BIBLIYOTEKA KA INTERNETI la Watchtower
Watchtower
BIBLIYOTEKA KA INTERNETI
xiChangana (Moçambique)
  • BIBELE
  • MABUKU
  • MINTLHANGANU
  • mwbr18 Abril pp 1-6
  • Mareferensiya ya Xibukwana xa Minhlanganu ya Mahanyelo ni Ntirhu

Aku na vhidiyu lihlawuliweke.

Hivaleli, aswikotekanga kuchaya vhidiyu.

  • Mareferensiya ya Xibukwana xa Minhlanganu ya Mahanyelo ni Ntirhu
  • Mareferensiya ya Xibukwana xa Minhlangano ya Mahanyelo ni Ntirho (2018)
  • Swihlokwana
  • 2 KUYA KA 8 KA ABRIL
  • XUMA XINGA KA RITU LA XIKWEMBU | MATEWU 26
  • 9 KUYA KA 15 KA ABRIL
  • 16 KUYA KA 22 KA ABRIL
  • 23 KUYA KA 29 KA ABRIL
  • 30 KA ABRIL KUYA KA 6 KA MAIO
Mareferensiya ya Xibukwana xa Minhlangano ya Mahanyelo ni Ntirho (2018)
mwbr18 Abril pp 1-6

Mareferensiya ya Xibukwana xa Minhlanganu ya Mahanyelo ni Ntirhu

2 KUYA KA 8 KA ABRIL

XUMA XINGA KA RITU LA XIKWEMBU | MATEWU 26

“Páscoa ni Xitsundzuxu — Swifana hi Yini, Switlhela Swihambana hi Yini?”

(Matewu 26:17-20)

vona xifaniso ka nwtsty

Swakudja Leswi Aswi Djiwa hi Siku la Páscoa

Swilo swalisima leswi aswi djiwa ka Páscoa akuli leswi: (1) xinyimpfana lexi woxiweke (akunga tshoviwi marhambu ya xihari); (2) xinkwa xokala comela; ni (3) matsavu yobava; (Eks 12:5, 8; Tin 9:11) Hikuya hi buku leli vitaniwaka Mishnah, matsavu yobava ama katsa matsavu yo hambanahambana. Swi tikomba ingi ama tsundzuxa Vaisrayele hi kubava ka wukarawa leli avali ka lona aEgipta. Yesu a tirhise xinkwa xokala comela kufanekisela muzimbha wa yena wa nyama lowu awu hetisekile. (Mt 26:26) Mupostola Pawulo ate Yesu i ‘Páscoa la hina’ (1Ko 5:7) Kolomo ka malembe ya 100, a vhinyu (4) ali yendla xiyenge ka leswi aswi djiwa hi Páscoa. Yesu atirhise vhinyu leswaku a fanekisela ngati ya yena leyi ayita halatiwa tani hi gandzelu. — Mt 26:27, 28.

(Matewu 26:26)

nhlamuselu yodjondza ha yona ka nwtsty ya Matewu 26:26

Swi vula: A ritu la Xigrika e·stinʹ laha li tikomba li vula “kuhlamusela, kufanekisela, kuseketela, kuyimela.” Leswo aswili rivaleni ka vapostola, hikuva hi nkama wolowo, muzimbha wa Yesu lowu awu hetisekile awu li mahlweni ka vona, ni mapawu yokala comela lawa ava lava kumadja. Hikolaho, mapawu amanga li muzimbha wa Yesu. Nakambe ritu leli fanaka la Xigrika li tirhisiwa ka Mt 12:7 naswona maBibele manyingi mali hundzuluxela liku: “swi vula”.

(Matewu 26:27, 28)

nhlamuselu yodjondza ha yona ka nwtsty ya Matewu 26:28

ngati ya ntwananu: Gandzelu la Yesu li yendle leswaku ntwananu lowu Yehovha awu yendleke ni Vakreste lava totiweke wu sungula kutirha. (Hv 8:10) Laha Yesu a tirhise maritu lama fanaka ni lawa ma tirhisiweke hi Moxe loko a tirha tani hi Muhlanganisi ni loko kusungula kutirha ntwananu wa Nawu ni Vaisrayele ka Ntshava ya Siyoni. (Eks 24:8; Hv 9:19-21) Kufana ni leswi ngati ya tinkuzi ni ya timbuti ayi yendla leswaku ntwananu wa Nawu wu tirha axikarhi ka Vaisrayele ni Xikwembu, ngati ya Yesu yi yendle leswaku kutirha a ntwananu lowu Xikwembu xiwu yendleke ni Israyele wa moya. Ntwananu wolowo wu sungule kutirha hi Pentekosta la 33 ka nguva ya Yesu. — Hv 9:14, 15.

