Tiyisa Ntshembo Wa Wena

1. Hi wini ntshembo lowu Yehovha a nga hi nyika wona?

YEHOVHA a hi nyike ntshembo wa ku kuma wutomi la ku kala li nga heli. Van’wana va ta li kuma tilweni na va ni miri lowu kalaka wu nga boli. (1 Kor. 15:50, 53) Kambe vanhu va vanyingi va ni ntshembo wa ku hanya hi masiku ni masiku lani misaveni na va tsakile. (Nhla. 21:3, 4) Ntshembo wa hina i wa lisima hintamu, ku nga na mhaka swaku hi ta hanya matilweni kumbe lani misaveni.

2. Ntshembo wa hina wu seketeliwa ka mani, naswona hi mhaka muni hi vula leswo?

² Ka Bibele rito leli nge “ntshembo,” li nga ha vula ku “nyimela minchumu ya yinene leyi nga ta yentxeka.” Funtshi hi nga tiyiseka swaku leswi Yehovha a nga swi tshembisa swi ta yentxeka ka nkama lowu taka. (Rom. 15:13) Hina ha swi tiva leswi Yehovha a nga swi tshembisa naswona ha tiyiseka swaku a ta swi hetisisa. (Tinhl. 23:19) Ha tiyiseka swaku Yehovha wa swi lava naswona a ta swi kota ku hetisisa hinkwaswu leswi a nga hi tshembisa swona. Ntshembo wa hina a ho wu sukela; wona wu tiyile.

3. Hi ta vona yini ka djondzo leyi? (Tipisalema 27:14)

³ Xikwembo xa hina xa hi rhandza naswona xi lava leswaku hi xi tshemba. (Lerha Tipisalema 27:14.) Loko ntshembo wa hina ka Yehovha wu tiyile, hi ta swi kota ku tiyiselela swikarhatu na hi tsakile. Ka djondzo leyi, hi ta vona swaku ntshembo wu nga hi vhikelisa ku yini. Ku sungula hi ta vona swaku ntshembo wu fanisa ku yini ni nsimbi leyi tiyisaka boti ni kapasete. Hi ta gama hi vona swaku hi nga wu tiyisisa ku yini ntshembo wa hina.

NTSHEMBO WA HINA WU FANA NI NSIMBI

4. Ntshembo wa hina wu fanisa ku yini ni nsimbi leyi tiyisaka boti? (Vaheberu 6:19)

⁴ Ka karta leli Pawulo a nga li tsalela Vaheberu, a fanise ntshembo wa hina ni nsimbi leyi tiyisaka boti. (Lerha Vaheberu 6:19.) Pawulo a a tolovela ku yendza hi boti. Hi mhaka leyo, a a swi tiva swaku tinsimbi leti, a ti tirhiseliwa ku tiyisa boti swaku li nga yingayingi ni lwandle. Khambi lin’wana na a yendza hi boti, ku sungule ku ba xidzedze xa xikulu, se a vona vafambisi va boti na va hoxa nsimbi ya ku tiyisa boti swaku li nga chayisani ni maribye. (Mint. 27:29, 39-41) Se, ku fana ni nsimbi yoleyo leyi yendlaka swaku boti li nga yingayingi, ntshembo wa hina wa hi tiyisa wu tlhela wu hi vhikela ka swilo leswi nga wonhaka wunghanu la hina na Yehovha. Naswona wa hi tiyisa swaku hi nga kayakayi hambiloko hi kumana ni swikarhatu. Ntshembo wa hina wu tlhela wu hi yentxa hi rhula nkama hi kumanaka ni swikarhatu hikusa ha swi tiva swaku ku nga li khale swikarhatu swoleswo swi ta hela. A hi khumbukeni swaku Yesu se a a hi byelile swaku hi ta hluphiwa. (Yoh. 15:20) Se, ku pimisa hi hakelo leyi hi nga ta yi kuma ka nkama lowu taka, swi ta hi pfuna ku tama hi tirhela Yehovha hi ku tshembeka.

5. Ntshembo wu mu pfunise ku yini Yesu swaku a tama a tshembeka hambileswi a a ta dlayiwa?

⁵ Pimisa hi leswi ntshembo wu nga mu pfunisa xiswona Yesu swaku a tama a tshembeka hambileswi a a swi tiva swaku a a ta dlayiwa hi ndlela ya ku vava. Hi Pentekoxta wa 33 E.C., mupostolo Pedru a vulavule hi wuprofeta leli kumekaka ka Tipisalema, leli tlhamuselaka ndlela leyi Yesu a a ta swi kota hi yona ku tama a rhula. Wuprofeta lolelo li li: “Ni ta tshama ni ni ntshembo; hikusa a wu nge ni tshiki Sirheni naswona a wu nge pfumeli swaku miri wa lweyi a nga tshembeka ka wena wu bola . . . u ta yentxa swaku ni tsaka swinene phambheni ka wena.” (Mint. 2:25-28; Pis. 16:8-11) Hambileswi a a swi tiva swaku a a ta fa, Yesu a a tama a tsaka hi ku tiva swaku Yehovha a a ta mu pfuxa, naswona a a ta tsaka hi ku tlhela a hanya matilweni ni Papayi wa yena. — Heb. 12:2, 3.

