Mareferensiya Ya Xibukwana Xa Mintlhanganu Ya Mahanyelo Ni Ntirho
© 2023 Watch Tower Bible and Tract Society of Pennsylvania
4 KU YA KA 10 KA SETEMBRO
XUMA XI NGA KA RITO LA XIKWEMBU | ESTERE 1-2
“Tiveki Hansi Ku Fana Na Estere”
Murindzi 01/17 paj. 25 par. 11
Tiveki Hansi Minkama Hinkwayu
11 Minkama yin’wani swi nga ha karhata ku tiveka hansi loko van’wani va tshamela ku hi khensa hi swilo swaswinene leswi hi swi yendlaka kumbe swilo swaswinene leswi hi nga na swona. Vona xikombiso xa Estere. Yena a a li wansati wa ku xonga hintamu. A hosi ya Persiya a yi lava nsati mun’wani swaku a va hosi ya xisati. Estere a ve yin’we ya tintombhi ti nga langiwa swaku ti ya kombiwa hosi. Tintombhi leti hinkwatu ku ringana lembe, a ti nyikiwa swilo hinkwaswu swaku ti tisasekisa. Tintombhi letiyani a ti yendla hinkwaswu leswi ti nga swi kotaka swaku ti rhandziwa hi hosi. Kambe Estere a a hambanile na tona. Hambileswi vanhu va vanyingi a va swi vona swaku a xongile, a tame a tiveka hansi a tlhela a kombisa xihlonipho. Hambi hi nkama lowu a nga langiwa swaku a va hosi ya xisati a nga txintxanga, a tame a tiveka hansi. — Est. 2:9, 12, 15, 17.
Tekelela paj. 130 par. 15
A Nyimelele Vanhu Va Yehovha
15 A nkama a nga kombiwa ka hosi, Estere a vutisiwile swaku i ntxini lexi a a xi lava. Loko a a yo swi lava ina a kombele minchumu leyi a yi ta mu pfuna swaku a tama a xonga. Kambe a hi swona leswi Estere a nga swi kombela. Leswi a a tiveka hansi, a yo kombela ntsena leswi Hegayi a a mu byelile. (Est. 2:15) Hi mhaka muni a yendle leswo? Swi nga yendleka a a pimisa swaku leswi a swi ta khumba mbilu ya hosi a ku nga ta va ku xonga ka yena ntsena, kambe a ku ta va ku va yena a va munhu wa ku tiveka hansi.
Murindzi 01/17 paj. 25 par. 12
Tiveki Hansi Minkama Hinkwayu
12 Loko hi li vanhu va ku tiveka hansi, hi ta yambala hi tlhela hi yendla swilo hi ndlela leyi kombisaka swaku ha va hlonipha van’wani. Hi ta swi twisisa swaku leswi nga ta yendla vanhu va hi rhandza a hi ku va hi tshamela ku tibyela hi leswi hi kotaka ku swi yendla, kambe i ku va vanhu va ‘ku rhula hi tlhela hi vevuka.’ (Lerha 1 Pedru 3:3, 4; Yer. 9:23, 24) Loko hi pimisa swaku ha yampsa ku tlula vanhu van’wani, swoleswo swi ta tikomba ka leswi hi swi vulaka ni leswi hi swi yendlaka. Hi xikombiso, swi nga yendleka hi tshamela ku vulavula hi ndlela leyi kombisaka swaku hi ni mintirho ya ku hlawuleka kumbe swaku hi tiva timhaka leti nga xihundla, kumbe swaku hi vanghanu va vamakwerhu lava rhangelaka. Kumbe minkama yin’wani hambiloko hi pfuniwe hi van’wani swaku hi yendla xanchumu hi nga ha vulavula hi ndlela leyi kombisaka swaku hi swi yendle hoxe, ntsena swaku vanhu va hi khensa. Kambe tlhela u pimisa hi xikombiso xa Yesu. Yesu a a ta va a vulavule minchumu ya nhloko ya yena ntsena, kambe minkama yinyingi a a vulavula hi Matsalwa ya Xiheberu. A a yendla leswo hikusa a a tiveka hansi. Funtshi a a lava swaku vanhu va swi tiva swaku leswi a a swi vulavula a swi ta hi ka Yehovha. — Yoh. 8:28.
Lavetela Xuma Ka Rito La Xikwembu
Murindzi 11/22 paj. 31 mapar. 3-6
A Wu Swi Tiva?
[Tintivi] ti tsumbule swa ku tsaliwa hi Xipersa leswi vulavulaka hi Marduka (hi Xichangana Mordekayi). A ve adminixtradori naswona swi nga yendleka a a tirha ka tikonta aXuxani. Nkama lowu ku nga tsumbuliwa swa ku tsaliwa hi Xipersa, Arthur Ungnad ku nga ntivi yin’wani, yi hlaye swaku leli ku ve khambi la ku sungula lani vito leli nge Mordekayi li humelelaka kona ka ndhawu yin’wani handle ka Bibele.
Ku sukela ka leswi nga kumiwa hi Ungnad, tintivi tin’wani ti hundzuluxele swin’wani swa leswi nga tsaliwa hi Xipersa. Swin’wani swa swilo swa kona va swi kume ka maribye lawa a ma li ka doropa la Persepolis lama nga kumiwa a ndzeni ka marhumbi ya lani ku vekiwaka kona xuma akusuhi ni mimuru ya doropa. Maribye wolawo ma vulavula hi leswi nga yendleka ku sukela ka mfumu wa Xerxes I naswona leswi nga tsaliwa swi kumeka hi lirimi la Elami naswona swi ni mavito ya vanhu lava kumekaka ka buku la Estere.
Maribye yamanyingi lama nga kumiwa ka doropa la Persepolis ma vulavula hi Marduka, a nga tirha ka yindlo ya wuhosi aXuxani nkama a ku fuma Xerxes Wa Ku Sungula. Lin’we la maribye wolawo li vula swaku Marduka a a li muhundzuluxeli. Leswi ma swi vulaka swa twanana ni leswi Bibele li swi vulaka hi Mordekayi. Yena a a tirha ka yindlo ya hosi Ahasuwerusi (Xerxes Wa Ku Sungula) naswona a a vulavula tirimi timbirhi kumbe ku tlula. Minkama hinkwayu Mordekayi a a tshama axipfalwini xa yindlo ya wuhosi aXuxani. (Est. 2:19, 21; 3:3) Leyi a yi li ndhawu yayikulu leyi lava a va tirha ka yindlo ya wuhosi a va kumeka kona.
Ku ni ku yelana ka Marduka lweyi ku vulavuliwaka hi yena ka maribye na Mordekayi wa le Bibeleni. Havambirhi a va hanya hi nkama wun’we naswona a va yendla mintirho ya ku fana. Ku yelana loku, ku hi yendla hi swi vona swaku leswi vakambisisi va nga swi kuma swa yelana ni leswi nga tsaliwa ka buku la Estere.
