NHLOKOMHAKA YA DJONDZO 26
LISIMU 123 Hi Tiveka Hansi Ka Yehovha
Tama U Tiveka Hansi Loko Ku Ni Leswi U Kalaka U Nga Swi Tivi
“A hi nge tshuki hi twisise Lweyi Wa Matimba Hinkwawu.” — YOB. 37:23.
LESWI HI NGA TA SWI DJONDZA
Nhlokomhaka leyi yi ta hi pfuna ku vona swaku ku pimisa hi leswi se hi swi tivaka ni ku tshemba Yehovha, swi nga hi pfuna ku tiyisela swikarhatu hambiloko hi nga tivi hinkwaswu leswi nga ha yendlekaka.
1. Yehovha a hi yendle na hi kota ku yendla yini, naswona hi mhaka muni?
YEHOVHA a hi yendle na hi kota ku pimisa, ku djondza swilo swa nyuwani ni ku tlhela hi tirhisa leswi hi swi djondzaka. A hi yendle hi ndlela leyo leswaku hi “ta va ni wutivi la Xikwembu” hi tlhela hi tirhisa wutivi lolelo kuva hi mu tirhela. — Swiv. 2:1-5; Rom. 12:1.
2. a) I mpsini leswi hi faneleke hi swi pfumela? (Yobo 37:23, 24) (Vona mufoto.) b) Hi mhaka muni leswo swi li swa lisima?
2 Hambileswi Yehovha a nga hi yendla na hi kota ku djondza swilo, ku ni swilo swa swinyingi leswi hi kalaka hi nga swi tivi. (Lerha Yobo 37:23, 24.) Vona leswi nga yendlekela Yobo. Yehovha a mu yendle swivutiso swa swinyingi leswi nga kombisa swaku ku ni swilo leswi Yobo a a nga swi tivi. Mabulu wolawo ma pfune Yobo kuva a tiveka hansi a tlhela a lulamisa mapimiselo ya yena. (Yob. 42:3-6) Na hina hi fanele hi tiveka hansi, hi pfumela swaku a hi tivi swilo hinkwaswu. Loko hi yendla leswo, hi ta ya hi tiyiseka swaku minkama hinkwayu Yehovha a ta hi byela leswi hi faneleke hi swi tiva leswaku hi kota ku yendla swiboho swaswinene. — Swiv. 2:6.
Ku pfumela swaku ku ni leswi hi kalaka hi nga swi tivi swi nga hi pfuna ku fana ni leswi swi nga mu pfunisa xiswona Yobo (Vona paragrafu 2)
3. Hi ta djondza hi yini ka nhlokomhaka leyi?
3 Ka nhlokomhaka leyi, hi ta vona swilo swin’wani leswi hi kalaka hi nga swi tivi ni leswi nga ha yendlekaka hileswi hi kalaka hi nga swi tivi swilo swoleswo. Hi ta tlhela hi vona swaku hi mhaka muni swi li kahle kuva hi nga swi tivi swilo swin’wani. Phela ku djondza hi swilo leswi, swi ta hi pfuna ku ya hi mu tshemba hintamu Yehovha, “Lweyi a nga ni wutivi hinkwalu”, swi tlhela swi hi pfuna ku tshemba swaku Yehovha a hi byela leswi hi faneleke hi swi tiva. — Yob. 37:16.
A HI SWI TIVI SWAKU MAGAMU MA TA FIKA SIKU MUNI
4. Hi ku ya hi Matewu 24:36, hi swini swilo swin’wani leswi hi kalaka hi nga swi tivi?
4 Lerha Matewu 24:36. Hina a hi li tivi siku leli Yehovha a nga ta helisa misava leyi ya ku biha ya Sathana. Hambi hi Yesu nkama lowu a a li lani misaveni, a a nga li tivi ‘siku ni nkama’ lowu Yehovha a a ta swi yendla leswo.a Kambe Yesu a game a tlhamusela vapostolo va yena swaku Yehovha Muhlayisi Wamukulu wa Nkama hi yena a nga ni mfanelo ya ku veka nkama lowu swilo swi nga ta yendleka hi wona. (Min. 1:6, 7) Phela Yehovha se a li vekile siku leli a nga ta helisa misava leyi ya ku biha, kambe a nga hi pfumelelanga swaku hi li tiva.
