Pfuna Xidjondzo Xa Wena Xa Bibele Swaku Xi Tirhela Yehovha

1-2. a) Hi mhaka muni van’wani va chava ku va Timboni ta Yehovha? b) Hi ta djondza hi yini ka nhlokomhaka leyi?

KU NGA VA swaku a wu chava ku tsakamisiwa? Swi nga yendleka a wu chava swaku lava u tirhaka na vona, vanghanu kumbe maxaka ya wena a ma ta ku djikela; kumbe a wu chavisiwa hi swaku u nga tshuka u nga swi koti ku hanya hi minawu ya Yehovha. Loko ku li swaku a wu titwisa xileswo, swi nga ku vevukela ku twisisa lava djondzaka Bibele, lava swi va karhatelaka ku va Timboni ta Yehovha.

² Yesu a a swi tiva swaku ku chava a swi ta yendla swaku swi karhata ku kulisa wunghanu na Yehovha. (Mat. 13:20-22) Kambe a va pfunile lava a va chava ku mu landzela. Yesu a tlhele a komba vadjondzisiwa va yena leswi a va ta swi yendla swaku va pfuna vanhu volavo kuva 1) va vona leswi va sivelaka ku va Timboni ta Yehovha, 2) ku ya va mu rhandza hintamu Yehovha, 3) ku rhangisa swilo swa lisima ka wutomi la vona ni 4) ku hlula swikarhatu swa vona. Se hi nga swi kotisa ku yini ku tirhisa leswi Yesu a nga swi byela vadjondzisiwa va yena nkama lowu hi pfunaka munhu kuva a nyimelela ntiyiso na hi tirhisa buku leli nge Tikhorisi Hi Wutomi La Ku Kala Li Nga Heli?

PFUNA XIDJONDZO XA WENA SWAKU XI TIVA LESWI SWI XI SIVELAKA KU VA MBONI

3. I ntxini xi nga ha vaka xi sivele Nikodema leswaku a va mudjondzisiwa wa Yesu?

³ Nikodema lweyi a a li murhangeli wa Vayuda lweyi a a hloniphiwa swinene, ku ni leswi a swi mu sivela ku va mudjondzisiwa wa Yesu. Loko se ku hundze kolomuyani ka 6 wa tiwheti na Yesu a sungule ntirho wa yena lani misaveni, hi kona a nga swi tsumbula swaku Yesu a a rhumiwile hi Xikwembu. (Yoh. 3:1, 2) Kambe ‘hi mhaka ya leswi a a chava Vayuda’, Nikodema a ye a ya tlhangana na Yesu axihundleni. (Yoh. 7:13; 12:42) Swi nga yendleka a pimise leswaku loko a va mudjondzisiwa wa Yesu a a ta luzekeliwa hi swilo swa swinyingi.a

4. Yesu a mu pfunise ku yini Nikodema kuva a twisisa leswi Yehovha a a swi nyimela ka yena?

⁴ Nikodema a a wu tiva Nawu, kambe a a fanele a twisisa leswaku Yehovha a a nyimele yini ka yena. Yesu a mu pfunile. Phela a a tinyimisele ku pfuna Nikodema hambi niwusiku. Yesu a byele Nikodema leswi a a fanele a swi yendla leswaku a va mudjondzisiwa wa yena. A a fanele a tshika swidjoho swa yena a tlhela a tisola, a tsakamisiwa ni ku va ni lipfumelo ka N’wana wa Xikwembu. — Yoh. 3:5, 14-21.

5. U nga mu pfunisa ku yini lweyi u djondzaka na yena ku tiva leswi mu sivelaka ku va Mboni ya Yehovha?

⁵ Hambiloko lweyi u djondzaka na yena Bibele a swi twisisa leswi a swi djondzaka, minkama yin’wani swi nga ha lava swaku u mu pfuna ku vona leswi swi mu sivelaka ku va Mboni ya Yehovha. Swi nga yendleka leswi mu sivelaka ku li ntirho wa yena kumbe ku kanetiwa hi maxaka. Se tinyikeli leswaku u mu pfuna. U nga ha yendla leswo hi ku mu rhamba swaku mi hungata xikan’we kumbe u famba u paseyara na yena. Leswo swi nga yendla swaku a titwa na a chunsekile kuva a ku byela leswi a titwisaka xiswona ni swikarhatu leswi a kumanaka na swona. Se mu pfune kuva a txintxa mahanyelo ya yena, ku nga li leswaku a tsakisa wena, kambe leswaku a tsakisa Yehovha.

