Hayini Ufanele Uhambeta Udjondza hi Xikwembu?

1. Xana utavuyeliwa hi yini loko uhambeta udjondza Bibele?

I ntiyisu leswaku tidjondzo ta masungulu ta Bibele leti se utidjondzeke tikuyendla utshinela swinene ka Xikwembu. Lirhandzu la wena na xona leli se ulisunguleke lilava kuhlakuleliwa swinene. (1 Petro 2:2) Ntshembo wa wena wokuma wutomi lelingaheliki wutiseketele hi minzamu ya wena yohambeta utshinela ka Xikwembu hi kudjondza Bibele. — Lerha Yohane 17:3; Yuda 21.

Loko uya uva ni wutivi hi Xikwembu, lipfumelo la wena litatiya. Nakambe litakupfuna kuyendla kurhandza ka Xikwembu. (Vaheveru 11:1, 6) Litaku susumetela kuva utisola naswona uyendla kucinca lokuvuyelisaka ka ndlela leyi awuhanya ha yona. — Lerha Mintirho 3:19.

2. Xana ungava pfunisa kuyini van’wani?

Hi ntolovelo utalava kubyela van’wani leswi se uswidjondzeke — hinkwerhu haswirhandza kuvulavula hi mahungu yotsakisa. Loko uhambeta udjondza Bibele, utativa tindlela tolitirhisa leswaku uyimelela lipfumelo la wena hi Yehovha ni kuhlamusela van’wani mahungu yotsakisa. — Lerha Varhoma 10:13-15.

Vanhu votala vasungula hi kubyela vanghana ni maxaka ya vona mahungu yotsakisa. Kambe swiyendle hi wutlharhi. Amatshan’weni yovabyela leswaku leswi vakholwaka ka swona i mavunwa, vabyele hi ta switshembisu swa Xikwembu. Khumbuka leswaku hakanyingi vanhu vatsakisiwa swinene hi mahanyelo ya wena kungali hi leswi uswivulaka. — Lerha 2 Timotiya 2:24, 25.

3. Hi yihi minkateko leyi ungatati khorisaka ha yona?

Kudjondza ka wena Bibele switakupfuna kutiyisa wunghana la wena ni Xikwembu. Ekuheteleleni, utava ni wuxaka la lisima swinene ni Xikwembu. Nakambe xitakukatsa ka ndjangu wa xona. — Lerha 2 Vakorinto 6:18.

4. Xana ungayendla yini leswaku wuxaka la wena ni Xikwembu likula?

Leswaku wuxaka la wena ni Xikwembu lihambeta likula, ufanele uhambeta udjondza Bibele. (Vaheveru 5:13, 14) Kombela Mboni ya Yehovha leswaku yidjondza na wena Bibele hi kutirhisa buku leyinge Hinga Djondza Yini ka Bibele? Loko uya udjondza leswi engetelekeke aRitweni la Xikwembu, utatikhorisa hi ntsaku awuton’wini la wena. — Lerha Tipisalema 1:1-3; 73:27, 28.

Mahungu yotsakisa mata hi ka Yehovha, Xikwembu lexitsakeke. Kambe leswaku utshinela ka xona swititshege hi kuva utipatsa ni ntlawa wa vanhu lava endlaka kurhandza ka xona. (Vaheveru 10:24, 25) Minzamu ya wena yoya mahlweni utsakisa Xikwembu yitakubindzulisa wutomi lelingaheliki. Kuva munghana wa Xikwembu hi xona ntsena nchumu xa lisima lexi ungaxiyendlaka. — Lerha 1 Timotiya 1:11; 6:19.