KU DJONDZISA VANHU BIBELE
DJONDZO 12
Tiya Nhlana
Bibele li li: “Mafurha ni swinun’hweliso swi tsakisa mbilu; swa fana ni wunghanu la ku tsakisa leli sungulaka hi mhaka ya munhu lweyi a ku layaka na swi huma ambilwini.” — Swiv. 27:9.
I Mpsini Leswi Yesu A Nga Swi Yendla?
1. Sixtira VHIDIYO, kumbe u lerha Marka 10:17-22. U gama u hlamula swivutiso leswi landzelaka:
Hi swini swilo swaswinene leswi Yesu a nga swi vona ka djaha la ku ganya?
Hi mhaka muni a swi lava swaku Yesu a va ni lirhandzu a tlhela a tiya nhlana leswaku a laya djaha leliyani la ku ganya?
Hi Djondza Yini Ka Leswi Yesu A Nga Swi Yendla?
2. Hi fanele hi vulavula hi lirhandzu ni vanhu lava hi va djondzisaka kambe a hi fanelanga hi chava ku va byela leswi va faneleke va swi yendla swaku va kulisa wunghanu la vona na Yehovha.
Tekelela Xikombiso Xa Yesu
3. Pfuna lweyi u djondzaka na yena swaku a fikelela swilo leswi nga ta mu pfuna ku tiyisa wunghanu la yena na Yehovha.
Tirhisa xiyenge lexi nge: “Zama Ku Yentxa Leswi” lexi kumekaka ka djondzo yin’wani ni yin’wani ya buku leli nge: Tikhorisi Hi Wutomi La Ku Kala Li Nga Heli.
Pfuna lweyi u djondzaka na yena swaku a tiva leswi a faneleke a swi yendla swoswi ni leswi a faneleke a swi yendla hi ku famba ka nkama.
Mu khensi nkama ni nkama hi leswi se a nga swi yendla.
4. Tiva leswi sivelaka lweyi u djondzaka na yena leswaku a nga kulisi wunghanu la yena na Yehovha, u tlhela u mu pfuna.
Tivutisi:
‘Loko lweyi ni djondzaka na yena a nga se kulisa wunghanu la yena na Yehovha lakaku a za a tsakamisiwa, i mpsini leswi mu sivelaka?’
‘Ni nga yendla yini leswaku ni mu pfuna?’
Khongela u kombela Yehovha a ku pfuna swaku u nga chavi ku vulavula hi lirhandzu ni lweyi u djondzaka na yena, u mu byela leswi a faneleke a swi yendla.
5. Nyima ku djondza ni lweyi a kalaka a nga txintxi.
Kambela swaku lweyi u djondzaka na yena wa txintxa mahanyelo ya yena hi ku tivutisa leswi:
‘Indjhe wa swi tirhisa leswi a swi djondzaka?’
‘Wa ya mintlhanganwini naswona wa bula ni van’wani hi leswi a swi djondzaka?’
‘Leswi se hi nga ni nkama wa wunyingi na hi djondza xikan’we, indjhe wa swi lava ku va Mboni ya Yehovha?’
Loko lweyi u djondzaka na yena Bibele a nga swi lavi ku txintxa mahanyelo ya yena:
Mu vutisi swaku i mpsini leswi mu pfalelaka.
Vulavula kahle na yena, u mu byela swaku hi mhaka muni u tshika ku djondza na yena Bibele.
Mu byeli swaku a fanele a yendla yini leswaku mi tlhela mi sungulisa ku djondza ka nkama lowu taka.