11 KU YA KA 17 KA SETEMBRO
XUMA XI NGA KA RITO LA XIKWEMBU | ESTERE 3-5
“Pfuna Van’wani Swaku Va Fikelela Leswi Va Nga Kotaka Ku Swi Yendla”
Perspicaz vol. 2 paj. 412 par. 3
Mordekayi
A Yale Ku Khizama Phambheni Ka Hamani. Hosi Asuweru a veke Hamani lweyi wa Muagagi swaku a va primeiro ministro. Naswona a byele vanhu swaku a va fanele va khizama phambheni ka Hamani swaku va mu hlonipha. Mordekayi a nga pfumelanga ku yendla leswo, funtshi a hlaye swaku a a nga ta pfumela hileswi a a li Muyuda. (Est 3:1-4) Phela Mordekayi a a swi tiva swaku kuva a khizama phambheni ka Hamani a swi ta khumba wunghanu leli a a li na lona ni Xikwembu xa yena Yehovha. A a tlhela a swi tiva swaku ku khizama phambheni ka Hamani a swi ngo kombisa xihlonipho ku fana ni leswi Vayisrayele a va swi yendlisa xiswona ka nkama lowu a wu hundzile, kambe a swi ta va swi kombisa swaku o mu gandzela. (2Sa 14:4; 18:28; 1Th 1:16) Mordekayi a a ni xivangelo xa ku twala xa kuva a nga pfumeli ku khizama phambheni ka Hamani. Swi nga yendleka ku ve hileswi Hamani a a li Muamaleke naswona Yehovha a a vulile swaku a a ta lwisana ni Vaamaleke hi masiku ni masiku. (Eks 17:16; vona HAMANI.) Ka Mordekayi a mhaka liyani a yi ngo fambisana ni politika ntsena, kambe a yi khumba ku tshembeka ka yena ka Xikwembu.
Perspicaz vol. 2 paj. 412 par. 5
Mordekayi
A Tirhisiwile Swaku A Ponisa Vayisrayele. Leswi a ku humesiwe nawu lowu a wu vula swaku Vayuda hinkwavu a va fanele va helisiwa, Mordekayi a yendle swilo leswi nga kombisa swaku a a ni lipfumelo. Phela yena a a kholwa swaku kuva Estere a vekiwile swaku a va hosi ya xisati hi nkama lowuyani, hi leswaku a a ta tirhisiwa hi Yehovha swaku a ponisa Vayuda. Hi mhaka leyo, Mordekayi a vulavule na Estere hi swilo leswi a a fanele a swi yendla a tlhela a mu byela swaku a kombela hosi kuva yi va twela wusiwana Vayuda ni ku va pfuna. Hambileswi swi nga veka wutomi la yena nghozini, Estere a pfumelile ku swi yendla leswo. — Est 4:7–5:2.
Tekelela paj. 133 mapar. 22-23
A Nyimelele Vanhu Va Yehovha
22 Nkama Estere a nga twa mhaka yoleyo swi nga yendleka a chavile hintamu. Phela swoswi lipfumelo la yena a li ta ringiwa hintamu. Ndlela leyi Estere a nga hlamula Mordekayi hi yona yi kombisa swaku a a chava. Estere a khumbukise Mordekayi hi nawu lowu a wu vula swaku loko munhu a ya ka yindlo ya wuhosi na hosi yi nga mu vitananga, a a ta dlayiwa. Naswona munhu a a to tsetseleliwa ntsena loko hosi yi tlakusa nhonga ya yona ya woru. Ku nga va swaku Estere a a pimisa swaku hosi a yi ta mu tsetselela? Phela Estere a wa ha swi khumbuka kahle leswi nga yendlekela Vhaxiti hileswi a nga yala ku yingisa nawu wa hosi. Estere a byele Mordekayi swaku se a ku hundza 30 wa masiku na hosi yi nga mu vitananga. Ku va hosi leyi ya ku karhata yi hete nkama wa ku leha na yi nga mu vitananga Estere swi nga ha va swi yendle Estere a pimisa swaku hosi a yi nga ha na mhaka na yena. — Est. 4:9-11.
23 Mordekayi a tiyise lipfumelo la Estere. A mu tiyisekise swaku loko yena a nga yendli nchumu, Yehovha a a ta tirhisa munhu mun’wani swaku a ponisa Vayuda. A tlhele a mu byela swaku hambi hi yena a a nga ta pona loko a mfumu wu helisa Vayuda. Leswo swi kombisa swaku Mordekayi a a ni lipfumelo ka Yehovha, naswona a a tshemba swaku Yehovha a a nga ta pfumelela swaku vanhu va yena va helisiwa kumbe a nga hetisisi switshembiso swa Yena. (Yoxu. 23:14) Mordekayi a game a vutisa Estere a ku: “Swi tiviwa hi mani swaku Yehovha a ku pfumelele swaku u va hosi kuva u ponisa Vayuda ka mhaka leyi?” (Est. 4:12-14) Phela Mordekayi i xikombiso xaxinene xa ku hi xi tekelela hikusa a a mu tshemba hi ku helela Yehovha Xikwembu xa yena. Se hina ke, indjhe ha mu tshemba Yehovha? — Swi. 3:5, 6.
Lavetela Xuma Ka Rito La Xikwembu
Mfumu Wa Xikwembu paj. 160 par. 14
Ku Lwela Ku Gandzela Yehovha Na Hi Chunsekile
14 Ku fana na Estere na Mordekayi, vanhu va Yehovha namuntlha va yendla hinkwaswu va nga swi kotaka swaku va mu gandzela na va chunsekile hilani a nga vula hi kona. (Est. 4:13-16) Indjhe wena u nga pfunisa ka leswo? Ina. U nga khongela nkama ni nkama u khongelela vamakwerhu lava hluphekaka hi mhaka ya leswi mimfumu yi kalaka yi nga va pfumeleli swaku va gandzela Yehovha na va chunsekile. Swikhongelo swoleswo swi nga va pfuna hintamu vamakwerhu lava va kumanaka ni swikarhatu va tlhela va hluphiwa. (Lerha Yakobo 5:16.) Ku nga va swaku Yehovha wa swi yingisa swikhongelo swoleswo? Ina wa swi yingisa funtshi wa swi hlamula! Ha swi vona leswo hikusa hi kote ku hlula timhaka tinyingi amatribunali. — Heb. 13:18, 19.
18 KU YA KA 24 KA SETEMBRO
XUMA XI NGA KA RITO LA XIKWEMBU | ESTERE 6-8
“Leswi Hi Faneleke Hi Vulavulisa Xiswona”
Tekelela paj. 140 mapar. 15-16
A Yendle Swilo Hi Wutlharhi, Na A Nga Chavi Nchumu Swaku A Pfuna Van’wani
15 Leswi Estere a a lehisa mbilu ni leswi a nga tshika swaku siku li hundza na a nga se yendla xikombelo xa yena ka hosi, ku pfuleke nkama wa ku Hamani a titxelela hi yexe. Swi nga yendleka ku ve Yehovha lweyi a nga yendla swaku hosi yi heleliwa hi wurhongo. (Swi. 21:1) Se swa twala kuva Bibele li hi byela swaku hi fanele hi “lehisa mbilu”! (Lerha Mikiya 7:7.) Loko hi nyimela Yehovha, minkama yin’wani hi tsumbula swaku leswi yena a swi lulamisisaka xiswona swikarhatu swa hina swa yampsa hintamu ku tlula leswi hina a hi pimisa ku swi yendla.
A Vulavule Na A Nga Chavi Nchumu
16 Ka fexta la wumbirhi Estere a swi vonile swaku a swi lava a vulavula. Kambe a a ta vulavula nkama muni? Hosi hi yoxe yi mu nyike nkama wa kuva a vulavula hi ku tlhela yi mu vutisa swaku a ku li xini xikombelo xa yena. (Est. 7:2) A “nkama wa ku vulavula” se a wu fikile.
