Mareferensiya Ya Xibukwana Xa Mintlhanganu Ya Mahanyelo Ni Ntirho
© 2022 Christian Congregation of Jehovah’s Witnesses
2 KU YA KA 8 KA JANEIRO
XUMA XI NGA KA RITO LA XIKWEMBU | 2 TIHOSI 22-23
“Hi Mhaka Muni Swi Li Swa Lisima Ku Tiveka Hansi?”
Murindzi 15/09/00 mapaj. 29-30
Yosiya A A Tiveka Hansi Funtshi A A Tsakeliwa Hi Yehovha
Lava a va pfuxeta tempele a va sungula ku tirha nimpundzu funtshi a va tirha hintamu. Yosiya a a wu khensa ntirho lowu a va wu yendla wa ku pfuxeta tempele leyi nga wonhiwa hi vavhovho va vona. Na va ha yaka, Xafani a fikile na a tamele buku ka mavoko a vula swaku buku lolelo li kumiwe hi muprofeta Hilikiya ni swaku a li ni nawu wa Yehovha lowu nga tsaliwa hi Moxe. (2 Tikronika 34:12-18) Kuva va kume buku leliyani a ku li nchumu wa ku hlamalisa, hikusa liyani a ku li kopiya la ku sungula la Nawu!
Yosiya a a swi nyimele hintamu ku swi twa leswi nga tsaliwa ka buku. Se, nkama Xafani a a li lerha a a zama ku li twisisa kahle ni ku vona swaku va nga swi tirhisisa ku yini leswi nga tsaliwa. Swi mu hlamalisile hikusa ka buku leliyani a ku tsaliwe leswi a va fanele va mu gandzelisa xiswona Yehovha, ni leswi a swi ta va yendlekela loko a vo tshika ku mu gandzela va ya gandzela swikwembu swa mavunhwa. Nkama Yosiya a nga tsumbula swaku a va nga landzi hinkwaswu leswi Yehovha a swi lavaka, a byele Hilikiya, Xafani ni van’wani a ku: “Vutisani Yehovha hi leswi swi nga tsaliwa ka buku leli, hikusa a hi kwatele hintamu hileswi vavhovho va hina va kalaka va nga yingisanga leswi nga tsaliwa.” — 2 Tihosi 22:11-13; 2 Tikronika 34:19-21.
Murindzi 15/09/00 paj. 30 par. 2
Yosiya A A Tiveka Hansi Funtshi A A Tsakeliwa Hi Yehovha
Yosiya a rhume vanhu swaku va ya vutisa muprofeta wa xisati Ulda leswi a swi tsaliwile ka buku la Nawu. Muprofeta Ulda a vule swaku makhombo lawayani ma nga tsaliwa ka buku la Nawu a ma ta wela Vayuda lava va va nga tshika ku gandzela Yehovha va ya gandzela swikwembu swin’wani. Kambe leswi Yosiya a nga tiveka hansi ka Yehovha, makhombo lawayani a ma nga ta li wela tiko na yena a ha hanya, kambe a ma ta va wela loko yena se a file. — 2 Tihosi 22:14-20; 2 Tikronika 34:22-28.
Lavetela Xuma Ka Rito La Xikwembu
Murindzi 15/04/01 paj. 26 mapar. 4-5
Swi Nga Ku Fambela Kahle Ku Nga Na Mhaka Swaku U Kulisiwe Ku Yini
Hambileswi Yosiya a nga kumana ni swikarhatu hintamu nkama na a li mutsongo, a tame a tsakisa Yehovha. Swilo swi mu fambele kahle ka mfumu wa yena. Ha swi tiva leswo hikusa Bibele li vula leswi: “A ku vanga ni hosi ya ku fana na yena ka tihosi leti nga va kona na yena a nge se fuma, leyi nga tirhela Yehovha hi mbilu ya yona hinkwayu, hi wutomi la yona hinkwalu ni hi matimba ya yona hinkwawu hi ku landza Nawu hinkwawu wa Moxe, naswona a ku vanga ni hosi yin’wani ya ku fana na yena loko se a file.” — 2 Tihosi 23:19-25.
9 KU YA KA 15 KA JANEIRO
XUMA XI NGA KA RITO LA XIKWEMBU | 2 TIHOSI 24-25
“Tshama U Pfule Matihlo”
Murindzi 15/02/01 paj. 12 par. 2
Siku La Ku Yavanyisa La Yehovha Li Kusuhi!
Leswi Sofoniya a nga swi profeta swi pfune Yosiya swaku a helisa wugandzeli la mavunhwa aYuda, kambe a nga swi kotanga ku susa swilo hinkwaswu swa ku biha swa wukhongeli la mavunhwa leswi a swi yendleteliwa hi vanhu, kumbe a yendla leswaku va rivaleliwa ka swidjoho leswi vhovho wa yena Manase a nga swi yendletela, ni leswi a nga “tata Yerusalema hi ngati ya yinyingi.” (2 Tihosi 24:3, 4; 2 Tikronika 34:3) Hi mhaka leyo, ku yavanyisa ka Yehovha a ku ta ta hikakunene.
