Hayini Xikwembu Xihlengeleta Vanhu Leswaku Vayendla Kurhandza ka Xona?

1. Hayini Xikwembu xilange Vaisrayele leswaku vava vanhu va xona?

Xikwembu xilange vatukulu va Abrahama xivayendla tiku la xona ni kuvanyika minawu. Tiku lelivitaniwaka Israyele, kuve lona ntsena lingava ni lunghelo loseketela wugandzeli la ntiyisu ni Ritu la Xikwembu. (Tipisalema 147:19, 20) Hikolaho, vanhu va matiku hinkwawu avatavuyeliwa ka Vaisrayele. — Lerha Genesa 22:18.

Xikwembu xilange Vaisrayele leswaku vava timboni ta xona. Matimu ya vona makombisa ndlela leyi vanhu vavuyeliwaka ha yona loko vayingisa minawu ya Xikwembu. (Deteronoma 4:6) Hikolaho, hi kulangutisisa ni kudjondza hi Vaisrayele, vanhu avatakota kutiva Xikwembu xa ntiyisu. — Lerha Esaya 43:10, 12.

2. Hayini Xikwembu xilava leswaku malandza ya xona mahleleka?

Hi kufamba ka nkama, Xikwembu xicince Vaisrayele hi Bandla la Wukreste hikolaho ka leswi avanga haxiyingisi. (Matewu 21:43; 23:37, 38) Nyamuntlha, ndhawu ya Vaisrayele yipfaletiwe hi Vakreste va ntiyisu lavatirhaka tani hi Timboni ta Yehovha. — Lerha Mintirho 15:14, 17.

Yesu alange vadjondzisiwa vakwe leswaku vachumayela mahungu yotsakisa ka matiku hinkwawu ni kupfuna vanhu leswaku vayingisa swilerhisu swakwe. (Matewu 10:7, 11; 24:14; 28:19, 20) Kungalikhale, Xikwembu xitahelisa wubihi hinkwalu laha misaveni, leswi kombisaka leswaku ntirhu lowu se wuyendliwile hi xitalu. I khambi losungula ka matimu ya vanhu, Yehovha ahlengeletela vanhu va magidigidi lavahumaka ka matiku yo hambanahambana ka wugandzeli la ntiyisu. (Nhlavutelo 7:9, 10) Vakreste va ntiyisu vakhutazana ni kupfunana hikuva vahlelekile. Amisaveni hinkwayu, vatikhorisa hi djondzo leyifanaka ya Bibele aminhlanganwini ya vona. — Lerha Vaheveru 10:24, 25.

3. Xana nhlengeletanu ya Timboni ta Yehovha yisungulise kuyini?

Hi va 1.870 ntlawa lowutsongo lowungaha vitaniwa vadjondzi va Bibele wusungule kutsumbula tidjondzo ta ntiyisu ta Bibele leti atikhohlwiwile kuringana malembe yotala. Vavone leswaku Yesu aalange bandla la Wukreste leswaku lichumayela. Hikolaho, vasungule kampanya lochumayela amatikweni yo hambanahambana. Hi 1.931 vasungule kutirhisa vitu lelinge Timboni ta Yehovha. — Lerha Mintirho 1:8; 2:1, 4; 5:42.

4. Xana ntirhu wochumayela wa Timboni ta Yehovha wukongomisiwa njhani?

Ankameni wa vapostola, akuli ni ntlawa wa madoda lamanga ni ntokoto lawa mangaha vonelela mabandla hinkwawu ya Wukreste. Madoda lawa amateka Yesu tani hi Nhloko ya bandla. (Mintirho 16:4, 5) Hilaha kufanaka, nyamuntlha Timboni ta Yehovha amisaveni hinkwayu tavuyeliwa ka Ntlawa Lowu rhangelaka lowu vumbiwaka hi madoda lamanga ni ntokoto. Madoda lawa mavonelela swikritoriyu swa Timboni ta Yehovha, laha kuhundzuluxeliwaka, kugandlisiwaka ni kufambisa mabuku yodjondzisa vanhu Bibele hi tirimi letitlulaka 900. Hikolaho, madoda lawa lamanga ni ntokoto manyikela nkongomisu ni swikhutazu leswi humaka Bibeleni ka mabandla lamatlulaka 115.000 amisaveni hinkwayu. Ka bandla lin’wani ni lin’wani kulangiwa vavanuna lava fanelekaka leswaku vatirha tani hi madoda kumbe valanguteli. Vavanuna lava, vahlayisa ntlhambi wa Xikwembu hi lirhandzu. — Lerha 1 Petro 5:2, 3.

Timboni ta Yehovha tihleliwa leswaku tichumayela mahungu yotsakisa ni kuyendla vadjondzisiwa. Kufana ni vapostola, na tona tichumayela hi munti ni munti. (Mintirho 20:20) Nakambe tidjondzisa Bibele ka vanhu lavalavaka kutiva ntiyisu hi mbilu hinkwayu. Kambe Timboni ta Yehovha ahi ntlawa wa wukhongeli ntsena; i ndjangu lowunga ni Papayi wa lirhandzu. I vamakwerhu va vaxinuna ni vaxisati lava khatalelanaka. (2 Vatesalonika 1:3) Tani hileswi vanhu va Xikwembu vahlelekeke leswaku vayendla kurhandza ka xona ni kupfunana, swiyendla leswaku vawumba ndjangu lowutsakeke swinene wa laha misaveni. — Lerha Tipisalema 33:12; Mintirho 20:35.