Indjhe Swi Nga Koteka Ku Hanya Wutomi La Ku Kala Li Nga Heli?

1. Ku pimisa hi leswi Yehovha a hi tshembisaka swona swi hi khumbisa ku yini?

YEHOVHA a hi tshembisa swaku lava mu yingisaka va ta kuma “wutomi la ku kala li nga heli.” (Rom. 6:23) Loko hi pimisa hi leswi Yehovha a hi tshembisaka swona, hi ta ya hi mu rhandza. Phela Yehovha a hi rhandza hintamu lakakuva a xi kona lexi xi nga hi hambanisaka na yena.

2. Xitshembiso xa Xikwembu xa ku hi nyika wutomi la ku kala li nga heli xi hi pfunisa ku yini?

² Xitshembiso xa Xikwembu xa ku hi nyika wutomi la ku kala li nga heli xi hi pfuna ku tiyisela swikarhatu namuntlha. Hambiloko valala va hina va hi hlupha kumbe va hi dlaya, a hi nge tshiki ku tama hi tirhela Yehovha. Hi mhaka muni? Hikusa loko hi tama hi tshembeka ka Yehovha, hambiloko ho fa a ta hi pfuxa naswona hi ta va ni ntshembo wa ku hanya na hi nga ha fi. (Yoh. 5:28, 29; 1 Kor. 15:55-58; Heb. 2:15) A hi voneni leswi hi tiyisekisaka swaku swi ta koteka kuva hi kuma wutomi la ku kala li nga heli.

YEHOVHA A KONA MINKAMA HINKWAYU

3. I yini xi hi tiyisekisaka swaku Yehovha a ta hi nyika wutomi la ku kala li nga heli? (Tipisalema 102:12, 24, 27)

³ Ha swi tiva swaku Yehovha a ta hi nyika wutomi la ku kala li nga heli hikusa yena i Xihlovo xa wutomi, funtshi a nga fi. (Pis. 36:9) Vona tindzimana tin’wani leti kombisaka swaku Yehovha minkama hinkwayu a kona. Hi xikombiso, Tipisalema 90:2 yi vula swaku Yehovha “a kona minkama hinkwayu.” Tipisalema 102 na yona yi tiyisekisa mhaka leyi fanaka. (Lerha Tipisalema 102:12, 24, 27.) Loko muprofeta Habakuku a vulavula hi Yehovha a te: “U kona minkama hinkwayu, Wena Yehovha Xikwembu xa mina, Mukwetsimi wa mina, a wu nge fi.” — Hab. 1:12.

4. Hi fanele hi karhateka loko hi nga swi twisisi swaku Yehovha a kona minkama hinkwayu? Tlhamusela.

⁴ Swa ku karhatela ku twisisa swaku Yehovha a kona “minkama hinkwayu”? (Esa. 40:28) Loko ku li swaku u titwisa xileswo a wu wexe. Elihu na yena a tshame a vula leswi hi Yehovha: “Malembe ya wena i manyingi lakaku a ma twisiseki.” (Yobo 36:26) Kambe ku kala hi nga wu twisisi nchumu a swi vuli swona swaku a wu kona. Hi xikombiso, swi nga yendleka hi nga swi twisisi swaku gezi li tirhisa ku yini kambe ha tiyiseka swaku lona li kona. Swa fana na Yehovha, swi nga yendleka ka tinhloko ta hina hi nga swi twisisi kahle loko Bibele li ku a kona minkama hinkwayu. Kambe leswo a swi txintxi mhaka ya leswaku a kona minkama hinkwayu. (Rom. 11:33-36) Yehovha a ve kona na swilo hinkwaswu leswi hi swi vonaka, swa ku fana ni dlambu swi nge se va kona. Ha swi tiva leswo hikusa “hi Yena a nga yendla misava hi ntamu wa yena.” Funtshi a ve kona “na matilo ma nge se va kona.” (Yer. 51:15; Mint. 17:24) I mpsini swin’wani swi hi tiyisekisaka swaku Yehovha a ta hi nyika wutomi la ku kala li nga heli?

