‘Kuvonakala ka N’wina Akuvoningi’ Leswaku Kuyisa Kudzuneka ka Yehovha
“Kuvonakala ka n’wina akuvoningele vanhu . . . lesvaku vadzunisa Tatana wa n’wina.” — MATEWU 5:16.
TINSIMU: 143, 104
1. Hi xihi xivangelo xa lisima lexihi yendlaka hi tsaka?
HA TSAKA swinene hi kutwa ndlela leyi ha yona malandza ya Xikwembu ma tshikaka kuvonakala ka wona kuvoninga! Ka lembe leli hundzeke, vanhu va Yehovha va fambise tidjondzo ta Bibele leti tlulaka 10.000.000. Naswona magidigidi ya vanhu lavanga tsakela va hlangamelile ka Xitsundzuxu xa lifu la Yesu va tlhela va djondza hi nyiko ya lirhandzu ya Yehovha, kunga nkutsulu. — 1 Yohane 4:9.
2, 3. a) I yini lexingahi siveliki kuva hi ‘voninga kufana ni tinyeleti’? b) Xana hita bula hi yini ka djondzo leyi?
2 Amisaveni hinkwayu, Timboni ta Yehovha ti vulavula tindzimi to hambanahambana. Kambe leswo aswihi siveli kuva hi dzunisa Yehovha tani hi ndjangu lowunga ni vun’we. (Nhlavutelo 7:9) Kungakhataliseki lirimi leli hili vulavulaka kumbe ndhawu leyi hi tshamaka ka yona, hinga voninga “kufana ni tinyeleti, laha misaveni”. — Vafilipiya 2:15.
3 Ntirho wa hina wochumayela, vun’we la hina tani hi Vakreste ni kutshama hi hitekile swi yisa kudzuneka ka Yehovha. Ka swiyenge leswi, xana hinga tshika kuvonakala ka hina kuvoninga hi tindlela tihi? — Lerha Matewu 5:14-16.
PFUNA VAN’WANA LESWAKU VA DZUNISA YEHOVHA
4, 5. a) Handle kochumayela, xana hinga tshika kuvonakala ka hina kuvoninga hi ndlela yihi? b) Hi wahi mavuyelo ya kukhoma vanhu hi ndlela leyinene antirhweni wochumayela? (Vona xifaniso akusunguleni ka djondzo.)
4 Ndlela ya lisima yotshika kuvonakala ka hina kuvoninga i kuchumayela ni kuyendla vadjondzisiwa. (Matewu 28:19, 20) Hi 1925, djondzo leyi ayi ni nhlokomhaka leyinge: “Livoningu Axikarhi ka Munyama,” yi hlaye leswaku ka masiku ya wugamu, leswaku munhu a tshembeka ka Hosi a afanele a lava “mukhandlu wotshika kuvonakala ka yena kuvoninga.” Yi tlhele yi ku: “Leswaku a yendla tanu, a fanele a chumayela mahungu yotsakisa ka vanhu amisaveni hinkwayu, a tlhela a hanya hi leswi aswi djondzisaka.” (Murindzi wa Xinghiza, wa 1 ka Junho wa 1925) Handle ka kuchumayela, ndlela leyi hiti khomaka ha yona yi yisa kudzuneka ka Yehovha. Vanhu vanyingi vahi vona loko hi chumayela. Loko hiva n’wayitelela hi tlhela hiva xeweta hi ndlela ya lirhandzu, swiva pfuna kuva va languta hina swin’we ni Xikwembu lexi hixi gandzelaka hi ndlela leyinene.
Ntirho wa hina wa kuchumayela ni ndlela leyi hiti tikhomaka ha yona swi yisa kudzuneka ka Yehovha
5 Yesu a byele vadjondzisiwa va yena a ku: “Loko minghena muntini, xewetani.” (Matewu 10:12) Ka tindhawu leti Yesu a chumayeleke ka tona, aku li mukhuva kuva vanhu va rhamba munhu lweyi vangamu tiviki kuva a nghena kaya ka vona. Ka tindhawu tinyingi namuntlha, leswo akaha li mukhuva. Hakanyingi vanhu va hlundzuka kumbe kunyenyentseka loko va vona munhu lweyi vangamu tiviki ka xipfalu xa vona. Kambe loko hiva khoma hi ndlela leyinene hi tlhela hiva ni xinghana, vangaha titwa va chunsekile. Loko uli karhi u chumayela ka tindhawu leti taleke hi vanhu hi kutirhisa xikarinyana xa mabuku, xana u tshama uswi xiya leswaku loko u n’wayitela naswona u xeweta vanhu hi ndlela ya xinghana, va titwa va chunsekile leswaku va tshindzekela ivi va teka mabuku? Leswo swi pfuxa mabulu ya kutsakisa!
