Mareferensiya Ya Xibukwana Xa Mintlhanganu Ya Mahanyelo Ni Ntirho
2 KU YA KA 8 KA MAIO
XUMA XI NGA KA RITO LA XIKWEMBU | 1 SAMUWELE 27-29
“Leswi Davhida A A Lwisa Xiswona Tinyimpi”
Perspicaz vol. 1 paj. 164
Akixi
Nkama Davhida a a baleka Sawulo, hi makhambi mambirhi a ye a ya tumbela lani a ku fuma Hosi Akixi. Ka khambi la ku sungula, loko vanhu lava a va tshama ka ndhawu yoleyo va pimise swaku a lava ku dumela ndhawu liyani, a yentxe ingi o hlanya, se leswo swi yentxe swaku Hosi Akixi a mu tshika a famba. (1Sa 21:10-15; Pis 34:Xihlokwane; Pis 56:Xihlokwane) Ka khambi la wumbirhi, Davhida a a ni 600 wa masonchwa ni mindjangu ya wona, naswona Akixi a game a va pfumelela swaku va tshama aSikilaga. Ku hele lembe ni 4 wa tiwheti na Akixi a pimisa swaku Davhida ni masonchwa ya yena a va dumela madoropa ya Yuda, kuve Davhida a a dumela Vagexura, Vagiriza ni Vaamaleke. (1Sa 27:1-12) Mavunhwa lawa ma tirhile, lakakuva Akixi a pfumelela Davhida swaku a tipatsa na yena nkama Vafilista va nga tilunghiselela swaku va ya lwa na Hosi Sawulo. Kambe hi siku leli va nga ya lwa hi lona, masonchwa ya Vafilista ma vule swaku Davhida a a nga fanelanga a famba na vona hikusa a va pimisa swaku a a ta va djikela. Hi mhaka leyo, Akixi a tlhelise Davhida. (1Sa 28:2; 29:1-11) Nkama Davhida a nga va hosi, a lwe ni Gade naswona swi tikomba na hosi Akixi a nga dlayiwanga hi nkama wolowo hikusa nkama na ku fuma Solomoni a wa ha hanya. — 1Th 2:39-41.
Majovhem, Mi Nga Yentxa Yini Leswaku Mi Tshembiwa Hi Van’wana?
Xikarhatu xin’wana lexi Davhida a nga kumana na xona hi leswaku a a fanele a nyima malembe ya manyingi leswaku a sungula ku fuma, hambileswi se a va mu lange khale swaku a va hosi. (1 Sam. 16:13; 2 Sam. 2:3, 4) Hi nkama wolowo, i ntxini xi nga pfuna Davhida swaku a lehisa mbilu? Handle ka ku a godola, Davhida a tame a yentxa leswi a a swi kota. Hi xikombiso, nkama lowu Davhida a a hanya hi ku baleka a tirhise nkama wolowo swaku a lwa ni vanhu lava a va nyenya tiko la Israyele. Hi mhaka leyo, a kote ku vhikela mafrontera ya tiko la Yuda. — 1 Sam. 27:1-12.
Perspicaz vol. 2 paj. 354 par. 6
Mavunhwa
Hambileswi Bibele lima solaka hi kuhelela mavunhwa, leswi aswi vuli swona swaku munhu a fanele a byela van’wana swilo swaku ava na mfanelo ya kuswi tiva. Yesu a te: “Mi nga nyiki timbyana swilo swa ku kwetsima, hambi ku hoxa maperola ya n’wina ka makhumba, hikusa ma ta ma psanyetela ma tlhela ma mi djikela ma mi vavisa.” (Mt 7:6) Hi mhaka leyo, loko Yesu a vona swaku mhaka kumbe nhlamulo ayita vavisa vanhu van’wani a angayi vuli hi kuhelela. (Mt 15:1-6; 21:23-27; Yh 7:3-10) Leswi Yesu angaswi yendla, swi yelana ni leswi Abrahamu, Isaka, Rahava, na Elixa vanga swi yendla loko va fihlela vanhu lavanga gandzeliki Yehovha timhaka leti atingava lumbi. — Gn 12:10-19; ni ndzima 20; 26:1-10; Yx 2:1-6; Yk 2:25; 2Th 6:11-23.
Lavetela Xuma Ka Rito La Xikwembu
Murindzi 01/01/10 paj. 20 mapar. 5-6
Vafi Va Nga Va Pfuna Lava Hanyaka?
Pimisa hi mhaka leyi. Bibele li vula leswaku loko munhu a fa “a tlhelela ka wuthulu” naswona “mimpimiso ya yena a ya ha tirhi.” (Tipisalema 146:4) Sawulo na Samuwele a va swi tiva leswaku Xikwembu a xi swi lavi leswaku vanhu va tipatsa ni vangoma. Ku sunguleni, Sawulo hi yena lweyi a a rhangela loko ku helisiwa matiko lama tirhisaka wungoma! — Levhitika 19:31.
Kambe tlhela u pimisa hi leswi: Loko ku li swaku Samuwele a a ha tama a hanya ka ndhawu yin’wana loko se a file, a a ta tshika ku yingisa nawu wa Xikwembu hi ku ya humelela ka mungoma leswaku a ya tlhangana na Sawulo? Phela Yehovha se a a yalile ku vulavula na Sawulo. Se mungoma a a ta swi kotisa ku yini ku sindzisa Xikwembu xa Matimba Hinkwawu leswaku xi vulavula na Sawulo hi ku tirhisa Samuwele kuve se a a file? Swoleswo a swi twisiseki. Swa tikomba swaku Samuwele yelweyo a ku nga li yena muprofeta wa ku tshembeka wa Xikwembu, kambe a ku li dimoni leli a li tiyentxa Samuwele.