Murindzi 15/03/07 paj. 11 par. 10
Tipontu Ta Lisima Ta Buku La Yeremiya
Hi 607 A.E.C. hi lembe la wu 11 la ku fuma ka Zedekiya, se a ku hundza lembe ni hafu na Nebukadinazara hosi ya Babilona a rhendzele Yerusalema. Hi siku la wu 7 ka wheti ya wu 5 ya lembe la wu 19 la ku fuma ka Nebukadinazara, Nebuzaradani xefe ya vagwardu a tile aYerusalema. (2 Tihosi 25:8) Swi nga yendleka a a li lana a va ghwimbe kona matende, a handle ka doropa la Yerusalema nkama a nga pimisa hi leswi a a ta li dumelisa xiswona doropa. Loko se ku hundze 3 wa masiku, hi siku la wu 10 la wheti a nghene Yerusalema a hisa doropa hinkwalu. — Yeremiya 52:12, 13.
Lavetela Xuma Ka Rito La Xikwembu
Murindzi 01/08/05 paj. 12 par. 2
Tipontu Ta Lisima Ta Buku La Tihosi Ta Wumbirhi
24:3, 4. Yehovha ‘a yendle leswi a nga hlaya swaku a a ta swi yendla’ hi Yuda hi mhaka swidjoho leswi Manase a nga swi yendla. Phela Yehovha a yi vona yi li ya lisima ngati ya vanhu lava kalaka va nga na nandzu, naswona hi nga tiyiseka swaku a nga kona lweyi a nga ni nandzu wa ngati lweyi a nga ta huluka ku khatisiwa hi Yehovha. — Tipisalema 37:9-11; 145:20.
16 KU YA KA 22 KA JANEIRO
XUMA XI NGA KA RITO LA XIKWEMBU | 1 TIKRONIKA 1-3
“Bibele I Buku Leli Vulavulaka Ntiyiso”
Murindzi 01/09/09 mapaj. 13-14
Indjhe Adamu Na Eva Va Ve Kona Hikakunene?
Pimisa hi xikombiso xa Vayuda va khale lava nga tsaliwa ka buku la Tikronika wa ku Sungula ndzima 1 ku ya ka 9 ni ka Luka ndzima 3. Malixta wolawo lawa ma nga tsaliwa kahle, ma vulavula hi kolomu ka 48 ku ya ka 75 wa tinguva. Ka buku la Luka hi kuma lixta la vavhovho va Yesu Kreste, kasi ka buku la Tikronika hi kuma lixta la tihosi ni vaprista va Israyele. Ka malixta hi mambirhi ku kumeka vanhu lava a va tiviwa hintamu, ku nga Solomoni, Davhida, Yakobo, Izaki, Abrahamu, Nowa swi gamesa hi Adamu. Hinkwawu mavito lawa ma kumekaka ka malixta lawa hamambirhi i ya vanhu lava va nga va kona hikakunene, naswona mun’we wa vanhu volavo lweyi a nga va kona hikakunene i Adamu.
Murindzi 01/06/08 paj. 3 par. 4
Indjhe Ndhambi Na Nowa Swi Ve Kona Hikakunene?
Malixta hamambirhi lama nga ka buku la Tikronika ni ka buku la Luka ma tiyisekisa swaku Nowa a ve kona hikakunene. (1 Tikronika 1:4; Luka 3:36) Phela Ezra na Luka, lava nga tsala malixta lawa a va kambisisa kahle swilo. Nkama Luka a nga tsala lixta la vavhovho va Yesu, a tsale ni vito la Nowa.
Murindzi 01/09/09 mapaj. 14-15
Indjhe Adamu Na Eva Va Ve Kona Hikakunene?
Hi xikombiso, pimisa hi djondzo leyi vanhu va vanyingi va kholwaka ka yona, ku nga nkutsulu. Hi ku ya hi djondzo leyi, Yesu a nyikele hi wutomi la yena la ku hetiseka swaku a ponisa vanhu ka xidjoho ni lifu. (Matewu 20:28; Yohani 3:16) Hilani hi swi tivaka hi kona, nkutsulu i nchumu lexi nyikeliwaka swaku ku hakeliwa leswi nga luziwa. Hi mhaka leyo, Bibele li hlaya swaku Yesu a nyikele “nkutsulu lowu a wu laveka.” (1 Timotiyu 2:6) Kambe u nga ha tivutisa leswi: ‘Hi mhaka muni nkutsulu lowu a wu laveka? Bibele li li: “Ku fana ni leswi hinkwavu va faka hi mhaka ya Adamu, hinkwavu va ta tlhela va pfuxiwa hi mhaka ya Kreste.” (1 Vakorinto 15:22) A wutomi la ku hetiseka leli Yesu a nga li nyikela swaku ku ponisiwa vanhu lava yingisaka, li fana ni wutomi la ku hetiseka leli Adamu a nga li luza hileswi a nga djoha. (Varoma 5:12) Hi mhaka leyo, loko ku li swaku Adamu a nga vanga kona hikakunene, nkutsulu lowu Yesu a nga wu nyikela a wu nga ta pfuna nchumu.
