena va fikelela mahetelelo ya mhaka hi voxe.