9 KU YA KA 15 KA MAIO
XUMA XI NGA KA RITO LA XIKWEMBU | 1 SAMUWELE 30-31
“Tshemba Yehovha Xikwembu Xa Wena”
Murindzi 01/08/06 paj. 28 par. 12
Chava Yehovha Leswaku U Tsaka!
Ku chava Yehovha, swi vhikele Davhida swaku a nga yentxi swilo swa ku biha naswona swi mu nyike ntamu wa ku lwisana ni swikarhatu swa swikulu leswi a nga kumana na swona na a nga chavi. Davhida ni vavanuna va yena va baleke Sawulo va ya aSikilaga ka tiko la Vafilista, ku ringana lembe ni 4 wa tiwheti. (1 Samuwele 27:5-7) Siku lin’wana loko vavanuna va nga li kona, masonchwa ya Vaamaleke ma hise doropa ma gama ma famba ni vasati hinkwavu va vavanuna volavo, vana va vona ni swifuyu swa vona. Loko va fika va vona leswi nga humelela, Davhida ni vavanuna va yena va rilile. Ku vaviseka koloko ku yentxe swaku vavanuna va Davhida va kwata hintamu lakakuva va lava ku mu bandza hi maribye. Hambileswi na yena Davhida a a vavisekile, a nga helanga matimba. (Swivuriso 24:10) Ku chava Xikwembu ku mu pfune swaku a tshemba Yehovha. Hi ku pfuniwa hi Xikwembu, Davhida ni vavanuna va yena va hlule Vaamaleke va tlhela va teka hinkwaswu leswi a va va yivele swona. — 1 Samuwele 30:1-20.
Murindzi 15/04/12 paj. 30 par. 14
Yehovha Wa Hi Vhikela Leswaku A Hi Ponisa
Davhida a kumane ni swikarhatu swa swikulu ka wutomi la yena. (1 Sam. 30:3-6) Bibele li kombisa leswaku Yehovha a a yi tiva ndlela leyi Davhida a a titwa hi yona. (Lerha Tipisalema 34:18; 56:8.) Wa yi tiva ndlela leyi hi titwaka hi yona. Wa tshinela ka hina loko hi ‘tshoveke mbilu’ kumbe hi ‘pfotlokile mbilwini.’ Mhaka leyi yi nga hi tiyisa ku fana ni leswi yi nga mu tiyisisa xiswona Davhida, lweyi a nga yimbelela a ku: “Ni ta tsaka ngopfu hi mhaka ya lirhandzu la wena, hikusa u ku vonile ku karhateka ka mina, wa ku tiva ku vaviseka ka kukulu loku ni nga na kona.” (Pis. 31:7) Yehovha a ngo vona swaku hi vavisekile ntsena, kambe a tlhela a hi tiyisa ni ku hi pfuna hi ku tirhisa mintlhanganu ya Wukreste.
Lavetela Xuma Ka Rito La Xikwembu
Murindzi 15/03/05 paj. 24 par. 9
Tipontu Ta Lisima Ta Buku La Samuwele Wa Ku Sungula
30:23, 24. Xiboho lexi xi sekeliwa ka Tinhlayo 31:27 naswona xi kombisa leswaku Yehovha a va vona na va li va lisima vanhu lava yentxaka mintirho leyi pfunaka swinene bandleni. Se ku nga na mhaka swaku hi yentxa yini, a hi ‘swi yentxeni hi mbilu ni hi matimba ya hina hinkwawu ingaku hi swi yentxela Yehovha, ku nga li vanhu’. — Vakolosa 3:23.
16 KU YA KA 22 KA MAIO
XUMA XI NGA KA RITO LA XIKWEMBU | 2 SAMUWELE 1-3
“Hi Djondza Yini Ka Lisimu Leli Davhida A Nga Li Hambela Sawulo Na Yonatani?”
Murindzi 15/06/00 paj. 13 par. 9
Va Hloniphi Hambileswi Va Kalaka Va Nga Hetisekanga
Davhida a titwise ku yini nkama na a hluphiwa? A rilele Yehovha a ku: “ni dumeliwa hi vanhu . . . va mona va lava ku ni dlaya.” (Tipisalema 54:3) A byele Yehovha leswi a swi mu karhata a ku: “Ni ponisi ka valala va mina, Xikwembu xa mina; . . . Ni hlaseliwa hi vanhu va matimba ku nga li hi leswi ni nga ku terekela kumbe ni nga ku djohela, Yehovha. Hambileswi ni kalaka ni nga wonhanga nchumu, va tsutsuma va lunghekela ku hlasela. Loko ni ku vitana, tana u ta vona.” (Tipisalema 59:1-4) U tshame u titwa hi ndlela leyi hi mhaka ya leswi u karhatiwaka hi munhu lweyi a rhangelaka na u nga mu wonhelanga nchumu? Davhida a nga tsandzekanga ku hlonipha Sawulo. Loko Sawulo a file, ku hambana ni kuva Davhida tsaka, a mu hambele lisimu a ku: “Sawulo na Yonatani a va rhandziwa wutomi la vona hinkwalu, . . . a va tsutsuma ngopfu ku tlula magama, a va ni ntamu ku tlula tinghonyama. N’wina tintombhi ta Israyele, rilelani Sawulo.” (2 Samuwele 1:23, 24) Mawaku xikombiso xa xinene xa ku hlonipha vatotiwa va Yehovha, hambileswi Davhida a a wonheliwile hi Sawulo!