6. I mpsini leswi makwerhu Leonard a nga swi vula hi ntshembo?

⁶ Ntshembo lowu hi nga na wona wu pfuna vamakwerhu va vanyingi swaku va tiyisela. Vona xikombiso xa makwerhu Leonard Chinn lweyi a a tshama aInglaterra. Hi nkama wa Nyimpi ya ku Sungula ya Misava a petiwe djele hileswi a nga yala ku ya nyimpini. A pfaleliwe ka djele leli a a tshama na a li yexe ku ringana tiwheti timbirhi, naswona a va mu sindzisa ku yentxa mintirho ya ku karhata hintamu. Yena a te: “Leswi nga ni humelela swi ni yentxe ni vona swaku hi fanele hi va ni ntshembo swaku hi kota ku tiyisela. Ka Bibele hi ni swikombiso swa Yesu, vapostolo, vaprofeta ni switshembiso swa ku hlamalisa. Hinkwaswu leswi, swi hi nyika ntshembo swi tlhela swi hi nyika ntamu wa ku tiyisela.” A ntshembo a wu fana ni nsimbi ka makwerhu Leonard, ni ka hina swi nga va hi ndlela leyi fanaka.

7. Swikarhatu leswi hi kumanaka na swona swi nga wu tiyisisa ku yini ntshembo wa hina? (Varoma 5:3-5; Yakobo 1:12)

⁷ Loko hi kumana ni swikarhatu hi tlhela hi vona ndlela leyi Yehovha a hi pfunaka hi yona, swi hi yentxa hi tiyiseka swaku Yena wa hi yamukela, naswona leswo swi tiyisa ntshembo wa hina. (Lerha Varoma 5:3-5; Yakobo 1:12.) Leswo swi yentxa swaku ntshembo wa hina wu tiya ku tlula nkama na ha ha li ku djondza Bibele. Sathana a lava swaku swikarhatu leswi hi kumanaka na swona swi hi heta ntamu, kambe hi ku pfuniwa hi Yehovha hi nga swi kota ku tiyisela xikarhatu xin’wana ni xin’wana.

NTSHEMBO WA HINA WU FANA NI KAPASETE

8. Ntshembo wu fanisa ku yini ni kapasete? (1 Vatesalonika 5:8)

⁸ Bibele li tlhela li fanisa ntshembo wa hina ni kapasete. (Lerha 1 Vatesalonika 5:8.) A kapasete li vhikela nhloko ya musonchwa swaku yi nga vavisiwi loko a txopiwa hi valala. Hilani ku fanaka, ka nyimpi leyi hi yi lwaka na Sathana hi lava ku vhikela mimpimiso ya hina ka mintlhamu ya yena. A tirhisa minchumu ya yinyingi swaku a hi ringa a tlhela a chimisa mimpimiso ya hina. Se, ku fana ni leswi kapasete li vhikelaka nhloko ya musonchwa, a ntshembo wu vhikela mimpimiso ya hina leswaku hi kota ku tshembeka ka Yehovha.

9. Ku humelela yini hi vanhu lava kalaka va nga na ntshembo?

⁹ A ntshembo lowu hi nga na wona wa ku kuma wutomi la ku kala li nga heli, wu hi pfuna ku yentxa swiboho hi wutlharhi. Kambe, loko ho tshika ntshembo wa hina wu hola, hi tlhela hi pimisa ku fana ni vanhu va misava, hi nga luzekeliwa hi wutomi la ku kala li nga heli. Vona leswi nga humelela Vakreste va le Korinto. Vona va heleliwe hi ntshembo, va sungula ku kala va nga ha kholwi swaku lava nga fa va ta pfuxiwa. (1 Kor. 15:12) Pawulo a vule swaku lava kalaka va nga na ntshembo wa ku pfuxiwa ka vafi, a vo hanyela ku titsakisa hi ku chava swaku mundzuku va ta fa. (1 Kor. 15:32) Ni namuntlha, lava kalaka va nga na ntshembo ka leswi Yehovha a hi tshembisaka swona, va heta nkama na vo hanyela ku titsakisa ntsena. Kambe hina hi hambanile na vona, hikusa hi tshemba leswi Xikwembu xi nga ta hi yentxela swona ka nkama lowu taka. Ntshembo wa hina wu fana ni kapasete, hikusa wu vhikela mimpimiso ya hina, wu tlhela wu hi pfuna ku kala hi nga hanyeli ku titsakisa, leswi nga wonhaka wunghanu la hina na Yehovha. — 1 Kor. 15:33, 34.