6. I yini leswinga pfuna vatekani vokarhi leswaku va hambeta va hiseka ka ntirho wochumayela?
6 Hikolaho ka mavabyi, vatekani lava gugeke lava tshamaka le Inglaterra, avahaswi koti kuchumayela hi munti ni munti hilaha ava yendla ha kona. Hikolaho, va veka xikarinyana xa mabuku kusuhi ni kaya ka vona. Tani hi leswi va tshamaka kusuhi ni xikola, va veka mabuku ka ndhawu leyi vapsali vangataswi kotaka kuma vona. Vapsali van’wana va teka mabuku, kupatsa ni leyinge: Swivutiso Leswi Vantshwa Va Swi Vutisaka — Tinhlamulo Leti Tirhaka, Vholumo 1 na 2 (hi Xitsonga). Ku ni makwerhu wa xisati wa phayona lweyi a sunguleke kutirha ni vatekani lava. Vapsali vanyingi va xiye leswaku makwerhu lweyi wa xisati a ni xinghana naswona vatekani lava hakunene va lava kupfuna van’wana. Lexi tsakisa, hi leswaku mupsali mun’we a sungule kudjondza Bibele.
7. Xana unga yendla yini leswaku u pfuna vanhu va le mugangeni va wena lava taka hi ka matiko man’wana?
7 Swoswi nyana, vanhu vanyingi va boheke ku baleka matikweni ya vona. Xana unga yendla yini leswaku u pfuna vanhu lava kuva va djondza hi Yehovha? Xosungula, unga djondza kuva xeweta hi lirimi la vona. Kuyengetela kolanu, hi ku tirhisa JW Language App, unga djondza maritu yokarhi lawa mangaha yendlaka leswaku va lava kubula na wena. Ka nkama wolowo, ungava komba mavhidiyu ni mabuku lawa manga kona hi lirimi la vona ka jw.org. — Deteronoma 10:19.
8, 9. a) Xana minhlanganu ya xikarhi ka vhiki yihi pfunisa kuyini? b) Xana vapsali vangava pfunisa kuyini vana kuva va yampsisa tinhlamulu ta vona aminhlanganwini?
8 Yehovha ahi nyika hinkwaswu leswi hiswi lavaka leswaku hi humelela loko hi chumayela. Hi xikombiso, leswi hiswi djondzaka ka Nhlanganu wa Mahanyelo ni Ntirho swihi pfuna kuva hi titwa hi lunghekile kuyendla mayendzo yovuyela ni kusungula tidjondzo ta Bibele.
9 Loko lava tsakelaka vata ka minhlanganu ya hina, hakanyingi va hlamalisiwa hi tinhlamulu leti nyikeliwaka hi vana va hina. Hayini unga djondzisi vana va wena kuva va nyikela tinhlamulu hi marito ya vona? Vanhu van’wana va tsakele ntiyiso ndzhaku ka kuvona swivanana swi kombisa lipfumelo la swona hi kunyikela tinhlamulu leti woloveke ni leti humaka mbilwini. — 1 Vakorinto 14:25.
TIYISANI VUN’WE LA N’WINA
10. Xana wugandzeli la ndjangu linga pfunisa kuyini mindjangu leswaku yi hambeta yiva ni vun’we?
10 Loko hi yendla minzamu hinkwayu yodjondzisa ndjangu wa hina kutirha swin’we hi vun’we ni hi kurhula, hi yisa kudzuneka ka Yehovha. Hi xikombiso, loko u li mupsali, yendla malulamiselo yova ni wugandzeli la ndjangu vhiki ni vhiki. Mindjangu yinyingi yi hlalela JW Broadcasting swin’we ivi ndzhaku ka leswo yi bula hi tindlela leti ha tona yinga tirhisaka leswi yiswi djondzeke. Khumbuka leswaku nkongomiso lowu laviwaka hi n’wana wa mutsongo awu fani ni lowu laviwaka hi lweyi a kuleke nyana. Yendla minzamu hilaha unga kotaka ha kona leswaku u pfuna mun’wana ni mun’wana ka ndjangu wa wena leswaku a vuyeliwa ka wugandzeli la ndjangu. — Tipisalema 148:12, 13.
Swi kahle kuheta nkama wa hina ni lava gugeke (Vona paragrafu 11)
11. Xana hinga yendla yini leswaku kuva ni vun’we bandleni ni kupfuna van’wana leswaku va tshika kuvonakala ka vona kuvoninga?