Lavetela Xuma Ka Rito La Xikwembu
Perspicaz vol. 1 paj. 1040 par. 1
Lixta La Vanhu Lava Nga Va Kona
Mavito Ya Vavasati. Minkama yin’wani mavito ya vavasati a ma kumeka ka malixta ya lava nga va kona loko ku ni swivangelo leswi twalaka. Hi xikombiso, swi nga yendleka Sara a tsaliwile ka malixta lawa, hileswi a a ta va vhovho wa Mesiya. Mesiya a a nga ta ta hi ka nsati mun’wani wa Abrahamu, kambe a a ta ta hi ka yena. Ka Genesa 25:1 ku vulavuliwa hi Ketura lweyi a nga gama a va nsati wa Abrahamu, leswo swi kombisa swaku Abrahamu a game a chada ni nsati mun’wani nkama Sara a nga fa. Naswona swi nga yendleka Milka a tsaliwile ka lixta la lava nga va kona hileswi a a li vhovho wa Rabeka nsati wa Izaki. Leswi kombisaka swaku vavhovho va Rabeka a va li maxaka ya Abrahamu, hikusa Izaki a a nga fanelanga a teka nsati wa matiko man’wani. — Gn 22:20-23; 24:2-4.
23 KU YA KA 29 KA JANEIRO
XUMA XI NGA KA RITO LA XIKWEMBU | 1 TIKRONIKA 4-6
“Swikhongelo Swa Mina Swi Vula Yini Hi Mina?”
Murindzi 01/10/10 paj. 23 mapar. 3-7
“Mutwi Wa Swikhongelo”
Swi tikomba Yabezi a a li munhu wa ku rhandza ku khongela. Nkama a nga sungula xikhongelo xa yena, a kombele Xikwembu swaku xi mu katekisa. A game a kombela 3 wa minchumu leyi kombisaka swaku a a li wanuna wa lipfumelo la ku tiya.
Xa ku sungula, Yabezi a kombele Xikwembu swaku xi ‘yengesela tiko la yena.’ (Ndzimana 10) Leswo a swi vuli swona swaku wanuna lweyi a a lava ku va ni swilo swa swinyingi, funtshi a swi vuli swona swaku a a navela tiko la vanhu van’wani, kambe a a lava swaku vanhu va vanyingi lava gandzelaka Xikwembu va tshama ka lona.
Xa wumbirhi, Yabezi a kombele swaku “voko la Xikwembu li va na yena.” A voko la ku fanekisela la Xikwembu i matimba ya xona lawa xi ma tirhisaka swaku xi pfuna vanhu va xona. (1 Tikronika 29:12) Leswaku ku hetiseka swikongomelo swa yena, Yabezi a tiseketele hi Xikwembu lexi kalaka xi nga va tsoni nchumu lava nga ni lipfumelo ka xona. — Esaya 59:1.
Xa wunharhu, Yabezi a khongelile a ku: “Ni kombela u ni vhikela ka makhombo swaku ma nga ni vavisi.” Ku va a vule swaku “ma nga ni vavisi”, a swi vuli swona swaku a wo kala a nga lavi ku kumana ni swikarhatu, kambe a a kombela Xikwembu swaku loko a kumana ni makhombo a nga vaviseki hintamu a za a godola.
Xikhongelo xa Yabezi xi swi kombisa kahle swaku yena a a li ni lipfumelo ka Yehovha ni swaku a a hisekela wugandzeli la ntiyiso. Se Yehovha a game a yendla yini? Ndzimana leyi yi gamesa hi marito lawa: “Se Xikwembu xi mu nyika leswi a nga swi kombela.”
Lavetela Xuma Ka Rito La Xikwembu
Murindzi 01/10/05 paj. 9 par. 7
Tipontu Ta Lisima Ta Buku La Tikronika Ta Ku Sungula
5:10, 18-22. Ka masiku ya Hosi Sawulo, tinxaka ta leste wa Yordani hambileswi a ti nga fiki ndhawu, ti swi kotile ku hlula Vaagriti. Leswi swi nga yendla vavanuna lava va hlula Vaagriti hileswi a va tshemba Yehovha va tlhela va kombela ku pfuniwa hi yena. Na hina hi nga tiyiseka swaku Yehovha a ta hi pfuna nkama hi lwisanaka ni valala va hina hambiloko va li vanyingi ku hi tluka. — Vaefeza 6:10-17.