6. U nga mu pfunisa ku yini lweyi u djondzaka na yena Bibele swaku a va ni ntamu wa ku hanya hi leswi a swi djondzaka? (1 Vakorinto 16:13)

⁶ Loko lweyi u djondzaka na yena Bibele a kholwa hi ku helela swaku Yehovha a ta mu pfuna ku yendla swaswinene, a ta kuma ntamu lowu a wu lavaka swaku a hanya hi leswi a swi djondzaka. (Lerha 1 Vakorinto 16:13.) U nga twisisa leswi u nga mu pfunisaka xiswona lweyi u djondzaka na yena Bibele hi ku pimisa hi leswi profesori a swi yendlaka. Hi ntolovelo hi rhandza profesori lweyi a hi lehiselaka mbilu a tlhela a hi pfuna ku vona leswi hi nga kotaka ku swi yendla. Hi ku fana, muchumayeli wa kahle a ngo tsakisiwa hi ku djondzisa lweyi a djondzaka na yena Bibele ntsena leswi Xikwembu xi lavaka a swi yendla, kambe a tlhela a mu tiyisekisa swaku hi ku pfuniwa hi Yehovha, a nga swi kota ku txintxa mahanyelo ya yena. U nga swi yendlisa ku yini leswo?

PFUNA XIDJONDZO XA WENA LESWAKU XI YA XI RHANDZA YEHOVHA

7. Yesu a va pfunise ku yini lava a va mu yingisela swaku va ya va rhandza Yehovha?

⁷ Yesu a a swi tiva swaku ku rhandza Yehovha a swi ta pfuna vadjondzisiwa va yena leswaku va hanya hi leswi a a va djondzisa swona. Hi mhaka leyo, minkama ya yinyingi a a va djondzisa swilo leswi a swi ta va pfuna swaku va ya va mu rhandza hintamu Yehovha. Phela Yesu a fanise Yehovha ni papayi lweyi a nyikaka swilo swaswinene vana va yena. (Mat. 7:9-11) Swi nga yendleka van’wani lava a va yingisela Yesu a va nga na vapapayi lava a va va rhandza; se swi nga yendleka swi va khumbile swinene nkama Yesu a nga yendla xikombiso xa papayi wa lirhandzu lweyi a nga yamukela n’wana wa yena lweyi a a yendle swilo swa ku biha. A va pfune ku twisisa swaku Yehovha a va rhandza swinene naswona a a lava ku va pfuna. — Luk. 15:20-24.

8. U nga mu pfunisa ku yini lweyi u djondzaka na yena swaku a ya a rhandza Yehovha?

⁸ Na wena u nga swi kota ku pfuna lweyi u djondzaka na yena leswaku a rhandza Yehovha, hi ku va u vulavula na yena hi wumunhu la ku hlamalisa leli Yehovha a nga na lona. Ka djondzo yin’wani ni yin’wani, mu pfuni leswaku a twisisa swaku leswi a swi djondzaka swi swi kombisisa ku yini swaku Yehovha wa mu rhandza. Nkama mi vulavulaka hi nkutsulu, mu pfuni ku vona swaku Yehovha a ze a nyikela hi N’wana wa yena swaku a ta hi fela, ku nga li hileswi a rhandzaka vanhu hinkwavu ntsena, kambe hileswi a rhandzaka yena. (Rom. 5:8; 1 Yo. 4:10) Ku vona swaku Yehovha wa mu rhandza swi ta mu pfuna kuva na yena a ya a mu rhandza. — Gal. 2:20.