Lavetela Xuma xa Moya

(Matewu 26:17)

nhlamuselu yodjondza ha yona ka nwtsty ya Matewu 26:17

Hi siku losungula la swinkwa [mapawu] leswo-ke-comela: A Nkhuvu wa Mapawu Yokala Comela awu sungula hi 15 ka Nisani, siku leli ali landzela ndzhaku ka Páscoa (14 ka Nisani), naswona awu teka 7 wa masiku. (Vona xiyenge 19 xa Xibukwana Xo Pfuneta Ku Dyondza Rito Ra Xikwembu) Hambiswilitanu, tani hi leswi minkhuvu leyi ayi yendliwa hi masiku ya kulandzelelana a masikwini ya Yesu, masiku hinkwawu ya 8 kupatsa ni siku la 14 ka Nisani, ama vitaniwa Nkhuvu wa Mapawu Yokala Comela. Laha, maritu lamange: “Hi siku losungula la” mangaha vula “tolo ka kona” (Fananisa ni Yh 1:15, 30, leyinge “yena ave kona na ninga se [proʹtos] va kona.” Laha ritu la Xigrika leli ka Matewu 26:7 li hundzuluxeliweke liva “losungula” [proʹtos], laha li hundzuluxeliwe liva “ninga se” ku kombetela ka nkama wa le ndzhaku). Kutani ritu la xigrika leli tirhisiweke laha, swin’we ni minkhuva ya Vayuda, swihi yendla hi gimeta hi leswaku xivutisu lexi vadjonzisiwa vaxi yendleke vangahava vaxi yendle hi siku la 13 ka Nisani. Hi siku lolelo, vadjondzisiwa va yendle malulamiselu ya Páscoa, leli vali tlangeleke “nimadjambu”, a kusunguleni ka 14 ka Nisani. — Mr 14:16, 17.

(Matewu 26:39)

nhlamuselu yodjondza ha yona ka nwtsty ya Matewu 26:39

hundzisa xinwelo lexi: Abibeleni “xinwelo” hakanyingi xi fanekisela kurhandza ka Xikwembu, kumbe leswi munhu “a yaveliweke swona”. Handle ko kanakana, Yesu a avilelisiwa hi ndlela leyi aata fa ha yona. Tani hi leswi avamu hehla vaku i muxandzi naswona i muxandzuki, a akarhateka hi kutiva leswaku mafela lawa amata chimisa vitu la Xikwembu. Swoleswo swimuyendle a khongela a kombela leswaku “xinwelo” lexi xi hundzisiwa ka yena.

9 KUYA KA 15 KA ABRIL

XUMA XINGA KA RITU LA XIKWEMBU | MATEWU 27-28

“Fambani Miya yendla Vadjondzisiwa — Hayini, Kwihi, Naswona Njhani?”

(Matewu 28:19)

tinhlamuselu todjondza ha tona ka nwtsty ta Matewu 28:19

miya yendla vadjondzisiwa: Ritu la Xigrika lelinge ma·the·teuʹo lingaha kombetela “kudjondzisa” hi xikongomelo xoyendla vadjondzisiwa. (Fananisa ni Mt 13:52, lani ritu leli li hundzuluxiweke ‘djondzisiwa.’) Maritu ‘miva khuvula’ ni ‘vava vadjondzisiwa’ ma kombisa leswi katsekaka ka xilerisu ‘xoyendla vadjondzisiwa’.

Vanhu va matiku hinkwawu: Hi kukongoma maritu lawa ma tirhisiweke ka matsalwa ya Xigrika ma vula ‘matiku hinkwawu’, kambe mongo wa mhaka wu kombetela ka vanhu va matiku hinkwawu; hi Xigrika ritu leli hundzuluxeliweke liva “va” li kumekaka ka xiga lexinge miva khuvula li vula “vanhu hinkwavu”. Xilerisu lexi xa kudjondzisa vanhu ‘va matiku hinkwawu’ axi li ximpsha. Na Yesu angase ta laha misaveni, matsalwa ama vula swaku lava avanga li Vaisrayele ava yamukeliwa a Israyele loko va tela kuta gandzela Yehovha. (1Th 8:41-43) Hi xilerisu lexi, Yesu a lerisa vadjondzisiwa va yena leswaku va chumayela vanhu van’wana kungali Vayuda ntsena. Hi ndlela leyi, a akombisa leswaku ntirhu wa kuchumayela awuta yendliwa amisaveni hinkwayu. — Mt 10: 1, 5-7; Nhl 7:9.

