MAJOVHEM MA VUTISA
Ni Nga Vulavulisa Ku Yini Ni Vapsali Va Mina Hi Minawu Leyi Va Ni Vekelaka Yona?
Sylvia a li: “A nkama a ni ni 15 wa malembe, a ni pfumelelana ni minawu hinkwayu leyi vapsali va mina a va ni vekela yona. Kambe swoswi ni nga ni 19 wa malembe ni pimisa swaku ni fanele ni yengeseliwanyana chunseko.”
Indjhe na wena u titwa ku fana na Sylvia? Loko u titwisa xileswo, nhlokomhaka leyi yi ta ku pfuna swaku u vulavula ni vapsali va wena hi mhaka leyi.
Leswi u faneleke u swi tiva
Na u nge se vulavula ni vapsali va wena hi minawu leyi va ku vekelaka yona, pimisa hi swilo leswi landzelaka:
A wutomi a li ta va ni mpfilumpfilu loko a ku nga na minawu. Pimisa hi xitaratu lexi ku fambaka mimovha ya yinyingi. A ku ta yendleka yini loko a ku nga na maplaka ya leswi mimovha yi faneleke yi tsutsumisa xiswona, maplaka ya lomu yi faneleke yi famba hi kona ni loko a ku nga na ma semáforo? Ku fana ni minawu ya xitaratu, minawu ya vapsali va wena yi yendla leswaku swilo swi famba kahle akaya.
Minawu leyi vapsali va wena va ku vekelaka yona yi kombisa leswaku va ni mhaka na wena. Loko vapsali va wena a va nga ku vekeli minawu a swi ta kombisa leswaku a va na mhaka ni leswi swi ku yendlekelaka. Indjhe a va ta kombisa swaku i vapsali vavanene loko a va yendla leswo?
A WU SWI TIVA? Vapsali va wena na vona va landza minawu. Loko u nga kholwi lerha Genesa 2:24; Deteronoma 6:6, 7; Vaefeza 6:4; ni 1 Timotiya 5:8.
Kambe swi li yini loko wa ha vula swaku minawu leyi vapsali va wena va ku vekelaka yona yi twali?
Leswi u nga swi yendlaka
Rhanga hi ku pimisa na u nge se bula ni vapsali va wena. Tivutisi leswi: Ku nga va leswaku ni tolovela ku yingisa minawu leyi vapsali va mina va ni nyikaka yona? Loko nhlamulu ku li ihim, swi kombisa swaku lowu a hi wona nkama wa ku kombela ku yengeseliwanyana chunseko. Kambe, lerha nhlokomhaka leyi nge: “Ni Nga Yendla Yini Leswaku Vapsali Va Mina Va Ni Tshemba.”
Loko swi ku, wa yi yingisa minawu ya vapsali va wena, lunghiselela leswi u nga ta swi vula. Phela ku pimisa hi leswi u nga ta swi vula funtshi u maha hi ku swi tsala, swi ta ku pfuna kuva u kambela swaku leswi u lavaka ku swi kombela swa twala kumbe nada. Gama u kombela vapsali va wena leswaku va markara nkama ni ndhawu leyi mi nga ta bula ka yona na mi chunsekile hinkwenu ka n’wina. Se loko wu fika nkama wa ku vulavula, vulavula na vona kambe na u khumbuka leswi:
Kombisa xihlonipho. Bibele li li: “Rito leli tlhavaka li kwatisa munhu.” (Swivuriso 15:1) Khumbuka swaku loko u sungula ku holova ni vapsali va wena kumbe ku va byela swaku leswi vona va swi yendlaka a swi twali, mabulu ya n’wina a ma nge te gama kahle.
Bianca wa 19 wa malembe a li: “Loko ni ya ni va hlonipha vapsali va mina, na vona va ya va ni hlonipha. Se, swa vevuka ku pfumelelana ka swilo swin’wani loko hinkwavu va hloniphana.”
Yingisela. Bibele li vula swaku hi fanele hi ‘hantlisela ku yingisa, hi hlwela ku vulavula.’ (Yakobe 1:19) Khumbuka leswaku u le ku buleni ni vapsali va wena, a wu va vekeli a dixkursu leswi vulaka swaku u fanele u va yingisela na vona.
Devan wa 20 wa malembe a li: “Nkama hi ya ka hi kula swi nga ha tikomba ingaku hi tiva ngopfu ku tlula vapsali va hina kambe leswo a hi ntiyiso. Hi fanele hi tama hi yingisa leswi va hi byelaka swona.”
Tiveki ka ndhawu ya vapsali va wena. Zama ku vona swilo hi ndlela leyi vapsali va wena va swi vona hi yona. Yendla leswi Bibele li swi vulaka loko li ku: ‘U nga pimisi hi leswi pfunaka wena ntsena, kambe pimisela ni van’wani,’ ka mhaka leyi, ku nga vapsali va wena. — Vafilipiya 2:4.
I mavulavulelo wani lawa u pimisaka leswaku ma nga ku pfuna swaku u nyikiwa chunseko?
Joshua wa 21 wa malembe a li: “A ni pimisa swaku vapsali va mina a vo tshamela ku ni holovisa funtshi a va nga tsaki hi swiboho leswi mina a ni swi yendla. Kambe namuntlha na swi vona swaku vona a va zama ku va vapsali vavanene kasi mina a no ho djondza ku yendla swiboho hi noxe. Hinkwaswu leswi vona va nga swi yendla, va swi yendle hileswi va ni rhandzaka ni leswi va nga ni mhaka na mina.”
Pimisa hi leswi mi nga swi yendlaka. A hi nge vapsali va wena va ku byela swaku, ‘a hi swi lavi leswaku u fambisa u ya fexteni ka ndhawu leyi nga kule ni kaya ka wena.’ Zama ku tsumbula swaku i yini lexi xi va karhataka, hileswaku hi wena u nga ta fambisa movha kumbe hi mhaka ya fexta la kona.
Loko swi ku hi mhaka ya leswi ku nga wena u nga ta fambisa movha, va nga ku tshika u famba loko u va byela swaku u ta famba ni munhu lweyi se ku nga khale na a fambisa movha?
Loko swi ku hi mhaka ya fexta, va nga ku tshika u famba loko u va byela swaku i vanhu va muxaka muni lava va nga ta va kona ka fexta lolelo ni leswaku i mani lweyi a nga ta li vonelela?
Khumbuka swaku u fanele u hlonipha u tlhela u yingisa leswi vapsali va wena va nga ta ku byela swona. Kombisa swaku wa mu “hlonipha papayi wa wena ni mamani wa wena” hi leswi u swi vulaka ni leswi u swi yendlaka. (Vaefeza 6:2, 3) Swi nga yendleka vapsali va wena va txintxa leswi a va swi pimisa kumbe va nga swi txintxi. Ku nga na mhaka leswi va nga ta swi yendla, wena u fanele u yendla leswi:
U pfumela hi ndlela yayinene xiboho lexi vapsali va wena va nga ta xi yendla. Ku yendla leswi, i swa lisima hintamu hambileswi majovhem ya manyingi ma kalaka ma nga swi yendli. Loko u sungula ku holova ni vapsali va wena hileswi vona va kalaka va nga yendlanga leswi wena a wu swi lava, swi ta karhata hintamu leswaku va ku nyika chunseko ka nkama lowu taka. Kambe loko u yingisa hi mbilu hinkwayu swi nga yendleka ka khambi leli taka va ku nyika chunseko.