Murindzi 15/04/12 paj. 10 par. 8
Ku Xengana I Xikombiso Xa Masiku Ya Wugamu!
Bibele li vulavula hi vanhu va vanyingi lava nga tshembeka. A hi kambisiseni swikombiso swa vavanuna vambirhi leswaku hi vona swaku hi nga djondza yini ka vona. Hi ta rhanga hi wanuna lweyi a nga tshembeka ka Davhida. Phela Yonatani matevula ya Hosi Sawulo, a a ta va hosi ya Israyele. Kambe Yehovha a lange Davhida leswaku a va hosi ya Israyele leyi a yi ta landzela Sawulo. Yonatani a xi hloniphile xiboho xolexo. A nga mu kweletanga Davhida a tlhela a mu vona na a li nala. Kambe a namarhele Davhida naswona Yonatani a tshembise leswaku a a ta tshembeka ka yena. Naswona a kombise swaku wa mu honipha Davhida hileswi a a li hosi hi ku mu nyika mpahla, tlharhi, ligubu ni bandhi la yena. (1 Sam. 18:1-4) Yonatani a yentxe hinkwaswu leswi a nga swi kota swaku a tiyisa Davhida. Funtshi a veke ni wutomi la yena nghozini swaku a mu vhikela ka Sawulo. Yonatani a byele Davhida hi ku tshembeka a ku: “Wena u ta va hosi aIsrayele, mina ni ta landzela wena”. (1 Sam. 20:30-34; 23:16, 17) Nkama Yonatani a nga fa, a swi hlamalisi leswi Davhida a nga yimbelela lisimu la xirilo a tlhamusela leswi a a mu rhandzisa xiswona ni ku vaviseka ka yena. — 2 Sam. 1:17, 26.
Lavetela Xuma Ka Rito La Xikwembu
Perspicaz vol. 1 paj. 1248 par. 1
Makwerhu
A rito leli nge “makwerhu” li tlhela li tirhiseliwa ka vanhu lava patsanaka swaku va yentxa swilo leswi havambirhi va swi lavaka. Hi xikombiso, Hiramu Hosi ya Tiru a vule swaku Hosi Solomoni i makwavu wa yena ku nga li hileswi havambirhi a va li Tihosi ntsena kambe ni hi mhaka ya leswi hinkwavu a va ni xikongomelo xin’we, xa ku Solomoni a nyikiwa mapulangu ni swilo swin’wana leswi a a ta swi tirhisela ku yaka tempele. (1Th 9:13; 5:1-12) Davhida a tsale a ku: “Vona ku saseka ni ku tsakisa ka swona loko vamakwavu va tshama xikan’we hi ku twanana!” Marito lawa ya Davhida ma kombisa swaku lexi yentxaka swaku vanhu va hanya hi ku rhula ni ku twanana a hi loko va li vana va mamana ni papayi mun’we ntsena. (Ps 133:1) Phela leswo hi swona swi nga yentxa Davhida a vula swaku Yonatani i makwavu wa yena. (2Sa 1:26) Vanhu lava twananaka ka minchumu ya ku fana hambi yi li ya ku biha, va vitaniwa swaku i vamakwavu. — Swiv 18:9.
23 KU YA KA 29 KA MAIO
XUMA XI NGA KA RITO LA XIKWEMBU | 2 SAMUWELE 4-6
“Chava Ku Kwatisa Xikwembu”
Murindzi 15/05/05 paj. 17 par. 8
Tiponto Ta Lisima Ta Buku La Samuwele Wa Wumbirhi
6:1-7. Hambileswi Davhida a a ni xikongomelo xa xinene, ku zama ku rhurhisa Arka hi ku tirhisa nyolo a swi lwisana ni minawu ya Xikwembu. Hi mhaka leyo, a tsandzekile. (Eksoda 25:13, 14; Tinhlayo 4:15, 19; 7:7-9) Leswi nga yentxekela Uzza nkama a nga khoma Arka, swi hi djondzisa swaku hambiloko hi li ni xikongomelo xa xinene minawu ya Yehovha a yi nge txintxi.
Murindzi 01/02/05 paj. 27 par. 20
Minkama Hinkwayu Yehovha A Yentxa Swilo Hi Ndlela Ya Yinene
Khumbuka swaku Uzza a a wu tiva kahle Nawu. A Arka a yi fanekisela lani Yehovha a nga kona. Nawu a wu swi tlhamusele kahle swaku a Arka a li nga fanelanga li khumbiwa hi vanhu va ku a va nga fanelanga, naswona loko a vo li khumba a va ta khatisiwa hi lifu. (Tinhlayo 4:18-20; 7:89) Se, ku rhurhisiwa ka Arka a ku nga li mhaka ya yitsongo. Leswi Uzza a a li Mulevhi (hambileswi a a nga li muprista), a a fanele a wu tiva kahle Nawu lowo. Naswona Arka li hete malembe ya manyingi na li li kaya ka papayi wa yena. (1 Samuwele 6:20–7:1) Li tshame kona kolomu ka 70 wa malembe, ku fikela loko Davhida a yentxe xiboho xa ku li rhurhisa. Swa tikomba swaku Uzza a tive minawu leyi fambisanaka ni Arka ku sukela a ha li mutsongo.