9. I mpsini leswi nga pfuna Michael leswaku a txintxa wutomi la yena?

⁹ Vona leswi nga yendlekela Michael lweyi a tshamaka Indonésia. Yena a kulisiwe ntiyisweni kambe a nga zanga a tsakamisiwa. Nkama na a ni 18 wa malembe, a sukile aIndonésia a ya tirha ka tiko lin’wani tanihi mufambisi wa ma camião. Hi ku famba ka nkama, a chadile kambe a siye ndjangu wa yena a ya tirha ka tiko lin’wani. Hi nkama wolowo wa wun’we, nsati wa yena ni n’wana wa yena wa ntombhi va sungule ku djondza Bibele naswona va sungule ku tirhisa leswi a va swi djondza. Nkama mamani wa yena a nga fa, Michael a tlhelile aIndonésia leswaku a ya hlayisa papayi wa yena naswona a pfumelile ku djondza Bibele. Michael a khumbekile hintamu nkama lowu a nga vona xiyenge lexi nge “Djondza Swin’wani,” xa djondzo 27 ka buku leli nge Tikhorisi Hi Wutomi La Ku Kala Li Nga Heli. Nkama a nga pimisa hi ndlela leyi Yehovha a nga titwa hi yona nkama a nga vona N’wana wa yena na a hluphiwa, Michael a sungule ku rila. Leswo swi yendle leswaku a wu nyika lisima hintamu nkutsulu, naswona swi mu yendle a txintxa wutomi la yena a tlhela a tsakamisiwa.

PFUNA XIDJONDZO XA WENA SWAKU XI RHANGISA KU TIRHELA YEHOVHA

10. Yesu a va pfunise ku yini vadjondzisiwa va yena ku rhangisa ntirho wa ku chumayela ka wutomi la vona? (Luka 5:5-11) (Vona mufoto.)

¹⁰ Vadjondzisiwa va hantle va swi twisisa swaku Yesu a a li yena Mesiya lweyi a a tshembisiwile; kambe a swa ha lava va pfuniwa kuva va rhangisa ntirho wa ku chumayela ka wutomi la vona. Pedru na Andre se a va ni nkamanyana na va landzela Yesu nkama a nga va rhamba leswaku va mu landzela nkama hinkwawu. (Mat. 4:18, 19) Pedru na Andre a va li vaphasi va tihlampfi, naswona swi tikomba ingaku a va tirhisana na Yakobe na Yohani. (Mar. 1:16-20) Nkama Pedru na Andre ‘va nga tshika maredi ya vona’, swi nga yendleka se a va hambe maplanu ya leswi a va ta yi hlayisisa xiswona mindjangu ya vona nkama lowu a va landzela Yesu. Kambe i mpsini swi nga va yendla va tshika ntirho lowu a va li na wona? Buku la Luka li hi byela swaku Yesu a yendle singita leli li nga va tiyisekisa leswaku Yehovha a a ta va hlayisa. — Lerha Luka 5:5-11.

11. U nga xi tirhisisa ku yini xiperiyensiya xa wena leswaku u tiyisa lipfumelo la xidjondzo xa wena?

¹¹ Hina a hi nge swi koti ku yendla masingita ku fana na Yesu, kambe hi nga kontarela lweyi hi djondzaka na yena swiperiyensiya swa ndlela leyi Yehovha a nga hi pfuna hi yona hileswi hi nga rhangisa Mfumu wa yena ka wutomi la hina. Hi xikombiso, khumbuka ndlela leyi Yehovha a nga ku pfuna hi yona nkama u nga sungula ku ya mintlhanganwini. Swi nga yendleka swi lave u bula ni patrão wa wena u mu byela swaku a wu nge swi koti ku tirha nkama wa ku leha hikusa swi nga ku sivela ku ya mintlhanganwini. Se loko u mu byela lweyi u djondzaka na yena hi xiperiyensiya xa wena ni ndlela leyi lipfumelo la wena li nga tiya hi yona loko u vona ndlela leyi Yehovha a nga ku pfuna hi yona hi mhaka leswi u nga rhangisa a Mfumu wa yena ka wutomi la wena, swi nga ha mu pfuna.