30 KA JANEIRO KU YA KA 5 KA FEVEREIRO
XUMA XI NGA KA RITO LA XIKWEMBU | 1 TIKRONIKA 7-9
“U Ta Swi Kota Ku Hetisisa Swiyavelo Swa Wena Hi Ku Pfuniwa Hi Yehovha”
Murindzi 01/10/05 paj. 9 par. 8
Tipontu Ta Lisima Ta Buku La Tikronika Ta Ku Sungula
9:26, 27. Valevhi lava a va tirha ka tinyanghwa a va ni ntirho wa wukulu naswona a va tshembeka ka ntirho wa vona. A va tshama ni makhiya ya tindhawu ta ku kwetsima ta tempele. Vona a va hetisisa ntirho wa vona hi ku tshembeka siku ni siku. Na hina hi nyikiwe ntirho wa lisima hintamu, wa ku rhamba vanhu swaku va ta va ta gandzela Yehovha. Se, ku fana ni Valevhi, na hina hi fanele hi wu yendla hi ku tshembeka ntirho lowu.
Murindzi 15/09/11 paj. 32 par. 7
U Nga Mu Tekelelisa Ku Yini Finiyasi Loko U Kumana Ni Swikarhatu?
Finiyasi a a ni ntirho wa lisima lowu a a wu yendla aIsrayele. Kambe hambileswi a a kumana ni swikarhatu, a a tshemba Yehovha, a yendla ntirho wa yena hi wutlharhi, funtshi a a nga chavi, naswona Yehovha a wu yamukelile ntirho wa yena. Loko se ku hundze 1.000 wa malembe, Ezra a tsale leswi: “Ka nkama lowu nga hundza, Finiyasi n’wana wa Eliyazari, hi yena lweyi a a li murhangeli wa vona funtshi Yehovha a a li na yena.” (1 Tikro. 9:20) Onge vamakwerhu lava rhangelaka ka nhlengeletanu ya Yehovha, ku patsa ni Vakreste hinkwavu lava tirhelaka Yehovha hi ku tshembeka va nga yendla leswi fanaka.
Lavetela Xuma Ka Rito La Xikwembu
Murindzi 15/12/10 paj. 21 par. 6
Yimbelela Yehovha!
Hi ku tirhisa vaprofeta, Yehovha a vule swaku vagandzeli va yena va fanele va mu dzunisa hi tinsimu. Valevhi lava a va tirha ka ku yimbelela a va nga nyikiwi mintirho yin’wani, leswaku va ta kota ku kuma nkama wa ku tsala tinsimu va tlhela va ti insayara. — 1 Tikro. 9:33.
6 KU YA KA 12 KA FEVEREIRO
XUMA XI NGA KA RITO LA XIKWEMBU | 1 TIKRONIKA 10-12
“Tama U Tsakela Ku Yendla Ku Rhandza Ka Yehovha”
Murindzi 15/11/12 paj. 6 mapar. 12-13
“Ni Djondzisi Ku Yendla Ku Rhandza Ka Wena”
Davhida a a ma nyika lisima matshinya ya minawu, na hina hi fanele hi mu tekelela. Pimisa hi leswi nga yendleka nkama Davhida a nga “navela ku phuza mati ya xihlovo lexi nga kusuhi ni nyanghwa wa Betlehema.” Masonchwa manharhu ya Davhida ma veke wutomi la wona nghozini hi ku nghena ka ndhawu leyi Vafilista a va gwimbe ka yona matende swaku va ya mu khela mati. Kambe Davhida ‘a yale ku ma phuza a gama a ma diba phambeni ka Yehovha.’ Kasi hi mhaka muni a yendle leswo? Davhida a tlhamusele leswi: “A ni nge swi yendli leswi, hikusa a hi swinene hi ku ya hi mavonelo ya Xikwembu xa mina. Ni nga yi phuzisa ku yini ngati ya vavanuna lava va nga veka wutomi la vona nghozini? A nga pfumelanga ku ma phuza, hikusa va veke wutomi la vona nghozini swaku va kha mati.” — 1 Tikro. 11:15-19.