HI YENDLELIWE KU HANYA NKAMA WA KU KALA WU NGA HELI

5. Hi wini ntshembo lowu Adamu na Evha a va li na wona?

⁵ Ka swilo hinkwaswu leswi Yehovha a nga swi yendla, ko va vanhu ntsena lava a nga va nyika ntshembo wa ku hanya wutomi la ku kala li nga heli. Kambe leswaku leswo swi koteka, a nkama a nga hamba Adamu, Yehovha a mu nyike nawu lowu nge: “U nga dla mihandzu ya minsinya hinkwayu leyi nga ka jardim leli, kambe a handzu wa ku tiva swaswinene ni swa ku biha u nga tshuki u wu dla, hikusa siku u nga ta dla u ta fa.” (Gen. 2:17) Loko Adamu na Evha a va wu yingisile nawu lowu, ina va nga fanga. Naswona swa tikomba swaku hi ku famba ka nkama, swi nga yendleka Yehovha a a ta va tshika va dla handzu wa nsinya wa wutomi. Se leswo a swi ta yendla swaku hikakunene va hanya wutomi “la ku kala li nga heli.”b — Gen. 3:22.

6-7. a) I yini xin’wani lexi kombisaka swaku hina vanhu a hi yendliwanga swaku hi fa? b) I mpsini u nga ta navela ku swi yendla ka misava ya nyuwani? (Vona mafoto.)

⁶ Vanhu va hanya kolomu ka 70 kumbe 80 wa malembe. Kambe vativi va siyensiya va vula swaku hina hi nga kota ku vekisa minchumu yayinyingi ka nhloko ya hina ya ku tlula 70 kumbe 80 wa malembe. Hi xikombiso, a jornal lin’wani la 2010 leli vulavulaka hi timhaka ta siyensiya, li kombise swaku a nhloko ya hina yi nga kota ku vekisa maprograma lama kombisiwaka ka televisão ya ku tlula 300 wa malembe. Leswo hi leswi vasiyentixta va swi vulaka; kambe swi nga yendleka vanhu va kota ku vekisa minchumu ya ku tlula leswi vasiyentixta va swi vulaka. Leswo swi kombisa swaku Yehovha a hi yendle na hi kota ku vekisa minchumu yayinyingi ka tinhloko ta hina, ya ku tlula 70 kumbe 80 wa malembe lawa vanhu va tolovelaka ku hanya wona. — Pis. 90:10.

⁷ Yehovha a hi yendle na hi ni ku navela ku hanya. Bibele li vula leswaku Yena a veke ku navela ku hanya “nkama wa ku kala wu nga heli ka timbilu ta hina.” (Ekl. 3:11) Lexi i xin’we xa swivangelo leswi yendlaka lifu li va nala wa hina. (1 Kor. 15:26) Indjhe loko hi vabya, ho hanya ntsena hi nga na mhaka na swona? Ihim. Hi ya ka dotori, funtshi hi nwa makinina swaku hi lwisana ni mavabyi wolawo. Se, hi yendla hinkwaswu leswo hikusa a hi swi lavi ku fa. Funtshi hambiloko munhu lweyi hi mu rhandzaka a fa, ku nga na mhaka swaku a gugile kumbe a nga guganga, a mbilu ya hina yi vava hintamu swinene. (Yoh. 11:32, 33) Vhela, lweyi a nga hi yendla a hi nyike ku navela koloko a tlhela a hi yendla hi ndlela ya ku kota ku vekisa swilo ka tinhloko ta hina hi ndlela ya ku hlamalisa hikusa a a lava swaku hi hanya wutomi la ku kala li nga heli. Kambe ku ni swivangelo swin’wani leswi hi yendlaka hi kholwa swaku swi nga koteka ku va ni wutomi la ku kala li nga heli. A hi voneni swilo swin’wani swa leswi Yehovha a nga swi yendla khale ni leswi a swi yendlaka swoswi, leswi kombaka swaku Yehovha a nge se txintxa xikongomelo xa yena.

YEHOVHA WA HA SWI LAVA KU NYIKA VANHU WUTOMI LA KU KALA LI NGA HELI

8. Esaya 55:11 yi swi kombisa ku yini swaku leswi Yehovha a a swi lava swa ha ta yendleka?

⁸ Leswi Yehovha a a swi lava a swi txintxanga hambileswi Adamu na Evha va nga djoha, va gama va yendla swaku vana va vona va fa. (Lerha Esaya 55:11.) Phela Yena wa ha swi lava swaku lava tshembekaka va hanya wutomi la ku kala li nga heli. Hi nga swi vona leswo loko hi kambisisa leswi Yehovha a nga swi yendla ni ku swi vula swaku leswo swi koteka.

