I Mpsini Leswi Ni Nga Swi Yendlaka Loko Vapsali Va Mina Va Nga Ni Tshiki Ni Tirhisa Ma Redes Sociais?

Swi tikomba ingi vanghanu va wena hinkwavu va tirhisa ma redes sociais naswona va tshamela ku vulavula hi swona. Swi nga yendleka va ku poyila hileswi wena u kalaka u nga ma tirhisi. I mpsini leswi u faneleke u swi tiva hi mhaka leyi, naswona i mpsini leswi u nga swi yendlaka?

Leswi u faneleke u swi tiva

Leswo a swi yendlekeli wena ntsena. Vapsali va vanyingi a va va pfumeleli vana va vona ku tirhisa ma redes sociais. Leswo swi yendleka hileswi va nga vona swaku, ku va vana va vona va tirhisa ma redes sociais swi nga ha va yendla va kumana ni swikarhatu swa ku fana ni leswi:

• Depressão ni swikarhatu swin’wani leswi nga khumbaka ndlela leyi va titwaka hi yona.

• Ku sixtira mapornografiya, ku poselana mavhidiyo kumbe mafoto ya swilo swa masangu ni ku poyilelana.

• Ku holovisana ni vanghanu.

Majovhem man’wani ma lange ku tshika ku tirhisa ma redes sociais. Majovhem man’wani ma tsumbule swaku ma redes sociais a ma nga va pfuni kambe a ma va vangela swikarhatu. Vona swikombiso leswi landzelaka:

• Priscilla a tsumbule swaku a nkama lowu a a wu heta ka ma redes sociais, a a ta wu tirhisela ku yendla minchumu yin’wani ya lisima hintamu.

• Jeremy a a karhateka hintamu hikusa ka ma redes sociais, a ku tshuka ku humelela minchumu ya ku kala yi nga basanga.

• Bethany a tsumbule leswaku hi mhaka leswi a a nghena ka ma redes sociais, a wo pimisa ntsena hi leswi vanhu van’wani a va swi yendla.

Sierra a li: “Ni lange ku paga aplikativhu leli a ni li tirhisa swaku ni nghena ka ma redes sociais. Phela leswo swi ni pfunile hintamu. A ni swi xuvi ku nghena ka ma redes sociais naswona na swi rhandza hikusa ni ni nkama wa wunyingi hintamu wa ku yendla leswi nga swa lisima hintamu ka mina.”

Kate a li: “Minkama yin’wani a ni karhateka hintamu hi leswaku leswi a ni swi postara a swi nga ta rhandziwa hi vanhu van’wani. Naswona ma redes sociais ma vhisiyarana funtshi leswo a ni nga swi rhandzi. Swi ni karhatelile hintamu ku paga konta ya mina kambe nkama ni nga yendla leswo ni pepile. Phela swoswi ni ni ku rhula kakukulu hintamu.”

Leswi u nga swi yendlaka

Tirhisana ni vapsali va wena. Komba vapsali va wena swaku u munhu wa ku wupfa hi ku landza minawu leyi va ku vekelaka yona na u nga tikwatisi kumbe u tshamela ku khalakhala.

Bibele li li: “Xiphunta xi kombisa ku kwata ka xona, kambe lweyi wa ku tlhariha a tshama na a rhulile.” — Swivuriso 29:11.

Swi nga yendleka vanhu van’wani va ku byela swaku u nga ma tirhisa ma redes sociais na vapsali va wena va nga swi tivi. Kambe leswo swi bihile! Naswona loko u tshuka u swi yendla u nga ha vilela u tlhela u titwa nandzu. Naswona vapsali va wena loko va tshuka va swi tsumbula swi nga ha va karhatela ku tlhela va ku tshemba.

Bibele li li: “Hi navela ku tshembeka ka swilo hinkwaswu.” — Vaheberu 13:18.

Tiyendleli xiboho xa ku kala u nga ma tirhisi ma redes sociais. Ku fana ni majovhem lawa se hi nga vulavula hi wona, swi nga yendleka na wena u ni swivangelo swa swinyingi leswi ku yendlaka u lava ku tshika ku tirhisa ma redes sociais. Loko u tsumbula swaku ma redes sociais a ma ku pfuni, nyima ku ma tirhisa. U nga yendli leswo hileswi vapsali va wena va ku tsimbisaka ku ma tirhisa kambe hi mhaka ya leswi wena u nga langa ku yendla swoleswo. Leswo swi ta ku pfuna swaku loko vakolega va wena va vulavula na wena hi mhaka leyi, swi nga ku danisi funtshi swi nga yendleka va nga ku poyileli.

Leswi u nga swi yendlaka: Loko munhu a tshuka a ku: “I ntiyiso swaku a wu na ma redes sociais?” U nga ku: “Ni bohe swaku a ni swi lavi ku ma tirhisa swoswi. Ni pimisa swaku ma nga ni yendla ni taleliwa hi swilo.” Kumbe u ku, “kumbexana ka nkama lowu taka ni nga ma tirhisa kambe swoswi ni lava ku tshama na ni pepile!”