Na mina se na swi kota ku pfuna van’wana

WUTOMI LA MINA LA KHALE:

Ni psaliwile ka xidoropana xin’wana xa Guatemala. Ndjangu wa ka hina i wa lixaka la Ixil, handle ka ku vulavula Xipanhol ku sukela na na ha li mutsongo ni vulavula ni Xiixil ku nga lirimi la lixaka la hina. Ni psaliwe hi nkama wa nyimpi ya 36 wa malembe a Guatemala, hi nkama wolowo ku fe vanhu va vanyigi a Ixil.

Nkama a ni ni 4 wa malembe makwavu wa mina lweyi a a ni 7 wa malembe a buvukeliwe hi mina leli a a tlanga hi lona, yena a file se mina ni fa matihlo. Ni game ni ya tshama ka ndhawu leyi a ku tshama swivanana swa ku fa matihlo ka Doropa la Guatemala lani ni nga djondza Braile. A va ni tsimbisa ku bula ni swivanana swin’wana, na swona a swi nga swi lavi ku bula na mina, phela a ni nga swi twisisi swaku hi mhaka muni, a ni titwa ni li noxe naswona nkama hinkwawu a ni nyimela tiwheti timbirhi ta lembe leti a ni ta famba ni ya pfuxela mamana wa mina lweyi a a ni hlayisa kahle. Kambe yena a file na ni ni 10 wa malembe, nkama ku nga yentxeka leswo ni karhatekile hintamu hikusa hi yena ntsena lweyi a a ni rhandza.

Loko ni tlhanganise 11 wa malembe ni tlhelile ka doropa leli ni nga kulela ka lona, ni ya tshama ni makwavu wa mina ni ndjangu wa yena, a va ni hlayisa kambe a ku nga na munhu lweyi a a ta ni pfuna ka leswi a ni karhatekile hi swona. Minkama yin’wana a ni vutisa Xikwembu ni ku: “Hi mhaka muni mamana wa mina a file? Hi mhaka muni ni fe matihlo?” Vanhu a va ni byela swaku leswo swi yentxekile hikusa a ku li ku rhandza ka Xikwembu, leswo swi ni yentxe ni pimisa swaku Xikwembu a xi na mhaka ni munhu, ni lave ni ku tisunga kambe a ni nga swi tivi swaku ni nga swi yentxisa ku yini.

Kuva ni fe matihlo swi ni yentxe ni titwa ni nga vhikelelekanga. Nkama a ni li mutsongo ni xanisiwe hintamu hi timhaka ta masangu, a ni byelanga munhu leswi a swi ni yentxekela hikusa a ni pimisa swaku a va nga ta va ni mhaka na mina. A ni nga buli ni munhu naswona a swi kala swaku vanhu va bula na mina, leswo a swi ni karhata hintamu, a ni titwa ni li noxe funtshi a ni nga tshembi munhu.

BIBELE LI TXINTXE WUTOMI LA MINA:

Nkama ni nga kulanyana Timboni ta Yehovha ta nuna na nsati, ti ni telile xikola ti ta bula na mina. A ti kombeliwile hi professora wa mina lweyi a a ni rhandza naswona a a ni twela wusiwana. Vona va vulavule na mina hi leswi Bibele li swi tshembisaka hi ku pfuxiwa ka va fi ni swaku vanhu lava nga fa matihlo va ta tlhela va vona. (Esaya 35:5; Yohani 5:28, 29) Ni swi rhadzile leswi va nga ni byela kambe a swi ni karhatela ku bula na vona hikusa a ni nga tolovelanga ku bula ni munhu. Hambileswo vona a va tshikanga ku ta va ta ni djondzisa Bibele hi lirhandzu. Swaku va fika ka doropa leli a ni tshama ka lona a va famba kolomu ka 10 kilometros ni ku hundza hi lomu a ku ni tinhava.

Makwavu wa mina a vule swaku a ku li nuna na nsati lava a va yambala kahle kambe a va nga ganyanga. Hambileswo, minkama hinkwayu vona a va ni komba swaku va ni mhaka na mina naswona a va ni tela ni minchumu va ta ni nyika. Se ni swi vonile swaku o va Vakreste va ntiyiso ntsena lava va nga tikarhataka swaku va ni pfuna.