Hi ku ya hi nawu, Davhida a a swi tiva swaku ngati yi fanele yi ‘dibiwa phambeni ka Yehovha’ naswona a yi nga fanelanga yi dliwa. Davhida a a vula leswo hikusa a a swi tiva swaku “wutomi li le ngatini”. Phela Davhida a va mu tiselanga ngati kambe va mu tiseli mati. Se hi mhaka muni a yalile ku phuza? Davhida a a swi tiva swaku a nawu lowu wu tsimbisaka ku dla ngati wu nga tirha ka swiyimu swa ku hambanahambana. Ka yena mati lawayani a ma fana ni ngati ya vavanuna lavayani vavanharhu. Hi mhaka leyo a nga pfumelanga ku ma phuza kambe a swi vone swi yampsa kuva a ma diba. — Lev. 17:11; Det. 12:23, 24.
Murindzi 06/18 paj. 16 mapar. 5-6
Pfumelela Minawu ni Matshinya ya Minawu ya Bibele Swi Kongomisa Lipfalu la Wena
Loko hi lava leswaku minawu ya Xikwembu yihi pfuna, ahi fanelanga hiyi lerha kumbe kuyitiva ntsena. Hi fanele hiyi rhandza hi tlhela hiyi hlonipha. Bibele li li: “Vengani leswobiha, minamarhela leswinene.” (Varhoma 12:9) Xana hingaswi yendlisa kuyini leswo? Hi fanele hi djondza kuvona swilo hi ndlela leyi Yehovha aswi vonisaka xiswona. Hi xikombiso, ahinge swa kutikela kukuma wurhongo. Loko uya ka dokodela, aku byela leswaku u fanele u dla swakudla leswi nyikaka rihanyu, u tiwolola ni kucinca mahanyelo ya wena. Ahinge waswi landzela swileleto leswi, naswona swaku pfuna. Xana awuta titwisa kuyini hi swona?
Hi ndlela leyi fanaka, Mutumbuluxi wa hina ahi nyike minawu leyi yihi sirhelelaka ka mavuyelo ya kubiha ya xidjoho ni kutlhela ma yampsisa wutomi la hina. Hi xikombiso, Bibele li vula leswaku ahi fanelanga hi hemba, hi kanganyisa, hi yiva, hi tikhoma hi ndlela yobiha hi tlhelo la masangu, hiva ni tihanyi kumbe kutipeta ka swilo leswi fambisanaka ni wudimona. (Lerha Swivuriso 6:16-19; Nhlavutelo 21:8) Xana lirhandzu la hina hi Yehovha ni minawu yakwe ali kuli loko hi vona mavuyelo lamanene lawa hi makumaka hi kumuyingisa?
Lavetela Xuma Ka Rito La Xikwembu
Perspicaz vol. 1 paj. 556 mapar. 6-7
Mbilu
“Ku Tirhela Yehovha Hi Mbilu Hinkwayu.” Loko mbilu ya hina yi yo yavana, a swi nga ta koteka swaku yi tirha kahle. Kambe mbilu ya hina ya ku fanekisela swa koteka swaku yi yavana. Davhida a khongelile a ku: “Ni pfune swaku ni hlonipha vito la wena hi mbilu ya mina hinkwayu” leswi vulaka swaku swi nga yendleka munhu a rhandza Xikwembu a tlhela a xi hlonipa kambe ku nga li hi mbilu ya yena hinkwayu. (Ps 86:11) Mbilu ya munhu yelweyo yi nga ha va yi yavanile, leswi vulaka swaku a yi hisekeli ku gandzela Yehovha. (Ps 119:113; Nhl 3:16) Munhu a nga tlhela a va ni “timbilu timbirhi” loko a gandzela swikwembu swimbirhi, kumbe a kanganyisa munhu munwani hi ku vula xan’wachumu kuve mbilu ya yena yi pimisa swinwani. (1Tk 12:33; Ps 12:2) Yesu a swi hlayile phambheni ka vanhu swaku vanhu va ku tshamisa xileswo a va li vakanganyisi. — Mt 15:7, 8.
Lweyi a lavaka ku tsakisa Xikwembu a nga fanelanga a va ni mbilu ya ku yavana kumbe a va ni timbilu timbirhi kambe a fanele a xi tirhela hi mbilu ya yena hinkwayu. (1Tk 28:9) Kambe leswo swi lava minzamu hikusa mbilu ya hina ya kanganyisa naswona yi ni khombo. (Yr 17:9, 10; Gn 8:21) Leswi swi nga hi pfunaka swaku hi tirhela Yehovha hi mbilu hinkwayu i ku khongela (Ps 119:145; Swir 3:41), ku djondza Bibele nkama ni nkama (Ezr 7:10; Swi 15:28), ku chumayela mahungu ya ku tsakisa (vona ni Yr 20:9), ni ku tipatsa ni vanhu lava va tirhelaka Yehovha hi mbilu ya vona hinkwayu. — Vona ni 2Th 10:15, 16.
13 KU YA KA 19 KA FEVEREIRO
XUMA XI NGA RITO LA XIKWEMBU | 1 TIKRONIKA 13-16
“Ku Yingisa Nkongomiso Swa Pfuna”
Murindzi 01/05/03 mapaj. 10-11 par. 12
Indjhe Wa Tivutisa U Ku “Yehovha A Kwini?”