12. a) Hi mhaka muni hi fanele hi famba ni vamakwerhu va ku hambanahambana loko hi ya fambisa xidjondzo? b) Nyikela xikombiso xa leswi hi nga ma tirhisisaka xiswona mavhidiyo kuva hi djondzisa xidjondzo xa hina.

¹² Swin’wani swi nga pfunaka lweyi u djondzaka na yena, i ku twa leswi vamakwerhu van’wani va nga swi yendla kuva va rhangisa ku tirhela Yehovha ka wutomi la vona. Se rhamba vamakwerhu va ku hambanahambana, va ku ta hi ka tindhawu ta ku hambanahambana loko u ya djondza na yena. Va kombeli leswaku va vula swaku va djondzise ku yini ntiyiso ni swaku i yini leswi va nga swi yendla leswaku va rhangisa ku tirhela Yehovha. Xin’wani u nga xi yendlaka i ku tinyika nkama wa ku yenela kuva mi sixtira mavhidiyo lawa ma nga ka xiyenge lexi nge “Djondza Swin’wani” kumbe “Loko U Lava Ku Tiva Swin’wani” ka buku leli nge Tikhorisi Hi Wutomi La Ku Kala Li Nga Heli. Hi xikombiso, loko mi li ka djondzo 37 naswona mi sixtira vhidiyo leli nge Yehovha A Ta Hi Pfuna Ka Swilaveko Swa Hina, bula ni xidjondzo xa wena u xi pfuna ku vona swaku Yehovha a nga xi pfunisa ku yini loko xi rhangisa ku mu tirhela ka wutomi la xona.

PFUNA XIDJONDZO XA WENA LESWAKU XI HLULA SWIKARHATU

13. Yesu a va pfunise ku yini vadjondzisiwa va yena swaku va tilunghiselela ku kanetiwa?

¹³ Makhambi ya manyingi Yesu a byele vadjondzisiwa va yena leswaku a va ta kanetiwa hambi hi maxaka ya vona. (Mat. 5:11; 10:22, 36) Nkama a a li kusuhi ni ku dlayiwa, Yesu a va byele swaku na vona a va ta dlayiwa hi mhaka ya leswi va gandzelaka Yehovha. (Mat. 24:9; Yoh. 15:20; 16:2) A va byele leswaku va fanele va tivonela nkama lowu va chumayelaka a tlhela a va tsundzuxa leswaku va nga holovisani ni munhu loko va kanetiwa, kambe va va ni wutlharhi nkama va tamaka va chumayela.

14. Hi nga xi pfunisa ku yini xidjondzo leswaku xi lunghekela ku kanetiwa? (2 Timotiya 3:12)

¹⁴ Hi nga pfuna xidjondzo xa hina leswaku xi lunghekela ku kanetiwa hi ku xi byela leswi xi nga nyimelaka ku swi twa ka lava xi tirhaka na vona, vanghanu kumbe maxaka. (Lerha 2 Timotiya 3:12.) Van’wani lava xi tirhaka na vona va nga ha xi poyilela hi mhaka ya mahanyelo ya xona ya nyuwani. Van’wani, ku patsa ni maxaka ya le kusuhi va nga ha vulavula ku biha hi minawu ya Bibele leyi xi hanyaka hi yona. Loko hi nga hlweli ku xi lunghiselela, xidjondzo xa hina xi ta va se xi swi lunghekelile loko xi kanetiwa.

15. I mpsini swi nga pfunaka xidjondzo ku tiyisela loko xi kanetiwa hi maxaka?

¹⁵ Loko lweyi u djondzaka na yena Bibele a kanetiwa hi maxaka ya yena mu pfune ku pimisa hi leswi swi nga ha yendlaka leswaku ma nga tsaki hileswi a djondzaka Bibele. Swi nga yendleka maxaka ya yena ma pimisa leswaku leswi Timboni ta Yehovha ti swi djondzisaka i mavunhwa kumbe ma pimisa swaku i vanhu va ku biha. Phela hambi maxaka man’wani ya Yesu a ma nga tsaki hi leswi a a swi yendla. (Mar. 3:21; Yoh. 7:5) Pfuna lweyi u djondzaka na yena kuva a lehisela mbilu vanhu van’wani ni ku vulavula kahle na vona, ku patsa ni maxaka ya yena.