Murindzi 01/02/05 paj. 27 par. 21
Minkama Hinkwayu Yehovha A Yentxa Swilo Hi Ndlela Ya Yinene
Hilani hi nga swi vona hi kona, Yehovha a tiva leswi nga ka timbilu ta vanhu. Bibele li vula swaku leswi Uzza a nga swi yentxa swi kombisa swaku a a nga xi hloniphi Xikwembu, naswona swi nga yentxeka Yehovha a vone swaku Uzza a a sungule ku tibyela, ku nga swilo leswi kalaka swi nga tlhamuseliwi ka mhaka leyi. I nga va swaku Uzza a tivone na a yampsa lakakuva a pimisa swaku a nga yentxa leswi a swi lavaka hambiloko a nga wu yingisi Nawu wa Xikwembu? (Swivuriso 11:2) Ku nga va swaku a a lava ku tikombisa swaku wa yampsa ku tlula vanhu van’wana, hi mhaka leswi yena ni ndjangu wa yena a va hlayise Arka ku ringana malembe ya manyingi? (Swivuriso 8:13) I nga va swaku Uzza a a nga ha na lipfumelo, lakakuva a pimisa swaku Yehovha a nga tsandzeka ku khoma Arka swaku li nga wi, kuve a li fanekisela lani Yehovha a nga kona? Ku nga na mhaka swaku i yini lexi nga yentxa Uzza a khoma Arka, ha tiyiseka swaku ku ni swilo swa ku biha leswi Yehovha a nga swi vona ka mbilu ya Uzza leswi nga yentxa a mu khatisa hi xihantla. — Swivuriso 21:2.
Lavetela Xuma Ka Rito La Xikwembu
Murindzi 01/04/96 paj. 29 par. 1
Minkama Hinkwayu Byela Yehovha Swikarhatu Swa Wena
Leswi Davhida a a li hosi, hi yena lweyi a a fanele a hlamula ka swilo leswi nga yentxeka. Leswi a nga yangulisa xiswona swi kombisa swaku hambi hi munhu lweyi a nga ni wunghanu la linene na Yehovha minkama yin’wana a nga yangula hi ndlela ya ku biha loko a kumana ni miringo. Xa ku sungula, Davhida a kwatile a gama a sungula ku chava. (2 Samuwele 6:8, 9) Wunghanu la linene leli a a li na lona na Yehovha li ringiwile. Leswi nga yentxeka swi kombise ndlela leyi Davhida a nga tsandzeka hi yona ku byela Yehovha swikarhatu swa yena hi leswi a kalaka a nga yingisanga minawu ya yena. Indje leswo swi nga yentxeka ni ka hina? Hi tshame hi sola Yehovha hi mhaka ya swikarhatu leswi hi nga kumana na swona hileswi hi kalaka hi nga yingisanga minawu ya yena? — Swivuriso 19:3.
30 KA MAIO KU YA KA 5 KA JUNHO
XUMA XI NGA KA RITO LA XIKWEMBU | 2 SAMUWELE 7-8
“Yehovha A Yentxa Xipfumelelwanu Na Davhida”
Murindzi 01/04/10 paj. 20 par. 3
“Mfumu Wa Wena A Wu Nga Ta Tsekatsekisiwa”
Ku navela ka Davhida loku humaka mbilwini, ku mu khumbile Yehovha. Nkama Xikwembu xi nga hetisisa ku navela ka Davhida, xi yentxe xipfumelelwanu na Davhida xi vula swaku a ku ta humelela munhu wa lixaka la Davhida lweyi a a ta fuma hilani ku nga heliki. Natani a byele Davhida xitshembiso xa Xikwembu a ku: “Yindlo ya wena ni mfumu wa wena swi ta tshama nkama wa ku kala wu nga heli; xitshamu xa wena xa wuhosi xi ta tshama na xi tiyile hi nkama wa ku kala wu nga heli.” (Ndzimana 16) Se i mani lweyi a a ta hetisisa xipfumelelwanu lexi, a fuma hilani ku nga heliki? — Tipisalema 89:20, 29, 34-36.
Murindzi 01/04/10 paj. 20 par. 4
“Mfumu Wa Wena A Wu Nga Ta Tsekatsekisiwa”
Yesu wa Nazareta a a li ntukulu wa Davhida. Loko ntsumi yi tivise hi ku psaliwa ka Yesu yi te: “Yehovha Xikwembu a ta mu nyika xitshamu xa wuhosi xa papayi wa yena Davhida, a ta va Hosi ya ndjangu wa Yakobo hi masiku ni masiku, Mfumu wa yena wu ta fuma hi masiku ni masiku.” (Luka 1:32, 33) Xipfumelelwanu lexi Yehovha a nga xi yentxa na Davhida xi hetiseke ka Yesu Kreste. Hi mhaka leyo, Yesu a ngo fuma hileswi a nga langiwa hi vanhu, kambe a fuma hi mhaka ya xitshembiso xa Xikwembu lexi mu nyikaka mfanelo ya ku fuma hilani ku nga heliki. Hi fanele hi khumbuka swaku minkama hinkwayu switshembiso swa Xikwembu swa hetiseka. — Esaya 55:10, 11.
