Ni Tsake Hintamu Ka Ntirho Wa Yehovha

Hi 1959, vamakwerhu va tivise ndjangu wa Betele swaku a ku laveka vamakwerhu lava a va ta pfunisa ka ku imprimira ka Betele la Djoni. Ni tinyikelile leswaku ni ya pfunisa naswona ni tsakile hileswi va nga ni langa. Naswona ku ni 3 wa vamakwerhu van’wana lava na vona va nga langiwa, ku nga Dennis Leech, Bill McLellan na Ken Nordin. Va hi byele swaku a hi ta tshama Djoni hi nkama wa ku leha!

Ni ligarele mamana ni mu byela swaku ni ya Djoni. Mamana a a li munhu wa ku miyela, hambileswo a a ni lipfumelo a tlhela a va ni wunghanu la likulu na Yehovha. A nga vulanga swa ku tala, kambe a ni swi tiva swaku a a pfumelelana na mina. Hambileswi mamana na papayi va nga karhateka hileswi a ni ta tshama kule na vona, va nyime na mina ka xiboho lexi ni nga xi yentxa.

TA LIYENDZO LA KU YA DJONI

Na hi nge se ya Djoni, mina na vamakwerhu lavayani va 3, hi rhange hi ku ya Betele la Brooklyn, lani hi nga heta 3 wa tiwheti na hi djondza ku tirhisa muchini wa ku imprimira mabuku. Hi game hi yendza hi xitimela xa mati hi ya ka doropa la Cabo, leli kumekaka Djoni. A no va ni 20 wa malembe. Ni madlambu hi suke Cabo hi ya Johanesburgo. Nimixo hi nyime ka doropa la Karoo, ndhawu leyi nga mananga. Ndhawu leyi a yi hisa naswona a yi tale hi wuthulu. Loko hi hlomele hi janela hi vona leswi ndhawu liya yi nga tshamisa xiswona swi hi hlamalisile. Hi tivutisile swaku i ndhawu ya ku tshamisa ku yini yoleyi. Hi ku famba ka nkama hi tlhele hi ya pfuxela ndhawu liyani kambe hi tsumbule swaku a yi li ndhawu ya ku rhula naswona a yi li yinene.

Nkama ni nga fika Djoni ni hete malembenyana na ni tirha hi muchini wa ku imprimira mabuku ni tlhela ni lunghisa michumu leyi a yi tirhisiwa leswaku ku imprimiriwa Murindzi ni Khindlimuka! ka Betele leli a ni tirha ka lona a hi imprimira mabuku hi tirimi ta Djoni ni tirimi tin’wana ta tinyingi ta matiko ya África. Swi hi tsakise hintamu ku va hi suke hi Canadá hi ya Djoni leswaku hi yentxa ntirho wa ku imprimira hikusa a swi vanga swa mahala.

Ni game ni ya tirha ka xikritoriyu lexi ka xona a ku yentxiwa ntirho wa ku fambisana ni ku imprimira, ku rhumela minchumu ka ndhawu yin’wana ni ku hundzuluxela. A ni tshama ni khomekile kambe a ni tsake hintamu.

NKAMA NI NGA CHADA NI TLHELA NI NYIKIWA NTIRHO WUN’WANA

Hi 1968, ni chade na Laura Bowen, lweyi a a tshama kusuhi ni Betele. A a li mupfuli wa ndlela naswona a a pfunisa Betele ka Departamento la ku Hundzuluxela. Hi nkama wolowo loko makwerhu a chada a a nga fanelanga a tama a tirha Betele. Hi mhaka leyo hi suke Betele swaku hi ya va vapfuli va ndlela va ku hlawuleka. Ni sungule ku karhateka hikusa se a ni ni 10 wa malembe na ni tshama Betele naswona a ni nga ha karhateki hi swakudla ni ndhawu ya ku tshama ka yona. Kambe leswi se a hi li vapfuli va ndlela ku hlawuleka, minchumu se a yi txintxile. Se a hi ta hanyisa ku yini? Mun’wana ni mun’wana a a pfuniwa hi male ya 25 Randi hi wheti loko a kota ku nyikela mawora ni mabuku lawa a ma laveka hi wheti. Male yoleyo a hi yi tirhisela ku hakela lomu a hi tshama kona, ku xava swakudla, ku hakelela xa ku famba hi xona, xibedlhela ni swin’wana.