9. I mpsini leswi Yehovha a nga swi tshembisa? (Daniyele 12:2, 13)

⁹ Yehovha a tshembisa ku pfuxa lava nga fa a tlhela a va nyika wutomi la ku kala li nga heli. (Mint. 24:15; Tito 1:1, 2) Wanuna mun’wani wa ku tshembeka lweyi a vitaniwaka Yobo a a tiyiseka swaku Yehovha wa swi lava ku pfuxa lava nga fa. (Yobo 14:14, 15) Muprofeta Daniyele a a swi tiva swaku vanhu va ta pfuxiwa va tlhela va va ni ntshembo wa ku hanya wutomi la ku kala li nga heli. (Pis. 37:29; lerha Daniyele 12:2, 13.) A Vayuda va nkameni wa Yesu na vona a va swi tiva swaku Yehovha a nga nyika “wutomi la ku kala li nga heli” lava va tshembekaka ka Yena. (Luk. 10:25; 18:18) Hi ku phindhaphindha Yesu a vulavule hi xitshembiso lexi, funtshi na yena a pfuxiwile hi Papayi wa yena. — Mat. 19:29; 22:31, 32; Luk. 18:30; Yoh. 11:25.

10. Kuva vanhu va pfuxiwile ka nkama lowu nga hundza swi kombisa swaku yini? (Vona mufoto.)

¹⁰ Yehovha i xihlovo xa wutomi naswona a ni matimba ya ku pfuxa lava nga fa. A nyike matimba muprofeta Eliya swaku a pfuxa n’wana wa wansati wa ku feliwa hi nuna wa le Sarepta. (1 Tiho. 17:21-23) Hi ku famba ka nkama, hi ku pfuniwa hi Xikwembu, muprofeta Elixa a pfuxe n’wana wa wansati wa Muxunemi. (2 Tiho. 4:18-20, 34-37) Hinkwaswu leswi swi kombisa swaku Yehovha a ni matimba ya ku pfuxa lava nga fa. Hambi Yesu nkama na a li lani misaveni a swi kombisile swaku Yehovha hi yena a a mu nyike matimba ya ku pfuxa lava nga fa. (Yoh. 11:23-25, 43, 44) Swoswi Yesu a le matilweni naswona “a nyikiwe matimba . . . atilweni ni le misaveni.” Leswo swi kombisa swaku hi matimba wolawo a ta pfuxa hinkwavu lava nga “ka masirha” a tlhela a va nyika ntshembo wa ku hanya wutomi la ku kala li nga heli. — Mat. 28:18; Yoh. 5:25-29.

11. Lifu la Yesu li hi pfunisa ku yini ku kuma wutomi la ku kala li nga heli?

¹¹ Hi mhaka muni Yehovha a pfumelele swaku N’wana wa yena a fa hi ndlela ya ku vava? Yesu a hlaye leswi: “Hikusa Xikwembu xi rhandze misava swinene xi za xi nyikela hi N’wana wa xona lweyi a nga psaliwa a li yexe, swaku lweyi a pfumelaka ka yena a nga lovisiwi kambe a kuma wutomi la ku kala li nga heli.” (Yoh. 3:16) Lifu la Yesu Kreste li yendla swaku swidjoho swa hina swi rivaleliwa, li tlhela li hi pfulela swipfalu kuva hi kuma wutomi la ku kala li nga heli. (Mat. 20:28) Mupostolo Pawulo a tlhamusele mhaka leyi hi ndlela leyi: “Leswi lifu li nga nghena hi mhaka munhu, ni ku pfuxiwa ka vafi ku kona hi mhaka ya munhu. Ku fana ni leswi hinkwavu va faka hi mhaka ya Adamu, hinkwavu va ta tlhela va pfuxiwa hi mhaka ya Kreste.” — 1 Kor. 15:21, 22.

12. Mfumu wa Xikwembu wu ta xi hetisisa ku yini xikongomelo xa Yehovha?

¹² Yesu a byele valandzeli va yena swaku va khongela va kombela swaku Mfumu wa Xikwembu wu ta leswaku ku rhandza ka Xikwembu ku yendleka lani misaveni. (Mat. 6:9, 10) Xin’we xa swikongomelo swa Xikwembu i xa leswaku vanhu va hanya wutomi la ku kala li nga heli amisaveni. Leswaku leswo swi koteka, Yehovha a veke N’wana wa yena Yesu swaku a va Hosi ya Mfumu wa Yena. Swoswi a karhi a hlengeleta 144.000 wa vanhu, swaku va ta tirhisana na Yesu a ku hetisiseni ka xikongomelo xolexo. — Nhla. 5:9, 10.