Loko areka la ntwananu se li susiwile a Israyele li yisiwa Kiriyati-Yerimi, ku ringana malembe ya manyingi Hosi Davhida a lave ku li susa a li yisa Yerusalema. A vulavule ni lava a va rhangela xitshungu a tlhela a vula swaku “loko swi yamukeleka ka Yehovha Xikwembu xa hina” areka a yi ta susiwa yi ya Yerusalema. Kambe Davhida a nga lavanga ku swi tiva hi ku helela swaku Yehovha a yi vonisa ku yini mhaka leyi. Hikusa loko a a yendle leswo, a areka a li nga ta va li kokiwe hi nyolo kambe a li tava li rhwaliwile hi valevhi va vakohata hi lani nawu wa Yehovha a wu vula hi kona. Nambileswi Davhida a a vutisa Yehovha loko a lava ku yendla xan’wanchumu, ka khambi leli swi mu hlulile ku yendla leswo. Hi mhaka leyo a swilo a swi va fambelanga kahle. Hi ku famba ka nkama Davhida a vule leswi: “Yehovha Xikwembu xa hina ahi kwatelile hikusa ahi swi yendlanga hi kuya hi leswi a a swi lavisa xiswona.” — 1 Tikronika 13:1-3; 15:11-13; Tinhlayo 4:4-6, 15; 7:1-9.
Murindzi 01/05/03 paj. 11 par. 13
Indjhe Wa Tivutisa U Ku “Yehovha A Kwini?”
Nkama valevhi a va susa a areka a Obede-Edomu va li yisa a Yerusalema va yimbelele lisimu leli Davhida a nga li tsala. Lisimu lolelo a li ni marito lama pfunaka lama khumbaka mbilu lama nge: “Lavetelani Yehovha ni matimba ya yena. Mu laveteleni nkama hinkwawu. Khumbukani mintirho ya yena ya ku hlamalisa leyi a nga yi yendla, masingita ya yena ni leswi a nga yavanyisisa xiswona.” — 1 Tikronika 16:11, 12.
Lavetela Xuma Ka Rito La Xikwembu
Murindzi 15/01/14 paj. 10 par. 14
Dzunisa Yehovha Hosi Leyi Yi Kalaka Yi Nga na Magamu
Nkama Davhida anga yisa a areka ya twananu a Yerusalema, valevhi va yimbelele lisimu la ku dzunisa leli li nga ka 1 Tikronika 16:31: “Matilo a ma tsake, ni misava a yi tsake; byelani matiko mi ku: ‘Yehovha i Hosi’”. Hi mhaka muni ka ndzimana leyi ku vuliwe swaku Yehovha a ve Hosi hi nkama wolowo kuve ku sukela khale Yehovha i Hosi leyi kalaka yi nga na magamu? Yehova a va Hosi loko a tirhisa wuhosi la yena kumbe loko a tirhisa munhu swaku a mu nyimela, kumbe a tirhisa munhu yelweyo swaku a lulamisa swikarhatu. Mhaka leyo ya wuhosi la Yehovha i ya lisima hintamu. Na Davhida a nga se fa, Yehovha a tshembise Davhida swaku mfumu wa yena a wu ta tshama hi masiku ni masiku. A te: “Ni ta gama ni langa mun’we wa vana va wena swaku a va hosi ni tlhela ni tiyisa mfumu wa wena. (2Sa 7:12, 13) Xitshembiso xa Yehovha xi hetisekile ka Davhida nkama “mun’we wa vana va Davhida” a nga humelela loko se ku hundze 1.000 wa malembe. Kambe xivutiso hi lexi: I mani “N’wana yelweyo” naswona a a ta sungula nkama muni kuva Hosi?
20 KU YA KA 26 KA FEVEREIRO
XUMA XI NGA KA RITO LA XIKWEMBU | 1 TIKRONIKA 17-19
“Tama U Tsaka Hambiloko Swilo Swi Nga Yendleki Hilani A Wu Navela Hi Kona”
Murindzi 15/07/06 paj. 19 par. 1
Pimisa Hi Minkateko Leyi U Yi Kumaka Ka Nlhengeletanu Ya Yehovha
DAVHIDA i mun’we wa vanhu lava ku vulavuliwaka hintamu hi vona ka Matsalwa ya Xiheberu. Yena a a li murisi, muyimbeli, muprofeta ni hosi naswona a a mu tshemba hi ku helela Yehovha. Leswi a a mu rhandza hitamu Yehovha, a a lava ku mu yakela yindlo. A a lava swaku yindlo yoleyo kumbe tempele yi tirhiseliwa ku gandzela Yehovha Xikwembu xa ntiyiso. Davhida a a swi tiva swaku malulamiselo wolawo a ma ta tisa ntsako ni minkateko ka vanhu va Xikwembu. A yimbelele Yehovha a ku: “Wa tsaka lweyi u mu langaka swaku a tshinela ka wena leswaku a ta tshama ka yindlo ya wena; hi ta tsaka hi ku helela hi wunene la yindlo ya wena, tempele ya wena ya ku kwetsima.” — Tipisalema 65:4.