(Matewu 28:20)

nhlamuselu yodjondza ha yona ka nwtsty ya Matewu 28:20

miva djondzisa: Ritu la Xigrika leli hundzuluxeliweke liku ‘djondzisa’ li katsa kuletela, kutlhamusela, kutiyisekisa mhaka hi kutirhisa swivangelo leswi kholwisaka. Kuva djondzisa kuhlayisa swilo hinkwaswu leswi Yesu aswi lerhiseke akuta va ntirhu lowu awuta ya mahlweni wu yendliwa, lowu katsaka kuva djondzisa leswi Yesu aswi djondziseke, kuva pfuna kuswi tirhisa awuton’wini ni kuva valandzela xikombisu xa yena. — Yh 13:17; Ef 4:21; 1Pe 2:21.

Lavetela Xuma xa Moya

(Matewu 27:51)

tinhlamuselu todjondza ha tona ka nwtsty ta Matewu 27:51

nguvu: Nguvu leyi ayi sasekisiwile swinene ayi hambanisa ndhawu yo kwetsima ka ndhawu yo kwetsima ngopfu. Hikuya hi ndhawuku wa Xiyuda, nguvu yoleyo ayilehe mpimu wa 18 m, yitlhela yiva ni 9 m hi kuyanama naswona ayi ni 7,4 cm hi kutsindzihala. Hi kuhandzula nguvu leyi hi xikarhi, Yehovha aanga kombisi kuhlundzukela vanhu lava ava dlaye n’wana wa yena ntsena, kambe a akombisa ni leswaku kunghena amatilweni se aswita koteka. — Hv 10:19, 20

vukwetsimelo: A ritu la Xigrika lelinge na·osʹ laha li kombetela ka yindlunkulu, kupatsa ndhawu yo kwetsima ni yo kwetsima ngopfu.

(Matewu 28:7)

nhlamuselu yodjondza ha yona ka nwtsty ya Matewu 28:7

miya byela vadjondzisiwa vakwe leswaku a pfuxiwile ka lava feke: Vavasati lava, vave va kusungula kutivisiwa mayelana ni kupfuxiwa ka Yesu naswona kuve vona va kusungula kurhumiwa kuya tivisa vadjondzisiwa van’wani hi mhaka leyi. (Mt 28:2, 5, 7) Hikuya hi ndhawuku wa Xiyuda lowunga sekeliwiki aBibeleni, a wumboni leli ali nyikeliwa hi wansati alinga pfumeleliwi ka tribunali la wuyavanyisi. Kuhambana ni leswo, ntsumi ya Yehovha yi xixime vavasati, hi kuva nyika ntirhu lowo wa kutsakisa.

16 KUYA KA 22 KA ABRIL

XUMA XINGA KA RITU LA XIKWEMBU | MARKA 1-2

“Swidjoho swa wena swi rivaleriwile”

(Marka 2:3-5)

jy tluka 67, maparagrafu 3-5

“Swidjoho swa wena swi rivaleriwile”

Loko Yesu ali karhi a djondzisa ka yindlu leyi taleke hi vanhu, mune wa vavanuna va tisa wanuna lweyi akwanyaleke swirhu. Vavanuna volavo va lava leswaku Yesu a daha munghanu wa vona. Kambe hikolaho ka xitshungu, ‘va tsandzeka kumu yisa ka Yesu hi kukongoma’. (Marka 2:4) Yanakanya hi ndlela leyi swiva xukuvaliseke ha yona. Va khwele henhla ka yindlu ivi va susa lwango leli ali funengeta laha avali kona. Hiloko va xikisa wanuna lweyi a akwanyale swirhu.

Xana Yesu a hlundzukisiwile hikolaho ka kukavanyetiwa koloko? Ahihi. Yena a hlamalisiwe hi lipfumelo leli ava li na lona kutani abyela wanuna lweyi a akwanyale swirhu aku: ‘swidjoho swa wena swi rivaleliwile.’ (Matewu 9:2) Kambe, xana Yesu awa rivalela swidjoho hakunene? Vatsali ni vafarisi ava vulavulisana hi leswi na vaku: ‘Hayini munhu lweyi a vulavula hi ndlela leyi? Wa xandza. I mani lweyi anga rivalelaka swidyoho handle ka mun’we, kunga Xikwembu?’ — Marka 2:7.