5. Ku kala hi nga li tivi siku leli Yehovha a nga ta helisa misava leyi, swi nga hi khumbisa ku yini?
5 Hi ku ya hi leswi Yesu a nga swi vula, a hi swi tivi swaku swi ta lava hi heta nkama muni na hi nyimela swaku Yehovha a helisa misava leyi ya Sathana. Leswo swi nga ha yendla swaku swi hi karhatela ku tama hi rindza, ngopfungopfu loko se hi ni malembe ya manyingi na hi tirhela Yehovha. Naswona minkama yin’wani swi nga hi godolisa loko maxaka ya hina kumbe vanhu van’wani va hi hleka hileswi magamu ma kalaka ma nge se fika. (2 Pe. 3:3, 4) Swi nga yendleka hi tibyela swaku a swi ta hi vevukela ku lehisa mbilu hi tlhela hi tiyisela loko va hi hleka, loko a ho tiva siku leli Yehovha a nga ta helisa misava leyi hi lona.
6. Ku kala hi nga li tivi siku leli magamu ma nga ta fika hi lona swi hi pfunisa ku yini?
6 Ku va Yehovha a nga hi byelanga siku leli magamu ma nga ta fika hi lona, swi hi pfuna ku kombisa swaku hi mu tirhela hileswi hi mu rhandzaka ni hileswi hi mu tshembaka. Phela hina a hi tirheli Yehovha na hi pimisa hi siku ntsena, hikusa lipfumelo la hina ka Yehovha a li na prazu, hi ta tama hi li kombisa hi masiku ni masiku. Se handle ka ku tshamela ku karhateka hi swaku “siku la Yehovha” li ta fika siku muni, hi fanele hi pimisa hi swilo swa ku tsakisa leswi nga ta yendleka loko siku lolelo li fika. Leswo swi ta hi pfuna ku kulisa wunghanu la hina na Yehovha, hi ya hi mu tshemba hi tlhela hi tikarhatela ku mu tsakisa. — 2 Pe. 3:11, 12.
7. I mpsini leswi hi swi tivaka?
7 I swa lisima hintamu kuva hi pimisa hi leswi hi swi tivaka, swa ku fana ni leswaku masiku ya wugamu ma sungule hi 1914. Wuprofeta la Bibele a lo kombisa ntsena lembe leli masiku ya wugamu ma nga sungula hi lona, kambe li tlhela li vula leswi misava a yi ta tshamisa xiswona ka masiku ya wugamu. Se loko hi txuvuka misava leyi, ha tiyiseka swaku “siku lalikulu la Yehovha li le kusuhi!” (Sof. 1:14) Ha wu tiva ntirho lowu Yehovha a nga hi nyika wona ka masiku lawa ya wugamu, ku nga ku chumayela “mahungu ya ku tsakisa ya Mfumu” hilani hi nga kotaka hi kona. (Mat. 24:14) Mahungu lawa ya ku tsakisa ma chumayeliwa kolomu ka 240 wa matiko naswona ma chumayeliwa hi ku tlula 1.000 wa tirimi. Se swa tikomba swaku a swi bohi kuva hi tiva ‘siku ni nkama’ leswaku hi wu yendla hi matimba ntirho lowu Yehovha a nga hi nyika wona.
A HI WU TIVI HI KU HELELA NTIRHO WA XIKWEMBU
8. Marito lawa ma nge “ntirho wa Xikwembu xa ntiyiso” ma vula yini? (Ekleziyaxta 11:5)
8 Minkama yin’wani a hi nge wu twisisi “ntirho wa Xikwembu xa ntiyiso”. (Lerha Ekleziyaxta 11:5.) Marito lawa ma vula leswi Yehovha a swi yendlaka ni leswi a pfumelelaka swaku swi yendleka kuva a hetisisa xikongomelo xa yena. A hi swi tivi hi ku helela swaku hi mhaka muni Yehovha a pfumelela swaku swilo swin’wani swi yendleka, kumbe leswi a nga ta hi pfunisa xiswona ka minkama yin’wani. (Ps. 37:5) Bibele li fanisa ku kala hi nga wu tivi “ntirho wa Xikwembu xa ntiyiso” ni ku kala hi nga yi twisisi ndlela leyi n’wana a kulaka hi yona ndzeni ka khwirhi la mamani wa yena. Hambileswi vadotori va djondzaka swinene hi mhaka leyi, a va swi twisisi hi ku helela swaku n’wana a kulisa ku yini. Swi hi ku fana, na hina a hi nge swi twisisi hi ku helela leswi Yehovha a swi yendlisaka xiswona swilo.