11 Hambileswi wahaliki munpsha, unga yendla leswaku hinkwavu bandleni va titwa va li va lisima. Ndlela yoyendla tanu i kuyendla xinghana ni vamakwerhu va xinuna kumbe va xisati lava se vanga ni malembe yotala a ntiyisweni. Va vutisi leswaku i yini leswiva pfuneke kuva va hambeta va tirhela Yehovha. Phela vanga kudjondzisa tidjondzo ta lisima swinene. Leswo swita va khutaza; na wena uta khutazeka! Hinkwerhu, kungakhataliseki leswaku hi vatsongo kumbe hi vakulu, hinga yendla leswaku varhambiwa va titwa va chunsekile a Salão do Reino. Unga va xeweta, u n’wayitela, u va komba ndhawu yotshama ni kuva pfuna kuva va tivana ni vamakwerhu van’wana. Va yendle va titwa va li kaya.
12. Hi tihi tindlela tin’wana leti ha tona hinga yendlaka leswaku kuva ni vun‵we bandleni?
12 Loko u nyikiwa xiyenge xofambisa nhlanganu wa ntirho wa kuchumayela, unga pfuna lava gugeke leswaku va tshika kuvonakala ka vona kuvoninga. Tiyiseka leswaku va ni territoriyu la kahle. Yendla malulamiselo leswaku vampsha va tirha na vona. Vamakwerhu lava gugeke ni lavanga ni swikarhatu swa mavabyi, hakanyingi va tsemeka nhlana hikolaho ka leswi vakalaka vangaha swikoti kuchumayela hi ndlela leyi ava chumayela ha yona. Kambe vata titwa va li va lisima loko va vona leswaku wena wa khatala hi vona naswona waxi twisisa xiyimo xa vona. Kungakhataliseki ntanga ya vona kumbe nkama lowu vanga na wona a ntiyisweni, leswi uva yendleleka swona swingava khutaza leswaku va hambeta va chumayela. — 1 Timotiya 5:1.
Xana unga yendla minzamu yovativa kahle vamakwerhu bandleni?
13. I yini leswi mun’wana ni mun’wana wa hina angaswi yendlaka leswaku bandla li hambeta liva ni vun’we?
13 Vayisrayele avati khorisa hi kudzunisa Yehovha hi vun’we. Mupisalema a te: “Ahi kunandziha ni kutsakisa ka swona loko vamakwavu va tshama xikan’we hi vun’we!” (Lerha Tipisalema 133:1, 2.) A fananise vun’we ni mafurha yokwetsima, lama pepisaka xikhumba matlhela ma nun’wela. Hi ndlela leyi fanaka, hinga pepisa vamakwerhu va hina hi kuva khoma hi ndlela leyinene ni kuva yendlela swilo leswinene. Leswo swita yendla leswaku bandla li hambeta liva ni vun’we. Xana unga yendla minzamu yovativa kahle vamakwerhu bandleni? — 2 Vakorinto 6:11-13.
14. Xana hinga tshika kuvonakala ka hina kuvoninga hi ndlela yihi lomu hi tshamaka kona?
14 Kuvonakala ka wena kunga kuvoninga kungakhataliseki lomu u tshamaka kona. Vayakelani vangaha lava kudjondza leswi yengetelekeke hi Yehovha loko uva yendlela leswinene. Tivutisi: ‘Xana vayakelani va pimisa yini hi mina? Xana munti wa mina wuhlayisekile u tlhela wubasa? Xana ni yendla yini leswaku muganga wa mina wusaseka? Xana ni muyakelani wa kahle?’ Vutisa vamakwerhu van’wana kuva u tiva ndlela leyi xikombiso xa vona lexinene ni swilo leswinene vaswi yendlaka swiva khumbaka ha yona vayakelani, vatirhikuloni, vakolega va xikola kumbe maxaka. — Vaefesa 5:9.
TSHAMANI MI HITEKILE
15. Hayini hi fanele hi tshama hi hitekile?
15 Loko hi lava kuvonakala ka hina kuvoninga, hi fanele hi tshama hi hitekile ka nkama lowu hi hanyaka ka wona. Makhambi manyingi Yesu a byele vadjondzisiwa va yena a ku: “Tshamani mi hitekile”. (Matewu 24:42; 25:13; 26:41) Loko hi pimisa leswaku “hlomulu lowukulu” wahali kule swinene, ahingataswi kota kutirhisa mukhandlu wun’wana ni wun’wana leswaku hi pfuna van’wana kuva va djondza hi Yehovha. (Matewu 24:21) Matshan’wini ya kuva kuvonakala ka hina kuvoninga, ha katsongokatsongo kuta tsana naswona hi wugamu kungaha nyamalala.