Tekelela paj. 140 par. 17
A Yendle Swilo Hi Wutlharhi, Na A Nga Chavi Nchumu Swaku A Pfuna Van’wani
17 Pimisa hi Estere na a khongela hi ndzeni ka mbilu, na a nga se vula marito lawa ma nge: “Loko hosi yi ni rhandza ni loko yi swi vona swi li kahle, ni kombela yi ni ponisa mina ni tiko la mina.” (Est. 7:3) Estere a kombise swaku a a hlonipha mavonelo ya hosi mayelana ni leswi a yi swi vona swi li swinene. Phela Estere a a hambanile na Vhaxiti, khale ka nsati wa hosi lweyi a a mu danisile hi maxivomu! (Est. 1:10-12) Estere a nga zanga a sola hosi hileswi yi nga tshemba Hamani. Ku hambana ni leswo, Estere a kombele swaku hosi yi mu vhikela hikusa wutomi la yena a li li nghozini.
Tekelela paj. 141 mapar. 18-19
A Yendle Swilo Hi Wutlharhi, Na A Nga Chavi Nchumu Swaku A Pfuna Van’wani
18 Xikombelo xa Estere xi yi hlamalise hintamu hosi. I mani lweyi a a ta veka wutomi la nsati wa hosi nghozini? Se Estere a tlhele a ku: “Hi xavisiwile, mina ni vanhu va tiko la mina, swaku hi helisiwa. Loko a hi yo xavisiwa swaku hi yendliwa swikarawa ntsena ina ni miyelile. Kambe leswi nga ta yendleka swi ta yendla swaku na yona hosi yi luzekeliwa.” (Est. 7:4) Estere a vulavule hi mhaka yoleyo hi ku kongoma, naswona a tlhele a vula swaku ina a miyelile loko yena ni vanhu va tiko la yena a va yo xavisiwa swaku va ya va swikarawa. Kambe leswi mhaka ya kona a yi ta tlhela yi yendla swaku hosi na yona yi luzekeliwa, a a ta titwa nandzu loko a a yo miyela.
19 Ka xikombiso xa Estere hi djondza nchumu xa lisima mayelana ni ku vulavula hi ndlela yayinene. Loko ku ni mhaka leyi u lavaka ku yi byela munhu lweyi u mu rhandzaka kumbe munhu lweyi a rhangelaka, ku lehisa mbilu, xihlonipho ni ku veka timhaka ti basa, swi nga ku pfuna hintamu swinene. — Swi. 16:21, 23.
Lavetela Xuma Ka Rito La Xikwembu
Murindzi 01/03/06 paj. 11 par. 1
Tipontu Ta Lisima Ta Buku La Estere
7:4 — Nkama Estere a nga vula swaku a ‘hosi a yi ta luzekeliwa’ a a lava ku vula yini? Nkama a nga vulavula hi ku va Vayuda va xavisiwa swaku va va swikarawa, Estere a a lava ku pfuna hosi ku vona swaku a yi ta luzekeliwa loko a yo pfumelela swaku Vayuda va helisiwa. A 10.000 wa titalenta ta prata leti Hamani a a tshembise ku ti nyikela ka xuma xa hosi, a ti nga li ta nchumu loko ti fanisiwa ni male leyi a yi ta kumiwa loko Vayuda a vo xavisiwa swaku va va swikarawa. Naswona ku helisiwa ka Vayuda a ku ta yendla swaku a hosi yi dlayeliwa nsati.
25 KA SETEMBRO KU YA KA 1 KA OUTUBRO
XUMA XI NGA KA RITO LA XIKWEMBU | ESTERE 9-10
“A Tirhise Xitshamu Lexi A A Li Na Xona Swaku A Pfuna Van’wani”
Perspicaz vol. 2 paj. 412 par. 8
Mordekayi
Mordekayi a pfalete Hamani ka ntirho wa ku va primeiro ministro, naswona hosi yi mu nyike aneli ya yona ya ku karimbara maphepha ya mfumu. Estere a veke Mordekayi swaku a vonelela yindlo leyi a yi li ya Hamani leyi hosi a yi mu nyikile. Naswona hi ku pfumeleliwa hi hosi, Mordekayi a humese nawu lowu a wu vula swaku Vayuda a va ni mfanelo ya kuva va tivhikela. Phela leswo swi yendle swaku Vayuda va tsaka hikusa a va swi vona swaku a va ta swi kota ku tilwela. Vanhu va vanyingi lava a va li hansi ka mfumu wa Persiya, va tipatse ni Vayuda. Naswona loko ku fike siku leli a ku ta lwiwa hi lona ku nga diya 13 ka wheti ya Adara, Vayuda a va tilunghiselelile swaku va lwa. Leswi Mordekayi a a li primeiro ministro, tihosi ta tinyingi ti va seketelile Vayuda. A Xuxani ku yengeseliwe siku lin’we swaku Vayuda va lwa. Leswo swi yendle swaku ku tlula 75.000 wa vanhu lava a va nyenya Vayuda lava a va li va mfumu wa Persiya, va dlayiwa, ku patsa ni 10 wa vana va Hamani. (Est 8:1–9:18) Loko Estere se a swi tiyisile, Mordekayi a vule swaku Vayuda a va fanele va hamba fexta leli a li hambiwa lembe ni lembe la “masiku ya Purimi,” lani a va ta tsaka va tlhela va dla ni ku tlhela va nyikana maprezenti ni ku pfuna swisiwana. Vayuda ni lava va nga tipatsa na vona va li yendlile fexta lolelo hi diya 14 ni 15 ka wheti ya Adara. Leswi Mordekayi a a li wa wumbirhi ka mfumu wa Persiya, a a hloniphiwa swinene hi Vayuda ku nga vanhu va Xikwembu, naswona a tame a tirha swaku va pfuneka. — Est 9:19-22, 27-32; 10:2, 3.
Perspicaz vol. 2 paj. 760 par. 5
Fexta La Purimi
Leswi a li tirhela swona. Vanhu van’wani va vula swaku a Fexta la Purimi ku nga fexta leli hambi hi namuntlha Vayuda va li kulungelaka, a li nga yelani ni swa ku gandzela Xikwembu. Kambe a ku li fexta la ku yelana ni mimfumu, leli minkama yinyingi a ku dliwa ku tlhela ku phuziwa ku tlula mpimu ka lona. Hambileswi va vulaka leswo ha swi tiva swaku leswo a hi ntiyiso naswona nkama li nga vekiwa nkameni wa kona wolowo a li nga tirheli leswo. Phela Mordekayi na Estere a va gandzela Yehovha Xikwembu, funtshi fexta leli a li vekiwe swaku ku dzunisiwa Yehovha. I Yehovha lweyi a nga ponisa Vayuda swaku va nga helisiwi, hikusa va za va lava ku helisiwa hi mhaka ya leswi Mordekayi a nga yala ku khizamela Hamani a vula swaku i Yehovha ntsena lweyi a faneleke a gandzeliwa. Hi mhaka muni Mordekayi a yalile? Swi nga yendleka hi mhaka ya leswi Hamani a a li Muamaleke wa tiko leli Yehovha a a li rhukile funtshi a a vule swaku a li fanele li helisiwa. Se leswi a a hlonipha nawu wa Yehovha a a nga ta za nikakutsongo a khizama a khizamela Hamani. (Est 3:2, 5; Eks 17:14-16) Marito lawa Mordekayi a nga ma byela Estere, (Est 4:14) ma komba swaku yena a a tshemba swaku ku ni munhu wa matimba ku tlula vanhu hinkwavu lweyi a a ta swi kota ku ponisa Vayuda. Funtshi a ku va Estere a rhange hi ku titsona swakudla na a nga se ya vulavula ni hosi a kombela swaku yi ponisa Vayuda, swi kombisa swaku na yena a a kombela ku pfuniwa hi Xikwembu. — Est 4:16.