Murindzi 15/10/14 mapaj. 10-11 par. 14
Vanani Ni Lipfumelo La Ku Tiya Ka Mfumu Wa Xikwembu
Pimisa hi leswi Yehovha a nga swi tshembisa Hosi Davhida wa le Israyele wa khale hi ku tirhisa xipfumelelwanu xa Davhida. (Lerha 2 Samuwele 7:12, 16.) Yehovha a yentxe xipfumelelwanu lexi na Davhida hi nkama lowu Davhida a a fuma Jerusalema, a mu tshembisa swaku Mesiya a a ta va ntukulu wa yena. (Luk. 1:30-33) Hi nkama wolowo, Yehovha a nyikele rungula la ku kongoma leli a li kombisa ndjangu lowu Mesiya a a ta psaliwa ka wona a tlhela a vula leswaku lweyi a a ta hetisisa xipfumelelwanu lexi a nga xi yentxa na Davhida a a ta va ni mfanelo ya ku va Hosi ka Mfumu wa Mesiya. (Ezek. 21:25-27) Hi ku tirhisa Yesu, wuhosi la Davhida “li ta va kona hilani ku nga heliki.” Ku vula ntiyiso, vana va Davhida ‘va ta tshama va li kona amahlweni ka Yehovha ku fana ni dlambu.’ (Pis. 89:34-37) Mfumu wa Mesiya a wu nge tshuki wu va ni wukanganyisi naswona leswi wu nga ta swi yentxa swi ta tshama hilani ku nga heliki!
Lavetela Xuma Ka Rito La Xikwembu
Perspicaz vol. 2 paj. 1165 par. 1
Masiku Ya Wugamu
Wuprofeta la Balama. Na Vayisrayele va nga se nghena ka Tiko la Xitshembiso, Balama a byele Balaka hosi ya Mowabu a ku: “Tana ni ta ku byela leswi vanhu lava va nga ta swi yentxa ka vanhu va wena, ka nkama lowu taka. . . . Ku ta huma nyeleti ka Yakobo, ku ta huma nhonga ya wuhosi aIsrayele. Kunene u ta helisa Vamowabu ni tinhloko ta hinkwavu lava rhandzana nyimpi.” (Tin 24:14-17) Nkama ku nga hetiseka wuprofeta leli hi khambi la ku sungula, a “nyeleti” a yi nyimela Hosi Davhida, lweyi i nga yena a nga hlula Vamowabu. (2Sa 8:2) Naswona ka wuprofeta leli loko ku vulavuliwa hi “nkama lowu taka,” a ku vulavuliwa hi nkama lowu Davhida a a ta sungula ku fuma hi wona. Se leswi mfumu wa Davhida a wu fanekisela Mfumu wa Mesiya, wuprofeta leli li ta tlhela li hetiseka ka nkama lowu taka loko Yesu a ta helisa lava nyenyaka Xikwembu. — Esa 9:7; Ps 2:8, 9.
6 KU YA KA 12 KA JUNHO
XUMA XI NGA KA RITO LA XIKWEMBU | 2 SAMUWELE 9-10
“Davhida A Kombise Lirhandzu”
Murindzi 15/06/06 paj. 14 par. 6
Swi Nga Koteka Kuva Hi tshama Hi Tsakile
Davhida a tsale a ku: “Wa tsaka lweyi a pimiselaka wa xiyimo xa le hansi.” A tlhele a ku: “Yehovha a ta mu ponisa hi siku la khombo. Yehovha a ta mu ponisa, a mu hlayisa a hanya. A ta vuliwa lweyi a tsakeke.” (Tipisalema 41:1, 2) Leswi Davhida a a mu rhandzisa xiswona Mefiboxeti, n’wana wa Yonatani lweyi a a limalile, swi kombisa swaku swisiwana a swi li swa lisima ka yena. — 2 Samuwele 9:1-13.
Murindzi 15/05/05 paj. 17 par. 12
Tipontu Ta Lisima Ta Buku La Samuwele Wa Wumbirhi
9:1, 6, 7. Davhida a hetisise xitshembiso xa yena. Na hina hi fanele hi tikarhatela ku yentxa leswi hi swi tshembisaka.
Murindzi 15/02/02 paj. 14 par. 10
Va Tiyisele Swikarhatu Swa Swikulu
Loko se ku hundze malembe ya manyingi, Hosi Davhida a kombe Mefiboxete lirhandzu hileswi a a mu rhandza hintamu Yonatani. Davhida a mu nyike ndhawu hinkwayu leyi a yi li ya Sawulo a gama a byela Ziba lweyi a a li mutirhi wa Sawulo leswaku a yi hlayisa. Davhida a tlhele a byela Mefiboxete a ku: “U ta hamba u dla ka meza wa mina.” (2 Samuwele 9:6-10) Swa tikomba swaku Mefiboxete a tiyisiwile hi lirhandzu leli Davhida a nga mu komba lona naswona li mu pfune ku kala a nga karhateki hileswi a nga limala. Phela leyi i djondzo ya lisima swinene! Na hina hi fanele hi va komba lirhandzu lava kumanaka ni swikarhatu.