Leswi Yesu a ativa mimpimisu ya vona, ava byele leswi: ‘Hayini mi anakanya swilo leswi atimbilwini ta n’wina? I yini lexi olovaka swinene, xana i kubyela munhu lweyi a omeke swirhu uku, “Swidjoho swa wena swi rivaleliwile,” kumbe i kuvula uku, “Pfuka u teka rihlaka la wena ufamba”?’ (Marka 2:8, 9) Hakunene, hikolaho ka gandzelu leli Yesu aatali yendla hi kunyikela wutomi la yena, aata swikota kurivalela swidjoho swa wanuna yelweyo.

(Marka 2:6-12)

nhlamuselu yodjondza ha yona ka nwtsty ya Marka 2:9

I yini lexi olovaka: Swingamu olovela munhu ku vula swaku anga rivalela swidjoho, hikuva akungata laveka nchumu lexi vonekaka lexi axita tiyisekisa maritu ya yena. Kambe kuvula aku, Pfuka . . . u famba aswita lava hlori leli alita swiveka arivaleni ka hinkwavu leswaku Yesu a ni wulawuli laku rivalela swidjoho. A rungula leli swin’we na Esa 33:24 swi kombisa leswaku kuvabya swi fambisana ni xiyimu xa hina xa kuva vadjohi.

Lavetela Xuma xa Moya

(Marka 1:11)

tinhlamuselu todjondza ha tona ka nwtsty ta Marka 1:11

ritu lihuma amatilweni: I khambe lo sungula ka makhambe manharhu lawa wurunguli la tiyevhangeli li vulaka leswaku Yehovha a vulavule hi kukongoma ni vanhu.

U N’wana wa mina:Tani hi xiwumbiwa xa moya, Yesu i n’wana wa Xikwembu. (Yh 3:16) Kusukela loko a psaliwile tani hi munhu wa nyama, Yesu a ali “n’wana wa Xikwembu” kufana na Adamu nkama aahetisekile. (Lk 1:35; 3:38) Hi ndlela yoleyo, Xikwembu axingo lava kutivisa leswaku Yesu hi mani ntsena. Kambe, Hi maritu lawa, swin’we ni kuchululiwa ka moya lowo kwetsima, Xikwembu xiswi veke rivaleni leswaku hi xona xinga tumbuluxa Yesu hi kukongoma tani hi xiwumbiwa xa moya naswona ‘a apsaliwa ka wumbirhi’ ni ntshembo wa kutlhela a hanya amatilweni tani hi mutotiwa leswaku a va Hosi ni Muprista wa Xikwembu. — Fananisa Yh 3:3-6; 6:51; Lk 1:31-33; Hv 2:17; 5:1, 4-10; 7:1-3.

Ni kuyamukelile: Kumbe “Na kutsakela; Ni kurhandza swinene”. Xiga lexi fanaka xi tirhisiwa ka Mt 12:18, laha ku tshahiwaka maritu ya Esa 42:1 malunghana na Mesiya lweyi atshembisiweke kumbe Kreste. Kuchululiwa ka moya lowo kwetsima ni maritu lawa Xikwembu xima vuleke mayelana ni N’wana wa xona swi veka rivaleni leswaku Yesu i Mesiya lweyi atshembisiweke.

(Marka 2:27, 28)

nhlamuselu yodjondza ha yona ka nwtsty ya Marka 2:28

Hosi ya . . . Savata: Yesu a vule maritu lawa na a kombetela ka yena n’winyi (Mt 12:8; Lk 6:5), kukombisa leswaku a siku la savata ali li mavokweni ya yena leswaku a yendla leswi Tatana wakwe aamu rhume swona. (Fananisa Yh 5:19; 10:37, 38.) Hi savata, Yesu a yendle man’we ya mahlori lama dumeke, lawa ama katsa kudaha vanhu lava ava vabya. (Lk 13:10-13; Yh 5:5-9; 9:1-14) Swi le rivaleni leswaku leswo aswi kombisa kuwisa loku angatahi tisela kona loko ata fuma misava, lokungata fana ni kuwisa hi savata — Hv 10:1

23 KUYA KA 29 KA ABRIL

XUMA XINGA KA RITU LA XIKWEMBU | MARKA 3-4

“Kuhanyisa hi Siku la Savata”

(Marka 3:1, 2)

jy tluka 78, maparagrafu 1-2

I Yini Leswi Pfumeleliwaka Kuswi Yendla hi Savata?