Hi nyikiwe ntirho wa ku ya pfunisa grupo la litsongo leli a li li kusuhi ni Durban. Ka ndhawu ya kona a ku tale hi vanhu lava a va ta hi Índia. Naswona vapsali va vanhu lava a va tshame va tirha ka komponi ya ku yentxa wulombe kolomuyani ka ma 1875. Hambileswi a va nga ha tirhi ka komponi yoleyo, a va hanyisa leswi a va hanyisa xiswona a India naswona a va dla swakudla swa ku nandzika leswi dliwaka a Índia. Funtshi leswi a va vulavula Xinghiza a swi hi vevukela ku va chumayela.

Hi nkama wolowo mupfuli wa ndlela wa ku hlawuleka a a fanele a nyikela 150 wa mawora hi wheti. Se hi siku la ku sungula mina na Laura hi yentxe programa la ku chumayela 6 wa mawora. Siku la kona a ku hisa naswoma a hi nga na xidjondzo kumbe revhizita. Se a swi lava hi heta 6 wa mawora na hi tirha hi munti ni munti. Hi sungule ku chumayela, naswona loko ku hundze 40 minutu hi txuvuke wachi hi vona swaku a nkama wo ho tshama. Se ni tivutisa swaku indje ni ta swi kota?

Hi ye hi tolovela ntirho wa hina hi katsongokatsongo. Siku ni siku loko hi ya nsin’wini a hi longa hi pawu leli a hi li chelanyana minchumu hi tlhela hi chela sopa kumbe café ka chumu xa ku swi hlwela ku hola. Loko hi lava ku humulanyana a hi veka movha wa hina ka ndzhuti wa nsinya. Nkama wun’wana a hi teliwa hi swivanana swa swinyingi leswi a swi ta swi ta hi txuvukisela na swi hi hlamala. Hi ku famba ka nkama loko hi li nsin’wini a hi vona swaku nkama se a wu hundza hi ku hantlisa.

A swi tsakisa hintamu ku chumayela vanhu lava a va tshama ka ndhawu liyani. Vanhu va Índia va ni xihlonipho naswona va rhandzana va tlhela va rhandza Xikwembu. Ku tala ka vona va ma yamukelile mahungu ya ku tsakisa. Phela va swi rhandzile ku djondza hi Yehovha, Yesu, ntiyiso wa Bibele ni ntshembo wa ku hanya hi ku rhula ka nkama lowu taka ni ku pfuxiwa ka vafi. Ku hele lembe na se hi ni 20 wa swidjondzo swa Bibele. Siku ni siku a hi rhamba ndjangu wa lava a hi djondza na vona Bibele swaku hi ta dla na vona. Phela leswo a swi hi yentxa hi tsaka hintamu.

Kambe na swi nga se ya kwini hi vekiwe swaku hi va vadjikelezi. Territoriyu leli a hi tirhela ka lona a ku li ndhawu ya ku xonga kusuhi ni Oceano Índico. Vhiki ni vhiki a hi yendzela ndjangu wa vamakwerhu hi tlhela hi pfuxela vachumayeli va bandla lolelo, hi tirha na vona nsin’wini hi tlhela hi va tiyisa. Phela a va hi vona na hi li ndjangu wa vona naswona hina a hi swi rhandza ku tlanga ni vana va vona ni swihari swa vona. Loko se hi hete malembe mambirhi na hi li vadjikelezi hi game hi foneliwa hi Betele. Makwerhu lweyi a nga hi fonela a te: “Hi tsakela ku mi byela leswaku mi fanele mi tlhelela Betele.” Ni mu hlamulile ni ku: “Hi tsake hintamu ka ntirho lowu hi wu yentxaka lani” hambileswo a hi tinyimiseleli ku tirha ka ndhawu yin’wana ni yin’wana.

HI THLELE BETELE

A Betele a ni tirha ka Departamento de Serviço, naswona a ni tirha ni vamakwerhu lava va mu rhandza hintamu Yehovha naswona a va ni malembe ya manyingi na va mu tirhela. Hi nkama lowuyani loko mudjikelezi a hete ko pfuxela bandla a a gama a posa relatoriyu a Departamento de Serviço leli vulavulaka hi liyendzo la yena ka bandla lolelo. Loko Departamento de Serviço li yamukele relatório lelo a li gama li posa carta ka bandla leli a la ha ku yendzaliwa, makarta lawo a ma tirhela ku tiyisa ni ku kongomisa mabandla hi leswi a ma fanele ma swi yentxa. Leswi marelatoriyu ya vadjikelezi a va ma tsala hi lirimi la Xixoza, Xizulu ni tirimi tin’wana ta África, vamakwerhu a va ni ntirho wa wukulu hikusa a va fanele va ma hundzuluxela ma va hi Xinghiza. Naswona leswi Departamento de Serviço a li tsala makarta hi Xinghiza, vamakwerhu a va fanele va ma hundzuluxela ma va hi tirimi ta África. Swi ni tsakise hintamu ku vona ntirho lowu vamakwerhu lava a va hundzuluxela makarta a va wu yentxa, hikusa swi ni yentxe ni vona swikarhatu leswi vamakwerhu va África a va kumana na swona.