Lavetela Xuma Ka Rito La Xikwembu
Perspicaz vol. 1 paj. 291 par. 2
Malepfu
Ka matiko ya manyingi ya nkameni wa Vayisrayele, ku patsa na vona Vayisrayele, malepfu a ma yentxa vavanuna va hloniphiwa. Nawu lowu Xikwembu xi nga wu nyika Vayisrayele, a wu va tsimbisa ku tsemeta misisi leyi kumekaka xikarhi ka ndleve ni tihlo. (Lv 19:27; 21:5) Nawu wa Xikwembu a wu tsimbisa ku tsemeta misisi yoleyo hikusa a swi fambisana ni wugandzeli la mavunhwa.
13 KU YA KA 19 KA JUNHO
XUMA XI NGA KA RITO LA XIKWEMBU | 2 SAMUWELE 11-12
“U Nga Pfumeli Ku Fumiwa Hi Ku Navela Ku Yentxa Swa Ku Biha”
Murindzi 06/21 paj. 17 par. 10
U Nga Swi Kota Ku Hlula Mintlhamu Ya Sathana!
Yehovha a a yentxe swaku Hosi Davhida a ganya, a va ni ndhuma a tlhela a hlula loko a lwa ka tinyimpi ta tinyingi. Hambi yena Davhida a a yi khensa minkateko ya Yehovha naswona a a nga ta yi “kota ku yi rungulela hi ku tala ka yona.” (Pis. 40:5) Kambe ku navela ku va ni swilo swa swinyingi ku yentxe Davhida a nga ha tsaki hi leswi a a li na swona a tlhela a khohlwa hinkwaswu leswi Yehovha a nga mu nyika swona. Hambileswi a a ni vasati va vanyingi, a sungule ku navela Batixeba nsati wa Uriya, naswona hi mhaka ku navela ku va ni minchumu ya yinyingi, a game a famba masangu na yena naswona Batixeba a game a va ni nyimba. Leswi Davhida a nga swi yentxa a swi bihile, kambe a tlhele a yentxa swin’wana swa ku biha hintamu, ku nga ku yentxa swaku Uriya nuna wa Batixeba a dlayiwa. (2 Sam. 11:2-15) Davhida a a pimisa yini loko a yentxetela swilo leswi? Ku nga va leswaku a a pimisa swaku Yehovha a a nga swi voni? Phela Davhida lweyi a a tshembekile ka Yehovha a pfumele ku phasiwa hi ntlhamu wa ku lava ku va ni minchumu ya yinyingi. Se hi mhaka ya leswo, a humeleliwe hi minchumu ya ku biha. Kambe hi ku famba ka nkama Davhida a vule xidjoho xa yena a tlhela a tisola, naswona a tsake hintamu hileswi Yehovha a nga mu rivalela. — 2 Sam. 12:7-13.
Murindzi 09/19 mapaj. 17-18 par. 15
Tiveki Hansi U Tlhela U Yingisa Yehovha na Swi Suka Mbilwini
Yehovha anga vekanga Davhida leswaku a rhangela ndjangu wa yena ntsena, kambe a afanele a rhangela ni tiko hinkwalu la Israyele. Tani hi hosi, Davhida a ani wulawuli kambe minkama yin’wani aangali tirhisi kahle wulawuli la yena naswona a yendle swihoxo swa swikulu. (2 Sam. 11:14, 15) Hambileswo, a kombise kutiveka hansi ka Yehovha hi kupfumela kulayiwa hi yena. A khongele ka Yehovha amu byela leswi a atitwisa xiswona. Naswona a zame hilaha anga kotaka ha kona leswaku a yingisa Yehovha. (Pis. 51:1-4) Handle ka leswo, a tiveke hansi ivi a pfumela kulayiwa ni hi vavasati. (1 Sam. 19:11, 12; 25:32, 33) Davhida a djondze swotala ka swihoxo swa yena naswona a teke ntirho lowu aawu yendlela Yehovha wu li wa lisima hintamu ka yena.
Murindzi 06/18 paj. 16 par. 7
Pfumelela Minawu ni Matshinya ya Minawu ya Bibele Swi Kongomisa Lipfalu la Wena
A ku na xilaveko xova ni mavuyelo ya ku biha lama kumiwaka hi ku tshova minawu ya Xikwembu leswaku hi djondza leswi nga swinene kumbe leswi hoxeke. Bibele li tale hi swikombiso swa swihoxo leswi malandza ya Xikwembu ya khale maswi yendleke. Swikombiso leswi swi nga hi djondzisa. Swivuriso 1:5 yi li: “Munhu lweyi a tlhariheke wa yingisa ivi a yamukela djondzo leyi yengetelekeke”. Djondzo leyi yi ta hi ka Yehovha naswona a ku na yin’wana leyi nga ya ku yampsa ku tlula yona. Hi xikombiso, anakanya hi mavuyelo yo biha lawa Davhida a veke na wona hi mhaka ya leswi akalaka anga yingisanga Yehovha hi kumbuyeta na Batixeba. (2 Sam. 12:7-14) Loko u lerha rungula leli, tivutisi: ‘Xana Davhida ina a yendle yini leswaku a nga weliwi hi makhombo? Loko a nova ka xiyimo lexi fanaka, ina ni yendle yini? Xana a ni ta tikhoma hi ndlela leyi hoxeke hi tlhelo la masangu hilaha Davhida a yendleke ha kona kumbe anita tekelela xikombiso lexinene xa Yosefa?’ (Gen. 39:11-15) Loko hi yanakanyisisa kahle hi makhombo lawa hi nga welaka ka wona loko hi djoha, hi ta ya hi “venga [swilo] swa ku biha.”