16. Hi nga xi pfunisa ku yini xidjondzo xa hina leswaku xi chumayela maxaka ya xona hi ndlela yayinene?

¹⁶ Hambiloko maxaka ya xidjondzo xa hina ma lava ku tiva swin’wani hi Bibele, a hi swinene kuva xi zama ku tlhamusela swilo hinkwaswu leswi xi swi tivaka hi Bibele. Leswo swi nga yendla swaku maxaka ya xona ma kolwa, naswona ma nga ha lavi ku twa nchumu hi Bibele. Se i swinene kuva hi pfuna xidjondzo xa hina leswaku xi nga vuli swilo swa swinyingi hi nkama wun’we, leswo swi ta yendla leswaku va navela ku tiva swin’wani hi nkama wun’wani. (Kol. 4:6) Xin’wani xi nga pfunaka i ku va xi rhamba maxaka ya xona leswaku ma nghena ka site la jw.org. Leswo swi ta pfuna maxaka ya xona leswaku ma djondza swin’wani hi Timboni ta Yehovha hi nkama lowu ma swi lavaka ni ku langa mpimu wa leswi ma lavaka ku swi djondza.

17. Hi nga mu lunghiselelisa ku yini lweyi hi djondzaka na yena swaku a hlamula swivutiso leswi vanhu va tolovelaka ku swi vutisa? (Vona mufoto.)

¹⁷ U nga tirhisa leswi kumekaka ka jw.org lani ku nge “Swivutiso Leswi Vanhu Va Tolovelaka Ku Swi Vutisa Hi Timboni Ta Yehovha” leswaku u pfuna lweyi u djondzaka na yena leswaku a lunghekela ku hlamula maxaka ya yena ni lava a tirhaka na vona. (2 Tm. 2:24, 25) Loko mi gama djondzo yin’wani ni yin’wani tirhisa lani ku nge “Van’wani Va Li” ka buku leli nge Tikhorisi. Pfuna lweyi u djondzaka na yena ku hlamula hi marito ya yena u tlhela u mu pfuna ku yampsisa ndlela leyi a nga hlamulaka hi yona loko va mu kaneta. Phela loko u tinyika nkama wa ku ensayara na yena leswi a nga ta swi vula, swi nga mu pfuna kuva a nyimelela lipfumelo la yena na a tiyile.

18. U nga xi pfunisa ku yini xidjondzo xa wena leswaku xi va muchumayeli? (Matewu 10:27)

¹⁸ Yesu a byele vadjondzisiwa va yena leswaku va chumayela mahungu ya ku tsakisa ka vanhu hinkwavu. (Lerha Matewu 10:27.) Loko xidjondzo xi hantla xi sungula ku chumayela xi ta hantla xi mu tshemba Yehovha. Kambe u nga xi pfunisa ku yini leswaku xi navela ku chumayela? Loko ku tivisiwa kampanya abandleni, pfuna xidjondzo xa wena ku vona leswi xi nga swi yendlaka kuva xi va muchumayeli. Xi tlhamuseli swaku van’wani swi va vevukelile ku sungula ku va vachumayeli hi nkama wa kampanya. Xin’wani lexi xidjondzo xi nga swi yendlaka i ku tiyendlela planu la ku veka madixkursu ka mintlhanganu ya xikarhi ka vhiki. Loko xi yendla leswo xidjondzo xa wena xi ta swi kota ku swi tlhamusela kahle leswi xi kholwaka ka swona.