10. Ntshembo wa hina wu hi vhikelisa ku yini ka mavunhwa ya leswaku a swi sizi nchumu ku zama ku tsakisa Xikwembu?

¹⁰ Ntshembo wa hina wu hi vhikela ka mavunhwa ya leswaku a swi sizi nchumu ku zama ku tsakisa Xikwembu. Van’wana va nga ha pimisa leswi: ‘Mina a ni wa nchumu. A ni nge pfuki ni li kumile wutomi la ku kala li nga heli. A ni nge swi koti ku hanya hi minawu ya Xikwembu.’ Khumbuka swaku mun’wana lweyi a a pimisa hi ndlela leyi a ku li Elifazi, munghanu wa ku biha wa Yobo. Yena a vule leswi: “Munhu o va wa yini swaku a va wa ku kwetsima ka matihlo ya Yehovha.” A game a vula leswi hi Yehovha: “Waswivo! Yena a nga va tshembi vakwetsimi va yena. Hambi hi matilo a ma kwetsimanga ka matihlo ya yena.” (Yobo 15:14, 15) Lawo a ku li mavunhwa! Lawo i mavunhwa ya Sathana. Yena wa swi tiva swaku loko hi pimisa hi ndlela yoleyo, ntshembo wa hina wu ta hola. Se, fambela kule ni mavunhwa wolawo u pimisa hi switshembiso swa Yehovha. U nga tshuki u kanakana swaku Yehovha a lava u kuma wutomi la ku kala li nga heli, funtshi a ta ku pfuna swaku u za u li kuma. — 1 Tim. 2:3, 4.

TAMA U TIYISA NTSHEMBO WA WENA

11. Hi mhaka muni hi fanele hi lehisa mbilu nkama lowu hi nyimela Yehovha a hetisisa switshembiso swa yena ?

¹¹ Minkama yin’wana swi nga ha hi karhatela ku tiyisa ntshembo wa hina, hikusa hi nga ha pimisa swaku Yehovha o hlwela ku hetisisa switsembiso swa yena. Loko leswo swi yentxeka, hi fanele hi lehisa mbilu na hi khumbuka swaku Yehovha a kona minkama hinkwayu naswona leswi hina hi wu vonisaka xiswona nkama a swi fani ni leswi Yena a wu vonisaka xiswona. (2 Ped. 3:8, 9) Yehovha a ta swi yentxa leswi a nga hi tshembisa swona, kambe swi nga yentxeka ku nga li hi ndlela leyi hina hi yi navelaka. Se, i mpsini swi nga ta hi pfuna ku tama hi tiyisa ntshembo wa hina, nkama lowu hi lehisaka mbilu na hi nyimela swaku Yehovha a hetisisa switshembiso swa yena? — Yak. 5:7, 8.

12. Hi ku ya hi Vaheberu 11:1, 6, ntshembo wu fanisa ku yini ni lipfumelo?

¹² Bibele li fanisa ntshembo ni lipfumelo la leswaku Yehovha a kona ni swaku ‘hi yena a hakelaka lava mu lavaka hi mbilu hinkwayu.’ (Lerha Vaheberu 11:1, 6.) Loko hi kholwa swaku Yehovha a kona hikakunene, ntshembo wa hina wu ta ya wu tiya naswona a hi nga ta kanakana swaku a ta swi yentxa hinkwaswu leswi a nga swi tshembisa. Loko hi ya hi va vanghanu va Yehovha, ntshembo wa hina wu ta ya wu tiya. Swoswi a hi voneni leswi nga hi pfunaka ku kulisa wunghanu la hina na Yehovha hi tlhela hi tiyisa ntshembo wa hina.

13. Hi nga swi kotisa ku yini ku va vanghanu va Xikwembu?

¹³ Khongela ka Yehovha u tlhela u djondza Bibele. I ntiyiso swaku a hi nge mu voni Yehovha, kambe hi nga swi kota ku va vanghanu va yena. Hi nga vulavula na yena hi xikhongelo na hi tiyiseka swaku wa hi twa. (Yer. 29:11, 12) Hina hi nga twa Xikwembu loko hi djondza Bibele hi tlhela hi pimisa hi leswi hi swi djondzaka. Nkama hi djondzaka hi ndlela leyi Yehovha a nga va hlayisa hi yona vanhu va yena va khale, ntshembo wa hina wa tiya. Hinkwaswu leswi nga ka Bibele “swi tsaleliwe ku djondzisa hina. Swi hi nyika ntshembo hikusa Matsalwa lawa ma hi pfuna ku tiyisela ma tlhela ma hi tiyisa.” — Rom. 15:4.