Tshinela Ka Yehovha mapaj. 101-102 mapar. 12-13
Tekelelani Xikwembu Ka Leswi Mi Ma Tirhisisaka Xiswona Matimba Lawa Mi Nga Nyikiwa Wona
12 Yehovha a yendle swaku ku va ni vanhu lava rhangelaka mabandleni. (Vaheberu 13:17) Vavanuna volavo lava fanelekaka va fanele va tirhisa matimba lawa va nga nyikiwa wona hi Xikwembu leswaku va pfuna vamakwerhu bandleni va tlhela va yendla swaku vamakwerhu va titwa kahle. Indjhe leswo swi lava ku vula swaku madoda ma ni mfanelo ya ku fuma vamakwerhu? A swi vuli swona! Vavanuna lava a va fanelanga va tivona na va li va lisima ku tlula vamakwerhu lavan’wani, naswona va fanele va tiveka hansi nkama lowu va hetisisaka ntirho wa vona bandleni. (1 Pedru 5:2, 3) Bibele li vula swaku madoda ma fanele ‘ma risa bandla la Xikwembu leli xi nga li xava hi ngati ya N’wana wa xona.’ (Mintirho 20:28) Marito ya wugamu ya ndzimana leyi ma kombisa lisima la kuva madoda ma hlayisa mun’wani ni mun’wani abandleni hi lirhandzu.
13 Leswaku hi swi twisisa kahle leswo pimisa hi xikombiso lexi: A hi nge munghanu wa wena wamukulu a ku kombele swaku u mu hlayisela nchumu xa lisima hintamu. Wa swi tiva swaku munghanu wa wena a xi hakelele male ya yinyingi swinene nchumu xolexo. Ku tiva leswo swi nga ku yendla u xi hlayisa kahle swaku xi nga wonheki. Hi ku fana, Xikwembu xi nyike madoda ntirho wa ku hlayisa nchumu xa lisima hintamu swinene, ku nga bandla. Phela hinkwavu lava lumbaka bandla va fanisiwa ni tinyempfu. (Yohani 21:16, 17) Yehovha a vona tinyempfu ta yena na ti li ta lisima swinene lakakuva a ti xavile hi ngati ya lisima ya N’wana wa yena wa mun’we Yesu Kreste. Phela a ku na nchumu xa lisima ku tlula lexo lexi Yehovha a a ta va a xi yendlile swaku a ti xava. Madoda lawa ma tivekaka hansi a ma swi khohlwi leswo, naswona ma ti hlayisa hi lirhandzu tinyempfu ta Yehovha.
Lavetela Xuma Ka Rito La Xikwembu
Murindzi 01/03/06 paj. 11 par. 4
Tipontu Ta Lisima Ta Buku La Estere
9:10, 15, 16 — Hambileswi nawu a wu va pfumelela, hi mhaka muni Vayuda va nga tekanga swilo swa vanhu lava va nga va hlula nyimpini? Va yendle leswo hikusa xikongomelo xa vona a ku nga li ku ganya kambe a a li ku ponisa wutomi la vona.
2 KU YA KA 8 KA OUTUBRO
XUMA XI NGA KA RITO LA XIKWEMBU | YOBO 1-3
“Kombisa Swaku U Mu Rhandza Hintamu Yehovha”
Murindzi 02/18 paj. 6 mapar. 16-17
Tekelela Lipfumelo Ni Ku Yingisa Ka Nowa, Daniyele Na Yobo
16 Swikarhatu leswi Yobo a nga kumana na swona. Ka wutomi la yena, Yobo ku ni nkama lowu swilo swi nga mu fambela kahle ni nkama lowu swilo swi kalaka swi nga mu fambelanga kahle. Hi xikombiso, ku ve ni nkama lowu yena a “a hloniphiwa hintamu hi vanhu hinkwavu lava a va tshama ka tlhelo la le Wuxeni.” (Yobo 1:3) Naswona a a ganye hintamu a tlhela a tiviwa. (Yobo 29:7-16) Lexo a ku li xikarhatu hikusa swi nga yendleka a a ta va a pimise swaku yena wa yampsa ku tlula vanhu van’wanyani ni leswaku a nga lavi Xikwembu ka wutomi la yena. Kambe swoleswo a swi yendlekanga. Yehovha loko a vulavula hi Yobo, a te: “I munhu wa ku lulama a tlhela a tshembeka, lweyi a chavaka Xikwembu naswona a fambelaka kule ni swa ku biha.” — Yobo 1:8.
17 Kambe wutomi la Yobo li txintxile swa kola na kola. Yobo a luzekeliwe hi swilo hinkwaswu leswi a a li na swona. Funtshi a vaviseke hintamu a za a lava ni ku fa. Phela lexo a ku li xikarhatu xaxikulu. Ha swi tiva swaku ku ve Sathana lweyi a nga yendla swaku Yobo a humeleliwa hi swilo swoleswo hinkwaswu. Sathana a vule swaku Yobo a a tirhela Yehovha ntsena hileswi a a lava ku pfuneka. (Lerha Yobo 1:9, 10.) Yehovha a swi twile leswi Sathana a nga swi vula. Se, Yehovha a yendle yini? A pfumelele Yobo swaku a hlupheka kuva a kombisa swaku a a tshembeka hi mbilu hinkwayu, ku nga li hileswi a a lava swilo ka yena.
Tshama U Tshembekile ka Yehovha!
10 Xana u katsekisa kuyini ka mhaka leyi Sathana ayi pfuxeke loko a ringa Yobo? Phela Sathana a vula leswaku wena awumu rhandzi Yehovha, uta tshika kumu tirhela leswaku u hanyela kurhandza ka wena ni leswaku awungata tshama u tshembekile ka yena. (Yobo 2:4, 5; Nhla. 12:10) U titwisa kuyini hi swihehlo leswo? Swaku vavisa, ahi swona? Kambe pimisa hi leswi: Yehovha aku tshemba hintamu la kakuva a pfumelela Sathana aku ringa leswaku uta va ni mukhandlu wa kukomba kutshembeka ka wena ka yena. Waswi tiva leswaku utaswi kota kutshama u tshembekile ivi u kombisa leswaku Sathana i muhembi. Handle ka leswo, a tshembisa leswaku ataku pfuna. (Hev. 13:6) Xana aswiku tsakisi kutiva leswaku Xikwembu Lexi Tlakukeke ka wuyako hinkwalu xaku tshemba? Ha tiyiseka leswaku swaku tsakisa. Se waswi vona leswaku hayini swi li swa lisima kutshama hi tshembekile ka Yehovha? Kutshembeka ka hina kuswi veka rivaleni leswaku Sathana i muhembi. Kutlhela kukombisa leswaku hi seketela vito ni wuhosi la B’ava wa hina Yehovha. Se xivutiso hi lexi: I yini leswi hingaswi yendlaka akuva kutshembeka ka hina kutshama kutiyile?