Hi nkama wolowo Djoni a ku ni xikheto. Valandi ni valungu a va nga tshami ka ndhawu yin’we naswona a va nga twanani. Vamakwerhu va va landi a va bula, va chumayela, va ya mintlhanganwini va tlhela va vulavula tirimi ta vona va nga zanga va tipatsa ni valungu.

Naswona hi nkama lowo a swi kala swaku ni bula ni vamakerhu va África, hikusa minkama ya yinyingi a ni rhumeliwa swaku ni ya pfunisa a bandla la xinghiza. Kambe leswi a ni tirha Departamento de Serviço ni ve ni mukhandlo wa ku tiva valandi, mahanyelo ya vona, ni leswi a va tolovela ku swi yentxa. Ni swi vonile swikarhatu leswi vamakwerhu a va kumana na swona ka muganga wa vona. A ku tale swihena swa wukhongeli la mavunwa, se a swi lava va va ni xivindzi ku va va tshika swihena swoleswo ni minchumu leyi fambisanaka ni wungoma, hambileswi vavhizinyu ni mindjangu ya vona a va va kwatela. Handle ka leswo, ka tindhawu ta tinyingi vanhu a va li swisiwana naswona ku tala ka vona a va nga djondzanga kambe a va li hlonipha Bibele.

Ni kume mukhandlu wa ku nyimelela tinfanelo ta ntirho wa hina. Vana van’wana lava a va li Timboni va hlongoliwe xikola hileswi a va yala ku yimbelela a hino nacional. Phela lipfumelo la mina li tiye swinene loko ni vona ku tshembeka ka vona.

Vamakwerhu van’wana lava va tshamaka Suazilândia, va kumane ni swikarhatu swa swikulu hintamu. Nkama hosi Sobhuza II a nga fa, ku humesiwe nawu wa leswaku vavanuna hinkwavu a va fanele va tsemeta timpandla kasi vavasati a va fanele va tsema misisi va yi pumbanyana. Phela a ku yentxa leswo a swi fambisana ni ku gandzela vafi naswona vamakwerhu va hina a va zanga va swi yentxa leswo. Hi mhaka leyo vamakwerhu va hina va hluphiwe hintamu, kambe ku vona ndlela leyi va nga tshembeka hi yona ka Yehovha swi ni tiyisile. Ku twa mahungu ya ndlela leyi vamakwerhu va hina va África va tshembekeke hi yona swi tiyise lipfumelo la mina.

NI TLHELELE KA NTIRHO WA KU IMPRIMIRA MABUKU

Hi 1981, va ni rhambile swaku ni pfunisa ku yampsisa tindlela ta ku imprimira mabuku hi komputadori. Ku yentxa ntirho lowu swi ni tsakise hintamu. Leswi ma imprimirelo ya mabuku a misaveni a ma ya ma yampsisiwa, na hina a hi fanele hi yampsisa ndlela leyi a hi imprimira mabuku hi yona. Wanuna mun’wana lweyi a a xavisa michini a lombe Betele muchini wa ku imprimira mabuku swaku hi wu ringisa ka ku imprimira mabuku ya hina. Hi mhaka leyo hi xave 5 wa michini ya nyuwani ya ku fana ni lowu. Ku tlhele ku vekiwa muchini wun’wana wa ku imprimira hi ku kahlula. Impela, minchumu a yi ya yi yampsisiwa!

Leswi a hi tirhisa makomputadori, hi kume tindlela tin’wana ta ku yentxa mabuku hi ku tirhisa programa la MEPS. Phela swilo swi yampse hintamu hikusa a hi nga ha yi tirhisi michini liyani ya khale ya ku hlwela loko yi imprimira naswona yi nga yentxa 4 wa vabatelita va Canadá va rhura va ya tshama aDjoni. (Esa. 60:17) Hi nkama wolowo, hinkwerhu va 4 se a hi chadile ni vapfuli va ndlela lava va mu rhandzaka hintamu Yehovha. Mina na Bill a ha ha tshama Betele, kasi Ken na Dennis va ve ni vana naswona a va tshama ka muganga lowuyani.