Hi savata mun’wana, Yesu a yendzele sinagoga leli swingaha yendleka ali kumeka aGalileya. Kolaho a kume wanuna lweyi a akwanyale voko la xinene. (Luka 6:6) Vatsali ni vafarisi avali karhi va langutisisa Yesu. Hayini ava yendla leswo? Vona vaswi veke rivaleni leswaku akuli xihi xivangelo xa kona nkama vangamu vutisa vaku: ‘Xana swa pfumeleliwa ku hanyisa hi savata?’ — Matewu 12:10.

Varhangeli va wukhongeli va Vayuda va kholwa leswaku swo pfumeleliwa kudaha munhu lweyi a vabyaka hi Savata ntsena loko wutomi la yena lili nghozini. Hikolaho ka leswo, hi savata aswinga pfumeleliwi kutlhelisa rhambu andhawini ya lona, kumbe kubandicha xilondza, hikuva a munhu ange fi hikolaho ka leswo. Vatsali ni vafarisi avanga vutisi Yesu hi leswi ava khatala hi kuxaniseka ka wanuna yelweyo. Vona ava lava xivangelo xo sola Yesu.

(Marka 3:3, 4)

jy tluka 78, paragrafu 3

I Yini Leswi Pfumeleliwaka Kuswi Yendla hi Savata?

Hambiswilitanu, Yesu wama tiva mapimiselu ya vona lama soholotiweke. Ava tikisa siku la savata hi kuyengetela swi nawanawana leswi aswinga sekeliwanga matsalweni. (Eksoda 20:8-10) Yesu a langutane ni kukanetiwa hikolaho ka mintirhu ya yena leyinene. Leswi a byeleke wanuna lweyi a akwanyale voko aku ‘suka uyima u ta laha xikarhi’, swoleswo swi yendle leswaku vakaneti vakwe vamu pfukela. — Marka 3:3.

(Marka 3:5)

nhlamuselu yodjondza ha yona ka nwtsty ya Marka 3:5

hi ku hlundzuka, ali ni gome swinene: Kuve Marka ntsena a tsaleke hi ta ndlela leyi Yesu a yanguleke ha yona loko a vona kutlanyala ka timbilu ta varhangeli va wukhongeli ka xiyendlakalu lexi. (Mt 12:13; Lk 6:10) Swinga yendleka Petro, lweyi a ali wanuna wa mintlhaveko leyi yenteke, kuve yena xihlovo xa kuhlamusela mintlhaveko ya Yesu hi ndlela leyi hanyaka. — Vona a vhidiyu la xinghenisu xa buku la Marka.

Lavetela Xuma xa Moya

(Marka 3:29)

tinhlamuselu todjondza ha tona ka nwtsty ta Marka 3:29

. . . xandzaka moya lowo kwetsima: Kuxandza swi vula mavulavulelo lama chimisaka, lama wonhaka ni kudelela vitu la Xikwembu kumbe swilo swo kwetsima. Leswi moya lowo kwetsima wu humaka ka Xikwembu, kuwu fularhela hi maxivomu kumbe kuyala leswaku wu tirha ka hina, swoleswo i kuxandza Xikwembu. Hilaha swi kombisiwaka hakona ka Mt 12:24, 28 na Mr 3:22, varhangeli va wukhongeli va Vayuda vama vonile matimba ya moya wa Xikwembu ka mahlori lawa Yesu ama yendleke, kambe hambiswilitanu va vule leswaku xihlovo xa matimba wolawo aku li Sathana Diyavulosi.

nandzu wa xidjoho lexinga heliki: Swi tikomba kuvuliwa xidjoho lexi munhu axi yendlaka hi maxivomu, lexinga ni vuyelu la hilaha kunga heliki, naswona aku na magandzelu manga funengetaka xidjoho xolexo.