Lavetela Xuma Ka Rito La Xikwembu
Hi Nga Djondza Yini Ka Marito Ya Yesu Ya Wugamu?
9 I yini leswi Yesu a nga swi vula? Nkama lowu Yesu a a li kusuhi ni ku fa, a te: “Xikwembu xanga, Xikwembu xanga, u ni tshikele yini?” (Mat. 27:46) Bibele a li hi byeli swaku i yini xi nga yentxa Yesu a vula marito lawa. Kambe, vona leswi hi nga swi djondzaka ka marito lawa. Loko Yesu a vule marito lawa, a a hetisisa wuprofeta leli kumekaka ka Tipisalema 22:1. Marito lawa, ma kombisa swaku Yehovha a a nga vekanga “xisirhelelo” ka N’wana wa yena. (Yobo 1:10) Yesu a a swi twisisa swaku Papayi wa yena a pfumeleli lava na va mu nyenya swaku va mu hlupha. Phela a nga kona lweyi a nga ringiwa hi tindlela toleto. Marito lawa Yesu a nga ma vula ma tlhela ma kombisa swaku a a nga faneliwi hi lifu hikusa a a nga dlanga xa munhu.
9 KU YA KA 15 KA OUTUBRO
XUMA XI NGA KA RITO LA XIKWEMBU | YOBO 4-5
“Tivoneli Ka Mahungu Ya Ku Kala Ma Nga Li Ntiyiso”
Perspicaz vol. 1 paj. 793 par. 2
Elifazi
2. Mun’we wa vanghanu vanharhu va Yobo. (Yb 2:11) Leswi a a li Mutemani, swi nga yendleka a a li ntukulu wa Elifazi, ku nga n’wana wa matevula wa Esawu ni nsati wa Mukanana. Leswi vulaka swaku a a li ntukulu wa Abrahamu a tlhela a va xaka la le kule la Yobo. Yena a a tibyela hi leswaku a a ni wutlharhi. (Yr 49:7) Ka vanghanu vanharhu va Yobo lava va nga mu tiyisa, Elifazi a a tivona na a li yena wa lisima. Se kumbexana a a li yena wamukulu ku va tlula. Handle ka leswo, hi yena a nga rhanga a vulavula naswona a vulavule hintamu ku tlula lavan’wani vambirhi.
Murindzi 15/09/05 paj. 26 par. 2
Fambela Kule Ni Mapimiselo Ya Ku Biha!
Loko a khumbuka nchumu xa ku kala xi nga tolovelekanga, lexi xi nga tshama xi mu yendlekela, Elifazi a te: “Ku hundze moya ka kara la mina; misisi ya mina yi nyima. Wu fika wu nyima wu nga fambi, kambe a ni nga swi koti ku twisisa swaku wu tshamise ku yini. A ku ni ndzhuti aphambheni ka mina; se ku ku whii, ni gama ni twa rito”. (Yobo 4:15, 16) I mani lweyi a nga kutxetela mapimiselo ya Elifazi? Leswi a nga gama a swi vula swi kombisa swaku a ku nga li tintsumi ta ku lulama ta Xikwembu. (Yobo 4:17, 18) A ku li ntsumi ya ku biha. Loko a ku nga li ntsumi ya ku biha, Yehovha a a nga ta va a mu layile Elifazi ni vanghanu va yena vambirhi hileswi va nga hemba. (Yobo 42:7) A hi kanakani swaku Elifazi a a kutxeteliwa hi dimoni hikusa leswi a nga swi vula swi kombise swaku a ni mapimiselo ya ku biha.
Murindzi 15/02/10 paj. 19 mapar. 5-6
U Nga Xengiwi Hi Mavunhwa Ya Sathana
Sathana a tirhise Elifazi (mun’we wa vanghanu vanharhu va Yobo) lava va nga mu pfuxela leswaku a kombisa swaku a vanhu a hi va nchumu. Loko a vulavula hi vanhu, Elifazi a byele Yobo a ku: “Lava tshamaka ka tiyindlo ta ku yendliwa hi madaka, lava va nga yendliwa hi wuthulu, lava va helisiwaka hi ku vevuka ku fana ni loko ku helisiwa phaphalati, va pfotloseliwa magamu ku sukela nimixo ku ya fika nimadlambu, va helisiwa magamu naswona a ku na lweyi a nga ni mhaka na swona.” — Yobo 4:19, 20.
Ka tindzimana tin’wani aBibeleni hi fanisiwa ni “timbita ta vumba”. (2 Kor. 4:7) Hi fanisiwa na tona hileswi hi kalaka hi nga hetisekanga ni leswi hi nga ni xidjoho. (Rom. 5:12) Hi mhaka leyo, hina hoxe a hi nge swi koti ku hlula mintlhamu ya Sathana. Kambe leswi hi nga Vakreste a hi hoxe. Hambileswi hi kalaka hi nga na matimba ya manyingi hi va lisima ka Yehovha. (Esa. 43:4) Naswona Yehovha a nyika moya wa yena wa ku kwetsima mun’wani ni mun’wani lweyi a mu kombelaka. (Luk. 11:13) Se moya wa yena wa ku kwetsima wu nga hi nyika “matimba ya makulu lama tlulaka hinkwaswu” swaku hi kota ku lwisana ni mindzingo ya Sathana. (2 Kor. 4:7; Filp. 4:13) Se loko hi va ni lipfumelo la ku tiya, Sathana a ta hi baleka naswona Yehovha a ta hi pfuna swaku hi tama hi nyima na hi tiyile. (1 Ped. 5:8-10) Hi mhaka leyo, a hi na xivangelo xa ku chava Davulosi.
Tinhlokomhaka ta site N.o 32 mapar. 13-17
Leswi Hi Nga Swi Yendlaka Swaku Hi Tivhikela Ka Mavunhwa
● Kambela mhaka ya kona ni lomu yi taka hi kona
Bibele li li: “Kambisisani swilo hinkwaswu.” — 1 Vatesalonika 5:21.
Na hi nge se kholwa ka nchumu lexi hi xi twaka kumbe hi xi lerhaka, funtshi na hi nge se xi posela van’wani, i swa lisima ku va hi rhanga hi tiyiseka swaku mpelampela swoleswiyani i ntiyiso kumbe a hi ntiyiso. Hambiloko mhaka ya kona yi hangalasiwa hi tikomponi tinyingi ta mahungu, i swa lisima ku yendla leswo. Se hi nga swi yendlisa ku yini?
Tiyiseka swaku lomu mhaka yi taka hi kona i ndhawu ya ku tshembeka. Phela makanali man’wani ya ku hangalasa mahungu kumbe mintlawa yin’wani yi nga ha txintxanyana minchumu swaku yi seketela mavonelo ya vona kumbe yi seketela mavonelo man’wani ya politika. Se i swa lisima ku va ku sungula u rhanga hi ku kambela swaku mahungu lawa ma ta hi kwini naswona lomu ma taka hi kona i ndhawu ya ku tshembeka ke. Minkama yin’wani vanghanu, hambiloko va nga swi yendli hi maxivomu, va nga hangalasa mavunhwa hi ma email kumbe ma redes sociais. Se u nga kholwi xin’wani ni xin’wani u xi twaka na u nga rhanganga hi ku kambela swaku xi ta hi kwini.