Mintirho ya Betele a yi ya yi yengeseleka. A hi hundzuluxela hi tlhela hi imprimira mabuku hi tirimi ta tinyingi, naswona mabuku lawa a ma fanele ma rhumeliwa ma ya ka Mabetele man’wana. Leswi ntirho a wu li wukulu, ku yakiwe Betele la nyuwani aJohanesburgo naswona li sungule ku tirhisiwa hi 1987. Swi ni tsakise hintamu ku heta malembe ya manyingi na ni pfunisa ka ntirho wa Betele la Djoni ni leswi ni nga ve mun’we wa vamakwerhu va Comissão la Filiyali la Djoni.

HI NYIKIWE NTIRHO WUN’WANA!

Hi 2001 hi kume ntirho wun’wana lowu nga ni tsakisa hintamu. Ni rhambiwile swaku ni ya va mun’we wa vamakwerhu va Comissão ya Filiyali la Estados Unidos. Phela a swi ta hi karhatela ku tshika ntirho lowu a hi wu yentxa ni vanghanu va hina Djoni. Kambe a hi tsaka hileswi a hi ta va ni ntirho wun’wana ka Betele la Estados Unidos.

Mamana wa Laura se a a gugile naswona leswi a hi ta ya tirha aNova York a hi nga ta swi kota ku mu pfuna hilani a swi laveka hikona, hi mhaka leyo, a hi karhatekile hintamu. Kambe vamakwavu vanharhu va Laura va vule swaku a va ta sala va mu hlayisa. Vona va te: “Hambileswi hina hi kalaka hi nga swi koti ku va ka ntirho wa nkama hinkwawu, loko hi hlayisa Mamana swi ta yentxa swaku n’wina mi tama mi va ka ntirho lowu.” Phela hi va khensa hintamu hi leswi va nga swi yentxa swaku va hi pfuna.

Makwerhu wa mina ni nsati wa yena, na vona va hi pfune hintamu. Leswi papayi a a file, a va tshama na mamana ka doropa la Toronto aCanadá naswona se a swi hamba 20 wa malembe na va tshama na yena. Xa ku vava hintamu, mamana a game a fa nkama hi nga rhurha hi ya tshama Nova York. Hambileswo, hi va khensa hintamu hileswi va nga hlayisa mamana anze a fa. Ku hlayisa vapsali lava se va nga guga a swi vevuki, kambe maxaka ya hina a ma tinyimisele ku yentxa hinkwaswu swaku ma hlayisa vapsali va hina. Swa tsakisa ku va ni maxaka ya ku tshamisa xileswo!

Ka Betele la Estados Unidos ni hete malembe ya manyingi ka ntirho wa ku yentxa mabuku, naswona ntirho lowu wu ya wu yampsisiwa hi ku famba ka nkama. Swoswi ni tirha ka Departamentu la ku Xava. Phela se ni ni 20 wa malembe na ni tirha ka Betele leli naswona leswo swi ni tsakisa hintamu. Swoswi aBetele la Estados Unidos li ni 5.000 wa vabetelita ni 2.000 wa vamakwerhu lava tirhaka Betele na va tshama makaya ka vona.

Ka 60 wa malembe lawa ma nga hundza, a ni nga swi tivi swaku wutomi la mina a li ta tshamisa ku yini. Kambe ka malembe lawa hinkwawu, nsati wa mina Laura a a ni pfuna. Phela hi ve ni wutomi la ku tsakisa, mintirho ya yinyingi hi tlhela hi tirha ni vamakwerhu va vanene naswona hi yendzele Mabetele ya manyinyi amisaveni tanihi vanyimeli va Sede Mundial. Swoswi ni ni 80 wa malembe ni ku tlula naswona a na ha koti ku yentxa swa swinyingi ka ntirho wa Yehovha kambe ku ni majovhem ya manyingi lawa ma nga kotaka ku yentxela Yehovha mintirho ya yinyingi.

Mupisalema a te: “La tsaka tiko leli Xikwembu xa lona ku nga Yehovha.” (Pis. 33:12) Phela marito lawa i ntiyiso. Ni mu khensa hintamu Yehovha hileswi ni mu tirhelaka na ni ni vanhu va yena lava tsakeke.