KOMBISA SWAKU WA VA TSHEMBA LAVA U DJONDZAKA NA VONA BIBELE

19. Yesu a swi kombisise ku yini swaku a a va tshemba vadjondzisiwa va yena naswona hi nga mu tekelelisa ku yini?

¹⁹ Na Yesu a nge se tlhelela tilweni, a byele vadjondzisiwa va yena swaku a va ta tlhela va va xikan’we. Kambe vadjondzisiwa a va swi twisisanga swaku Yesu a a vula swaku a va ta tlhela va hanya xikan’we tilweni. Yesu a a tiyiseka swaku vadjondzisiwa a va swi lava ku mu tirhela Yehovha, hi mhaka leyo a a nga veki tihlo ka leswi a va nga swi twisisi kahle. (Yoh. 14:1-5, 8) Yesu a a swi tiva swaku vadjondzisiwa a va ta lava nkama kuva va twisisa mintiyiso yin’wani, ya ku fana ni ntshembo lowu a va li na wona wa ku hanya a tilweni. (Yoh. 16:12) Na hina hi nga komba lava hi djondzaka na vona swaku ha tiyiseka leswaku va swi lava ku tirhela Yehovha.

20. Makwerhu Chifundo a xi pfunise ku xidjondzo xa yena?

²⁰ Phela swi lava hi tiyiseka swaku swidjondzo swa hina swa swi lava ku yendla leswi nga swinene. Hi leswo swi nga yendliwa hi makwerhu wa xisati lweyi a vitaniwaka Chifundo lweyi a tshamaka Malawi. A sungule ku djondza Bibele hi ku tirhisa buku leli nge Tikhorisi Hi Wutomi La Ku Kala Li Nga Heli ni ntombhi leyi vitaniwaka Alinafe, leyi a yi khongela Katolika. Nkama va nga gama djondzo 14, makwerhu Chifundo a vutise xidjondzo xa yena leswaku a xi swi vonisa ku yini ku tirhisa swifaniso ka wugandzeli. Alinafe a kwatile a gama a hlamula a ku: “Lexo i xiboho xa mina, ni nga swi tirhisa loko ni swi lava.” Chifundo a pimise leswaku Alinafe a a ta tshika ku djondza Bibele, kambe a mu lehisele mbilu Alinafe, na a tiyiseka swaku hi ku famba ka nkama a a ta yi twisisa kahle djondzo leyi. Loko se ku hundze tiwhetinyana, makwerhu Chifundo a vutise Alinafe xivutiso lexi nga ka djondzo 34 lexi nge: “Ku djondza Bibele ni ku tiva Yehovha Xikwembu xa ntiyiso swi ku pfunise ku yini ku ta fikela swoswi?” Phela a hlamalisiwile swinene hi nhlamulu leyi Alinafe a nga yi nyikela. Chifundo a te: “Alinafe a vule swilo swa ku saseka swinene. Xin’wani xa kona a vule swaku Timboni ta Yehovha a ti yendli nchumu lexi Bibele li xi solaka.” Swi nga yanga kule, Alinafe a tshike ku tirhisa swifaniso naswona a game a tsakamisiwa.

21. Hi nga swi pfunisa ku yini swidjondzo swa hina swaku swi va ni ntamu wa ku tirhela Yehovha?

²¹ Hambileswi i nga ‘Xikwembu lexi kulisaka’ mbewu ya ntiyiso ka timbilu ta vanhu, na hina hi nga yendla nchumu leswaku hi pfunisa. (1 Ko. 3:7) Phela a ho lava ku djondzisa swidjondzo swa hina ntsena leswi Xikwembu xi lavaka swaku swi swi yendla, kambe hi lava ku tlhela hi swi pfuna leswaku swi ya swi mu rhandza Yehovha. Xin’wani hi nga xi yendlaka i ku pfuna lava hi djondzaka na vona swaku va kombisa lirhandzu lolelo hi ku rhangisa Yehovha ka wutomi la vona. Naswona hi fanele hi va pfuna ku vona swaku loko va tshemba Yehovha, minkama hinkwayu a ta va pfuna loko va kumana ni swikarhatu kumbe loko va kanetiwa. Loko hi komba lava hi djondzaka na vona Bibele swaku ha tshemba swaku va swi lava ku mu tsakisa Yehovha, swi nga va pfuna swaku va va ni ntamu wa ku mu tirhela.