Kambela masiku, tindhawu ni vanhu lava ku vulavuliwaka hi vona swaku u tiyiseka swaku mpelampela leswi hlayiwaka i ntiyiso. Funtshi tivoneli ka mahungu lawayani ya ku ma tikomba na ma karhata ku ma twisisa kambe na ma tlhamuseliwa hi ndlela ya ku vevuka hintamu swinene. U nga ma kholwi na u nga rhanganga hi ku ma kambela. Tivoneli ka mahungu man’wani lawa loko ma hangalasiwa vanhu va hantlaka va khumbeka hi wona, va ma tsakela kumbe va nga ma tsakeli.
Lavetela Xuma Ka Rito La Xikwembu
Murindzi 15/05/03 paj. 22 mapar. 5-6
Nyima U Tiyile U Hlula Ka Mpalisanu Wa Wutomi
Ku va hi lumba ndjangu wa misava hinkwayu wa vamakwerhu swi nga hi tiyisa swinene. Phela i nkateko wukulu ku va hi lumba nhlengeletanu leyi ya misava hinkwayu! (1 Pedru 2:17) Funtshi hina hi nga va tiyisa hintamu vamakwerhu.
Pimisa hi swilo swaswinene leswi Yobo, wanuna lweyi a a lulamile a nga swi yendla. Hambi hi munghanu wa yena Elifazi, lweyi a a fanele a mu tiyisa kambe a nga mu tshova hi marito a boheke ku pfumela a ku: “Marito ya wena ma pfuxe lweyi a nga wa; naswona u tiyise matsolo lawa ma gudlagudlaka.” (Yobo 4:4) Hi nga yendla yini swaku hi tekelela Yobo? Mun’wani ni mun’wani wa hina a ni ntirho wa ku pfuna vamakwerhu swaku va tama va tiyisela nkama lowu va tirhelaka Xikwembu. Nkama lowu hi tirhisanaka na vona swi nga va swinene loko hi yendla leswi vuliwaka ka ndzimana leyi: “Tiyisani lava va nga hela matimba, mi tiyisa ni matsolo lama gudlagudlaka.” (Esaya 35:3) Se swi ngo yini u tinyimisela ku tiyisa makwerhu mun’we kumbe vambirhi loko u kumana na vona? (Vaheberu 10:24, 25) Marito ya ku tiyisa, ya ku va khensa hi minzamu leyi va tamaka va yi yendla swaku va tsakisa Yehovha, ma nga va pfuna swaku va nyima va tiyile, va hlula ka mpalisanu wa wutomi.
16 KU YA KA 22 KA OUTUBRO
XUMA XI NGA KA RITO LA XIKWEMBU | YOBO 6-7
“Loko U Nga Ha Swi Gwenti Swikarhatu Swa Wena”
Murindzi 15/03/06 paj. 14 par. 10
Tipontu Ta Lisima Ta Buku La Yobo
7:1; 14:14 — Yobo a a lava ku vula yini hi marito lama nge “ntirho wa ku sindzisiwa”? Ku vava loku Yobo a a ku twa a ku li kukulu lakaku a fananise wutomi ni ntirho wa ku sindzisiwa kumbe wa ku karhata hintamu. (Yobo 10:17) Hi ku fana, leswi nkama lowu munhu a wu hetaka na a file na a nyimela ku pfuxiwa, ku nga nkama lowu swi kalaka swi nga koteki swaku munhu a wu baleka, Yobo a fananise nkama wolowo ni ntirho wa ku sindzisiwa.
“Yehovha . . . Wa Va Ponisa Lava Pfotlokeke Mbilu”
MINKAMA yin’wana hi nga ha hela ntamu hi ku vona swaku hi hanya malembe ya matsongo naswona wutomi “li tale hi swikarhatu.” (Yobo 14:1) Leswo a swi hlamalisi hikusa vanhu van’wana lava a va tirhela Yehovha ka minkama ya khale, na vona a va titwisa xileswo funtshi van’wana a va navela ni ku fa. (1 Tiho. 19:2-4; Yobo 3:1-3, 11; 7:15, 16) Kambe minkama hinkwayu Yehovha a a va pfuna a tlhela a va nyika ntamu. Leswi swi nga va yentxekela swi tsaliwile swaku swi ta hi pfuna. — Rhom. 15:4.
Khindlimuka! 01/12 mapaj. 16-17
U Tshama U Pimisa Ku Tisunga?
U nga ha pimisa swaku a ku na ndlela ya ku lunghisa xikarhatu lexi u kumanaka na xona, kambe khumbuka swaku a wu wexe ni leswaku vanhu vanyingi amisaveni na vona va kumana ni swikarhatu. Bibele li li: “Hinkwaswu leswi Xikwembu xi nga swi yentxa swa ha tama swi konya swi tlhela swi vaviseka ku ta fikela swoswi.” (Varoma 8:22) I ntiyiso swaku minkama yin’wani swi nga ha tikomba ingi a ku na ndlela ya ku huma ka swikarhatu leswi u kumanaka na swona, kambe hi ku famba ka nkama swilo swi nga ha yampsa. Kambe, na swi nge se yampsa, i mpsini swi nga ku pfunaka?
Pfula xifuva xa wena ka munghanu lweyi u mu tshembaka. Bibele li li: “Munghanu wa ntiyiso a kombisa lirhandzu minkama hinkwayu naswona i makwenu wa ntiyiso loko u ni swikarhatu.” (Swivuriso 17:17) Yobo, wanuna wa ku tshembeka lweyi Bibele li vulavulaka hi yena, a vulavule hi ndlela leyi a a titwa hi yona nkama a nga kumana ni swikarhatu swa ku tika swinene. Nkama a a peziwa hi swikarhatu a tlhela a vona swi yampsa swaku a fa a te: “Ni ta hlaya leswi swi ni karhataka. Ni ta vulavula hi mhaka ya leswi ni twaka ku vava!” (Yobo 10:1) Ku va hi byela van’wani hi ndlela leyi hi titwaka hi yona, swi nga pumba ku vilela swi tlhela swi hi yendla hi vona swikarhatu leswi hi kumanaka na swona hi ndlela yin’wani.
Chulula mbilu ya wena ka Xikwembu hi xikhongelo. Ka van’wani, ku khongela a swi sizi nchumu. Hi ku ya hi vona swo va ka tinhloko ta lava khongelaka swaku xikhongelo xi va pfunile kambe a xi va pfuni. Kambe leswi Bibele li swi vulaka swi hambanile. Tipisalema 65:2 li vula swaku Yehovha Xikwembu i “Mutwi wa xikhongelo” naswona buku la 1 Pedru 5:7 li vula leswi: “[Xikwembu] xa mi hlayisa.” Minkama yinyingi, Bibele li vulavula hi lisima la ku tshemba Xikwembu. Hi xikombiso:
“Tshemba Yehovha hi mbilu ya wena hinkwayu, u nga tshembi ku twisisa ka wena. Mu tivisi tindlela ta wena hinkwatu, kutani yena a ta lulamisa tindlela ta wena.” — SWIVURISO 3:5, 6.