Ni djondze Bibele hi ku pfuniwa hi mabuku ya Braile. Hambileswi a ni swi twisisa leswi a ni swi djondza, ka mbilu ya mina swin’wana a swi ni karhatela ku swi kholwa. Hi xikombiso a swi ni karhatela ku kholwa swaku Xikwembu xi ni mhaka na mina hikakunene, ni swaku van’wana a va ta ni rhandza ku fana ni leswi Xikwembu xi ni rhandzisaka xiswona. Ni swi twisisile swaku hi mhaka muni minkama yin’wana Yehovha a pfumelela wubihi, kambe a swi ni karhatela ku mu vona a li papayi lweyi a nga ni lirhandzu.

Hi ku famba ka nkama leswi ni nga swi djondza ka Bibele swi ni pfunile ku txintxa mapimiselo ya mina. Hi xikombiso ni djondze swaku Xikwembu xi ni mhaka ni lava va hluphekaka, xi byele vanhu va xona lava a va hlupheka xi ku: “Kunene ni ku vonile ku hlupheka ka vanhu va mina . . . Naswona ni xi twile xirilo xa vona”. (Eksoda 3:7) Loko ni sungule ku tiva leswi Yehovha a nga tshamisa xiswona ni tinyiketelile ka yena, naswona ni tsakamisiwile hi 1998.

Loko se ku hundze lembe na ni tsakamisiwile ni yile ka xikola xa vanhu va ku fa matihlo ka doropa la Escuintla. Doda lin’wana la kusuhi ni xikola xolexo li tive swaku a swi ni karhatela ku ya mintlhanganwini lomu a ni tshama kona. A bandla la kusuhi la kona a li kumeka kusuhi ni tinhava leti lava a va ni djondzisa a va fanele va hundza hi ka tona. Ku famba ka tindhawu leto a swi ni karhatela hintamu, leswaku li ni pfuna, doda lelo li vulavule ni vamakwerhu va doropa la Escuintla lava va nga ni nyika ndhanwu ya ku tshama swaku ni kota ku ya mintlhanganwini. Ku sukela kolanu anze namuntlha ni tshama kaya ka vamakwerhu lava naswona va ni hlayisa ingi no va wa ndjangu wa vona.

Ni ni swikombiso swa swinyingi leswi a ni ta swi vula hi lirhandzu la ntiyiso leli vamakwerhu va bandleni va nga ni komba lona. Hinkwaswu leswo swi ni yentxa ni kholwa swaku a ku va Mboni ya Yehovha swi ni yentxa ni va xikarhi ka Vakreste va ntiyiso. — Yohani 13:34, 35.

LESWI NI NGA PFUNEKISA XISWONA:

A na ha titwi ni nga li wa nchumu naswona na swi tiva leswi swi nga ta yentxeka ka nkama lowu taka. Swoswi na swi tiva swaku ni hanyela yini. Ni tirha nkama hinkwawu swaku ni djondzisa vanhu ntiyiso lowu nga ka Bibele naswona a na ha tshameli ku pimisa hi swikarhatu swa mina. Swoswi ni doda naswona ni veka madixkurso ka mabandla ya kusuhi ni ka makongreso.

Hi 2010 ni ye ka Xikola Xa Vachumayeli Va Mfumu. Ku ya ka xikola lexi swi ni pfunile ku wu yentxa kahle ntirho wa mina a bandleni, leswi ni nga swi djondza swi ni pfune ku vona swaku ni wa lisima naswona Yehovha wa ni rhandza hikusa hi yena a pfunaka mun’wana ni mun’wana swaku a yentxa ntirho wa yena.

Yesu a te: “Swi tsakisa hintamu ku nyika ku tlula ku yamukela.” (Mintirho 20:35) Swoswi ni nga vula swaku ni tsakile hikakunene naswona ni nga yentxa nchumu lowu a ni nga wu pimisanga swaku ni nga tshuka ni wu yentxa. Na mina se na swi kota ku pfuna van’wana.