14. Hi mhaka muni swi li swa lisima ku pimisa hi switshembiso leswi Yehovha se a nga swi hetisisa?

¹⁴ Pimisa hi ndlela leyi Yehovha a nga swi hetisisa hi yona switshembiso swa yena. Pimisa hi leswi Yehovha a nga swi yentxela Abrahamu na Sara. Hambileswi se a va gugile, Yehovha a va tshembisile swaku a va ta va ni n’wana. (Gen. 18:10) Se, Abrahamu a a yi vonisa ku yini mhaka leyi? Bibele li li: ‘Abrahamu a kholwile swaku a a ta va papayi wa matiko ya manyingi.’ (Rom. 4:18) Hambileswi hi ku ya hi mavonelo ya munhu a swi tikomba ingi leswi Yehovha a nga swi tshembisa a swi nge hetiseki, Abrahamu a a kholwa swaku leswi Yehovha a nga swi tshembisa a ta swi hetisisa. Ku kholwa koloko a ku vanga ka mahala. (Rom. 4:19-21) Leswi nga yentxekela Abrahamu, swi hi tiyisekisa swaku minkama hinkwayu Yehovha wa swi hetisisa switshembiso swa yena, hambi swi tikomba ingi a swi nge hetiseki hi ku ya hi mavonelo ya munhu.

15. Hi mhaka muni hi fanele hi pimisa hi leswi Yehovha se a nga hi yentxela swona?

¹⁵ Pimisa hi leswi Yehovha se a nga ku yentxela swona. Pimisa hi switshembiso swa Bibele leswi se swi nga hetiseka ka wena. Hi xikombiso, Yesu a hi tshembise swaku Papayi wa yena a ta hi nyika hinkwaswu leswi hi swi lavaka swaku hi tama hi hanya. (Mat. 6:32, 33) Yesu a tlhele a hi tiyisekisa swaku Yehovha a ta hi nyika moya wa yena wa ku kwetsima loko hi mu kombela. (Luk. 11:13) Hikakunene Yehovha wa swi hetisisa switshembiso swa yena. Swi nga yentxeka u khumbuka switshembiso swin’wana leswi swoswi Yehovha a swi hetisisaka ka wena. Yena a tshembisa ku ku rivalela, ku ku tiyisa ni ku ku nyika leswi u swi lavaka swaku u va munghanu wa yena. (Mat. 6:14; 24:45; 2 Kor. 1:3) Ku pimisa hi leswi Xikwembu se xi nga ku yentxela, swi ta tiyisa ntshembo wa wena wa leswaku xi ta swi hetisisa hinkwaswu leswi xi nga tshembisa ku ku yentxela ka nkama lowu taka.

TSAKANI HI NTSHEMBO

16. Hi mhaka muni ntshembo wa hina wu li xihiwa xa lisima?

¹⁶ Ntshembo lowu hi nga na wona wa ku kuma wutomi la ku kala li nga heli, i xihiwa xa lisima lexi taka hi ka Xikwembu. Hi wu nyimele hintamu nkama lowu switshembiso hinkwaswu swa Yehovha swi nga ta hetiseka. Ntshembo wa hina wu fana ni nsimbi leyi tiyisaka boti. Wu hi yentxa hi tiya loko hi kumana ni swikarhatu, hi hluphiwa kumbe hi langutana ni lifu. Wona wu fana ni kapasete, wu hi vhikela ka mimpimiso ya ku biha ivi hi khomelela ka leswi nga swinene. Ntshembo wa hina lowu kumekaka ka Bibele wu hi tshineta kusuhi hintamu na Yehovha, wu tlhela wu hi komba ku kula ka lirhandzu leli Yehovha a nga na lona hi hina. Loko hi tiyisa ntshembo wa hina, Yehovha a ta hi katekisa.

17. Hi mhaka muni hi fanele hi tsaka hi ntshembo wa hina?

¹⁷ Mupostolo Pawulo a hi tiyisile hi marito lama nge: “Tsakani hi mhaka ya ntshembo wa n’wina”. (Rom. 12:12) Pawulo a a ni swivangelo swa ku twala swa ku tsaka hikusa a a tiyiseka swaku loko a tama a tshembeka a a ta kuma wutomi la ku kala li nga heli amatilweni. Na hina ha tsaka hi mhaka ntshembo wa hina, hikusa ha swi tiva swaku Yehovha a ta swi hetisisa switshembiso swa yena. Mupisalema a tsale a ku: “Wa tsaka lweyi . . . a tshembaka Yehovha Xikwembu xa yena, . . . lweyi a tshamaka a tshembekile.” — Pis. 146:5, 6.