9. Ku nga yendleka yini hileswi hi kalaka hi nga swi tivi leswi Yehovha a nga ta hi pfunisa xiswona?
9 Ku kala hi nga swi tivi leswi Yehovha a nga ta hi pfunisa xiswona, swi nga ha hi yendla hi kanakana ku yendla swiboho swin’wani ka ntirho wa yena. Hi xikombiso, hi nga ha chava ku vevukisa wutomi la hina swaku hi yengetela ntirho wa hina ka Yehovha, kumbe ku rhurha swaku hi ya chumayela lani ku nga ni vachumayeli vavatsongo. Naswona hi nga ha sungula ku pimisa swaku Yehovha a nga hi katekisi loko hi nga swi koti ku fikelela mintirho leyi a hi yi navela ka nhlengeletanu, loko hi tirha hi matimba ka ntirho wa chumayela kambe hi nga yi voni mihandzu ya kona, kumbe loko hi kumana ni swikarhatu nkama lowu hi pfunisaka ka ntirho wa ku hlawuleka wa nhlengeletanu.
10. Ku kala hi nga swi tivi leswi Yehovha a nga ta hi pfunisa xiswona swi nga hi pfuna ku va ni wumunhu la ku tshamisa ku yini?
10 Ku vula ntiyiso, ku kala hi nga swi tivi leswi Yehovha a nga ta swi yendla swaku a hi pfuna, swi nga hi yendla hi va ni wumunhu la ku saseka la ku fana ni ku tiveka hansi; hikusa ha swi vona swaku Yehovha minkama hinkwayu a tiva leswi swi nga swinene ku tlula hina. (Esa. 55:8, 9) Swi tlhela swi hi pfuna ku mu tshemba hi ku helela Yehovha ni ku pfumela swaku swilo swi ngo hi fambela kahle ntsena loko hi pfuniwa hi Yena. Loko hi yi yendla kahle mintirho ya hina ka nhlengeletanu, kumbe swi hi fambela kahle ka ntirho wa ku chumayela hi fanele hi dzunisa Yehovha hi mhaka ya swona. (Ps. 127:1; 1 Ko. 3:7) Hambiloko swilo swi nga fambi hilani a hi navela hi kona, hi nga tiyiseka swaku Yehovha wa swi vona. (Esa. 26:12) Hina hi yendla leswi hi nga swi kotaka na hi tiyiseka swaku Yehovha a ta hi pfuna minkama hinkwayu. Ha tiyiseka swaku Yehovha a ta tama a hi kongomisa, hambiloko a nga yendli leswo hi ndlela ya singita ku fana ni leswi a a swi yendlisa xiswona khale. — Min. 16:6-10.
11. I yini leswi hi swi tivaka?
11 Ha swi tiva swaku Yehovha minkama hinkwayu a kombisa lirhandzu, wululami ni wutlharhi lalikulu. Xin’wani lexi hi xi tivaka hileswaku Yehovha a yi nyika lisima swinene minzamu leyi hi yi yendlaka leswaku hi mu tirhela hi tlhela hi pfuna vamakwerhu. Naswona a hi kanakani swaku minkama hinkwayu Yehovha wa va hakela lava va tamaka va tshembeka ka yena. — Heb. 11:6.
A HI SWI TIVI LESWI NGA TA YENDLEKA MUNDZUKU
12. Hi djondza yini ka Yakobe 4:13, 14?
12 Lerha Yakobe 4:13, 14. Hina a hi swi tivi leswi nga ta hi yendlekela ka nkama lowu taka. Ka misava leyi hi hanyaka ka yona, hi humeleliwa hi swilo leswi “yendlekaka kola na kola na swi nga nyimeliwanga”. (Ekl. 9:11) Hi mhaka leyo, a hi swi tivi swaku maplanu lawa hi ma yendlaka ma ta famba kahle kumbe nada, naswona a hi swi tivi kumbe mundzuku hi ta va na hi hanya swaku hi hetisisa maplanu wolawo.
13. Ku kala hi nga swi tivi leswi nga ta hi yendlekela mundzuku ka siku swi nga hi khumbisa ku yini?
13 Ku kala hi nga swi tivi leswi nga ta hi yendlekela mundzuku ka siku swi nga ha va xikarhatu xaxikulu, hikusa ku tshamela ku pimisa hi swona, swi nga hi yendla hi vilela swi tlhela swi hi hetela ntsaku wa hina. Wutomi la hina li nga ha txintxa swa kola na kola naswona leswo swi nga ha hi kwatisa swi tlhela swi hi twisa ku vava. Naswona loko swilo swi nga fambi hilani a hi nyimela hi kona, hi nga ha sungula ku hela ntamu. — Swiv. 13:12.