30 KA ABRIL KUYA KA 6 KA MAIO

XUMA XINGA KA RITU LA XIKWEMBU | MARKA 5-6

“Yesu A ni Matimba yo Pfuxa Varhandziwa va Hina Lava Feke”

(Marka 5:39)

nhlamuselu yodjondza ha yona ka nwtsty ya Marka 5:39

anga fanga, kambe o yetlela: A Bibeleni, makhambe manyingi a lifu li fanisiwa ni kuyetlela. (Ps 13:3; Yh 11:11-14; Min 7:60; 1Ko 7:39; 15:51; 1Te 4:13) Yesu aata yendla leswaku xintombhana xitlhela xi hanya. Yena a vule maritu lawa, kukombisa leswaku kufana ni leswi vanhu lavanga yetlela swinga kotekaka kuva pfuxa awurhongweni, swinga koteka kupfuxa lava feke. Matimba lawa Yesu ama tirhiseke kupfuxa xintombhana lexi amata hi ka Tatana wakwe, lweyi ‘a yendlaka leswaku vafi vatlhela va hanya ni kuvitana swilo leswinga liki kona inge hi loko swi li kona’. — Rhm 4:17.

(Marka 5:42)

jy tluka 118, paragrafu 6

Xintombhana Xitlhela Xihanya

Ka makhambe man’wana, Yesu a lerise vanhu lava angava daha leswaku vanga byeli munhu hi leswi aswi yendleke; kutani ni laha a byela vapsali va xintombhana lexi leswi fanaka. Kambe, hikolaho ka leswi ava tsakile swinene, vapsali vaxona swin’we ni vanhu van’wana va hangalase mhaka leyo ‘axifundzheni hinkwaxu.’ (Matewu 9:26) Loko wena awo vona vanhu lava uva rhandzaka va pfuxiwa aku feni, xana awungata tsaka swinene ha swona utlhela uswi rungulela van’wana? Leli i khambe la wumbirhi ka lawa matsaliweke, leli Yesu a pfuxeke munhu aku feni.

Lavetela Xuma xa Moya

(Marka 5:19, 20)

nhlamuselu yodjondza ha yona ka nwtsty ya Marka 5:19

uma rungulela: Kuhambana ni leswi hi ntolovelo aaswi byela vanhu leswaku vanga paluxe mahlori ya yena (Mr 1:44; 3:12; 7:36), Yesu a lerise wanuna lweyi leswaku aya byela maxaka yakwe leswi aswi yendlekile. Swingaha yendleka Yesu a vule leswo hikolaho ka leswi a ahlongoliwile amugangeni wolowo, kutani aanga ta swikota kunyikela wumboni hi yexe. Naswona aswita tirhela kuhambanisa leswi aswita vulavuliwa kumbe kuhangalasiwa hi vanhu amugangeni mayelana ni makhumba.

(Marka 6:11)

nhlamuselu yodjondza ha yona ka nwtsty ya Marka 6:11

phumunhani thyaka hansi ka milenge ya n’wina: Kuyendla leswi, aswi vula leswaku vadjondzisiwa avangata va ni nandzu mahlweni ka Xikwembu. Xiga lexi fanaka xa kumeka ka Mt 10:14; Lk 9:5. Marka na Luka va yengetela xiga lexinge ‘leswaku swiva wumboni ka vona’. Pawulo na Barnaba va yendle tanu aAntiyoka wa le Pisidiya (Min 13:51), naswona loko Pawulo a yendla leswi fanaka aKorinto, hi kugubuta swiyambalu swakwe, a yengetele maritu lawa mange: ‘Ngati ya n’wina ayi ve henhla ka tinhloko ta n’wina. Mina ni tengile.’ (Min 18:6) Swiyendlu leswi aswitolovelekile nkameni wa vadjondzisiwa. Vayuda lava ava ni kutinyiketela, lava se a vayendzele tiku la lava avangali vayuda, ava phuhuna leswi vona ava swi teka swili wuthuli leli nyameke ka masandali ya vona, na vangase nghena ka tiku la ka vona. Hambiswilitanu, swi le rivaleni leswaku loko Yesu anyikela xilerisu lexi ka vadjondziwa va yena axi ni ntlhamuselu leyi hambaneke.

    Mabuku ya xiChangana (2003-2025)
    Huma
    Nghena
    • xiChangana (Moçambique)
    • Rhumela
    • Hlawula
    • Copyright © 2025 Watch Tower Bible and Tract Society of Pennsylvania
    • Minawu ya Matirhiselo
    • Nawu wa Xihundla
    • Seta Swa Xihundla
    • JW.ORG
    • Nghena
    Rhumela