Lavetela Xuma Ka Rito La Xikwembu
Perspicaz vol. 1 paj. 653 par. 3
Davhida
Yehovha a a swi vona swilo swa ku biha leswi a swi yentxiwa hi Davhida. Loko Yehovha a a yo pfumelela swaku timhaka leti ti yavanyisiwa hi munhu, Davhida na Batixeba a va ta va va dlayiwile hi ku landza Nawu wa Moxe, naswona leswi Batixeba a a ni nyimba, ni n’wana wa kona a a ta fa. (Dt 5:18; 22:22) Kambe leswi Yehovha a nga yavanyisa mhaka hi yexe, a mu twele wusiwana Davhida hi mhaka xipfumelelwanu xa Mfumu lexi a nga xi yentxa na yena. (2Sa 7:11-16) Phela Yehovha a yentxe leswo hikusa na yena Davhida a a ni ntwelawusiwana (1Sa 24:4-7; vona ni Yk 2:13) naswona a tisolile ka xidjoho lexi a nga xi yentxa. (Ps 51:1-4) Hambileswo, Yehovha a nga tshikanga ku va khatisa. A tirhise muprofeta Natani swaku a byela Davhida a ku: “Ni ta tisa khombo ka yindlo ya wena.” — 2Sa 12:1-12.
20 KU YA KA 26 KA JUNHO
XUMA XI NGA KA RITO LA XIKWEMBU | 2 SAMUWELE 13-14
“Ku Navela Ka Aminoni Ku Mu Yentxe A Wela Nghozini”
Perspicaz vol. 1 paj. 31 par. 3
Absalomu
Ku dlayiwa ka Aminoni. Leswi Tamari makwavu wa Absalomu a a sasekile, Aminoni makwavu wa vona a mu navelile. Aminoni a yentxe ingi o vabya, a tlhela a yentxa swaku Tamari a ya mu swekela kaya ka yena, a gama a mu pfinya. Loko se ku yentxeke leswo, a sungule ku mu nyenya a gama a mu hlongola. Se loko a li ndleleni, Tamari a sungule ku handzulela mpahla ya yena, leyi a yi kombisa swaku i n’wana wa hosi ni swaku a a nge se tshama a famba masangu, a tlhela a tichela nkuma ka nhloko. Kambe a tlhangane na Absolomu naswona yena a nga hlwelanga ku twisisa leswi Aminoni a a swi yentxe Tamari, hikusa a a swi tiva swaku a a mu tsakela. Absalomu a byele Tamari swaku a nga byeli munhu hi mhaka leyi, naswona a mu tekile swaku a ya tshama na yena kaya ka yena. — 2Sa 13:1-20.
Murindzi 09/17 paj. 5 par. 11
Djondza Ku Tikhoma
Bibele li vulavula hi swikombiso swa vanhu lava nga tsandzeka ku tikhoma ka timhaka ta masangu. Li tlhela li vulavula hi minchumu ya ku biha leyi nga va yentxekela hileswi va nga tsandzeka ku tikhoma. Loko na wena u kumane ni xiyimu lexi fanaka ni xa Kim, i swinene ku pimisa kahle hi leswi nga humelela djaha leli la ku kala li nga tlharihanga, leli ku vulavuliwaka hi lona ka Swivuriso ndzima 7. Naswona tlhela u pimisa hi leswi Aminoni a nga swi yentxa ni swilo swa ku biha leswi nga gama swi mu yentxekela. (2 Sam. 13:1, 2, 10-15, 28-32) Vapsali va nga pfuna vana va vona leswaku va djondza ku tikhoma va tlhela va va ni wutlharhi loko swi ta ka timhaka ta ku rhandzana, hi ku bula na vona hi swikombiso leswi nga ka Bibele ka wugandzeli la vona la ndjangu.
Perspicaz vol. 1 paj. 31 par. 6
Absalomu
Loko se ku hundze malembe mambirhi, hi nkama lowu tinyempfu a ti tsemetiwa mavoya, Absalomu a yentxe fexta aBali-Hazoro ku nga ndhawu leyi nga kusuhinyana ni Jerusalema naswona ka fexta lolelo a rhambe Davhida ni vana va yena. Kambe leswi Davhida a nga yala ku famba, Absalomu a sindzise swaku a rhumela Aminoni swaku a ya mu pfaleta. (Swiv 10:18) Nkama Aminoni a nga dakwa hi vhinyu, Absalomu a rhume vatirhi va yena swaku va mu dlaya. Vamakwavu va yena va tlhelele aJerusalema, se yena Absalomu a ye Gexura lomu a ku ni vhovho wa yena. (2Sa 13:23-38) A xipada lexi muprofeta Natani a nga profeta hi xona se a xi nghenile ka yindlo ya Davhida naswona a xi ta tama xi va kona hi masiku ni masiku. — 2Sa 12:10.
