Swivutiso Swa Valerhi

A 70 wa vadjondzisiwa lava Yesu a nga va rhuma swaku va ya chumayela a va li kwini nkama a nga veka Xilalelo Xa Hosi? Ku nga va leswaku a va mu tshikile Yesu va nga ha mu landzeli?

I ntiyiso leswaku vadjondzisiwa lava 70 a va nga li na Yesu nkama a nga veka Xilalelo Xa Hosi, kambe leswo a swi vuli swona leswaku Yesu a a nga ha va yamukeli kumbe leswaku vona a va mu tshikile va nga ha mu landzeli. Leswi nga yendleka hi leswaku Yesu a a lava ku va ni vapostolo va yena lava 12 ntsena ka xiyendlakalu lexiyani.

Lava 12 ni lava 70, hinkwavu a va li vadjondzisiwa va Yesu. (Luk. 6:12-16) Yesu a rhange hi ku va ni 12 wa vapostolo lava a a li na vona aGalileya lava a nga “va rhuma swaku va ya chumayela hi Mfumu wa Xikwembu ni ku hanyisa lava vabyaka.” (Luk. 9:1-6) Hi ku famba ka nkama, seniyani Yuda, Yesu a tlhele a langa 70 wa vadjondzisiwa van’wani lava a nga gama a va rhuma leswaku va famba va ya chumayela hi vambirhi vambirhi. (Luk. 9:51; 10:1) Yesu a a ni vadjondzisiwa va vanyingi ka tindhawu ta ku hambanahambana lava a va chumayela muhungu ya ku tsakisa.

Vayuda lava a va li vadjondzisiwa va Yesu a va ha fanele va tama va hamba Paxkwa lembe ni lembe, kumbexana leswo a va swi yendla xikan’we ni mindjangu ya vona. (Eks. 12:6-11, 17-20) Kambe nkama lowu Yesu na a li kusuhi ni ku fa, a fambe ni vapostolo va yena aYerusalema. Lano a nga rhambanga vadjondzisiwa va yena hinkwavu lava a a li na vona ku sukela aYudiya, Galileya ni le Periya leswaku a ya tlangela Paxkwa. Swi vhela swi tikomba leswaku Yesu a o lava ku va ni vapostolo va yena ntsena ka xiyendlakalu lexiyani. Hi leswo swi nga mu yendla a vula leswi ka Luka 22:15: “Ni tsakile swinene hi ku dla Paxkwa leli na n’wina na ni nga se xanisiwa.”

Yesu a a ni swivangelo swa ku twala swa ku yendla leswo. Phela Yesu a a ta fa a va “Xinyempfani xa Xikwembu lexi susaka xidjoho misaveni.” (Yoh. 1:29) Yesu a a ta fa Yerusalema ku nga ndhawu leyi Vayisrayele a va yendlela kona magandzelo ka Yehovha, kambe gandzelo leli la Yesu a li ta va likulu hintamu ku tlula magandzelo hinkwawu lawa Vayisrayele a va ma yendla hikusa gandzelo la Yesu a li ta yendla leswaku hi chunsiwa ka xidjoho ni lifu. (1 Ko. 5:7, 8) Naswona lifu la Yesu a li ta yendla leswaku vapostolo lava va 12 va sungula bandla la Wukreste. (Efe. 2:20-22) Se Bibele li vula leswaku Yerusalema ku nga doropa la kwetsima a “yakiwe henhla ka 12 wa maribye” naswona “ka wona a ku tsaliwe 12 wa mavito ya 12 wa vapostolo va Xinyempfani.” (Nhl. 21:10-14) Leswo swi kombisa leswaku Vakreste lavayani a va ni ntirho wa lisima hintamu lowu a va fanele va wu hetisisa. Hi leswo swi nga yendla Yesu a lava ku va na vona ka Paxkwa la wugamu ni ka Xilalelo Xa Hosi.

Ku nga na mhaka swaku lava 70 a va nga li kona ka Xilalelo Xa Hosi kambe a ko va ni lava va 12, hinkwavu va pfuneka hi Xilalelo Xa Hosi. Swa fana na hina namuntlha, ha pfuneka hi mhaka ya Xilalelo lexi Yesu a nga xi yendla ka nkama lowuyani ni vapostolo va yena. — Luk. 22:29, 30.