14. I yini lexi hi yendlaka hi tsaka? (Vona mafoto.)
14 Loko hi kumana ni swikarhatu, hi pfulekeliwa hi nkama wa ku kombisa leswaku ku nga na mhaka leswi swi hi humelelaka, hi tirhela Yehovha hileswi hi mu rhandzaka. Bibele li kombisa swaku Yehovha a nga ta hi vhikela ka xikarhatu xin’wani ni xin’wani lexi hi nga ha kumanaka na xona ni swaku a nga tsali kumbe ku langa leswi nga ta hi humelela ka nkama lowu taka. Yehovha wa swi tiva swaku kuva hi tsaka a swi yi hi swaku ha swi tiva leswi swi nga ta yendleka ka nkama lowu taka kumbe nada. Ku vula ntiyiso, lexi nga ta yendla swaku hi tsaka i ku kombela ku kongomisiwa hi Yehovha hi tlhela hi yingisa leswi a hi byelaka swona. (Yer. 10:23) Loko hi kombela Yehovha swaku a hi pfuna loko hi lava ku yendla swiboho, a hi nga ta tshamela ku vilela hi swaku ku ta yendleka yini mundzuku. Swi to fana ni loko hi vula leswi: “Loko Yehovha a swi lava, hi ta hanya, hi yendla leswi ni leswiya.” — Yak. 4:15.
Loko hi lavetela minkongomiso ya Yehovha hi tlhela hi mu yingisa swa hi vhikela (Vona maparagrafu 14-15)b
15. I yini lexi hi xi tivaka lexi nga ta yendleka ka nkama lowu taka?
15 I ntiyiso swaku a hi swi tivi leswi swi nga ta yendleka ka nkama lowu taka, kambe lexi hi xi tivaka hileswaku Yehovha a ta hi nyika wutomi la ku kala li nga heli. Van’wani va ta kuma wutomi lolelo atilweni, kasi van’wani va ta li kuma kola misaveni. Xin’wani hi xi tivaka hi leswaku Yehovha a nge tshuki a hemba funtshi a xi kona lexi nga mu sivelaka ku hetisisa leswi a nga hi tshembisa swona. (Tit. 1:2) Phela o va yena ntsena a kotaka ku “vula leswi nga ta humelela na swi nge se humelela.” Hinkwaswu leswi Yehovha a nga profeta swaku a swi ta yendleka ka nkama lowu nga hundza a game a swi hetisisa, se ni leswi a hi tshembisaka swona ka nkama lowu taka a ta swi hetisisa. (Esa. 46:10) Phela a xi kona lexi nga sivelaka Yehovha swaku a hi rhandza. (Rom. 8:35-39) Se ku nga na mhaka leswi swi hi humelelaka, hi nga tiyiseka swaku Yehovha a ta hi nyika wutlharhi, a hi tiyisa a tlhela a hi nyika matimba lawa hi ma lavaka kuva hi tiyisela. A hi kanakani swaku minkama hinkwayu Yehovha a ta hi pfuna naswona a ta hi katekisa. — Yer. 17:7, 8.
A HI NGE SWI TWISISI HI KU HELELA LESWI YEHOVHA A HI TIVISAKA XISWONA
16. I mpsini leswi Yehovha a swi tivaka hi hina, naswona u titwisa ku yini hi leswo? (Tipisalema 139:1-6)
16 Lerha Tipisalema 139:1-6. Yehovha Muvumbi wa hina a swi tiva kahle leswi mun’wani ni mun’wani wa hina a nga tshamisa xiswona amuzimbheni, leswi a titwisaka xiswona ni leswi a swi pimisaka. Minkama hinkwayu a tinyimisele ku hi pfuna! Naswona hambiloko hi phazama loko hi vula nchumu, Yehovha a swi twisisa kahle leswi a hi lava ku vula swona. Xin’wani hileswaku Yehovha a vona swilo hinkwaswu leswi hi swi yendlaka funtshi wa swi tiva swaku hi mhaka muni hi yendle swilo hi ndlela leyi kumbe liyani. Hosi Davhida a vule leswaku minkama hinkwayu Yehovha a tinyimisele ku hi pfuna ka swiyimu hinkwaswu. Se wena ke, u titwisa ku yini hi ku tiva swaku Yehovha Xikwembu xa Matimba Hinkwawu, Muyendli wa matilo ni misava wa ku vona naswona a ni mhaka na wena? Leswo swa hlamalisa. Davhida a te: “A ni swi koti ku yi twisisa ndlela leyi u ni tivaka hi yona. Yi tlakuke hintamu lakakuva a ni nge swi koti ku yi fikelela.” — Ps. 139:6.