“[Yehovha] a yenelisa ku navela ka lava va mu chavaka, wa va twa loko va rila va kombela ku pfuniwa, kutani wa va lamulela.” — TIPISALEMA 145:19.
“Ha tshemba swaku Xikwembu xa hi twa loko hi kombela xin’wana ni xin’wana lexi fambisanaka ni ku rhandza ka xona.” — 1 YOHANI 5:14.
“Yehovha a kule ni vanhu lava yendlaka swa ku biha, kambe a twa swikhongelo swa lava yendlaka swa ku lulama.” — SWIVURISO 15:29.
Loko u byela Xikwembu hi swikarhatu leswi u kumanaka na swona, xi ta ku pfuna. Phela hi leswo swi yendlaka swaku Bibele li hi kutxa ku va ‘hi xi tshemba minkama hinkwayu’ hi tlhela hi xi ‘byela leswi nga timbilwini ta hina.’ — Tipisalema 62:8.
Lavetela Xuma Ka Rito La Xikwembu
Murindzi 04/20 paj. 16 par. 10
Tekelela Yehovha loko U Hanyisana ni Vamakwerhu
10 Hinga tekelela Yehovha hi kuva hiva twisisa vamakwerhu. Lwela kuva tiva kahle vamakwerhu. Bula na vona amintlhanganwini na yingase sungula ni loko yi hela. Famba na vona kuchumayeleni. Loko swi koteka va rhambi leswaku miya dla swin’we. Loko u yendla leswo, uta tsumbula swaku vamakwerhu lava u pimisaka swaku va ni mona, ahi swona, vo va ni tingana ntsena. Lava a wu pimisa swaku va rhandza male, a va tsonani, lava xwelaka mintlhanganwini, swova karhatela kusuka kaya hi leswi va kanetiwaka. (Yobo 6:29) Hambi leswo, ahi lavi kuva “vahlevi” lava fambaka va vulavula timhaka ta van’wana. (1 Tim. 5:13) Hambi leswo, leswaku hiva twisisa kahle vamakwerhu, i swinene kutiva swiyimu swa vona ni leswinga tshama swiva humelela.
23 KU YA KA 29 KA OUTUBRO
XUMA XI NGA KA RITO LA XIKWEMBU | YOBO 8-10
“Lirhandzu La Xikwembu La Hi Vhikela Ka Mavunhwa Ya Sathana”
Murindzi 01/07/15 paj. 12 par. 3
Swi Nga Koteka Ku Hi Tsakisa Xikwembu?
Yobo a kumane ni swikarhatu swa ku tika swinene lakakuva a pimisa swaku yena a a nga fanelanga hi ku va a kumana ni swikarhatu swoleswo. Phela Yobo a fikelele magamu ya leswaku Xikwembu a xi nga na mhaka na yena hambi a tshembeka ka xona kumbe nada. (Yobo 9:20-22) Yobo a a tiyiseka swaku yena i munhu wamunene lakakuva leswi a nga swi vula swi kombise swaku yena i munene ku tlula Xikwembu. — Yobo 32:1, 2; 35:1, 2.
Lirhandzu La Yehovha Li Hi Pfunisa Ku Yini?
14 Lirhandzu la Yehovha la hi vhikela ka swilo leswi nga wonhaka wunghanu la hina na yena. Loko Davhida a khongele ka Yehovha a te: “U ndhawu ya mina ya ku tumbela ka yona, u ta ni hlayisa ka swikarhatu. U ta yentxa swaku ku biwa minkulungwana hikusa u ni ponisile. . . . Lweyi a tshembaka Yehovha, a vhikeliwa hi lirhandzu.” (Pis. 32:7, 10) Ka minkama ya Bibele, mimuru leyi a yi rhendzela madoropa a yi vhikela vanhu lava a va tshama ka madoropa wolawo. Se, lirhandzu la Yehovha la ntiyiso li fana ni muru lowu hi vhikelaka ka swilo leswi nga wonhaka wunghanu la hina na yena naswona lirhandzu lolelo li hi yentxa hi va kusuhi na Yehovha. — Yer. 31:3.
Lavetela Xuma Ka Rito La Xikwembu
Murindzi 15/10/10 mapaj. 6-7 mapar. 19-20
“I Mani Lweyi A Nga Tivaka Mimpimiso Ya Yehovha?”
19 Hi djondza yini hi “mimpimiso ya Yehovha”? Hi fanele hi pfumelela swaku a Rito la Xikwembu li txintxa mavonelo ya hina hi mimpimiso ya Yehovha. A hi fanelanga hi yavanyisa Yehovha hi ku ya hi leswi hina hi swi vonisaka xiswona. Yobo a hlaye leswi: “Xikwembu a xi fani ni munhu swaku hi xi hlamula kumbe ku va hi famba na xona atribunali swaku xi ya thethisiwa.” (Yobo 9:32) Phela ku fana na Yobo, a nkama lowu hi yaka hi yi twisisa mimpimiso ya Yehovha, hi ta susumeteleka ku vula marito lama nge: “Vonani! Leswi kova swiphemunyana swa tindlela ta xona, leswi hi nga swi twa hi yena kova ku hleveteliwa ntsena! Kutani i mani lweyi a nga twisisaka ku dzindza ka tilu ka xona loku nga ni matimba!” — Yobo 26:14.
20 Se hi ta ku yini, loko nkama lowu hi lerhaka Bibele hi kumana ni ndzimana leyi hi kalaka hi nga yi twisisi kahle, ngopfungopfu loko yi yelana ni leswi Yehovha a swi vonisaka swona swilo? Hi to kambela mhaka, leswaku hi lavetela nhlamulu. Kambe loko hi kambela, hi kambela hi tlhela hi kambela kambe nhlamulu ya kona yi nga twali, hi fanele hi khumbuka swaku a hi swilo hinkwaswu leswi Yehovha a swi yendlaka leswi hi nga ta swi twisisa. Hi ku tiveka hansi hi fanele hi pfumela swaku ku ni swin’wanyani leswi hi nga ta kala hi nga swi twisisi funtshi loko hi kumana na swona hi fanele hi kombisa swaku ha mu tshemba Yehovha funtshi ha li tshemba wumunhu la yena. (Ekl. 11:5) Loko hi yendla leswo, hi ta kombisa swaku ha twanana ni marito ya mupostolo Pawulo lama nge: “Hi nga vona ku tala ka minkateko, wutlharhi ni wutivi la Xikwembu! Wuyavanyisi ni tindlela ta xona a swi lavisiseki! Hikusa ‘i mani lweyi a tivaka mimpimiso ya Yehovha, kumbe i mani lweyi a nga va mutsundzuxi wa yena ke?’ Kumbe ‘i mani lweyi a nga rhanga a mu nyika xanchumu, swaku Yena a fela ku mu tlhelisela ke?’ Hikusa swilo hinkwaswu i swa yena, swi yentxiwe hi yena naswona swi ve kona hi mhaka ya yena. A a dzunisiwi hi masiku ni masiku. Amen.” — Rom. 11:33-36.