Lavetela Xuma Ka Rito La Xikwembu
Khindlimuka! 22/12/04 mapaj. 8-9
Ku Saseka Loku Nga Ka Lisima
Pimisa hi Absalomu, mun’we wa vana va Davhida. A a li wanuna lweyi a a nga rhandziwi hambileswi a a xongile. Bibele li vula leswi hi yena: “Ka tiko hinkwalu la Israyele, a ku nga na munhu lweyi a a khuzeliwa hi mhaka ya ku xonga ku fana na Absalomu. Ku sukela aminengeni ku ya fika ka nhloko, a a nga na xivati.” (2 Samuwele 14:25) Kambe leswi Absalomu a nga navela wuhosi la papayi wa yena swi yentxe swaku a mu djikela a mu tekela wuhosi hi nkanu. Naswona a tlhele a pfinya vasati va papayi wa yena. Hi mhaka leyo, Yehovha a mu kwatelile naswona a fe ku fana ni mbyana. — 2 Samuwele 15:10-14; 16:13-22; 17:14; 18:9, 15.
Ku nga va swaku wa mu rhandza Absalomu? Ihim! Phela a a nga rhandzeki. Ku xonga ka yena a ku swi kotanga ku tumbeta ku tibyela ni ku pfumala ka yena ku tshembeka kumbe ku sivela leswaku a nga lovisiwi. Bibele li tlhela li vulavula hi swikombiso swa vanhu va vanyingi va ku tlhariha, lava rhandzekaka kambe ku kalaka ku nga hlayiwi nchumu hi ku xonga ka vona. Ku vula ntiyiso, lexi a xi li xa lisima hintamu a ku li ku xonga ka vona ka le ndzeni.
27 KA JUNHO KU YA KA 3 KA JULHO
XUMA XI NGA KA RITO LA XIKWEMBU | 2 SAMUWELE 15-17
“Ku Tibyela Ku Yentxe Swaku Absalomu A Nga Yingisi”
Perspicaz vol. 2 paj. 692 par. 2
Vatsutsumi
A swi tolovelekile khale swaku vatsutsumi va rhangela phambeni ka movha wa wuhosi swaku va huwelela ku fika ka yona va tlhela va yi pfuna hi leswi yi swi lavaka. (1Sa 8:11) Absalomu na Adoniya na vona va yentxe leswi fanaka. Va veke 50 wa vatsutsumi phambeni ka vona, leswaku va ta khuzeliwa va tlhela va hloniphiwa. — 2Sa 15:1; 1Th 1:5; vona ni CORREDORES (BATEDORES) (hi Xiputukezi).
Murindzi 15/07/12 paj. 13 par. 5
Tirhela Xikwembu Lexi Nyikaka Nchunseko
Bibele yi ni swikombiso swa swinyingi swa vanhu lava a va xengetela van’wana swaku va yentxa swilo swa ku biha. Mun’wana wa vona i Absalomu n’wana wa Hosi Davhida. Absalomu a a xongile. Kambe ku fana na Sathana, hi ku famba ka nkama ku rhandza swilo swi mu yentxe a navela wuhosi la papayi wa yena hambileswi a li nga mu faneli. Se a tiyentxe ingi a rhandza vanhu van’wana a tlhela a vula hi ku gega swaku lava a va tirhela hosi a va nga na mhaka ni vanhu. Ku fana ni leswi Davulosi a nga swi yentxa ka ntanga wa Edeni, Absalomu a yentxe ingi a lava ku pfuna vanhu kambe hi nkama wolowo a a mu wonha vito papayi wa yena. — 2 Sam. 15:1-5.
Perspicaz vol. 1 paj. 1138 par. 1
Hebroni
Hi ku famba ka nkama Absalomu n’wana wa Davhida a ye aHebroni lomu a nga ya zama ku tekela papayi wa yena wuhosi, kambe a nga swi kotanga. (2Sa 15:7-10) Swi nga yentxeka Absalomu a lange doropa leli swaku a tekela papayi wa yena wuhosi hileswi a ku li doropa la lisima la Yuda leli a nga psaliwa ka lona. Hi ku famba ka nkama, Rehobuwama a tlhele a yaka doropa la Hebroni. (2Tk 11:5-10) Loko Vayuda va sukile awukaraweni aBabilona va tlhelela ka tiko la vona, van’wana va ye va ya yaka aHebroni (aKiriyati-Araba). — Neh 11:25.
Lavetela Xuma Ka Rito La Xikwembu
Murindzi 08/18 paj. 6 par. 11
Xana U Makholwa Hinkwaswu?
Minkama yin’wana hi nga ha kwata loko van’wana va hangalasa rungula hi hina leli nga liki ntiyiso hi ku helela. Leswi swi humelele Mefiboxete. Hi ku swi rhandza, Hosi Davhida a nyike Mefiboxete nsimu hinkwayu leyi a yi lumba kokwana wa yena Sawulo. (2 Sam. 9:6, 7) Kambe loko ku hundze nkama nyana, Davhida a twe rungula la ku biha hi Mefiboxete. Matshan’wini ya ku kambisisa kahle mhaka, a teke swilo hinkwaswu swa Mefiboxete a swi nyika munhu mun’wani. (2 Sam. 16:1-4) Davhida a game a swi tsumbula leswaku a yendle xihoxo lexikulu. Hikolaho, a tlhelisele Mefiboxete swin’wana swa leswi aswimu lumba. (2 Sam. 19:24-29) Loko Davhida a a ti nyike nkama wa ku kambisisa kahle mhaka, Mefiboxete ina a nga xanisekanga hi ndlela leyi a xanisekeke ha yona.