DJONDZO 8

Swikombiso Leswi Djondzisaka

Matewu 13:34, 35

U FANELE U YENDLA YINI? Tirhisa swikombiso leswi wolovaka swi tlhela swi twanana ni swiyimo swa vayingiseli va wena leswaku uva djondzisa mhaka ya lisima.

UNGASWI YENDLISA KUYINI:

Tirhisa swikombiso leswi wolovaka. Kufana na Yesu, tirhisa swilo leswi tsongo kuva u hlamusela swilo leswi kulu, naswona tirhisa swikombiso leswi wolovaka leswaku u hlamusela mhaka yotika. Unga hlamuseli wuxokoxoko lelinga lavekiki ka xikombiso xa wena leswaku swingava tikeli vayingiseli va wena kuswi twisisa. Kambe tiyiseka leswaku xikombiso xa wena xa fambisana ni djondzo leyi uyi nyikelaka.

U fanele uva ni wuxiyaxiya. Kambisisa leswinga kusuhi na wena, djondza mabuku ya Nhlengeletano, naswona yingisa vadjondzisi lavanga ni ntokoto. Hi nkama wolowo, vona swikombiso leswi ungataswi tirhisa leswaku u yampsisa ndlela leyi u djondzisaka hi yona. Swi tsali u tlhela uswi hlayisa.
Pimisa hi vayingiseli va wena. Hlawula swikombiso leswi khumbaka mintirho ya vayingiseli va wena ni leswi vaswi tsakelaka. Tivoneli leswaku unga danisi kumbe kukhunguvanyisa vayingiseli hi swikombiso swa wena.
Djondzisa mhakankulu. Tirhisa xikombiso leswaku u djondzisa mhakankulu kunga li wuxokoxoko. Tiyiseka leswaku vayingiseli va wena vangata khumbuka ntsena xikombiso xa wena, kambe vata kuma djondzo ka xona.