30 KA OUTUBRO KU YA KA 5 KA NOVEMBRO
XUMA XI NGA KA RITO LA XIKWEMBU | YOBO 11-12
“Tindlela Tinharhu Ta Ku Kuma Wutlharhi Hi Tlhela Hi Pfuneka Hi Lona”
Murindzi 15/04/09 paj. 6 par. 17
Yobo A Dzunise Yehovha
17 I ntxini xi nga pfuna Yobo swaku a tshembeka? A hi kanakani swaku na a nge se kumana ni swikarhatu, Yobo a a ni wunghanu lalikulu na Yehovha. Hambileswi ku kalaka ku nga na lexi kombisaka swaku Yobo a a swi tiva swaku Sathana a a djikele Yehovha, a a tinyimiselile ku tama a tshembeka. A te: “A ni nge tshiki ku tshembeka, anze ni fa!” (Yobo 27:5) I mpsini swi nga pfuna Yobo swaku a va ni wunghanu la ku tiya na Yehovha? A hi kanakani swaku Yobo a a swi nyika lisima leswi a nga swi twa mayelana ni ndlela leyi Xikwembu xi nga tirhisana hi yona na Abrahamu, Izaki na Yakobe, ku nga maxaka ya yena ya le kule. Naswona nkama lowu Yobo a a vona swilo leswi Yehovha a nga swi yendla, a djondze swa swinyingi hi wumunhu la yena. — Lerha Yobo 12:7-9, 13, 16.
Murindzi 06/21 paj. 10 mapar. 10-12
Minkama Hinkwayu Yehovha A Na Wena
10 Yentxa wunghanu ni vamakwerhu. U nga djondza swa swinyingi loko u yentxa wunghanu ni vamakwerhu abandleni, swi nga na mhaka swaku i vakulu kumbe i vatsongo kumbe va ta hi ka tindhawu tin’wana. Bibele li hi byela swaku hi nga kuma wutlharhi ka “vanhu vavakulu.” (Yobo 12:12) Kambe hambi vanhu vavakulu va nga djondza swa swinyingi ka majovhem ya bandleni. Davhida a ve munghanu wa mukulu wa Yonatani hambileswi a a li mutsongo hintamu ka yena. (1 Sam. 18:1) Hi wumbirhi ka vona va pfunanile swaku va tama va tirhela Yehovha hambi va kumana ni swikarhatu. (1 Sam. 23:16-18) Makwerhu Irina, lweyi a nga yexe ka ntiyiso ka ndjangu wa yena, a li: “Phela vamakwerhu va hina va fana ni ndjangu wa hina, naswona Yehovha a tirhisa vona swaku va va ndjangu lowu hi wu lavaka.”
11 Ku yentxa wunghanu ni vamakwerhu swi nga ha karhata, ngopfungopfu loko u li ni tingana. Makwerhu Ratna, lweyi a nga ni tingana naswona a nga djondza ntiyiso hambi loko swi mu karhatela, a li: “Ni swi vonile swaku a ni lava ku pfuniwa hi vamakwerhu abandleni.” Minkama yin’wana swi nga hi karhatela ku byela van’wana leswi hi titwisa xiswona, kambe leswaku hi yentxa wunghanu ni munhu mun’wana hi fanele hi bula na yena. Se leswaku vamakwerhu va hi pfuna hi fanele hi va byela leswi hi titwisaka xiswona leswaku va hi tiyisa ni ku tiva leswi va nga hi pfunisaka xiswona.
12 Xin’wana lexi nga hi pfunaka ku yentxa wunghanu ni vamakwerhu i ku chumayela na vona. Carol, lweyi se hi nga bula hi yena, a vula leswi: “Ku heta nkama wa wunyingi ni vamakwerhu ka ntirho wa ku chumayela ni mintirho yin’wana ya nhlengeletanu swi ni pfunile ku yentxa wunghanu la linene ni vamakwerhu. Hi ku famba ka nkama Yehovha a tirhise vanghanu volavo swaku a ni pfuna.” Minkama hinkwayu i swinene ku yentxa wunghanu ni vamakwerhu va ku tshembeka, hikusa Yehovha a tirhisa vona swaku va hi tiyisa loko hi titwa na hi li hoxe. — Swi. 17:17.
Perspicaz vol. 2 paj. 886 par. 4
Wutlharhi
Wutlharhi la Xikwembu. A wutlharhi la ntiyiso lo va na Yehovha Xikwembu ntsena hikusa hi yena a tivaka swilo hinkwaswu. (Rm 16:27; Nhl 7:12) A wutivi i ku twisisa leswi swilo swi nga tshamisa xiswona. Naswona leswi Yehovha Xikwembu a nga yena Muvumbi funtshi a nga kona “hi masiku ni masiku” (Ps 90:1, 2), a tiva swilo hinkwaswu mayelana ni matilo ni misava, ndlela leyi swi nga vumbiwa hi yona, leswi swi nga kona amatilweni ni misaveni, ni lomu swi sukelaka kona ku ta fikela namuntlha. Hambi hi minawu leyi vanhu va yi tirhisaka swaku va kambela swilo ni ku tlhela va yendla swilo swin’wanyani, hinkwayu yi vumbiwe hi Yehovha naswona loko a yi nga li kona a va nga ta swi kota ku yendla nchumu. (Yb 38:34-38; Ps 104:24; Swi 3:19; Yr 10:12, 13) Se, leswi swi hi pfuna ku vona swaku a minawu ya mahanyelo ya Xikwembu ya pfuna swinene swaku hi va ni wutomi la kahle, hi teka swiboho swa kahle hi tlhela hi hanya kahle. (Dt 32:4-6; vona YEHOVHA [Xikwembu xa minawu yayinene].) A xi kona lexi Yehovha a kalaka a nga xi twisisi. (Esa 40:13, 14) Hambileswi minkama yin’wani Yehovha a pfumelelaka swaku swilo swi yendleka na swi nga landzi minawu ya yena, ka nkama lowu taka ku rhandza ka yena ku ta yendleka. Naswona leswi a nga swi vula swi ta hetiseka. — Esa 55:8-11; 46:9-11.
Lavetela Xuma Ka Rito La Xikwembu
Murindzi 01/08/08 paj. 11 par. 5
Ku Bula Ni Majovhem
▪ ‘Ku nga va swaku na swi twisisa leswi vanhu van’wani va lavaka ku swi vula?’ Yobo 12:11 yi li: “Indjhe ndleve a yi ringi marito ku fana ni lirimi li ringaka swakudla?” Swoswi i nkama wa leswaku ‘u ringa’ leswi n’wana wa wena a swi vulaka. Phela vana va namuntlha va nga ha vula swilo kuve va lava ku hlaya swin’wani. Hi xikombiso, n’wana wa wena a nga ha vula swa ku fana ni leswi: “Wena minkama hinkwayu u vulavula na mina ingi no va xin’wanani!” kumbe a ku: “Wena a wu ni yingisi!” Se handle ka kuva u kwetlembetana ni n’wana wa wena hi leswaku leswi a swi vulaka a hi ntiyiso, zama ku twisisa swaku leswi a swi vulaka swi nga ha lava ku vula swin’wani. Hi xikombiso, loko a ku: “Wena minkama hinkwayu u vulavula na mina ingi no va xin’wanani,” a nga ha lava ku vula swaku: “Ni pimisa swaku wena a wu ni tshembi.” Naswona loko a ku “Wena a wu ni yingisi,” a nga ha lava ku vula swaku “no lava ku ku byela swaku ni titwisa ku yini.” Se zama ku twisisa leswi van’wani va lavaka ku swi vula hi marito lawa va ma tirhisaka.