Murindzi 08/21 mapaj. 22-23 par. 11
Tsaka Hi Ntirho Lowu U Wu Yendlelaka Yehovha
Loko hi tirha hi mbilu ya hina hinkwayu ka ntirho wun’wani ni wun’wani lowu hi nga na wona ka nhlengeletanu ya Yehovha, hi ta tsaka. Se, “chumayela rito la Xikwembu hi ku hiseka” u tlhela u tirhisana kahle ni bandla la wena. (Mint. 18:5; Heb. 10:24, 25) Yana mintlhanganwini na u lunghiselelile u tlhela u nyikela tinhlamulu leti nga ta pfuna van’wani. Yi yendli kahle mintirho kumbe madixkursu lawa u nyikiwaka wona ka mintlhanganu ya xikarhi ka vhiki. Loko madoda ma ku kombela swaku u yendla mintirho abandleni, yi yendli hi nkama u tlhela u zama ku yi yendla kahle. A wu fanelanga u pimisa swaku wo luza nkama loko u yendla mintirho leyi va ku nyikaka yona, kambe yi tshiki yi ku pfuna swaku u yampsisa wumunhu la wena ni leswi u kotaka ku swi yendla. (Swi. 22:29) Phela loko u tama u tinyikela swaku Yehovha a ku tirhisa, u ta kulisa wunghanu la wena na yena u tlhela u yi yendla kahle mintirho leyi a ku nyikaka yona funtshi u ta tsaka. (Gal. 6:4) Naswona a wu nga ta vaviseka loko u vona van’wani va kuma mintirho leyi u swi navelaka hintamu ku va na yona. — Rom. 12:15; Gal. 5:26.
Lavetela Xuma Ka Rito La Xikwembu
Murindzi 02/20 paj. 12, kwadru
Yehovha, Papayi wa Hina Hamu Rhandza Hintamu
Yehovha Wani Tiva Hikakunene?
U tshama u tihamba xivutiso lexi: ‘Ka kutala ka vanhu hinkwavu lavanga kona la misaveni Yehovha anga vona mina?’ Loko kuli swaku u tshama u tivutisa leswi, awu wexe. Hosi Davhida a tsale leswi: “Oh Yehovha, o va yini munhu lakaku ungamu vona, o va yini n’wana wa munhu lweyi anga faka leswaku ungava ni mhaka na yena?” (Pis. 144:3) Davhida a akholwa swaku Yehovha amu tiva kahle. (1 Tikro. 17:16-18) Naswona hi kutirhisa Rito la yena ni nhlengeletanu ya yena waku tiyisekisa swaku waku tiva hi leswi umu rhandzaka. Vona marito lamanga ka Bibele lamangaku kholwisaka swaku Yehovha waku tiva:
• Yehovha aku tivile ni kupsaliwa ungase psaliwa. — Pis. 139:16.
• Yehovha waswi tiva leswinga ka mbilu ya wena ni leswi uswi pimisaka. — 1 Tikro. 28:9.
• Yehovha waswi yingisa swikhongelo swa wena. — Pis. 65:2.
• Leswi uswi yendlaka swamu khumba Yehovha. — Swi. 27:11.
• Hi Yehovha angaku vitana akuva uva munghanu wa yena. — Yoh. 6:44.
• Yehovha aku tiva kahle lakakuva hambi loko wo fa, angaswi kota kukupfuxa. Ataku nyika muzimba wa nyuwani, ni mimpimiso ya nyuwani ya kufana ni leyi unga na yona swoswi. Waha tava munhu yelweyi wa mun’we. — Yoh. 11:21-26, 39-44; Mint. 24:15.
27 KA FEVEREIRO KU YA KA 5 KA MARÇO
XUMA XI NGA KA RITO LA XIKWEMBU | 1 TIKRONIKA 20-22
“Pfuna Majhovem Swaku Ma Yendla Mintirho Ya Yikulu”
Murindzi 01/17 paj. 29 par. 8
“[Swilo Leswi] Swi Djondzisi Vanhu Va Ku Tshembeka”
Lerha 1 Tikronika 22:5. Davhida a a ta va a pimise swaku Solomoni a a nga se lunghekela ku yendla tirho lowuyani wa wukulu. Phela yindlo liyani a yi ta yakiwa a yi fanele “yi va yikulu hintamu yi tlhela yi saseka.” Kambe Solomoni “a wa ha li mutsongo funtshi a a nga na xiperiyensiya.” Hambileswo, Davhida a a tiyiseka swaku Yehovha a a ta mu pfuna Solomoni swaku a wu yendla kahle ntirho lowu. Se Davhida a pimise hi leswi a a ta swi yendla swaku a seketela ntirho lowu, hi mhaka leyo a nyikele hi swilo swa swinyingi leswi a swi laveka swaku ku yakiwa tempele.