16, 17. Xana hinga yendla yini leswaku hi tshama hi hitekile?
16 Hi fanele hi tshama hi hitekile ngopfu ngopfu ka masiku lawa ya wugamu. Xiyimo xa misava leyi xiya xi nyanya. Kambe haswi tiva leswaku makumu mata fika ka nkama lowu Yehovha anga langa wona. (Matewu 24:42-44) Na haha nyimele nkama wolowo, hi fanele hi lehisa mbilu hi tlhela hi veka miyanakanyu ya hina ka wumundzuku. Lerha Bibele siku ni siku naswona unga tshuki u nyima ku khongela ka Yehovha. (1 Petro 4:7) Djondza hi vamakwerhu lava se kunga khale swinene va tirhela Yehovha. Hi xikombiso, unga lerha mintokoto ya ta wutomi, yofana ni lowu tsaliweke ka Murindzi wa 15 ka Abril wa 2012, matluka 18-21, lowunga ni nhlokomhaka leyinge: “Ku Heta Malembe Ya 70 Ndzi Khome Nguvu Ya Muyuda.”
17 Hambeta u tshama u khomekile ka ntirho wa Yehovha. Yendlela van’wana leswinene naswona heta nkama wa wena ni vamakwerhu. Loko u yendla tanu, uta tsaka naswona awungatawu vona nkama loko wu hundza. (Vaefesa 5:16) Malandza ya Yehovha ma yendle swilo swotala ka 100 wa malembe lawa manga hundza. Naswona namuntlha, hi khomeki tinga teki. Ntirho wa Yehovha wuya wu kula hi ndlela yohlamalisa swinene. Kuvonakala ka hina kuya kuvoninga!
Ka mayendzo ya wurisi, hinga vuyeliwa ka wutlharhi la Yehovha (Vona maparagrafu 18, 19)
18, 19. Xana madoda mangahi pfunisa kuyini leswaku hi tirhela Yehovha hi kuhiseka? Nyikela xikombiso.
18 Hambileswi hi djohaka makhambi manyingi, Yehovha ahi pfumelela leswaku himu tirhela. Leswaku ahi pfuna, ahi ‘nyike tinyiko,’ kunga madoda ya bandla. (Lerha Vaefesa 4:8, 11, 12.) Hikolaho, loko madoda maku pfuxela, londzovota nkama lowu ungatawu heta na wona leswaku u djondza ka wutlharhi ni npfunu lowu vangataku nyikaka wona.
19 Hi xikombiso, vatekani va le Inglaterra ava ni swikarhato ka muchadu wa vona; hikolaho, va kombele npfunu ka madoda mambirhi. Nsati a atitwa onge nuna a anga khatali hi kurhangela ka ntirho wa Yehovha a ndjangwini. Nuna a atitwa onge a anga li mudjondzisi wa kahle naswona a pfumelile leswaku a anga yendle malulamiselo leswaku ndjangu wuva ni wugandzeli la ndjangu vhiki ni vhiki. Madoda ma pfune vatekani lava kuva va yanakanya hi xikombiso xa Yesu. Ma khutaze nuna leswaku a tekelela ndlela leyi Yesu a khataleleke vadjondzisiwa va yena ha yona. Hi hala tlhelo, ma khutaze nsati leswaku a lehisa mbilu kufana na Yesu. Matlhele mava nyika swiringanyeto swa ndlela leyi vanga yendlaka ha yona wugandzeli la ndjangu ni vana va vona va vambirhi. (Vaefesa 5:21-29) Nuna a yendle minzamu ya yikulu leswaku ava mulumuzana wa kahle. Madoda mamu khutaze leswaku anga karhali naswona a hambeta a tshemba moya lowokwetsima wa Yehovha. Lirhandzu ni npfunu lowu nyikiweke hi madoda lawa, hakunene swi pfune ndjangu lowu!
20. Xana lita va lihi vuyelo loko u tshika kuvoninga ka wena kuvonakala?
20 “Watsaka mani na mani lweyi achavaka Yehovha, lweyi afambaka atindleleni ta yena.” (Tipisalema 128:1) Uta tsaka loko u tshika kuvonakala ka wena kuvoninga. Hikolaho, djondzisa van’wana hi Yehovha, yendla hinkwaswu leswi uswi kotaka leswaku u pfuna ndjangu wa wena ni bandla leswaku liva ni vun’we naswona tshama u hitekile. Van’wana vata vona xikombiso xa wena lexinene kutani va lava kudzunisa Tatana wa hina, Yehovha. — Matewu 5:16.