17. Hi mhaka muni swi nga hi karhatelaka ku kholwa swaku Yehovha a hi tiva kahle?
17 Ndlela leyi hi nga kulisiwa hi yona, lani hi nga kulela kona ni leswi a hi kholwa ka swona na hi nge se tiva ntiyiso, swi nga yendla swaku swi hi karhatela ku vona Yehovha tanihi Papayi wa lirhandzu lweyi a lavaka ku hi pfuna. Loko ku li leswaku ka nkama lowu nga hundza hi yendle swihoxo swaswikulu, swi nga ha hi karhatela ku vona swaku Yehovha a hi rivalelile naswona swoswi a lava ku va Munghanu wa hina wamukulu. Phela hambi hi Davhida minkama yin’wani a a titwa hi ndlela leyo. (Ps. 38:18, 21) Munhu lweyi a zamaka ku txintxa mahanyelo ya yena leswaku a tsakisa Yehovha a nga ha tivutisa a ku: ‘Hi mhaka muni Yehovha a lava swaku ni txintxa mahanyelo ya mina kuve wa swi tiva swaku ni tshamise swoleswi?’
18. Hi mhaka muni swi li swa lisima ku tiva swaku Yehovha wa hi tiva ku tlula hina vinyi? (Vona mafoto.)
18 I swa lisima kuva hi kholwa swaku Yehovha a hi tiva kahle ku tlula hina vinyi funtshi a vona swilo swaswinene ka hina leswi hambi hi hina hi kalaka hi nga swi voni. Hambileswi a swi vonaka swihoxo swa hina, wa swi tiva swaku ha tikarhata swaku hi yampsisa naswona wa hi rhandza. (Rom. 7:15) Loko hi swi twisisa swaku minkama hinkwayu Yehovha wa swi vona swaku hi nga swi kota ku yampsisa, swi ta hi nyika matimba ya ku tama hi mu tirhela hi ku tshembeka na hi tsakile.
Loko hi kumana ni swikarhatu swa kola na kola, Yehovha wa hi pfuna ku tiyisela hi ku tiyisa ntshembo wa hina ka leswi a nga ta hi yendlela ka nkama lowu taka (Vona maparagrafu 18-19)c
19. I mpsini leswi hi swi tivaka hi Yehovha?
19 Ha swi tiva swaku Yehovha i lirhandzu naswona a hi kanakani leswo. (1 Yo. 4:8) Ha swi tiva swaku hinkwaswu leswi Yehovha a kombelaka swaku hi swi yendla swi pfuna hina naswona a hi kombela hileswi a hi rhandzaka. Xin’wani lexi hi xi tivaka hileswaku Yehovha a lava swaku hi kuma wutomi la ku kala li nga heli; naswona leswaku leswo swi koteka a hi nyike nkutsulu. Nkutsulu wu hi tiyisekisa leswaku hi nga swi kota ku tsakisa Yehovha hambiloko hi pfa hi phazama. (Rom. 7:24, 25) Ha swi tiva swaku “Xikwembu i xikulu ku tlula timbilu ta hina naswona xi tiva swilo hinkwaswu.” (1 Yo. 3:19, 20) Phela Yehovha a hi tiva kahle naswona a nga kanakani leswaku hi nga swi kota ku yendla leswi a hi kombelaka swona.
20. Hi mhaka muni hi nga fanelanga hi karhateka hi leswi hi kalaka hi nga swi tivi?
20 Yehovha a hi djondzisa leswi hi faneleke hi swi tiva swoswi. Loko hi pfumela swaku leswi Yehovha a hi djondzisaka swona swa hi xega, a hi nga ta karhateka hi swilo leswi hi kalaka hi nga swi tivi kambe hi to pimisa ntsena hi leswi nga swa lisima hikakunene. Loko hi yendla leswo hi kombisa swaku ha tiveka hansi naswona ha mu tshemba hi ku helela Yehovha, “Lweyi a tivaka hinkwaswu.” (Yob. 36:4) I ntiyiso leswaku ku ni leswi hi kalaka hi nga swi twisisi swoswi, kambe ha swi tiva swaku Yehovha a ta tama a hi djondzisa hi masiku ni masiku. Ku tiva leswo swa hi tsakisa hikusa hi ta tama hi djondza swilo swa nyuwani hi Yehovha Xikwembu xa hina. — Ekl. 3:11.
LISIMU 104 Moya wa Kukwetsima i Nyiko ya Xikwembu
b NTLHAMUSELO WA MAFOTO: Papayi ni n’wana wa yena na va lunghiselela paxta la emergência leswaku va tshama na va lunghile loko ku yendleka swilo swa kola na kola.
c NTLHAMUSELO WA MUFOTO: Makwerhu lweyi a kumanaka ni swikarhatu a pimisa hi ntsaku lowu a nga ta wu kuma ka misava ya nyuwani.