13. I mpsini leswi Yehovha a swi yendlaka swoswi, naswona i mpsini leswi u faneleke u swi yendla?

¹³ Swoswi Yehovha a hlengeleta vanhu va xitshungu xaxinyingi a tlhela a va djondzisa leswaku va tiveka hansi ka Mfumu wa Yena. (Nhla. 7:9, 10; Yak. 2:8) Hambileswi hi hanyaka ka misava ya ku tala hi tinyimpi ni ku nyenyana, lava xitshungu xaxinyingi a va yavananga, funtshi va rhandzana va tlhela va twanana. Hi marito man’wani, swi fana ni loko va txintxe swipada swa vona swi va swikomu. (Miki. 4:3) A va tipeti ka tinyimpi ta misava leyi leti ti dlayaka vanhu vavanyingi. Ku hamba ni leswo, va djondzisa vanhu van’wani hi Xikwembu ni leswi xi lavaka ku swi yendla leswaku na vona va ta kuma wutomi la ku kala li nga heli. (1 Tim. 6:19) Minkama yin’wani maxaka ya vona ma nga ha va hlupha kumbe va pfumala male ya ku yendla leswi va swi lavaka hi mhaka ya leswi va seketelaka Mfumu wa Xikwembu, kambe Yehovha wa va pfuna hi ku va nyika leswi va swi lavaka. (Mat. 6:25, 30-33; Luk. 18:29, 30) Hinkwaswu leswi swi hi tiyisekisa swaku Mfumu wa Xikwembu se wa fuma naswona wu ta yendla hinkwaswu leswi Yehovha a swi lavaka.

SWILO SWA KU TSAKISA SWI LE KU TENI

14-15. Xitshembiso xa Yehovha xa ku helisa lifu xi ta hetisisiwa ku yini?

¹⁴ Yesu swoswi i Hosi ya Mfumu wa Xikwembu amatilweni naswona a ta hetisisa switshembiso hinkwaswu swa Yehovha. (2 Kor. 1:20) Ku sukela 1914, Yesu a karhi a lwisana ni valala va yena. (Pis. 110:1, 2) Yesu ni lava nga ta fuma na yena va ta hlula naswona va ta helisa wubihi. — Nhla. 6:2.

¹⁵ Ka Mfumu wa Yesu wa 1.000 Wa Malembe, lava ku fa va ta pfuxiwa naswona lava yingisaka va ta susiwa xidjoho hi kutsongokutsongo. Ndzhaku ka ku kambeliwa ka wugamu, lava nga ta tshama va tshembekile va ta kuma wutomi la ku kala li nga heli lani misaveni. (Pis. 37:10, 11, 29) Hi nkama wolowo, nala wa wugamu ku nga lifu a ta helisiwa a nga ha li kona. — 1 Kor. 15:26.

16. Ku fanele ku va yini lexi hi susumetelaka ku tirhela Yehovha?

¹⁶ Hi ku ya hi leswi hi nga swi djondza, a ntshembo wa hina wa ku hanya hi masiku wu seketeliwe ka Rito la Xikwembu. Ntshembo lowu wu nga hi pfuna kuva hi tama hi tshembeka ka masiku ya wugamu lawa hi hanyaka ka wona. Kambe leswaku hi tsakisa Yehovha, a hi fanelanga hi mu tirhela ntsena hi mhaka leswi hi lavaka ku kuma wutomi la ku kala li nga heli. Hi fanele hi tshembeka ka Yehovha ni ka Yesu hi mhaka ya leswi hi va rhandzaka. (2 Kor. 5:14, 15) Lirhandzu lolelo li fanele li hi yendla hi va tekelela hi tlhela hi chumayela hi ntshembo lowu hi nga na wona. (Rom. 10:13-15) Loko hi nga tshameli ku pimisa hi hina ntsena kambe hi yavelana ni van’wani leswi hi nga na swona, hi ta va vanhu lava Yehovha a va lavaka swaku va va vanghanu va yena ni ku va nyika wutomi la ku kala li nga heli. — Heb. 13:16.

17. U fanele u yendla yini? (Matewu 7:13, 14)

¹⁷ Indjhe wena u ta li kuma wutomi la ku kala li nga heli? Yehovha se a ku pfulelile xipfalu. Kambe swoswi swi le ka wena kuva u nghena u tlhela u tama u famba ka ndlela leyi yi yisaka ka wutomi la ku kala li nga heli. (Lerha Matewu 7:13, 14.) Kambe li ta tshamisa ku yini wutomi lolelo? Hi ta bula hi mhaka leyi ka nhlokomhaka leyi taka.