Murindzi 01/17 paj. 29 par. 7
“[Swilo Leswi] Swi Djondzisi Vanhu Va Ku Tshembeka”
Davhida a a ta va a tibyele leswi: ‘Leswi tempele yi nga ta kala yi nga yakiwi hi mina, a ni nga ta nyikela hi nchumu. Phela a ni nge nyikeli a mavonelo ku gama ku tlakusiwa mun’wani’. Vhela hi ku famba ka nkama, tempele yi vitaniwe “tempele ya Solomoni” ku nga li “tempele ya Davhida”. Phela swi nga yendleka leswo swi nga mu khomanga kahle Davhida, kambe a yendle hinkwaswu leswi a nga swi kota swaku apfunisa. A lange vanhu lava a va ta tirha a tlhela a nyikela hi leswi a swi laveka, swa ku fana ni tinsimbi, kobre, prata, woru ni timhandzi ta ku tiya. A tlhele a tiyisa Solomoni hi ku mu byela leswi: “N’wananga, Yehovha a a ve na wena, a swi ku fambeli kahle. Yaka yindlo ya Yehovha Xikwembu xa wena hi ku ya hi leswi a nga swi hlaya swaku u ta swi yendla.” — 1 Tikro. 22:11, 14-16.
Murindzi 03/18 mapaj. 11-12 mapar. 14-15
Pfuna Vana Va Wena Swaku Va Tsakamisiwa
Madoda na wona ma nga pfuna vapsali swaku va tiyisa vana va vona. Ndjhani? Hi ku vulavula kahle hi mintirho leyi nga kona ka nhlengeletanu ya Yehovha. Makwerhu mun’wana wa wansati a khumbuka swaku nkama na a ni 6 wa malembe, makwerhu Charles T. Russell a mu yelile a ya bula na yena. Makwerhu lweyi a vula leswi: “A hete 15 minutu na a vulavula na mina hi mintirho leyi ni nga yi fikelelaka ka nhlengeletanu ya Yehovha.” Mabulu lawa ma mu pfunile makwerhu lweyi hikusa hi ku famba ka nkama a ve mupfuli wa ndlela, funtshi ni swoswi se a ni 70 wa malembe na a ha li mupfuli wa ndlela. Impela, marito ya manene ni ku tiyisa vamakwerhu swa pfuna. (Swi. 25:11) Madoda ma nga tlhela ma rhamba vapsali ni vana va vona swaku va ya pfunisa ka mintirho leyi yendliwaka ka Yindlo ya Wugandzeli. Va nga tlhela va kombela vana swaku va yendla mintirho leyi va nga yi kotaka hi ku ya hi ntanga ya vona.
Vamakwerhu van’wana bandleni, na vona va nga yendla xan’wanchumu swaku va pfuna majovhem. Va nga kombisa swaku va ni mhaka ni majovhem. Hi xikombiso, va nga kambela ku vona swaku i mpsini leswi jovhem li swi yendlaka swaku li kulisa wunghanu la lona na Yehovha. Ku nga va swaku ku ni jovhem bandleni leli nyikeleke nhlamulu ya kahle? Kumbe ku nga va ku ni jovhem leli nga hetisisa xiyavelo xa lona xa mintlhanganu ya xikarhi ka vhiki? Kumbe leli nga kota ku chumayela munhu axikola? Kumbe leli nga swi kota ku yendla swa swinene loko li ringiwa? Loko li li kona, u nga ha heti nkama, vhela u li yela u ya li khensa. Tinyimiseli ku bula ni vana va bandla la wena na mintlhanganu yi nge se sungula kumbe loko yi helile. Loko u yendla leswo, vana va ta swi vona swaku na vona va lumba nhlengeletanu ya Yehovha. — Pis. 35:18.
Lavetela Xuma Ka Rito La Xikwembu
Murindzi 01/10/05 paj. 11 par. 6
Tipontu Ta Lisima Ta Buku La Tikronika Ta Ku Sungula
21:13-15. Yehovha a byele ntsumi swaku yi ya helisa makhombo lawa Yena a a ma tisele vanhu, hikusa a swi mu vava ku vona vanhu va yena va hlupheka. Hikusa Yehovha “a ni timpsali ta tikulu hintamu.”